《بَــــتَــــلْ》


ھَرکس وتی بھتءِ مھمان اِنت"

ھُشتر کہ شوم بیت(پیربیت)'چراگاهءِ دیر بیت.
هورا گْوارگی نہ اِنت
نیمون گوریچ ءِکنت"

یکّے چُلّ ءَ کن ئے 'دو در کیت!"

اِشتاپیں کاراں پاد ماں پلاراں مان اڑیت"

دُزّ ھما اِنت کہ سَرشَپءَ،جتی ءُ برتے"

اسپ ھزاری کُرّگے کار ایت نہ شُدیت' بلے مُرگ پہ ھیکے مُلکےءَ پہ سَر زیر ایت"

بانکلینکے پُلّ ءُ ھُشترءِ ھِرّ ماں ماتءِ لاپءَ مست بنت "

چوْر کہ مست بیت، پہ پَٹءٰ بالاد بیت"

دروگءِ بُن ٹُنگ اِنت"

پہ براتءَ دپءَ چوٹ مہ کن "

وام بزور بلے پہ داتِن"

ھَرکس زانتءُ کاسگی'بلُّک زانتءُ نواسگی"

ھما دست ءَ بوپس کہ ترا واب کیت"

تین وتءَ نہ گند ایت تاپگءَ شگان جنت!"

جم بیت انت میرءُ مزار' وْٹِش نہ رسیت پہ یک ھزار"

جنگلءِ شیرءُ پلنگان کپتگ انت ' آ دَجُک جنگاور انت"

چاتءَ مہ جن پہ بْرات ءَ وت کپے چات ءَ "

دستے کہ پہ وت مَبیت چہ بُن ءُ بَگَلءَ بِسدیت(ھُشک بات)"

رِندان بدے کُرت دُزّان گلے کُرت"

وت گلاه ءِ دپ پیمازءِ بوه ءَ کنت"

سیوی دور اِنت پہ لُنکہ ءِ موش ءَ"

هورا پیسر آپشون بہ جن"

هور نہ گوار اَنت ساچان اِش وش اَنت"

میش ءَ پہ لاگری دور مہ دئے بْرات ءَ پہ واری"
سیت گوں شکلیں جنگان اِنت"

وتی کُشیت روچ ءِ سرا دور نہ دنت"

ماں دپ ءَ جنگانی بٹاک وش اَنت
بْرات هما اَنت سکّیاں بیان"


شوھازکار.نواب واهگ

@Labzank
telegram.me/Labzank

دلپدردی

بلوچی زبان کلمکار واجه اکبال هاشمیءِ ماما واجه عبدالرحیم بیرانیءَ ما سک دلپدردیں ءُ آئی کهول ءِ گماں برابر شریکداریں ءُ واجه هُداءِ گورا دوا لوٹیں که هُدامرزیءَ وتی گنجیں رهمتانی ساهگءَ جاگہ بدنت -

گمانی شریدار : لبزانکی مجلس کلمتی کاروان ریمدان
@Labzank
telegram.me/Labzank

کلمت ..................الی جان مہر کُلانچی

گوادر بُنگپتگ کپتگ انـت انگر کلمت ءَ
همّل ءَ چے رَند شاگ نه بنت ننگر کلمت ءَ

جزماں ریکبارءِ سینگءَ چِست بنت بادگیر
بدواه ، پاداں چو مان اَڑنت ڈنگر کلمـت ءَ

اِسپیهاک تامورچَنڈی موتک کاریت سَننّڈی
گزدان ءِ ڈکّ ءَ بندیت کئے سنگر کلمـت ءَ

سیاه گراں رپتگ انت،چداں دیرانت مالدار
بزگر ! کئے زُوریت سَمّڑ ءُ شَنگر کلمـت ءَ

مہر پشومانی ءَ وتی نوں ما چے گُشیں
بلوچ په سُوریں ماهیگے لنگر کلمـت ءَ

@Labzank
telegram.me/Labzank

.....🌹🌹عطا شاد🌹🌹.....

واجہ محمد اسحاق (عطا شاد) ۱۹۴۰ءِ سالءَ سنگانی سر(کیچ)ءَ ودی بوت آئیءَ وتی بنداتی وانگ چـہ گورنمنٹ ہائی سکول تربتءَ ونتءُ در برت میـٹرک ۱۹۵۶ءِ سـالءَ چـہ گورنمنٹ ہائی سکول چتـکانءَ پنجـگورءَ پـاس کُت..ایف اے ۱۹۵۹ءِ سالء َءُ بی اے ۱۹۶۲ءِ سالءَ چـہ گورنمنٹ ڈگـری کالج کوئٹہءَ سرجم کُت ۱۹۶۴ءِ سالءَ چـہ پنجاپءِ یونیورسٹی لاہورءَ ایم اے پاس کُت واجہءَ وتی کارءِ بندات چـہ ریڈیوءَ جارچین،پروڈ یوسرءُ ڈرامہ نویسءِ حیثیتءَ بنا کُت..آئیءِ یک خاصیـں پروگرامے لشکوسک مشھـور بوت ۱۹۶۹ءِ سالءَ آ انفارمیشن آفیسر جوڈ بوتءُ واجہ عطا شادءَ چہ حکومتءِ نیمگءَ بازیں ایوارڈ ھم رستگ
محمد اسحاق عطاشادءَ بلوچیءُ اردوءِ مستـریںءُ نامدارتریں شائرانی تـہءَ ھساب بیت آئیءُ پاکستانءُ ڈنّی ملکـاں بووکیـں شئری دیوانانی تـہءَ بلوچستانءِ نمایندگی کُتـگ اے تکءَ آئیءَ انگلینڈ،امریکہ،کینیڈا،ایران،سعودی عرب،بحرینءُ دگہ بازیں ملکاں بووکیـں دیوانانی تہءَ بھــر زرتگ
واجہ عطا شاد چـہ حکومتءَ بـگر داں زندءِ آخری وھدءُ پاساں بلوچی شائریءُ لبزانکءِ اولی سرپءَ گون اَت آ نوکیـں بلوچی شائریءِ سروک زانگ بیت کہ گوں خاصیـں اسٹا ئلءَ بلوچی شائریءِ رنگءُ دروشم ے بدل کتگ کہ بلوچی شائریءَ را اید گہ دیما شتگیـں زبانانی سرپءَ آورتءُ اوشتار ینت یے
آئیءَ ماں بلوچیءُ اردوءَ بازیں کتاب یے نویستگ کہ آیانی نام بلوچی اردو لغت،بلوچی نامہ،دریـن،جوان سال،ہفت زبانانی لغت،گشیـن،سنگاب،شپ سحاراندیم،روچ گر،قفس رنگءُ بلوچی گیدی شائریءِ اردو رجانک اِنت
عطا شادءِ شائریءِ سرا چمشانکے دیگ بہ بیت آئی شائری المءَ چـہ ایدگہ بازیں شائراں جتائیں رنگ ئے داریت عطا شاد یک تخلیقی ازم کاریے اَت آ چـہ میان استمانی لبزانکی چِستءُ ایرانی سرپدیءَ ابید چہ وتی چاگردی جاورءُ عہدی شائریءِ تبءُ روایت آں چہ ھم شریءَ سر پد اَت پمیشکہ آئی شائری عہدیءُ چاگردی میلءُ تبءِ شریءَ شونداریءَ کـن اَنت بلوچی شائریءِ پـڑءَ دستونکءُ آزات لچہءِ روایتءِ دیما برگءَ آئیءَ نـہ ایوک سوگہیـں تہـرے ٹاھینتگ بلکنءَ جتائیـں بستارے ھم دارایت آئیءَ مـاں بلوچی شائریءَ اوّلی بہـرءَ بلوچستانءَ کارمرز بووکیـں تہر تہرین لبزءُ گالوارانءَ وتی شائریءَ کارمرز کُتـگ ابید چہ ایشیءَ چہرءُ شبیـنءُ چیـدگءُ تلمیع ھانی کارمرز کنگءَ ھم آ را مزنیـں دست رس ئے است اِنت
آئیءَ مـاں وتی شائریءَ تچکءُ سادگیـں لبزانی بدلءَ رمزءُ اشارہاں چـہ کار گپتـگ آئیءَ نوکیـں دورءِ شئری لوٹانی ردءَ بازیں جاگہ ئے ءَ وت گـڑیں چیدگءُ چہـرءُ شبیـن ھم سازئتگ کـہ وانوکانءَ پہ ایشانی پہـمگ کمیـں گرانءُ مشکل کپ ایت بلے اے ماں بلوچی شائریءَ نوکیـں تجربت ئے نہ اِنت بلکن ایشیءَ پیـش بازیں شائرئےءَ ءُ ھاسیـں صورتءَ ملّا پازلءَ وتی شائریءِ تہـا
رمزءُ اشارہ کار مرز کُتگ اَنت پـہ درورءَ عطا شادءِ گال یے ...

مکءَ را مسـک مہ گُش جورءَ آسمی نہ گشنت

چـراغءِ شپـکدگءَ روچءِ ھـاکــمـی نـہ گُشنت

بُنکی صورتءَ عطاءِ شائری مزن پہـناداِنت کہ آئیءِ بنکی سبب آئی دپتـر زانتیءُ راجی شعورءِ پہــتگی اِنت پمیـشکہ مارا آئیءِ شائریءِ بلوچ زندماں ویلءُ ڈکھانی اھوال رسیت عطا یک مارشتی ازم کاریے برے ھاترا وھدے کـہ وتی چاگردءِ اڑءُ جنجالاں گنـد اِیت تـہ آئیءِ دل پیـچءُ تاب وارتءُ وتی دلءِ پاہاراں ماں شائریءِ درانگاز کنت ھنـچش کہ آئی گالبندے

کدی بلیت منی آجوئیءِ دلءِ دریا
اے موجءِ آھریءَ ماہءِ دروریءَنکنت

عطا شائریءَ زیبائیءِ مارشت وتی ساچستی توانءَ پدّر اِنت آ ھیالانی ماں شائریءَ کمائنگءَ کمال دارانت آ ھیالءُ مارشتاں ماں شائریءَ ھنچـش کمائینت کہ گمان ھیمـش بیت کہ آ گماہی ذاتءَ بندوک انت
آئیءِ شائریءِ تہـا ھمنکـس اثر است اِنت کہ بے جانیـں چیزانی تہـا ھم جان مان کیت اِنت پمیشکہ ما گشت کناں کہ ھستین صورتءَ آئیءِ شائری پہ ازمءُ ھنر کاریءُ پہ بُن گپءُ ھیال وتی جتائیں بستاریے داریتءُ آئی شائری وتی ھمے جتائیں پجّارءِ المی ابدمان اِنت ھنـچش کہ اے شئرءَ چہ پدّر اِنت

سد برءَ زھراناں وراں انگت زندگاں
تئ زھر وارتگ زنگیں مرکاں کن انت

عطا شاد کہ ۱۳فروری ۱۹۹۷ءَ دلئِ دورہءِ سوبءَ اے کوڑھیـں دگنیاءَ یلہ داتءُ شت بلے آئیءِ شائری نمیران اِنت

پٹءُ پول:گہـرام بلوچ

شنگ کار: لبزانکی مجلس کلمتی کاروان
@Labzank
telegram.me/Labzank

آزمانک............. آ شُت ........... ستار سنّی
آئیءَ گُشت من رواں کار کناں ، گشئے دلءَ آسے لگّت دلءَ گشت دنیاءِ تها مستریں نامرد مناں که منی جنین سئے چُکءِ مات انت گشیت رواں کار کناں گشتوں چیا کار کنئے منی دستءُ پاد سلامت انت بیستءُ دو سالءَ فوجءَ کار کتگ ءُ پنشن رسگءَ انت لوگ بستگءُ وتیگ انت لوگءِ پشت بستگءُ کِراءَ داتگ من ٹیکسی کار کناںءُ چُکانی لاپءَ کشّاں تو کار چیا کنئے مئے زند شریءِ سرا گوزگءَ انت دنیاءَ مردم چے بارت گوں دو وال کپن اِزّتءِ سرا لوگءَ نشتگ ئے چُکّاں رودینئے کس تی نامءَ نہ گریت ، شرتر نہ انت - بلے جنینءِ کار کنگ گناهے وَ نہ انت باز کسءِ جَنءُ جنین چُک کارءَ انت ، بچار شیرجانءِ جَنکءَ مرچی وزیرءِ کِرّءَ کارءَ انت سئے تَبَکءِ لوگے زُرتگءُ پتءَ داتگ پتءَ کہ ٹیکسی یے گون بیتگ پراڈوءَ سوارانت ءُ مزنیں باگے زُرتگ ئے باگءِ تها دو لینڈکروزرءُ دو تَبَکءِ لوگے بستگ ئے مئے کلاسءَ وانگءَ بیتگ کلاسءِ نابودتریں جَنِک همے بیتگ چیزے نہ زانتگ ئے منءَ جُست ئے کُتگ مرچی لکّانی بانُک انت ، من پہ ریالےءَ تئی چمداراں شانزده ونتگ ءُ تئی چُکّاں رودیناں جاگهےءَ رو گیگ بیت تئی مِنّتءَ بگراں ، تو ده رندا مورکاں مُجینئے نی برئے - من باز برداشت کتگ تئی لوگءَ ، نوں بل رواں کار کناں آ هونڈا کمپنیءَ کارءَ انت مُلیباری بنگالی عرب زنجباری بلوچ پنچاپی مردین آئی هم کار انت آ یکیں جنین انت کہ ایشانی تہا کارءَ انت - منی جانءَ هما وهدءَ مُور پِر رتکنت که آ ، زنجباری ٹی یـے ءَ آورتءُ منی لوگءِ دپءَ ایر کُت - جُست اوں کُت کہ کئے انت گُشت ئے مئے کِرّءَ کارءَ اِنت - سئے ماهءَ رند آئیءَ گاڑی یے چه هونڈا کمپنیءَ وام کُت نی آ وت روگءُ آئیگءَ اِنت آئیءَ منی زلورت نہ انت هر جاه دل ئے گشیت رؤتءُ کئیت - بلے من چوره بوتاں من هچ جاگہ شُت نہ کناں سئے چُک انت آئیءَمنی سرا دؤر دات انت ءُ کارءَ لَگّئت ، چُک کسان انت یل دئیگ نہ بنت - نوں من زالانءُ آ منی مَرد انت هچ گُشگ نہ بیت هبرے کناں دپءَ پچ لگوشیت منی ورگءَ پاد کیت ، شپءِ نیمءَ گار انت ءُ وهدے جُست ئے کناں گُشیت مات لوگایاں من چو پُرشتگیں پیرمردےءَ گوں چُکّاں لوگءَ کپتگاں آئیءَ هچ سُدّءُ سما نیست نہ گُشئے من آ پانزده سالءَ لاپ داتگءُ آئیءِ مَرداں آئیءَ منی هچ پِکر نیست انت نئے چُکّانی گم آئیءَ درست بـے هیال کتگ اتنت - ایوک میک اپ ءُ کارءُ شپ گاری یات اَت - نی منءَ گشیت تو باز هبر کنئے منی سوناں بدئے ، من بلاهیں ردی یے کتگ گوں تو سُور کتگ کسانیءَ چُک پیداگ کُتک - وتی زِند برباد کتگ ، اگن سُور نہ کُتگ ات من کُجا شُتءُ سر بوتاں - من پانزده سال انت کہ تئی جیلءَ بیتگاں نوکی در آتکگاں آ زاتاں ، دنیایے گنداں تئی لوگءِ نندگءَ منءَ چہ رست ات ، تئی شِکلءِ چارگءَ نی من دَم بُرتگ منءَ بِلّ که رواں هُدا یکے کہ منی سوناں بدئے - آئیءَ زور چہ منءَ وتی سون گپت انتءُ سئے چُکءِ زندگی برباد کتءُ شُت - ہو '' آ '' شُت -

شنگ کار : لبزانکی مجلس کلمتی کاروان

@Labzank
telegram.me/Labzank

🌾🌾🌾🌾🌾🌾🌾🌾🌾🌾🌾🌾
‌ 🔹اگر کسی می خواهد
به تنهایی به بهشت برود
انسان خوب و بی آزاری است،
ولی کشت و کشتار
و آزار و اذیت مردم از جایی
شروع می شود،
که یک مشت احمق می خواهند
به جز خودشان
بقیه را هم با خود به بهشت ببرند!


ماهاتما_گاندی. ☘☘☘☘☘☘☘
بلوچی

🔹اگں کسے بہ لوٹ ایت
ایوکءَ بھشتءَ برو
آ یک شَرّ ءُ وش دلیں انسان ئے
بلے کُشت ءُ کوش
دردءُ دورئے دئیگ مردمءِ
ھما وھدءَ بندات بیت
کہ لھتے نابزانت لوٹ اَنت
ابید چہ وتءَ
دگے لھتے ھم وتی پَجّیگءَ بھشتءَ بہ براں

@Labzank
telegram.me/Labzank

اگاں بیتءُ بہ بیت بلے دام منی آپءَ انت
شر وتا پارسایے بکن رازے دلءِ لاپءَ انت

دائـم در کپتگ ءُ وتا بانور کُتگ !!!
مرچاں جند تئی چیر ءُ سریگ تئی تاپءَ انت

کادربکش کادر

@Labzank
telegram.me/Labzank

.....🌹🌹مُپتیـــں ھــرچ🌹🌹....

یـک ملکےءَ ھست اَت بادشاھے،بادشاہ سکّیـں نیکیـںءُ رھم دلیں بادشاھے اَت ..بادشـاہءَ لھــتیں کاردار ھـست اَت کـہ سکّیـں مُپت ھـرچ اِت اَنت کاردارانی مُپتیــں ھرچـاں بادشاہ سـک پـریشان اَت یـک روچے بادشـاہءَ چارءُ بچار کُـت کـہ چـوں بکنـاں کـہ کاردار شـر بـہ بنت..بادشاہءَ یکّءُ دو روچ جیــڑگءَ پـد ایشانی نـان کُتءُ گُــشت کـہ مـرچی بـیا اِت شُمئــے نـان اِنت دراھیـں کارداراں ورگءِ وھـد کُـتءُ اتک اَنت بازیـں وھـد گوزگءَ پـد ایشـاں سُک سُک کُـت مـاں گُــژنگ اِیـں ورگاں دیـر کُـت ھمـے سُـک سکـاں بادشاہءَ شاھی بُرچی ھُکـم دات کـہ ورگـاں بیار اِت مہمـانءُ کاردارانی دل وش بوت کہ مئے واستـہ وڑ وڑیـں ورگ جوڑ کنـگ بوتگ... ورگ کـہ آرگ بـوت اَنت کارداراں چار اِت دانکـہ اے تیـوگءَ گـرمیــں چنـا انت کاردار سـک شُدیک اِت اَنت ھیــران بوت اَنت کـہ چـوں بکن ایں لاپ ھـالیگ اِنت پُـر کـنگی اِنت ایشـاں دلءِ میـلءَ چنـا وارتءُ لاپ سیـر کُـت بادشاہءَ پدا ھُکـم دات کـہ ورگاں بیـاراِت وھدے کـہ شاھی ورگ آرگ بـوت اَنت لہـتیں دپارءَ پـد کـسّءَ دسـت ھـوں نـہ جـت اَنت چیـا کـہ آھـاں پیـسرءَ لاپ سیـر کُـتگ اَت بادشـاہءَ درسانـاں دیـم پـہ دیـم کُـتءُ گُشـت کـہ شُمـا کمّے ورگءَ وتـی گُــژنءَ بُـرت کـن اِت بلـے شُمـا مُپتیــں ھـرچ کـن اِتءُ زرّاں مُپـتءِ ھُـدا گـوازین اِت وتـی دولـتءَ شـرّیـں کارےءِ واستـا ھـرچ بکـن اِت شمـا چنـا ھـم دلءِ سیــرا وارتءُ لاپ پُـر کُـت بلـے شـرّیـں ورگانی ورگءَ پـشت کـپت اِت کاردارانی سـر چـہ ھجالتیءَ جھـل بوتءُ گُشـت اِش کـہ مارا پہـل کـن نـوں تـو ھـرچی کـہ گُشے ما ھمـا وڈ کـن ایں

پٹءُ پـول:نـزیر جان بلوچ
نبشـتہ کنـوک:گھــرام بلوچ
کتـــــــاب: درونـت
شنگ کار:لبزانکی مجلس کلمتی کاروان
@Labzank
telegram.me/Labzank

اِلم گِهتر اِنت یا مال (ثروت)؟؟

اے یک انچیں جُستءِ چہ هرکسءَ کنگ بہ بیت پہ هِچ مَهتلی ڈارِک گُشیت اِلم ، بلے منی نزّا توانایءِ اِلم پہ هِچ کسءَ چِیر نہ انت من اِلم اَرزِش نہ مَنّوک هم نیاں بلے پہ دِلجَمی گُشاں اگاں مال (ثروت) مہ بیت اِلم پہ آسانی دست نئیت ، بازیں نودربرءِ هستیں کہ پہ مال نیستیءِ سببءَ دَپتِر ءُ کَلم .... زیرگءَ چہ اِلم گران بهایں هستیءَ زِبهر بنت ،
بازیں کسءِ نادراه جاهانی تها کپتگ پہ یک کسانیں دِرّءُ دوچ ( عَمل جرّاحی)ءَ وتی ساهءَ چہ دست دیگ انت ، اے دُرست مارا پیش دار اَنت که هر دوئیں وتی جاه ءَ شَرّانت ءُ اهترام لایک انت -

✍ قادربخش کلمتـی

@Labzank
telegram.me/Labzank

پِشّیءُ شاعر......................رهیم دشتی

پِشّی شُتگ هوش تئی سرءِ
تـو شاعر ءِ شام ءَ ورئے
پِشّی بروتاں چَنگ مکن
چمّاں چو بُرزءَ درنگ مکن
رؤت یک قلم یـے وام کنت
شاعر ترا بَنّام کنت
پِشّی مہ کپ گوں شاعراں
اے رپکءُ هُنر ءَ ماهرانت
جاتوگءُ زنڈیں ساهرانت
علمءِ پڑءَ نام آورانت
روچـے کپئے گوں مَٹّے ءَ
لِٹّک سدیت گوں لٹّے ءَ
بیت لالیءِ چکّانی سور
رندءَ گڈا تو بئے مُلور
کار بستگ ئے گونڈیں عقل
پِشّی گڈا بیتگ پشل
زاناں سرءِ هوش اوں شُتگ
اے چونیں کارے من کُتگ
یک شاعرے همشام کُتگ
منا شاعرءَ بنّام کتگ
بسّ انت منا گوں شاعراں
من دگہ پرے گوشاں گراں
شاعر توام دیوانگ انت
گُپتارءُ گالاں زانگ انت
شاعر وتی جیڑنت دلءَ
ریچنت گُشئے زرّءُ تلاه
پر بستگ گالے دشتیءَ
من دیستگ مدام شپ گشتیءَ

@Labzank
telegram.me/Labzank

دُرّیں گپتار : هیتلر
رجانک : ادبی هکیم
آ اَرسے کہ پروش وَرَگ ءَ رَند بہ رِچ ایت اِے هَما هِیداِنت کہ سوبمَندی ءِ وَهد ءَ ریچَگ نہ بوُتگ.

@Labzank
telegram.me/Labzank

زبانـی جار گشت بر اسم ء ھو ھو

بسے زکـر ء الھـی گُپت کـو کـو

اَجـل شـد آن ابوجھـل ءِ ستمگـر

بہ کول ءُ وادھاں بر گشتگ ازھار

محمـد سـاھری تـو دارد بسیار

نبی گُپت برو تو اے جھل ء منکر

لھـین ء لھـنت للہ ء ستمـگـــر

شُد سجیـن جھنم جاہ ء تو نـار

منـم یک بنـدھے عیسـی گنھکار

دوئیـں دستاں براں ھاجت تلبـکار

بخـواری ءُ ھـلل مـا را نـگاہ دار

بـہ ھـک احمـد محمـود ءُ مھتـار.
🌴 کـــــورُشـــــیں گــــال 🌴
لبـزانکـی مجلـس کلمتـی کـاروان 🌴

چار بند.........................کریم تہل

زُلم ءِ پولنگ ماں جہان ءَ ، نئے کدی وژنام بیت
گر مسیح بیت یا مُسلمان ، گر جہود بـے تام بیت

هر کہ آساں جمبوراں بیت ، زُلم ءِ آس ءَ وت سُچیت
سامراج بیت یا نوابـے ، گَور بہ بیت ، اسلام بیت


@Labzank
telegram.me/Labzank

او منـی مِسکیں ڈگار !!

اے هونواریں گُرکاں ترا گزل گزل نہ کُرتگ

بلکیں !!

اے منی جگر انت کہ ایشاں چار گپّڑا کرتگ کہ دنیگا هم ایشیءِ ٹَپ هما ڈولا آزگءُ هون هما رنگا تازگ اَنت کہ هر وهد پدا یکجا وتا گِپت کننت -

سید هاشمی

@Labzank
telegram.me/Labzank

'' گوں عزّت ءَ پجاروکی ''

ملّا پازلءُ ملّا قاسم

پازل : نود کاینت اچ سرونءَ بنت پُٹّہ سے سے

قاسم : عاقلیں دیوانءِ مرداں شر بزانئت کے ءُ کے؟

عزّت : شَمس ، مهتابءُ زُلیخہ تُستگیں دل بود کے


@Labzank
telegram.me/Labzank

55420:
بیا اِت لچہ کاری ءَ دربر ایں
__________
اولی در
شرپمنداں مرچی ما شمارا یک وشّی یے گپے گْوش ایں بلے پیشتر شما بگْوش اِت کہ شُما چِد ءُ پیش لچّہ گْوشتگ ؟اگاں نہ گْوشتگ ما شمارا سرپدی دے ایں
اے گپ ءَ وا سرپد اِت شما کہ چَہ آباں گال ٹاهینگ بنت ‎ءُ چَہ گالاں گالرِد ءُ چَہ گالرِداں بُنگپ یا کسّہ ٹاهینگ بنت همے وڑ نَزم ٹَهیت گوں بنداں
بند گوں مِسرعہ ءُ کاپیہ ءُ ردیفاں ٹاهینگ بنت
مِسرعہ ٹَہ اَنت گوں رُکناں کاپیہ ٹهینگ بنت چَہ مجگ ءَ
نی کہ تو کاپیہ ردیف ءُ رکن کہ زانت اَنت گڑا تو بند ءُ مسرعہ هم ٹاهینت کن ئے وهدے کہ تو ایشاں دربر ئے گڑا الّم لچہ نبیس اِت کن ئے
لچّہ کہ نبیس ئے مردم تئی لچہ ءَ وان اَنت ءُ ترا سوگات دے اَنت آ وهد ءَ تو سک گَل بئے
وشّی بیت نا.؟
نی بیا ما ترا بند ردیف کاپیہ ءِ بابت ءَ سرپد کن ایں
درستاں چہ پیشتر ما ترا ردیف ءِ بابت پُرسیتّیں سرپدی دے ایں بند ءِ گُڈسر ءَ هما همتواریں گال کا اَنت همایاں گْوش اَنت ردیف درور ءَ بچار اِت👇🏻
من وتی هلک ءُ دیاراں چَہ شموشکار نباں
همدلیں سنگت ءُ یاراں چَہ شموشکار نباں
☝🏻دوئیں آباں دلگوش بہ کن دوئینانی گُڈسر ءَ👈🏻 ر اِنت همیشی ءَ آب روی گْوش اَنت نی تی مجگ ءَ یک گپّے کیت کہ 👈🏻دیار ءُ یار کاپیہ اَنت گڑا آ دگراں چے گْوش اَنت
اے گپ دلگوش بدار اِت هما گال کہ آهر ءَ رند پہ رند کا اَنت ایاں رِدیف گْوش اَنت
نی بزاں شما سئے چیز ءَ سرپد بوتگ اِت
کاپیہ
آب روی
ردیف
___
رجانک
@Labzank
telegram.me/Labzank

رم لچہے ندر اِنت

''''''‘'''کُچک ''''''

شپ اِنت
استال اُوھنگ اَنت ماں آزمانءَ
سُرمگیں مَس آں رِیچان کنت تہاری ہرگْورا
بس!
ھُورّکیں دمکـے ءَ
تہنا یک گُژنگیں کُـچکے دپءَ بُرزءَ کنت ءُ چَانگّ اِیت
بلکیں من اِسـتالاں پِـلکّ آں وتی گْژن ءَ تُوسَ آں .....

امام آزاد

@Labzank
telegram.me/Labzank

گشتن

مـن گُشت گوں مـن همدست بئے کہ گُنگاں زبانے جوڈ کنیں ، آئیا دست ماں کَمکَاں کرتنت -
دیم بُرز پہ شالکوٹءِ مُجیں آزمانءَ کرت ، کہکولے جت ءُ گشت ئے !
'' واب گندئے ''
بَلے نوں کم کم ءَ آ وت آگہ بوان اِنت

سید هاشمی

@Labzank
telegram.me/Labzank

.... آسکـــواب انـت ......
سـیدھــاشمــی.
کــــورُشــیں گــــال ...
مـروچـی مجلـس ءَ داد ءُ ھسـاب انـت
بلے دیـوان ءِ مسـتر جـور جـواب انـت

انگـت دلگـران ئے بے نـام ءُ تـوار ئے
ماں کُلّـیں ھُلکـواں تئی بیم ءُ زْراب انـت

اگاں کارے کـہ سـر داں سـر گُنـاہ انـت
پـہ لال ءِ ھــاتــر ءَ کُـرتـگ سـواب انـت

اگـاں مھـــرنـگ پُلـّیں کنــدگـے جَنــت
منـی نــزّ ءَ جھــان چنـگ ءُ رَبـاب انــت

نـہ بیتـگ مـادنیـں راہ ءَ کسـے گــار
نـہ تَـرّاں ھر کس ءَ پھک ءَ جواب انـت

بـزان ئے زنـدمــانـی ملگـــزار انـت
نـہ زان ئے پَتّـو تاھـاپیـں گیـاب انـت

پَمـن زَھــر انت اگـاں مُـلّا ء پیشـوک
کہ آیـانـی وتی راہ چـوٹ ءُ تاب انـت

نـہ تـُرسـاں تِیھُـر ءُ مـاتکــوہ بنــداں
گُـل ءِ واھـگ منـی شِِیلّـیں وکاب انت

مـن کـولیـگاں پـہ کـابُـدگ ءِ کھیبــاں
مَــہ تیمّــار اِت دل ءَ بِلّے ازاب اِنـت

کمــان ءَ پـہ جگــر جــاہ بِـہ تَـرّیـن
دل ءَ بِل گوں شِپیں تیراں کبـاب اِنت

گُـل ءَ ایـر کـُرتـگ دسـتانـی دِل ءَ دیــم
گْـوش ئے رِھل ءِ سر ءَ دُرّیں کتاب انت

ھنـوش ءُ کـدّھـیں چمّـانـی نــدراں
ھ‌ُـدا ءِ بـادشــاھی آسـک واب انـت

منـی ھــانــل پـہ اُمیــت ءَ تئیــگ ءَ
سیـد بے ھـاجت ءُ شـاہ ءِ مواب انـت.
... بلــوردان ـ کسـرکنــد.
.....پشمبے ۳۰ ستمبـر ۱۹۵۴.
🌴 کــــورُشــــیں گــــال 🌴
لبـزانکـی مجلـس کلمتـی کـاروان. 🌱

هر دو برْرات کسان اِت اَنت
هر دو یک هالیگیں کُمبـےءَ چو اُشتر ءَ
جمّاز بوتگ اِت اَنت
اے کش آ کش ءَ لیٹ اِش داتگ اَت
ءُ اے گال اِش دپءَ اِت اَنت
وادو وادو تِرّی وادو وادو ترّی
آ وهدی ایشاں نہ زانتگ کہ چے گُش اَنت
انوں کہ زان اَنت
بلے ترا نہ گُش اَنت

سید هاشمی
@Labzank
telegram.me/Labzank