پیسرا مردم مردمی لوگءَ شُتگ گوشتگی نمازی ئے بیار
ءُ کبلہ کُجام نیم ایں
انی گوش انت چارجرءَ بیار وائی فائی کوڈ چی اِنت
اکبال هاشمی
@Labzank
telegram.me/Labzank

سـرباز داں سـرهـد ءُ سـراوان ءَ
پهــرگ ءُ پنّـوچ ءُ گِـهـ ءُ لاشــار
هنـگءُ بمپشت داں هدءِ مینابءَ
بنـتءُ بشـکرد ءُ زرگورءُ چابهـار
کُل بلـوچ یکّـیں لوگ پرزنـد اَنـت
گوں همـے یکّـیں جامگ ءُ شلّـوار
نئیکه ما ایرانـــــی بلـوچ تهـنا
بلکـیں داں هبّ ءُ سیـبی ءُ هُزّدار

روانبد
@Labzank
telegram.me/Labzank

مهـرانـی سارتـیں ساهـگ ءَ زنـد بزّگیں بیگار بیـت
مُـرواردیں ارساں مـه ریـچ زرد آزگـیں گمسار بیت

کمـے بجـل چـاراں تـرا سـاه ءُ دل ءِ بنـدوک منی
باریں کـدی گنـدگ تـئی کسـمت پـدا دیـدار بیـت

هـر چی گشـئے مـرچـی بگش هچّی میار پِـرنیست ترا
پـه گلّه ءُ تـژناں تـئی دل کـئے گشـیت آزار بیـــــت

کـولیـگ زهیـرانـی بـه باں کـه زنـدگـی ءِ همبـل انـت
دوستانـی بازیں تـرانگاں زاناں سـروں بیسـار بیـت

پـه چیـر دئیگ چیـر نـه بیـت دوستـیں دلانـی داستان
بِل کـه گُلام یک کِسّهـے نـوکـیں پـدا آشـکار بیـت

📝 جـی ایـم بلـوچ

@Labzank
telegram.me/Labzank

بــود هیـالانــی تـچــیـت ءُ تاگ کنــت
مـارا چـاگـرد ءِ گـمـاں آژنـاگ کنــت

نیستـی ءِ دوهمـی بزانت اِنـت بـےوسـی
هستـی انـت کـه مسـتیاں پیـداگ کنـت

ایــر بـنــت لـوٹ ءِ جـنــازه هـر گـور ءَ
دل تـمــردیں واهـگاں کـه واگ کنــت

زاناں دلـپـروشـی ءِ کـهــریں اِلّـت اِنـت
دل بـهـاری مـوسـمـاں جـو پاگ کنـت

شهـدیں بچکـنـدے دوا انـــــت ژنـــــدی ءِ
گلـگـدارے دیــدگاں بیــناگ کـــــنت

داد مـئے بـہـت ءِ شـپاد ءُ ســر دری
تـالـه ات سـوگات کـوش ءُ پـاگ کنـــــت

اے انیـس اے ســـــربتگ نازانتـــــی ءِ
زانـت ءِ کـشک ءَ مادنـیں کـد شـاگ کنـت

ایسُپ انیـس
@Labzank
telegram.me/Labzank

بلوچـی زبان '' آب '' سرجمءَ ایش انت : ا ب پ ت ٹ ج چ د ڈ ر ڑ ز ژ س ش ک گ ل م ن و هـ ء ی ے _ ءُ هر گالے تها که ث ح خ ذ ص ض ط ظ غ ق کاینت آ گال بلوچـی بیت نه کنت انوں اے زانگ لوٹ ایت که آ گالے ءَ که چه اے آباں یکے یا دو مان به بیت آ گال بلوچـی یـے نه بیتءُ چُشیں گال گیشتر عربـی بنت - البت دگه باز انچیں گال هست انت که گوں بلوچیءَ پهک هور ترّاتگ انت ءُ چو که بلوچـیءَ کار مرد بنت چُشیں گال ماں بلوچی لچّهاں گیشتر گندگ بنت که ندکار په ایشانی کار مردءَ لاچار انت - په اے رنگیں گالاں نوکیں راه ایش انت که ما ایشاں بلوچـی گالوارءَ نبشتگ بکنیں - انچوش که : '' اِقرار ، عهد ، عشق ، ضد ، رضا '' ءَ باید انت که ما '' اِکرار ، اَهد ، اِشک ، زِد ، رَزا '' نبشتگ بکنیں - دگه لهتیں گال انت که پارسیءَ گوں '' خ ، غ ، ف '' ءَ نبیسگ بنت ، بلے بلوچـیءَ په '' هـ ، گ ، پ '' بنت انچوش که پارسیءَ '' خشت ، مرغ ، گفتار '' بلوچـیء '' َ هِشت ، مُرگ ، گُپتار '' بنت -

سید هاشمـی
۲۶/ اکتوبر 1961
@Labzank
telegram.me/Labzank

🚬💊🚬💉💊💉

دست بنداں گوں پاکیں رحمانءَ
دپتراں چَـه شُـود مـئے گناهان ءَ
دئے مـنءَ توفیق فرض ءُ نفلانـی
تهجـد ءُ زکــر ءُ کُل نمازانــی
دل هُدوک انت مئے پیشی عهدانی
مجلساں پُلّـیں دوست ءُ براتانـی
آ هبـر زانتـیں پیـر کماشانـی
آ مـڑاهـدار ءُ مل بلوچـانـی
نوبتـے اتکگ حیف ءُ ارمانـی
کار دگـه کارے اے جـوانانـی
روچ ءُ شـپ آسانـی نگاهپانـی
ورد ءُ تام زُرت اش آس ءُ دوتانـی
کش انت تریاکءَ مست ءُ مدهوش اَں
وتـی راج ءَ اے پـرامـوش اَں
زال جتا چُکءَ گوں وارءُ شُد لاپ اِں
ورنا ءِ سـر ماں یـک کش ءَ ٹاپ اِں
کش اِیت چرسءَ نوں سرءِ گوات انت
دائم ءَ لوگ ءَ جنگ ءُ سلوات انت
پت گماں گپتگ ماں سرء تهت اِں
مات چه اندوهاں وارءُ بد بهت اِں
ورنا سُهبءَ داں سر شپءَ گار انت
گوں بـدءُ بـے راهیں سراں یار انت
بـے سما انت که جندے بیکار انـت
راج ئے چـه درداں مُلّـی بیمار اِں
لـوٹ آں رهم ءَ چـه قادر ءِ پاک ءَ
راج ءَ پهریـز چـه شُومّیں تریاکءَ

📝 قادربخش کلمتـی

@Labzank
telegram.me/Labzank

چیا ..................................مُلّا کلمتـی

نشتگ ئے تو بـے توار ءَ هُشک ءُ هیران ئے چیا
رَنگ بر گشتگ تِلاهیں چو تو ویران ئے چیا

میری ءَ را کِرد لوٹیت نئے که پِیری کار دنت
بزّگیں تو راج ءِ چَکّا زهراں درشان ئے چیا

شودگ ءَ آدینک ءِ هجبر دیم ءِ پولنگی نه رؤت
شود دیم ءَ میر مئے آدینک ءَ شودان ئے چیا

کار ءِ وهد ءَ کار نه بستگ نی نئیت کار ءَ اُڑے!
گار کتگ تو هوش هاکاں آساں پٹّان ئے چیا

اے تی کارانی مُزّ انت که ترا لوپے گور اِنت
وهدگوستگ چه تئی دستءَ ارس ریچان ئے چیا

چو که درچک ءَ ریدگینءَ لیٹ ئے گواتانی پدا
گراں بدار مُلّا وتا را تو چو ارزان ئے چیا

@Labzank
telegram.me/Labzank

وشـکنـد 🌹🌹

نادراه : داکٹر منـی لاپ درد کنـت -

ڈاکٹر : مـن تئی اِلاج ءَ کناں تـو گُـڑا رنـد ءَ منـی واستا چے کن ئے ؟

نادراه : ڈاکٹر مـن یک کبر جنے آں ، هر وهدیکه تئی ساه ءَ ملکموت کبز کنت گُڑا من تئی کبر ءَ مُپت ءَ جناں - 😁😁😄😜

@Labzank
telegram.me/Labzank

هپتگ روچانـی نام ماں بلوچـی ءَ

شنبه ........... گنجـی

یکشنبه........... جتّـی

دوشنبه...........مولم

سه شنبه............ سوب

چهار شنبه......... ساکِم

پنج شنبه ....... شیکر

جمعه ...... ... آدینگ

@Labzank
telegram.me/Labzank

بتل

☀️ تو اگاں جهانءَ سُرینگ لوٹ ئے ، پیسرا چه جاهءَ به سُر

☀️ هَر مه بئے سُرمباں مه چار اُشتر بو دیر بچار

☀️ برو همودا که لوٹ انت ئے
مرو همودا که سوچ انت ئے

@Labzank
telegram.me/Labzank

وشـکنـد

یک مردے ءُ یک ناکو یے نشتگ اِتنت ، بچکے ایشانـی کِرّا پِنڈگ ءَ آتک -
ناکو ءَ مرد ءَ را گُشت که بچک ءَ را پنڈگ بـدئے -
مرد ءَ گُشت من ءَ کُلّا گوں نیست تو چیا ندیےءِ - ناکوءَ گُشت که منـی جنـد چُکّ انت پنڈگ من پرماتگ 😜😜😁😁

@Labzank
telegram.me/Labzank

کهیبانی پری............................سید هاشمی

تچوکیں آپ ءِ پُشت ءَ کِشک رَند اِیت
گنوک اِنـت دل که پتّو پَهر بنـد اِیت

کهیبانـی پـری ســـــر چادر ءَ بَـے
نـه سگّاں کسّـے بالاد اِت بگنـد اِیت

تئی وش زیمـریں گالـوار ماں کُلّ ءَ
منـی ریشیں دل ءَ بنداں چه سند اِیت

مه شِنگین مِسکیں مَلگوراں مه شِنگین
پمـن جمبـر گمانـی سْیـاه بنـد ایت

کَپ اِیت کَبگ چـه وتی کرام ءُ کهیباں
چـو دابانـی گُل ءَ راه ءَ بِگنـد اِیـت

نـه دل پمـّن نـه دراهـیں زنـدمانـی
مـه گنـدات اِنـت کسے چیزے که من دیت

منـی بهت ءَ سیاهـی ءَ مانپوش اِیـت
وتـی گواپاں اگاں مهـدیـم رَنـد اِیـت

مـن اِشک ءِ بـرهنگـیں ڈنّ ءِ میاراں
گـم ءِ جُـڑ پمّـن بـے ساهار گْـرنـد اِیـت

مکـن جُسـت ءَ شپانـی روچ تهار اَنــت
کـه دیـدگ گـونمـن ءَ سهتـے نـه نِنـد اِیـت

مـن کـول ءُ نـدر منّاں پـه مُریـد ءَ
کـه گـونمـن یـک بَـرے هانل بکنـد اِیـت

نـه بیـت اِنـت اومـر ءُ ماهـو همـک کَس
سیـد کس پـه کسـی اَهـداں نـه ننـد اِیـت

کراچی - ۱۳/ اکتوبر ۱۹۵۱

@Labzank
telegram.me/Labzank

بتل

☀️ گنج بـے رنج ءَ نه بیت

☀️ ترا په گوک ءَ نه انت ، گوک ءِ ریدگیں پوساد ءَ انت

☀️ شیر ءِ پوست ءِ گورا کنگ ءَ شیر نه بئے

☀️ شر رنگیں جَنِک وتی لُنٹانی سُهر کنگ ءِ مُهتاج نه انت

☀️ گوشتے تو گرادئے ، بوهے همساهگ ءِ لوگا هم روت

☀️ ملّگ مـن شر زاناں بله آستونک لُکّ انـت

@Labzank
telegram.me/Labzank

نا دوستـی ءَ را بل دگـه تاج ءِ پـر نبـی
اینچو جتا نهیں که منـی هالاسهی مبـی
یک رنـدے ما وتارا درملکءَ بُرت سلیم
وشـی دلا نکپـتاں ما کـه تـرا نـــــدی

سلیم سابت

@Labzank
telegram.me/Labzank

وشـکنـد !!

وانینگ ءِ وهد ات اُستاد ءَ وتی نودر براناں جُست کُت که شما به گُش ات '' شمے تها کے جنّت ءَ روگ لوٹ ایت وتی دستاں چست کن ات ''
دُرستیں نودر براں دست چست کتاں بلے یکے ءَ دست چست نه کت گُڑا اُستاد ءَ جست کت '' تو جنّت ءَ روگ نه لوٹ ئے زاناں '' ؟
گونڈوءَ پسّو دات '' واجه منی مات ءَ من ءَ گُشتگ که چه وانگجاه ءَ واتر تچک ءَ لوگ ءَ بیا اگاں تـو دگه جاگاهاں شُت ئے من تئی پت ءَ هال دیاں '' - 😂😄😁

@Labzank
telegram.me/Labzank

" پنڈوک "

" آزمانکک "

﴿ نعیم پیرجان ﴾

سہبی من چہ بینک ءِ ڈبُک ءَ زر کش ات ءُ ڈنءَ دراتکاں، منی چم کشکءِ لمبءَ نشتگیں پنڈوکءَ کپت انت کہ چہ دوئیں دستاں زبہر ات.تاسے دیمءَ ایر ات ئِے.

منءَ سک بزگ بیتءُ من ھزاری تمن یے آئی ءِ تاسءِ تہءَ ایر کت ءُ انچو کہ پِر ترگءَ لگ اتاں تہ چاراں پنڈوکءَ چہ پشکءِ تہءَ چیریں دستانءَ کشگءِ جہدءَ جبزبہ

کت.پرچاکہ سیاھیں گوبزے آئی گوشءِ سرا نندگ ئے جہد ءَ ات.
@Labzank
telegram.me/Labzank

وشیں هال

ھیئت محترم دولت امروز رسما" مرز ریمدان را مرز رسمی تصویب نمودند وآن را بہ استانداری سیستان و بلوچستان اعلام کردند

(من پہ وپاھاں ناز کتیں)

مہر ءِ شدیّکیں تئی شائر
دردانی جہان ءَ تہناھیں
گاریں کشکاں سرگرداں
موسم سستاں ساچانیں
نود نہ شنزاں بیگاھاں
کوش سمین ءِ دیناں شوت
واھے وتن تو بن گپت ءِ
جوانیں نوبت پد رپتاں
وھد وتا تو اَکّل اِت
من تئی پاداں پش کپتاں
مہر ءِ شدیکّیں تئی شائر
ساچی وتا وت سنگاریت
زاھر باتن دیوانگ
لوٹیت جتاھیں مٹّیگ ءَ
بالاد ءِ گلابیں امبازاں
لنٹ پلج پہ بچکندے
کمبکتیں دل وام نَداں
سھتے وتا بے ھال نباں
چم ھدا ءِ دنزین انت
بلکیں زمین اش میم نھیت
بلکیں چہ من بے ھال انت
یا من درداں اندیماں
اوپ کناں ٹپّیں جگراں
ھوش دمانے برگشتیں
دور بہ گشتیناں چہ وت
کبرستانے وپتیناں
ڑیک بہ داتیں بھت وتی
مٹ وتی شوھاز کتیں
شر گریتیں امباز کتیں
من پہ وپاھاں ناز کتیں
بہار زہری

*《 ما نہ کت شهبو 》*

داتگیں دْراهیاں نیاتک ئے تو
هار کتگ ارساں ، رُمب اِتگ کاجو

واهگ ءِ دیماهی کشار هجگیں
شیرکنیں اندوهاں کتگ آدْرو

دل بل ایت چار پاسیں شپاں لُنجیں
چم اُمیتانی بامے ءَ دو دو

جی شلنگ شیموش کن وکابالیں
دیر نہ انت نزّیک اِنت گلیں بیلو

ماهلاں ماتکوه ءُ هسار بُرزیں
پہ کپوتاتی نالگ ءَ باهو

بے سریں وازاں بل وتی مُلّا
بے وتیں ابدال نہ بنت پُهتو

سرْپتگیں تیر ءُ گْوستگیں باریگ
پہ کئی کوکار ءَ کن انت بیرو

مکّهیں ماتاں بچ وتی سولیں
پہ مرادے ءَ داتگ انت لیلو

کپتگ انت چم پہ دْروشم ء َ دْرینیں
سار ءُ سسّا ءِ سستگ انت تانجو

چاپ جن ات کاڑاں *دُرگُل* بانور انت
لیلڑو لیلاڑو لڑو لاڑو

بے گماں چو کہ مُرگے ءَ *عابد*
بال کنت ارواه ، ما نہ کُت شهبو


📝 *لچہ کار: استاد عابد آسکانی*
https://telegram.me/Labzank

دُرّیــــں دانــــک

🌹🌹شما نه توان اِت دگنیا ءَ به ٹگلین اِت، بلے توان اِت وت ءَ به ٹگلین اِت.
🌹🌹شما نه توان اِت چه درواهیں مردماں مِهر به گند اِت، بلے توان اِت وَت مِهر به کن اِت.
🌹🌹شما نه توان اِت درواهیں کاراں شرّے ءِ سر ءَ به کن اِت، بلے توان اِت کارے به کن اِت توری گُوَنڈ به بیت.
💐💐شما نه توان اِت کسّے ءِ بیرانی ءِ دیم گیر به به اِت، بلے توان اِت زند ءِ وهد ءَ آئے ءَ مِهرْ به کن اِت.
💐💐شما نه توان اِت درواهیں دگنیا ءِ گُژنَگان ءَ سیر لاپ به کن اِت، بلے توان اِت یکّے ءَ زند ءِ واهِشْت به دے اِت.
🌸🌸🌸🌻شما نه توان اِت درواهیں دگنیا ءَ دَروَنت به دے اِت، بلے توان اِت چَه وتی سَرگوَست ءَ دَروَنت به گر اِت.

رجانک مهمد بلوچ
@Labzank
telegram.me/Labzank