ودار لنجیں شپ:
سوچی ایت وهدئے دل تی سلام ءِ سرا

شراب انت هلاریں هرام ءِ سرا


پریانی بانک چه کل ء‍َ درآ

به چکّاس تیراں گلام ءِ سر ءَ

زر ءِ آشنائیں تیابے بہ بیت

بہ بیت گیمے دْرنگول برام ءِ سر ءَ

همک شپ تئی یادے من سرجم کناں

تو سهباں که مٹّین ئے کْرام ءِ سراءَ

او سرتاج تو درداں چه آزات بے

به دے مهر کمے په وام ءِ سر ءَ

سرتاج راهی 20018/1/8

چِد ءُ بے لَجّ تِریں مردم کے بوت کنت
کہ ترا پیژدھے دَنت ءُ گُش اِیت،
برو وتی برات ءَ بجن!
ءُ اَگاں تو نہ من ئے! آ تُشے ھم میاریگ نہ بیت...

ـــــ ـــــ ـــــــــــــ ـــــــــــــــ

مردم نہ بادشاہ ءِ چک اِنت نہ گلام ءِ
وتی جِند ءِ چُک اِنت
اے گپ ءَ
کسے پہ وت شات بہ کنت یا مہ کنت!

سیدھاشمی ... کورُشیں گال#
لبزانکی مجلس کلمتی کاروان..

دروت
چہ ھما روچی کہ ما بلوچ کوم اش پہ زور ءُ زیردستی ماں جھل ءُ تھاریں چاتانی تھا دور دیگ بیتگ ایں یک روچے ھم پہ گواھی نہ گوست کہ بلوچ کوم ءِ شیرگُلڑاں چہ زندمان ءِ وش تامیں شیر ءُ شربتاں یک گُٹے بہ تینگ اِت ایں!..

برے بیوس ءُ نیزگاریں کوم ءِ سر ءَ کاسگ چٹیں بزدلانی آس ، تپنگ ءُ تیر انچوش کہ ھور ءَ گوارگ ءَ اِت اَنت بلے کجا اَنت ھما کہ وت ءَ کوم جھگیر ءُ راجکماش گوش انت کہ اے درداں بمار ایت ءُ زند ءِ نگیگیاں بہ گن انت!!! ...

برے پہ ھکیں ھبرے ءَ بلوچ کوم ءِ شکرورنا ءُ نوک بروتانی گُٹ ماں پاھو ءِ ساد ءَ لوپ دیگ بنت برے برے .. پہ یک نیمونے ءَ مئے کوم ءِ نوک ورنا ءُ کماش ءُ راج ءِ سروکے ءَ پہ کجام یک پنڈل ءُ لالچ ءَ شھمیر کنگ بیتگ انت!!!...

برے برے ... رھشون ءُ ندکارے کہ سالانی سال ماں تَنک ءُ تھاریں بندیگجاھانی تھا جیل ءُ زمزیل بیتگ ات انت ءُ گوں وڑوڑیں تکلیپانی دئیگ ءَ کہ وتی سر ءَ برز مہ کن انت ءُ ھک ءَ پدّر مہ کن انت ءُ ھک ءِ پدا چے واتر بہ کن!

چرے پلیں گلزمین ءِ شکرورنائیں شیرگُلڑاں ابید ھر کس زانت ءُ سرپد اِنت، آ کہ سرپد نہ اِنت چوش ھمائی ءَ اِنت وتی پہ واب ءَ جتگ ءُ ایشی ءِ پاد کنگ ھم چہ وابیں مردمے ءَ سک تر انت کہ بازیں شیرزالے جنوزام بیتگ اَنت ، بے ھسابیں چک چورہ ءُ بے ھساب ءُ کتابیں مردم شُد ءُ تُن ءِ آماچ انت! کسے ھست اے کوم ءِ راھشون بہ بیت؟
کجا اَنت آ کہ ھک ءِ گروک اَنت ، کجا اَنت آ کہ راج ءِ جھگیر اَنت ؟ ایشی ءَ بزان ات کہ بلوچستان تُنیگ اِنت کہ چہ تُن ءِ ھلاھوش ءَ سجگیں ھند ءُ دمگ ءِ مردم سک تکانسر بیتگ انت ءُ وتی تکلیپ ءِ مشکلاتانی بابت ءَ گوں شما جھگیراں مارا ھمے گوشگ لوٹ ایت کہ شمارا اگاں مارا برگ نہ بیت شما پہ وتی گلزمین ءُ ڈیھ ءَ بچار ات کہ اے پریاتانی بھا گران انت اے داد ءُ پریات ءَ پہ ما یک نوکیں روچے ءَ ... سر ءَ ھوش بہ کن ات کہ اے یک نوکیں زندمانے ءِ مانزمان انت ...
ھارون اخلاقی
کورشیں گال#
لبزانکی مجلس کلمتی کاروان...

کاپلہ چو چون ءِ کپ ایت کشک ءَ
دانکہ سر مہ کش ایت کاپلہ سالار

بے شپانک ءَ کہ روت رمَگ ڈَنّ ءَ
تو بزاں وت کہ سوب ءِ کنت ھپتار

مارا ھم ھَکے ھست ھمے ملک ءَ
ھچ کسے مئے ھک ءَ نہ کنت انکار

ھک نہ انت چیزے کہ رس ایت مُپت ءَ
باید اِنت ھک ءَ پد بہ جنت ھکـدار

مئے *بلوچستان* جزوء ایران اِنت
پر چی ءَ کپتگ وار ءَ بے گموار!

آ کہ گموار اَنت دستی کوتاہ انت
آ کہ سردست اَنت خائن ءُ گَدار

مئے جوان جَٹّ ءُ جاھل ءُ تمبل
بیوت ءُ رسوا بر سر ءِ بازار

علم ءُ فرھنگ ءُ دانش ءَ محروم
تختہ ءِ مشق ھیلہ ءُ آزار

دکتر ءُ دارو گواچی انت دروگیں
ھر گور ءَ نال اَنت بَزگیں بیمار

وَنڈے کہ نام گپت اِنت بلوچانی
راہ ءِ نیم ءَ کیت یکبر ءَ بیت گار

گُشنگ انت مردم چہ شُد ءَ گریو انت
پَر گَلے کَند ایت میتگ ءِ سردار

آ کہ ھمشام انت لاپی ھالیک انت
پُر اِنت چہ زَرّ ءَ( پول ءَ)کسیہ زردار

لاگریں ھمال ءِ کوڈ ریش انت
گوں تجوری ءَ وشدل انت تجّار

دھکان کہ جانشود انت وتی ھیداں
چہ آئی محصول ءَ کٹ کنت ھٹار

آھر اے تبعیض ءِ دوا چی انت
کندگیں میر ءُ گریوگیں پاکار

ھمتے کن کہ وکت ءِ پریاد انت
آستیگاں لانچ ءُ ھمبلاں شھاھکار

من جواب دات کہ چوں کناں بیلاں
در کَپس شاھین ء نہ کنت ھنزار

من کجا اے کاراں کپاں آخر
روچ ءُ شپ مسلِ اُشتر ءَ بیگار

شپ کدی ھنگت کُٹ اتگ سیاھیں
ھنجرے آسمان ءَ نہ جنت استار

زُلم ءِ زلمات ءَ پوش اتگ دنیا
چیری چٹ عدل ءُ ھمت ءُ ایثار

زور ءِ چم کور ءُ گوشی سیہ چُپت انت
ھک ءَ پہ آسانی نہ کنت اِکرار

جو ترا دنت ءُ پیش ءِ کنت گندم
گوں زبان دراجی کنت ترا بیوار

زلم ءُ نادانی فطرت انت خلق ءِ
فطرت ءِ سندگ باز بیت دشوار

دائم ءَ دنیا ءِ رواج ایش انت
کجرو انت چرخ ءِ گردش ءُ رفتار...
نمیرانیں مولوی عبداللہ روانبد
*کـورُشـیں گـال*
لبزانکی مجلس کلمتی کاروان.

# رجانک اکبال ھاشمی #
وھدے کہ ھاجی سھودیءَ سر بیت گرم سک باز ات ۔
مھلوکءِ رَش اوں باز اَت ۔
ھاجی سرترگےءَ گِپت کپت ءُ بے ھوش بوت ۔
لہتے سھتءَ رند ھوشءَ اتک ءُ گوں وتی دلءَ جیڑگءَ لگ اَت کہ من کُجءَ آں ۔
گُڑا ھَیال کُت ھَو، من ھُداءِ لوگءَ مَرگءِ دُوا لوٹتگ ات ۔
ھو ھمشیں منی دُوا ھُداءَ وتی درءَ کبول کُتگ ۔
کَش ءُ گوراں چار ات، پاک ءُ پلگاریں جاہ اسپیتیں گُد، اسپیتیں چادر ، اِنچو پاک ءُ پلگاری اِشیءَ پاکستانءَ نہ دیستگ ات ۔
کماش سرپد بوت کہ من مُرتگاں ءُ اتکگ بہشتءَ سر بوتگاں ۔
گُشاد گُشادءَ چہ وتی تھتءَ پاد اتک کہ رواں وتی مھلءَ چاراں کہ چِینچو مزن ءُ شاھگان اِنت ۔
اے انچو کہ چہ کوٹیءَ در کپ ایت دیمءَ پِلپینی نرسءَ گوں کتابی ایں پُچ ءَ لبیساں گِند ایت کہ وتی کارا دز گٹ ات ۔
اسپیت اسپیت چو شیرءَ، بارگ بند ءُ کمان میانے اَت ، شَوک ات چو دُتُکءَ اَت ۔
کماشءَ چہ دِلءِ سوکءَ توار جت ۔
ماشا اللہ ماشا اللہ
ھُور الھین !!! ھُورالھین!!! ھورالھین!!!،.
ھسپتالءَ شورے چِست بوت، کش گورءِ درستیں نرس درست اتکاں کہ کماشءَ گرمءَ جتگ ٹگل اتگ ۔
بلے کماش دومی دنیاءَ اَت، سرپد بوت کہ ھپتادیں ھُوراں منی سرا اُرش کُتگ ۔
کموکے ھیرانیءَ پد گوں بزگیءَ گوشتی،
چو اوں زُلم مہ کن یک یکءَ بیا اِت ۔


@Labzank
telegram.me/Labzank

من هر کجا بباں گوں من هوار ئے تو/
هر نیمگ ءَ وتی داداں شهار ئے تو/
هوت ءَ ابید چہ تو کسّے بها نہ دنت/
هو *رب* مئے سکّی ءُ درداں کرار ئے تو.
(عبدالمالک حوت)

💐💐💐💐

بتل :

کُل پہ بانُکاں، ءُ رند پہ واجھاں...

پژدر ؛ لوگ ءُ گس ءَ شیرزالیں جن دار انت ' وھدے کہ سجگیں لوگ ءَ کار ءُ بار گوں ھمگوپگی بہ بنت آ لوگ ءِ وشنامی ءُ نامداری کار ایت اے درست لوگبانک ءِ زھمت انت کہ لوگواجہ ءَ وشنام کنت لوگ ءِ ھمتپاکی ءُ ھمکوپگی آسودگی کار ایت ھمے داب ءَ کسے کہ مال ءُ زر ءِ گڈ ءَ وش کسمتیں اولاد بر انت بلے اگاں مردم بے پد ءُ رند بہ بیت سیت پہ سیاد ءُ وارسان انت پہ آ مردماں رند ءُ پد ءِ نشان نہ مان ایت بے اولادی سک انت اللہ کس ءَ بے اولاد مہ کنات، نیگبھتیں اولاد پت ءُ مات ءِ اسا انت...
کورشیں گال#
لبزانکی مجلس کلمتی کاروان..

(رجانک,, بیّم,, خلیل جبران/ وسیم دازنی)

قائین چہ وتی واجہ ءِ لوگ ءَ دیم پہ جنگلءُگیاناناں شت- روچءِرُژنءَوتی ساہ یلہ داتگ ات- کہ ھمے دمان ءَ آیک وڑ ءَ اتکءُرس ات کہ یک کوھے ءِ بنےات-راہءِسپرءَآءُآئی چُکّ ءُ جنین مارتوس کتگ اتنت-پمشکا آ درست ھمے وڑ ءِ سر کپت ءُ مچ بوتاں، آھمےژندی ءُ بلے تُرس ءُ بیّم ءِ تھا واب کپت انت- آدرست واب اتنت بلے قائین وتی پگرءُھیالانی زِرءِتھاگارات- واب چرآئی ءِ چماں انچودیرات کہ ماہ چہ زمینءَ- آئیءَ وتی سرگ سیاہ ءُ تھاریں آزمانءِنیمگءَچست کت ءُ سک دیر کہ اودا آزمان گوں زمین ءَ یک بیت چارت ئےِکہ دیست ئےِیک چمّے آئیءَ چارگءَانت- آئی ءَ چہ ترسءَ درائینت,, من دنیگہ ھمائیءِ گوْراھاں-،، آچہ ترسءَپاداتک ءُ اوشتاتءُوتی چکّ جنین ئےِ ھم چہ وابءَپادکت انت ءُ دیمترا رھادگ بوت-ھمےترس ءُ بیّمءِتھا آماں یک رگستانےءَ رست-سِی شپءُسی روچ آئی ءَ سپرجت ءُ دانکہ چہ ریگستان ءَ دراتک-ءُیک تیابے ءِ گوْرءَسربوت- اےدریاءِنام اشور انت- آئی ءَ ماں اے درستیں سفرءِ تھاناں گوں وتی چکّاں گپّےجت نہ پُشتءَ چُک ئےِجت ءُ چار ات-
اےسپرءَآچہ رنگءُ رُو ءَ بُرتگ اتءُژندءُپندکتگ ات-نوں وھدےکہ آ دریا ءِ گورءَ رست گوں چُکّاں درائینت ئےِ,, نوں مئےمنزل ہمیش انت- ما پہ مدامی ھمدءَداریں-پرچیاکہ آ (تُرسءُبیّمءِ)جھانءِھدّءَسیم گوازینتگ انت- نوں ادا ایمنی ءُ پہریزی ماوتی زند ءَ گوْازینیں-،، بلے زمین ءِ سر ءِ نندگ ءَ گوں آئی ءَ دیست کہ آچم پدا آئی ءَ روک روکءَ چارگءَ انت- آسک نگیگ بوت ءُ چہ بیّم ءَ چیولت ئے :
"من ءَ پچ گِر ات،،
آئی جنین چکیں نماسگ آئی کشءَاوشتاتگ ات-ءُ شککے ماں دپءَات-ءُھشکءُھیرانی وتی پیرکءَچارگءَات- قائین ءَ گوں جوبال ءَ گوْشت کہ "آ دیمءِگدام ءِ تگردءَپربدے-،، جوبال کہ پہوالانی سردارات ءُ قائین ئےِوتی گوْرءَجاگہ داتگ ات- قائینءِ گپّ ئےِگپت ءُ گدامءِتگردےپردات ءُ آئی لمبانی سرءَلہتے ڈوک ءُ سنگ ئےِھم پردات- ھمےدمانءَ تیلا ءَ کہ آئی ءِنماسگ ات-چو سھبءِسمین ءَ وش ءُ چو پُلّ ءَ نرم ءُ ڈولدارات-جست کت ئے-,, پیرُک! ْچیز ءَ تو انگت گندگ ءَ ئے،،
ھو! من آ چمّ ءَ انگت گندگ ءَ اوں،،
قائین ءَ پسّو دات-
جوبال چست بیت ءُ سرے بست-دپ ئےِپچ لگوشت ءُ درّائینت ئےِ,, نوں الّم ءَ مارا یک دگےکارے کنگ لوٹیت-،،
آئی ءَ یک آسنے فصیلے پہ قائین جوڑ کنائنت ءُ آئی ءِ پشتءَنادینت بلے قائین ءَ انگت درّائینت,,آچمّ انگت ھم منا چارگ ءَ انت-،،
جوبال ءَ گشت نوں دگہ راہ نیست، مایک ڈنّےءِھرچاریں نیمگاں یک برزیں فیصلے بندیں ءُ ایشیءِتھا میتگے آبات کنگ بیت ءُ یک مھر ءُ مھکمیں کلاتےھم جوڑکنیں کہ ایشیءِدروازگ شرمھری ءُ ٹٹایگ ءُ کبل کنگ بیت ءُ اے فیصلءِچاریں نیمگاں حفاظتی گاٹ بدینت-نہ کسے اےنیمگ اتک بکنت ءُ ناں چار ات بکنت-اگاں کسّےبچاریت تہ آئی ءِچمّ درکنگ بہ بنت جوبال ءُ آئی ءِمردماں شپانی تھاریءَانچو تیرگوازی کت گشئےزاناں آ استارانی سینگ ءَ دِرّگ ءُ ٹُنگ کنگ لوٹ انت- وھدیکہ بان بندانی مسترتسال ءَ اےفیصل ءُ کلات جوڑکت انت گڑا آمیتگ ءِ تگردی گُدامانی جاگہ دری لوگ آرگءُایرکنگ بیت، کشءُ گورءِکوہءُجمپ گشئےزاناں تیل ءُ زمزیلانی تھاپتاتگ اتنت-کسےءَاگاں اےجاگہ دیست تہ آئی دلءَگْوشت کہ دوزہ ءِ یک بھرےھمیش انت کہ ماں زمینءِسرءَ انت- ھر دیم ءَ بندیں کوھانی مک بیگءِسبب ءَ دروازگ ءِ دپءَ اےوڑءَنبشتہ کنگ بوت :
,,اےجاگہ ءَ پادءُقدم ایرکنگ مہ بیت-،،
وھدیکہ شھر ءِ میتگ ءِکار ھلاس بیت تہ آھاں کلاتءِ نیمگءَدلگوش دات ءُ آئی ءِ تھاھروڑیں پہازکاری بند ءُ بوج کت بلے اےدرستیں کاراں ابید قائین انگت ءَ یک نیمگ ءَ ملور ءُ بےچاڑ نشتگ ات-
نی تیلا ءَ پدا پہ تُرس وتی پیرُک ءَ را جست کت :
"باریں بگوش کہ تو آ چم ءَ گندگ ءَ ئے یا ناں؟،،
من انگت آچم ءَ گنداں کہ منا چارگ ءَ انت-
قائین ءَ درّائینت ءُ پدا گوْشت ئے :
"نوں من اے سرزمین ءِ سرءَ نہ ننداں پرچاکہ من زاناں آ چم ادامن ءَ یلہ نہ دنت پمنّ یکے کَلّےبہ جن ات-من چو مردگءِوڑءَ ایشی تھا رواں کہ اودءَ کس نہ گندیت ءُ من کسےءَ نہ گنداں-،،
قائین ءِ گپّءِسرءَ یک جھلیں کَلّےجنگ بوت-وھدیکہ کلّ تیاربوت تہ قائین ءَ درّائینت,, ھو! اےبازجوان انت-، پرآئیءَ یہ کرسی یےھم ایرکنگ بوت- نوں آ کلّءِ تھا ایر دیگ بوت-
وھدیکہ قائین کرسیءِسرءَ نشت گڑانندگ ءِ سھتءَآئی پدادیست کہ ھما چمّ آئی ءَ چارگ ءَ انت-

@Labzank
telegram.me/Labzank

"بلوچ ءُ اُستاءِ تعصب"

منظور بسمل

چاکر ءُ گْوہرام پہ بلوچءَ دو معتبریں نام اَنت، بلے بلوچ کانفیڈریسیءِ پْروشوک ءُ خانہ جنگیءِ بدیں بُنپدءِ ایر کنوک ہمے ملّیں مترس انت۔ ابشانی سی سالی جنگ ءُ بجنگانی بروردءَ بلوچ "اِیسُپءِ کَتب"ءَ سرکتگ۔ کسے منّیت یا نہ منّیت، بلے دُنیا،زانت کہ "بلوچ" یک حاص ءُ ناسیں زاتے، ٹکّے یا بولکّے نہ اِنت۔ بلوچ ڈیہہءِ کُلّیں جہمنند کہ بلوچیءَ ہبر کننت، بلوچ دود ءُ ربیدگانی حسابءَ زندگ اَنت، مِلک ءُ میراس اِش است یا بُوتگ اِش، لوگ ءُ گِدان اِش است، چہ کرناں ہمے ڈیہہءِ جہمنند اَنت آ "بلوچ" انت۔

چے اُستا، چے جدگال، چے بْراہوی، چے درزادگ، چے گُلام، چے زگری، چے نمازی، چے رِند، چے ہوت، چے گچکی، چے رئیس، چے فِلان ءُ چے گُہمان۔۔۔

انگریزءِ آہگءَ پیسر بلوچ یک "کوڈے" ات۔ اُستا، دہکان، شْوانگ، جتّ ءُ اے دگہ کِسب ءُ کارانی ہنرمند، بزگر ءُ پوریاگر ہمدست ءُ تپاک اتنت، ہمراہ ءُ ہمکار اتنت، یکے دومیگءِ ہمباسک ات، ایمنی ات، وشدلی ات، زندءِ ہمک پڑءَ کار سواری ات۔ اَشر، اَواچک، بجّاری، پوڑی، وام، بدل، مَدت، کُمک ءُ دگہ باریں چے چے۔۔۔ ہواریں زندءِ بہر اتنت۔

"سِست ءُ سید کن حاکمی کن" انگریزءَ وہدے بلوچ گلزمین دیست، بلوچءِ مَجگ ونت، کسب ءُ کار چارت ءُ تپّاس اتنت، گڑا شیطانی دماغءَ کار کت۔ بلوچ ٹک ءُ بولکانی سرا کار بِنا بوت۔ چدو پد ہما بوت کہ مروچی ہرکس گندگا اِنت۔ ناں بلوچ یک کوڈے منتگ ءُ ناں بلوچ گلزمین یک اُستانے، کُل بہر ءُ بانگ، ٹُکر ٹیری، ہچ پشت نہ کپت۔

بژنی ہبر ایش انت کہ دو مردم مڑیت، زاہ ءُ لٹاں سیمی مردم مپتء حُدا وارت۔

بلوچءِ مستریں بدبہتی چہ ہمدا بنا بیت کہ آ پندلانی آماچ بیت، "ہنرمند ءُ کسب" ایرجنئگ بنت، کم درجہ ءُ کم نسل لیکگ بنت، "عیبی برسرء گیبی" بنت، کس دومیگ وتی درور نہ لیکیت، بْراتی ءُ دوستیءِ مُرگ بال کنت۔

اے ہبرءَ بزان ات کہ دُنیاءِ حاکمیں توان ءُ طاقتانی سرچمّگ ہمے "کم نسلیں ہنرمند ءُ کِسب سازیں سرگ ءُ پادگ" انت کہ مروچی پادمال اَنت۔

من اے نہ گُشاں کہ بلوچءِ اعلٰی ءُ بالائیں ٹک ءُ بولک کہ مزن مرّی ءُ شان کنگا اَنت، وتی کسب ءُ کارانی شونداریءَ بہ کننت، بلے اے ہبر تچک اِنت کہ دنیاءِ سرا دُز، ڈُنگ، کاچاک، شپک، گُریز ءُ غُنڈہاں دائما حاکمی نہ کتگ۔

یکبرے من پدا گوں وت دزبندی کناں کہ ائے بدبہتیں "بلوچک" وتی کبلہءَ راست کن! وتا پجہ بیار! پندلانی آماچ مبو! وتکوش مبو! سد ءُ یک دل بو! چہ وش نیاتکانی گیتکگیں داماں وتا پہریز! دشمنانی پندل ءُ رِپکانی شکار مبو! "بلوچ کوڈ" ءَ ایلنگی ءُ پولنگی مکن۔!!!

دْرُستیں ٹَکّ ءُ بولک وتی جاگہءَ شرپدار ءُ پُرمَنگِہہ اَنت، کس کسی چَمدار ءُ واستیگ نہ اِنت، کُل بروبر اَنت، پمیشکا ہمینچو زُوت تر ہوش کنگ بہ بیت گہتر اِنت۔ کست ءُ کینگءَ برورد نیست۔

اگاں "بلوچ"ءَ ڈیہے بُوت، بلوچءَ دیمرہی یے کت، گُڑا "اُستا" ءُ اے دگہ "کم نسلیں" کسب ءُ کارانی ہنرمند وتی سرا پہر بندنت۔

فزکس ءُ کیمسٹری اُستاءِ میراس اَنت، سلاہ ءُ ازباب اُستائیگ اَنت، کِسب ءُ ہنر اُستاءِ دستءَ اَنت، زانشت ءُ سائنس اُستائیءِ منت وار اَنت۔

بلوچ راج تپاک بات
تعصب گار ءُ بیگواہ بات


@Labzank
telegram.me/Labzank

Besam:
بلوچ ءُ اُستاءِ تعصب

دومی بہر

منظور بسمل

آ زمانگءَ کہ "بلوچ" وت واک ءُ وت مستر ات، کس مستر ءُ کستر نہ ات، ہرکس شرپدار ات۔ جولاہگ ءُ کتریاں گُد گْواپی کت، رَتک ءُ رَجءِ کار کت، مشک ءُ اینزک رتک، زِکّ رتک، گُد رَتک۔ زرگرءَ تلاہ سازی کت، چہ چمّگ ءُ جوہاں تلاہ، چاندی، بْرنج ءُ اے دگہ مادن کشّ ات ءُ سہت ءُ زیور جوڑ کت۔ شْوانگءَ مال چارینی کت، مالداری کت، شیر ءُ پنیر شر کت، روگن ءُ شیلانچ کت، پُٹ ءُ پژم نزّارت۔ آسن کارءَ داس ءُ تپر جت، زہم، کارچ، کاٹار، ہرّگ ءُ استرگ ساز ات۔
دہکانءَ ڈگار کِشت، بْرنج، گندیم، کاہ ءُ دان ودی کت، ہامینءَ مَچ پہرست ءُ ناہ جم کت، شیرگ گپت، پاچک ءُ پُرّو مِت۔ موچیءَ کَوش دوتک، چبّو شر کت، چکنکاری کت۔ جتّ ءَ ساربانی کت، اشتر بانی کت، دَزگْواپی کُت، داز کار گپت، ساد، تگرد، لچ، پات، گورپات، کپات، تور ءُ دگہ سداں ازباب ساچ ات۔ دارکار ءُ واڑہاں دار تْراشت، دارءِ ازباب ٹاہینت، تہت، بوجیگ، لانچ، ننگار، ہَرِن، کاسگ، تہتگ، ڈُہل، رہت، دستگ ءُ دگہ ہزاراں ازباب جوڑ کت۔ مید ءُ ملّاراں دریاوردی کت، ماہیگ ءُ مدگ گپت۔ ساز گر ءُ پہلواناں شعر جت، ساز کت، دمال کت، کسہ ءُ داستان کت، دل وشنود کت انت۔ دوچگر ءُ زِیکناں گُد دوچی کت، دستکاری کت، کُندری ءُ نکّاشاں نکش سازی کت۔ ساربانءَ ساربانی کت، بلوچ مڈی نہادیگءَ سر کت انت۔۔

ہمے رنگءَ "بلوچ" ایمن ءُ آسْراتیں زندے گْوازینگا ات۔ یک اشتراکی نظامے ات، ہرچ کارے بوتیں درستاں ہوریءَ کت۔ سورے، مرگے، پُرسے، شادہے، گمے، وشی یے، لیب ءُ گْوازی یے یا جنگ ءُ جیڑہےکُل ہمدست ءُ ہمکار اتنت۔ ناں کسے رِند ات ءُ ناں ہوت، کُل بلوچ اتنت، گوں یکے دومیگءَ شیر ءُ شکر اتنت۔ آ زمانگءَ زر نیست ات، بلے مہرءُ دوستیءِ فراوانی ات، دل پْراہ ءُ کُشادہ اتنت، تپاکی ءُ ہوری ات، چاردیواری نیست ات، بلے حیاداری ات، کُلانی لجّ یک ات، زمین دْرستانی ہواریں میراس ات، ہرکس ہرجاہ کہ دلءَ گشت جہمنند بوت، موسمی لڈ ءُ بار برجاہ اتنت، ہما دمگاں کہ ہرکسءَ وتی گیگ دیست لڈ ءُ بوج اش کت۔ بلوچ گلزمین شگرب تاں مگرب یکے ات، ہچ ٹک ءُ بولکءِ جدّی میراس نہ ات۔

اتک یک گندگیں دورے، "بلوچ"ءِ پتّ ءُ تپاک اش پْروشت، چمء زاہرا وتیگ اتنت، بلے چیراندری دشمنءِ دست ہوار ات۔ پْرشت ءُ پْروش، تعصب، کست ءُ کینگ پہ زور رواج دیگ بوت انت، میزان میزانءَ دیما جُبزان بوت انت، ہچ رنگیں گر و دارے نیست ات، سیاستداناں سیاست کت، نادانءِ دستءِ ناہ پچ گپت ءُ سکن ئِے دستءَ دات، "بلوچ" اش پْروش دات، زمین اش پُل ات، بہر و بانگ کت ہر رنگیں ناروائی یے کہ کُت اش کت دستان اش درد نہ کت، بُودناکیں سر اش جت انت، لُٹ ءُ پل اش کت، مالء مپت دلء بے رحم۔۔

مکاراں مکاری کت، پلینڈاں پلینڈی کت، غداراں غداری کت، "بلوچ" کہ سرجم ءُ برجمیں توانے ات، وتی گلزمینءِ بے سلاہیں سلاہ بندیں پاسپانے ات پروشت ءُ گار اش کت۔

زوراکیں وہد اوشتوکیں آپے نہ انت، زندگیءِ تہا روچ پہ روچ بدلی سدلی آیان انت، ہمے کہ "بلوچ" بود کنت، سرءَ چست کنت، زوراک گوں نوکیں رپک ءُ ہیلہاں اُرش کننت۔

21می کرنءَ زات ءُ زُریاتءِ ناولّگ یک انچیں شعوری یا لاشعوری پندلے کہ "بلوچ"ءَ چد و گیشتر مان شِردینیت، "بلوچ"ءَ یک دگہ جنگےءِ دیمپان کنت آ جنگ تعصبءِ خلافءَ بے ترس ءُ تکانءَ بِنا کنگی انت۔

بلوچ راجکار، سیاستدان، وانندہ، زانندہ، لانک بندءُ سرمچار بائد اے پیمیں نسلی تعصباں ایر بہ جننت، تِج پْروش بہ کننت، وتی ہنرمند ءُ کسب سازیں ہستیاں ہمینچو شرپ بہ دینت کہ آ شاہی شاہان بہ بنت، وتی کسب ءُ ہنراں پہ شانے دیما بہ برنت، لجیگ مہ بنت، عیب مہ کننت، بلے حیف! سد حیف کہ اے درگتا تنیگا دل سرداریں مزن مرّاں گوشے نہ سُرینتگ۔

بلوچ راج تپاک بات
نسلی تعصب گار ءُ بیگواہ بات

@Labzank
telegram.me/Labzank

سید ہاشمی ءِ بوتنءِ روچءَ خیرجان آرٹ اکیڈمی گوادرءِ سنگتانی نیمگءَ پیش بوتگیں سید نمدیانی یک سلسلہ ے اِیر کنگ بوتگ چرے نمدیاں یک نمدی ے پہ شما ندر اِنت کہ اے نمدی سید ہاشمیءَ ماسی زُھرہءِ نامءَ نبشتہ کتگ.



@Labzank
telegram.me/Labzank

زرّ ءُ زُریات

منظور بسمل

زات ءُ زُریاتءِ تعصب اے نہ اِنت کہ ماں دُنیاءَ ہلاس اِنت، تہنا بلوچ اے سِلّیں نادْراہیءِ آماچ اِنت، جی ناں! چو نہ انت۔

بازیں ڈیہہ ءُ دمگاں کم زانگیءِ سببءَ وڑے نہ وڑےءَ کم ءُ گیش تعصبءِ نادْراہی است اِنت، بَلے ہرکجا شعور اتکگ، زانت اتکہ، علم ءُ آگاہی اتکگ، آ راجانی تہا تعصب کنگءِ جند عیبے، تعصب کنوکیں مردماں کم علم ءُ بے زانگ لیکنت، نفسیاتی نادْراہ سرپد بنت، آہاں وانین انت، سرپد کننت کہ "ادب بالائے نسب" بازیں ڈیہاں تعصب کنوکاں گِرنت ءُ بندیگ کننت، مَلام کننت کہ دیمترا چُشیں گُہے مہ وارت۔

مرے سائنسی زمانگءَ دُنیا ٹکنالوجی سِٹّ ءُ دَورانی تہا اِنت، ہر روچ نوکیں سائنسی ازباب ءُ آزمائش دیما آیان انت کہ نوک وانندہ ءُ ناوانندہاں دست دپءَ انت پہ ابکہی سَیلِیگ اَنت۔

اے زرّیں زمانگءَ کسی کِرّا اینچو وہد نیست کہ آ زات ءُ زُریاتءِ اڑ ءُ جیڑہانی تہا بہ کپیت۔ دنیائی اے دگہ کار ءُ جنجال ہمینچو باز اَنت کہ کس نہ رسیت گوں۔ اگاں اے زمانگءَ چیزے درکار اِنت تہ آ اِنت "زانت"۔ ابید زانت ءُ زانگءَ بنی آدم ءُ دلوتءِ نْیاما بازیں تپاوتے نہ مانیت۔ بے زانگیں شپانکءَ کس وتی پساں ہم پہ چارینگءَ نہ دنت۔

زانتءَ ابید اے زمانگءِ دومی مستریں اِسپر یا زور زرّ اِنت، (زرّ بے زانتءَ کٹّگ نہ بیت)۔ زرّ بنی آدمءِ دْرستیں عیباں چیر دنت، دْراہیں نزوری ءُ کمبودیاں گار کنت، "گزّک" ءَ "گزّابیگ" کنت، "جتّ "ءَ "بزنجو" کنت، چُشیں سداں دَرور ما ءُ شُما روچ روزینی زندگیءَ گندگاایں۔ "ہستیءَ گُلامے شرّ اِنت، نیستیءَ مُلوکءَ گرّ اِنت"

بلوچ ڈیہہ بہ بیت یا درملک ما چمء وت گندگاایں کہ "بلوچ" چہ وت ءُ "کم دَرجہیں" مردماں سانگءَ زُورگا اِنت۔ اے سانگ بندیانی سبب دو اَنت، یکے مہر ءُ دوستی، دومی پہ ازگاری ءُ نیزگاری۔ چرے دروراں ما سرپد بیں کہ اے زمانگءَ زاتءَ بودناکی چیر دنت، زرّ زاتءَ بدل کنت، چُشیں بازیں درور مئے دیما است کہ مردم ازگار بوتگ انت آیانی زات بدل بوتگ انت، سانگ ءُ سُوراں یا لڈ ءُ ریچاں بازینےءِ زات بدل کتگ، زات چُشیں مُہریں تئیلے نہ اِنت کہ سِندگ مہ بیت۔

اگاں من بُگشاں کہ "بلوچ" یک زگریں زاتے یا نسلےءِ نام نہ اِنت تہ منی دلءَ من رَد نہ باں۔ "بلوچ" ہواریں زات ءُ زُریاتانی راجے، بلوچانی تہا چُشیں ہچ زاتے نیست کہ آ سد در سد زگر ءُ پَیاپ اِنت، پمیشکا اے بٹاک ہچ رنگیں مانا ءُ اَرزشتے نہ داریت کہ "من" شر زاتے آں، "تو" کمزاتے ئے۔

منی اے چاریں دانکانی مُول ءُ مُراد کسی دلگْرانی ءُ دل آزاری نہ اِنت۔ اے کُلیں کِسّہ چہ بلوچ چاگردءَ ڈن ہم است انت۔

نسلی ءُ زُریاتی تعصباں چُشیں بُنے نیست کہ آ زندگ دارگ بہ کرزنت یا مُہکم کنگ بہ بنت۔

وہدءِ زوراکیں ہار، زرّ ءِ تمردیں جوپہ ءُ زانتءِ روژنائیں شہم اے نزوریں رسم ءُ رَبیتاں مئے چمءِ کَلّ ءَ لیپگ کنان ءُ روان اِنت۔

راج ہر چُند کہ دیمروی کنان بنت اے پیمیں بے روتگیں نادْراہی ءُ پون ہلاس بُؤان بنت۔

بلوچ راج پہ زانت تپاک بات
تعصب گار بات


@Labzank
telegram.me/Labzank

(گوشکند,, پھٹانے ءَ مُشوک یلہ دات،، طارق پیشکانی )

پھٹانے شُت مُلّا یے ءِ گوْر ءَ ءُ جست ئےِ کت :

پھٹان :- مولوی صاحب! جنّت ءَ مُشوک رس ایت؟

مولوی :- ھو! رستگ ءَ رس ایت بلے تُکّ ءِ جنگ ءَ ترا دوزہ ءَ روگ کپ ایت-
پھٹان :- مڑا! گڑا من مرچی ءَ پد بزاں کہ مشوک یلہ داتگ-،،

* کھیر ءِ ساھگ *

وشّیں کھیر ءِ ساھگ
سبزیں کھیر ءِ ساھگ
گیر کائے تو منارا
ھر پاسءُ ھر دمانا
تئی ساھگ ءَ من نشتاں
شعر ءَ گزل نبشتاں
گرماگ ءِ زگریں نیمروچ
یا کہ لِوار ءُ تبد اَت
تئی ساھگ پہ من سرد اَت
سر لمب ءِ کوکوانی
وشّیں توار گوشاں
نرم نرم ءَ ایر کپان ات
تاھیر رست زرد ءَ
چہ آواز ءَ شانتلانی
چہ گم جتیں ھیالاں
دست ءِ ند ءِ کمک ءَ
اسپیتیں تاک ءِ پُشت ءَ
تئی سارتیں ساھگ ءَ من
شعر ءُ گزل کماتگ
اے گپ من نہ مار اںت
تو ھم نہ زانتگ جزماں
(کہ) زوراکـیں بنی آدمے ھست
ھرس ءُ ھوس یـے دار ایت
چُک ے شُدیگاں لوگ ءَ
ھچ راہ ءُ در نہ گند ایت
گُڈّ ایت ترا بہا کنت
کوکواں کنت پُرسیگ
آواز ءَ شانتلانی
وش زیمریں تواراں
تئی ساھگ ءَ را سارتـیں
چہ شاعر ءَ جتا کنت

✍اسھاک رھیم


@Labzank
telegram.me/Labzank

: کجام اکس ءَ ترا بدیاں؟

کجام اکس ءَ ترا بدیاں؟
ہمے اکس ءَ کہ من تو ہور نندوکیں
کش ءَ مئے پیشّی یے وپتہ ءُ پُشت ءَ چار ءُ پنچ رنگ والا چیپُک آپ ورگ ءَ اِنت
دگہ سیائیں کُچکے نمبگ ءَ وپتہ
ہمے اکس ءَ ترا بدیاں؟

کجام اکس ءَ ترا بدیاں؟
منی سر بُنژ ءَ بانژ اِنت ءُ من ءَ شلوار پاد ءَ نیست
من ءَ را کُلفی یے دست ءَ
منی گُٹّ ءَ گُلیرے انچو لونجان اِنت گُشے سی تیری یے بستہ
ہمے اکس ءَ ترا بدیاں؟

کجام اکس ءَ ترا بدیاں؟
من ءُ شاہ جان ءُ عارف ہر سئے اوشتوکیں
من ءَ را لانکی یے بڈّ ءَ
ءُ شاہ جان کندگ ءَ اِنت دستے ٹال اِنت عارف ءِ نیم ءَ
ہمے اکس ءَ ترا بدیاں؟

کجام اکس ءَ ترا بدیاں؟
دگہ اکسے منی یک سنگتے ءَ دیریں کَشتگ
ہمے اکس ءِ تہا من دیوال ءِ دیما پُشت پِر اِنت یک کارے کنگ ءَ آں
ہمے دیوال ءَ نبشتہ اِنت
"یہاں پیشاب کرنا سخت منع ہے"
ہمے اکس ءَ ترا بدیاں؟

کجام اکس ءَ ترا بدیاں؟
دگہ ہم لہتیں اکس اَنت آ بلے چو آرٹ ءِ شکل ءَ اَنت
ہمے آرٹانی توک ءَ دو، سئے آرٹ اسکیچ ءِ توک ءَ انت
منی اکس انت کہ دیر اِنت ہاشم عثمان ءَ وتی دستاں گوں بنائینتگ ءُ من ءَ دات اَنت
ہمے اکساں ترا بدیاں؟

کجام اکس ءَ ترا بدیاں؟
ہمے اکس ءَ من لوگ ءَ ٹانکی ءِ کرا اوشتوکاں
من ءَ را پیپ دست ءَ اِنت ءُ جہل ءَ بالٹی یے ایر اِنت
منی ماسی اوں اوشتاتہ ءُ پنچے ٹال اَنت موٹر ءِ نیم ءَ
ہمے اکس ءَ ترا بدیاں؟

پھلان عمر


@Labzank
telegram.me/Labzank

*کـول ءُ کـرار ، کـول ءُ وادہ ' زبـان ، لبـز ءُ کبـز*
کول ءُ کرار بلوچ کوم ءِ دود ءُ ربیدگانی تھا یکے انچوشیں جوانیں دودے بیتگ کہ گوستگیں باریگ ءُ راجدپتر ھم آئی ءِ گواھی ءَ ھم دات انت کہ آئی پورہ کنگ ھژدری اِنت! پچے کہ آ کس ءَ کہ زبان، کولی مہ بیت بزاں کہ آئی ءَ ایمان ھم نیست اِنت...

کول ءُ زبان دئیگ ءِ ربیدگ، بلوچ کوم ءَ چہ ھما پیدائش ءَ گوں ھمراہ اِنت ءُ بلوچ کوم ءِ راجدپتر اے چیز ءِ گواہ اِنت کہ بلوچ کوم ء مردم کدی وتی کولاں نہ بج اِتگ ءُ مدام وتی کول ءُ کرار ء ُ زبان ءِ سر ءَ اوشتاتگ اَنت ! اگاں ما وتی اھدگیں سرگوست ءَ چمشانکے بہ دئین ءُ دور بچاریں کہ شیمرید ءِ داد بکشی ءِ داستان راجدپتر ءَ مِک اِنت ءُ اے گواھی ءَ ھم پدّر کنت کہ شیمرید ءَ وتی دشتار بزاں ھانی کہ چہ یک نیمگے ءَ شیمرید ءِ وتی ناکوزاتک بیت ءُ چہ دگہ نیمگے ءَ ھم آئی ءِ وتی دشتار ھم بیت اِنت بلے پہ وتی دادانی کول ءِ سر ءَ کہ ھر کس چہ من ءَ پشمبہ ءِ سھب ءِ سر ءَ داد بہ لوٹ اِیت شیمرید داد ءُ دھشت ءَ بند نہ بیت...

گڑا پہ ھما وتی کول ءُ لبز ءَ وتی دشتار ءَ بزاں ھانی میر چاکر ءِ ڈونبی چنگانی سئیت ءَ بکشات کہ باندا من ءَ چاکر تژن ءُ شگان مہ جنت اِنت کہ شیمرید ءَ وتی کول ءُ لبز وارت...

سجگیں بلوچ کوم زانت ءُ سرپد اِنت کہ راجدپتر ءِ تھا اے مستریں ردی اِنت کہ شیمرید ءَ کُتگ! پچے کہ دگنیا ءِ کانود ءِ تھا داد مال ءُ مڈی مِلک ءُ میراس ، سنج ءُ سلاہ ءُ وردنی ءُ ... چیز بنت انسان کدی داد دئیگ نہ بنت...

پہ چیا کہ ھانی یک انسانے بیتگ دومی یک جنین آدمے بیتگ کہ بلوچ راج ءِ تھا جنین آدم ءِ مزنیں ازتے ھست انت انچوشکہ ھانی گوں شیمرید ءَ گوش اِیت کہ تو داد ءُ مال ءُ مڈی بہ داتیں وتی سلاہ ءُ سنج گوں سواری اسپ ءَ بہ داتین بلے تو وتی دشتار مہ داتیں بلکیں تو چنگانی سئیت ءِ زبان چہ بُن ءَ بہ بُر ات ایں کہ گپ جت ئَے مہ کتیں اُو ادا ھانی کانودی ءُ راجدپتری گپ کنگ ءَ اِنت کہ ھچ کانود ءِ تھا نیاتکگ کہ انسان داد دئیگ بہ بیت! بلے راجی ءُ انسانیت ءِ مستریں ردی منی ھیال ءَ شیمرید ءَ کتگ بائد اِنت شیمرید ءَ بہ گوشتیں کہ من دشتار پہ شرت ءَ ایر نہ کرُتگ ءُ من ھانی پہ شرت ءَ ایر نہ کرُتگ ءُ من گوشتگ کہ ھر کس کہ چہ من ءَ داد بہ لوٹ اِیت من پہ داد ءِ دئیگ ءَ بند نہ باں دگہ ھرچ دادے شما بہ لوٹ اِت شی ء َبہ داتین بلے منی ھیال ءَ شیمرید ءَ کانودی ءُ راجی مستریں ردی اِنت کہ شیمرید ءَ کُت ءُ راجدپتر ءِ تاکاں نمیران اِنت! ....
🌴 کــورُشـیں گـال 🌴
لبزانکی مجلس کلمتی کاروان

شبِ برات ترا زور مان اِنت

یا هدا ءَ

من اَنچو اِش کتگ
کہ مرچی شپ تو نشتگئے ءُ!
تالہ هاں کِسمتاں بدل کنئے
من اِش کتگ
دگہ یک دپترے تو پچ کنئے
آ دپتر ءَ تو بند کنئے کہ!
ہرچی ما کتگ
تو درستاں پیچئے
یک مُدّامی جاهے دور دئے
اے نوکیں رِسک ءُ روز
اے نوکیں ماه ءُ سال
اے نوکیں درد ءُ رنج
اے نوکیں زندگی
اے نوکیں وشیاں
تو نشتگئے نویسگئے
من دست بنداں دعا کناں
بلوچ بلوچ ءِ روچ ءُ شپ!
دگہ بہ بنت منی هدا
بلوچ ءِ زندگی بدل بہ بیت
بلوچ پہ بْراتی ءَ زہبر مہ بات
بلوچ ءِ زَز گبر بدل بہ بات
من دست بنداں دعا کناں
هدا تو مالکئے
هدا تو هالکئے
هدا تو رازکئے
هدا تو واهدئے
هدا تو زانئے دراهیں جاوراں
ءُ سرپدئے بلوچ بزگ اِنت
اے زندگی کہ زندمان ءِ!
هاجتاں زہبر بہ بیت
اے شہر ءَ نام تی گبر بیت
بلوچ باهد چہ هزاباں در بہ بیت

اومان
@Labzank
telegram.me/Labzank

بلوچی زبان ءِ نبیسگ ءُ وانگ
مئے ماتی زبان بزاں بلوچی ءِ وانگ ءُ نبشتہ کنگ پہ مئی نودربراں کہ گوش اَنت یک کمے مشکل اِنت!
پہ چیا؟
پمشکا ماں مئے ڈیھ ءُ گلزمین ءَ ( کہ ما ، ماں ایران ءِ تھا زند گوازینگ ءَ ایں ) نیں کہ بلوچی زبان وانینگ بیتگ نیکہ جھگیراں جھدے کُتگ کہ سرکار پہ مئے بلوچ کوم ءَ وانینگجاھے جوڑ ئَے کُرتگ کہ ما وانگ ءُ نبیسگ ءَ سوھو بہ بہ ایں!

مروچی کہ ما بلوچی گپ ءَ ایں اُو ھر چے مارا ھست ءُ نیست اِنت اے مئے وتی مات ءُ پتانی برکت اِنت کہ ماں لوگاں گوں ما دپ ماں دپی گپ ءُ تران اِش کُرتگ ...

ھمے جھدانی برورد اِنت کہ کہ مئے گپ ءُ گال ، شعر ءُ شاعری ، ادب ءُ لبزانک سینگ پہ سینگ گردگ ءَ انت ءُ پہ آؤکیں پدریچ ءَ سر بیگ ءَ انت!

مروچی ما پہ ایشی ءَ کہ مئے زبان چہ دری ءُ ردی ءَ سرریچ اِنت بَش بَش مہ وریں ءُ یک دومی ءَ میار بار کہ کن ایں کہ تئی اُو مئی زبان ساپ ءُ پلگار ءُ زِگر نہ انت ، ھدا روز ھیرے ھما انگریز ءَ بدیات کہ واتساپ ءُ تلگرامی جوڑ کرت کہ مروچی ما زانگ ءَ ایں کہ سیاھگ چی ءَ گوش اَنت ءُ مئے ادبی ءُ لبزانکی جھدکار ءُ ندکار کے اَنت!

کول نمیرانیں مولوی روانبد ءَ ء
گوں کیا پریاد کناں باریں
ھچ کسی گوشاں نہ روت کوکار
گِلّہ چہ در کوماں کناں پرچے
مئے وتی برات نہ اِشکُن اَنت گُپتار
من نہ نالاں چہ دست ڈنیگاں
ٹَپ من ءَ مان اِنت از وتی کاٹار...

دگہ گپے ھم ایش اِنت کہ ماں بلوچ کوم ءِ زانتکار ءُ سردست ءُ جھگیراں چے بہ لوٹ ایں چے مہ لوٹ ایں سابکیں ھچ پہ ھچ بزاں مئے گپ گوں کوہ ءَ اِنت آئی ھم گپاں چپکا پمّا واتر کنت ... نی چتور بوت کنت کہ مئے گپ ءُ گال ھور ءُ تھور مہ بنت!

گوں اے وڑا دیمروئی دروگے اِنت ، اگاں دست ماں دست ءِ پُشت ءَ ایر بہ کنیں اُو پادا پاد ءِ پُشت ءَ گڑا مئے بلوچی زبان کم کم ءَ وتی جاگہ ءَ پہ دگہ زباناں دنت اُو بلکُل شموشگ ءُ گار ءُ بیگواھی ءِ آماچ بیت اِنت...

اُو منی لاڈُکیں بلوچ کوم ، کول نمیرانی مولانا روانبد ءَ :

حق نہ اِنت چیزے کہ رس ایت مُپت ءَ
باید اِنت حق ءَ پد بہ جنت حقدار
مئے بلوچستان جزوء ایران اِنت
پرچیا کپتگ وار ءُ بے غموار
آ کہ غموار انت دستی کوتاہ انت
آ کہ سردست انت خائن ءُ غدار...

اے وڑا کہ ما گندگ ءَ ایں اے داب ءَ ترس ءُ بیم روت انت کہ دانکہ آؤکیں چنت ماہ ءُ سال ءَ دگہ چہ مئی ماتی بلوچی زبان ءَ ھچ پد ءُ رندے مہ مان ایت ...

نی منیگ ءُ شمے اُو کل جھگیر ءُ سردستانی زمہ واری اِنت تانکہ پہ وتی بلوچی ماتی زبان ءِ گپ ءُ گالانی وانگ ءُ نبشتہ کنگ ءِ زندگ دارگ ءَ جھد ءُ کوشست ءَ دو برابر بہ کن ایں بنگیج ءَ چہ وتی لوگ ءَ بزاں گوں وتی چُک ءُ چوریگاں بلوچی ھبر بہ کنیں دومی ھم ھمیش اِنت کہ ھر چے دیوانے ءَ ھوریں ماں ھر گالردے "جملہ ای " ءَ دو ء سَے گال بلوچی نبشتہ بہ کنیں...

جھد بہ کنیں وتی نبشتھاں ھام پھم بہ کنیں دانکہ آ نودربرے ءَ کہ بلوچی وانگ ءُ نبیسگ ءَ سرپد نہ اِنت بزانت کہ ادا چے نبشتگ ، بلوچی زبان ءِ راہ ءُ راھبند ءَ واجھیں زانتکاراں ساپ ءُ پلگار کتگ ما بیا ایں وتی ماتی زبان ءِ نبیسگی بھر ءَ تاچ بہ دئیں کہ مروچی دنیا گوں ترندیں گاماں دیمروئی کنگ ءَ اِنت گڑا ما پہ چے پہ وتی ماتی زبان ءِ دیمروئی وت ءَ مہ تاچین ایں ...

وھدے کہ ھبر چہ دپ ءَ در کیت آ گار ءُ بیگواہ بیت اِنت اے نبشتہ اَنت کہ مان اَنت ءُ نمیران ء بنت، ند بزاں کلم زمزیلاں پروش ایت بلے کسے کہ بزانت ایشی ءِ بزانت ءُ مانا چی اِنت ... ھبر ءَ گونڈ گراں اُو منی بلوچ کوم ءِ بیل ءُ ھمبلاں بیا ات بلوچی زبان ءَ بہ نبیس اِت گوں ھر وڑیں سیاھگے ءَ کہ شمئے دل ءِ مول ءُ مراد اِنت ھما کہ شما زان اِتی راھت تر ءُ آسان تر اِنت ' بلے شمارا پہ ھما کس ءَ کہ شمارا دوست بیت بلوچی ءَ بہ نبیس اِت ءُ بلوچی گپ ءُ گال بہ کن اِت ' اُمیت اِنت کہ بلوچ ءُ بلوچی ءُ بلوچستان آبات ءُ میزران ءُ آجو بات...
شمے کستر پاد ھارون اخلاقی#
*کـورُشـیں گـال*
لبزانکی مجلس کلمتی کاروان

"سیرینءِکُچَکّ بباتاں بلے گَرِیبءِ چُکّ مباتاں"

من گوں باں بندان روزنداری کارءَ اِتاںءُ منی روز شش سد کلدار آت کاربوج کُنگءَپَد منءَ وتی مُزّءِ ششیں سد کیسگءَ اتنتءُ من دِیم پَہ لوگءَرَوگءَ اَتاں منءَ گِیر آتک کہ منی چُکّانی ماتءِ دل پَسءِ گوشتءَ بند اِنت.من اے گَپّءَ ھم سرپد اِتاں کہ منی لوگیءَ نیپگ انت من چہ پیریناں اے گپ ھوں آشکتگ آت کہ نیپگیءَجنیادمےءِ دل چیزےءَ مان ببیتءُ اگن آھیءَ ھما چیز مہ رسیت گڈا آھیءِ لاپءِ چُکّءِ چمّ کانٹ بنت.مُردنی اِنت منی دلءَ ھوں ھمے گپّ آھگا اَت کہ چوش مبیت کہ منی جنینءِ لاپءِ چُکءِچمّ کانٹ ببنتءُ ھمسروگ ئےکانٹی بہ گشنت ءُکلاگ ئے بزیر آنت پمیشا من گوشتءِ دکانےءِ دیما اوشتاتگءُ جیڑگا اتاں باریں کیاسے گوشت بزیراں یا نیم کیاس؟ من ھمے گڈءُ منجءَ اتاں کہ اناگہءَ پراڈو گاڑی ے ھمے دکانءِ دیما اتکءُ ١اوشتات مردے چہ گاڑیءَ ایرکپت تچکءَ گوشتءِ دکانءَ اتکءُ گوں دکاندارءَ گشت ئے چہ اے پسءِ گوشتء پادے گوشت کشّءُ تُرنسءُ منءَ بدئے. دکاندارءَ پادے گوشت تور اِت تُرنس اتءآھیءَرا دات مردءَ گوشت زرتءدیم پہ گاڑیءَ شت گاڑیءِ پشتی دروازگ ے بوتکءُ ھمے پادے گوشت ئے زنڈسرگیں کُچکےءِ دیما دات کہ گاڑیءِ ڈِگیّءِ لاپءَ بندوک آت .کُچکّ گوشتء ورگاَ اتءُ مردکار کچکءِ سَرگءَ لگاشگءَ ات... من دلءَ گشت ُکہ من ھما انت کہ پہ کیاسءُ نیم کیاسءَ دل جیڑگا آں بلے اے مردءَ تچکءَ پادے گوشت گپتءُ کچکءِ دیما دات. من دلءَ گشت مردماں راست گشتگ کہ "سیرینءِ کُچکّ بباتاں بلے گریبءِ چُکّ مباتاں"

(بوہیر کُلانچی)


@Labzank
telegram.me/Labzank