کِشک ....... خالق ارمان

اے کِشک گپ جنت!!!
بلئے،،
اے کشک مردمے نہ اِنت
اے کشک پیچ وارت ءُ بس!!!
اے کشکءَ دستءُ پاد پِر کت ایں
اے کشک ءَ بلّے گام جت
تو چے گُش ئے ؟
اے کشک باندا مردمے بہ بیت
گنوک بیت
اے کشک باندا گپ کنَگ نہ بیت
اے کشک ءِ سُنٹ ءَ نود دز جنت اَنت
اے کشک نوک کیسگے بہ بیت
کجا پہ وام دنت منزلے
اے کشک مردمے نہ اِنت
اے کشک گپ جنت بلئے!!!
اے کشک ءَ دزماں دست بئے تہ تران کنت
اے کشک لھتے روچ پیسرا من جنگلےءَ ڈِیک دات
کپوتے بوتءُ نال اِتے
زہیرے بوتءُ گال اِتے
اے کشک ءَ کمّو یات گون ءُ لھتے ترانگانی بُو
اے کشک ءِ ایر گوات ءَ ٹنگِتہ دیوانگانی بُو
اے کشک پیریں کِسّہ ے
اے کشک ءَ لھتے راز گون
اے کشک مرچاں سوت جنت
اے کشک ءَ بلکیں ساز گون
اے کشک چماں گار کنت ،گبارءُ دَنز لڈّءُبار کنت
اے کِشک جِنترے ءُ من تو دنزے آرت بس !
اے کشک پیچ وارت بس !
اے کِشک مردمے نہ اِنت
اے کِشک گپ جنت ، بلئے

◆◆◆◆◆◆
@Labzank
telegram.me/Labzank

*دُزّ ءِ دل ءَ جـت*
*کَھـبہ ءَ تـپ گپـت*

اے بتل ھما جاگہ ءَ کارمرز بیت کہ اگاں کسے ءَ ردیں کارے کتگ یا کہ ماں بازار ءَ دُزّی یے بیتگ ، بلے کس نہ زانت کہ دُزّ کے انت وھدے کہ ھمے دُزّی ءُ ردیں کار ءِ بارو ءَ گپ بیت ھما کس کہ دُزّ انت ءُ کُتہ کاریں مردم انت چہ ترس ءَ کہ بلکیں مردم چہ منی کارست ءَ سرپد اَنت پیش کپ ایت ءُ دپ ءَ پچ کش ایت ءُ گلبجانک کنت کہ زان آں من بیتگ آن ءُ زان آں اے کار من کتگ..

گُڑا مردم گوش انت پلانی تئی نام وَ کس ءَ نہ گپت بزاں تو اے کار کتگ کہ تو ماں جلاں کپتگ ئے *کہ دُزّ ءِ دل جنت ءُ کھبہ ءَ تپ گیر ایت*

اشی ءِ پژدر ھم ھمے پیم انت
کہ وھدے ماں دیوانے ءَ چنت نپر نشتگ انت ءُ ھیا ءُ گیرت ءِ گپ ءَ جن انت چُشیں جاھاں ھیا دار ءُ پھک دامنیں زالبول ساڑایگ بنت ءُ دامن دست ءُ دور ساھت ویلانکیں جنین ایر جنگ بنت ھمے دیواناں نام گرگ بیت کہ پلانی سکّیں شرّیں جنینے ءُ پلانی کُربانے ءُ پلانی ءِ نام اش پلان جاہ گپتگ!

اگاں چُشیں دیواناں چُشیں جنینے نندوک بہ بیت گڑا آئی ءَ تپ گیرت کہ باریں اے منی ھال ءَ ھم سرپد اَنت
گوں وت جیڑ ایت کہ باریں اے جنین منی گوش ءَ جَنگ ءَ انت پمیشکا نشت کت نہ کنت ءُ پہ تپ ءُ دردے ءِ بھانگ ءَ چہ دیوان ءَ پاد کیت *بزاں کھبگ ءَ تپ گیرت*
پولکار/ ھـارون اخلاقی.
کـورُشـیں گـال#
لبـزانکـی مجلـس کلمتـی کـاروان.

دستونک

زبان ءَ اوں رسیت واکے
منی گنگی ءَ گو یاکے

من انچیں دمکے ءَ کریاب
نہ راہ منتگ نہ اولاکے

منی بالاد نزور انت سک
پدا دل چونیں زوراکے

پہ وت اوستے چڑکّہ تئی
پہ دلترکاں بہ بیت تراکے

اے گترانکیں لب ءِ ھوشام
ترھیت پہ پوچکی مزواکے

کبر لوگے پہ بے لوگاں
کپن اوں پمّا پوشاکے

اے درچکاں جنگلے یل دات
شت انت ویرانگیں ڈاکے

گنوکے چوریاں مان بست
پدا بازار ءَ رُست جاکے

آ چو اللہ ءَ زوراور
آ چو شیتان گروناکے

ترا جاوید مہ کوپاریت
بچار چو تلک ءَ چالاکے

ھبیب جاوید

@Labzank
telegram.me/Labzank

۔۔۔۔۔۔کلات۔۔۔۔۔

دل ءَ را گیر بُتکگاں
سباہ ءِ سنجیں ساھگ ءَ
سمین ءَ الوتے کُتہ
گوں مہپرانی وشبوھاں
چراگیں لئیبواں گوں نشتگان ءُ ساز اتگ
مں ایوکی ءِ بِہ تواریں زیمرے
نہ بوتگاں
تاں مئے دَوار ءِ پشگاھ ءِ
کہیر ءِ ٹُل ءِ جِنگُلاں
سُروز گونگیں ندارگے بِنا کُتہ
بِنا کُتہ شپانک ءُ شوانگاں
اے میہڑانی دنز رُستگاں
چو دیہی بستگیں کلاتے ءَ
ھوار بوتگاں مں گواتے ءَ۔۔۔۔۔
۔۔۔۔۔۔۔
۔۔۔جاوید دین۔۔۔

@Labzank
telegram.me/Labzank

دستونک

اِے راستے تَنگی اِنت، بیچارگی اِنت
ھمے ھال ءَ وتی دل دارگی اِنت

بچار تو آپسرے، سبزیں دیارے
اگاں جاھے دمے ساسارگی اِنت

گم ءَ چاگرد ءِ یا اندوہ ءَ جند ءِ
منی چمّاں مُدامی گْوارگی اِنت

چیا پَشت کپتگیں، سرپد جھان اِنت
نوں مارا ھم ھمے گپّ مارگی اِنت

گْوشگ ارزان نہ اِنت ھر جاگہ راست ءِ
بلے راستی زُبان ءَ آرگی اِنت

کَے ءَ گْوشتگ، کجام جاہ ءَ نبشتگ
ترا تائر شپ ءُ روچ نارگی اِنت

تاج مھمد تائر


@Labzank
telegram.me/Labzank

وہدءِ تہاریں میتگاں ہمراہ کنگ نہ بیت
آ نامے انچیں شیرکنیں ہرجاہ گِرگ نہ بیت

دل انچو ناتوان اِنت کہ ارسے اوں دَر نئیت
مرچاں وتی سرا اوں توازہ کنگ نہ بیت

چمّانی درپ شُشتگ ءُ ایر اَنت کہ بیائے تو
زیبائیءِ شراب کہ تاساں کنگ نہ بیت

داں زیکّءَ شئیر گُشتگ ءُ سہڑینتگ اَت وتا
بیا بیا او مہروان نوں گوں ما گِلگ نہ بیت

زہرئے کہ پرچا ریزگوں پاداں نہ لگّنت تئی
من مردمے آں گوں من چو کانچءَ پْرُشگ نہ بیت

لوٹاں کہ نوں بنِنداں تئی بیکءِ ساہگءَ
مرچاں کہ گوں من اے دلءِ پاداں روَگ نہ بیت

وہدءَ مُنیرؔ دمکے چُنیں آرت ءُ سر کتگ
نندگ نہ بیت ودارءَ شُہازءَ تچگ نہ بیت
@Labzank
telegram.me/Labzank

آزمانک

منی پیروک زندگ انت دلجان لعل

منءُ چگرد دیوالءِ ساھگءَ نشتگءُ بسءِ ودارءَ ات ایں کہ ھمے دمانءَ آئیءَ آہ سردے جش اتءُ چم آزمانءَ شانک دات انت.
"چے بوت"من گوں ھیرانیں چماں جست کت.
بس!منا وتی کسانی یات اتک کہ کسانیءَ من چہ اسکولءَ واتر کتگ گڑا سُبارگءَ پد، دیم پہ نیکراهی ءِدرس جاهءَ شتگاں - سارتیں بیگاهءَ چہ نیکراهیءِ درس ءَ واتر کنگ ءَ پد نورانی قاعده اینگھیٹی ءِ سرا ایر کتگءُ پتءِ کستریں برات ءِ گسءَ زرءِ پچگرگءَ شتگاں.پرچاکہ پت ڈنءَ بوتگءُ زر ھمائیءِ گورا بوتگ انت.
ناکو کدی واب بوتگ، کدی آگہ، کدی اُودا نہ بوتگ- وهدے کہ واب بوتگ گڑاں من ناکوءِ سرینءَ نشتگاں داں کہ وابءَ چہ پاد اتکگ-
ھما وھداں منی ناکوءَ کُروسے ھم بوتگ ءُ ناکو کروسءَ پہ سک ھب ناک بوتگ.من برے برے آئیءِ ھمرائیءَ کروسءِ میڑ شتگاں گڑا ناکو گشتگ بابا ءَ کروسءِ سک شوک انت.بلے من نزانتگ کہ بابا کے انت.
ناکوءِ لوگءِ پُرشتگیں دْریگ شپ روچ اللهءِ نامءَ پچ بوتگ انت -دریگءَ چہ ڈن کپودرانی ٹین، گسءِ تہءَ پُرشتہ کانچیں گهڑیالے هم درنجوک بوتگ- گھڑیالءِ کش ماں کشءَ وابی بلپءِ چیرا یکے عکسے مدام درنجوک بوتگ. من همے گمان کتگ کہ اے منی پیروک ءِ عکس انت پرچا کہ من وتی پیرک نہ دیستگءُ آ منی ودی بوهگءَ پیسر بیران بوتگ-پمشکہ من مدام همے مار اِتگ کہ اے منی پیرک انت-من ناکوءَ را آ اکسءِ بابتءَ هچبر جست هم نہ کُتگ -
چیزے وھدءَ پد،ناکوءِ آروس بوتءُ آ یکءَ چہ دو بوت انت،آ زندءِ لزتاں چہ سرچکار نوں منیگی نہ بوت- منی کماش کہ چہ ڈنءَ واتر اتک گڑا آئیءَ لڑ ءُ بار کتءُ ما دگہ نیمگےءَ شُت ءُآباد بوت ایں - ماہءُ سال گوست انت بلے من ناکوءِ گسءِ دپءَ شت نہ کُت - پرچہ کہ منی گیشتر وهد گوں وانگءَ گوزگءَ اَت ءُ ناکوءِ گس هم دور ات - من دھمی جماعتءِ چکاس سوبین بوتگ ات آںءُ گیشتریں وانگءِ هاترا کماشءَ منا شالءَ راہ دات- شال پمن نوکیں دیارے اَت ، نوکیں دروشم ،جتائیں موسمءِ همراهیءَ پکر ودان اَت - وهد هم وتئی رنگءَ چو مارءِ پوست مٹاھان اَت- نوک پگریں سنگتاں گوں نندگءُ پادایگءَ من اُوں همے ٹولیءَ گوں ھوارکپتاں-یک روچے روزردءَ سنگتاں منا گشت کہ باندا سہبءِ سرا وتا همے جاهءَ سر بہ کن -باباءِ گْورا روایں کہ مارا لوٹ اتگ ئِِےءُ لہتیں جیڑه هم است انت. جیڑهانی بابتءَ مارا شریں وڈےءَ سرپدی دنت- من هؤ! کت ........
اے شپ من پہ وداری گوازینتءُ سھبءَ وتارا ھما جاہءَ سر کت، کل سنگت جم بوت انتءُ ما دیم په باباءِ گورا رهادگ بوت ایں - سپرءِ تہءَ من همے پگر کنگءَ ات آں کہ من بابا نہ دیستگ، باریں بابا چِہ دروشمیں انسانے بیت -من بس آئیءِنام، پگرءُ کرداش کتگ اتنت-
ما سھبءِ بیلءِ دراتکگیں مردم سارتیں بیگاهءَ باباءِ کمپانءَ سر بوت ایں- چم باز گندگءَ اَتنت، دل باز مارگءَات-بلے چم پہ یکے ءَ گْلودَگ اتنت- باباءِ مردماں مارا باباءِمجلسءَنادینت،آپءُ چاه کت.
آپءُ چاہءَ پد یک کماشے گوں ورناےءَ مجلس ءَ پُترت -من ناکوءِ گسءِ هما اکس کہ شش سال پیسرا دیستگ ات،مرچی همااکس یک ادارھےءِ دروشمءَ منی دیما اوشتاتگ اَت - من وتارا هال دات کہ منی پیروک نہ مرتگ،زندگ انت.
@Labzank
telegram.me/Labzank

میشی زگرَگ ءُ گؤنگی ناہ
ماں نیمروچءَ پنیر ھونکّیں
ماں بیگاہ ءَ نباتی ھلواہ
لیلو ءُ لی للو لیلو بیا
من لیلوے کن آں داں بِہ وپسی
بچّیگ پہ تُنب رودیں تیں
میشی زگرَگ ءُ گؤنگی ناہ
ماں بیگاہ ءَ نباتی ھلواہ
ماں نیمروچ ءَ پنیر ھونکّیں
بہ وپس ماں گوانزگ ءَ شاگین ءَ
شاگیں گوانزگ تی واب جاہ انت
میدیں بند تئی پاسپان اِنت
@Labzank
telegram.me/Labzank

((هیالانی بانک))

قلم بیا لولو انگیْزیْن گُهر گوْار

نگارانی طراز بندیْن رقم کار

سفید و سادهیْن گُل کاغذا بیار

لکیران رند و قرطاسان به سینگار

بکش سنجیدهیْن سطران بکتّار

حروفان رد بکن چوْ دُرّ شهوار

کنن وصفِ رُخِ دلدارِ عیّار

جنک تاینت جهانا لاله رخسار

شبِ سیاره و گوْربامَیْ استار

فرشته صورتیْن فرخنده دیدار

غزالیْ از غزالستانِ تاتار

مثالِ یوسفِ مصری به بازار

تمامیْن عالمِنت لالَیْ حریدار

دلون دلدارَیْ گیسوان اسیرنت

غزل سنجیْن زبانون نکته گیرنت

قلم الماس و قرطاسون حریرنت

جنک رنگ و رُخا بدرِ منیرنت

تویَ لیلا ، منان مجنونِ شیدا

گنوکی کپتَگان تئی بند و قیدا

بیا دلبر که تئی دیما به گندن

دمانیْ تئی گوْرا بیایان به نندن

چه تئی باغیْ گـُلا پُلیْ به سندان

بچارن تئی دو ملگوریْن کمندان

سفیدیْن غبغب و پُلیْن پرندان

شکر تامیْن لب و دُرهایْ دندان

دلِ چوْ پرچیا سختنت چوْ سندان

جفا بر عاشقان لیکن نه چندان

جنک دوستنت منا آهو غزالیْن

زلیخه زینت و یوسف جمالیْن

منیریْن مشتری بدر الکمالیْن

قمر پیشانی و بُروان هلالیْن

عطارد پیکر و زهـره مثالیْن

شکـر بچکـندگ و طوطی مقالیْن

تویَ گـُلبن منان تئی باغَیْ بلبل

مکن دلبر منا طنز و تغافل

تمنایْ کنان من از تو ایْ گـُل

دو بادام و دو نارنج و دو کاکـُل

دو هم قوسیْن کمان تاب و دو سنبل

دو یاقوت و شراب آلوده ئیْن مُـل

جهانیْ گـُلشنا نیْستنت چُشیْن گـُل

وَرق پوْشیْن نهال و آسمی پُل

نه در چین و نه کشمیر و کابل

نه ایْران و نه توران و نه زابُل

نه ملکِ قیصَر و فغفور و دارا

هراتَیْ کوچگ و بلخ و بخارا

جنک در چیدَهنت از صد هزارا

پُلیت از عاشقان صبر و قرارا

عـروسانه پِر بندیت وتارا

غزالی گردنا کشیت چوْ مارا

دُرخشیت همچوْ ماهِ بیْ غبارا

کمندان گرهن دنت واسطه شکارا

دجوکیْن غمزَهان شانیت په مارا

دو ابرو چوْ سپاهانی سگارا

دلا سندیت چوْ ترولیْن خیارا

هزار نازیْـن جنک جان پرورنت مئیْ

تن و روح و دل و جان و سرنت مئی

شبِ مهتاب و شمسِ خاورنت مئی

زلیخا زیب و بَـدرِ انـورنت مئی

منـان تـئی عشقَـیْ لـوپایان گـرفتار

عَـجَـب زیبنت ترارا زرگـری هـار

سَـرَیْ مهنا و پُـر دوچیْن گوْرَیْ شار

چُلنب و نالک و پٹـّیگ و گیوار

خماریْن نرگس و بینی چوْ کاٹار

کـهیب و کنزگانی میان زُنّار

لذیذیْن کـَندگ و بلقیسی گفتار

کپوتی لڈگ و سیسیگی رفتار

تئیَ شیرین منان تئی عاشقِ زار

چوْ فرهادا مـدام رنجور و بیمار

دلا جـوْش جَننت دردانی پاهار

منـی درد نه بنت دراه په دوایا

طبیـبـیْ حکـمـت و سقمونیایا

منی دردیْ دوا شهدیْن لبَنت تئی

سفیدیْن گـُب وسارتیْن غبغبنت تئی

دو نورانـی مثالیْن کوکبنت تئی

سَـریْ ملگوْر و مسک ومهلبنت تئی

منان پروانه تو شمع شبستان

دهن تئی حقه و لب شکرستان

منا اومان کنت تئی کاکلستان

بهاریْن باغ و سرسبزیْن گلستان

مسلسل پیچ و تابیْن سنبلستان

گلیْن رخسار و نارنجیْـن دو پستان

چِنان پلان چه باغ صندلستان

دمیْ مدهوش بان چـوْ میْ پرستان

زنوک چوْ سیب و لب چوْ انگبیننت

گوْر و سینه لطیف و نازنیننت

دوئیْن رُخـسار آیـاتِ مُـبینـنت

دهن تئی میم و دندان سین وشینـنت

زبرجـد زیور و لالـیْ نگیننت

چنـان منّینتَگــن ماهیْن دلـارام

پـری رنگیْن جنک گلـقـدّ و گلفام

کـپودر آخـرا بیت گوْن منا رام

صنوبر صورتیْن سـرو و گل اندام

پریا پوشِتَنت ســونارَهَـیْ سـاز

طلائیْن مورت وشش کالکیْن گوْرانداز

چَمیت چینی پرند پوشیْن پری ناز

چوْ ماها پُلّیتگ طاووس طنّاز

بهار خیزیْن گل و سَـرو و سرفراز

منی کُـرتگ انیس و محرم راز

دمــاگا پکـِتگ خامــیْن خیالـیْ

جتگ نفسا خرابیْن فکـر و فالــیْ

تعالی الله عجـب خـوبیْن جمالـیْ

منا هکـَّل کُـتَگ عـلـمَیْ پیامـا

حیا و طـعـنه و لـجّ و مـلامـا

مکن مُـلا مَـوَر مـالِ حَــرامـا

مـرو دیمـا مه کپ ابلـیسـیْ دامـا

به کـج گردن کشیْن نفسَـیْ لگامـا

بچار که حاضرنت پاکیْن شهنشاه

گناهان وت بکش استغفر الله

چه خوابِ غفـلتـا بیتان من آگاه

سمندن تیهـریْن گـٹـا نه دات راه

پدا سستنِ من و گل پیکریْن ماه

به صد افسوس و درد و ناله و آه

جَنِکـا عشوه ییْ داتَگ مَـنارا

اِه! مَـن وت کلاگ زُرتگ تَـرارا

غـزالانی گِرگ مـردانی کارنت

بر

و که چوْ تئین ملا ہزارنت
((

شاعر ((هدا مرزی ملا عبدالله پشینی))@Labzank
telegram.me/Labzank

گـوشکنـد 😄😂

ملالُتر گوانک کنت پلیس ۱۱۰ ءَ گوش ایت:

من مارمولکے ماں دگّ (جادہ) ءَ گوں موٹل ءَ چیر گپتگ انی مرتگ ءُ بیران بوتگ چے بہ کناں؟

پلیس بچکندے جنت ءُ گوش ایت!

دُمب ئَے بہ گر ءُ یک نیمگے مان ئَے بہ بُر ءُ وتی راہ ءَ بہ گر ءُ پشت ءَ چک مہ جن ءُ برو!

لتر گوش ایت: منت وار واجہ پلیس نی پاگ ءُ جُل ئَے چوں بہ کناں؟؟😶

پلیس: یا گوس 😄😂
رجانک / ھارون اخلاقی.
کورُشیں گال#
لبزانکی مجلس کلمتی کاروان.

گـوشکنـد 😂😄
ملالُتر روت پنی سیلین بہ جنت
داکتر گوش ایت تو پیسر ءَ جتگ؟

ملالتر گوش ایت جی ھو من زیکیں روچ ءَ جتگ 😁
داکتر گوش ایت شر انت گڑا ترا نہ چکاساں زیکیں روچ ءَ جتگی!

وھدے کہ پنی سیلین ءَ جن انت! لتر ءَ مارتوسک (تشنج) گر ایت، کپ ایت دیم پہ چیر لیزگ ءُ لیتار بیت 😐
.
.
وھدے کہ پہ ھوش کیت داکتر ئَے گوش ایت بھتاوریں لُتر تو نہ گوشت من زی پنی سیلین جتگ 😠
.
.
.
ملالُتر گوش ایت جی ھو من زیک ھم کہ جتگ اَت ھمے وڑا بوتاں ... 😄😝😂
رجانک / ھارون اخلاقی.
کورشیں گال#

اِے چاڑیں دل کہ کدی موجے ءَ ھوار کَپ اِیت
من پادکایاں بلے سر ھزار وار کَپ اِیت

ترا سلام اِنت تو پُلّان ءَ آس پِرّیچ ئے!
من ءَ گوں کُنٹگاں روچے بِہ گندئے کار کَپ اِیت

کجام راہ ءَ ودار ءَ تئی بہ ننداں من
کُجام راہ ءَ زمانگ، من ءَ دُچار کَپ اِیت

اِے دل کہ دست ءِ دل ءَ اِنت من ءَ تئی بازار ءَ
گُشان ءِ دامن ءِ لَمب ءَ وتی بہ دار، کَپ اِیت

پمیشکا میر ءَ وتی اوست کُنٹگاں بَستگ
کہ کَوش کَشّ اِیت گُڑا پُلّ بے شُمار کَپ اِیت

میر اُمَر میر



@Labzank
telegram.me/Labzank

" تژن ءُ کندگ "
(ٹگیں مُردگ او پرشتہ)
پرشتہ: چے ھال اِنت تئی ؟
مُردگ: منی ھال توبہ توبہ گشے مُردگانی ھالءَ
پرشتہ: تو منا پجہ آرگائے
مُردگ: تئی صورت اللہ اللہ
پرشتہ : تو ادا چیا وپتگ ئے
مُردگ: تئی انتزارءَ روچ شپ تو ناز مکن
پرشتہ: تئی رب کئے اِنت؟
مُردگ: مئے ھُدا اِنت مارا چو ہمشام کنت
پرشتہ: دنیاءَ تو گیشتر نیکیں عمل کتگ یا بدیں ؟
مُردگ: ھرکسءَ گوں کس دِلءِ رازاں نہ دنت
پرشتہ: تو کدی ھُدا ءِ گورا ماپی لوٹتگ ؟
مُردگ: اے وھدءَ من کجا رواں کئی دامنءَ گرآں
پرشتہ: ادا ترا کجام وھدءَ گریوگ کیت ؟
مُردگ: دوست ءُ دلبر کہ مارا یات کائینت
پرشتہ: تو رب گورا گیشتر کجام دوا لوٹ اِتگ؟
مُردگ: اللہ منی سالونکءِ بھتءَ بلند کن واللہ
پرشتہ: تو ادا چوں اتک ئے ؟
مُردگ: پرے ھالءَ گُلیں یار ءَ کنائینت
پرشتہ: گڈا تو زانئے تئی جاگہ کجام اِنت ؟
مُردگ: دنیا منی امروز اِنت جنتّ منی وابانی
پرشتہ: شریں وشیں من رواں...
مُردگ: بارگ نلی ءَ مرو
★★★★★

اے گپّ ءَ کم چہ کم پنجاہ سال بیت
اے ھما وھد ءِ گپ انت کہ سید ھرچ نیمگ ءَ بدواھاں اَنگر کتگ ءُ ھرچے کہ نمیرانیں سید ءَ نبشتگ اے کماشیں ندکاراں واجہ ءِ راستیں نبشتانک پچ رتکگ اَنت ءُ پہ زانت رھبند اِش ھراب کتگ پرچا کہ آیاں بلوچی ءِ درد پر نہ بیتگ آیاں مدام لوٹ اِتگ کہ سید ءَ پہ وژنامی ءَ مَیل اَنت بلے چوش اش نہ زانتگ کہ وژنامی ءُ بدنامی ھاوند ءِ دست ءَ اِنت
اگاں بدواہ زبان ءِ دیمپان مہ بیتین اَنت مروچی سید ءَ اے کنڈگ دیر اِنت کہ گوازینتگ اِت اَنت ءُ مروچی بلوچ ءِ رَمگ بھاری لاٹیگاں چرگ ءَ اَت بلے بژن کہ اشاں بھار پہ ترکگ ءَ نہ اشتگ
اگاں مروچی ما مانگیش اتگ ایں چہ ھمے بدزردیں دوتل ءُ دوپوستانی سَوَب ءَ ما پشت کپتگ ایں!
سید، سیدے بیتگ اے گپ راستے کہ سید انسانے بیتگ ءُ چہ انسان ءَ ردی بیت بلے شما بچار ات آ وھدی چوشیں ساز ءُ سامان ءُ پٹ ءُ پولی دم ءُ درگاہ نہ بیتگ اد ءَ کتابے شوھاز کن ءُ اود ءَ کاگدے درگیج چو نہ بیتگ کہ تو ناکو گوگل ءَ بہ نبیس پارسی ءِ باستان ءُ یاکہ اوستا ترا ھزار ءَ چہ گیش نبشتانک دست کپ ایت پد ءَ ھم پہ آ کس ءَ کہ تھت باھوٹ بیتگ ءُ کیسگ ءَ کلدارے نہ کپتگ کتاب درگیجگ ءُ وانگ مزنیں گپے بیتگ
شما شر بہ زان ات گوں اینچُک نگیگیں جاور ھال ءَ شست سال ءَ پیش ھُدامرزی ءَ سیاھگ ءُ رھبندے گیشینتگ انی شست سال ءَ رند یک نادراھے ءِ دیم ءَ ھزار ءَ چہ گیش درھجان ءُ سوھو ءُ زانتکار مِک اِنت بلے پد ءَ ھم پہ دلجمی راستیں منانکے آرت نہ کن اَنت چو ھما مار ءُ مار وانیں جوگی ءِ کسہ ءَ تچ اَنت ءُ ایرودْراپ کنگ ءَ اَنت ءُ بے سر ءُ بنیں منانک دے اَنت بلے وھدے کہ دگہ ھچ راہ ءُ در نہ گند اَنت بارگ بارگ ءَ جوگی ءِ تورگ ءَ پُتر اَنت ءُ ترَہ اَنت
شما گوَہ دار اِت کہ اگاں پہ بلوچی ءَ شرتر ءُ الکاپ تریں سیاھگ ءُ رھبند ھمے سید ءِ رھبند نہ بیت من پہ دلجمی گوش آں ھرچ ادیب ءُ زانتکارے کہ چہ سید ءِ رَستگیں کِشک ءَ ڈن شوھاز ءَ اِنت بزاں آئی رھ گار اِنت ءُ پہ آپسرے نہ رس ایت ءُ اَلّم ءَ یک روچے ھمے تبد ءُ لِوارانی وَڈالیگ بیت ءُ گوں تلکار بستگیں لُنٹاں راستی ءِ چمگے شوھاز ایت بلے بژن کہ آ وھدی آئی ءِ گرانبھائیں وھد آسر اِنت.
ھارون اخلاقی.
کـورُشـیں گـال#

🌹🌹 دُرّیں دانـک 🌺🌺

🔸اگاں لوٹ ءِ ،
مَرگ ءَ چہ رَند شَموشَگ مہ بـے...
اَنچیں چیزے بِلِک کہ
وانگ بہ کَرز اِیت ؛
یا انچیں کارے بکن کہ
لِکَّگ بہ کرز اِیت

˝بنجامین فرانکلین˝
رجانک : قادربخش کلمتی

@Labzank
telegram.me/Labzank

ہلک بے نشان اِنت ءُ مردماں وپا نیستیں
هو بلئے منارا ہچ انگت ءَ دلءَ نیستیں

انشپی کہ مہکانی تئی گشانءَ اندیم اِنت
انشپی اے ماه ءَ را آزمان سرا نیستیں

مِنّت ءَ من دمبرتاں تئی هبر هما یکّین
گریوگاں مئے مُپتیناں زاناں پائده نیستیں

آزمان بلان اِنت کہ ماهکان ءِ مانا چے
یک چراگے ءِ شهر ءَ آشنا شپ ءَ نیستیں

مجلس ءَ گنوکانی وهدے ءَ اگاں اتکئے
سرپدئے تہ اهدانی زندگی کجا نیستیں

مهربان پکیرے ءِ چارگ ءَ نہ یَتکئے تو
سنگتی هتم کُرتگ یا ترا سما نیستیں

زندگی نزاناں چوں ڈِک نوارت تئی گوما
یا ترا دل ءَ نہ انت ءُ یا مئے کسمتءَ نیستیں

مُهــبتے نـــواهانی دیـــدگاں بِکاں پیدا
مرچاں آ وڈیں مردم یار تربت ءَ نیستیں

اکرم ءَ مرادے کہ کِیسگ ءَ کتگ اتکہ
چو نزانت گریب ءِ چُک پتّو کس ادا نیستیں

اکرم اسلمBesam:
@Labzank
telegram.me/Labzank

دوستی ءِ راز ءَ نزانے بل منا
طرز : نمیرانیں استاد دینارزهی
شاعر : استاد علی بخش دشتیاری
بینجو : استاد سلیم
طبلا : جاسم همراز
گشنده : وحید بلوچ
کنارک دیوان
@obaloc

گیوار گلءِ کلکش ن انت هچ وش ن انت👆👆👆👆
گلوکار : نمیرانیں استاد علامرسول دینارزهی
شعر : استاد علی بخش دشتیاری
محفلی دیوان
@obaloc

جمبـراں زردیـں بیـگاہ ءَ بنـد ات
گـوازگاں دار ءُ یـک دمے ننـد ات

شما وتی براسی جیڑھاں سند ات
دپتـراں کـوھنیـناں وتـی گنـد ات

چـوں کـرتـگ پیشتر آ یلیں میـراں
داشـت ات ملک گوں جابہ ءُ تیـراں

پنجگاں بَل ات زھم گوں شمشیراں
چو مہ بیت تاریـخ ءَ کـن ات بیـراں

او منـی بیـل ءُ ھمـدلیـں بـراسـاں
اتفـاق ءَ گـوں کـار بنـت آسـان

لـوگ بلـوچـانـی انـت بلـوچسـتان
ملـک ءَ را نـاز انت پہ بلـوچ جوانـاں

مـا تپـانی وتـی تاریـخ ءَ بـہ وانـاں
ما بلوچستان ءَ گـس وتـی بہ زانـاں

گـام پـہ گـام ءَ کہ دیمـتر ءَ ران ایں
منـت بلـوچسـتان ءَ گـڑا امـان ایـں.
خـواسـتـی خـارانـی.
کـورُشـیں گـال#
لبزانکی مجلس کلمتی کاروان.

*شِرک ءُ پال یا شِکّ ءُ پال*
کورُشیں گال
شرک ءُ پال هما کار ءُ هبرےءَ گوش اَنت کہ زانشت ءُ نیکراه آئی ءَ نہ منّ ایت ءُ آئی ء زانشتی ءُ نیکراهیَ منّاک نیست اِنت . درائیں مُلک ءُ چاگرداں شرک ءُ پال بیتگ ءُ لهتے ملکاں انگت هم هست اَنت . اهدی زمانگاں شرک ءُ پال گیشتر بیتگ پرچا کہ مردمانی زانشت کم بیتگ ء ُ آیاں چاگرد ءِ منّانک نہ زانتگ اَنت ءُ پمیشکا آیانی ساهار پہ چاگرد ءِ اتپاکاں باز بیتگ ءُ آیاں پگر کتگ آ راهے کہ آیاں چہ سکّی ءُ سوری ءَ بچّین ایت ایش اِنت کہ شرک ءُ پال بہ کن انت . بلے هرچے مردمانی زانشت ودّان ءُ گیشتر بہ آں بیتگ شرک ءُ پال کمتر ءُ زیان بہ آں بیتگ. شرک ءُ پال مردمانی زندگی ءِ سجّهیں جاوراں کارمرد بیتگ . سیر ءُ سانگ ، جنگ ءُ جیڑه ، کار ءُ بار ، چکّانی پالگ ءُ رودینگ ، مرگ ءُ زند ، پرس ءُ پاتیا ، نادراهی ءُ دراهی .... مردماں گوں شرک ءُ پال ءَ وتی زند ءِ سکّی ءُ سوری پہ وشّی مٹینتگ انت . اے هم گوشگ لوٹ ایت کہ زوراکاں باز شوک ءُ زَوْک بیتگ کہ شرک ءُ پال ماں آیانی چاگرد ءَ گیش ءُ گیشتر بہ بیت دانکہ آیاں گیشتر زکَّت ءُ هاٹی بہ بیت دانکہ مردماں بہ گلائین اَنت ءُ آیانی سر ءَ هکم بہ اَلاّئین انت ءُ مردم چہ آیانی زوراکیاں ایراد ءُ کچّہ چینی مکن اَنت پہ درور زوراکاں وتی مهلوک گُشتگ آیانی اسل ءُ نسب چہ آیانی مردماں گیشتر اِنت ءُ هاوند ءَ زوراکی آیانی نسیب کتگ ءُ اگاں مردم آیانی زورکیانی بابت ءَ باوست بہ کن اَنت گشیگاں گوں هاوند ءَ باوست کنگ ءَ اَنت ! ابید چہ ایشی ءَ شرک ءُ پال ماں نیکراهی ءَ هوار بیتگ اے وڑ ءَ کہ بازیں گپ ءُ تران ءُ کار هست اِنت کہ نیکراهی نیست اَنت بلے لهتے نازانتیں مردم ءَ ماں نیکراه ءَ هوار کُتگ اَنت ءُ نیکراهی ءِ زانتکار هرچنت جهد کن اَنت مردماں سوج ءُ سر کَن اَنت کہ آ دود ءُ ربیدگ نیکراهے ءِ نہ اَنت ءُ یلہ اِش بہ دے اِنت پرچا کہ وت ساچ انَت بلے باز مردم ملاّ ءُ مولویانی گپاں نہ گر اَنت ءُ گُش اِنت شما نوکیں ملاّ اِت ءُ اهدی ملاّیاں اے وڑ ءَ نہ گوشتگ ءُ انّوں شما اِشاں گوشگ ءَ اِت ! بلے اے وڑ ءَ نہ اِنت کہ مردم گوش اَنت پرچا کہ اهدی ملاّ ءُ زانتکاراں گوشتگ بلے مردماں نہ منّ اتگ انت ! پہ درور پرس ءُ پاتیا ءِ تہ ءَ چلّ ءُ چارماه ءُ سال گرگ ، سیگ دارگ ءُ سیہ پوش کنگ ء موتک ء ...ابید چہ ایشی ءَ لهتے زانتکار گوش انت یکّے چہ شرک ءُ پال ءِ الگاریں برورداں پہ چاگرداں ایش بیتگ کہ زانشت ءِ دیمروی آئی ءَ گپتگ. چہ هما وهدی کہ الم ءُ زانشت ءَ دیمروی کتگ شرک ءُ پال کمتر بیتگ . البت ما گوں شرک ءُ پالانی پتّ ءُ پال کنگ ءَ اهدی مردمانی سکّی ءُ سوریاں ءُ آیانی زندگ گوازینگ ءَ زانتکار بہ اِنت . پہ درور یکّے چہ شرک ءُ پالاں گوش آں بلکیں شمئے گوش ءَ نہ کپتگ :
مَرگ سبز ایت - مَرگ جُش ایت :
اهدی دوراں وهدے کہ یک مردینے بیران بیتگ گُڑا آ مردین ءِ جن ءُ چُک ءُ وارساں دانکہ چل روچ ءَ وتی مید ءُ ملگور اِش گوں کُنَرتاک ءَ نہ شستگ اَنت ءُ کنرتاک ءِ بدل ءَ سورگ ئےِ کارمرد کُتگ . آیانی منّانک اے بیتگ کہ کنرتاک سبزیں چیزے ءُ سبزیں چیز سبز ایت ءُ گیشتر بیت بزانت ابید چہ بیران بیتگ ایں مردم ءَ دگہ مردم چہ آ کتم ءَ بیران بیت اِنت ! ابید چہ ایشی ءَ اهدی مردماں دانکہ چل روچ ءَ ناهی شیرگ اشِ نہ گراستگ ! پرچا کہ آیانی منّانک اے بیتگ کہ هما وڑ ءَ کہ شیرگ گرادگ ءِ وهد ءَ جُوش جنت . مرگ ءُ میراں آیانی کوم ءُ راج ءِ تها گیش ءُ گیشتر بیان بیت. همے سوب ءَ دانکہ چل روچ ءَ آیاں شیرگ نہ گراستگ ! رئیسی ....
کـورُشـیں گـال#
لبزانکی مجلس کلمتی کاروان.