گُبار

چمءِ گُباریں رہسراں
واباں دمُوکّہ پوشِتہ
امروز کشکے بے ڈسیں
نا آشنائیں منزلے
مانِشت جاہیں ساہگے
مردم نپَس کشّ اِت نہ کنت
کوراسیں غارانی تہا
چمّے وتا چارِت نہ کنت
گَردءُ گبارانی تہا
دروہاپ تُنّیں رولہاں
دریا ءِچم ہونیں کتہ
چولاں ملامت کئے بکنت
ہورکیں تیاب ءِ پلّوا
ھوشامیں لنٹ ءِ ساہگ ءَ
امروز باراں دؤر دنت
گوْرکِشکیں کوہ دیمی زِہاں
مارا ماں چماں کور کنت
دل بے نشان ءُ بے ڈَسیں
وہد ءِ ھلاھوشیں جَلءَ
مَرگءَرا زندے نوشِتہ
چم ءِ گُباریں رہسراں
واباں دمُوکہ پوشِتہ
★

(خالق ارمان)



@Labzank
telegram.me/Labzank

مُلّا محمد کلمتی ءِ زند ءُ شاعری ءِ سر ءَ دو گپ
*******************

بلوچ قوم چہ جهان ءِ مستریں قوماں یک قومے کہ بازیں راجانی تہ ءَ بهر اِنت ءُ چہ آیاں یک راجے کلمتی ءِ نام ءَ زانگ بیت کہ یک شانداریں گْوستے ءِ (ماضی) واهُند اِنت ، شش سد سالی مانش جاه کہ گوں نَقش ءُ نگاریں سنگاں "توتا چوکنڈی" ءِ نام ءَ زانگ بیت یا کْوهنیں شاعری ءُ داستان بہ بنت اے هبر ءِ گْواهی ء‍َ دے اَنت .

کلمت هما روچ کلمت اَت
سردارئِے شاهی بِنگو اَت
پَوجاں سماعیل مستر اَت
زهم ئِےامام میر سنجر اَت
پور ءِ دپ ء‍َ مرد توکل اَت
شاریں پڑکّو حمّل اَت

شاهی ءُ سماعیل ، حمّل ءِ ناکو بیتگ اَنت ، سماعیل چہ حمّل ءَ پیش شاگ ءِ ناهدا ءُ جنگ ءِ دیمی مردم اَت کہ شهیدی ءَ پَد گْوادر ءَ قبر کنگ بیت کہ داں انگت آئی ءِ مانش گوں سنگ ءِ شاهکاریاں هست اَنت .

(نام ءُ نسب)

ملا محمد ، ملا محمد ءِ میر سلیمان ، میرسلیمان ءِ میر جامی ، میر جامی ءِ کینگی ، کینگی ءِ سلیمان ، سلیمان ءِ امیر ، امیر ءِ قمبر ، قمبر ءِ ثوبان ، ثوبان ءِ نوتک ، نوتک ءِ کاپڑی ، کاپڑی ءِ شاهو ، شاهو ءِ مُرید ، مُرید ءِ مندو ، مندو ءِ جلّاب ، جلّاب ءِ هالو ، هالو ءِ شاهو ، شاهو ءِ هدّه ، هدّه ءِ نوت ، نوت ءِ نودبندگ ، نودبندگ ءِ نوت ، نوت ءِ میرعالی

********************

ثوبان 1 ءِ گنجی ، گنجی ءِ جیهند ، جیهند ءِ شاری ، شاری ءِ میرجیهند ، میرجیهند ءِ میر بِنگو ، میربِنگو ءِ ملک زردار ، ملک زردار ءِ ملک محمد ، ملک محمد ءِ ملک اِسحاق، ملک ء اسحاق ءِ ملک حاجی ، ملک حاجی ءِ نوت ، نوت ءِ میر عالی

********************
میر بِنگو ءِ سَے چُک بیتگ اَنت:
میرجیهند ، ملک شاهی (کلمت ءِ حاکم) ، سماعیل

میرجیهند ءِ هم سَے چُک بیتگ اَنت:
شاری ، مادری (اِیشی ءِ پدریچ آهوران ءِ دمگ ءَ اَنت) ، میرحمّل

میر عالی کیچ ءِ والی بیتگ ، هوتانی نسب هم میرعالی ءَ رس ایت .

(پیدائش)
کساس ۱۳۳۵ هجری ءَ حصاریں درابول ءِ دامن ءَ مسیت ریک ءَ میر سلیمان ءِ لوگ ءَ ودی بیتگ .

(وانگ ءُ زانگ)

آ وهداں اے دمگ ءَ بازیں وانگ ءُ زانگ ءِ ازباب نہ بیتگ ، البت واجہ مُلّا محمد ءِ پیرُک واجہ میر جامی کہ وتی دَور ءِ مهمان نواز ، میارجلّ ءُ نامی ئیں سَرے بیتگ ، دائم ءَ ملّا ءُ پیش امامے بیتگ کہ چراهاں مُلّا دوست محمد ، مُلّا مراد ءُ مُلّا خدادات ءِ نام گِرگ کرز اَنت .
ملّا محمد ءِ اُستاد مُلّا دوست محمد ءُ ملّا مراد بیتگ اَنت کہ بس قُرآن مجید همے واجهانی گْور ءَ دربرتگ ئِے بلے گیشتر ئِے نہ ونتگ.
بلے چوشکہ درابول (کُمب ، مسیت ریک ءُ درّین تلمب) هنچیں نامے کہ آ وهد ءَ رهگْوزی مردانی ساسار جاهے بیتگ ءُ اِد ءَ هر پڑ ءِ بورسواراں پہ ادارُکے منزل کتگ ، درابول ءِ نام ءَ اے بتل چہ کْوهن ءَ همگْرنچ اِنت :

من جتگ شَعر ءُ نال اِتگ مُرگاں
من جتگ شَعر ءُ دنز اِتگ بگّ ءَ
بَگّ ءَ پہ درابول ءَ زهیر بیتگ
مارا پہ دشت ءِ گورگیں کُلّ ءَ

ءُ باز جاگہ ءَ گْوتر ءِ گورگیں کُلّ ءَ نبشتہ اِنت چوشکہ صدّیق آزات ءِ تنّاپیں تْران ءَ هم گْوتر ءِ نام اتکگ .

مُلّا محمد ءَ همے آیوکانی گْور ءَ کہ آئی ءِ واجهیں کماش ءُ بوهیریں پیرُک ءِ مهمان بیتگ اَنت نند ءُ پادا کتگ ءُ بازیں گپ ءُ گال ، شَعر ءُ داستان ئِے دربرتگ ، همے هاتر ءَ واجہ ءِ شاعری ءِ تہ ءَ عربی ءُ فارسی لبز گندگ بنت ، پیش ءَ اے دمگ ءَ شرک ءُ بدعت ءُ زیارتانی پانپانی باز بیتگ ءُ مُلا اے پِڑ ءَ مُنجار ءُ رهشون بیتگ انت ،،،، بلے مُلّا محمد چہ شرک ءَ تکے گِستا ءُ چہ توحید ءِ جام ءَ سیراپ اَت ءُ اے گال آئی ءِ توحید ءِ نشاندهی ءَ کنت :

هر سحر فریاد کناں پیش ءِ پاک ذات
واناں الحمد ءُ سجده ءُ توحید ءُ صلات
بر یقین تصدیق اِنت من ءَ فرض ءُ واجبات
سی جُزیں قرآن ، عالمانی گپّ ءُ روات
ثابت ءُ برحق اَنت خداوند ءِ کائنات

واجہ ءِ شَعر گوں بلوچی زگریں گالاں چو تچوکیں آپ ءَ اَنت .


هملسون ءَ چو شرتگی سبزیں ساوڑاں
ره نئیت آپ ءَ پہ کلات بُرّیں ڈیمبراں
گْریشگ ءُ گیڈئِے پَشت نہ دات داز گوں کونراں


جانور ءُ ساهدارانی نام ءَ پہ گْومے گالانی رشتگ ءَ کما اِیت :

ممّ ءُ خنزیر ءِ رپتگ انت سَید گوں بابراں
هوزم ءُ شاهین ءُ نرپلنگ ، گُرک گوں گلّڑاں
شادی ءُ پل گوش ءُ بشوشگ گوں کَپتراں
گوج ءُ ریژگوک ءُ سیکُّن گوں سِلّیں گدَّڑاں
موش ءُ خرگوش ءُ گُربگ ءُ سیسی گوں پَراں
مار ءُ گژدم ءُ گانڈو چہ شیر آپیں تڑاں

دشت ءِ توپان ءِ ویرندانیانی دلکُدیں ندارگے ءُ هاس پہ هما کہ پہ چمّ اِش دیتگ اَنت ءُ پہ زرد اِش مار اِتگ انت :

شوم هما روچ اَت اگرب ءُ بے سوبیں دمان
پْرشتگ اَنت سدّ ءُ جهل انت پہ ماتکَوری شماں
سورگ ءُ تَلّ ئِے چیر چِت اَنت گورپان ءُ گتان
کهن ءُ شهجوئِے بُرتگ اَنت باگ گوں نیوَگاں
دستِ کِش گونگ گوں آتکگیں فصل ءُ میوهاں
هچ کس ءَ نیست اَت هنچشیں اندیش ءُ گمان
شکّ ءُ بے ڈاه ءَ بُرت ئِے چہ مهلوکاں امان
گوں نهیبان ئِے بستگ

انت پیر ءُ

ناتوان
کُلّی نوک سیر ءُ طفل گونا شاگیں گْوانزگاں
ماں گڑ ءُ گبّاں چندها اسکولی جوان

ماں قرآن ءِ تہ ءَ هست :

ظهر الفساد فی البرّ و البحر بما کسبت ایدی الناس
(بہ زاں : هُشکی ءُ زِر ءَ نہ گیگیں جاورانی سوَب مردمانی کِرد ءُ کارپد اَنت)

مکسد ئِے جرمءِ گپتگ ئِے کاڑیں مهتراں
سیٹ ءُ تُجّار ءُ خان ماں زرنقشیں خیبراں

زردارانی زند ءِ زیب ءُ زینت ءِ ازباب کہ توپان ءَ وتی اَرجاں جت اَنت .

فرش ءُ قالی ءُ کُلت ءُ بندوق گوں خنجراں
کٹّ پت ءُ جدّی لعل ءُ یاقوت گوں گوهراں
شار ءُ شاهی گوں زرگری سهت ءُ زیوراں

بے وس ءُ بزگرانی زند ءِ مڈّی ءُ متاه هم دریمبوکیں زر ءِ میار بیت اَنت .

ماں ک‍َش ءُ کِرّ ءَ باز گدام نند چہ بزگراں
جَتّ ءُ گُوّال گوں گاو ءُ گوسفند ءُ هُشتراں
راهی ءِکاروان گوں لیڑه ءُ بارکَشّیں هَراں
پہ چیتک ءِ پاریتک انت چو هوات واریں میهڑاں

توپان ءِ گورموشی گوں سرشَم ءُ ماتبند ءُ ڈومگی سنٹ ءُ سیاه تلاراں تُرک ءے تاراجیانی یاد ءَ دنت کہ هر وهد ءَ پہ اے بے وسیں راج ءَ بیڑ اِش برتگ ،


کیچ ءِ سدگنجیں تاتکگ چو تُرکی لشکراں
تا کہ دیهات ءَ بوری پاچوپ ءُ الگراں
سرشَم ءُ ماتبنداں نهنگ اتکگ جوش وراں
ڈومگی سُنٹ ءُ سیاه تلاراں بیتگ مڑاں
هردوئیں جاڑاں چو حسدّی زورآوراں

دلوت ءُ رسترانی یکجاهی ءُ چہ یکدگر ءَ بے سمائی ءُ نپسانپسی قیامت ءِ ندارگاں سیادی کنت .

هور اِت اَنت زند ءُ لاش گْونا کنٹ ءُ اولڈاں
گاهے پنهان ءُ گاهے چہ موج ءَ سربر انت
هر دگہ جنس انت صورت ءُ شکل ءَ وڑ وڑ انت
باز هما درّنده شکار گولان اِش زر انت
امروز ءَ هم نیاد انت چو پت ءُ چُکّ ءُ مادر انت
بے خیال انت چہ پیسری بُغض ءُ کُنّتاں
کل ءِ جاندار پہ تهتگے بیت انت همکنان

ربّ ءِ قهر ءِ لوار جهانے تباه کنت ءُ رحمت ءِ ساهیل دنیایے آباد ءُ میزران .

واحد القهّار اَت کرم ساز ماں قدرتاں
طُرفة العین ءَ جوش کتگ ربّ ءِ رحمتاں
آس اِتگ بام ءَ پیش ءِ چہ وقت ءُ مدّتاں
بُرّ اِتگ اقلیم ءِ سر ءَ گْرانیں زحمتاں

ربّ ءِ هچ کار بے حکمت نہ اَنت اگاں سزایے دنت پہ عبرت ءَ ءُ وشّی یے دنت پہ چکّاس ءَ .
نمیرانیں مولانا روانبد گُش ایت :

جهان ءِ جَهل ءُ بُرز ءُ انقلابات
روانبد عبرت ءِ واستا نشان اَنت

مُلّا محمد گُش ایت :

شکر گزاری یے اتکگ پہ نیکیں امّتاں
یادگاری پہ مشرک ءُ نادانیں جَٹاں

اے شَعر ءِ وهد ءَ واجہ کماش ءُ عاجز اَت بلے واجہ ءِ بورتاچی ماں شَعر ءِ پِڑ ءَ ءُ پد ءَ اے عُمر ءَ ستا کرز اِیت .

بس کن او ثوبانزهی تئی وهد اِنت آخری
محمد چو شاهین ءَ مہ جن پرواز پیسری
رتکگ اَنت دنتان ءُ زبان کنڈان ءَ مِڑ ایت
آ شکر بهریں نُگده چو گنگان ءَ اَڑ اِیت
هر قدر مرد ءَ گون بہ بیت داد ءِ قادری
جوانی ءُ پُرزوری نہ اِنت یارے آسَری

چہ اے تُرس ءَ کہ نبشتانک دْراج مہ بیت واجہ ءِ یک شَعرے ءِ بابت ءَ کہ دشت ءِ توپّان ءِ شَعر اِنت وتی هیال درشان کتگ اَنت .

.............
(بیرانی)

مروچی کہ من اے نبشتانک ءَ نبشتہ کنگ ء‍َ آں واجہ ءَ چار سال ءُ دو ماه ءُ بیست ءُ پنچ روچ اِنت کہ میارانی چادر چنڈ اِتگ ئِے .
بزاں سَے شمبے ءِ روچ ءَ ٤ ذیقعده ۱٤۳٤ همدپ گوں ۱۹ شهریور ۱۳۹۲ ءَ بیران بیت ، ءُ آئی وصیّت ءِ پد ءَ جنازه ءِ نماز بزرگیں واجہ نمیرانیں مولانا منیراحمد سراوانی ءَ وانینت ءُ کُلّانی ءِ کْوهنیں مانش جاه ءَ پہ مدامی تاهیر گپت ، ربّ ءِ پاک آئی ءِ مانش ءَ بهشت ءِ گلباگاں بہ کنت.

محمد یوسف انیس - باھو ،کُلانی.

سرچمگ:اوھنگ / ملا محمد کلمتی/ سال 2004/ ادارہ ھنگام چاپ ءُ شنگ پیشکان.

🎻سلیم امین ءِ مھپل🎤

مُفتءَ جَتئے منی سنگت سلیم امین,
سُتکگ یک واھرے بیتگ ھراب مشین,


گُشتگ چو پیسرا شھداد ڈینجرا
بینجو نہ جنت فرید مے. گانائے سرا,
داتگ من بددُعا پہ سِتک ءُ پہ یقین,
مُفتءَ جَتئے منی سنگت سلیم امین,


سالونکءِ سنگتاں دُرستاناں شعور کُت,
دُرستاں چہ پیسرا سالونکءَ دَور کُت,
صالح, نبو, کریم, عبدالغنی, متین,
مُفتءَ جَتے منی سنگت سلیم امین,


مے راجءِ ھستی اَنت مے راجءِ ازمکار,
تو بایدیں بلوچ پَجّہ اشاں بیار,
لالو تئی شاعری تپتگ چو مثلء تین,
مُفتءَ جَتے منی. سنگت سلیم امین

لالو پیشوکانی 📑دیوان لالوپیشُوکانی🎤@Labzank
telegram.me/Labzank

کِشک ....... خالق ارمان

اے کِشک گپ جنت!!!
بلئے،،
اے کشک مردمے نہ اِنت
اے کشک پیچ وارت ءُ بس!!!
اے کشکءَ دستءُ پاد پِر کت ایں
اے کشک ءَ بلّے گام جت
تو چے گُش ئے ؟
اے کشک باندا مردمے بہ بیت
گنوک بیت
اے کشک باندا گپ کنَگ نہ بیت
اے کشک ءِ سُنٹ ءَ نود دز جنت اَنت
اے کشک نوک کیسگے بہ بیت
کجا پہ وام دنت منزلے
اے کشک مردمے نہ اِنت
اے کشک گپ جنت بلئے!!!
اے کشک ءَ دزماں دست بئے تہ تران کنت
اے کشک لھتے روچ پیسرا من جنگلےءَ ڈِیک دات
کپوتے بوتءُ نال اِتے
زہیرے بوتءُ گال اِتے
اے کشک ءَ کمّو یات گون ءُ لھتے ترانگانی بُو
اے کشک ءِ ایر گوات ءَ ٹنگِتہ دیوانگانی بُو
اے کشک پیریں کِسّہ ے
اے کشک ءَ لھتے راز گون
اے کشک مرچاں سوت جنت
اے کشک ءَ بلکیں ساز گون
اے کشک چماں گار کنت ،گبارءُ دَنز لڈّءُبار کنت
اے کِشک جِنترے ءُ من تو دنزے آرت بس !
اے کشک پیچ وارت بس !
اے کِشک مردمے نہ اِنت
اے کِشک گپ جنت ، بلئے

◆◆◆◆◆◆
@Labzank
telegram.me/Labzank

*دُزّ ءِ دل ءَ جـت*
*کَھـبہ ءَ تـپ گپـت*

اے بتل ھما جاگہ ءَ کارمرز بیت کہ اگاں کسے ءَ ردیں کارے کتگ یا کہ ماں بازار ءَ دُزّی یے بیتگ ، بلے کس نہ زانت کہ دُزّ کے انت وھدے کہ ھمے دُزّی ءُ ردیں کار ءِ بارو ءَ گپ بیت ھما کس کہ دُزّ انت ءُ کُتہ کاریں مردم انت چہ ترس ءَ کہ بلکیں مردم چہ منی کارست ءَ سرپد اَنت پیش کپ ایت ءُ دپ ءَ پچ کش ایت ءُ گلبجانک کنت کہ زان آں من بیتگ آن ءُ زان آں اے کار من کتگ..

گُڑا مردم گوش انت پلانی تئی نام وَ کس ءَ نہ گپت بزاں تو اے کار کتگ کہ تو ماں جلاں کپتگ ئے *کہ دُزّ ءِ دل جنت ءُ کھبہ ءَ تپ گیر ایت*

اشی ءِ پژدر ھم ھمے پیم انت
کہ وھدے ماں دیوانے ءَ چنت نپر نشتگ انت ءُ ھیا ءُ گیرت ءِ گپ ءَ جن انت چُشیں جاھاں ھیا دار ءُ پھک دامنیں زالبول ساڑایگ بنت ءُ دامن دست ءُ دور ساھت ویلانکیں جنین ایر جنگ بنت ھمے دیواناں نام گرگ بیت کہ پلانی سکّیں شرّیں جنینے ءُ پلانی کُربانے ءُ پلانی ءِ نام اش پلان جاہ گپتگ!

اگاں چُشیں دیواناں چُشیں جنینے نندوک بہ بیت گڑا آئی ءَ تپ گیرت کہ باریں اے منی ھال ءَ ھم سرپد اَنت
گوں وت جیڑ ایت کہ باریں اے جنین منی گوش ءَ جَنگ ءَ انت پمیشکا نشت کت نہ کنت ءُ پہ تپ ءُ دردے ءِ بھانگ ءَ چہ دیوان ءَ پاد کیت *بزاں کھبگ ءَ تپ گیرت*
پولکار/ ھـارون اخلاقی.
کـورُشـیں گـال#
لبـزانکـی مجلـس کلمتـی کـاروان.

دستونک

زبان ءَ اوں رسیت واکے
منی گنگی ءَ گو یاکے

من انچیں دمکے ءَ کریاب
نہ راہ منتگ نہ اولاکے

منی بالاد نزور انت سک
پدا دل چونیں زوراکے

پہ وت اوستے چڑکّہ تئی
پہ دلترکاں بہ بیت تراکے

اے گترانکیں لب ءِ ھوشام
ترھیت پہ پوچکی مزواکے

کبر لوگے پہ بے لوگاں
کپن اوں پمّا پوشاکے

اے درچکاں جنگلے یل دات
شت انت ویرانگیں ڈاکے

گنوکے چوریاں مان بست
پدا بازار ءَ رُست جاکے

آ چو اللہ ءَ زوراور
آ چو شیتان گروناکے

ترا جاوید مہ کوپاریت
بچار چو تلک ءَ چالاکے

ھبیب جاوید

@Labzank
telegram.me/Labzank

۔۔۔۔۔۔کلات۔۔۔۔۔

دل ءَ را گیر بُتکگاں
سباہ ءِ سنجیں ساھگ ءَ
سمین ءَ الوتے کُتہ
گوں مہپرانی وشبوھاں
چراگیں لئیبواں گوں نشتگان ءُ ساز اتگ
مں ایوکی ءِ بِہ تواریں زیمرے
نہ بوتگاں
تاں مئے دَوار ءِ پشگاھ ءِ
کہیر ءِ ٹُل ءِ جِنگُلاں
سُروز گونگیں ندارگے بِنا کُتہ
بِنا کُتہ شپانک ءُ شوانگاں
اے میہڑانی دنز رُستگاں
چو دیہی بستگیں کلاتے ءَ
ھوار بوتگاں مں گواتے ءَ۔۔۔۔۔
۔۔۔۔۔۔۔
۔۔۔جاوید دین۔۔۔

@Labzank
telegram.me/Labzank

دستونک

اِے راستے تَنگی اِنت، بیچارگی اِنت
ھمے ھال ءَ وتی دل دارگی اِنت

بچار تو آپسرے، سبزیں دیارے
اگاں جاھے دمے ساسارگی اِنت

گم ءَ چاگرد ءِ یا اندوہ ءَ جند ءِ
منی چمّاں مُدامی گْوارگی اِنت

چیا پَشت کپتگیں، سرپد جھان اِنت
نوں مارا ھم ھمے گپّ مارگی اِنت

گْوشگ ارزان نہ اِنت ھر جاگہ راست ءِ
بلے راستی زُبان ءَ آرگی اِنت

کَے ءَ گْوشتگ، کجام جاہ ءَ نبشتگ
ترا تائر شپ ءُ روچ نارگی اِنت

تاج مھمد تائر


@Labzank
telegram.me/Labzank

وہدءِ تہاریں میتگاں ہمراہ کنگ نہ بیت
آ نامے انچیں شیرکنیں ہرجاہ گِرگ نہ بیت

دل انچو ناتوان اِنت کہ ارسے اوں دَر نئیت
مرچاں وتی سرا اوں توازہ کنگ نہ بیت

چمّانی درپ شُشتگ ءُ ایر اَنت کہ بیائے تو
زیبائیءِ شراب کہ تاساں کنگ نہ بیت

داں زیکّءَ شئیر گُشتگ ءُ سہڑینتگ اَت وتا
بیا بیا او مہروان نوں گوں ما گِلگ نہ بیت

زہرئے کہ پرچا ریزگوں پاداں نہ لگّنت تئی
من مردمے آں گوں من چو کانچءَ پْرُشگ نہ بیت

لوٹاں کہ نوں بنِنداں تئی بیکءِ ساہگءَ
مرچاں کہ گوں من اے دلءِ پاداں روَگ نہ بیت

وہدءَ مُنیرؔ دمکے چُنیں آرت ءُ سر کتگ
نندگ نہ بیت ودارءَ شُہازءَ تچگ نہ بیت
@Labzank
telegram.me/Labzank

آزمانک

منی پیروک زندگ انت دلجان لعل

منءُ چگرد دیوالءِ ساھگءَ نشتگءُ بسءِ ودارءَ ات ایں کہ ھمے دمانءَ آئیءَ آہ سردے جش اتءُ چم آزمانءَ شانک دات انت.
"چے بوت"من گوں ھیرانیں چماں جست کت.
بس!منا وتی کسانی یات اتک کہ کسانیءَ من چہ اسکولءَ واتر کتگ گڑا سُبارگءَ پد، دیم پہ نیکراهی ءِدرس جاهءَ شتگاں - سارتیں بیگاهءَ چہ نیکراهیءِ درس ءَ واتر کنگ ءَ پد نورانی قاعده اینگھیٹی ءِ سرا ایر کتگءُ پتءِ کستریں برات ءِ گسءَ زرءِ پچگرگءَ شتگاں.پرچاکہ پت ڈنءَ بوتگءُ زر ھمائیءِ گورا بوتگ انت.
ناکو کدی واب بوتگ، کدی آگہ، کدی اُودا نہ بوتگ- وهدے کہ واب بوتگ گڑاں من ناکوءِ سرینءَ نشتگاں داں کہ وابءَ چہ پاد اتکگ-
ھما وھداں منی ناکوءَ کُروسے ھم بوتگ ءُ ناکو کروسءَ پہ سک ھب ناک بوتگ.من برے برے آئیءِ ھمرائیءَ کروسءِ میڑ شتگاں گڑا ناکو گشتگ بابا ءَ کروسءِ سک شوک انت.بلے من نزانتگ کہ بابا کے انت.
ناکوءِ لوگءِ پُرشتگیں دْریگ شپ روچ اللهءِ نامءَ پچ بوتگ انت -دریگءَ چہ ڈن کپودرانی ٹین، گسءِ تہءَ پُرشتہ کانچیں گهڑیالے هم درنجوک بوتگ- گھڑیالءِ کش ماں کشءَ وابی بلپءِ چیرا یکے عکسے مدام درنجوک بوتگ. من همے گمان کتگ کہ اے منی پیروک ءِ عکس انت پرچا کہ من وتی پیرک نہ دیستگءُ آ منی ودی بوهگءَ پیسر بیران بوتگ-پمشکہ من مدام همے مار اِتگ کہ اے منی پیرک انت-من ناکوءَ را آ اکسءِ بابتءَ هچبر جست هم نہ کُتگ -
چیزے وھدءَ پد،ناکوءِ آروس بوتءُ آ یکءَ چہ دو بوت انت،آ زندءِ لزتاں چہ سرچکار نوں منیگی نہ بوت- منی کماش کہ چہ ڈنءَ واتر اتک گڑا آئیءَ لڑ ءُ بار کتءُ ما دگہ نیمگےءَ شُت ءُآباد بوت ایں - ماہءُ سال گوست انت بلے من ناکوءِ گسءِ دپءَ شت نہ کُت - پرچہ کہ منی گیشتر وهد گوں وانگءَ گوزگءَ اَت ءُ ناکوءِ گس هم دور ات - من دھمی جماعتءِ چکاس سوبین بوتگ ات آںءُ گیشتریں وانگءِ هاترا کماشءَ منا شالءَ راہ دات- شال پمن نوکیں دیارے اَت ، نوکیں دروشم ،جتائیں موسمءِ همراهیءَ پکر ودان اَت - وهد هم وتئی رنگءَ چو مارءِ پوست مٹاھان اَت- نوک پگریں سنگتاں گوں نندگءُ پادایگءَ من اُوں همے ٹولیءَ گوں ھوارکپتاں-یک روچے روزردءَ سنگتاں منا گشت کہ باندا سہبءِ سرا وتا همے جاهءَ سر بہ کن -باباءِ گْورا روایں کہ مارا لوٹ اتگ ئِِےءُ لہتیں جیڑه هم است انت. جیڑهانی بابتءَ مارا شریں وڈےءَ سرپدی دنت- من هؤ! کت ........
اے شپ من پہ وداری گوازینتءُ سھبءَ وتارا ھما جاہءَ سر کت، کل سنگت جم بوت انتءُ ما دیم په باباءِ گورا رهادگ بوت ایں - سپرءِ تہءَ من همے پگر کنگءَ ات آں کہ من بابا نہ دیستگ، باریں بابا چِہ دروشمیں انسانے بیت -من بس آئیءِنام، پگرءُ کرداش کتگ اتنت-
ما سھبءِ بیلءِ دراتکگیں مردم سارتیں بیگاهءَ باباءِ کمپانءَ سر بوت ایں- چم باز گندگءَ اَتنت، دل باز مارگءَات-بلے چم پہ یکے ءَ گْلودَگ اتنت- باباءِ مردماں مارا باباءِمجلسءَنادینت،آپءُ چاه کت.
آپءُ چاہءَ پد یک کماشے گوں ورناےءَ مجلس ءَ پُترت -من ناکوءِ گسءِ هما اکس کہ شش سال پیسرا دیستگ ات،مرچی همااکس یک ادارھےءِ دروشمءَ منی دیما اوشتاتگ اَت - من وتارا هال دات کہ منی پیروک نہ مرتگ،زندگ انت.
@Labzank
telegram.me/Labzank

میشی زگرَگ ءُ گؤنگی ناہ
ماں نیمروچءَ پنیر ھونکّیں
ماں بیگاہ ءَ نباتی ھلواہ
لیلو ءُ لی للو لیلو بیا
من لیلوے کن آں داں بِہ وپسی
بچّیگ پہ تُنب رودیں تیں
میشی زگرَگ ءُ گؤنگی ناہ
ماں بیگاہ ءَ نباتی ھلواہ
ماں نیمروچ ءَ پنیر ھونکّیں
بہ وپس ماں گوانزگ ءَ شاگین ءَ
شاگیں گوانزگ تی واب جاہ انت
میدیں بند تئی پاسپان اِنت
@Labzank
telegram.me/Labzank

((هیالانی بانک))

قلم بیا لولو انگیْزیْن گُهر گوْار

نگارانی طراز بندیْن رقم کار

سفید و سادهیْن گُل کاغذا بیار

لکیران رند و قرطاسان به سینگار

بکش سنجیدهیْن سطران بکتّار

حروفان رد بکن چوْ دُرّ شهوار

کنن وصفِ رُخِ دلدارِ عیّار

جنک تاینت جهانا لاله رخسار

شبِ سیاره و گوْربامَیْ استار

فرشته صورتیْن فرخنده دیدار

غزالیْ از غزالستانِ تاتار

مثالِ یوسفِ مصری به بازار

تمامیْن عالمِنت لالَیْ حریدار

دلون دلدارَیْ گیسوان اسیرنت

غزل سنجیْن زبانون نکته گیرنت

قلم الماس و قرطاسون حریرنت

جنک رنگ و رُخا بدرِ منیرنت

تویَ لیلا ، منان مجنونِ شیدا

گنوکی کپتَگان تئی بند و قیدا

بیا دلبر که تئی دیما به گندن

دمانیْ تئی گوْرا بیایان به نندن

چه تئی باغیْ گـُلا پُلیْ به سندان

بچارن تئی دو ملگوریْن کمندان

سفیدیْن غبغب و پُلیْن پرندان

شکر تامیْن لب و دُرهایْ دندان

دلِ چوْ پرچیا سختنت چوْ سندان

جفا بر عاشقان لیکن نه چندان

جنک دوستنت منا آهو غزالیْن

زلیخه زینت و یوسف جمالیْن

منیریْن مشتری بدر الکمالیْن

قمر پیشانی و بُروان هلالیْن

عطارد پیکر و زهـره مثالیْن

شکـر بچکـندگ و طوطی مقالیْن

تویَ گـُلبن منان تئی باغَیْ بلبل

مکن دلبر منا طنز و تغافل

تمنایْ کنان من از تو ایْ گـُل

دو بادام و دو نارنج و دو کاکـُل

دو هم قوسیْن کمان تاب و دو سنبل

دو یاقوت و شراب آلوده ئیْن مُـل

جهانیْ گـُلشنا نیْستنت چُشیْن گـُل

وَرق پوْشیْن نهال و آسمی پُل

نه در چین و نه کشمیر و کابل

نه ایْران و نه توران و نه زابُل

نه ملکِ قیصَر و فغفور و دارا

هراتَیْ کوچگ و بلخ و بخارا

جنک در چیدَهنت از صد هزارا

پُلیت از عاشقان صبر و قرارا

عـروسانه پِر بندیت وتارا

غزالی گردنا کشیت چوْ مارا

دُرخشیت همچوْ ماهِ بیْ غبارا

کمندان گرهن دنت واسطه شکارا

دجوکیْن غمزَهان شانیت په مارا

دو ابرو چوْ سپاهانی سگارا

دلا سندیت چوْ ترولیْن خیارا

هزار نازیْـن جنک جان پرورنت مئیْ

تن و روح و دل و جان و سرنت مئی

شبِ مهتاب و شمسِ خاورنت مئی

زلیخا زیب و بَـدرِ انـورنت مئی

منـان تـئی عشقَـیْ لـوپایان گـرفتار

عَـجَـب زیبنت ترارا زرگـری هـار

سَـرَیْ مهنا و پُـر دوچیْن گوْرَیْ شار

چُلنب و نالک و پٹـّیگ و گیوار

خماریْن نرگس و بینی چوْ کاٹار

کـهیب و کنزگانی میان زُنّار

لذیذیْن کـَندگ و بلقیسی گفتار

کپوتی لڈگ و سیسیگی رفتار

تئیَ شیرین منان تئی عاشقِ زار

چوْ فرهادا مـدام رنجور و بیمار

دلا جـوْش جَننت دردانی پاهار

منـی درد نه بنت دراه په دوایا

طبیـبـیْ حکـمـت و سقمونیایا

منی دردیْ دوا شهدیْن لبَنت تئی

سفیدیْن گـُب وسارتیْن غبغبنت تئی

دو نورانـی مثالیْن کوکبنت تئی

سَـریْ ملگوْر و مسک ومهلبنت تئی

منان پروانه تو شمع شبستان

دهن تئی حقه و لب شکرستان

منا اومان کنت تئی کاکلستان

بهاریْن باغ و سرسبزیْن گلستان

مسلسل پیچ و تابیْن سنبلستان

گلیْن رخسار و نارنجیْـن دو پستان

چِنان پلان چه باغ صندلستان

دمیْ مدهوش بان چـوْ میْ پرستان

زنوک چوْ سیب و لب چوْ انگبیننت

گوْر و سینه لطیف و نازنیننت

دوئیْن رُخـسار آیـاتِ مُـبینـنت

دهن تئی میم و دندان سین وشینـنت

زبرجـد زیور و لالـیْ نگیننت

چنـان منّینتَگــن ماهیْن دلـارام

پـری رنگیْن جنک گلـقـدّ و گلفام

کـپودر آخـرا بیت گوْن منا رام

صنوبر صورتیْن سـرو و گل اندام

پریا پوشِتَنت ســونارَهَـیْ سـاز

طلائیْن مورت وشش کالکیْن گوْرانداز

چَمیت چینی پرند پوشیْن پری ناز

چوْ ماها پُلّیتگ طاووس طنّاز

بهار خیزیْن گل و سَـرو و سرفراز

منی کُـرتگ انیس و محرم راز

دمــاگا پکـِتگ خامــیْن خیالـیْ

جتگ نفسا خرابیْن فکـر و فالــیْ

تعالی الله عجـب خـوبیْن جمالـیْ

منا هکـَّل کُـتَگ عـلـمَیْ پیامـا

حیا و طـعـنه و لـجّ و مـلامـا

مکن مُـلا مَـوَر مـالِ حَــرامـا

مـرو دیمـا مه کپ ابلـیسـیْ دامـا

به کـج گردن کشیْن نفسَـیْ لگامـا

بچار که حاضرنت پاکیْن شهنشاه

گناهان وت بکش استغفر الله

چه خوابِ غفـلتـا بیتان من آگاه

سمندن تیهـریْن گـٹـا نه دات راه

پدا سستنِ من و گل پیکریْن ماه

به صد افسوس و درد و ناله و آه

جَنِکـا عشوه ییْ داتَگ مَـنارا

اِه! مَـن وت کلاگ زُرتگ تَـرارا

غـزالانی گِرگ مـردانی کارنت

بر

و که چوْ تئین ملا ہزارنت
((

شاعر ((هدا مرزی ملا عبدالله پشینی))@Labzank
telegram.me/Labzank

گـوشکنـد 😄😂

ملالُتر گوانک کنت پلیس ۱۱۰ ءَ گوش ایت:

من مارمولکے ماں دگّ (جادہ) ءَ گوں موٹل ءَ چیر گپتگ انی مرتگ ءُ بیران بوتگ چے بہ کناں؟

پلیس بچکندے جنت ءُ گوش ایت!

دُمب ئَے بہ گر ءُ یک نیمگے مان ئَے بہ بُر ءُ وتی راہ ءَ بہ گر ءُ پشت ءَ چک مہ جن ءُ برو!

لتر گوش ایت: منت وار واجہ پلیس نی پاگ ءُ جُل ئَے چوں بہ کناں؟؟😶

پلیس: یا گوس 😄😂
رجانک / ھارون اخلاقی.
کورُشیں گال#
لبزانکی مجلس کلمتی کاروان.

گـوشکنـد 😂😄
ملالُتر روت پنی سیلین بہ جنت
داکتر گوش ایت تو پیسر ءَ جتگ؟

ملالتر گوش ایت جی ھو من زیکیں روچ ءَ جتگ 😁
داکتر گوش ایت شر انت گڑا ترا نہ چکاساں زیکیں روچ ءَ جتگی!

وھدے کہ پنی سیلین ءَ جن انت! لتر ءَ مارتوسک (تشنج) گر ایت، کپ ایت دیم پہ چیر لیزگ ءُ لیتار بیت 😐
.
.
وھدے کہ پہ ھوش کیت داکتر ئَے گوش ایت بھتاوریں لُتر تو نہ گوشت من زی پنی سیلین جتگ 😠
.
.
.
ملالُتر گوش ایت جی ھو من زیک ھم کہ جتگ اَت ھمے وڑا بوتاں ... 😄😝😂
رجانک / ھارون اخلاقی.
کورشیں گال#

اِے چاڑیں دل کہ کدی موجے ءَ ھوار کَپ اِیت
من پادکایاں بلے سر ھزار وار کَپ اِیت

ترا سلام اِنت تو پُلّان ءَ آس پِرّیچ ئے!
من ءَ گوں کُنٹگاں روچے بِہ گندئے کار کَپ اِیت

کجام راہ ءَ ودار ءَ تئی بہ ننداں من
کُجام راہ ءَ زمانگ، من ءَ دُچار کَپ اِیت

اِے دل کہ دست ءِ دل ءَ اِنت من ءَ تئی بازار ءَ
گُشان ءِ دامن ءِ لَمب ءَ وتی بہ دار، کَپ اِیت

پمیشکا میر ءَ وتی اوست کُنٹگاں بَستگ
کہ کَوش کَشّ اِیت گُڑا پُلّ بے شُمار کَپ اِیت

میر اُمَر میر



@Labzank
telegram.me/Labzank

" تژن ءُ کندگ "
(ٹگیں مُردگ او پرشتہ)
پرشتہ: چے ھال اِنت تئی ؟
مُردگ: منی ھال توبہ توبہ گشے مُردگانی ھالءَ
پرشتہ: تو منا پجہ آرگائے
مُردگ: تئی صورت اللہ اللہ
پرشتہ : تو ادا چیا وپتگ ئے
مُردگ: تئی انتزارءَ روچ شپ تو ناز مکن
پرشتہ: تئی رب کئے اِنت؟
مُردگ: مئے ھُدا اِنت مارا چو ہمشام کنت
پرشتہ: دنیاءَ تو گیشتر نیکیں عمل کتگ یا بدیں ؟
مُردگ: ھرکسءَ گوں کس دِلءِ رازاں نہ دنت
پرشتہ: تو کدی ھُدا ءِ گورا ماپی لوٹتگ ؟
مُردگ: اے وھدءَ من کجا رواں کئی دامنءَ گرآں
پرشتہ: ادا ترا کجام وھدءَ گریوگ کیت ؟
مُردگ: دوست ءُ دلبر کہ مارا یات کائینت
پرشتہ: تو رب گورا گیشتر کجام دوا لوٹ اِتگ؟
مُردگ: اللہ منی سالونکءِ بھتءَ بلند کن واللہ
پرشتہ: تو ادا چوں اتک ئے ؟
مُردگ: پرے ھالءَ گُلیں یار ءَ کنائینت
پرشتہ: گڈا تو زانئے تئی جاگہ کجام اِنت ؟
مُردگ: دنیا منی امروز اِنت جنتّ منی وابانی
پرشتہ: شریں وشیں من رواں...
مُردگ: بارگ نلی ءَ مرو
★★★★★

اے گپّ ءَ کم چہ کم پنجاہ سال بیت
اے ھما وھد ءِ گپ انت کہ سید ھرچ نیمگ ءَ بدواھاں اَنگر کتگ ءُ ھرچے کہ نمیرانیں سید ءَ نبشتگ اے کماشیں ندکاراں واجہ ءِ راستیں نبشتانک پچ رتکگ اَنت ءُ پہ زانت رھبند اِش ھراب کتگ پرچا کہ آیاں بلوچی ءِ درد پر نہ بیتگ آیاں مدام لوٹ اِتگ کہ سید ءَ پہ وژنامی ءَ مَیل اَنت بلے چوش اش نہ زانتگ کہ وژنامی ءُ بدنامی ھاوند ءِ دست ءَ اِنت
اگاں بدواہ زبان ءِ دیمپان مہ بیتین اَنت مروچی سید ءَ اے کنڈگ دیر اِنت کہ گوازینتگ اِت اَنت ءُ مروچی بلوچ ءِ رَمگ بھاری لاٹیگاں چرگ ءَ اَت بلے بژن کہ اشاں بھار پہ ترکگ ءَ نہ اشتگ
اگاں مروچی ما مانگیش اتگ ایں چہ ھمے بدزردیں دوتل ءُ دوپوستانی سَوَب ءَ ما پشت کپتگ ایں!
سید، سیدے بیتگ اے گپ راستے کہ سید انسانے بیتگ ءُ چہ انسان ءَ ردی بیت بلے شما بچار ات آ وھدی چوشیں ساز ءُ سامان ءُ پٹ ءُ پولی دم ءُ درگاہ نہ بیتگ اد ءَ کتابے شوھاز کن ءُ اود ءَ کاگدے درگیج چو نہ بیتگ کہ تو ناکو گوگل ءَ بہ نبیس پارسی ءِ باستان ءُ یاکہ اوستا ترا ھزار ءَ چہ گیش نبشتانک دست کپ ایت پد ءَ ھم پہ آ کس ءَ کہ تھت باھوٹ بیتگ ءُ کیسگ ءَ کلدارے نہ کپتگ کتاب درگیجگ ءُ وانگ مزنیں گپے بیتگ
شما شر بہ زان ات گوں اینچُک نگیگیں جاور ھال ءَ شست سال ءَ پیش ھُدامرزی ءَ سیاھگ ءُ رھبندے گیشینتگ انی شست سال ءَ رند یک نادراھے ءِ دیم ءَ ھزار ءَ چہ گیش درھجان ءُ سوھو ءُ زانتکار مِک اِنت بلے پد ءَ ھم پہ دلجمی راستیں منانکے آرت نہ کن اَنت چو ھما مار ءُ مار وانیں جوگی ءِ کسہ ءَ تچ اَنت ءُ ایرودْراپ کنگ ءَ اَنت ءُ بے سر ءُ بنیں منانک دے اَنت بلے وھدے کہ دگہ ھچ راہ ءُ در نہ گند اَنت بارگ بارگ ءَ جوگی ءِ تورگ ءَ پُتر اَنت ءُ ترَہ اَنت
شما گوَہ دار اِت کہ اگاں پہ بلوچی ءَ شرتر ءُ الکاپ تریں سیاھگ ءُ رھبند ھمے سید ءِ رھبند نہ بیت من پہ دلجمی گوش آں ھرچ ادیب ءُ زانتکارے کہ چہ سید ءِ رَستگیں کِشک ءَ ڈن شوھاز ءَ اِنت بزاں آئی رھ گار اِنت ءُ پہ آپسرے نہ رس ایت ءُ اَلّم ءَ یک روچے ھمے تبد ءُ لِوارانی وَڈالیگ بیت ءُ گوں تلکار بستگیں لُنٹاں راستی ءِ چمگے شوھاز ایت بلے بژن کہ آ وھدی آئی ءِ گرانبھائیں وھد آسر اِنت.
ھارون اخلاقی.
کـورُشـیں گـال#

🌹🌹 دُرّیں دانـک 🌺🌺

🔸اگاں لوٹ ءِ ،
مَرگ ءَ چہ رَند شَموشَگ مہ بـے...
اَنچیں چیزے بِلِک کہ
وانگ بہ کَرز اِیت ؛
یا انچیں کارے بکن کہ
لِکَّگ بہ کرز اِیت

˝بنجامین فرانکلین˝
رجانک : قادربخش کلمتی

@Labzank
telegram.me/Labzank