......دروگءِ انجام ھرابی اِنت.......
شپـانکےءِ عادت اَت کـہ ھـر وھدءَ پــسءِ چاریــنگءَ شُــتگ اَت گُـڈا کـوکارے جَــتءُ درّائینت ئے کہ،،شیــرے شیــرے،،مـنءَ بچّـارینے....مھلـوکءَ تچـان تچانءَ آئیءِ بچّـارینگءَ پـہ شُتـگ ءِ تنت
بلے وھــدے کــہ اوداں سـر بـوت اَنت گُــڑا شپــانکءَ ٹھــک داتگ اَتُ درّائینتگ اَت ئے کــہ مـن مــزاک کــُـرتگ
یـک روچـے راستــیءَ شیـــرے آھتءُ رمـگءُ پســانی گاجلینگءَ لـگ اِت،
شپـانک سـاءِ تــرسءَ درچکءِ ســرا لـک کپـتءُ کوکارءَ لـگ اِت بـــلے اے رنـدی مــردماں آئیءِ ھبــرءِ سرا کمــار نـہ کُـت آیانی ھـیال اَت کــہ دروگ بنــدگ ایشــیءِ کـار اِنت بلـے مــروچی جـاور دگــرے اَت شیــرءَ رمـگءِ مـــزنیــں بھــرےءَ گـاجلینتگ اَت ...
راستے کـــہ دروگءِ انجـام آخــر ھــرابی اِنت
@Labzank
telegram.me/Labzank

کنـدءُ مـــــنءَ کنـدین - !!

اولـی مردم : مـن مـرچـی دو مـردمءِ کیسّگ بُـرّاِتگ-

دومـی مـردم : گُـڑا ترا کسّءَ نه گِپتگ-

اولـی مـردم : مـنءَ کئـے گِپت کنـت - مـن وا درزی یـے آں 😄😄😄

@Labzank
telegram.me/Labzank

دلبر کہ ٹہل ءُ نازکنت کئیتءُ منا امباز کنت
ارسے شلیت چہ دیدگاں دل آشنائی باز کنت

مـــــن یکبرے کہ گارباں امروزءِ رنگانی تہا
رندا کجا دنیا مــــــــــنا ارزانیءَ شوہاز کنت

پہ ما زبہراں موسمءِ دراہی تئی رنگءُ د‍‌روشمءِ
بیا بیا بہار آتکہ پدا دُور شــــــــــانتلے آواز کنت

اے ام کہیبانی گلءِ دابانی گونڈیں دروشمے
ذی دژمنءِ نامءَ فدا مرچی منا ھمراز کنت

الھان کنت شعرے پدا گوں زھیرواریں زیملاں
قاضی چو ناکو فیضکءَ دردءِ سروزءَ ساز کنت

مبارک قاضی
@Labzank
telegram.me/Labzank

........... مــــلا پــازل .........
دیرسریں رنگراھاں گرانت پَیل ءَ سَے ءُ چار
سُست بنت بیم ءَ رہ بُرّیں گامانی شھار

تِکّہ ءُ تیلانکاں نہ کنز اَنت اِنت روچ پہ مَیل
پہ دپی وشاتکاں نہ بنت پولنگ ازّت دار

میتگاں بینگ وپس انت ءُ تاھاپاں کُنیـل
سر زِھاں پادمال کن انت دنگیں نرمزار

سجّوئیں زند ءَ کس نہ کنت امروز ءَ سَیل
آسری ھمراہ نہ بنت چار روچی بھـار

ھیلی آں لڈّوک ءُ شگالاں پازُل پہ تَیل
لیڑوئی تْرامپولاں نہ دار اَنت اِنت سی ھزار
@Labzank
telegram.me/Labzank

دُرّیں دانـک

☀️ نا اُمیتـی مَـرگ دومـی نام انـت -

☀️ انسان مسـتریں دژمن بَـدی اِنـت -

☀️ چه دُرساں مستریں بَـدی هما اِنـت که دومـیءِ دلءَ به پروش ئے -

☀️ زَرّ ءِ بـے سریں دوستـی ماتءُ پتاں چه چُکاں دور کنت -

@Labzank
telegram.me/Labzank

کنـدءُ مـنءَ کنـدین !!

یک سیاسـی لیڈرے نادراهجاه یےءُ شُـت
ڈاکٹرءَ را گُشت ئے - مـن وهـدے گُشتانک دیاں منـی زُبان لِلّ بیتءُ منـی پاد لرزانت - منـی نادراهـی چـی انـت ؟

ڈاکٹر : تو هچ وتءَ پریشان مه کن دروگ بندگءِ وهـدءَ همک مـردم همـے پیمءَ بیت 😄😄😄

@Labzank
telegram.me/Labzank

بتل

☀️ کار په کَورءِ ایشرکءَ هـم کـپ ایت

☀️ دُژمـن اگاں مـورے بزاں کـدّء مـزارے

☀️ آپ جانءَ پاک کنـتءُ راستـی دلءَ

☀️ بارءَ په هُژ بُرّ مه بنـد

☀️ من سدو آں راه تلی دار انت
ناگهاں پِیشّءِ بُرّگءَ کا آں

☀️ آپءَ بنـد دار ایـت ، کارچءَ هـڈّ

@Labzank
telegram.me/Labzank

در آخر

ما حرف‌های دشمنانمان را فراموش خواهیم کرد.

اما سکوت دوستانمان را

هرگز

 

#مارتین_لوترکینگ


گڈسر ءَ
وتی دژمنانی گپّاں شموش ایں
بلے دوستانی بـے تـواریءُ هاموشـیءَ هِچ بر بـے هیال نبیں

مارتین لوتر کینگ

رجانک : توار
@Labzank
telegram.me/Labzank

سندی تہءَ شائرے ھمے گپاں اے وڑ گوش ایت
دھشت وارن جا سُور تہ سھبا
پر دوستن جو سُلوُک ماریتو

........ عــطا ءِ نــام ءَ ..........
...... کـــــورُشــــیں گــــال .......
راست کہ مکّاریں جنین دلـدار نـہ بیت
زنـد ھما بدواہ اِنت کہ ھچ یـار نہ بیت

دیـدگ ءِ رُژن اِنـت کہ دل ءِ پاھـار نہ بیت
سوب ھما ارس ءِ ھون بیت استار نہ بیت

جی پہ تئی پکر ءُ زانگ ءِ سر چمگ زِریں
سَلّـھیں آدینـک ءِ شُبـین لیـگار نـہ بیت

داتگیں دْراھیاں مہ زَر دْروگیں کِسّہ اَنت
داتـگـیں اَھـدانی پـد ءَ دیـدار نـہ بیـت

مارا مئے دوداں سـانکل ءُ زمـزیلاں کتگ
جنـگ ءِ پـڑ کبرسـتان بیت بـازار نہ بیـت

اے ھما راہ انت کہ نہ بیت کار پہ دیدگاں
اے ھما جاہ انت کـہ دلـوں درکار نہ بیت

ارش پیژگاہ ء چو سُھیل الماسی شِر بیت
تئی گمے انچیں گوں گماں سربار نہ بیت

تئــی جتــائـی پـہ آبلـہ پـادیـں راھیـاں
سْیھـہ شپے ھالو ھالو ءَ بامسـار نہ بیت.
🌴 کــــورُشــــیں گــــال 🌴
لبـزانکـی مجلـس کلمتـی کـاروان.

ستکاں منزلے چمّان انت

گنجاں گنجلی سوگاتاں
سوگاتاں دلے راهی کں
راهی امبوئیں درهباتاں
درهبات ملپدیں وابانی
وابانی کپوت بـے چاڑیں
بـے چاڑیں زرءِ دلبندءَ
دلبند آهوئی سر تلّ انت
سر تلّ آلکو شمشانی
شمشاں ترانگے گونجان انت
گونچان انت زهیرے زگریں
زگریں سر شپی اوماناں
اومان مهلبی آتاراں
آتار مهکجءِ ملگوراں
ملگور بیگهی دروهاپاں
دروهاپ دیدگیں آدینکاں
آدینک سلهئیں بالادے
بالاد کوکریں استین یے
استین دروشمے سنجینیت
سنجینیت نه گورتیں هئوراں
هئوراں مهپلی شنزوکیں
شنزوکاں زرے زیر آپیں
زیرآپ واهگءِ بوجیگیں
بوجیگ مرکبـے ستکانی
ستکاں منزلے چمّان انت
چمّاں منزلے ستکان انت

جاود دین

@Labzank
telegram.me/Labzank

بتل
☀️ پیل ستر پیر به بیت ، انگت سَد اُشترءِ بارءَ بارت

☀️ ناچوءَ ناچ نه زانت گُشتی زمین کَنڈ انت

☀️ پت کُشتگاں اوست نه بیت ، هونی په سانگ دوست نه بیت

☀️ پیر بئے میر نه بئے

☀️ چه دگرءِ ماڑیءَ وتی گدان بالا اِنت

☀️ روگن رچ ایت بلے نیکه سی من

☀️ تولگءَ بے هولّاسگءَ نه بیت

☀️ اینچو ڈُهلی نه نشتگ که سُرنائیءَ جاگاه به بیت

☀️ جَو جاهگی چیزے نه انت، سُهرو پُرانیگ نه بیت

@Labzank
telegram.me/Labzank

چاچ

☀️ کیچاں کیچر و ماماءِ شِنک
بوجان ئے مِرایت
بندان ئے چَرایت
( کُوٹگ)

☀️ بانور چه کُلءَ در کپیت کُلیں جهان روژناه بیـت
(ماه)

☀️ کُٹیں بُزُک کُٹیں شِنک ، وپتگ کرودءِ ساهگءَ ، گپتگ دو پادیں تولگءَ ، هون ئے ماں تلارءَ رتکگ انت ، ماه ئیں جَنِکءَ رُپتگ انت ، پیریں پتءِ شام بیتگ انت ، مهمان ئے هُشکءَ نشتگ انت
( بینگ )

☀️ بُزرءَ کاهءُ کاه دان اِنت ، جهلءَ آپءُ آپ دان اِنت
( چلیم )
☀️ سُهر سُهر انت چو آسءَ ، هَرّگ هَرّگ انت چو داسءَ
( کُروس تاج )

@Labzank
telegram.me/Labzank

وشـکنـد !!

یک مردے شربت والاءِ گورءَ اوشتاتءُ گُشگءَ لگّ اِت - مـنءَ شرّیں شربت جوڑ کن بـدئے که مـنءَ گوں کسےءَ مِڑگـی اِنـت -
شربت والاءَ وڑ وڑیں شربت جوڈ کتءُ آئیءَ را وارینت - گُڈّیءَ شربت والاءَ آئیءَ را جست کُت تو زاناں گوں کئےءَ جنگ کن ئے ؟ اینچو شربت ورگءَ ئے...؟

آئیءَ پسو دات - مـن گوں تو جنگ کن آں چیا که مـنءَ زرّ گون نیست -😄😄

☀️☀️☀️

@Labzank
telegram.me/Labzank

گوهریں دانـک

☀️ زنـدگـی یک وش رنگءُ بـے نهادیں کتابـے بلے باز کم مردم ایشیءِ وانگءَ زانـت -

☀️ بُزدلءُ لگور باز رنـدءَ مِـر اِیت بلے بهادرءُ تمرد یک رنـدے -

☀️ وتـی کردءَ هنچو به کـن که دومـی مـردمءَ وشـیءُ نـپ به رس اِیـت -

☀️ اگاں یکےءِ هیال شر بنـت آ هچبر ابیتکءُ تهنا نه بیت -

☀️ اگاں تئـی تهءَ شرّیں کِرد هست ته آهاں ڈنّءَ در بکن - دانکه تی پجّار به بیت پرچا که پُلّ چه وتـی وشبوءَ زانگ بیـت -

🌸🌸🌸

@Labzank
telegram.me/Labzank

گیدی کسّھے

,,ولی م ولی,,
,, نیکی ءَ نیکی نیکی ءَ بدی ,,

یک روچے مردے پیادگ گیابانے ءَ رَوَگ ءَ اَت کہ دیتّ ئِے درچکے بُن گپتگ ءُ سُچَگ ءَ اِنت!
مرد وھدے کہ نزّیک شُت گند ایت کہ مارے ھمے آس ءِ توک ءَ اِنت ءُ چہ آس ءَ در آیگ راہ ئِے نیست ءُ چیزّے پشت نہ کپتگ کہ بہ سُچ ایت ، اے مرد ءَ بزّگ کَیت ءُ وتی دست لَٹ ءَ آس ءِ توک ءَ راہ دنت مار اِشتاپ اشتاپ ءَ وت ءَ مرد ءِ ھیزران ءَ پیچ ایت ءُ مرد مار ءَ گوں وتی دست لَٹّ ,,ھیزران ,,ءَ چہ آس ءَ کشّ ایت ءُ یک کِرّے وتی ھیزران ءَ سُرین ایت ءُ چنڈ ایت کہ مار ایر بہ کپ ایت ءُ بہ رَوت بلے مار ایر کپگ ءِ بدل ءَ دیم پہ مرد ءِ دست ءَ رھادگ گیپت ءُ پہ مرد ءِ نیش جَنَگ ءَ وتی سر ءَ چست کنت !
مرد پہ ھبکّھی گْوش ایت ھاں مزنیں مرد چے کنگ ءَ ئے من ترا چہ آس ءَ در کت ءُ نیکی یے کت! نیکی بدل ھمیش اِنت ؟
مار ءَ گْوشت ھَو زاناں تو نہ زان ئے کہ نیکی ءَ بدی !
مرد ءَ گْوشت چو نہ اِنت من اِشکتگ نیکی ءَ نیکی!
مار پہ نہ منّگ ءُ مرد پہ منّواری گُڈ سر ءَ شَور ھمے بیت کہ دگہ دوسے پھکدل ءَ جست بہ کن اَنت ، مار ءَ گْوشت پرواہ نیست بلے اِشتاپ کن کہ من وتی زھران ریچ آں ،
ھنچوش کہ مار ءَ وت ءَ مرد ءِ ھیزران ءَ پیتکگ اَت برزاد بیت اَنت ، یک ساپ ءُ سَلّھیں چمّگے دیت اِش کہ سارت ءُ روشنائیں آپے در آیگ ءَ اَت ؛
چَمّگ ءِ سر ءَ اوشتات اَنت مرد ءَ چہ چمّگ ءَ جست کت کہ چَمّگ نیکی ءَ نیکی نیکی ءَ بدی چَمّگ ءَ بے ھیش توت ءَ جْواب دات: نیکی ءَ بدی کے ءَ گْوشتگ کہ نیکی ءَ نیکی! مار ءَ سر ٹِنگر اینت ءُ پہ مرد ءِ جَنَگ ءَ آھیزگ بیت مرد ءَ گْوشت مار تو کمّے دل ءَ بہ دار ،
چَمّگ چتور نیکی ءَ بدی ؟
چمّگ ءَ گْوشت شما آ درچک ءِ پشت ءَ اَندیم بہ بَہ اِت ءُ بہ چار اِت ،
مار ءُ مرد نشت اَنت تاں یک رھگْوزے آتک گَرم ءَ سکّ تَورینتگ اَت ءُ تُنّ ءَ ھلاھوش کتگ اَت ھمے کہ مرد ءِ چمّ پہ چمّگ ءِ آپ ءَ کپت اَنت شگرے گپت ئِے ءُ چمّگ ءِ کِرّ ءَ نشت چہ سیر ءَ آپ وارت ئِے ءُ وتی آپداری ئِے پُرّ کت رند ءَ وتی دیم ئِے شُشت ءُ ھید ئِے ھوشینت اَنت رَوَگ وھد ءَ رھگْوزی مرد ءَ وت سْواساں مان دات ءُ پاد ئِے شُشت اَنت ءُ وتی دماگ ئِے سپا کُت اَنت ءُ گُلگلے جت ئِے ءُ چَمّگ ءِ سپائیں آپ ئِے سِلّ ءُ بے پلگار کُت ءُ پشت ئِے مان دات ءُ شُت!
چَمّگ ءَ مرد ءُ مار توار کت اَنت ءُ گْوشت ئِے شما وت دیت دگہ منی گْوشگ ءِ ھاجتے نیست مرد ءَ گْوشت ھَو ما اے رھگْوز ءِ نامردی دیت !
مار ءَ سر چست کت ءُ گْوشت ئِے واجہ منی وھد ءَ زوال مہ کن کہ من ءَ اِشتاپ اِنت!
مرد ءَ گْوشت تو کمّے اوپار بہ کن دگرے جست کن ایں مار ءَ گْوشت پَرواہ نیست بلے رند ءَ دگہ اینگُر ءُ آنگُر مہ کن ،
کمّے آ کشتر شت اَنت مزنیں کنرے گوں بَزیں ساھگے ، مرد ءَ گْوشت کُنر تو بلاھیں درچکے یے ءُ تئی ساھگ ءَ بازیں سُھل ءُ ترانی دیوان بیتگ مارا جستے ھست اُمیت اِنت کہ تو مئے جْواب ء َپہ الّمی دات کن ئے ؛
کُنر ءَ وتی سر چنڈ اینت ءُ گْوشت ئِے جست کن اِت ،
مرد ءَ گْوشت کُنر نیکی ءَ نیکی یا نیکی ءَ بدی ؟؟
کُنر ءَ ٹھکے جت ءُ درّائینت نیکی ءَ بدی کے ءَ گْوشتگ نیکی ءَ نیکی!!
مار چست بیت پہ مرد ءِ جَنَگ ءَ مرد ءَ گْوشت:
مار جان تو کمّے دل ءَ دار بِلّے کُنر وتی گپّ ءَ ھلاس کنت ،
کُنر ءَ گْوشت شما وت ءَ دیر بہ دار اِت ءُ بہ چار اِت.
مرد گوں مار ءَ دْرَچکے پشت ءَ چیر ٹَپّ اِت اَنت تاں باریں چے بیت ؟
شُپانکےگرم ءَ جتگ ، ھید ءَ میسّ اتگ ءُ چَہ شُد ءَ شپانک ءِ چمّ سْیہ تَرّ اِتگ اَنت ،
وھدے کہ شپانک ءِ چمّ پہ کنر ءَ ءُ کنر ءِ ساھگ ءَ کپت اَنت باز رازیگ بیت شپانک آتک کنر ءِ ساھگ ءَ نشت دم ئِے ساسارت ءُ کنر ءِ چیر ءَ بازیں کُنرے رتکگ اَت شپانک ءَ شر چت ءُ وارت ءُ پیلَکے شپانک ءَ گون اَت چہ کنر ءِ بَراں پُرّ ئِے کت ءُ کَمّے وَپت ءُ پد ءَ پاد آتک ءُ گوں وتی ٹالبُرّیں تَپر ءَ کُنر ءِ شاہ ئِے بُرّ اِت اَنت رَمگ ءِ دیم ءَ دات اَنت ،
اے نِدارہ مار ءَ ءُ مرد ءَ دیت اَنت کُنر ءِ گویاک بند بیت ءُ چہ شپانک ءِ بدیاں کنر ءَ ھچ گْوشت نہ کت،
مار پہ جزم پاد آتک ءُ گوں مرد ءَ گْوشت ئِے دگہ ھچ اِلّام میار پَدّر اِنت کہ من سوبین بیتگ آں مرد ءَ گوں لَپزوکیں گالوارے گْوشت ھَو تو سوبین بیت ئے بلے من ءَ یک دزبندی یے ھست ھمینچک اوپار بہ کن تاں من یکّے بہ گندان ءُ پہ وتی چورئیں چُکّاں کُلوھے دیم بہ دے آن ءُ وتی چُکّاں بہ گْوش آں کہ نیکی ءَ بدی تاں بہ زان اَنت ءُ منی پیم ءَ رد مہ کپ اَنت!
ھمے دمان ءَ روباھے مَلّان ءَ آتک ءُ رس اِت مار ءَ روباہ توار کُت ءُ گْوشت ئِے بیا اے مرد ءِ پیگاماں ببر ، روباہ نزّیک ءَ آتک ءُ دروت ءُ دْرھباتے ءَ رند جست ئِے کت گپّ بہ جن اِت مرد ءَ گْوشت واجہ روباہ من اے مار چہ آس ءَ در کتگ ءُ چہ سُچَگ ءَ نجات داتگ ھنّی مار منی سر ءَ بلاہ ھدا اِنت کہ من ءَ ڈنگ بہ جنت ءُ گْوش ایت نیکی ءَ بدی ،
م

ار ءَ گْوشت روباہ تو بہ گْوش نیکی ءَ نیکی ، نیکی ءَ بدی! روباہ ءَ گْوشت نیکی ءَ نیکی یا نیکی ءَ بدی بلے گپّ اش اِنت کہ من ءَ شمئے کسّہ ءِ سر ءَ شکّ ھست !
چتور مرد تو مار چہ آس ءَ کشّ اِت ءُ ترا ھچ نہ بیت ءُ مار ءَ ھم آس ءُ سوچک ءِ پد پر نیست ،
مرد ءَ گْوشت باور کن من چہ آس ءَ کشّ اتگ بلے روباہ ءَ نہ مَنّ اِت ءُ گْوشت ئِے من تاں گوں وتی دیدگاں مہ گند آں من چشیں شَر نہ جن آں ،
روباہ ءَ آسے روک کت ءُ گْوشت ئِے مار آس ءَ بہ رَوت ءُ تو گوں وتی دست لَٹّ ءَ مار ءَ چہ آس ءَ بہ کشّ ،
باریں تو چتور مار چہ آس ءَ در کتگ ؟
وھدے کہ مار شُت آس توک ءَ روباہ ءَ چپ ءُ چاگِرد ءَ آس مانداشت مرد ءَ وتی ھیزران تچک کت ءُ دلمانگ اَت کہ مار ءَ چہ آس ءَ بہ کشّ ایت کہ روباہ ءَ مرد مہ کن کت ءُ گْوشت ئِے بل کہ سُچ ایت سرجمیں روچے تئی سر ءَ ٹِلّہ اِنت پد ءَ چہ آس ءَ در ئِے کن ئے ؟
مرد من زان آں کہ نیکی ءَ بدی بلے من ءَ پتّو بزّگ آتک روباہ ءَ گْوشت ءُ پشت مان دات ءُ شُت کہ ھمے وھد ءَ شکاری مردے آتک ءُ چہ ھمے مرد ءَ جست ئِے کت کہ من ءَ روباھی پوستے گرز اِنت تو پہ اے گْور کِرّاں روباہ نہ دیتگ مرد ءَ گْوشت ھمے دمان اِنت کہ روباھے اے شیپ ءَ برزاد بیت شکاری دیم پہ روباہ ءَ شُت ءُ دیر نہ گْوست کہ شکاریگ ءَ گوں نیم جانیں روباہ ءَ واتر کت روباہ ءَ چمّ چست کت اَنت ءُ گْوشت ئِے:
گند ئے مار ءَ راست گْوشت نیکی ءَ بدی من ترا چہ مار ءَ در گیشّ اینت بلے تو من ءَ شکاریگ ءِ دست ءَ کوشارینت ،!!!

,, دُرگنج ,,
@Labzank
telegram.me/Labzank

وشکنـد

یک مردےءِ لوگ بُن گِپت - مرد جند لوگءِ کشءَ نشتگ ات - بازار مردم تچانءَ آتک انـت آسءِ توسگءَ لگّ اِت انت -
مردماں دیسـت که مرد وت هُشکءَ نشتگ - گڑا مردماں جُست کُت تئـی لوگ بُـن اِنت تو نشتگ ئے ؟
مـردءَ درّائینت : مـن هُشکءَ نه نشتگ آں بلکیں مـن هُـداءِ کِرّءَ دوا ( دعا) کنگءَ آں که هور به بیـت بلّے آس مِـراِیت 😄😄

☀️☀️☀️

@Labzank
telegram.me/Labzank

آسءُ هاکشانـی اِنت گریوگءُ زاری اِنـت چے نبشته کناں
هـر چهـار نـیـمـگا بزّگی واری اِنــت چے نبشته کناں

آزمـان ءَ سـر انـت آ دگـه راج گوں وانـگ ءُ زانـگ ءَ
پـه بلوچـاں مُـدام گـژن ءُ بیمـاری انـت چے نبشته کناں

انچـیں باریگـے اتکه منـی بُنـدر ءَ کـس کسئیگـی نه انت
هرکس بے هاجت انت هرکس بیزاری انت چے نبشته کناں

راجءِ ورناه که باندات ءِ اُوسـت انت وتی جندءِ سُدّءَ نه انت
کشّیت تریاک جان ءَ چـه بیـزاری اِنـت چے نبشته کناں

کازی بلّے تـو آڈالءُ ابدالےءِ پُـوچکـے بستـار تئی
سـر کتاباں بلے نام تئـی ساری انـت چے نبشته کناں

مُبـارک کازی

@Labzank
telegram.me/Labzank

سـید هاشمـی
بلوچـیءِ لسان الغیب
نبشته واجه صبا دشتیاری

لهتے روچ هبر اِنـت که سیـدءِ گالانـی دپتـر '' شکلیں شهجو'' ءَ من گالے شوهاز کنگءَ اِت آں گُڑا مے مزن شاهدربرجاهءِ یک ورنایـے که ایران شهرءِ مردم ات - منـی کارگسءَ اَتک - وانگی یے که منـی دسـتءَ دیست گُڑا پُرس اِت ئے که مـن چے کنگءَ آں - مـن گُشت که سیـدءِ یک گالے شوهازءَ آں - همینچکءَ همـے گال مـن شوهاز کُـت - ورناهءَ گُشت که په مـن بوان ئے گال ایش ات -

میار اَنت لنجیں زرانی مرادءِ مروارد...
چتور اوستءُ اُمیتانی پتّرءَ پیچاں

ورناهءَ گُشـت واجه ایشیءَ کمے گیشواری '' تشریح'' ءَ نه کن ئے - من کوشست کُـت گند آں ورناهءِ چمّانـی رُژن گیش بوان اِنـت - منءَ گُشت ئے واجه منّـت وار باں اگاں تیوگیں دستونکءَ په مـن بوانءُ تشریح ئے به کن ئے - مـن پدا کوشست کُت - ورناهءِ هُـب هنچو گیش بوت که دو سے دگه دستونک ئے وانگ پرماتءُ گیشواری پرمات ئے - دستونکءِ هزار دَروَریں گِسد گْواراں چه لاکوٹـے که پُر کُت گُڑا گُشت ئے واجه بلا شکءُ گمان سیـد هاشمـی بلوچـی زبانءِ '' لسان الغیب '' اِنـت -

اے یک دلپاکیں ورنایـےءِ که دلءِ راستـیں توار اَت -
☀️☀️☀️

☀️☀️☀️☀️☀️☀️☀️
@Labzank
telegram.me/Labzank

‌(هندوستانی بتل)

پہ پـوشاکءِ بدل کنگءَ زات بدل نہ بیـت

@Labzank
telegram.me/Labzank