عشق عشقےعشق عشقےعشق آسءُانگرے
عشق پلیں شے مریدئے زرنبشتیں چادرے

وشیانی شپ چراگ پہ دیم بلاناں واھگ ءِ
کئے بزانت کہ زندمان ءِ چے بلاھیں آسرے

Besam:
@Labzank
telegram.me/Labzank

(حاجی ءِ موتک)
حاجی نامانی میرھمّل کلمتی ءِ گوھارزتک اَت کہ سیر ءِ روچ ءَ کَورگان ءِ وھد ءَ اسپ ءِ سواری ءَ زین آئی ءِ دلبند ءَ لگّ ایت۔۔۔وھدے آ پہ نکاہ ءَ نادینگ بیت گڈا گوش ایت یک برے منی نکاہ ءَ مہ بنداِت گوں ھمے ھبر ءَ سرجھل بیت ءُ ھمدا دیوان ءَ بیران بیت۔۔۔۔اے موتک ھم بلوچی ءِ یک بے دروریں لچّھے۔۔۔۔
کولواہ ءُ گزدان آ جھان رندیں
ملکمیت ڈھدار ءُ ھسدّیگیں
چو صیاد ءَ ماں تُمپگ ئے پُشتیں
نئے کہ روت فرضی میڑھے نندایت
نئے گھتریں مردے لیکہ ئے گِندایت
ایرشُتگ گوْنڈیں روچ زمستانی
مئے سرئےمولشتےنہ کُت سالی
پُرْشتگاں چنگ ءُ رُستگاں زاری
پُرْوشتگ انت کاڑاں نُھہ تلیں باھی
جَمّو ءُ پُلّ بندیں نکیب شاھی
چہ بُزرْگی موردانگاں مُندری
دُرّ گوْن آ پَوراں ماھْکی گوشاں
بے نصیب بیتاں چہ سیچکی گوشاں
بِلّے ایر اَنت ماں تنک دپیں دُرْجاں
تنک دپیں دُرْج ءُ پیلھیں سالاں
پیلھیں سال ءُ قادر ءِ سوباں
باز اتاں راجی مرد سوارانی
ھاکمیں حاجی اَت مڑایانی
کئے بہ بیت کوٹانی اڑ ءَ توس ایت
آپاں ماں روکیں انگراں ریچ ایت
سیاہ اگاں سیگین اِنت ھمک وقت ءَ
چانک نہ کنت مُوری گُنبدیں دُمب ءَ
دُمب ءَ ماں نیلاں جنت سراپیناں
داں نیم شپی درْپشوکیں سُھیل گوش کنت
اے لاٰئقِ حاجی اَنت مُلوکین ءَ
شر بہ چاراھیت باھڑاں نیک نام
سیاہ ءَ گوں پرّگاں چکّریناں
رہ جتی اولاکاں بہ لڈّیناں
لَڈّ اِت اَت بیگاھاں بُنگ کشّاں
بلّ ءُ بشّی ءُ ھَنجری تشّاں
درکپاں کُلّ ءَ چُست ءُ اِشتاپ ءَ
شانک دیاں دیرگِنداں خُماریناں
پہ پَٹ ءُ ھِینّاریں نِگور دیم ءِ
داں اتکگاں بور ءُ چبراکیں واجہ
دُرْست کناں سالونک ءَ مُلوکین ءَ
درْوت دے آں ھاجی ءَ گنی بکّیں
پھک کناں قبر ءِ کلّر ءُ ھاکاں
واجہ ئے لاڈین ءَ بیجیکاراں
بور ءَ بنداں ماں کاپری درْمبکاں
روچ درآتک مامکی جڑکوکیں
ھمّل ءِ مات گوں شادھاں مین اِنت
رُمباں پہ پھر ءِ بندگ ءَ شین اِنت
ھئےھئے او کھریں دِل ھیالانی
ھاجی پہ نہ چونائیں گورے رپتگ
کوکری اِستیناں نہ کنت پیداک
نئے پِڑے شیریں چوٹو ءَ رند ایت
وتی سیاہ ءُ انکاسیں پیلو ءَ بندایت
دِل منی موجیں دائم ءَ جنگ اِنت
پرتو او ھاجی دل منی رنج اِنت
ھمّل ءَ میسک پُلّ ءُ شمال بیار ایت
ھاجی ءَ کَوش ءُ نود مُلیباری

(چہ کتاب''دَمبانی میار''زیرگ بیتگ)
Besam:
@Labzank
telegram.me/Labzank

مروچی ما چہ وتی جند ءِ پت ءُ پیروکی مال ءُ ملکیت ءَ زبھر ایں ءُ بے ھسابیں کدرتی ازبابانی چوش کہ زر ءُ ھندانی سیمسر انت واھندی ءَ ابید مئے ڈیھ ءِ مھلوک نیزگاری ءُ پدمنتگی ءِ آماچ اَنت.

پہ یک کساں کسانیں نادراھی یے ءِ درمان ءَ منی ڈیھ ءِ مھلوک پہ الاج ءُ دوا ءُ درمان ءِ واستا ماں دگہ شھر ءُ ھنداں در پہ در اَنت، کے ءَ میاریگ بہ کن آں؟

پہ وتی لاپ ءِ شوھاز ءِ ھاتر ءَ ماں دگرانی ملک ءُ ملکیت ءَ گلامی ءَ اَنت کہ ماں مروچگیں دیم ءَ شُتگیں دگنیا ءَ نزانتکاری ءُ جھالت ءُ ژیمبیں کور چاتانی تھا بُڈّ اتگ انت.

منی ڈیھ کہ پلیں بلوچستان بہ بیت چہ وتی لاڈُکیں بچّانی رتگیں ھوناں کہ پہ وتی لاپ ءُ وتی پجار ءِ شوھاز ءَ وتی تلاھیں زند اش پہ وتی سوگاتیں ڈیھ ءِ ننگ ءُ راج ءِ شرپ ءُ شان ءَ ندر ءُ کربانی کتگ، مئے زندمان ءِ متاہ ءُ مڈی بزاں راجدپتر، زبان، دود ءُ ربیدگ ءُ ... لگتمال کنگ بیتگ اَنت ءُ آیانی اسلی دروشم بدل کنگ بیتگ!

اے دپ چَٹ ءُ بے ننگیں مزن لاپانی چم پہ مئے مال ءُ مڈی بزاں پہ من ءُ تئی ڈیھ ءِ ونڈ ونڈ کنگ ءَ سک اِنت کہ ایشی ءَ ھم ( کہ مئے سروک اِش سیر کتگ انت لاپ اش پُر اِنت چہ ھر نیمگا رسگ اِنت اِش) چہ ما پچ بہ گر اَنت.

ما ءُ شما چماں پچ بہ کن این ءُ شر بہ چار ایں کہ بلوچستان ءِ چار کُنڈ ءَ وڑ وڑ مردم آرگ ءَ اَنت، کار ھمایاں دیگ اَنت، مئے بھر ءُ ونڈ ءَ ھمایاں دیگ ءَ اَنت دگہ نیمگے مہ چار اِت پاد ءِ سرمب ءَ بچار اِت کہ مئیگ ءُ شمئے جھگیرانی دپ اِش بستگ ءُ بیچارگ ھچ گوشت نہ کنگ ءَ اَنت بلے دگے نیمگے نیکراہ اِش پہ الکاپ ءَ داتگ اَنت اِش ءُ آیانی چکاں ھم انچوش دیگ اَنت کہ مہ گوش، ایشی ءَ ما ءُ شما گندگ ءَ ایں ماں تامر ءُ ...کہ مئے ڈیھ ءَ آبات کنگ ءَ اَنت تانکہ ماں وتی جند ءِ پٹ ءُ پیروکی ھندانی تھا ما انچوش درآمد ءَ بہ بہ ایں کہ بوتگ ایں، ءُ در کومی راج مئے راج ءِ واھند وت واجہ اِنت.

بلے اسر ءَ ایشی ءَ پہ دل ءُ ستک گوشگ لوٹ آں کہ مولانا کوھی ءِ کربانیانی آسر انت کہ بلوچستان ءِ ٹل مروچی گوں آزمان ءَ تران ءَ انت ءُ بلوچ راج ءِ نام ماں میان استمانی مراگش ءُ دیواناں پہ اِزّت ءُ شاں پہ ھاوند امیت ءَ گرگ بیت....
ھارون اخلاقی#
لبزانکی مجلس کلمتی کاروان.

سِیمک۔۔
چہ مُجاں اِستینے سر ءَ کشّ ایت
بُرز چَما ماران ءِ خَمیں کوھاں
کوکر نَتّھا ءِ بیرمیں پاگیں
جیھڑ تئی امبوھیں گُلالِکّاں
ترْمپ تئی مورتیں جابہ ءِ تیراں
شپ گِروک میان ءِ گوھریں تیگیں
گرْند چو نتھا ءِ توپک ءِ گوانکیں
دِرْین چو مَلّ ءِ سُورمگیں واگیں
یک دمے مونجانی کن اِت ترْمپاں
شُما زباد بوھیں جیھڑاں بِلّ اِت
اَچ سمینانی گُلگُل ءُ ھُلّاں
در کپ ایت تنگہ درْوشمیں نتّھا
گیمران ءَ چہ تنک دپیں قبر ءَ
گیگ نہ اِنت براھندگ ھمے گیگ ءَ
گپتگ آ گور ءِ کلّر ءُ ھِیسپاں
دنزئے ماں ڈالشاھیں برْوتان اَنت
ماں برْوتان ءُ برْنگنیں ریشاں
چوٹوئے دنزین اَنت زباد بوھیں
گال ءُ بولی بیت گوں تانھی نوداں
شما کئی تُنیگیں دل ءَ کا اِت
شما کئی چمّ ءِگریتگیں ارس اِت
شُما کئی مِنّت ءَ من ءَ مین اِت
چو جواب داتگ تانھی نوداں
ما سِیمک ءِ تُنّیگیں دل کایاں
ما سِیمک ءِ چمّ ءِ گریتگیں ارساں
ما سیِمک ءِ مِنّت ءَ ترا میناں
ما جنے ویران گوْنگیں دیستگ
رنگ ئے چو آسانی پُر ءَ بیتگ
پرتوئے نتّھا ءَ گنوک بیتگ
بچّ کہ سینگار اَنت وتی بوراں
کاراَنت منی کُلّانی سر ءَ تاچاں
پرمن ءَ کاراَنت شُوتگیں زرّاں
ھَلوانی آ پکّگیں ونگاں
ھرّگیں رانڈو باز من ءَ ریپّ اَنت
کہ دیرو ءِ ورنایاں گِچین یکّے
اے دیرو ءِ ورنا کُلّ منی برْات اَنت
پرمنی نِزّ ءَ نتّھا مھمانیں
پرمن ءَ کارایت چیٹ ءُ چُنّیاں
سرمنی چُنّیاں نہ بیت بازار
پادگوں لاھڑی رَتکگیں کَوشاں
چمّ اوں پہ سیاھیں سُرمگاں سکّاں
من وتی جیگ پہ نُھمتے بستگ
موت گیش بیت یا سورھیں نتّھا
(اچ اسحاق رحیمءِ منتءَ)

Besam:
@Labzank
telegram.me/Labzank

درآمد

۔۔۔۔۔۔۔۔۔۔۔۔۔

زمانگاں ھست ات یک بادشاہ ئے
یک روچے درآمدے
بادشاہ ءِ دیوان ءَ اتک
ءُ بادشاہ ءَ گوشت ئے
واجہ من تنگدست آں
من ءَ وتی گورا کار ءَ بہ دار
بادشاہ ءَ جُست کُت مردک تو چہ کار زان ئے
مردک من سیاسی مردمے آں
سیاسی" اربی ءِ تہ ءَ سیاسی ءِِ متلب سوچ ءُ پگر ءَ پد جیڑھانی گر ءُ گیش کنوکیں زانوگر"
ھدا ءِ کنگ ءُ مردک ءِ بد بَھتی
بادشاہ ءِ گورا سیاسی کار ءِ لوٹوکیں مردمانی
یک لڑے ھست ات
ھمے امیت ءَ ودار ءَ نشتگ انت
ءُ تلب اش داتگ پہ کار ءَ
اناگتی گپ اش ات
بادشاہ ءِ ھر ءُ اپسانی چار ءُ گزار
کنوکیں ڈبہ گر بیران بیتگ ات
بادشاہ ءَ ھمے درآمد وتی ھاسیں اپسانی
ڈبہ گر جوڑ کُت
چیزے روچ ءَ پد بادشاہ ءَ وتی دوستناک تریں
اَپسے باروا جُست کُت
مردک ء گوشت تئی اَپس شر زات ءُ شر نسلیں اَپسے نہ انت
بادشاہ ءَ اے اَپس گرانین نھادے ءَ زُرتگ ات
ءُ مردک ءِ گپّ یے تور انت ھمے دمان ءَ
بادشاہ ءَ سپاھیگ رواں دات انت
ھما مرد ءَ بیار ات کہ من اَپس زُرتگ
آ مرد آرگ بوت مردک دیریں جنگلے ءَ اَپسان یے
چار ءُ تپاس کنوک ءُ بھا کنوک ات
بادشاہ ءَ مردک گوشت تو اے اَپس من ء شر نسل ءُ
شر زاتیں اَپسے نام ءُ نھاد ءَ پہ بھا داتگ
بلے اے اَپس شر زاتے نہ انت
مردک بادشاہ سلامت
اَپس شر زات ئے شر زات یے ءَ ھچ شک ماں نیست
بلے وھدے کہ اے پیداگ بیتگ
ایشی یے ءِ مات مُرتگ
ءُ اے اَپس ءَ گوکے ءِ شیر میتگ ءُ وارتگ انت
ءُ اے اَپس رُستگ ءُ مزن بیتگ
ءُ کسانی ایشی ءَ گوک ءِ گورا گوازینتگ

بادشاہ ءَ مردک رزا دات ءُ اپسانی چار ءُ گزار
کنوکیں ڈبہ گر لوٹاینت
مردک تو بہ گوش کہ تو چوں پجّا آورتگ
کہ اے اَپس شر زات ئے نہ انت
ڈبہ گریں مردک۔ اپس ھر وھد ءَ کہ کاہ وارت
من دیستگ چو گوکانی پیما سر ءَ جھل کنت ءُ وارت
شرزاتیں اَپس دایم کاہ ءَ کہ دپ ءَ کن انت
سر ءَ بُرز کن انت ءُ ور انت
بادشاہ مرد ءِ زانتکاری ءَ متاسر بیت
ءُ آئی ءِ لوگ ءَ بکشش دان روگن شکر لھتے پتکگیں
گٹّور یی گوشت ءُ مُرگ رواں دات
ءُ اشانی گوم ءَ بانُک ء ماڑی ءِ ڈبہ ھم دات ئے گوں
چیزے وھد ءَ پد بادشاہ ءَ جُست کُت
کہ بانُک ءِ باروا تو چے گوش ئے
مردک۔۔گپ اش انت بانک ءِ نند ءُ پادا
بانُک یے انت بلے بانک ھچ اینگل ءَ بادشاہ یے
جنکے نہ انت
اے گپان یے اش کنگ ءَ پد بادشاہ ءِ پادان یے
چیر ءَ زمین در اتک
پرچا کہ بادشاہ ءِ زال بادشاہ یی چُکے ات
بادشاہ سارت بیت ءُ وتی تری
زال ءِ مات کلوہ دیم دات ئے
ءُ ھمے گپ گوشان یے جت انت ئے
تری ءَ پسو دیم دات
ھکیکت اش انت
تئی پت ءَ منی مرد ءِ گورا منی چُکے گواجار دیم داتگ
من چُک مات بیتگ آں چُک پیداگ بوھگ ءَ ساری
بلے مئے جنک شش ماہ ءَ پد بیران بیتگ
ما تئی پتین بادشاہ ءِ گوم ءَ نزیک یے کنگ ءِ ھاترا
اے چُک وتی جنک جوڑ کُتگ
ءُ رودینتگ ءُ مزن کُتگ مزن بوھگ ءَ پد ءَ گوں
تو سانگ داتگ

بادشاہ ءَ مردک جُست کُت تو چون زانت
کہ منی زال بانُکے نہ انت
مردک ۔ بانُک ءِ چار ءُ گزار وتی کارمند ءُ نوکرانی
گوم ءَ شر نہ انت
بادشاہ چوش نہ کن انت
آ وتی کارمندانی سک ھیالداری ءَ کن انت ایں

بادشاہ ءَ بکشش دان آرت روگن لھتے پس مردک ءِ لوگ ء رواں دات
ءُ اے مردک دیوان ءَ نیکراھی کاران یے ڈبہ ھم دیگ بیت
چیزے وھد گوست بادشاہ ءَ مردک جُست کُت
تو منی باروا چے گوش ئے
مردک تُک ءُ نُک بیت
کمو دیر ءَ پد گوشت ئے
بادشاہ تو اگاں دلگران نہ بہ ئے
ءُ من ءَ زند ءِ زمانت ءَ دے ئے
ءُ کول کن ئے
من ترا ھچ نہ کن آں
گڑا چیزے درشاں کن آں
بادشاہ ءَ زبان دات
کول دات کہ من ترا ھچ نہ کن آں
مردک ۔تو بادشاھے ھست ئے
بلے تئی رمپرد بادشاہ یے نہ انت
ناں کہ تو بادشاہ یے چُکّے ئے
بادشاہ گوں اے گپّانی اش کنگ ءَ ھُشک ترّ اِت
لبز وا داتگ ات ئے
بادشاہ ءَ ماڑی نہ زورگ اَ ت
پوچان یی تہ جاہ یی نہ بیت
جان ءَ آس کپت ئے
بادشاہ گپ ءِ پدّری واست ءَ
وتی مات ءِ گورا شُت کہ
بزان آں گپ چے انت
راستی ءَ شوھاز بہ کن آں
مات کہ جُست یے کُت
مات ءَ گوشت تو بادشاہ یے چُکے نہ ئے
تو شپانک ءِ چُکے یے ئے

بادشاہ ءَ مردک لوٹاینت
تو چوں مار ات ءُ زانت کہ من بادشاہ یے چکے نہ آں
مردک ءَ گوشت
بادشاہ وھدے کہ مردم ءَ داد دے انت
بکشش دے انت
آ ھیرہ تلاہ ءُ اشرپی دے انت
تو ھر وھدے کہ داد داتگ یا دے ئے
دان آرت روگن پس دے ئے ءُ داتگ
اے کُل وراکی چیز انت
اے کاراں ھجبر شاھی چُک نہ کن انت
اے شپانکانی کار انت

ناکومُراد
Besam:
@Labzank
telegram.me/Labzank

شُکر اِنت کریم ءِ برکت ءَ
سَبر ءُ سکوت ءُ ھلوت ءَ
سَلوات پہ نام ءِ ھَزرت ءَ
راستے کہ مرگ ءِ ساھت ءَ
دل جوش جنت وت پہ وت ءَ
دُرست چہ ھُدا ءِ ھِکمت ءَ
گوار انت رگام بـے مُدّت ءَ
سبزیں بھار ءُ بَر نوبت ءَ
پانی بنت پہ مُھلَت ءَ
بیا اِت اریپـیں ھَمبلاں
جَزماں کہ یک روچے مِراں
رُوھ چہ کَپس ءَ بال کنت
اے کالب ءَ کَے سوال کنت
دُرست گُش انت کہ لاشَھے
دِیرئے کن ‌اِت کہ سِلّھے
مَرگ ءَ کس ءَ نیست گِلّھے
بند اَنت کَنِک ءُ کِلّھے
گُسلان پہ تازیمے دینت
مَھرم منی چار ءُ سے اَنت
من وت نزاناں کے کے اَنت
ھِیش ءُ کس اَنت یا ڈنی اَنت
وھدے جنازہ دُرست بیت
مھپَل کبیھیں سُست بیت
تھت چہ دوار ءَ چِست بیت
چار مردمئے کنت کوپگ ءَ
ھَلک ءِ نہ چار اَنت گریوگ ءَ
بَر اَنتی پہ یک گرم ءُ جلے
دار اَنت یہ سیہ ڈنّی سرے
کاینت مُسلمان یک دَرپے
پہ مَیت ءَ بند اَنت سَرپے
پیر ے اگاں پیر زالَگے
گُوالے یا کہ شُوانگے
یا سیدے اوبادگے
مالے سِپیدیں جامگے
روت پہ مُکیمی ھانگے
مُلا چار تَکبیر گُشیت
سَرپ بستگیں رند ءَ پروشیت
بَر اَنتی مں قبر ءِ لَب ءَ
سر دستی زور انت مَرھب ءَ
ایری دیئنت گُور ءِ تہا
ناد اَنتی مں ھَند ءِ بُنا
دیمِ دئینت مں قبلہا
سِگان دئینت ھندِ رھا
پانیگی بنت چو مونسا
اُستا بمینیت ھاک ؤ گِل
باری دئینت پہ جان ؤ دل
واننت درودا حُرمتا
بخش اَنت پہ روحِ میتا
آئیِ سپارت پہ خُدا
وت بزانت وتی نیک ؤ بدا
سے روچا پُرس ؤ مجلس انت
دوستاں پہ زار ؤ بش بش اِنت
غم گوں پِت ؤ ماتاں بیت
تاوانی گوں براتاں بیت
سر روت ھماکہ زیان بیت
زالِ خبر آسان بیت
زال کہ مُقیمی کرگز ایت
چندے دگے روچ گوزیت
آ چندان شموشکار بیت
بِیکاں مُشیت سیاه‌مار کنت
سر چادرے اَلبار کنت
سر کوپگاں سیمکار کنت
سر پنجگاں رنگ دار کنت
چم کنجل ؤ انوار کنت
بَچ ؤ جِنکان وار کنت
سوسن رواجے یار کنت
جُست چہ ھمک بازار کنت
ٹِل ملگے درکار کنت
درقدا آ جود سگے
زال ءَ دل ءَ شیرِ مَلّگے
کوم ءِ دل ءَ بد مردگے
آ مُرتگ ءُ اے زندگے
پازُل مکن گمراھی ءَ
گال ءُ شَکر گُپتاری ءَ
گِپتگ ترا را واری ءَ
انچو ملک دیناری ءَ


@Labzank
telegram.me/Labzank

$ سُنَت $
# آبد میر #
رجانک اکبال ھاشمی

ابا، دو سِیر شِیرءَ چینچو آپ مان بکناں؟

منی چو دو سِیر مان کن ۔

ڈالاں ریک چینچو بِباں؟

ھمینچو کہ سَنگ گِران تر بہ بیت،

بلے باز مہ کن اِش کہ زانگ مہ بنت ۔

داناں ڈال ھوار بِکناں؟

ھَو بلے پہ وڑ ۔

شکراں چوں بِکناں؟

سیرءِ سَے چار روپیہ گیش کن کس جُست نہ کنت ۔

ءُ روگنءَ بازیں سِیت نیست، بیست سیری ڈبہءَ بیست کلدار نہ رس ایت ۔
اِشیءِ اسلی کیمتءَ کور کن پنجاہ روپیہ گیش بہ لِک، بگوش چہ کمپنیءَ ھمینچوکہ رَسگ ایں ۔

شریں ابا ۔

شر منی چو بیا دَبّوج کن ایں، بانگ ءِ وھد اِنت ۔

شریں ابا تَو برو من پہ نمازءَ دست دیم کناں کا آں ۔

پِتءَ مُشت رِیشاں ترّینت گوشت،

گوشدار منی چو ناہءَ یات کن بیار گوں ، ناہءَ گوں دَبّوج سُنَت اِنت ۔

جُست : آیا بلوچی زبان ءِ بُنکی جیڑہ سیاھگ اِنت ؟ اگاں تئی پسّہ ھو اِنت چیا۔۔۔۔؟ ءُ اگاں انا اِنت چیا۔۔۔۔۔۔؟

اناں
سیاھگءَ وتی راہ گشینتگءُ روگءَ انت..گیشتر نبشتہ کار سید ءِ راست نبیسیءَ کارمرزگءَ انت.
بس ھمے رھبند کمے نوکازگ لوٹیت.
اسل جیڑہ من نہ کشتگ ھلار نہ انتءِ سرا انت.
انوں زبان باز جاگھاں بھر کنگ بوتگءُ سیاھگ پہ زوریں زانتکاریاں مانگشینگ بوتگ کہ چریشیءَ نوکیں نبشتہ کار سمگو بہ انت.
منی ارز ھمیش انت کہ درست ھم پت بہ بنت ءُ ھمے سیاھگ کہ رواج گپتگ ھمیشیءَ دیمروئی بہ دئے انت.
انوں بلوچی لبزانک اسل جیڑہ ایش انت کہ آئیءَ را نوک دورءَ گوں ھمگام کنگی انت.سائنسی چیلنجاں گوں دیم پہ دیم کنگی انت.
گالبندانی سرا کار کنگی انت..نوکیں ردومءُ لبزانءَ وتی کنگی انت..
اگں کسے بہ گشیت کہ اے سیاھگءَ بلوچی لبزانک دیمروئی کت نہ کنت ..رد انت..
فارسیءَ عربی ءِ درور مئے دیما چو روچءَ پدر انت کہ ھمے سیاھگءَ کارمرز کنگءَ انت. بس راست نبیسی اش دگر انت.
سیاھگ مئے جیڑہ نہ انت بلکن راست نبیسیءِ سرا ما کار کنگی انت.

ازگر زھیر


@Labzank
telegram.me/Labzank

#شکاری

[ ءِ ، ے، ئے ، ئِے ]

#ءِ : اے دو گال ءِ میانجی ءَ کیت ءُ دوئیں گالانی سیادی ءَ پدّر کنت بزاں منسوب ءُ منسوب الیہ ءِ درمیان ءَ کیت چوش کہ:
پس ءِ شِنک
اد ءَ ھمزہ زیر پس ءُ شنک ءِ میان ءَ آتکگ ، بزاں مارا گوشگ اِنت کہ شنک پس ئیگ اِنت.
کتاب ءِ پوش / پوش ءَ کتاب ءِ نیمگ ءَ نسبت کنگ ءَ اِنت.

#ے : اے گال وھدیکہ نامگال “اسم” ءِ گُڈ سر ءَ کیت گڑا آ نامگال ءَ یکّے کنت چوش کہ:
کتاب: کتابے بزاں یک کتابے
پسے بزاں یک پسے
ملکے بزاں یک ملکے۔

البت ھما نامگال کہ آئی ءِ گُڈّی آب “الپ، ی، ے ” بہ بیت گڑا پہ چشیں گالانی یکے ءَ “ے” ءِ چیر ءَ دو ٹِک (نقطہ) جنگ بیت چوش 👈 یے۔

دروَر:
ورنایے بزاں یک ورنایے
دانایے بزاں یک دانایے۔
ملایے بزاں یک ملایے

وانگی یے بزاں یک وانگی یے
مندی یے بزاں یک مندی یے
گْوادری یے بزاں یک گْوادری یے

بَے یے بزاں یک بَے یے۔
سے یے بزاں یک سے یے.

#ئے : انچش کہ “ اِت ” پہ دیم ءِ مردم ءَ گْوشگ بیت ھما وھد ءَ کہ آ مردم باز بہ بنت ( باز ساڑی )
دروَر:
وش اتک اِت بزاں شما وش اتک اِت.
شت اِت بزاں شما شت اِت

ھمے رنگ ءَ “ ئے ” ءِ گال پہ دیم ءِ مردم ءَ کارمرز بیت بلے وھدیکہ آ مردم یکّے بہ بیت بزاں پہ یک ساڑی ءَ
دروَر:
وش اتک ئے بزاں تو وش اتک ئے
شت ئے بزاں تو شت ئے۔

بزاں “ئے” پہ یکے ءَ “ تو ”
ءُ “ اِت ” پہ باز ءَ “ شما” ءَ کار مرز بیت.

نوں اے گالاں چُش نبیسگ رد اِنت کہ
وش اتک ءِ،، یا “ وش اتکے”

پرچا کہ “ ءِ ، ے ” دگہ جاگھاں کارمرز بہ اَنت کہ آیانی وتی جاگہ اِنت.

#ئِے ( ءِے ): اے یک ناساڑی ءِ لِچّوکیں پنامگال اِنت.
"آئی ءِ" ءُ "آئی ءَ" ءِ بزانت ءَ دنت ، اے واھندی ءُ کنوکی دوئیں جاوراں زیر ایت.
چوش کہ:
پس ئِے مُرت بزاں آئی ءِ پس مُرت
پس ئِے کُشت بزاں آئی ءَ پس کُشت.

لھتے واجہ ایشی ءِ جاگہ ءَ "ی، ئے، ئی" ءَ نبیس اِیت کہ سید ءِ رھبند ءَ رد اِنت ءُ اے گال ھجبرانی ھجبر "ئِے" ءِ جاگہ ءَ گپت نہ کن اَنت
پس ئِے مُرت: ایشی ءِ جاگہ ءَ پسی مُرت ، پس ئے مُرت یا پس ئی مرت نبیس اَنت کہ چو روشنیں روچ ءَ رد اَنت.

جھد ءِ کاروان



@Labzank
telegram.me/Labzank

دستونک...

نِندگءُ گریوگءُ بازیں هِسکارگءَ چم کور بیتگ انت.
تو نیائے تئی راهسر ئے چارگءَ چم کور بیتگ انت.

مرچی سوگِند کُتگ من نبشتہ کنگ تو نَہ وانےِ مناں.
کاگدانی سرا نکش سِنگارگءَ چم کور بیتگ انت.

مرچی باندا کُتگ دانکہ تاک کپتگاں سیاهیں ملگور تئی.
تو هَما، من هَما، بازیں دلدارگءَ چم کور بیتگ انت.

اچ مئے واکءَ در اِنت من هزار وس کُتگ دوستءِ بیهال کنگ.
نمدیانی تئی نور ماندارگءَ چم کور بیتگ انت.

شاه نور کلمتی
@Labzank
telegram.me/Labzank

بلوچ بلوچ انت..... میجرمجید

Oct 14, 2017, 4:21 pm

پُلیں مہرگڑھءِ پولکاراں
زند ءُُ زانشءِ زانتکاراں
راجی دپترءِ سوجکاراں
آشکار کت بلوچءِ دپتر
مانیت دائما تاں مہشر
پیش چہ دہ ہزارے سالاں
زانگ بیت بلوچءِ دودمان
کْوہنیں مہرگڑھءِ ڈیوالاں
دست کپتگ بلوچی دوچے
ٹِک ءُُ سَے ٹٹ ءُُ جالاریں
کُنڈی گُل اجب ڈولداریں
دوچ اِش کرمز ءُُ زیبداریں
سنگانی سرا نکش بیتگ
کُلیں عالمءَ ہم دیستگ
سک کْوہن اِنت بلوچءِ دودمان
دستکاری کلنڈ ءُُ کاسگ
زہم ءُُ اسپر ءُُ بورتاچی
راجانی سْرپاں چکاسگ
مہمان دار میار جلّیں راج
ہچ راجءَ نہ بُرت چہ تو باج
بْراہ انت حاکمی تہت ءُُ تاج
تنگویں بیلاں! گْوستگیں روچاں ماں سوشل ، پرنٹ ءُُ الیکٹرونک میڈیاءَ یک کم زانگےءَ فرعون ءَ را بلوچے گْوشتگءُُ زامران سْیاہ گِسیءِ جہمنند ہم گْوشتگ۔ ہمے وتگڑ ءُُ نابلدیں دپتری پولکارءَ وتی ناسرجمیں پولکاری ماں کُلیں رسانکدراں شنگ ءُُ تالان کتگ ات۔ چدو پیش ہم ڈنی راجدپتری پولکاراں ءُُ مئے لہتیں بلوچ پولکارءَ بلوچءَ راعرب، فارسیءُُ افغانی ہم گْوشتگ، بلے راستی ءُُ گْواچن پہ لگت کنگءَ گار ءُُ بیگْواہ نہ بنت۔ تچکیں گپ ایش انت کہ بلوچ بلوچ اِنت، چہ کرناں ہمے حاکءِ جہمنند اِنت۔ چونائیءَ ہم فرعون یک فردےءِ یا قومےءِ نام نہ انت۔ آ دہرءَ ہرکس کہ مصرءِ حاکم بیتگ، آئیءِ نام ءِ دیما فرعون نبشتہ کنگ بیتگ۔ انچو کہ ہرکس کہ ایرانءِ حاکم بیتگ آئیءِ نامءِ دیما شہنشاہ نبشتہ کنگ بیتگ۔ اگاں برطانیہءِ حاکم بیتگ، مردیں آدمے بیتگ آئیءِ دیما کنگ (King)ءُُ جنین آدمے بیتگ، گُڑا آئیءِ نامءِ دیما کوئین (Queen)نبشتہ بیتگ۔ فرعون یک انچیں لقبے، منصبے یا پنّامے۔ فرعون بلوچے نہ بیتگ۔ بلوچ بلوچ انت:
بلوچ بلوچانی زات ءُُ زُریات انت
نَے بلوچ نمرود انت ناں کہ فرعون انت
حمزہءِ اولاد، نہ سامءِ پدریچ انت
نَے کہ قحطانءُُ نَے عرب جرات انت
نَے کہ فارسی ءُُ نیکہ افغان انت
نَے جنید بغدادی نَے نوح ءِ اولاد انت
اصل بلوچ میریں آرین نسل انت
کرد ءُُ بلوچانی رشتگ سک کْوہن انت
مئے بلوچ راجءِ دپتراں مان انت
پیش چہ اسلام ءُُ چہ مسلماناں
زرتشت بلوچانی دین ءُُ ایمان ات
ایمنی، امن ءُُ حق ءِ شوندات ات
مہر ءُُ دوستی ءُُ پُر کرامات ات
پیش چہ موسیٰ ءُُ مہتر عیسیٰءَ
بلوچ بلاشکانءِ پُل ءُُ سوگات ات
بلوچک بلوچانی قومءِ نام بیتگ
بلوچک بلاشکانءِ زہم جنیں سانڈ اَت
گُڈّء چہ بازیں کرن ءُُ باریگاں
ہمے لبز بلوچک نی بلوچ بیتگ
چہ بلاشکانءَ لڈّ ءُُ بوج کرتگ
(اولی لڈوبوج بلوچانی چہ بلاشکانءَ بنگیج کتگ)
بلاشکان ماں کرمان ءُُ نْیامء سیستانءَ
لنجیں ریگزارے کہ دشت ء لوط گْوشتگ
(دشتء لوط کرمان ءُُ سیستانءِ نیامءَ بلاہیں ریگستانے)
جنگی پازگاہ اِش دشتء لوط بیتگ
ہر گْورا مُہریں سنگر اِش بستگ
عزت ءُُ لج ءُُ ننگءِ پاسداراں
کرت اِش دُز جنگی گوں فوجاں ایرانی
(دُزجنگی بزاں گوریلا جنگ)
کُشتگ اِش بازیں فارسی، سیستانی
کوہء البرزءِ دامن اِش گپتگ
مدتے دْراجیں پہ جنگ ءُُ مِڑ گْوستگ
لِک کُت انت مید بندیں گدان پُلیں
بگ ءُُ بگپان ءُُ لیڑہ مید کونڈیں
ہلکوءِ بگ جت ءُُ شپانک سانڈیں
بُزگل ءُُ اِیرت ءُُ میہڑ ءُُ میہگ
(میہگ گامیشانی رُمبءَ گْوشنت)
تْردگ بورانی زہمء شیرازی
مرد مزن مرّ ءُُ زہم جنیں غازی
رہبند ءُُ دستور اِش وتی بیتگ
پُچ ءُُ پوشاک ءُُ زبان وتی بیتگ
دپترءُُ آمیدگِس وتی بیتگ
بلوچ وتی ہندءِ حاکم وت بیتگ
حاکماں دہرءِ سک نہ وش بیتگ
نوشیروان عادل چو ملکمیت گشتگ
آ وہدءَ ایرانءِ حاکم نوشیروان عادل بیت کہ پہ دگراں عادلے بیتگ، بلے بلوچءِ مستریں قاتل بیتگ۔ چہ بلوچاں سک نہ وش بیت، پرچا کہ بلوچ وتی شناختءُُ پجارءَ برجاہ داریت، دہرءِ حاکمءِ کاسگ چٹ ءُُ دزبوج جوڑ نہ بیت، بلوچ دہرءِ حاکمءَ مالیت، چِلّ یک، دہ یک، گٹّو ءُُ بیگار ہم نہ دات، بلے ماں ایرانءَ وتی ہندءُُ دمگاں چہ دہکان، مالدارءُُ اَزگاراں مالیت ، چِل یک، دہ یک، گٹّوءُُ بیگار گیپت۔ بلوچءِ اے عملءَ گوں نوشیروان عادل سک نہ وش بیت ءُُ بلوچءِ نسل کشیءِ حکمءَ دات:
نوشیروان عادل حاکم ات دہرءَ
گوں بلوچاں سک دلءَ زہرءَ
داتگ ءِے پرمان لشکرءِ مرداں
ایرانی زوراکیں سپاہیگاں
کوش بلوچانی سنت ءُُ فرضیں
چُک چینی بندات بیت بلوچانی
گْوانزگی طفل ءُُ زالبول پیریں
کاڑ خمار چمیں، ورنا نوک سیریں
بگی جت پان ءُُ بزگر ءُُ دہکان
گووال ءُُ شْوانگ میر بلوچانی
راجی سرخیل ءُُ شیرزال شدریں
مادگ ءُُ میش ءُُ بزگل ءُُ میہڑ
کلگ ءُُ بستانی کشار اَجگیں
شہر ءُُ بازار ءُُ ہلک بلوچانی
تہت ءُُ تاراج کت فوجاں ایرانی
چہ ایرانی حاکمءِ زُلمءُُ زوراں بلوچ سک تنگ بیت۔ بلوچانی چُک چینیءَ ایرانی حاکم ءُُ واکدار وتی مذہبی ذمہ واری یے سرپد بیت انت، بلے بلوچ نوشیروان عادلءِ فوجءِ دیما لگور نہ بیت، تاں آخری وہدءَ مقابلہ اِش کت۔ چدو پد بلوچانی جنگی ازباب ءُُ توشگ ہلاس بیت انت، بلے زورگیرءِ لشکرءِ دیما پیش سلام نہ بیت انتءُُ نی بلوچا ں وتی اولی لڈ ءُُ بوج چہ کوہء البرز، سیستان، کرمان ءُُ

دشت ء لوطءَ بنگیج کت۔
پند ءُُ منزل اِش بُرّان کت
چو نرشیرءَ یلاں گُرّاں کت
آپ ءُُ آپسراں داراں کت
مسکیں کاہ چراِ ش چاراں کت
زید ءُُ کوچگ ءُُ شہکوراں
ہنکین اِش وتی پولاں کت
کیچ تاں درّہ ء بولانءَ
ڈاڈر سیبی ءُُ شورانءَ
دِزّک تاں گِہہءِ دربندءَ
نامانی مگس گنداوگ
لاشار کچڑو نامانی
دُزاپ ءُُ جگین، مینانءَ
کسرکند، پہرگ ءُُ ہیچانءَ
وش اَت زید مئے سْرادانی
مولاءِ دپءِ شہجواں
کیل انت دائما سبزاپ انت
شنگ انت کوچگ ءُُ مِیتاپاں
چرتگ گورم ءُُ گامیشاں
راہ ءُُ رہ سر اِش گولاں کت
شنگ بیت انت بلوچ اے ہنداں
گوں شیری گُرّگ ءُُ گْورگنداں
پرگول داتگ ات بامرداں
نی بلوچانی ہما دہیں ٹک پدا ماں بلوچستانءَ واتر بیت انت، بلے چہ ایشانی آہگءَ ساری بلوچستانءَ بلوچ پیشءَ ہم آباداتنت، پرچا کہ اے لڈءُُ بوج ءَ کساس دو ہزار سال انت، مہرگڑھءِ دودمانءَ کساس دہ ہزار سال انت۔ مہرگڑھءِ پٹ ءُُ پولءَ ثابت کت کہ بلوچءِ دودمانءِ نشانی مہرگڑھ بیتگ۔
چرے لڈ ءُُ بوج ءَ پد بلوچستانءِ نام ایر کنگ بیت۔ لبزء بلوچک کہ اشاں چہ بنداتءَ گون ات، ہمے لبزء بلوچک لبزء بلوچءَ بدل بیت۔ اشاں وتی ملکءِ نام بلوچستان ایر کت۔ بلوچستان نوکیں نامے نہ انت، آ دگہ گپے کہ دہرءِ زوراکاں وڑوڑیں ہیلہ بازی کتگ ءُُ بلوچءِ گار ءُُ بیگْواہ کنگءِ جہد کتگ، بلے بلوچاں مدام چہ بنداتءَ وتی شناختءُُ پجار برجاہ داشتگ ءُُ زوراکانی مقابلہ کتگ۔ بلوچانی یک بہرے ماں بلوچسانءَ سر بیت، ہمودا جہمنند بیت۔ اسلامءِ دہرءَ عرباں 150سال ایرانءِ سرا حاکمی کتگ۔ اے دہرءَ عرب ءُُ فارسءِ نْیامءَ سک باز جنگ بیتگ، سک باز ہونریچی بیتگ۔ اے جنگءَ بلوچاں اسلامءِ نامءِ سرا عربانی ہمراہ داری کتگ۔ 150سال ءَ پد عرباں چہ ایرانءَ درکپگءِ فیصلہ کتگ، گُڑاعرباں بلوچءَ را گوں وت آہگءِ شور داتگ۔ بلوچءِ دہ ٹک ءَ گوں جنگی لاہ ءُُ لشکرءَ عربستانءَ درکپگءِ فیصلہ کت۔ اے بلوچءِ دومی لڈ ءُُ بوج بیت:
درکپت انت عرب چے ہندءَ
پتّ اِش گوں بلوچءَ بستگ
مہر ءُُ دوستیءِ سوگندے
لڈ اِش مان کتگ یکمُشتءَ
دیم پہ بصرہ ءُُ بغدادءَ
چیزے کرن پدا پرگْوستگ
زُلم کت یوسفء حجاجءَ
(یوسف بن حجاج بصرہءِ حاکم اَت)
زہر زُرتگ بلوچءِ راجءَ
گنجانی حلب آباد اَت
سیمی لڈءُُ بوج: بصرہءِ حاکم یوسف بن حجاج ات کہ اے حاکم بلوچءِ سرا غضب ات، پہ بلوچءَ حدائی کہرے ات، زلم ءِے کت بلوچءِ سرا۔ ہمے دہیں ٹکاں لڈءُُ بوج بنگیج کت ءُُ دیم پہ حلبءَ شت انت:
گنجانی حلب آباد اَت
آ وہدءَ حسینءِ راج ات
(حضرت امام حسین رسولءِ نماسگ ات)
وادیء بلوش بازار اَت
مئے راجءِ مہترانی جاہ ات
دہ میریں بلوچءِ ٹک ات
لانک اِش بستگ ءُُ یکمُشت ات
راجانی سْرپاں ہم دْرست ات
پیروزء گلو نامانی
راجءِ حاکم ءُُ سردار اَت
جنگے مَچّ اِتگ سرداری
حکم ءُُ حاکم ءُُ نامداری
یک دیمے یزید گوں فوجاں
یک دیمے حسین ات غازی
گرمیں کربلاءِ ڈنءَ
پدریچ اِش رسولءِ کُشت انت
دینءِ ہاترا زہر زرتگ
دہ میریں بلوچءِ ٹکءَ
چہ گنجانی حلب درکپت انت
نی ہما دہیں بلوچ ٹکاں کہ ماں حلبءَ یک ہلکے کہ نام ءِے تاں روچء مروچ وادیء بلوش اِنت، جہمنند اِتنت۔ چہ حضرت امام حسین ءِ شہادتءَ پد ایشاں چہ حلبءَ زہر زُرتءُُ دیم پہ وتی بنکی ہنکین بزاں کہ بلوچستانءَ شت انت۔ ملافاضل گْوشیت:
مہپلے پُلیں دْرم گْوریں کاڑاں کَجّ اِتگ
آ حلب گنجیں برسرء دینءَ سر کتگ
مں جگین سالے نشتگ ءُُ زید اِش سیل کتگ
دیم اِش پہ کچّ ءُُ ڈاڈر ءُُ سیبیءَ کتگ
ملا فاضل ءِ پٹ ءُُ پول راست انت، بلے ملا فاضلءَ ماں وتی شعرءَ بلوچءِ راجدپتر چہ بُن دوچءَ نہ زُرتگ۔ آئیءَ وتی شعر چہ بلوچءِ چارمی لڈءُُ بوجءِ بابتءَ زرتگ۔ بزاں چہ حلبءِ لڈءُُ بوجءَ وتی شعر بندات کتگ۔ملا فاضلءِ شعرءِ وانگءَ پد باز مردم گمان کنت کہ بلوچ عرب انتءُُ چہ عربستانءَ اتکگ انت۔ اے بلوچ بزاں ہما دہیں ٹک کہ چہ کوہء البرزءَ درکپتگ ءُُ عربستانءَ شتگ انت، وہدے عربستانءِ جاورحال پہ بلوچءَ نہ وش بیتگ انت، ہمے ٹکاں پدا دیم پہ وتی ماتیں گلزمین بلوچستانءَ واتر بیتگ انت۔
دہ میریں بلوچءِ ٹک اَت
لڈ ءُُ بوج دُبر بندات کت
آہِرّاں مدام یک دست ات
دیم پہ پیشیگیں آبنداں
شنگ بیت انت بلوچ ہر کنڈاں
کیچ ءُُ ڈاڈر ءُُ ہلمندءَ
تاں مائی کُلانچی ءُُ سندھءَ
شوران سبی ءُُ بولانءَ
دْراجیں منزلاں گولانءَ
ہند ءُُ جاگہاں پولانءَ
رپت انت ماں بلوچستانءَ
وش ءُُ وشدل ءُُ شادانءَ
دستور اِش بلوچی زُرتگ
پوشاک ءُُ زبان ءُُ رہبند
آ روچی بلوچ آزات ات
ملکءِ واجہ ءُُ وت واک اَت
تنگویں بیلاں! چرے کُلیں پٹ ءُُ پولاں پد اے گپ المی انت کہ بلوچ بلوچ انت۔ بلوچ نمرود ، نوح، قحطان، فرعونءُُ حمزہءِ اوبادگ نہ انت۔ پٹ ءُُ پولکاراں گوں بلوچءَ سک زیادہی کتگ۔ بلوچ وتی اصلی دْروشمءَ پیش نہ کتگ۔ چیزے پٹ ءُُ پولکارءَ پہ زانت ءُُ وتی سیاسی لوٹءُُ گزرانی ہاترا کتگ، دگہ بازینےءَ پہ نہ زانتکاری کتگ۔ بائد انت کہ ما وتا وت بزانیں، ما وتا پجہ بیاریں، اگاں دگرے مارا نہ زانت، باکے نہ انت، عیبے ہم نہ انت، بلے ما و

تا پہ زور فرعون ، نمرود، نوح، قحطانءُُ حمزہءِ پدریچ مہ گْوشیں، مئے راجدپتر پولنگ نہ انت، مئے پیریناں، کماشاں ءُُ بُن پیرکاں مئے راجدپتر پہ وزمے زرینتگ۔ ادا بچار کہ دری پولکارے فردوسی بلوچءِ بابتءَ چے گْوشیت:
سپاہش زگردان کوچ و بلوچ
سقالیدہ جنگ و بر آوردہ خوچ
کسے درجہان پشتِ ایشاں نہ دید
درفشی بر آوردہ پیکر پُلنگ
ہمی از درفشن بیارید جنگ
**
بلوچی سبز ءُُ مَیزران بات
بلوچءِ دژمن بے سوب بات انت
(اے نبشتانکءِ نویسگءَ من چہ ڈاکٹرنصیردشتیءِ کتاب "The Baloch and Balochistan"ءَ کمک زرتگ۔ واجہءِ منتواراں)
Besam:
@Labzank
telegram.me/Labzank

" بے دروریں ھوشمند "

کسھہ کن انت کہ میتگے ءَ مردے نشتگ ات
آئی ءَ سے بچکیں چُک ھست ات
سے ئیں چُکّانی نام ھجر ایر کُتگ اِت انت ئے
روچ گوزاں بیت انت
یک روچے نادراہ بیت سکرات ءِ وھد ءَ وتی سے ئیں چُکی لوٹاینت انت ءُ وسیت کُت انت ئے منی مرگ ءَ پد منی مال ءَ

یک ھجرے ءَ ونڈ رس ایت
یک ھجرے ءَ ونڈ نہ رس ایت
یک ھجرے ءَ ونڈ رس ایت
گوں ھمے گپاں ھیکگے جت یے ءُ ساہ دات ئے
بلے وتی چُک ھیرانی کُت انت کہ پیسلہ چوں کنگ بیت یکے اچ ما بے ونڈ ایں
اشاں جیڑ ات پگراں اش ھچ کار نہ کُت وت ماں وت پیسلہ کُت ئے
مئے پیسلہ ءَ کازی بہ کنت دگہ راہ نیست
سے ئیں براتاں توشگ زُرت ءُ دیم اش دات پہ شھر ءَ تاں کہ مئے ونڈانی جیڑہ ءَ
کازی بہ گیش ایں ایت ۔
راہ ءَ مردمے دیست ئے کہ وتی گاریں 'چیزے شوھاز ءَ سرگرداں انت
براتانی جُست ءُ پرس ئے رد ءَ مردک ءَ گوشت منی اُشترے گار انت
ھجرے ءَ گوشت تئی اُشترے چمّے کور انت مردک جی ھو
دومی ھجر ء گوشت تئی اُشتر پادے لنگ جنت مردک جی ھو
سیمی ھجر ءَ گوشت تئی اُشتر ءِ لٹّک بُرّگ بوتگ
مردک ھو ھو ھکّ تو یے چوں تو زانت
کُج انت منی اُشتر
سے ئیں ھجراں پسّو دات ما چے زاں ایں تئی اُشتر کج ایں برو شوھازی کن
ما نہ زانیں ناں کہ ما تئی اُشترے دیستگ
اُشتر ءِ مالک گنوکیاں گپت اے چوں
مرد ءَ پیسلہ کُت کہ اے منی اُشتر ءِ دُزّ انت منی گوم ءَ شریھت بہ کن انت گوں
مردک پکّ ات کہ اشاں منی اُشتر برتگ کُشتگ ءُ وارتگ نی سر اش داتگ پہ دروگ ءَ
مردک ءَ گوشت شریں بیا انت گوں من شریھت بہ کن ات گوں
براتاں گوشت مارا ھچ گپ نیست
بریں کازی گور ءَ
ما وا اَنچو کازی گور ءَ روگ ءَ بیتگ ایں
وھدے کہ چاریں کازی ءِ کرّ ءَ سر بیت انت
اُشتری ءَ کازی ءِ کرّ ءَ وتی سرجمیں گپ جت انت
کازی ءَ ھجر جُست کُت انت
مردک کہ اے گپّاں جنگ انت راست گوشگ انت
سے ئیں ھجراں پسّو دات مردک راست گوشگ انت
کازی گُڑا گپّانی رد ء اُشتر شمارا گوں انت
پہ شما گھتر ھمیش انت کہ وتی ردی ءَ
منّ ات مردک ءِ اُشتر ءَ بدے ات
اولی ءَ گوشت کازی ساب اُشتر پہ چم ما نہ دیستگ البت من لھتے نشانی دیستگ ات گوشتگ ات انت نشانانی رد ءَ من گوشتگ ات کہ تئی اُشتر ءِ یک چمّے میم نہ کنت پرچا کہ من دیستگ ات سبزیں ٹال دومی نیمگ ء شرتریں ھست بیتگ
بلے اُشتر ءَ دومی نیمگ ءِ ٹال دپ نہ جتگ انت
من زانتگ یک چمّے کور انت ئے
دومی ھجر ءَ گوشت من وھدے کہ اُشتر ءِ پد دیستگ اِت انت ھر سے گام ءَ چارمی پد زاھر تر انت کمو کَلّ نمونہ انت من زانتگ اے پدانی کلّی اُشتر ءِ لنگی ءِ نشانی ءَ دنت
سیمی ءَ گوشت اُشتر روگ ءِ تہ ءَ ریک جنت زلور یک جاہ نہ کپ انت لٹکی بُرّ اتگ ئے کہ لڈّ یکجاہ مچ انت ئے
کازی ءَ اُشتری گوشت بازین نندگ ءَ پایدگ نیست اے تئی دُزّ نہ انت
برو وتی اُشتر ءَ شوھاز کن
تئی اُشتر اے مردانی گور ءَ نہ انت ناں کہ اشاں دیستگ
اُشتری یے پاد آھگ ءُ روگ ءَ پد براتاں وتی ونڈانی کسھہ بیاں کُت
کازی کسھہ ءِ گوش دارگ ءَ پد ھیراں بیت
کازی ءَ گوشت شپ ءَ شما منی مھماں اِت
سھب ءَ شمئے جیڑہ ءَ گیشیں آں
سے ئیں ھجر مھمان ھانہ ءَ نشت انت بلے سما اش کُت کہ چاریگ مئے سر ءَ انت
مئے سجیں چیز چارگ بوھگ انت
کمو دیر نہ گوستگ اَت ورگ آرگ بیت انت
ورگ گوشت ءِ ناروشت ءُ نان ات انت
اولی ھجر ءَ گوشت اے ناروشت کُچکی گوشت ءِ ناروشت انت
دومی ھجر ءَ گوشت نان پچوک لاپ پُرّ ئے وتی آھری روچاں انت
سیمی ھجر ءَ گوشت کازی وتی پت ءِ چُک نہ انت ھرامزادگ
چاروکاں گپ کازی ءَ سر کُت انت
بیا کہ مھماں دگے وڑیں ھبر کنگ ء انت
کازی ءَ دومی روچ ءَ سے ئیں امیدگس ءَ لوٹاینت انت
کازی چہ شمارا کے ءَ گوشتگ کہ
کہ گوشت کُچکی گوشت انت
اولی ھجر ءَ دست چست کُت ءُ گوشت
کازی ساب من گوشتگ
کازی ءَ کنورکنوک لوٹائینت ءُ جُست کُت
مردک ء منّ ات گپ گوش انت من دیستگ پہ کنور ءَ ھچ نیست من کُچکے کُشتگ ءُ گراستگ پہ مھمانان دیم داتگ
کازی ءَ گوشت ترا چوں مالوم بیتگ کہ اے کُچکی گوشت انت
اولی ھجر ءَ گوشت گوک ۔پس۔اُشتر ءِ گوشت ءِ چیر ءَ پیک بیت بلے اے گوشت ھمک نیمگ ءَ پیگلو بیتگ کمو جھلی نیمگ ء پیک بیتگ ءُ بس
کازی ءَ گوشت یک ھجرے توے ئے کہ ترا ونڈ رس ایت چہ پت ءِ مال ءَ
کازی ءَ گوشت آ کے بیتگ گوشتگ ئے
کہ نان پچوک لاپ پُرّے وتی آھری روچاں انت
دومی ھجر ء گوشت واجہ من اے گپ جتگ
کازی تو چوں زانتگ ؟
مردک من دیستگ کہ ترونی نان یک نیمگ
شر انت دومی نیمگ ء آرت انت
من ھمے مار اتگ کہ نان پچوک انچیں جنینے بیت کہ آ دردانی تہ ءَ انت زیادگ یک نیمگے ءَ لیٹ ات ءُ جھل بیت نہ کنت تکلیپ بیت ئے
من مار اتگ کہ بیت ءُ نہ بیت لاپ پُرّے بیت کہ
یک نیمگے ءَ لیٹ ات نہ کنت
اگاں نان ءِ دومی نیمگ دیست بہ کُت ایں ئے
گُڑا ناں یک نیمگے ء آرت ءُ یک نیمگے ءَ شر نہ بیتگ ات
کازی ءَ گوشت تو ھم ھما ھجر ئے کہ ترا ھم چہ پت ءِ مال ءَ ونڈ ھست ءُ رس ایت
کازی ءَ دیم سیمی ھجر ءِ نیمگ

ءَ کُت ءُ گوشت ترا کے ءَ گوشتگ من ھرام زادگے ءَ آں
مردک ءَ گوشت اے گپ من جتگ برو وتی مات ءَ جُست کن
کازی پاد اتک ءُ لوگ ءَ شُت
مات جُست کُت ئے مات ءَ آھر منّ ات کہ ھو مردک راست گوش ایت
کازی اتک ءُ سیمی ھجر گوشت ئے تو چوں زانتگ
کہ من وتی پت ءُ مات ءِ چُک نہ آں
ھرام زادگے آں
ھجر ءَ گوشت تو ھلارزادگے بیت ایں ئے
تو مئے چاریگی نہ کُتگ ات ناں کہ مارا کچکی گوشت وارینتگ ات ناں کہ مزلومیں جنین نان پچگ ءَ پرماتگ ات
کازی ءَ گوشت تو ھما ھجر ئے کہ ترا چہ پت ءِ مال ءَ ونڈ نہ رس ایت
سیمی ھجر ھیراں بیت اے چوں
چے پیما بیت کنت؟
کازی ء گوشت ھرام زادگ ھرامزادگ ءَ زانت
تو منی پیم ءَ وتی مات ءُ پت ءِ ھکیں چُک نہ ئے برو انت جُست پُرس بہ کن اِت
دوئیں ھجراں شُت وتی مات جُست کُت
مات ءَ گوشت تئی پت یک سھبے ءَ نماز ءَ مسیت ءَ شُتگ ات
اے شمئے براتوکیں ھجر ھمود ءَ مسیت ءِ دپ ءَ یکے ءَ دور داتگ بیتگ تئی پت ءَ چست کُتگ گوں وت لوگ ءَ آورتگ ءُ رودینتگ ئے ءُ ھجر نامی کُتگ

رجانک

ناکومُراد
Besam:
@Labzank
telegram.me/Labzank

بانورءِ مهمانی

کُپِ اِتگ زار زار پیداگ اِنت
مرچی ناکو بِلار پیداگ اِنت

کُکّڑے زُرت ءَ مرچی ڈُمبان ءَ
تِری ءِ دُسکیچ ءِ گُهار پیداگ اِنت

چُکّی واپینت ءَ لوگ یل داتگ
سمبھ اِینتگ نشار پیداگ اِنت

پہ تُشے بَٹ ءَ گریوگ ءَ اَنت چُک
گُپ ءُ گاپے توار پیداگ اِنت

زینب ءَ گوش ءَ گوشت ءَ ماگنج ءِ
شام ءَ محمد معیار پیداگ اِنت

یکیں کُکّڑ بُگوش کیا پُج اِیت
گنُجل ءِ دزگهار پیداگ اِنت

زَر من داتگ بزیر دگہ مُرگے
زرُتگ ئی سئہ انار پیداگ اِنت

وت گُوش اِیت گراد مرچی بریانی
گون ئی نیست ایں بزار پیداگ اِنت

پَچ مکن تو دریگ ءَ سُجُّم بئے
چُل ءَ دَنز ءُ گُبار پیداگ اِنت

اڑ نہ کنت چُلے په منا تی پِت
پَڈل ءَ چی لوار پیداگ اِنت

یکّے ءَ زاناں سُهبی هال داتگ
گوں هرءَ گنگُزار پیداگ اِنت

ما وَ بس شام ءَ لُوٹ اِتت بانور
جکس اِتگ دراهیں شهر پیداگ اِنت

ترُنس پیمازاں انچو دیما دئے
برات ءَ گون نیست هیار پیداگ اِنت

هژده اتکگ ءُ شَش دگہ کیت ایں
ٹوٹلی بیست ءُ چار پیداگ اِنت

زاناں دلمانگ اِنت پہ نارُشت ءَ
ماگلین بار بار پیداگ اِنت

سُپره ءَ پیچ ءُ منجل ءَ ٹَپّین
اَلّوک ءَ گوں نِشار پیداگ اِنت

(لالو پیشوکانی)



@Labzank
telegram.me/Labzank

Raees 👊💪:
درداناں زبانــے منـی بکشـات کنئے بیا
تو مارا وتی پُلیں دل ءَ دات کنئے بیا

تئی دراہی ءِ باندات ءَ وتا چون رسیناں
اے مرچـیگیں روچ ءَ وتی بانـدات کنئے بـیـــا

دنیا ءِ درداں من پـہ گلـے داراں دیدگاں
مئے عشق ءِ زر ءَ تو اگں ماندات کنئے بیــا

کار انت منـا پہ تئی مــرواردیں ارســـاں
بچکـنـد ءِ گلاباں وتی ہــیرات کنئے بیــا

دیدار ءَ پہ تئی مــہر ءِ طـلب انگہ ہـــما انت
تو دور چـیــا نشـتگئــے پـریات کنـئــے بیــا

ہچ دود چشیں نیست تئی راہاں بہ بندیت
دل وہـدے بلوٹیــت منا وشّـــات کنئــے بیـــا

#میر عمر میر



@Labzank
telegram.me/Labzank

ارس درو أنت دیدگاناں دل گماں آزات کنت
زندگی پُلاں یلہ دنت موسماناں یات کنت

شپ وتی گاماں نداریت روچ اوں مہتل نہ بیت
کئوش کئی اوست دریگاں وشبوہاں ہیرات کنت

تئی وپاداری اوں زانئے ساہتے ءِ ساهگ انت
کےترا را واہگ ءُ مہر ءِ عوض ءَ دات کنت

تو تہــارے یانی چماں الّم ءَ سُرمگ کنئے
گوات امروز ءِ تئی کُل ءِ چراگاں شات کنت

تئی گم انت زانئے منی درائیں گماں دیما تر انت
کـے مـنــا چـہ زندگـی ءَ ہــر گـم ءَ آزات کنت

میر تو وشئے دل ءَ دنـیـــاءَ من ہــم زندگاں
آگئی وابانی با پُشت ءَ شپاں باندات کنت

#میر عمر میر


@Labzank
telegram.me/Labzank

بیا کپوت نندین ءَ ساچیں پہ وتا یک موسمے
تو ملــوریں بیـگہ ءِ دل من زهیـریں مـردمــے

چہ هما روچ ءَ کہ تو اتک ے ٳد ءَ تہـنائی انت
تو همـا روچ ءَ کہ رَپت ے من ندیستگ مردمـے

زندگی یک سبزُکـیں دمکـے کہ مردم تاب وارت
تُـن آپ ءِ جنگل ءَ رؤت آس سر بیت جہند مے

چہ تئی سد گنجیں مـهراں زُرتگ ءُ ازگاراں من
سُہب ءَ سارتیں گواتی کُولے بیگہ ءِ بیل ءَ گمے
#منیر_مومن


@Labzank
telegram.me/Labzank