بیا بلوچـیءَ پاهازیں ، بلوچـیءَ هما اِزّتءَ دئیں که کرزیـت ئے - بلوچستانءَ اے وڑیں مـردم باز انـت که آهانـی علاقائی زبان دگر انـت ، بلئے آ بلوچ انـت - تو وتی علاقائی زبانءَ دوست بدار، آئیءِ دیما برگ جُهـدءَ به کن - بلئے وهـدے تو بلوچـے بئے گُڈا منـی تئی علاقائی زبانءَ چـه بلوچـی مستر بیـت ، پرچا کـه آ مارا چـه علاقهءَ کش ایت ءُ مُلکـی کنت ، راجـی کنتءُ بلوچ کنت -

ڈاکٹر هنیپ شریپ
@Labzank
telegram.me/Labzank

کج کجے بیت چو چاردهـی ماهءَ
دنت ترا درواهـی بیا منـی جاهءَ
دراج مکـن گامـگیجاں پمـا راهءَ
سَد شَپاں یک روچے کپ ئے چاهءَ
چوٹو ءُ ریش ماں دست ءِ بدواهءَ
تـو هـزار اپسـوز وَرئـے رنــدءَ
پُـرشتگـیں دسـت هچ نئیت بنـدءَ

مُلّا پازُل

@Labzank
telegram.me/Labzank

عطاشادءُ کریـم دشتـی ئے ادبـی بستار

گْوستگیں مردمانـی تها عطا شادءُ کریم دشتـی هما کس اَنـت که آهانـی هر نبشتانکےءَ وان ئے سما بیت که ایشاں چندیں هنچیں هم گپ جتگ که اگاں مروچیگیں نـدکاراں شریں رنگےءَ به ونتین اَنـت آهاں شعرءُ آدبءِ باروا سنگینیں زانتکاری یـے دست کپتگ اَت -

☀️☀️اُستاد اے آر داد☀️☀️

@Labzank
telegram.me/Labzank

دانک

☀️ وتی رنگءَ چو روچءِ رنگءَ بکن ترا ساهگ گندگءَ نئیت - (هیلن کیلر)

☀️ زنـد یک گوهر کیمتی یـے اگاں ایشیءَ به تراش ئے گُڑا کارءَ کئیت - ( جارج بر نارڈشا)

☀️ انسانءِ مستریں نزوری آئیءِ دْروگیں ستا انت

@Labzank
telegram.me/Labzank

احمـد نثار

دل گُشیـت دائـم ڈوبار وتیـگاں
په مـن کتگ انچیں کار وتیگاں

دگـه گـوں کسءَ نـه بیتـیں گِلّه
منـی آستونکءِ ته ءِ مار وتیگاں

بِلے چاراں دژمـن هـر روچ نـداره
دل گُشیـت آس مانـدار وتیـگاں

وشیاں دائـم تئی همـراه اِتاں
کجاں سکیاں بـرو بیار وتیـگاں

دگـر ءَ رنـد ءَ بُگـش تـو نثـار
یک بـرے ایباں بچـار وتیـگاں

@Labzank
telegram.me/Labzank

بتل

☀️ جت ءِ کَول مولد ءِ دوراھیاں مہ نِند

☀️ تاسءِ آپ ور سد سال وپا کـن

☀️ مار جوگیءِ یار نه بیت
سیاه پـه شُودگ شار نه بیت

☀️ چم نه گِنداِیت ، دل نلوٹ ایت

☀️ همراه همراهءِ بیرگیں چـمّ اِنـت

☀️ روگنءِ بازیءَ کس هرءِ لاپءَ چرپ نه کنت

☀️ دیوان په مرداں وش انتءُ بار په لیڑهاں

☀️ گپّءَ هُدائی بکن لَٹّءَ په براتءَ بور

@Labzank
telegram.me/Labzank

@ھاشمی آمڑ@
#سِندی ءِ سول#
لالو منی میتگی مردمے, ءُ لالو ءِ میتگ چہَ بازارءَ (مارکیٹ )کِساس یک کلومیٹرے دور اِنت.
لالو سہبءِ ششءَ چَہ وابءَ کئیت داں شپءِ ھپتءَ شانزدہ ترّاپ دنت بازارءَ.
لالوءَ ھر وھد تو گِندے موترےءَ سوار اِنت بازارءَ رَوگ ایں یا چہَ بازار ءَ میتگءَ پیداگ ایں,
پاداں بِہ نہ رَوت.
روڈ سرا اوشتاتگ موتراں دست دنت ءُ رَوت ءُ کئیت, چو نزانت کہ موتر پیسرا دو پُشتگ اِنت , چُک ءُ جنین گون اِنت یا کہ سامان ءُ بُچّے بلے لالو المءَ دست دنت.
یک روچے لالو روڈ سرا اوشتوک بیت پہ بازار رَوگءَ گُد والا پٹانے گوں موترا رَوک بیت ءُ لالو دست دنت, پٹان اوشت ایت کہ بلکیں گراکے جوڑائے گُد زیر اِیت, بلے پٹّان ءِ اوشتگ ءُ لالوءِ کُپ کنگ پٹانءِ گُدانی سرا نِندگ,
پٹان گوش اِیت کہ ایرا گُدانی سرا مہ نِند, من گوشتگ زاناں تَو گُد زیرے من داشتگ من ترا اینچو گُدءَ گوں زُرت نہ کن آں, بلے لالو ھما نا سرپدیں لالو, لالو گوش ایت کہ تَو کہ پہ منءَ داشتگ من ایر نہ کپ آں, منءَ بازارءَ رَسین.
اے ھمدا جر ءُ باسا بنت کہ یک سندی ئے گوں موترا کئیت دار ایت اِشاں جُست کنت کہ شُما چیءَ اڑتگ ات. لالو وتی گپاں جنت ایت. پٹان وتی درداں گوش ایت.
گُڑا سِندی گوش اِیت کہ من شمے سولءَ (پیسلہءَ ) کن آں شمارا کبول اِنت. پٹان ءُ لالو ھر دوئیں گوش انت کہ ھَو مارا کبول اِنت.
سِندی گوش اِیت ءُ پٹان اے مرد کماشے ءُ تو اوں بزّگے کہ گوشے سھتے بیت کہ اے گوں من اڑتگ.
تو گُداں ھمداں ایر کن ءُ
اے کماشءَ زیر بر بازارءَ سر کن بیا . من چہ تئی بزگیءَ تئی گورا دو جوڑا گُد نگدی زیراں.
پٹان ءُ لالو دوئیں گَل بنت کہ شریں سولے بیتگ.
پٹان گُداں ایر کنت ءُ لالوءَ رسین ایت بازارءَ کئیت چار ایت نہ سِندی ھمدیں ناں مبی گُد زاھر انت.
مروچی چار سال گوستگ پٹان سِندیءَ شوھاز اِنت بلے سِندی پٹانءَ دست نہ کپ ایت.
ءُ لالو گِند ایت کہ روڈ سرا اوشتاتگ بلے لالوءَ نہ چار ایت ءُ گوز ایت.
اکبال ھاشمی

آسءُ هاکشانـی اِنت گریوگءُ زاری اِنـت چے نبشته کناں
هـر چهـار نـیـمـگا بزّگی واری اِنــت چے نبشته کناں

آزمـان ءَ سـر انـت آ دگـه راج گوں وانـگ ءُ زانـگ ءَ
پـه بلوچـاں مُـدام گـژن ءُ بیمـاری انـت چے نبشته کناں

انچـیں باریگـے اتکه منـی بُنـدر ءَ کـس کسئیگـی نه انت
هرکس بے هاجت انت هرکس بیزاری انت چے نبشته کناں

راجءِ ورناه که باندات ءِ اُوسـت انت وتی جندءِ سُدّءَ نه انت
کشّیت تریاک جان ءَ چـه بیـزاری اِنـت چے نبشته کناں

کازی بلّے تـو آڈالءُ ابدالےءِ پُـوچکـے بستـار تئی
سـر کتاباں بلے نام تئـی ساری انـت چے نبشته کناں

مُبـارک قاضی
@Labzank
telegram.me/Labzank

دستونک .. خالق ارمان

شِیرَگیں ترانگے مَلارینتہ
وارتہ تریاک زہر مارینتہ

بِرانز مانپوش اِتگ گَیابانءَ
کُوچگاں آس ملگُزارینتہ

جندءِ وت واجہی ءُ سرداری
دستِ بدواہاں برات وارینتہ

گار ہرکس وتی پداں جند ءِ
شہر دنز ءُ مُجاں گُبارینتہ

ما پہ سمّو گنوگ،مَست ءُ مَلنگ
عشق ءِ ارواہ ءَ بَنگ چارینتہ

بیاکہ زیبائیں جَنگے ءَ مرچاں
دُراہیں بازار سرمَچارینتہ

وہد ءِ زانِشت پَہمِتہ ارمان
نِشتہ تگران ءَ ہَر نہ چارینتہ

@Labzank
telegram.me/Labzank

....دَرانڈیہہ...
....................... منظور بسمل......
بیا کپوت درد نالگیں
زَرین شاہی بانزلاں پہ مولمے
بہ گْوز چہ کوہی بُرزیں پرّگاں
ہشی ءُ تْرشتیں دُومّگاں
زِر ءِ سُبکّیں کوش ءِ منّت ءَ بہ زُور
شَلین بالاں
آزماں شہاریں پند ءُ منزلاں بہ جن !
مدار ءُ مولِشاں مہ کن
برو پہ رودراَتک ءِ کُوچگ ءُ دِہاں
کہ شِمش ءُ آلکو بہار بنت
سنج سِیم سہار بنت
پنیر ءُ شِیر بیت دَواراں شْوانگی
ماں کوہ ءُ کوراں بے وسانی وانڈہی
کہ زندمان دْروشم اِنت زندگی
پُتْرونک ءُ کونرانی سُہریں بر زَرنت
شکوسگانی شِیر بینگ اَنت
گْون ءُ پَتْرِک روگن اَنت
بہ دئے منی گمیگیں
دْروتاں ہانی ئیں وتن
بگُش (من بے )تو شے مرید گَشتگاں
پہ داگ ءُ تْرِکُّل ءَ نہ گیپت کرار
تلوَسوکیں دل
زَریت سہب ءُ بیگہ
پہ ترا زہیری اِنت..

@Labzank
telegram.me/Labzank

بے کار ءَ وپتگ ئے تو لوگ ءَ در ءَ بُرو
کارے بکن تو شوھاز زیر اکبر ءَ برو

داوا ءُ جنگاں یلدئے تو بِل قاسم ءَ
نام ءَ بے لِک پوج ءَ تو مسکت ءَ بُرو

پکوڈا پچ بھا کن بازار ءَ جنت ے
یاکہ ببئے کِلنڈر ڈاج ے سُر ءَ بُرو

تئ رُکستی ءَ دلبر ھرچی گوش ئے کن آں
پادانی ءَ من کایاں تو گوں ھر ءَ بُرو

لالو تو بریس سُوتکگ ،درنئیت گڈاکو ے
سُوٹ ے چیلیم ے کَشّگا کئے گوادر ءَ بُرو

"لالو پیشوکانی"

@Labzank
telegram.me/Labzank

?.....................(مردم چہ شیئرءَ چے لوٹیت؟).......................?

"اے یک انچیں جستے کہ باز بر ءَ مردم ءَ تکانسر کنت،شیئر واناں کن ءُ پَد جناں بو،میزاں میزان ءَ اے گرنچ پررچان کنت کہ شرّیں شیئر دگہ ہچے نہ اِنت بس یک وشّی یے،کیفے کہ ترا بے واھش ءُ لوٹ ءَ رسیت،شیئر بہ بیت یا دگہ ازمے راہ اِش ھمیش اِنت،یک انچیں شادہ یے،انچیں تاہیرے کہ آئی ءِ تلب تئی دل ءَ پاد نیاتکّگ، تو آئی ءِ شوھاز ءَ در نہ کپتگے ءُ اناگاہ ترا رسیت، بلے وہدے کہ رسیت گڑا مردم زانت،اگں مہ رستیں مزنیں کمّی یے پشت کپتگ اَت،بلائیں محرومی یے بوتگ اَت شرّیں شیئر دگہ ہچ نہ کنت،بلے یک کارے الّم کنت کہ ابیتکی یے سھڑین اِیت،ھورکیں جاگھے پُر کنت"-

.............................(منیر مومن)...............................

@Labzank
telegram.me/Labzank

لالچ بربادیءِ نشانـی انت

سئے دوست سپرءَ در اتکگ آں سپرءِ دورانءَ آیانءَ چه سُهرءُ زیوراں پُریں پیلکـے دست کپت - آ سک باز گل بوت انت بلے آ هر چوں دیما روان اِت انت لالچ آس آیانی سینگءَ روک بیان بیت ءُ هر یکےءَ همـے هیال کرت که من اے سُهراں چه دومـیءَ را چوں زبهر بکناں وهـدے آ شهرءِ نزدیکءَ سر بیتاں گڑا ایاں یکےءَ را په نان گرگءَ شهرءَ دیم دات - ایدگه دوئیناں وت ماں وت سیمیءِ کُشگءِ شور کرت تانکه چه سُهرءَ پُرّیں پیلک هما دوئینانی میانجـیءَ بـهر به بیت - بله هما سنگت که نانءِ آرگءَ شُتگ ات آئیءَ نانانی تهءَ زهر مان کُرت دانکه آ ناناں بورانتءُ به مرانت ءُ سُهر تهنا همائی به بنت -
وهدیکه آ سنگتانی کِرّا آتکءُ رست گڑا هما دوئیں سنگت آئی سرا زهر گپت انت ءُ درّائینت اش که تو پرچا دیر کُتگ - آیانءَ بهانه یے در کارات ، دوئیناں ائی سرا اُرش کُتءُ ارا کُشت اشءُ پدا بے پگریءَ گوں نانءِ ورگا لگ ئتاں ساهتے نه گوست که آ زمین ءِ سرا تچک گپتءُ مرگءِ آماچ بیت انتءُ سُهرانـی پیلک همایانی نیامءَ کپوک ات - راستـے که لالچ بربادی نشانـی انت
☀️☀️☀️☀️☀️
@Labzank
telegram.me/Labzank

......راجی شائریءِ ارزشت.....

دنیاءِ تہـا ھـر راجءِ وتی راجدپترے بیت،زبانے بیـت،دودءُ ربیـدگ بنت،زمیـن یے بیت، آ الّــم وتی اے چیــزانی سـرا پہـــر بنـدیت،ہمـے وڈا شائری ہــم راجانی راجدپتــرءِ بہــرے،شائـری تُری عشقیـہ شائـری بہ بیت یا کـہ راجی زندمان،دودءُ ربیـدگ،زمیــن،راجی بامـرد،راجی ویلءُ آئءِ ڈگارءُ ڈیھءِ سـرا دریـں راجانی اُرش بہ بیت،ھمـے وڈا بازیـں راجانی گورءَ دراجدپتری ویلءُ واقعہ شائریءِ دروشمءَ نبشـتہ ءُ است بنـت چو کـہ یونانیانی گورءَ اُمـرءِ نامءَ چـہ استیـــں شائری ایلیڑءُ اوڈیسی،انگریزءِ گورءَ بیولف،پرتگیزیانی گورءَ، ،،لوزیاڈز،،لونروٹءِ،،کلویفوگ،،کہ ایسٹونین چاگردءِ جہگیریءَ کنت،ءُ دگہ بازیں راجانی گورءَ راجی شائری است انت ہمـا کہ آ راجانی پجار اَنت
ہمے وڈا ایلیڑءِ بابتءَ گشنت کہ اے روایتی ھسابءَ اومرءِ شائری گشگ بیت ایشیءَ را، ،،یلیمءِ شئـر،،ھم گشنـت اے شئــر،،ٹرونجم وار،،ءِ وھـداں نبشتـہ کنـگ بوتگءُ اے جنـگ داں دہ سالاں برجاہ منـتگءُ اے جنـگ بادشاہ اگامننءُ جنگـول آچیلءِ میـانءَ بـوتگ،اے شئــر جنـگءِ گُڑی سالءِ لہتــے ہپتگانی بوتگیـں ویلاں پـدّر کنت اے شئـر ہشت سد سال پیـش چہ عیــسی زانگ بیت بلے نوکتریں پٹءُ پولءُ ھساب دادءِ ردا اے 760یا 710پیـش چہ عیـسیءِ زمانگ گشــگ بوئگ اِنت...
@Labzank
telegram.me/Labzank

فلسطین راجی شائرمھمود درویش

.......اپس مئے لوگءِ پانگ اِنت.....


ابّا کجا مناں برگائے؟
ہــر جاگہ گوات بران کنت

پت:مہ تُـرس منی چُک

اے تیرءُ تُپنگاں
امباز کناں ڈیھءِ ھاکاں
آ پشتی کوہءَ کہ رستیں
اے فوجی چماں اندیم بنت

چُـکّ:ابّا گڑا مئے لوگءُ میتگءَ
چہ ما پد
کئے نندیت

پِــت: مئے لوگ ہمے رنگءَ ماننت

چُـک:ابّا تو اپسءَ چیا تہنا یلدات؟

پِت:وتی لوگءِ چارگءُ پانگیءَ
لوگءَ کہ واہنـد مـہ مبیت
تـہ بیگــواہ بیــت
@Labzank
telegram.me/Labzank

دُرّیں دانک

وهـد کدرءَ بکن وهـدءَ پجّاه بیار وهدءَ گوں تلاه زیرگ بیت بله گوں تلاهءَ وهـد زیرگ نه بیت
@Labzank
telegram.me/Labzank

سچل سرمستءِ گشتن

یک زانتکارےءَ نلءَ چه پُرس ات
تو سرداں پاداں بندیگ ئے
تئی پریاتءَ اش کناں ته منی هُب ودّیت
تو آه کش ئے ته مئے ساهاں پر چے آس جمبور یت
نلءَ گشت '' من وتی توارءَ اش کُت نکناں
تو هما هنر کارا پُرس که توارا سازیت
من شاهانی شاهی دیستگ
آ نیزگارانی سرا کهرءُ زلم کننت
زمانگءِ گردشءَ ما اے ام دیستگ که
بادشاه پکیر بیتگ انت ءُ پکیر بادشاه

رجانک : رهیم مهر بلوچ

@Labzank
telegram.me/Labzank

منـی دستءِ تاک..................مُهسن هالک

مناں چه در کسانیءَ وانگءُ زانگءِ هـبءُ واهـگ بیتگ ، مـن وهدے دهمی جماعتءِ چکاس که پاس کُت، په دیمءِ وانگءِ واستءَ کـراچیءَ روگءِ اراده کُت گڈا همـے وهداں جناح هسپتالءَ منـی پتءِ ٹرینگ ئے بوهگءَ ات پمشکه من گوں پت همراهیءَ کراچـیءَ شُتاں که من وتی انٹرءِ تعلیم ءَ کراچیءَ سرجم بکناں من مدام چه وتی سنگتاں همے اش کتگ ات که کراچی په وانوکاں شرّیں دربرجاهءِ ءُ نه وانوکاں دل مرادءِ هوٹلءِ پیما انت که مردمءِ دلءَ هر وڈیں سلّیں عادتانی آماچ کنت بزاں په ترءُ گردءَ شرّیں پارکءُ سیلءُ ندارگءِ واستا وڈ وڈیں جاگاه است انت -
من وهدے گوں پتءِ همراهیءَ کراچیءَ سربوتاں گڈا اے دگه روچءَ من سعیدآباد کالجءَ داخله زُرت من مدام سُهبءَ مهله وابءَ پاد اتکگاں نمازءَ چه رند پدا هوٹلءَ په ناشتهءَ شُتگاں کالج منی کمرهءَ نزدیک بیتگ پمشکه من وانگا پادانیءَ شُتگاں - داں وهـدے منـی کالج چکّاسءِ وهـد نزدیک بوت گڈا مـن هر سهبءَ که وانگءَ شُتاں یک کاپیءِ تاک ئے سرا چیزے نبشته کتءَ یاد کناں بوتاں پر چا که مناں وتی چکاس گوں شرّیں وڈئےءَ سوبین کنگی ات - یک روچ ئے من وتی دستءِ تاکءَ چارانءُ وتی سوالاں یاد کناں دیم په کالجءَ رؤگءَ اِتاں که اناگههءَ گواتءَ منـی دستءِ تاک چه منـی دستءَ چامپتءُ کشءِ کمرهءِ تها چگل دات - چوشکه من درامدے اتاں پمشکه من تاکءِ چست کنگءَ مڑاه کت ، ءُ دیم په کالجءَ رؤگءَ لگّ اتاں - اناگه مناں پُشتءَ یکئےءَ توار پر کُت ، من پُشتءَ چَک ترینت گنداں یک ماه دروشمـیں جنکے ئےءَ منـی سوالانـی تاک دستءَ ات ، په بچکنگے مـنءَ گُشگءَ لگّ ات -

'' من ناوانندئیں جنکے آں تئی کاگدءِ وانگءَ نزاناں ، بله من اوں چو تئی وڈا تئی وداریگ بوتگاں تو که هر سُهبءَ ادا گوستگے من چه دریگءَ ترا چاراِتگ - تئی دوستـی مناں سرءُ چمّ انت ، بلے وتی کاگدءَ بر گوں که کسے مگندیت ایں '' -

@Labzank
telegram.me/Labzank

مُزّ
شاه عبدالطیف بهٹائی
رجانک : مُلّا کلمتـی

روچ که دیگرءَ کِنزاں بیت
مُرگانـی رم انت آزمانءَ
بال انت په وتی شپد رنگاں
کاریگاں وتی کار پیتکگ
زُرتگ لهتےءَ جوانیں مُزّ
لهتےءَ تُشے دان زُرتگ
لهتے کُنٹگاں سر بار انت
هورک انت لهتےءِ هر دو دست
دیم په منزلءَ راه گپت انت


@Labzank
telegram.me/Labzank

بتل

☀️ لوگ پُشتءِ مُزاهتی مَچّءَ چـه لوگءِ دپ کُروچیں مَچّ شرترانـت

☀️ کار نه انت کُواروکیں کواٹانـی ، باراں جونگیں لیڑه زیر انـت

☀️ گوں ماهءَ نِنـدے ماه بئے ، منجل کشءَ نِنـدے سیاه بئے

☀️ مَچّ مَچّءَ گِندایت رنگ زیرایت

☀️ شپ هر چُنت به بیت تهار ، پیدا ورانت ماتءُ گُهار

@Labzank
telegram.me/Labzank