نمیـرانیـں انـور صـاحـب خـان
کـورُشـیں گـال
تیر اَنت ءُ زھم ءُ ھَنجر اَنت بچکند ءِ دامن ءَ
ٹپـاں نگنـداں انور ءِ درمان بکنت کسے

چو انـور ءَ بُچک ایت گـُل ءِ نام ءَ کُنـٹگاں
تلکاراں لُنـٹ ءِ تُنگـیں نمبـاں بکنت کسے

نیمون ءَ گوات ءُ گْرند ءُ گروکانی انور ءِ
گُل ءَ بہ بیت چراگ وتا مھمان بکنت کسے

راھبند زُرتاں پازُل ءُ بالاچ ءِ انور ءَ
گپے چُشـیں نہ انت وتا ھیراں بکنت کسے

دردانی درگاہ ءِ دپ ءِ مُنجـار انور اِنت
ھست اِنت دگہ گم ءِ وتا دیمپان بکنت کسے

زنگ ءَ مجنت چو انور ء َ بھت طالع ءِ
لازم نہ اِنت وتارا پـریشـاں بکنت کسے

ماہ دروشم انت ءُ نازرکیں بالادیں ماھکان
نیست ایں دگہ کہ انور ءَ سوزمان بکنت کسے.
*نمیرانیں انور صاحب خان*
*کورُشیں گال*

@Labzank
telegram.me/Labzank

دِیدَگاں شَہرے بِہ بِیت ءُ باتِن ءَ جَنگل بہ کَنت
مَن چُشِیں وابے مہ گِنداں کہ دِل ءَ تْراوَل بہ کَنت

دِل ہَما زَہگ اِنت پہ گْرِیوَگ شرّ کنت کار ءَ وتی
تَئ ہَما گَم پہ من ءَ سَر بَئیت شات ءُ گَل بہ کنت

مَن تَئ سوگِند مَرگ ءُ زِند اِے دُنیا تُرِی
لَیلَڑی لاڑی بہ الہان ایت مَلّ ءُ مَل بہ کنت

مَئے دِگہ اِشکے.دِگہ دَردے.دِگہ گْرانِیں گَمے
آ .کس ءَ کہ دل ماں لاپ ءَ نِیست جیگ ءَ تَل بہ کنت

تلوَسیت کسّے اگاں پہ مَئے نِیاداں دائمِی
گِیمُرَگ مَیل ایت گُلاب ءَ.ساہِگ ءَ مَہتَل بہ کنت

رُوچ تئ آدِینک دِیم ءَ بَئیت بہ بیت دو ٹُکّرءَ
شَپ وتی پَجّیک بِسمل تئ نَسِیب ءَ کَل بہ کنت..


@Labzank
telegram.me/Labzank

سَیَد ھاشمی ءِ اَنگریں گال پہ زُبان دُژمناں

گُرّئے کہ تئی گَپسگ ءِ پسّو من نہ داتگ
من کاروان سالار تو گَپسوک بہ گَپسار

شَھکَور ءِ مڑا نیلّگیں گْورمانی نھنگ اِنت
کَنڈانی مَٹُونڑ! چے تئی بِست ءُ تئی بِستار؟؟

گْوندئے اَگاں بے اَیبیں سَراں اَیب پہ تَمَردی
پولنگ بیت تئی شال! تئی دوستار ءِ گْور ءِ شار

اَنگار بہ کَن ناشَری ءُ ناشَریں ھیلاں
دَنت ناشَری آریپّیں سَرَاں جَھندم ءَ اَنگار

سْیہ بَند ءِ دل ءُ زِرد زِر ءِ ھِچّ نہ چَنڈ اَنت
کْراک اَنت پُگُل، تْراک اَنت تَیَاب ءَ سَتَر ٹانٹار

چون رون بیت! چون موش بیت! چون سَجّ بیت! چون زاگ!؟
نَنگار گِلاں کَپتگ ءُ وپتگ تئی جُتکار

پہ نیکی ءِ پَدگاری ءَ چوش نیکاں مَہ گِرّین!
کہ نیکی ءِ گِرپد کَن اَنت تئی جِند ءِ پَداں گار!

کِرم کَپتہ سَما گَندگیں، گَھ اِتگ تئی ھَبَر دان
زِند چہ ترا بیزار اِنت ءُ مرگ چہ ترا بیزار

اَمب، اَمب ءِ بَر اِنت، زھریں کَرَگ اَمب نہ بیت اَمب
کَئی وَلّ ءِ نَوَلّیں بَرئے تو بے بُنیں بِھگار!؟

اُہ پہ ترا اُہ پہ تئی بے سر دَریں کاراں
زار پہ تو ءُ زار پہ تئی ھمکاسگیں ھمکار!

گْور بند ءَ ھَری سِند وتی! دِرّ دْروگ ءِ کَوَار ءَ
اَنگت پہ تو دَر بَند نہ اِنت، توبہ ءِ دربار

پہ زَرّ بھا زُرتگ اِت بَنّامی ءُ ٹاکور
پہ گالے ءَ گوں تو نہ بیت وَشنامی ءِ باپار

سر لانگوَی چَنڈینت اِت ءُ دلپْروش کُت اَنت بْرات
مرچی ھمے بْراتانی رِد ءَ نیست ترا بِستار!

چہ کِینَگ ءُ کَست ءَ وت ءَ بے راھاں مہ پِرّین!
گوں بے سَریں کاراں مہ کَن کُلّ ءَ وتی بازار

اُہ پہ چُشیں نام ءَ بدیں، زار پہ چُشیں زِند ءَ
سْیہ پہ چُشیں زَرّ ءَ کہ تئی پولنگ نہ بنت پلگار

شپ شام شَگالانی شُد ءُ گُژن ءِ مزار ءِ
دَر مَنتگ ءُ پَد مَنتگ ءُ بَھمَنتگ ءُ رَھگار

بلکیں گوں گِھیں شاہ ءِ کِراماتاں بہ کنت بود
زیر انگریں گالے منی زِرد ءَ وتی پِردار

رَھدار بلوچی نہ رَگاں ھون بلوچی
سوگند بلوچی ترا چون کَنت وَپَادار؟

شھسَسّا سید ھاشمی



@Labzank
telegram.me/Labzank

*گوس ماں گلباگ ءِ بھاراں بات ئے*
ایم شکاری 11/8/2018

واجہ ءِ پیدا بوگ یک بھارے اَت، واجہ ءِ زند پہ بلوچاں بھارے اَت، واجہ ءِ جند بھارے اَت، واجہ ءِ جُھد بھارے اَت۔۔
گوس بھار ءِ زند یک ھنچیں بھارگاھے اَت کہ نپ ئِے پہ سرجمیں بلوچراج ءُ بلوچستان ءَ اَت.
بلے بژن کہ بھار ءَ مارا یلہ کت ءُ شت ءُ مارا تاھاپے ءَ دَور دات ۔
دوستاں زندمان ءِ گُڈّی آسر مرگ اِنت، بلے چشیں سر کہ استاد گوس بھار اِنت، گوں زندمان ءِ آسر بیگ ءَ بیران نہ بنت ءُ گار نہ بنت ، پمیشکا من پہ شانے گوش آں گوس نمیران اِنت ءُ آئی ءِ بھار ءِ پُلّ ءُ گْواڑگ مدام ماں ماتیں بلوچڈیھ ءَ سرسبز اَنت.

من لوٹ آں گپ ءَ گْونڈ گران ءَ کمے واجہ ءِ زند ءُ ازم ءِ بارہ ءَ چیزکے بہ نبیس آں:
آ وشکدّ ءُ بَز بُروان،سیاھتابیں مرد 1954 میلادی ءَ ماں اورماڑہ ءَ اسلامی بازار ءَ واجہ مھمد ھسن ءِ گِس ءَ ودی بوت،
واجہ ءَ ماں کراچی ءَ داں MA (لیسانس) ءَ وتی وانگ سرجم کت۔
واجہ ءَ پہ بلوچراج ءِ وشھالی ءُ دیمروئی ءِ ھاتر ءَ لبزانک ءُ سیاست ھردوئیں پڑاں بے بْرمشی دروشمے ءَ سک باز ءُ وشیں اندازے ءَ کار کتگ ءُ پہ راج ءُ زبان ءَ مدام پگر مند بوتگ۔ ھمے بازیں پانکجنی ءُ مھرانی سَوب ءَ واجہ 1981 داں 1986 ءَ بزاں پنچ شش سال ءَ مَچ ءِ بندیجاہ ءَ بندی کنگ بیتگ.
واجہ بھار 1986 ءَ بگر داں پنچ سال ءَ بلوچستان نیشنل مومنٹ ءِ رھنما ءُ سکریٹری اتلائات (روابط عمومی) بوتگ۔
پد ءَ 2004 ءَ بلوچستان نیشنل پارٹی کہ آ وھد ءَ واجہ اتاءاللہ مینگل پارٹی ءِ سربراہ ءُ واجہ اکتر ھان مینگل کارمستر اَت، واجہ گوس بھار پاٹی ءِ سکریٹری اتلائات ءُ سَکاپت گِچنگ بوت بلے پد ءَ ماں ھمے یکیں سال (2004) ءَ چہ اے پاٹی ءَ دست ئِے کشّ اِت۔
ھمے رنگ ءَ واجہ ءَ اھوالکاری (صحافت) ھم کتگ، اھوالکاری ءِ بندات چہ روتاک توار مستونک ءُ روتاک استمان کوئٹہ ءَ بوت۔
ءُ گُڈ سر ءَ واجہ ءَ BNM ءَ رھشون ءُ باسکی دروشم ءَ وت ءَ ھوار کت، وھدیکہ رودرآتکی بلوچستان ءِ جاور نگیگ بوت اَنت ءُ پاکستان ءِ زلم ءُ زیادتی روچ پہ روچ پہ بلوچاں گیشتر بوّان بوت اَنت گڑا واجہ چہ اورماڑہ ءَ درایگ ءَ لاچار بوت، چہ اود ءَ درآتک روکپتی بلوچستان شستون(سراوان) ءَ آتک گوں وتگش ءُ ریڈو ءِ چِنگ ءُ شر کنگ ءِ کار ءَ گلائیش بیت ءُ وتی ھرچ ءُ درچ ءِ در ئِے جت.
گوں اے نگیگیں جاوراں وڑ وڑیں دلسیاھی ءُ مشکل واجہ ءِ سر ءَ آتک بلے وتی راجی ءُ زبانی جھدانی سر ءَ مدام جُنزان اَت ۔

ماں لبزانک ءِ پڑ ءَ استاد گوس بھار ھمک تھر ءَ سوھو ءُ زانتکار اَت
ھنچوش کہ آزمانکارے اَت، ھمے پیم ءَ لچھکار ءُ بنرھدربرے اَت بلے واجہ ءِ گیشتریں جھد سْیاھگ ءُ بلوچی رھبند ءِ گیشّ ءُ گیوار ءِ بارہ ءَ بوتگ ءُ اے پڑ ءَ استاد ءَ باز باز جھد کتگ.
استاد گوس بھار چہ ھما مردماں یکے اَت کہ سرجم ءَ سید ءِ رھبند ءِ منوگر اَنت(لھتکیں جاگھانی بگیریانی سر پہ در) ءُ شھسسّائیں سید ءِ ایرکتگیں بن ھشت ءِ دلجمیں دیم ءَ بروکے اَت.
پہ بلوچی ءَ بس بیست ءُ پنچ آب ءِ منوگر اَت مان اربی سْیاھگ ءَ ءُ اے بارہ ءَ وتی کتاب "بلوچی لیک وڑ" (دومی پشتانک) ءِ تہ ءَ گوں بازیں زبانانی دروراں گوں منانک گیشتر گپ جنت ءُ گْوش اِیت کہ اربی سْیاھگ پہ بلوچی ءَ ھرچ وڑ ءَ گھتر ءُ شرتر اِنت .
(واھگ دار اے کتاب ءَ اَلّم ءَ بہ وان اَنت)
ماں لبزانک ءِ پڑ ءَ واجہ ءَ سک باز جھد کتگ ءُ بازیں کتابے ھم نبشتگ ئِے کہ چرایاں لھتے ایش اَنت :
1۔ بلوچی دریاب (بلوچی لچھکاری ءِ وزنانی بارہ ءَ اِنت)
2۔ بلوچی لیک وڑ (اولی پُشتانک، سید ھاشمی ءُ ھاجی کیوم بلوچ ءِ ٹھینتگیں رھبندانی بارہ ءَ چمشانکے
3۔ کرکینک (آزمانک)
4۔ ابیتکیں بلور (لچہ)
5۔ آجوئی ءِ چراگ (رجانک کُتگیں گدارے)
6۔ زرگْوات (آزمانک)
7۔ بلوچی لیک وڑ (دومی پشتانک، بلوچی سْیاھگ بارہ ءَ اِنت کہ کجام سْیاھگ پہ بلوچی ءَ گھتر اِنت اربی یا رومن؟)
8۔ باتیل (ھدامرزی ایسپ ھان ءِ نزآؤرتگیں لچہ اَنت)
ھمے رنگ ءَ واجہ ءَ پہ بلوچی ءَ بازیں نوکیں گال ءُ گالبند ھم جوڑ کتگ کہ مروچی اے گالاں ماں بلوچی ءَ وتی جاگہ وش کتگ، مردماں پسند کتگ اَنت ءُ کارمرز بیگ ءَ اَنت۔

استاد گوس بھار انچوش کہ یک ھدا دوست ءُ ھدا ترس ءُ پکّائیں مسلمانے اَت کہ وتی نماز ءُ ابابتاں مُجِدّ اَت ھمے پیم ءَ پہ دود ءُ ربیدگ ءُ زبان ءِ زندگ دارگ ءُ دیمروئی ءَ ھم ھدوک ءُ واھگدار اَت .
ھمے پیم ءَ آئی ءَ لوٹ اِت کہ گلام مھمد بلوچ ءِ دیستگیں واب ھم پورو بہ بیت
واجہ ءَ لوٹ اِت کہ بلوچستان آجو ءُ آباد بہ بیت
واجہ ءِ واھگ ءُ مراد ھمیش اَت کہ ھمک ھَند ءُ دمگاں بلوچی گَلّ ءُ وانگجاہ پچ بہ بیت ءُ بلوچی زبان دنیا ءِ زندگیں زبانانی سرپاں اوشتات بکنت.
بھار پہ اے امیت ءَ مرادیگ اَت کہ بلوچ راج آجو بہ بیت ءُ آیاں وت ءَ یک راجی پجارے بہ بیت ،بلوچانی پگر آجو بہ بیت ءُ وت ءَ پجاہ بیار اَنت ءُ گلامی ءِ سانکل پہ ھمیشگی چہ بلوچ راج ءِ دستاں' سندگ بہ بیت .



@Labzank
telegr

*گون الله ء پاکیں نام ءَ*

*ائیــــــــــد ءِ وَشیں روچ شمارا گوں وتـــــی لوگءِ مردماں،گوں سیادءُ وارسءُدوستءُ آزیزان،مرادبات* ❤❤

*وتـــــی هـــــکّاں شـــــرّی ءِ ســـــرءَ پَہل کن اِت* 🙏🏻🙏🏻

*مــدام شــادءُ آباد بات اِت.*


🌹 🌹 🌹

*باھو*


باھو منی سبزیں دھات
جمر سرا تئیگ ءَ شلات

باھو ماں باگ ءُ میزراں
وشیں تئی زید ءُ کھچراں

باھو کپاں ماں یاداں تئی
شمش ءُ گراپاداں تئی

باھو تئی میش ءُ بزگلاں
ماں روباھی ئے ڈن ءَ یلاں

دور صوفی ئے چو وشترات
باھو تئی پُلیں مستر ات

میر احمد ئے گنجیں کلات
پرواہ ترا ھجبر مبات ۔۔۔۔۔۔۔

شنریزی ءُ کھنال کشی انت
باھو تئی زید ءِ وشی انت

باھو ماں باگ ءُ لیستراں
موزی چہ درستاں شر تراں

کنڈ ءُ کلاں بیاٹاں تئی ۔۔۔۔۔
شیر ءُ شکر میٹاں تئی ۔۔۔۔

مئے پکنک ءِ جاہ مچُکی
ڈوھنڈ ءُ بھار ءُ کُلکی

آپ بِھ نہ کُٹیت باھو ئے
نیکیں دوا گوں ماھو ئے

گوات باھوئے لگیت دل ءَ
بے ھال کنت کاؔدر یل ءَ

مھمود کادر زھرانی


@Labzank
telegram.me/Labzank

وشـــکند❤️🌹💐🌺


@Labzank
telegram.me/Labzank

واجہ رسول اللہ ءِ دوزواھی

یکرندے جبرائیل علیہ السلام واجہ صلی اللہ علیہ وسلم ءِ کر ءَ آتک، واجہ ءَ دیست کہ جبرائیل گمیگ اِنت ، واجہ ءَ جست کت چِہ ھبرے کہ مروچی تو گمیگ ئے ؟
جبرائیل ءَ گْوشت کہ واجہ زی من دوزہ چار اِتگ ءُ پیداگاں پمیشکا من گمگیناں
واجہ ءَ گْوشت جبرائیل من ءَ ھم دوزہ ءِ بارہ ءَ سرپدی بہ دے کہ دوزہ ءِ جاور چون اَنت ؟
جبرائیل ءَ گْوشت:
دوزہ ءِ درستی ھپت تبک اَنت ،
چہ درستاں چیر چیری تبک مناپِک ءُ دوتل ءُ دوپوستانی جاگہ اِنت

چہ ایشی ءَ سربُر ششمی تبک ءَ مُشرک مان کنَگ بنت
چہ ایشی ءَ سرتِر پنچمی تبک ءَ روچ ءُ ماہ پرست مان کنگ بنت ،

چارمی تبک آس پرستانی جاگہ اِنت ،
سیمی تبک ءَ یھودی مان کنَگ بنت ،
دومی تبک ءَ ایسائی مان کنَگ بنت ،
چہ اے گپاں پد جبرائیل بے تْرک ءُ توار بوت!
واجہ ءَ گوشت کہ جبرائیل تو چے ءَ ھاموش بوت ئے ؟
بہ گوش اولی تبک چونیں مردمانی جاگہ اِنت ؟
جبرائیل ءَ گْوشت کہ اَے اللہ ءِ رسول اولی تبک ءَ تئی امت ءِ گنھگاریں مردم مان کنگ بنت!!
گوں اے گپ ءِ اِشکنگ ءَ واجہ سک باز گمگین بوت ءُ واجہ ءَ اللہ ءِ دربار ءَ دست چِست کت اَنت ءُ دوا ئِے لوٹ اِت ، سے روچ اے ڈول ءَ گْوست کہ واجہ پہ نماز ءَ مسیت ءَ آتک ءُ نماز ئِے ونت ءُ وتی ھُجرہ ءَ شت در ئِے بست اللہ ءِ دربار ءَ گریت ءُ دوا ئِے لوٹ اِت ؛
واجہ ءِ ھمراہ ءُ بیل ( صحابہ ) پریشان بوت اَنت کہ واجہ ءَ چون اِنت بس مسیت ءَ کیت ءُ پد ءَ ھُجرہ ءَ رَوت، وتی لوگ ءَ ھم نہ روت
سیمی روچ ءَ ابوبکر ءِ اوپار ءِ بند سِست ، آتک ءُ در ئِے ٹُکّ اِت سلام ئِے دات بلے سلام ءِ پسو نیاتک.
ابوبکر گریوان گریوان ءَ واجہ اُمر ءِ کِرّ ءَ آتک
گوشت ئِے کہ من واجہ سلام داتگ بلے منی پسو ئِے نہ داتگ تو برو بلکیں تئی پسو ءَ بہ دنت
اے واجہ شُت سے رند ءَ سلام ئِے دات بلے پسو نیاتک
واجہ اُمر ءَ سلمان پارسی دیم دات ، بلے انگت پسو نیاتک.
سلمان ءَ واجہ اَلی ھال دات ، ایشی ءَ وتی دل ءَ پگر کت کہ اینچکیں مزنیں مردمانی سلامانی پسو دیگ نہ بوتگ اَنت گڑا منی نہ روگ گھتر اِنت ، اے واجہ ءَ واجہ رسول اللہ ءِ لاڑکیں جنک بی بی پاتما دیم دات ، بی بی ھُجرہ ءِ دپ ءَ آتک ، در ئِے ٹُک اِت ءُ گْوشت ئِے ابا جان " السلام علیکم"
دوستیگیں چُک ءِ بْرمش کہ گوشاں کپت واجہ پاد آتک در ئِے پچ کت ءُ سلام ءِ پسو ئِے دات.
بی بی ءَ جست کت کہ ابا جان ترا چون اِنت کہ سے روچ بیت تو اد ءَ نشتگ ئے ؟
واجہ ءَ گْوشت کہ منی چُک!
جبرائیل ءَ من ءَ ھال داتگ کہ منی امتی ھم دوزہ ءَ رو اَنت ، امت ءِ گَم من ءَ نیل اَنت ، من رب ءِ درگاہ ءَ دوا لوٹگ ءَ آں کہ ایشاں پھِل بہ کنت ءُ چہ دوزہ ءَ بہ زھین ایت اِش ؛
اے گپانی گوشگ ءَ رند واجہ پد ءَ سجدہ ءَ کپت ءُ گریوگ ءَ لگّ اِت کہ یا اللہ منی امت ، یا اللہ منی امت ءِ گنھگارانی سر ءَ رھم بہ کن ءُ آیاں چہ دوزہ ءَ بہ رَکّین .
ھمے وھدی اے ھکم آتک کہ
#وَلَسوفَ #یُعطیکَ #ربُّک #فترضیٰ
منی رسول گَم مہ کن من ترا ھمینچک دیاں کہ تو رازیگ بہ ئے..
واجہ گل ءَ بال بوت ءُ گْوشت ئِے کہ مردماں! اللہ ءَ گوں من مُسام کتگ کہ کیامت ءِ روچ ءَ من ءَ منی امت ءِ بارہ ءَ رازیگ کنت ءُ من داں ھما وھد ءَ رازیگ نہ باں دانکہ منی گُڈّی امتی ھم بھشت ءَ مہ رَوت.
اے ھبرانی نبیسگ ءَ منی چمانی ارس رِتک اَنت کہ مئے نبی پمّا اینچک مِھربان ءُ دوزواہ اِنت ءُ ما بدلوکی واجہ ءَ چے داتگ ؟

گنوکیں دل ترا لوٹیت ءُ لوٹیت
دمانے سد بر ءَ لوٹیت ءُ لوٹی

نہ زاناں آدم ءِ زات ءَ را چونیں
شتگ ماھ ءِ سر ءَ لوٹیت ءُ لوٹی

منی پئیم ءَ پہ یکے دل نہ بندی
اے ملا مھشر ءَ لوٹیت ءُ لوٹی

کپوتے بئیت گنجیں مکران ءَ
کھیرے جمبر ءَ لوٹیت ءُ لوٹی

پت ءَ ساری پہ ھاک ءَ ھاک بوتگ
مبارک کمبر ءَ لوٹیت ءُ لوٹی

شھاری للک ءَ چٹیت ریکاں
اے دریا سمبر ءَ لوٹیت ءُ لوٹی

شپ ءَ وپت ءَ ءُ سھب ءَ واب کپتگ
نوں روچ ءَ دیگر ءَ لوٹیت ءُ لوٹی

تو ڈولی شیھ مرید ءِ باج بُرتگ
تئ ھانی چاکر ءَ لوٹیت ءُ لوٹی

ڈولی بیگ



@Labzank
telegram.me/Labzank

فایل صوتی از طرف ساسان

فایل صوتی از طرف ساسان

فایل صوتی از طرف ساسان

فایل صوتی از طرف ساسان

فایل صوتی از طرف ساسان