👇_ #لینک کانال اشتراک بزار#_👇
@OBaloc

توار: فیصل بلوچ
شاعر: یحیی کلمتی
@Labzank
telegram.me/Labzank

چکاس بند

*هور کیت انت گوات کیت انت تو نیا ئے پرچیا*
*مئے دل ءَ تئی یات کیت انت تو نیائے پرچیا*

دل ستر اِشک ءِ اَزاب ءَ زانت مہ کنت اِنت پہ وت ءَ
اندر ءَ پریات کیت اِنـت تـو نیائے پرچیا

دَور ءِ تژناں شر بچار کہ چون کنت اِنت پہ منا
رهسراں مئے چات کیت اِنت تو نیائے پرچیا

مئے وَ پجّاروک سرگوات اَت دنیگا هال ئِے نیست
گوں سمین سوگات کیت اِنت تو نیائے پرچیا

شازی ءَ سرتاج ترارا اے وڑ ءَ پیگام کت
تئی سلامت بات کیت اِنت تو نیائے پرچیا

سرتاج راهی چهباری



@Labzank
telegram.me/Labzank

جار :
سلام ءُ دروت باسکاں
انوں پدردیں ھالے سربوتگ کہ گومازی تحصیل تمپ ضلع کیچ ءِ نامداریں شائر مہم جان موج مروچی کراچیءَ بیران بوتگ.
انا لله و انا اليه راجعون
آئ ءِ میت مُلک ءَ دیم دَیگ بیت ءُ ھمودءَ نماز ِ جنازہ ءِ جار پرینگ بیت۔
ھاوند وتی گنجیں رھمتانی ساھگ ءَ جاہ ئِے بہ دنت ءُ پُشت پداں سبر ءِ ھاٹیگ بہ دَنت۔ آمینBesam:
@Labzank
telegram.me/Labzank

بنوش ہر تہاریءَ ، ءُ روک بُوّگی نہ اِنت
گنوک بوت ءُ پہمتہ گنوک بُوّگی نہ اِنت

ہما زمانگ ءَ پتو ہدوک اِتاں،من زانتگ اَت
کہ مردم ءَ را اے وڑا ہدوک بُوّگی نہ انت

چو دْرپشناکیں شئیرے ءَ بباتۓ روشنا مُدام
بَلے چو شئیر ہر دپ ءَ رِچوک بُوّگی نہ اِنت

پتو اے تیوگیں جہاں،گنوک بیت بہ بیت،بَلئے
ترا پہ اے دیوانگ ءَ گنوک بُوّگی نہ اِنت

تئ درد وہدے گوں منا دوچار کپت گُشتگے ئِے
کہ عشق ءَ کوھن کپتگئے تہ نوک بُوگی نہ اِنت

منیرؔ کسّے الوتاں چراگ کنت ءُ بال دنت
بلۓ زمانگ ءِ شپ ءَ را روک بُوّگی نہ اِنت

۔۔۔۔۔۔۔۔ منیرمومنؔ ۔۔۔۔۔۔۔



@Labzank
telegram.me/Labzank

آشنائی ءِ سفر
(چندن ساچ)
من دمکے ءَ روگ ءَ اتاں۔ اناگہ ءَ دو پشی تچانی ءَ منی کش ءَ گوست۔ سیاہیں پشی اتاں۔۔ اے پشی آنی گندگ ءَ گوں حیالانی دروازگ پچ بوت۔ من دیراں اوشتاتاں ،ءُ من ءَ وتی گوستگیں زمانگ گیر اتک۔۔۔۔ ورنائی ءَ من یک کاڑے ءِ سرا شید ءَ اتاں۔ آئی ءِ نام نازان ات۔ آئی ءَ دو چیز ءَ سک ترس اِتگ ات۔ یکے پِشی ءُ دومی کٹار۔۔۔۔۔ آئی ءِ جتائی ءَ نوں باز مدت گوستگ۔ کساس بیست سال ءَ گیش اِنت۔ بیست سال۔۔۔۔۔۔۔۔۔۔۔ چنچو مزنیں مُدتے۔۔۔۔۔ ۔۔۔۔۔ منی ءُ آئی ءِ گڈی دیدار کراچی ءَ ایکسپو سینٹر ءَ انٹر نیشنل بُک فئیر ے ءَ بوتگ ات۔ آ زمانگ ءَ سک دیر اِنت۔ آ وتی مات ءِ ہمراہ ات۔ آیاں گونڈوے ہم گون ات۔ نازان گونڈو ءَ گوں بچکند اِت ءُ پدا نیم چمی ءَ من ءَ چار اِت۔ بَلے ہمے نیم چمی چارگ ءِ تہا لاڑکی ئیں درآمدی یے ہست ات۔۔۔۔ شپ ءَ پدا من نازان میسج کُت کہ تئی بچکندانی عمر سک مزن اِنت۔۔۔۔۔ منی میسج ءَ گوں آ زہر گپت ءُ من ءَ گشت ئِے۔۔۔۔ اگاں نوں تو من ءَ میسج کُت۔۔۔ من وتی پت ءَ حال دئیاں۔۔۔۔ آ روچی ءَ چہ پد من پدا نازان بھہ میسج نہ کُت۔۔۔۔۔
مروچی اے پشی آں پدا من ءَ نازان ءِ دنیا ءَ بُرت۔۔۔۔۔شناسائیں درآمدی یے گیر اتک۔
کمو دیراں پد من وت ءَ وتی دنیا ءَ آرگ ءِ جہد کُت ءُ دیما شتاں۔۔۔۔ دومی دمک ءَ رستاں۔۔۔۔ تہ گنداں۔۔۔ ہما دوئیں پشی اَنت کہ گاڑی یے ءَ جتگ ءُ مرتگ اَنت۔۔۔۔۔مرتگیں پشی آنی گندگ ءَ پد۔۔۔۔ من اوشتات نہ کُت ، پرچا کہ نوں اگاں من بہ اوشتاتیناں گڑا درآمدی منی تہانگ ءَ ایر کپتگ ات ۔۔۔۔۔۔
من لوگ ءَ شتاں۔۔۔۔۔ وتی وابانی ڈائری پچ کُت۔۔۔۔ آئی ءِ تہا یک وابے نبشتہ ات ۔۔۔
من واب ءَ گنداں کہ نازان بانور اِنت۔۔۔۔ آئی ءَ عکسے دست ءَ اِنت۔۔۔۔ آ عکس ءِ تہا چار پشی اَنت۔۔۔۔ بَلے پیر اَنت۔۔۔۔۔ من نازان جُست کُت۔۔۔۔ ترا زانہ مروچاں پشی آں چہ نہ ترسیت؟۔۔۔ نازان من ءَ پسہ دات۔۔۔۔ من وتی اندر ءِ مردم کُشت ءُ پدا آئی ءِ جاہ ءَ پشی یے آورت۔۔۔۔۔ مروچاں من ءَ وتی سرا کندگ کیت کہ من یک زمانگے چہ پِشی آں پرچا تُرس اِتگاں۔
اِے واب من شانزدھ سال پیسر دیستگ ات۔۔۔۔۔۔


@Labzank
telegram.me/Labzank

گـوَشـکـَـنـد – ادَبـی هَـکـیـم
کـار ءِ سـرءَ مَـردَکـےءِ گـوانـکـو دُزّگ بـوُت مـردَک ءَ بـاز شـوهـاز کـُـرت بـلے گـوانـکـو دَر نـہ کـَـپـت بـیـگـاه ءَ مَـردَک لـوگ ءَ آتـک آئـی ءَ دیـسـت کـہ آئـیءِ لـوگ بـانُـک ءِ بـرات وَتـی گـُـهـار ءِ سـامـان لَـڈگ ءُ بَـرَگءَاَنـت مَـردَک ءَ جُـسـت کـُـرت زانـاں شـمـئـے گـُـهـار کـُـجـا رَوَگءَاِنـت کـہ شـمـا مـنـی لـوگ ءَ هـالـیـک کـَـنَـگءَاِت لـوگ بـانُـک ءِ بـراتـاں گـوَشـت تـو مـئـے گـُـهـار ءِ سَـون مـاں وَتـی گـوانـکـو ءَ دِیـم داتـگ اَنـت نـوں پَـرچـے گـوں مـا پـوُتّـاری کـن ئـے ؟!!!... مَـردَک ءَ گـوَشـت مـن شـمـئـے گـُـهـار ءِ سَـون نـہ داتَـگ اَنـت سُـهـبـگـیـنـے یَـکـےءَ مـنـی گـوانـکـو دُزّاِتـگ گـڑا بـزاں هَـمـائـی ءَ چـو نـبـشـتَـگ مَـردَک ءَ کـُـلَـهـے نـبـشـت ءُ مـاں وَتـی گـوانـکـو ءَ تـهـا ایـرکـُـرت مَـردَک ءَ نـبـشـت تـو مـنـی گـوانـکـو دُزّاِتَـگ اَت وَ پَـرواه نـیـسـت اَت بـلـے تـو مـنـی لـوگ بـانُـک سَـون مـہ داتـیـں دُزّ ءَ گـوَشـت سُـهـبـیـگـیـنـے تـئـی لـوگ بـانـک ءَ مـن ءَ سـیَـہ دِل کـُـرتَـگ آئـیءَ کـُـلـہ نـبـشـتَـگ ءُ دیـم داتَـگ اِے چـیـزّ ءَ بـہ گِـر ءُ بـیـار آ چـیـزّ ءَ بـہ گِـرءُ بـیـار مـنـی سَـرءِ دَردے داتَـگ رَنـدا مـن بـیـزار بـوُت آں گـڑا مـن شَـور کـُـرت تـرا هَـم چـہ اِے بَـلاه ءَ بـہ رَکـّـیـن آں .


@Labzank
telegram.me/Labzank

گُبار

چمءِ گُباریں رہسراں
واباں دمُوکّہ پوشِتہ
امروز کشکے بے ڈسیں
نا آشنائیں منزلے
مانِشت جاہیں ساہگے
مردم نپَس کشّ اِت نہ کنت
کوراسیں غارانی تہا
چمّے وتا چارِت نہ کنت
گَردءُ گبارانی تہا
دروہاپ تُنّیں رولہاں
دریا ءِچم ہونیں کتہ
چولاں ملامت کئے بکنت
ہورکیں تیاب ءِ پلّوا
ھوشامیں لنٹ ءِ ساہگ ءَ
امروز باراں دؤر دنت
گوْرکِشکیں کوہ دیمی زِہاں
مارا ماں چماں کور کنت
دل بے نشان ءُ بے ڈَسیں
وہد ءِ ھلاھوشیں جَلءَ
مَرگءَرا زندے نوشِتہ
چم ءِ گُباریں رہسراں
واباں دمُوکہ پوشِتہ
★

(خالق ارمان)



@Labzank
telegram.me/Labzank

مُلّا محمد کلمتی ءِ زند ءُ شاعری ءِ سر ءَ دو گپ
*******************

بلوچ قوم چہ جهان ءِ مستریں قوماں یک قومے کہ بازیں راجانی تہ ءَ بهر اِنت ءُ چہ آیاں یک راجے کلمتی ءِ نام ءَ زانگ بیت کہ یک شانداریں گْوستے ءِ (ماضی) واهُند اِنت ، شش سد سالی مانش جاه کہ گوں نَقش ءُ نگاریں سنگاں "توتا چوکنڈی" ءِ نام ءَ زانگ بیت یا کْوهنیں شاعری ءُ داستان بہ بنت اے هبر ءِ گْواهی ء‍َ دے اَنت .

کلمت هما روچ کلمت اَت
سردارئِے شاهی بِنگو اَت
پَوجاں سماعیل مستر اَت
زهم ئِےامام میر سنجر اَت
پور ءِ دپ ء‍َ مرد توکل اَت
شاریں پڑکّو حمّل اَت

شاهی ءُ سماعیل ، حمّل ءِ ناکو بیتگ اَنت ، سماعیل چہ حمّل ءَ پیش شاگ ءِ ناهدا ءُ جنگ ءِ دیمی مردم اَت کہ شهیدی ءَ پَد گْوادر ءَ قبر کنگ بیت کہ داں انگت آئی ءِ مانش گوں سنگ ءِ شاهکاریاں هست اَنت .

(نام ءُ نسب)

ملا محمد ، ملا محمد ءِ میر سلیمان ، میرسلیمان ءِ میر جامی ، میر جامی ءِ کینگی ، کینگی ءِ سلیمان ، سلیمان ءِ امیر ، امیر ءِ قمبر ، قمبر ءِ ثوبان ، ثوبان ءِ نوتک ، نوتک ءِ کاپڑی ، کاپڑی ءِ شاهو ، شاهو ءِ مُرید ، مُرید ءِ مندو ، مندو ءِ جلّاب ، جلّاب ءِ هالو ، هالو ءِ شاهو ، شاهو ءِ هدّه ، هدّه ءِ نوت ، نوت ءِ نودبندگ ، نودبندگ ءِ نوت ، نوت ءِ میرعالی

********************

ثوبان 1 ءِ گنجی ، گنجی ءِ جیهند ، جیهند ءِ شاری ، شاری ءِ میرجیهند ، میرجیهند ءِ میر بِنگو ، میربِنگو ءِ ملک زردار ، ملک زردار ءِ ملک محمد ، ملک محمد ءِ ملک اِسحاق، ملک ء اسحاق ءِ ملک حاجی ، ملک حاجی ءِ نوت ، نوت ءِ میر عالی

********************
میر بِنگو ءِ سَے چُک بیتگ اَنت:
میرجیهند ، ملک شاهی (کلمت ءِ حاکم) ، سماعیل

میرجیهند ءِ هم سَے چُک بیتگ اَنت:
شاری ، مادری (اِیشی ءِ پدریچ آهوران ءِ دمگ ءَ اَنت) ، میرحمّل

میر عالی کیچ ءِ والی بیتگ ، هوتانی نسب هم میرعالی ءَ رس ایت .

(پیدائش)
کساس ۱۳۳۵ هجری ءَ حصاریں درابول ءِ دامن ءَ مسیت ریک ءَ میر سلیمان ءِ لوگ ءَ ودی بیتگ .

(وانگ ءُ زانگ)

آ وهداں اے دمگ ءَ بازیں وانگ ءُ زانگ ءِ ازباب نہ بیتگ ، البت واجہ مُلّا محمد ءِ پیرُک واجہ میر جامی کہ وتی دَور ءِ مهمان نواز ، میارجلّ ءُ نامی ئیں سَرے بیتگ ، دائم ءَ ملّا ءُ پیش امامے بیتگ کہ چراهاں مُلّا دوست محمد ، مُلّا مراد ءُ مُلّا خدادات ءِ نام گِرگ کرز اَنت .
ملّا محمد ءِ اُستاد مُلّا دوست محمد ءُ ملّا مراد بیتگ اَنت کہ بس قُرآن مجید همے واجهانی گْور ءَ دربرتگ ئِے بلے گیشتر ئِے نہ ونتگ.
بلے چوشکہ درابول (کُمب ، مسیت ریک ءُ درّین تلمب) هنچیں نامے کہ آ وهد ءَ رهگْوزی مردانی ساسار جاهے بیتگ ءُ اِد ءَ هر پڑ ءِ بورسواراں پہ ادارُکے منزل کتگ ، درابول ءِ نام ءَ اے بتل چہ کْوهن ءَ همگْرنچ اِنت :

من جتگ شَعر ءُ نال اِتگ مُرگاں
من جتگ شَعر ءُ دنز اِتگ بگّ ءَ
بَگّ ءَ پہ درابول ءَ زهیر بیتگ
مارا پہ دشت ءِ گورگیں کُلّ ءَ

ءُ باز جاگہ ءَ گْوتر ءِ گورگیں کُلّ ءَ نبشتہ اِنت چوشکہ صدّیق آزات ءِ تنّاپیں تْران ءَ هم گْوتر ءِ نام اتکگ .

مُلّا محمد ءَ همے آیوکانی گْور ءَ کہ آئی ءِ واجهیں کماش ءُ بوهیریں پیرُک ءِ مهمان بیتگ اَنت نند ءُ پادا کتگ ءُ بازیں گپ ءُ گال ، شَعر ءُ داستان ئِے دربرتگ ، همے هاتر ءَ واجہ ءِ شاعری ءِ تہ ءَ عربی ءُ فارسی لبز گندگ بنت ، پیش ءَ اے دمگ ءَ شرک ءُ بدعت ءُ زیارتانی پانپانی باز بیتگ ءُ مُلا اے پِڑ ءَ مُنجار ءُ رهشون بیتگ انت ،،،، بلے مُلّا محمد چہ شرک ءَ تکے گِستا ءُ چہ توحید ءِ جام ءَ سیراپ اَت ءُ اے گال آئی ءِ توحید ءِ نشاندهی ءَ کنت :

هر سحر فریاد کناں پیش ءِ پاک ذات
واناں الحمد ءُ سجده ءُ توحید ءُ صلات
بر یقین تصدیق اِنت من ءَ فرض ءُ واجبات
سی جُزیں قرآن ، عالمانی گپّ ءُ روات
ثابت ءُ برحق اَنت خداوند ءِ کائنات

واجہ ءِ شَعر گوں بلوچی زگریں گالاں چو تچوکیں آپ ءَ اَنت .


هملسون ءَ چو شرتگی سبزیں ساوڑاں
ره نئیت آپ ءَ پہ کلات بُرّیں ڈیمبراں
گْریشگ ءُ گیڈئِے پَشت نہ دات داز گوں کونراں


جانور ءُ ساهدارانی نام ءَ پہ گْومے گالانی رشتگ ءَ کما اِیت :

ممّ ءُ خنزیر ءِ رپتگ انت سَید گوں بابراں
هوزم ءُ شاهین ءُ نرپلنگ ، گُرک گوں گلّڑاں
شادی ءُ پل گوش ءُ بشوشگ گوں کَپتراں
گوج ءُ ریژگوک ءُ سیکُّن گوں سِلّیں گدَّڑاں
موش ءُ خرگوش ءُ گُربگ ءُ سیسی گوں پَراں
مار ءُ گژدم ءُ گانڈو چہ شیر آپیں تڑاں

دشت ءِ توپان ءِ ویرندانیانی دلکُدیں ندارگے ءُ هاس پہ هما کہ پہ چمّ اِش دیتگ اَنت ءُ پہ زرد اِش مار اِتگ انت :

شوم هما روچ اَت اگرب ءُ بے سوبیں دمان
پْرشتگ اَنت سدّ ءُ جهل انت پہ ماتکَوری شماں
سورگ ءُ تَلّ ئِے چیر چِت اَنت گورپان ءُ گتان
کهن ءُ شهجوئِے بُرتگ اَنت باگ گوں نیوَگاں
دستِ کِش گونگ گوں آتکگیں فصل ءُ میوهاں
هچ کس ءَ نیست اَت هنچشیں اندیش ءُ گمان
شکّ ءُ بے ڈاه ءَ بُرت ئِے چہ مهلوکاں امان
گوں نهیبان ئِے بستگ

انت پیر ءُ

ناتوان
کُلّی نوک سیر ءُ طفل گونا شاگیں گْوانزگاں
ماں گڑ ءُ گبّاں چندها اسکولی جوان

ماں قرآن ءِ تہ ءَ هست :

ظهر الفساد فی البرّ و البحر بما کسبت ایدی الناس
(بہ زاں : هُشکی ءُ زِر ءَ نہ گیگیں جاورانی سوَب مردمانی کِرد ءُ کارپد اَنت)

مکسد ئِے جرمءِ گپتگ ئِے کاڑیں مهتراں
سیٹ ءُ تُجّار ءُ خان ماں زرنقشیں خیبراں

زردارانی زند ءِ زیب ءُ زینت ءِ ازباب کہ توپان ءَ وتی اَرجاں جت اَنت .

فرش ءُ قالی ءُ کُلت ءُ بندوق گوں خنجراں
کٹّ پت ءُ جدّی لعل ءُ یاقوت گوں گوهراں
شار ءُ شاهی گوں زرگری سهت ءُ زیوراں

بے وس ءُ بزگرانی زند ءِ مڈّی ءُ متاه هم دریمبوکیں زر ءِ میار بیت اَنت .

ماں ک‍َش ءُ کِرّ ءَ باز گدام نند چہ بزگراں
جَتّ ءُ گُوّال گوں گاو ءُ گوسفند ءُ هُشتراں
راهی ءِکاروان گوں لیڑه ءُ بارکَشّیں هَراں
پہ چیتک ءِ پاریتک انت چو هوات واریں میهڑاں

توپان ءِ گورموشی گوں سرشَم ءُ ماتبند ءُ ڈومگی سنٹ ءُ سیاه تلاراں تُرک ءے تاراجیانی یاد ءَ دنت کہ هر وهد ءَ پہ اے بے وسیں راج ءَ بیڑ اِش برتگ ،


کیچ ءِ سدگنجیں تاتکگ چو تُرکی لشکراں
تا کہ دیهات ءَ بوری پاچوپ ءُ الگراں
سرشَم ءُ ماتبنداں نهنگ اتکگ جوش وراں
ڈومگی سُنٹ ءُ سیاه تلاراں بیتگ مڑاں
هردوئیں جاڑاں چو حسدّی زورآوراں

دلوت ءُ رسترانی یکجاهی ءُ چہ یکدگر ءَ بے سمائی ءُ نپسانپسی قیامت ءِ ندارگاں سیادی کنت .

هور اِت اَنت زند ءُ لاش گْونا کنٹ ءُ اولڈاں
گاهے پنهان ءُ گاهے چہ موج ءَ سربر انت
هر دگہ جنس انت صورت ءُ شکل ءَ وڑ وڑ انت
باز هما درّنده شکار گولان اِش زر انت
امروز ءَ هم نیاد انت چو پت ءُ چُکّ ءُ مادر انت
بے خیال انت چہ پیسری بُغض ءُ کُنّتاں
کل ءِ جاندار پہ تهتگے بیت انت همکنان

ربّ ءِ قهر ءِ لوار جهانے تباه کنت ءُ رحمت ءِ ساهیل دنیایے آباد ءُ میزران .

واحد القهّار اَت کرم ساز ماں قدرتاں
طُرفة العین ءَ جوش کتگ ربّ ءِ رحمتاں
آس اِتگ بام ءَ پیش ءِ چہ وقت ءُ مدّتاں
بُرّ اِتگ اقلیم ءِ سر ءَ گْرانیں زحمتاں

ربّ ءِ هچ کار بے حکمت نہ اَنت اگاں سزایے دنت پہ عبرت ءَ ءُ وشّی یے دنت پہ چکّاس ءَ .
نمیرانیں مولانا روانبد گُش ایت :

جهان ءِ جَهل ءُ بُرز ءُ انقلابات
روانبد عبرت ءِ واستا نشان اَنت

مُلّا محمد گُش ایت :

شکر گزاری یے اتکگ پہ نیکیں امّتاں
یادگاری پہ مشرک ءُ نادانیں جَٹاں

اے شَعر ءِ وهد ءَ واجہ کماش ءُ عاجز اَت بلے واجہ ءِ بورتاچی ماں شَعر ءِ پِڑ ءَ ءُ پد ءَ اے عُمر ءَ ستا کرز اِیت .

بس کن او ثوبانزهی تئی وهد اِنت آخری
محمد چو شاهین ءَ مہ جن پرواز پیسری
رتکگ اَنت دنتان ءُ زبان کنڈان ءَ مِڑ ایت
آ شکر بهریں نُگده چو گنگان ءَ اَڑ اِیت
هر قدر مرد ءَ گون بہ بیت داد ءِ قادری
جوانی ءُ پُرزوری نہ اِنت یارے آسَری

چہ اے تُرس ءَ کہ نبشتانک دْراج مہ بیت واجہ ءِ یک شَعرے ءِ بابت ءَ کہ دشت ءِ توپّان ءِ شَعر اِنت وتی هیال درشان کتگ اَنت .

.............
(بیرانی)

مروچی کہ من اے نبشتانک ءَ نبشتہ کنگ ء‍َ آں واجہ ءَ چار سال ءُ دو ماه ءُ بیست ءُ پنچ روچ اِنت کہ میارانی چادر چنڈ اِتگ ئِے .
بزاں سَے شمبے ءِ روچ ءَ ٤ ذیقعده ۱٤۳٤ همدپ گوں ۱۹ شهریور ۱۳۹۲ ءَ بیران بیت ، ءُ آئی وصیّت ءِ پد ءَ جنازه ءِ نماز بزرگیں واجہ نمیرانیں مولانا منیراحمد سراوانی ءَ وانینت ءُ کُلّانی ءِ کْوهنیں مانش جاه ءَ پہ مدامی تاهیر گپت ، ربّ ءِ پاک آئی ءِ مانش ءَ بهشت ءِ گلباگاں بہ کنت.

محمد یوسف انیس - باھو ،کُلانی.

سرچمگ:اوھنگ / ملا محمد کلمتی/ سال 2004/ ادارہ ھنگام چاپ ءُ شنگ پیشکان.

🎻سلیم امین ءِ مھپل🎤

مُفتءَ جَتئے منی سنگت سلیم امین,
سُتکگ یک واھرے بیتگ ھراب مشین,


گُشتگ چو پیسرا شھداد ڈینجرا
بینجو نہ جنت فرید مے. گانائے سرا,
داتگ من بددُعا پہ سِتک ءُ پہ یقین,
مُفتءَ جَتئے منی سنگت سلیم امین,


سالونکءِ سنگتاں دُرستاناں شعور کُت,
دُرستاں چہ پیسرا سالونکءَ دَور کُت,
صالح, نبو, کریم, عبدالغنی, متین,
مُفتءَ جَتے منی سنگت سلیم امین,


مے راجءِ ھستی اَنت مے راجءِ ازمکار,
تو بایدیں بلوچ پَجّہ اشاں بیار,
لالو تئی شاعری تپتگ چو مثلء تین,
مُفتءَ جَتے منی. سنگت سلیم امین

لالو پیشوکانی 📑دیوان لالوپیشُوکانی🎤@Labzank
telegram.me/Labzank

کِشک ....... خالق ارمان

اے کِشک گپ جنت!!!
بلئے،،
اے کشک مردمے نہ اِنت
اے کشک پیچ وارت ءُ بس!!!
اے کشکءَ دستءُ پاد پِر کت ایں
اے کشک ءَ بلّے گام جت
تو چے گُش ئے ؟
اے کشک باندا مردمے بہ بیت
گنوک بیت
اے کشک باندا گپ کنَگ نہ بیت
اے کشک ءِ سُنٹ ءَ نود دز جنت اَنت
اے کشک نوک کیسگے بہ بیت
کجا پہ وام دنت منزلے
اے کشک مردمے نہ اِنت
اے کشک گپ جنت بلئے!!!
اے کشک ءَ دزماں دست بئے تہ تران کنت
اے کشک لھتے روچ پیسرا من جنگلےءَ ڈِیک دات
کپوتے بوتءُ نال اِتے
زہیرے بوتءُ گال اِتے
اے کشک ءَ کمّو یات گون ءُ لھتے ترانگانی بُو
اے کشک ءِ ایر گوات ءَ ٹنگِتہ دیوانگانی بُو
اے کشک پیریں کِسّہ ے
اے کشک ءَ لھتے راز گون
اے کشک مرچاں سوت جنت
اے کشک ءَ بلکیں ساز گون
اے کشک چماں گار کنت ،گبارءُ دَنز لڈّءُبار کنت
اے کِشک جِنترے ءُ من تو دنزے آرت بس !
اے کشک پیچ وارت بس !
اے کِشک مردمے نہ اِنت
اے کِشک گپ جنت ، بلئے

◆◆◆◆◆◆
@Labzank
telegram.me/Labzank

*دُزّ ءِ دل ءَ جـت*
*کَھـبہ ءَ تـپ گپـت*

اے بتل ھما جاگہ ءَ کارمرز بیت کہ اگاں کسے ءَ ردیں کارے کتگ یا کہ ماں بازار ءَ دُزّی یے بیتگ ، بلے کس نہ زانت کہ دُزّ کے انت وھدے کہ ھمے دُزّی ءُ ردیں کار ءِ بارو ءَ گپ بیت ھما کس کہ دُزّ انت ءُ کُتہ کاریں مردم انت چہ ترس ءَ کہ بلکیں مردم چہ منی کارست ءَ سرپد اَنت پیش کپ ایت ءُ دپ ءَ پچ کش ایت ءُ گلبجانک کنت کہ زان آں من بیتگ آن ءُ زان آں اے کار من کتگ..

گُڑا مردم گوش انت پلانی تئی نام وَ کس ءَ نہ گپت بزاں تو اے کار کتگ کہ تو ماں جلاں کپتگ ئے *کہ دُزّ ءِ دل جنت ءُ کھبہ ءَ تپ گیر ایت*

اشی ءِ پژدر ھم ھمے پیم انت
کہ وھدے ماں دیوانے ءَ چنت نپر نشتگ انت ءُ ھیا ءُ گیرت ءِ گپ ءَ جن انت چُشیں جاھاں ھیا دار ءُ پھک دامنیں زالبول ساڑایگ بنت ءُ دامن دست ءُ دور ساھت ویلانکیں جنین ایر جنگ بنت ھمے دیواناں نام گرگ بیت کہ پلانی سکّیں شرّیں جنینے ءُ پلانی کُربانے ءُ پلانی ءِ نام اش پلان جاہ گپتگ!

اگاں چُشیں دیواناں چُشیں جنینے نندوک بہ بیت گڑا آئی ءَ تپ گیرت کہ باریں اے منی ھال ءَ ھم سرپد اَنت
گوں وت جیڑ ایت کہ باریں اے جنین منی گوش ءَ جَنگ ءَ انت پمیشکا نشت کت نہ کنت ءُ پہ تپ ءُ دردے ءِ بھانگ ءَ چہ دیوان ءَ پاد کیت *بزاں کھبگ ءَ تپ گیرت*
پولکار/ ھـارون اخلاقی.
کـورُشـیں گـال#
لبـزانکـی مجلـس کلمتـی کـاروان.

دستونک

زبان ءَ اوں رسیت واکے
منی گنگی ءَ گو یاکے

من انچیں دمکے ءَ کریاب
نہ راہ منتگ نہ اولاکے

منی بالاد نزور انت سک
پدا دل چونیں زوراکے

پہ وت اوستے چڑکّہ تئی
پہ دلترکاں بہ بیت تراکے

اے گترانکیں لب ءِ ھوشام
ترھیت پہ پوچکی مزواکے

کبر لوگے پہ بے لوگاں
کپن اوں پمّا پوشاکے

اے درچکاں جنگلے یل دات
شت انت ویرانگیں ڈاکے

گنوکے چوریاں مان بست
پدا بازار ءَ رُست جاکے

آ چو اللہ ءَ زوراور
آ چو شیتان گروناکے

ترا جاوید مہ کوپاریت
بچار چو تلک ءَ چالاکے

ھبیب جاوید

@Labzank
telegram.me/Labzank

۔۔۔۔۔۔کلات۔۔۔۔۔

دل ءَ را گیر بُتکگاں
سباہ ءِ سنجیں ساھگ ءَ
سمین ءَ الوتے کُتہ
گوں مہپرانی وشبوھاں
چراگیں لئیبواں گوں نشتگان ءُ ساز اتگ
مں ایوکی ءِ بِہ تواریں زیمرے
نہ بوتگاں
تاں مئے دَوار ءِ پشگاھ ءِ
کہیر ءِ ٹُل ءِ جِنگُلاں
سُروز گونگیں ندارگے بِنا کُتہ
بِنا کُتہ شپانک ءُ شوانگاں
اے میہڑانی دنز رُستگاں
چو دیہی بستگیں کلاتے ءَ
ھوار بوتگاں مں گواتے ءَ۔۔۔۔۔
۔۔۔۔۔۔۔
۔۔۔جاوید دین۔۔۔

@Labzank
telegram.me/Labzank

دستونک

اِے راستے تَنگی اِنت، بیچارگی اِنت
ھمے ھال ءَ وتی دل دارگی اِنت

بچار تو آپسرے، سبزیں دیارے
اگاں جاھے دمے ساسارگی اِنت

گم ءَ چاگرد ءِ یا اندوہ ءَ جند ءِ
منی چمّاں مُدامی گْوارگی اِنت

چیا پَشت کپتگیں، سرپد جھان اِنت
نوں مارا ھم ھمے گپّ مارگی اِنت

گْوشگ ارزان نہ اِنت ھر جاگہ راست ءِ
بلے راستی زُبان ءَ آرگی اِنت

کَے ءَ گْوشتگ، کجام جاہ ءَ نبشتگ
ترا تائر شپ ءُ روچ نارگی اِنت

تاج مھمد تائر


@Labzank
telegram.me/Labzank

وہدءِ تہاریں میتگاں ہمراہ کنگ نہ بیت
آ نامے انچیں شیرکنیں ہرجاہ گِرگ نہ بیت

دل انچو ناتوان اِنت کہ ارسے اوں دَر نئیت
مرچاں وتی سرا اوں توازہ کنگ نہ بیت

چمّانی درپ شُشتگ ءُ ایر اَنت کہ بیائے تو
زیبائیءِ شراب کہ تاساں کنگ نہ بیت

داں زیکّءَ شئیر گُشتگ ءُ سہڑینتگ اَت وتا
بیا بیا او مہروان نوں گوں ما گِلگ نہ بیت

زہرئے کہ پرچا ریزگوں پاداں نہ لگّنت تئی
من مردمے آں گوں من چو کانچءَ پْرُشگ نہ بیت

لوٹاں کہ نوں بنِنداں تئی بیکءِ ساہگءَ
مرچاں کہ گوں من اے دلءِ پاداں روَگ نہ بیت

وہدءَ مُنیرؔ دمکے چُنیں آرت ءُ سر کتگ
نندگ نہ بیت ودارءَ شُہازءَ تچگ نہ بیت
@Labzank
telegram.me/Labzank