زلم روت بُرز ءَ ءُ پدا ترّ ایت
سرکپ ءَ ھستیں ایرکپے ناچار

غنی آدیش بلوچی لبزانک ءِ دلستکیں ھمراہ ءُ سید ھاشمی ءِ شیدائیں مریدے اَت چہ غنی ءِ مرگ ءَ بلوچی لبزانک یک دلستکیں جھدکارے ءَ چہ زبہر بوت ۔۔۔۔بلوچی پاک نازینکانی سرا آئی ءِ تاکبند بلوچی لبزانک ءِ تہا جتائیں کارے اَت۔۔۔۔۔۔

وشّی بیا پدا وشّیں روچ
مهرانی گُلاں سینگاراں
درد ءِ میتگاں روپاں کن
کست ءُ کینگانی هاراں


پروشاں کن بن ءُ بنیاد ءَ
وت گِندیں پِڑے آدینکاں
جی په شیشگاں آ دیم گِند
دنیا ءَ راستی ءَ پیشداراں


علم ءِ کوکراں گواروکیں
گواریں پہ بلوچ راج ءَ مئے
مهر ءُ محبت ءَ سرریچ کاں
تنّیگیں دل ءِ آپداراں


هرکس راستی ءَ جَاه بیاریت
حقّ ءُ باطل ءِ میدان ءَ
راستی ءَ بِہ کَنت همراهی
هنچیں نوبتی راهچاراں


قولیں من نصیب شعراں گوں
راج ءِ پُسّگاں نازیناں
ربّ ءِ داتگیں زانت ءَ گوں
گالاں دل جَمیں کتّاراں


ناصر نصیب
باهو کلانی

@Labzank
telegram.me/Labzank

میزاں میزان ءَ منی وابءُ ھیالاں چہ درا

دل چہ بنداں تئی اندوہ ءُ گماں چو سستگ
کہ من دل گْوشتگ بلےزیادگیں دْروگے بستگ
ایشی ءِ اُپّارگاں سالے ءُ دو شش ماہ گْوستگ
یک دمانے بیت کہ دردانی دوارجاہ تْرہ اِتگ

مِنّت واراں تئی ایشیءَ نی مہ ٹوھین پہ ھُدا
میزاں میزانءَ منی واب ءُ ھیالاں چہ درا

وتی ملگوراں مہ شنگین منءَ بے سار مکن
شھد ءُ وش زیملیں گالاں گوں وتی گار مکن
واھگ ءُ دوستی ءَ مارا پدءَ بیگار مکن
چو منءَتْرند مچار ءُ دل ءَ واھدار مکن

دست بنداں کہ چَما راہ ءَ برو تَرّ پدا
میزاں میزانءَ منی واب ءُ ھیالاں چہ درا

چو منی بَھت ئیگ ءَ شپ پہ کسے ءَ سیاہ مبات
کسی بالاد ءَ گمانی چشیں مشکل مہ کپات
گوں تو ھانل منی اے یکّیں دُوا ھمراہ بات
وژدلیں کُلّ تئی دِلواھیں مُراداں گِندات

زیر وتی داتگیں سوگاتاں پہ وشّی ءُ رَزا
میزاں میزان ءَ منی واب ءُ ھیالاں چہ درا

...... سید ھاشمی


@Labzank
telegram.me/Labzank

سَیَد ھاشمی ءِ اَنگریں گال پہ زُبان دُژمناں

گُرّئے کہ تئی گَپسگ ءِ پسّو من نہ داتگ
من کاروان سالار تو گَپسوک بہ گَپسار

شَھکَور ءِ مڑا نیلّگیں گْورمانی نھنگ اِنت
کَنڈانی مَٹُونڑ! چے تئی بِست ءُ تئی بِستار؟؟

گْوندئے اَگاں بے اَیبیں سَراں اَیب پہ تَمَردی
پولنگ بیت تئی شال! تئی دوستار ءِ گْور ءِ شار

اَنگار بہ کَن ناشَری ءُ ناشَریں ھیلاں
دَنت ناشَری آریپّیں سَرَاں جَھندم ءَ اَنگار

سْیہ بَند ءِ دل ءُ زِرد زِر ءِ ھِچّ نہ چَنڈ اَنت
کْراک اَنت پُگُل، تْراک اَنت تَیَاب ءَ سَتَر ٹانٹار

چون رون بیت! چون موش بیت! چون سَجّ بیت! چون زاگ!؟
نَنگار گِلاں کَپتگ ءُ وپتگ تئی جُتکار

پہ نیکی ءِ پَدگاری ءَ چوش نیکاں مَہ گِرّین!
کہ نیکی ءِ گِرپد کَن اَنت تئی جِند ءِ پَداں گار!

کِرم کَپتہ سَما گَندگیں، گَھ اِتگ تئی ھَبَر دان
زِند چہ ترا بیزار اِنت ءُ مرگ چہ ترا بیزار

اَمب، اَمب ءِ بَر اِنت، زھریں کَرَگ اَمب نہ بیت اَمب
کَئی وَلّ ءِ نَوَلّیں بَرئے تو بے بُنیں بِھگار!؟

اُہ پہ ترا اُہ پہ تئی بے سر دَریں کاراں
زار پہ تو ءُ زار پہ تئی ھمکاسگیں ھمکار!

گْور بند ءَ ھَری سِند وتی! دِرّ دْروگ ءِ کَوَار ءَ
اَنگت پہ تو دَر بَند نہ اِنت، توبہ ءِ دربار

پہ زَرّ بھا زُرتگ اِت بَنّامی ءُ ٹاکور
پہ گالے ءَ گوں تو نہ بیت وَشنامی ءِ باپار

سر لانگوَی چَنڈینت اِت ءُ دلپْروش کُت اَنت بْرات
مرچی ھمے بْراتانی رِد ءَ نیست ترا بِستار!

چہ کِینَگ ءُ کَست ءَ وت ءَ بے راھاں مہ پِرّین!
گوں بے سَریں کاراں مہ کَن کُلّ ءَ وتی بازار

اُہ پہ چُشیں نام ءَ بدیں، زار پہ چُشیں زِند ءَ
سْیہ پہ چُشیں زَرّ ءَ کہ تئی پولنگ نہ بنت پلگار

شپ شام شَگالانی شُد ءُ گُژن ءِ مزار ءِ
دَر مَنتگ ءُ پَد مَنتگ ءُ بَھمَنتگ ءُ رَھگار

بلکیں گوں گِھیں شاہ ءِ کِراماتاں بہ کنت بود
زیر انگریں گالے منی زِرد ءَ وتی پِردار

رَھدار بلوچی نہ رَگاں ھون بلوچی
سوگند بلوچی ترا چون کَنت وَپَادار؟

شھسَسّا سید ھاشمی



@Labzank
telegram.me/Labzank

سید ھاشمی ءِ کتابانی pdf

▪️سیدگنج

▪️انگر ءُ ترونگل

▪️بْرتکگیں بیر

▪️سچکانیں سسا

▪️شکّلیں شھجو

▪️بلوچی بُنگیجی

▪️بلوچی سْیاھگ ءِ راست نبیسّگ

▪️ سید نِمدی

▪️میر گِند

▪️نازُک

▪️ شھلچہ کار

▪️گِسِد گْوار

▪️بلوچی زبان و ادب کی تاریخ

▪️تْراپکُنیں تْرمپ

#حسین_پناهی
رجانک ـ ریئسی
------------------------
من روچگ آں !!!
سجّهیں سال ءَ روچگ آں .
بلے دپ ءُ لاپ ءِ بدل ءَ منی سسا روچگ اِنت .
منی سسا ءَ اے هکّ نیست اِنت کہ مردمے ءِ بے ازّتے ءَ بہ کنت .
منی سسا ءَ اے هکّ نیست اِنت کہ مردمے ءَ زاه ءُ بد بہ گوش ایت .
منی سسا ءَ هکّ نیست اِنت مردمے ءِ مال ءُ مڈّی ءِ باره ءَ سسا بہ کنت .
منی سسا ءَ هکّ نیست اِنت یکّے ءِ زندگی ءَ تباه ءُ ویران بہ کنت .
منی سسا ءَ بائد نہ انت یکّے ءَ بهتام بہ جنت .
منی سسا ءَ بائد نہ انت یکّے ءِ سر ءَ زبردستی بہ کنت .
منی سسا ء بائد نہ انت یکّے ءِ دل ءَ بہ پروش ایت .
منی سسا ءَ بائد نہ انت دروگ بہ بُرّ ایت .
منی سسا ءَ بائد نہ انت چورواں چار ءُ وار مہ کنت .
منی سسا ءَ بائد نہ انت گوں مردماں زورانسری بہ کنت .
منی سسا ءِ بائد نہ انت وهدے کہ کم دستے ءَ گند ایت آئی ءِ نیمگ ءَ دلگوش مہ دار ایت ءُ آئی ءَ سرگوز بہ کنت .
منی سسا ...
جی هو من روچگ آں ،
بلے بس اچ ورد ءُ وراک ء روچگ نیاں ،
بلکیں پہ انسان بیگ ءَ روچگ آں ،
روچگ آں دانکہ گوں بهادری وتی زند ءَ بہ گوازین آں ،
روچگ بیاں داں مکیمی بہ بیاں .
جی هو من سجهیں سال ءَ روچگ آں .
سجهیں ساهتاں روچگ آں .
ءُ سجهیں دماناں روچگ آں .
رجانک : رئیسی
🌴 کــورُشــیں گــال 🌴

Besam:
Besam:
@Labzank
telegram.me/Labzank

@ رِداں راست کن اَت @
جُماءِ نمازءِ وھد ات ءُ مُلا نہ رستگ ات، یک دیوانگے سر کپت ممبر سرا کہ واز بہ کنت ، مردماں مکن کُت، بلے میتگءِ کماشےءَ ھکل کُت کہ بِل اتی کہ واز کنت ۔
دیوانگءَ وتی واز بِندات کُت گوشت کہ دُرستیں سَتا پہ پروردگارءَ اَنت کہ آئیءَ درست چہ دوءَ ( مات ءُ پِتءَ)پیداگ کُتگ اَنت ءُ دو جَنس (مردین ءُ جنین)ءِ تھا بھر کُتگ ۔
ءُ اِشانی تھاءَ لھتے ازگار کُت کہ منی شُگرءَ بِگر اَنت، ءُ لھتے نیزگار کُت کہ اوپار بکن اَنت ۔
بلے ناں ازگاراں شُگر گِپت ءُ ناں نیزگاراں اوپار کَشت۔
درستانی سرا ھُداءِ لانت بِبات ۔
مُناپکاں پہ نمازءَ رِداں راست کن اَت ۔
رجانکار - اکبال ھاشمی

آریپی ءُ بوهیری

چے کہر نہ ساز اِیت تئی گوں کینگاں لاپ سیری
کستاں گوں بہ بات بیگْواه تئی واجہی ءُ میـری

آیـوکـیں همـا پـدریچ پدّر کنـت همـے گپّ ءَ
بْراه اِت کے ءَ بـدواهـی زیـب اِت کـے ءَ هک زیری

تـرا هچّ میار پـر نیست سْـرمـب چاری ءِ منّـوگـر
سک دیر اِنـت چہ تئی پـگر ءَ آریپـی ءُ بـوهـیـری

تـولگ تبـیں نامـرداں مـرچی پد ءَ هال شِنگ اِنت
سنگینءَ گوں سیکّ دات اِش کئی سینگءَ سـی تیـری

آزمـان ءَ پـدگ بسـتگ آ راجـاں نـزانـاں تـئـی
کُـٹّ اِیـت کـدی باریں وت بْرات ءَ گوں گُْٹ گیری

یـک گامـے نہ گامین ئے پہ دیمروئی اے رنـگ ءَ
چہبار شُتگ روت اِنـت گـوں گْـوادر ءَ پلّـیـری

سـی سالیگـی سنگت زات ءُ زُریات ءَ بکنت توّاب
باز بہـتر اِنـت اِے رنگـیں دوست ءَ چہ گُش اَنت دیری

تـو شیر مـن روباه چـون دیر گْوست بہ کنت پـدّر
باریں داں کُجا روت مئے روباهـی ءُ تئی شیـری

تـو ایمنـی ءَ گردئے گـوں دشـمنءَ دسـت پہ دسـت
اتکگ چے ءَ زار پہ تئی ورناهـی ءُ مئے پـیـری

شہزانتـیں سیـد رَبّ ءَ ٹیکـی کُت بلـوچ راج ءَ
بہ کن اِت کہ سیـد کرزیـت پہ واهـگـے رنـدگیـری

هـر یکے وتـی زِیـد ءَ ڈولـدار اِنت ءُ وشنود اِنت
چے لوٹ اَنـت بلـوچ ڈیهـ ءَ پنجـاپـی ءُ کِشـمیری

شاهـی ءُ گـداهـی دْرسـت تو دات کن ئے یا رَبّ
بـرجان ءِ نسیـب ءَ کـن دو سُجـده ءِ شبّـیری

📝برکت برجان بلوچ

@Labzank
telegram.me/Labzank

سِستگیں اوتاگ

منظور بسمل

ما کہ وہدے 'بلوچ' کنیں، کُلاں پیش بائد ما وتی کرّ ءُ کشانی چارگءِ بدلءَ وتی جندءِ گْورجیگءَ سر بہ کشّیں بچاریں، چیا کہ ما مدام 'بلوچ' بلوچ کنیں، بلے وتی جندءَ شَید و بید کنیں۔

بلوچیءَ 'کوم'ءِ مانا مُچی، رُمب، گلگ، مانریچ، حاکوٹ، بلے وہدے ہمے رُمب ءُ گلگ، یک رہبندے، دودے، زبانے، ربیدگے، رسمے ءُ ربَیتے کہ ہوریءَ داریت تہ 'قوم' گُشگ بیت۔ قوم چہ تمن، تمن چہ ٹَک، ٹک چہ بولک، بولک چہ حاندان (لوگمان) ءُ حاندان چہ مردمانی ہوریءَ جوڑ بنت۔

اگاں ما اُورت بچاریں مابلوچی رسم ءُ ربیدگ یلہ داتگ انت، قومی منّ ءُ مراد کُشتگ انت،پہ دپ بلوچ بلوچ ءُ قوم قوم کنگائیں۔

سکندر وہدے ہندوستانءِ پُلپانچ کنگءَ روت تہ یک ءُ دو روچءَ داریت، وتی جاسُو پاسُواں شہر ءُ بازاراں یلہ دنت، روچ کہ کپیت، ہر نیمگا آسُکے روک بیت۔ سکندر وتی چارُوگاں پُرسیت کہ اے چی اَنت؟ آ پسو دینت کہ اے ترُون انت، تِین اَنت، نان پَچُکائی اِنت، کنوری آس اَنت، ورگ گْرادُکا اِنت۔

سکندرءِ ایمان کالبءَ بیت، سارتیں گِینّے کشّیت ءُ درّائینیت: "آ قوم کہ یک پرزونگےءِ سرا پہ تپاکی ورگ نہ وارت، آ جنگءَ چوں ہَمپَتّ بیت؟"

دیر نہ گْوزیت ہندوستان تاراج بیت، لُٹّ و پُلءِ آماچ بیت، ہر نیمگا تباہی ءُ بربادی بیت، آہ ءُ زار بیت۔

بلوچ راجی رہشون کہ ہمے 'رہشونی'ءِ نامءَ نہ کرزنت، کس نہ زانت کہ کےءَ اے بلوچ راجءِ 'رہشون' نامینتگ انت؟؟ ہرکس پہ دیم کمرزانی یے بہ جَن، کُرشی یے منڈین، "قومی ہیرو، قومی لیڈر، قومی رہنما، قومی رہشون" دگہ باریں چُنت بگر و بدار۔۔۔ دْرُست دْروگ انت۔

منی واجہاں کمّو دلگوشءَ گْور کن ات! شما تنیگا 'قوم'ءِ لبزی ماناءَ نہ زانگائے، اگاں ناں شما چُشیں بٹاک ہچبر نہ جتگ ات۔

"تُنّیگ ءَ بُز مِتکگ" ورّود ءُ جَتگانیں مہلوکءِ مانا ءُ چوَکّیں رمگءِ مانا یک، ہمک مُچّی ءُ رُمبءِ مانا 'قوم' نہ اِنت۔ قومءِ لہتیں لوٹ ءُ گزر اَنت، تاں آ پیلو مہ بنت، تو مہلوکءِ رُمب ءُ گلگءَ 'قوم' گُشت نہ کنئے۔

بلوچءِ بدبہتی کہ آئیءِ قومی وحدت ءُ یکّوی ہما اِنت کہ پْروشگ بوتگ، پدا ہچبر آ قومےءِ بستارءَ چِنئگ ءُ نزّارگ نہ بوتگ۔ بلوچءَ تنیگا آ راجی رہشون نہ رستگ کہ آئیءَ قومی پجّارے بہ دنت۔ ہرکس وت دلءَ میر اِنت کہ "من نہ کُشتگ ہلار نہ اِنت۔"

بلوچ قومءِ دستور 'بلوچی' اِنت۔ چہ بلوچی زبانءَ ابید، بلوچ زند رہبندءَ 'بلوچی' گُشنت۔ 'بلوچی' تنیگا نبشتاکی دْروشمءَ آرگ نہ بوتگ۔ دود ءُ ربیدگاں بگر تاں رسم ءُ رواجاں بیا، کُل سرزُبانی اَنت، وہد ءُ زمانگاں وَ مئے پیریناں یات بوتگ انت، بلے وہد گْوزان، پیرین مِران، نوکیں پدریچ آیان۔۔۔ دود ءُ ربیدگ بار گِران، چیرگْوچّان، بدلان، مِران، گار ءُ گور بُؤان انت، اگاں بلوچءِ راجی جاور ہمے بہ بنت، اے پدریچءَ رند بلوچ بے دود ءُ ربیدگءَ زندگ بیت، آ زند پہ بلوچءَ چونیں زندے بیت، حُدا گِہتر زانت۔

انچو کہ من پیسرا گُشت بلوچ سیاسی گل ءُ پارٹی کہ بلوچءِ نامءِ سرا 'آزادی'ءِ یا 'پارلیمانءِ' سیاستءَ کنگا اَنت، (اے سیاستے نہ انت، لُٹ و پُلے) بلوچی دود ءُ منگہاں سرپد نہ اَنت یا پہ زانت ڈالچار اِش کتگ اَنت، شمارا بلکیں باور مہ کنت، بلے من شمارا درورے دیاں، شما وت بچار اِت کہ چیزے وہد پیسر ہچ بلوچ سیاسی گلءِ دستور بلوچی زبانءَ نہ بوتگ۔ ہمے چندے سال اِنت کہ پہ دپ راجدوستیں چیزے گلءَ ہوش کتگ، وتی دستور (بلکیں) بلوچی زبانءَ نبشتگ انت، بلے چد و پیسر اردوءَ بوتگ انت۔ آ دگہ ہبرے کہ ہمے نبشتگیں دستورانی تہا 'بلوچی دستور'ءِ نام ءُ نشان نہ گْواہیت۔

لج، مڑاہ، میار، باہوٹ، بیر، بدل، مہمان، گندک، سور، پرس، اواچک، کُمک، اَشر ءُ دگہ بازیں راجی کیلو کہ (اردوءَ رجانک کنگ نہ بنت) بلوچ زندمانءِ مُہکمیں باسک ءُ بہر انت، چہ نامگپتیں راجی ءُ لبزانکی گلانی دستوراں انچو گار ءُ بیگْواہ انت، مردم نہ زانت بہ گْریت یا بہ کندیت۔۔۔

نُو ما بہ نندیں پرے گل ءُ پارٹیاں موتک بیاریں، زنگ بہ جنیں، گِلگ درشانی بہ کنیں، منی دلءَ ہچ نپ نیست، چرے کوریں کارءِ بدلءَ ما پہ بْراتی، پہ مُلک مردمی، پہ راجی ءُ مردم گِری اِشاں حال بہ دیئیں کہ:
"رہدربرءِ راہے دِگر ءُ مئے دگہ راہے"

گُڈسرا منی گوں بلوچ واہیں ہما گَلانی سروک کہ بلوچءِ نامءِ پُشتا آپ و لاپ اَنت، وتی منّ ءَ وتا بلوچءِ بیرکدار لیکنت، کُلّاں پیش وتی گَلانی دستوراں چمّے بہ جننت کہ آیا آ بلوچ قومءِ دستوری جہگیریءَ کنگا اَنت یا "تچوکیں آپءِ پُشتا کِشک رَندگا انت"

اَگاں چُشیں راجدوستیں گلے اَست کہ آئیءِ دستورءِ تہا بلوچی سَّڈ و مِنّ، دود ءُ ربیدگ یا رسم و رواج بلوچ راجی دستورءِ حسابءَ است انت، گُڑا بلوچءِ راجی گل ہما اِنت۔ اگاں ناں کُل پُوچ اَنت۔

بلوچ راجی دود ءُ ربیدگ زندگ بات انت.


@Labzank
telegram.me/Labzank

چَنڈگائیں چادر ءَ رمضان ءِ ماہ
ما نہ کُت نیکیں عمل اپسوز ءُ آہ

رحمت ءِ پرزونگ ءَ سیر ءَ نہ وارت
بخشش ءِ شَند ءَ نہ شُشتاں ما گُناہ

برکت ءَ نیکانی مارا ھم ببکش
دوست بنت مارا ولی ءُ نیک راہ

بخشش ءِ جمبر کہ تئی اوھِنگ کنت
نیک ءُ بد دار اَنت دل ءَ مِھر ءِ تَماہ
یوسف انیس
@Labzank
telegram.me/Labzank

رجانک اکبال ھاشمی
@ دومی سیر @
مردکےءَ شَور کُت کہ دگے سیرے کن آں، پرداچ سرجم بوت، کرار ات کہ جُمہءِ روچءَ نِکاہ بہ بیت ۔
جنینءَ ھال سر بیت کہ جُمہءِ روچءَ منی لوگ واجہءِ نِکاہ اِنت ۔
جُمہءِ شپءَ وپت اَنت، سہبءَ مردک پاد اتک جان شُشت، پُچ ءُ لبیس بیت ۔
جنینءَ جُست کُت کہ تَو ھال کن پُچ ءُ لَبیس ئے کُجءَ روگ ئے، ۔
مردءَ جواب ترینت کہ جُمہءِ نمازءَ روگءَ آں ۔
جنینءَ گوشت مروچی جُمہءِ روچ نہ اِنت۔
مروچی روچاں یک شنبے اِنت۔
من ترا وابءِ گولی داتگ تَو سَے روچءَ رند چہ وابءَ پاد اتکگے ۔
دگہ برے گِندے اگاں تَو انچیں ھیالے دلءَ بِدارے، گُڑا انچش کناں کہ کیامت روچءَ پاد بیائے ۔

@Labzank
telegram.me/Labzank

زند ءِ فلسفہ

اے زندگی سکیں مزنیں سوگاتے ءُ ھرکس ءَ وتی زندگی سک دوست انت. ھرکسی جھد ھمیش انت کہ من گیشاں چہ گیشتر زندگی بہ کناں ءُ شر ءَ چہ شرتریں آسراتیانی واھند بہ باں.
ادءَ گیشتریں مردم پہ وت ءَ زندگ بوھگ ءِ جھد ءَ انت.چوشیں مردم چہ مرگ ءَ پد ھاک بیت رؤت.
ھما پہ وت ءَ زندگیں کلاتے بست کنت، ھما دائم ءَ زندگ مانیت کہ وتی زاتی نپ ءُ آسراتیاں پُشت بہ جنت ءُ پہ دگر ءَ (پہ راج ءِ مچانکی نپاں) زندگ بہ بیت ءُ پہ دگر ءَ وتی زند ءَ ندر بہ کنت.
اصغر زہیر

@Labzank
telegram.me/Labzank

دستونک ۔۔۔۔ مجید عاجز

" دُزّپ ( زاھدان ) شھیدانی نام ءَ "

ماں آسے سَنگرینیت آپ ھوناں
کہ مرچی بُڈّ اِتگ دُزّاپ ھوناں

پہ کوریں دیدگانی کَورَگان ءَ
نہ مینیت ھِنّیاں سرگْواپ ھوناں

چہ سرباز ءَ بگر دانکہ کراچی
وتن مئے مَلّ اِتہ الکاپ ھوناں

سْرپان اَنت آسمی ءُ گْواڑگی پُلّ
کتگ ھر نیمگ ءَ میتّاپ ھوناں

منی دل چو شھیدیں زاھدان ءَ
پہ تْرمپے تُنّی ءُ تاھاپ ھوناں

بہ انگار اِت بدیں روچاں ، بلوچاں
بہ پِٹّیت زھرگ ءَ زھراپ ھوناں

بہ تْرکات اَنت مجید ءِ عاجزیں چمّ
مہ دنت آجوہی ءِ زنداپ ھوناں

‍ 📄 سرشون 1

🔺 سْیاھگ ءِ راست نبیسّی، گچینی پہ ندکاراں

✍ کازی ریھان

🔹@Balochiketabjah

‍ ‍ 📄 سرشون 2

🔺 سْیاھگ ءِ راست نبیسّی، گچینی پہ ندکاراں

✍ کازی ریھان

🔹@Balochiketabjah

‍ ‍ ‍ 📄 سرشون 3

🔺 سْیاھگ ءِ راست نبیسّی، گچینی پہ ندکاراں

✍ کازی ریھان

🔹@Balochiketabjah

‍ ‍ ‍ ‍ 📄 سرشون 4

🔺 سْیاھگ ءِ راست نبیسّی، گچینی پہ ندکاراں

✍ کازی ریھان

🔹@Balochiketabjah