*#كفة~مائلة《23》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
قال لي ايوه اتلاقينا قبل كدا لكن لا انتي بتعرفيني ولا انا بعرفك.. ابوي صوتو كان زي المخنوق قال لي الزول دا كان في مصر وهو ومرتو مشو يعملو حقن ولا شنو ما عارف عند الدكتور الكنتي بتمشي ليهو.... سكت وعمي واصل قال لي وانتي بالغلط اخدتي الحقنه دي....
من الصدمه اتجمدت مكاني للحظات، كانو كلهم بعاينو لي منتظرين ردة فعلي قمت وانا بضحك بهستيريا قلت ليهم شفتو؟؟ مش انا قلت ليكم ما علمت حاجه؟ هدا الحق ظهر، ربنا ما بنسى زول وما نساني انا.. كنت عارفه حيجي يوم والحقيقه حتظهر... طارق قال بي نهرة: قفلي خشمك دا وخشي جوا.... دخلت وانا بجري خالتي وخنساء لمن شافوني قامو على حيلهم بخلعه بقيت بعاين ليهم قلبي كان شغال دلوكه ولساني حسيتو ما قدر ينطق بالفرحه خنساء قالت لي في شنو يا بت؟؟... دخلت ضميتها شديد وانا بقول ليها ما عملت شي انا ما عملت شي... خالتي صفيه قالت لي ميسم يا بتي قولي الحاصل بي برا شنو نحن من قبيل قاعدين في النار.. فكيت خنساء وضميتها كانو مستغربين وما قالو حاجه تاني.. فكيت خالتي صفيه وقلت ليها بصوت متقطع وانا بأشر على بطني: اا الود الولد الفي بطني جا بالغلط.... ما كنت قادره اوصل ليها الكلام وغلبني اعبر.. بقو بعاينو لبعض قلت ليها الدكتور داك يا خالتي صفيه الكنت بمشي ليهو عشان البريود كان جاينو ناس يعملو الحقن واتعمل لي انا بالغلط..... عاينو لي بعدم تصديق، قعدت في السرير بتهالك بعدها جا طلال خاشي قال لي خالتي صفيه بنادوك... طلعت وخنساء جات قعدت جمبي ختت راسها في كتفي وضمتني قالت لي انا ما قادرة اصدق...

صفيه: ميسم كلمتنا هسي، لكن انت عرفت كيف يا ولدي
باسل: الدكتور بنفسو كلمني، قال لي اتصلت لابو البنت لكن ما ارتحت لكلامو وحسيت انو في حاجه غلط لمن قلت ليهو اديني رقمو قال لي ما حاديك رقمو بديك رقم صاحب الشقه الكانو نازلين فيها، فعلاً شلتو واتصلت ليهو لمن طلبت منو الرقم قال لي برجع ليك، بعد مسافه رجع لي وقال لي انا ما عندي رقمو.. سألتو لو بعرف حاجه عنكم قال ساكنين في نفس منطقة اخوهو والليله عقد بتو من ولد اخوه دا زاتو... طلبت منو عنوانكم واداني ليهو وجيت طوالي
عبدالله: يديك العافيه يا ولدي انت ولد حلال واصول وراجل بمعنى الكلمه العملتو دا ما اي زول بقدر يعملو
باسل: العفو يا عم انا ما عملت الا الواجب
طارق: والضمنا شنو كلامك دا صح؟
عاينو ليهو كلهم بي خلعه
طارق: مالكم؟ مش يمكن بكضب ولا مرسلو زول
باسل اكتل على رجولو وشبك يدينو، قال وهو بتمالك اعصابو : ماف سبب بخليني اكضب، انا كنت متردد في اني اطلب طلب زي دا عشان ما ادخلكم في احراج لكن مادام جات منكم خليني اقول ليكم انا داير اعمل فحص ابوة
عبدالله: يا ابني صلي على النبي نحن حكينا ليك الحصل ووريناك كيف البت كانت مصره على كلامها انو مافي زول لمسها ما شفتها هسي فرحت كيف لمن عرفنا الحاصل؟
باسل: كلامك على عيني يا عم (عاين لي طارق) لكن اذا اهلها ما واثقين فيها انا حـاثق كيف؟
عثمان: تمام ، بنعمل ليك الدايرو.. لكن انا واثق في بتي

خالتي صفيه جات داخله قعدت في السرير القصادنا وقالت لي ما عارفه اقول ليك شنو، اعفي لي يا بتي اعفي لينا كلنا.. ابتسمت وقلت ليها عافيه ليكم كلكم يا خالتي... قالت لي الولد قال داير يعمل فحص ابوة.. قلت ليها ما عندي مشكله، هسي؟.. قالت لي بكرا ان شاء الله.... الليله ديك صليت قيام الليل وشكرت ربنا انو كشف لي الحقيقه واتمنيت انو ما تحصل مشكله تاني لحدي ما نتيجة الفحص تطلع.. لمن رقدت اتذكرت غسان ياربي حاصل ليهو شنو وعمل لي محجوب شنو؟؟؟.. اتذكرت لمن اتلاقينا وضماني والراحه الحسيتها لمن مسك يدي وقال لي انا مصدقك... عمري ما حانسى اللحظه دي لأنو الوحيد الما شفت نظرة الخيبه وعدم التصديق في عيونو، كان مصدقني من قلبو وواقف معاي او على الاقل حاول..... كنت متشوقه شديد لشوفتو عشان احكي ليهو بالحصل الليله وءاكد ليهو انو ثقتو فيني في محلها

___ ___

مسك الباب واتكل بتقل جسمو عليهو.. حاول يلتقط انفاسو بعدها دخل وهو بنده بصوت عالي: عمييي عمي انت هنا؟؟؟
جا طالع من باب الصالون راجل ستيني: ود محجوب انت كنت وين
لمن لاحظ لوشو المليان كدمات والدم المالي يدو وخلف راسو جرا عليهو مسكو وهو بقول: دا شنو يا محجوب لا حول ولا قوة الا بالله العمل فيك كدا منو
محجوب اتكل فيهو: عمي وصلني الحمام هسي خليني انظف جسمي دا من الدم اول
بعد مرور نص ساعه جا قعد في الكرسي جمب عمو
علم: استنى دقيقه محمد مشى يجيب ليهو قطن ومعقم وشاش من الصيدليه...
سمعو صوت الباب بفتح
علم: هدا ليهو جا
بعد محمد ولد عمو عقم ليهو جروحو وربطها مشى الصالون بامر من ابوهو
علم: اتكلم يلا قول كنت وين من امس والعمل فيك كدا منو
محجوب: ناس عثمان عملو شنو قالو ليك حاجه؟
علم: طارق حالف ليك
محجوب مسح وشو ورقبتو بتوتر
علم: انت دي عمله ليك؟ تخلي الناس في موقف زي دا حيقولو فيهم شنو؟
محجوب: بمشي بكرا اعتذر ليهم
علم: ما قلت لي كنت وين
محجوب: عمي انا تعبان هسي ما فيني حيل لي شي غير اخت راسي في المخده وانوم
علم: يعني ماف شي خطير؟
محجوب: لو في بتلقاني قاعد قدامك كدا؟ شوية اولاد شوارع لاقوني في طريقي بس
علم: شالو تلفونك؟
محجوب: تلفوني بس؟ التلفون والقروش واي شي معاي
علم: عشان كدا بضرب ليك ما بترد
محجوب وهو بقوم: انا ماشي انوم
علم: صحي ذكرتني في واحد ضرب الصباح سألني من ناس عثمان..قال لي كان في زول مؤجر شقتك في مصر اسمو عثمان في التاريخ الفلاني؟ قلت ليهو اي قال داير رقمو اتصلت ليك عشان اشيلو منك لكن ما رديت تاني اتصلت ليك ما خشا معاي
مححوب: دا منو كمان
عثمان: ابى يقول اسمو لكن محمد قبل كم يوم نزل لي برنامج بوريك اسم الزول الضرب لو رقم غريب ظهر لي اسمو بي باسل منو كدا دقيقه (طلع التلفون) اي باسل جلال، المهم وصفتو ليهو بيتهم
محجوب ضيق عيونو كأنو بحاول يتذكر بس ما أفلح.. نفض يدو بلا مبالاه وقام، فجأة اتذكر انو مر عليهو نفس السؤال دا لمن الدكتور اتصل ليهو وقف وقبل على عمو
محجوب: قلت اسمو باسل؟
علم:اي
ما قال ليك حاجه تاني؟
علم: لالا ما قال حاجه
محجوب بلع ريقو وقبل يمين وشمال: كدي اديني تلفونك دقيقه خلاص

شال التلفون وطلع الشارع بخطوات مرتجفه، فتش في سجل المكالمات لحدي ما لقى الرقم المفتاحو مصري اتصل فيهو لكن ما كان في رصيد اتأفف واتجه على اقرب كشك حول منو ورجع اتصل تاني
محجوب: الو السلام عليكم
_ وعليكم السلام
محجوب: معاك عثمان ابو ميسم متذكرني؟
_ وانا اقدر انساك يا استاذ عثمان؟
محجوب: اخبارك شنو يا دكتور
_ الحمدلله انا كويس انت عامل ايه واخبار بنتك وابنها
محجوب: الحمدلله تمامين تمامين اااا داير اسألك قدرت تصل لي باسل
_ اه وصلتلو قبلك، انت مش قلت انك هتكلموا؟

قفل الخط طوالي وختا قبضة يدو في شفايفو "انت انتهيت يا محجوب انتهيت لازم تفكر في حل قبل الولد دا يصل ليهم" سرح مسافه بعدها ابتسم ابتسامتو الخبيثة المعتاده " لقيتها، حامشي ليهم الصباح بدري" قال وهو بضغط على ازرار الهاتف "لكن قبل دا خلينا نطمن على حبيبنا" ....
محجوب: الو.. اي يا خينا.. صِحى؟.. اديهو حبة تاني ما تخليهو يصحصح.. قطعت ليهو ابهامو؟.. وكان فايق صح؟.. ما كورك كيف يعني بلعها في حنانو؟؟.. انت يمكن اديتها ليهو قبل الحبه مفعولها يروح وجسمو مخدر... تمام تمام فهمت المهم انو اتقطع.. انت ما عندك دخل لقيتها وين.. ياخ مش الآله العاجباك دي؟ اول ما نخلص شليها معاك.. خلاص يلا برجع ليك بكرا اوريك تعمل شنو تاني"...
رقد وطلع من جيبو تلفون redmi not11 قلبو بي يدو يمين وشمال، ضغط على زر الباور وظهرت ليه شاشة القفل
محجوب: تؤ، هسي الرمز دا اعرفو كيف
بقى بطبز في الارقام لحدي ما قفل
محجوب:الا بكرا اوديه لي غازي، بعرف للحاجات دي

صحا تاني يوم متأخر بعد شرب الشاي كلم عمو انو ماشي لي ناس عثمان، عمو كان ماشي معاهو لكن منعو قال ليهو حاوريهم سوء التفاهم الحصل وبكرا نمشي نعمل العقد....
لمن وصل دقا الباب كتير لكن ماف زول فتح، مشا على الباب الملاصقو طوالي وضرب الجرس، بعد مسافه جات خنساء فتحتو وهي لابسه التوب
محجوب: صباح الخير
خنساء حاولت تخفي صدمتها: اهلا
محجوب: ناس عمي عثمان وين بدق الباب ماف زول بفتح
خنساء: طلعو
محجوب: كلهم؟
خنساء: اي
محجوب: مشو وين؟
خنساء: ما عارفه
محجوب: خلاص زحي لي خاشي اشوف ميسم
خنساء: ميسم زاتا مشت معاهم
محجوب: عايني لو عارفاهم مشو وين وريني انا دايرهم في موضوع ضروري
خنساء ربعت يدينها وقالت: مشو المستشفى يتأكدوا من هوية الجنين
لمن فهمت من ملامح وشو الاستغراب: ابو الطفل ظهر امس بالليل، طلع انو ميسم اخدت حقنة تلقيح صناعي بالغلط
محجوب نطط عيونو ومشا طوالي، كان ماشي بسرعه وبدعي انو ما يصلو قبل ما يطلع من الشارع " كلو بي سببك يا حيوان يا *** لو ما خطفتني كنا عقدنا وانتهى الموضوع كلو، بقتلك بي يدي دي الليله ماف زول حيخلصك مني"

خنساء: دا مالو وشو اتخطف كدا بسم الله

___ ____

كنا كلنا في المستشفى انا وابوي وطارق وعمي وخالتي صفيه وباسل بعد خلصنا من الفحص قالو لينا النتيجه حتطلع بعد يومين.. طلعنا وكنا حنركب عربية عمي، باسل وقفنا عاين لي ابوي وقال ليهو لو سمحت يا عمي ممكن اتكلم مع بتك دقيقتين.. طارق قال ليهو لو في كلام حتقولوا قولو قدامنا... باسل عاين ليهو ورجع عاين لي ابوي قال ليهو داير اتكلم معاك انت زاتك لكن ما داير زول غيرنا... عمي وخالتي صفيه ركبو طارق قال ليهو اتفضل يلا.. ابوي قال ليهو طارق اركب.. طارق احتج وقال اركب ليه يا ابوي (اشر بي سبابتو على باسل) الزول دا انا اصلا ما ارتحت ليهو حيقول شنو يعني عشان نحن ما نسمع؟.. ابوي نهرو وهو بقول: قفل خلاص قفل انا زهجت منك ومن حركاتك دي قلت ليك اركب يعني اركب هدا انا واقف معاهم حيعمل ليها شنو يعني؟؟ ... طارق عاين لينا انا وباسل بعدين ركب ورزع الباب بقوة... باسل كان متكل بظهرو على العربيه ومدخل يدو في جيب البنطلون بعد طارق ركب وقف كويس ودنقر لي عمي بالشباك قال ليهو اتحرك انا بوصلهم.... بعد عمي اتحرك قال لينا اركبو معاي نشوق لينا مكان نتكلم فيه برواق.... ابوي عاين ليهو مسافه بعد داك مشى على عربيتو، كنت بعاين ليهو ومستغربه من تصرفاتو قال لي اتفضلي .... ركبنا ووقفنا جمب كافيه بعد نزلنا وقعدنا قال لينا تشربو شنو ابوي قال ليهو شكراً ليك ما دايرين حاجه... قام جاب قارورتين مويه واداهم لينا، بعد قعدنا شبك يدينو فوق التربيزة وقال: عم عثمان انا بعرفك ولا عندك بيك صله؟.. ابوي قال ليهو لا.. قال ليهو مع ذلك انا اول ما عرفت بالموضوع دا جيت وكلمتكم بدون ما اتردد ثانيه وصراحه موضوع الفحص دا ما كان في بالي قلتو بس عشان اكسر راس ولدك -مع احترامي ليك- يعني ما كان قصدي بيهو اي اساء او تصغير.. عاين لي وقال ميسم انا بعتذر ليك على الحصل لأنك اكتر وحده متضرره منو، انا حابقى على تواصل مع ابوك لحدي ما تضعي الطفل واجي اخدو.. انتي ما مجبورة تخليه معاك ولا تربيه وانا متأكد انو ما عندك فيهو رغبة بسبب المشاكل السببها ليك لكن لو حبيتي تشوفيه في اي وقت ف بابي مفتوح ليك ولابوك كمان.. نجي للمهم امس بعد طلعت واخدت رقمك يا عمي طارق اتصل لي وطلب انو لو الفحص طلع متطابق اتزوج بتكم عشان كلام الناس وما ادراك وانا زي ما عارفين زول متزوج ومرتي ما حترضى بالحاجه دي، اي نعم انا ما كلمتها لحدي اللحظه لكن متأكد انها ما حتقبل بي مرا تانيه مهما كان السبب وانا صراحه ما داير ازعلها واخرب علاقتي بيها... ابوي قال ليهو طارق ولدي احمق وما بعرف يتصرف امسحها لي في وشي نحن ما دايرين منك اي شي... صلح قعدتو وقال لكن في نفس الوقت ما حاقبل اجيب لي بتكم الكلام عشان كدا انا مستعد اثبت للناس دي كلها القصه الحقيقيه ورا الحمل دا.. ابوي قال ليهو حتثبتها كيف.. قال ليهو حاطلع في برنامج سوداني معروف واحكي القصه دي وحاجيب دكتور عمر يشهد على كلامي... ابوي عاين لي ورجع عاين ليهو قال ليهو لا انا ما داير الموضوع يكبر للدرجه دي.. باسل قال ليهو ختيت احتمال زي دا في بالي وعندي اقتراح تاني، مستعد اسفر ميسم لاي دولة عايزنها لحدي ما تضع... ابوي سكت باسل قال ليهو ما عندنا غير الخيارين ديل.. ابوي قال ليهو حنسفرها لكن بي حقنا نحن.. باسل قال ليهو الموضوع دا ما بتحمل حساسيات انت عايز تحافظ على سمعة بتك وانا مقدر الحاجه دي وواقف معاك، خليني اتكفل بموضوع السفر دا في النهايه دا ولدي برضو.... ابوي قال ليهو ما حتتكفل بيهو براك.. باسل اتنهد وقال ليهو طيب نص بالنص.. ابوي هز راسو بالايجاب في اللحظه دي جا واحد شايل كبايتين عصير منقة ختاهم قدامنا باسل قال لينا انا موقف سكر عشان كدا ما طلبت، عن اذنكم دقايق وبرجع.....

بعد قام عاينت لي ابوي لقيتو بعاين لي بنظرات ما فهمتها كان نفسي يقول لي حاجه ان شاء الله يشاكلني زي كل مره بدون سبب لكن ما اتكلم شال كبايتو وقال لي اشربي عشان نطلع طارق حـيجن لحدي ما نصل... ابتسمت وقلت بنفسي " طارق والاولوية في اي شي"... باسل لمن جا قمنا طوالي، ابوي كان ماشي يحاسب باسل قال ليهو دفعت.... طول الطريق ما اتكلمنا بس باسل قال حنبدا اجراءات السفر بعد النتيجه تطلع .. وابوي وافق.. سألني قال لي عندك مشكله؟ هزيت راسي بالنفي.... لمن وصلنا طارق كان عامل زعلان ما اتكلم ابداً.. بعد فطرو طلعو للشغل اما انا كان شاغل بالي موضوع واحد.. لمن باسل قال لي حيشيل الطفل... ختيت يدي في بطني وعاينت ليها بقيت بتكلم كأنو في زول واقف قدامي " انا للحظه دي ما جاني احساس الامومه تجاهك ما عارفه دا شي طبيعي ولا على قول باسل بسبب المشاكل الحصلت لي بسببك" اتنهدت وواصلت " لكن بتمنى انك ما تعيش نفس الحياه العاشتها امك ما بأكد ليك اني ممكن اتقبل وجودك في يوم لكن من العرفتو خلال امس والليله انو ابوك عايزك عشان كدا ما حاكون انانيه واحرمو منك في حين اني ما عارفه هل حاكون ليك ام ولا لا".... رقدت وانا بالي مشغول بغسان لي لحدي اللحظه دي ما اتصل لي، انا من امس خاله التلفون الصغير معاي لكن ما اتصل ولا رسل لي.... اتنهدت وختيت يدي في صدري وانا بدعي انو يكون بخير..
المساء خنساء جاتني ورتني انو محجوب جا الصباح وكان رابط يدو وراسو قلت ليها يعني غسان ضربو؟... قالت لي شكلو كدا، انتي غسان ما اتكلم معاك لحدي هسي؟.. قلت ليها بري ما اتصل من امس مستنياهو.. قالت لي كدي اتصل لي مرتضى واجس نبضو قلت ليها اي عليك الله... دخلت المطبخ اتكلمت بعد داك جاتني قالت لي قال غسان ليهو فترة ما قاعد في البيت بجي مره مره يشيل ليهو حاجات من غرفتو ويمشي قال لي شكلو متناقش مع امو... قلت ليها وهو ما عارف السبب شنو؟... قالت لي ما اظن لو عارف كان قال لي.. اتنهدت بضيق، قلبي ما كان مطمن ابدا خصوصاً انو محجوب ظهر وغسان لسه ماف منو خبر..
____ ____

دخل الغرفه وقفل الباب وراهو، كانت مشغوله بالتلفون لمن شافتو قامت وقفت قدامو ولفت يدينها حولين رقبتو
ميسم: حبيبي مشتاقين
باسل: كتير
كشرت حواجبها باستغراب : كتير؟!!! باسل انت مالك من امس
باسل: مالي
ميسم: انت شايف انك طبيعي يعني؟
باسل: ميسم انا تعبان داخل اسحمى وانوم طوالي
ميسم: ما حتتغدى؟
باسل: اتغديت
ميسم: من متين بتتغدى بدون ما تتصل وتقول لي ما تستنيني
شال غيار ودخل الحمام بدون ما يرد.. اول ما طلع لقاها واقفه ومربعه يدينها
ميسم: ما حتنوم قبل توريني الحاصل شنو
رما المنشفه الحولين رقبتو في السرير ومشا عليها
باسل: ميسم انتي داسه مني حاجه؟
قالت بارتباك واضح عكس نبرتها القبل شويه: انا؟؟ حـادس منك شنو يعني
باسل مدا يدو: جيبي تلفونك
ميسم: تلفوني ما مشحون
اتخطاها ورفع المخده شالو وفتحو، وجهو عليها لمن شاف شحنو عامل ٨٧٪ رفع حاجبو وحرك راسو بتساؤول.. بلعت ريقها وقالت ليهو في شنو يا باسل
فتح الواتس وبقى بفتش في الدردشات، رماه في السرير وقبل عليها: مسحتيها يعني؟
ميسم بدت تخاف لمن شكت انو عرف: مسحت شنو
باسل: دكتور عمر حكا لي اي حاجه
ختت يدها في شفايفها وغمضت عيونها وهي بتحاول تمنع دموعها تنزل، باسل نزل يدها وقال ليها: ليه دسيتي مني؟ عايني لي في عيوني وقولي دسيتي لشنو؟؟.. ميسم انا مش امس الصباح سألتك نفس السؤال دا وقلتي مافي حاجه داساها والليله الصباح برضو سألتك ورديتي بنفس الجواب.. ما جا في بالك اني ممكن اكون عرفت؟
قال بصوت مبحوح: باسل انا كنت خايفه
باسل: خايفه من شنو؟
ميسم: الموضوع ما كان هين بالنسبه لي لحدي اللحظه دي انا ما قادة استوعب الحصل دا.. خفت، خفت تعرف و.. و
باسل: واعرسها؟
ميسم: ايوه
باسل: ختيتي نفسك مكانها؟ قلتي انا لو انا كنت مكانها واهلي عرفو اني حامل ممكن يعملو فيني شنو؟
قالت وهي بتصرخ: فكرت، ايوه فكرت (خفضت نبرة صوتها) لكن انا ما عندي القوة اشوف وحده تانيه تشاركني فيك يا باسل
باسل: لو بتعرفيني ما بتفكري كدا
ميسم: لا بعرفك، ولأني بعرفك ما كلمتك، عارفه انك ما حتقبل تشوف وحده الناس بتكلمو عن عرضها بسببك انت.. صح ولا ما صح؟
كان بعاين ليها بدون ما يرد
ميسم: صح كلامي دا يا باسل؟
شال مفاتيحو وتلفونو من التربيزة وطلع بدون ما يرد على نداءاتها .. قفلت الباب وقعدت في الارض وهي متكله فيهو وبتبكي..
___ ____

فتح عيونو وغمضها كم مره، شاف نفس المكان للمرة ال... كم ما متذكر.. كان حاسي بالم فظيع في يدو اليمين المربطه مع الشمال لي ورا...كان قاعد في مكان اشبه بالمستنقع ريحتو ما بتنطاق والجو فيهو حار شديد قاعد في الارض مربوط من يدينو ورجلينو.. شاف زول جاي عليهو اول ما وصلو ابتسم باستفزاز

محجوب: شايف الدنيا دوارة كيف؟ يوم ليك ويوم عليك
شال خشبه من طرف الحيطه وبكل قوتو بقى بضربو بيها في اجزاء متفرقة من جسمو
غسان: لو هبشتها بضبحك سامعني؟ قسما برب الكعبه اضبحك وارمي لحمك للكلاب
محجوب ضحك ورجع كم خطوه لي ورا فتح يدينو وقال: تعال، تعال اضبحني وااااي انا خفت
ضحك مره تانيه ورجع يضربو
__ _____

عدو يومين وما رجع البيت كانت بتتصل ليهو وما بتلقى منو رد..
مروة: يا حليلها غيم كانت عاملة جو في البيت
جا اليوم داك داخل واول ما شافتو قامت من الصاله ودخلت وراهو الغرفه
ميسم: باسل انت كنت وين؟ ليه ما بترد علي؟
قال وهو بفتح زراير القميص: عرستها
ميسم: ش شنو؟ قلت شنو؟
عاين ليها: عرستها قلت ليك
ما نطقت بحرف تاني، لمت ملابسها وطلعت من البيت.... اول ما وصلت بيتهم جرت دخلت ودموعها جات نازلة... امها وابوها كانو في الصاله، لمن شافوها قامو مخلوعين.. مشت عليهم وارتمت في حضن ابوها
حياة: بسم الله يا بت مالك الحاصل شنو
عبدالرحيم فكاها وهو بسأل: ميسم في شنو؟؟
حياة: ما تقولي لي اتشاكلتو تاني؟
عبدالرحيم حدر ليها
حياة: انتي يا بت كل ما تحصل ليك مشكلة مع راجلك تجينا جاريه البيت؟ الناس يقولو عليك شنو، مشاكلكم اقعدو وحلوها مع بعض انتو ناس كبار وعاقلين ما مراهقين
عبدالرحيم: حياة اهدي ما شايفه البت حالتها كيف، تعالي يا بتي اقعدي.. غيم جيبي لي اختك دي مويه.. اقعدي يا بتي وقولي لينا الحصل شنو خلاك تطلعي زي الوقت دا وتجي هنا
قالت بحرقة ودموعها ماليه وشها: باسل عرس يا ابوي باسل عرس فيني
عبدالرحيم سكت مسافه بعدين قال: باسل كلمني ، جا حكا لي الحاصل واخد اذني
ميسم قامت وعاينت ليهو بخلعه : اخد اذنك؟؟ يعني انت انت عارف يا ابوي ووافقت ليهو
عبدالرحيم: اي وافقت
____

*"نتصرف أحياناً بانانية ونحن موقنين بذلك، لسنا سيئين نحن فقط نخاف ان نُكسر او نفقد اغلى ما نملك"*
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《24》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
قامت مخلوعه وشهقت، لمن شافتو راقد جمبها رقدتو المعتاده -على بطنو وقالع قميصو- اخدت نفس طويل وختت يدها في صدرها.. رجعت رقدت وختت يدها تحت راسها، كانت بتتأمل ملامحو وهي مبتسمه
ميسم: لو تعرف انا بحبك قدر شنو كنت حتفهمني
بعد صلت الصبح حاضر طلعت المطبخ عملت كيكة شوكولاته ودخلتها الفرن، عاينت لساعة تلفونها وكانت عامله ٥:٤٠ بعدها عملت شاي ساده رمت فيهو عودين قِرفه.. ختت في الصينيه السكريه والبراد وكبايتين من كبابي شاي اللبن الجديده الكانو جايبنها من مصر والاختارها بنفسو.. طلعت الكيكه وكبت فيها الصوص بتاع الكاكاو ودخلتها التلاجه.... رجعت غرفتها وكان مافي لمن سمعت صوت الدش عرفتو في الحمام.. رجعت جابت الصينيه والصحن وختتهم في التربيزة.. طلع عاين ليها كانت قاعده في الكنبه وماسكه تلفونها، صلى وقعد مسافه في المصلايه بعدها قام فتح الدولاب
ميسم: الشاي حـيبرد
باسل: مستعجل بشربو قدام
قامت من مكانها ووقفت جنبو، مسكت كف يدو الشمال بيدينها الاتنين
ميسم: ما تعمل كدا
فكا يدو بدون ما يرد عليها واتوجه على الحمام وهو بخت المنشفه في كتفو
__ __

يوم النتيجه قلت لي ابوي ماشه معاك.. قال لي خلاص البسي.. طلعنا الصباح ونحن في الطريق ابوي جاهو اتصال من كلامو عرفتو باسل، قال ليهو جايين في الطريق قربنا.. مشينا ولقيناهو واقف لينا برا سلمنا ودخلنا، لمن دورنا باسل دخل بعدين جا شايل الورقه وقال متطابق.. ابوي هزا راسو بالايجاب طلعنا واصر يوصلنا ف ركبنا معاهو، في الطريق فتحو موضوع السفر قال لي حابه تمشي وين يا ميسم... عاينت لي ابوي، كان قاعد معاهو قدام.. ابوي قال ليهو ما حتسافر.. باسل عاين ليهو ورجع عاين للطريق واصل وقال ليهو انا ما بقدر اخلي بتي تسافر بلد تانيه براها وهي ما بتعرف فيها شي، هي زاتا ما متعوده تمشي حته بعيده وتقعد كتير، لكن بشوف ليها شقه بعيده من حتتنا تقعد فيها هي واخوها الصغير... لمن ابوي قال كدا فرحت فرح لأنو فكرة السفر اصلا ما كانت راكبه راسي باسل عاين لي بالمرايه وقال لي وانتي رايك شنو؟.. قلت ليهو موافقه... قال لينا تمام نبدا نفتش ونشوف ليك في اقرب وقت، اخوكم الصغير دا ياهو البمشي بالعكاز؟.. ابوي قال ليهو اي... قال لينا ما صعبه عليهو طلعة السلم ونزلتو؟.. ابوي قال ليهو نعمل شنو، ما بنقدر نخلي البت براها.. سكت شويه بعدين قال ليهو خلي موضوع الشقه دا علي يا عم عثمان ... ابوي كان عايز يتكلم باسل قال ليهو هسي التفتيش خليه علي الباقي بنتناقش فيهو بعدين..
لمن وصلنا لقيت خنساء بتدق في الباب قالت لي ياداب جيتو ولا شنو؟ قلت ليها اي انتي واقفه من قبيل؟.. قالت لي لالا جيت هسي... عملت الفطور لي ابوي بعد شرب الشاي وطلع فطرنا انا وخنساء برانا.. ونحن بنشرب الشاي قلت لي خنساء انا حاسه بتأنيب الضمير.. قالت لي ليه؟.. قلت ليها حاسه اني ما عندي اي مشاعر تجاه الطفل دا ولا كأني امو.. قالت لي بعد الحصل ليك دا منتظرة مشاعر تاني؟؟ انا لو مكانك كنت نزلتو، استغفر الله العظيم يارب.. قلت ليها برضو ياخ .. قالت لي لمن تمشي المقابله كلمي الدكتور احكي ليهو الحاصل واسأليه لو دا شي طبيعي.. قلت ليها طيب.. اترددت شويه قبل اسألها بعدين قلت ليها غسان ماف منو خبر؟..

قالت لي هي صحي نسيت اكلمك تصدقي وانا اصلا جايه عشان الموضوع دا، غسان قالو سافر.. قلت ليها سافر! وين ومتين؟!!.. قالت لي ما عارفه والله امس كنت بتكلم مع مرتضى قال لي قدر ما اتصلنا ليهو ما برد في النهايه قفل تلفونو وامس الصباح رسل ليهو رساله في الواتس كاتب فيها انا سافرت لمن سألو وين ما رد الا لمن خشا الفيس لقاهو عامل منشور كاتب فيهو الى باريس... ما استوعبت الكلام او ما قدرت اصدقو قلت ليها وما كلم ولا زول سافر كدا ساي.. قالت لي شكلو كدا... قلبي ما كان مطمن لكن ما قلت ليها حاجه تاني.. بعد طلعت فتشت تلفوني البيت كلو ما لقيتو استنيت ابوي متين يجي عشان اسألو لمن جا قال لي تلفونك مع طارق.. قلت ليهو انا دايراهو خليهو يديني ليهو انا لو قلت ليهو ما حيديني.. قال لي كويس... لمن طارق جا بقيت منتظره بفارغ الصبر وكل شويه اتاوق بي برا لحدي ما ابوي جا اداني ليهو شلتو طوالي واتصلت ليهو لكن ما خشا معاي.. خشيت صفحتو في الفيس وشفت المنشور وقتها ياداب صدقت وقلبي وجعني شديد💔..انا ما فاهمه ليه بعمل كدا، قال لي مصدقك وما حاخلي محجوب يعرسك وفعلا محجوب اختفى وما شفناه ليوم الليله لكن ليه مشى وخلاني.. قلت لي نفسي "دا منو الحيقبل يكون مع وحده في بطنها طفل ما منو💔" انا ما بلوم غسان لأنو ما بستاهل وحده في وضعي دا غير موضوع طارق واختو اللسه شاغل بالي وكنت متخوفه منو لقدام.. وهسي قدام زاتو بقى ماف... اتنهدت ومسحت دمعتي النزلت..
بعد يومين رحلنا انا وطلال في شقه مفروشة في عماره وكان فيها اصانصير عشان طلال، فيها غرفتين وصاله صغيره ومطبخ مفتوح وحمامين واحد في الصاله وواحد في واحده من الغرف.. كنا في الطابق التالت والحي جميل شديد منظرو من فوق يحسسك كأنك مافي السودان.. باسل اصر على ابوي يتكفل بقروش الايجار لكن ابوي رفض ف اتفقو كل شهر يدفع واحد فيهم... وبالنسبه لمدرسة طلال ف باسل قال حيشوف ليهو ترحيل يوصلو ويرجعو كل يوم وحلف لي ابوي ما يدفع ولا قرش فيهو... خالتي صفيه وخنساء جو عدو معانا اول يوم ورجعو.. بالمساء عملت شاي لبن وكان في بسكويت شاي من الحاجات الجبناها معانا ختيتهم وناديت طلال قعدنا في البلكونه قلت ليهو كيف مع السكن الجديد؟.. قال لي الحمدلله لكن ما زي بيتنا.. قلت ليهو يا راجل يعني اقنعني الشقه ما عجبتك شوف الانوار دي شكلها سمح كيف والزلط والعربات والمحلات.. قال لي ديل كلهم ما بسوو سريري الفي بيتنا.. اتنهدت وقلت ليهو انا بحاول اواسي روحي.. ضحكت وضحك معاي قال لي ان شاء الله الفتره دي تعدي سريع وطفلك يجي بالسلامه ونرجع بيتنا.. قلت ليهو لو باسل قال لي سميه حاسميه طلال، لكن ما اظن ولا بقدر اطلب منو حاجه زي دي براي.. قال لي لو خلاك تسميه سميه عبدالرحمن.. قلت ليهو اشمعنى قال لي خير الاسماء ما حُمِّد وعُبِّد، وانا عاجبني شديد الاسم دا.. قلت ليهو حااضر حاسميه عبدالرحمن ان شاء الله... قال لي الشاي سمح شكراً تسلم يدك.. قلت ليهو بالعافيه عليك حبيبي.. اداني نظره فهمت منها انو ما عجبتو الكلمه ضحكت وضربتو في كتفو قلت ليهو ما تعمل لي فيها كبير انت اخوي الصغير وحتفضل صغير في نظري لحدي ما تعرس وتجيب اولاد.. ابتسم بس، بعد مسافه قال لي الزول دا بعمل معانا كدا ليه؟.. قلت ليهو باسل؟.. قال لي اي.. قلت ليهو كيف ليه ما دا ولدو.. قال لي عارف ولدو لكن برضو تعب معانا شديد .. رفعت كتفي ومطيت شفايفي قلت ليهو زول طيب وولد ناس...... حسيت طلال بلمح لحاجه بس ما ركزت معاهو شديد اتونسنا شويه وعلقنا على الشارع بعدين اي واحد دخل غرفه ينوم..
يوم المقابله كانت بتجيني خالتي صفيه ومرات بجينا باسل.. يوم بعد خلصنا قعدت مع الدكتورة وحكيت ليها الحاصل في النهايه قلت ليها انا امو لكن ليه ما حاسه بالحاجه دي؟ مافي اي ذرة مشاعر مني تجاه الولد دا يعني ما بقول ليك انا بكرهو بسبب الحصل لي من وراو لكن برضو ما بريدو ولا متلهفه لولادتو هل دا شي طبيعي؟ وممكن لقدام مشاعري دي تتغير؟... الدكتورة ابتسمت وقالت لي لكن دا ما ولدك.. كشرت حواجبي باستغراب وقلت ليها كيف يعني ما ولدي!!.. قالت لي كلام كتير وما كنت فاهمه حاجه لمن حست بي تايهه قالت لي حابسط ليك الموضوع قدر الإمكان عشان تفهمي العينه البتعمل بيها الحقن بتكون ملقحه جاهزه يعني العمليه الاتعلمت ليك اشبه بزراعة الجنين... قلت ليها يعني الولد دا ولد باسل ومرتو مش؟.. قالت لي ايوه بالظبط.. اتنهدت تنهيده طويله عكست الراحه الحسيتها بيها وقتها كأنو كان في جبل في قلبي وانزاح... بعد طلعت كلمت خالتي صفيه وهي برضو ما استوعبت الموضوع طوالي قلت ليها اول ما ارجع حاتصل لي ابوي اكلمو واخليهو يكلم باسل.. قالت لي هو مالو ما جا الليله.. قلت ليها ما عارفه والله بكون شغال.. قالت لي الليله مرتضى وابوهو جايين حيحددوا مواعيد العرس.. قلت ليها بالجد؟؟ خنساء ما ورتني.. قالت لي هي زاتا ما اظن عارفه مرتضى قال داير يعملها ليها مفاجأة غايتو الولد دا حركاتو زي المراهقين..

ضحكت ضحك قلت ليها نفسي افهم انتي ليه مرتضى دا ما عاجبك.. قالت لي بري ما عارفه لكن مادام سعادة بتي معاهو ما بقيف ليها في وشها....فعلا اول ما رجعت اتصلت لي ابوي وكلمتو حسيت بيهو هو زاتو فرح.. خنساء اتصلت لي نفس اليوم بعد المغرب قالت لي اتخيلي يا ميسم مرتضى جا وحدد العرس نهاية الشهر الجاي.. عملت نفسي ما عارفه قلت ليها يا زولة ما شاء الله والله ربنا يتم ليكم على خير ويسعدكم يارب.. قالت لي آمين آمين لكن اجلناهو لبداية الشهر البعديه.. للحظه اتذكرت اني ما حاحضر عرسها، عرس صحبتي واختي الوحيده قلت ليها باسى: كويس.. قالت لي حتجي مش؟.. قلت ليها اجي كيف بس.. قالت لي هوووي ما دايرة معاك قلة ادب عرس من غيرك ما بسويه.. قلت ليها ما عندي طريقه والله يا خنساء انتي عارفه الحاصل ابوي زاتو ما بخليني.. قالت لي انا بكلمو.. قلت ليها كلميه لكن ما اظن يرضى.. قالت لي اوووف ياخ والله ما قادره اتخيل عرسي بدونك كنت مخططه لحاجات كتيرة واي تفصيله تكوني فيها معاي.. قلت ليها قدر ربنا نعمل شنو، ااا مرتضى ما قال ليك حاجه عن غسان تاني؟.. قالت لي ميسم انتي لسه خاتاهو في بالك؟ الزول دا سافر وما كلف نفسو انو يوريك مستنيه منو شنو تاني.. قلت ليها ما عارفه ياخ ما قادره امنع نفسي من التفكير فيهو... العبرة خنقتني ودموعي بدت تنزل ضغطت عليهم بسبابتي وابهامي وشهقت في نص بكيتي... قالت لي ميسم ما تعملي في نفسك كدا حيجيك الاحسن منو صدقيني ربنا حيعوضك ان شاء الله.. قلت ليها ما حالقى الاحسن منو يا خنساء ولو لقيت ما دايراه انا ما دايره غير غسان بس💔.. قالت لي ما توجعي قلبي معاك كفايه عليك الله💔... مسحت دموعي وقلت ليها اتخيلي بدخل الواتس بشوفو متصل بجيني عديل انو متصل الان وما برسل لي ما عارفه كيف قادر يهمشني بالطريقه دي، لحدي اخر لحظه شفتو فيها كنت شايفه نظرة الحب في عيونو.. قالت لي طيب مالو هسي الاتغير شنو؟.. قلت ليها ما دا المحيرني.. اتنهدت وقالت لي بسأل ليك منو مرتضى تاني اشوف لو اتكلم معاهو ولا قال حيجي العرس ولا كدا.. قلت ليها حتى لو جا انا حاعمل شنو؟.. قالت لي ما اسألو يعني؟.. قلت ليها ما تسأليه ما عايزه اعرف كفايه لحدي هنا هو ما دايرني انا لمتين حاقعد اسكو كدا.....
خنساء اتكلمت معاي كتير وحاولت تهديني لكن النار الجواي ما انطفت لو اعرف بس الغيرو كدا شنو..... من جينا الشقه غيرنا نظامنا بقينا نتغدى متأخر وفي العشا بنشرب شاي ، وقت بنشرب الشاي طلال وراني انو بكرا اخر امتحان ليهم في الفترة الاولى قلت ليهو ربنا يوفقك وسكت.. قال لي بهناك بمشي مع رامي وماشي بيتنا لي ناس ابوي.. قلت ليهو طيب.. لمن لاحظ لي شرودي قال لي مالك يا ميسم؟.. قلت ليهو انا؟ مالي.. قال لي حاسه بحاجه نمشي الدكتور؟ قالت ليهو لالا اصلا الليله كنا عند الدكتور.. قال لي في شنو طيب.. قلت ليهو مافي شي، هي ما وريتك.... حكيت ليهو موضوع الطفل عشان الهيه من السؤال وردة فعلو كانت نفس حقت خالتي قال لي سبحان الله.... الليله ديك ما قدرت انوم كل ما اغمض عيوني بشوفو قدامي يا بتذكر اخر مره اتقابلنا فيها شلت تلفوني وفتحت البروفايل بتاعو كبرت الصوره وبقيت بعاين لملامحو وبتذكر المواقف الجمعتنا سوا... اثناء ما انا سرحانه جاتني رساله منو قلبي بقى بضرب سريع ويدي بقت ترجف قريتها في نفس الثانيه كان مرسل لي " مساؤ خير ميسم😍" استغربت لأنو طريقة الكتابه ما نفسها بتاعت غسان.. حاولت امسك نفسي لكن ما قدرت رسلت ليهو " مساء النور"... قفلت التلفون وختيتو قلت في نفسي" يلعن الشوق البخلينا ندوس على كرامتنا عشان ناس ما بتستاهل" جاتني رسالة منو في نفس الثانيه
" الاومور والخبار شنو🤔"
المره دي استغربت بالجد لأنو غسان ما بتكلم بالطريقة دي وما بستخدم اموشنات خالص في المحادثه دا غير الأخطاء الاملائية..
" الحمدلله، داير شنو؟"
" رسلتا ليكي عشان اقول ليكي انا رجعتا السودان"
" حمدلله على السلامه"
" الله يسلمك، داير اشوفك يا ميسم😔"
" ليه؟"
" عشان اوضح ليكي سبب اختفاي الفترا دي كلها😢😢💔"
هنا اتأكدت انو في شي غلط
" ماف داعي توضح لي ما عايزه اي تبريرات"
" عليكي الله يا ميسم"
" عايزه اتكلم معاك مكالمه"
" لالا انا شبكتي كعبة لسه ما وصلتا الخرطوم بكرة بوصل وداير اشوفك اول حاجة"
" ما بقدر"
" يا ميسم انتي مالك"
" غسان انت كل مره حتعمل كدا؟ تختفي زي ما عايز وتجي راجع تقول لي اسمعي اسبابي؟ انا فترت من حركاتك دي وما عندي قدرة تاني استحملها"
" دي اخر مرا بس المرا دي"
ختيت التلفون وبقيت بفكر ليه حاسه انو البتكلم معاي دا ما غسان؟ لكن لو ما هو حيكون منو؟ اديه فرصه ياربي ؟ انا عارفه نفسي هبله وما بدي قيمه لنفسي... لكن البينا انا وغسان ما كان هين عشان كدا حاديه اخر فرصة، شلت التلفون ورسلت ليهو " نتلاقى وين؟"
"😍😍😍 برسل ليك العنوان بكرا اركبي ترحال وتعالي، اطلعي من الساعه ١٠"...
__ _

فتح الباب ودخل، كان ناوي يزف ليها البشاره السمعها الصباح... على غير العاده البيت كان صاني والانوار مطفيه ولع فلاش التلفون لحدي ما وصل للكُبس نور وبقى بنادي وهو بتاوق في المطبخ والغرف
باسل: امي ، احلام ، مروه ، ميسم.... ديل مشو وين؟
قعد في كرسي في الصاله وهو بطلع تلفونو عمل مكالمه ورا التانيه لكن مافي رد..
باسل: " يكونوا في وحده من رحلات الاسرة الما عندهم موضوع ديل"
اتجه على غرفتو واخد دش بعدها رقد طوالي، اول ما النومه خشت في عيونو جاتو مكالمه، شال التلفون ورد
باسل: ايوه
مروة: انت وين
باسل: في البيت، انتو الوين
مروة: انا مشيت مع غيم، واحلام وامي مع ميسم في المستشفى
قام وسأل بلهفة: ميسم مالها، في ياتو مستشفى
مروة: ما عارفه، احلام اتصلت لي قبيل قالت بتضرب ليك ما بترد وتلفونها خلاص حيقفل قالت لي اضرب ليك اكلمك انو ميسم وقعت وشالوها، انا زاتي هسي لبست وطالعه عليهم
باسل: وين قلت ليك في ياتو مستشفى
بعد سمع الرد قفل ولبس بسرعه، شال مفاتيحو وطلع وهو بجري
___ ______

طلع من الامتحان وشاف من تحت شجرة صحبو بأشر ليهو.. مشى عليهو بالعكاز لحدي ما وصلو.. رامي سألو اها الامتحان كان كيف
طلا:ل الحمدلله ما بطال، انت اشتغلت كيف
رامي: ما اشتغلت حاجه جمعت ليهم الورقه زي ما هي
بانت معالم الاستغراب في وش طلال، ضحك رامي لمن شاف تعابير وشو وقال ليهو يا زول دا اخر يوم لي في المدرسه دي حيلقوني وين؟
طلال: في المدرسة الحتحول فيها ما حيطلبو منك النتيجه؟
رامي: لالا ما بطلبو، اها حتمشي معاي الليله؟
طلال: اي ماشي اشوف ناس ابوي وطارق
رامي: قدام ارح يلا
طلال: نفطر ونطلع
رامي: لالا نفطر في البيت يا زول ارح اسرع
طلال: براحه خلاص مالك جاري كدا

طلعو ورامي اصر انو يسلكو طريق تاني عشان يتسكعوا، طلال رفض في البدايه بس رضخ لمن رامي اصر وقال ليهو دا اخر يوم نرجع فيهو سوا ما تبقى بايخ...... دخلو بي زقاق وطلال اتفاجأ بالعصابه القافله نهاية الزقاق وواقفه كأنها مترصداهم
طلال: ديل ما ناس مجتبى؟
رامي: عاين الحيوان دا، قال بجي براهو (عاين لي طلال) انت ارجع اقيف لي بهناك لو سمعتني بكورك نادي الناس
طلال مسكو من ذراعو: رامي داير تعمل شنو انت جنيت؟ ارح ارجع معاي
رامي جرا يدو: ما راجع يا زول الليله بحددها معاهم
رامي اتقدم عليهم بخطوات سريعه وطلال حاول يلحقو.. شاف الشكله البدت تدور بيناتهم، كانو كلهم محاوطين رامي وبشلتو فيهو ومنهم الجاي بي عصاياتهم وواقع فيهو ضرب
طلال: اقيفو هوي اقيفو بنادي الناس كان ما وقفتو
رامي فجأة وقف وطلع سكين، كلهم بعدو من جمبو لمن شافوها
مجتبى رجع لي ورا لمن شافو بتقدم عليه : دا شنو يا زول
رامي: يا باطل انت كان راجل اقيف لي
فجأة واحد منهم خطف منو السكينه، رامي كورك من اثر الضربة الجات في يدو.. طلال بعد وقف تاني اتحرك عليهم لمن لمح السكينه.. كانو كلهم ماسكين رامي ومجتبى شايل السكينه وبحركها يمين وشمال ورامي بحاول يتفكى منهم.. بحركه سريعه ضرب واحد برجلو في بطنو ونطا في مجتبى.. احتدم الشكل بيناتهم وفجأة طلال وقف لمن شاف الدم سايل من بطن رامي.. مجتبى قام بخوف اتخلع لمن عاين حواليهو ولقى المعاهو كلهم ماف، عاين لي طلال ورامي ومشا بسرعه ختا السكينه في يد طلال وفكا الجريه... طلال بخطوات اقرب للجري مشا على صحبو، وقع بي فوقو وهو بضربو في خدو وبحاول يصحيه
طلال بخلعه وهلع: رامي رامي قوم رامي اصحى رامي انت سامعني (علا صوتو وبقى بكورك باعلى حس) يا نااااااس يا عالم ساعدونا يا نااااس
___ ____

رفع يد غسان فوق وفكاها ف وقعت تلقائياً.. قام وبقى بعاين للراقد في الارض ومربط، طلع التلفون من جيبو ورسل اخر رساله بعدها دخلو راجع... طلع من المخزن شم الهواء النظيف البي برا بعدها طلع التلفون التاني وعمل مكالمه
محجوب: الو طارق كيفك
طارق: محجوب؟؟ يا *** يا سافل يا باطل
محجوب: طارق اهدا واسمعني، داير اقول ليك اي حاجه اتقالت ليكم هي كضب ولعبه لعبوها عليكم ميسم وباسل وغسان
طارق: انت بتقول في شنو يا حيوان
محجوب: لو ما مصدقني تعال في المكان الحارسل ليك موقعو هسي وحتشوف الحقيقه بعينك
طارق: حقيقة شنو ، محجوب انا والله كان عرفت مكانك اقرا الفاتحه على روحك بس
محجوب: يا مان اهدا، الراحل الجا قال ليكم ميسم حملت بالغلط دا كضاب، ميسم كانت عامله علاقة مع مديرها في الشغل والولد الفي بطنها ولدو كضبت علينا كلنا وقالت اغتصبوها ونحن صدقناها وتاني جات كضبت وقالت حمل بالغلط وما عارف.. والولد الاسمو باسل دا زاتو راجل اختو لي حبيبها غسان.. لو ما مصدقني تعال في المكان البرسلو ليك وشوف بي عينك الحاصل
طارق: انت ابن****
تيت تيت تيت
___ ___

قلبي ما كان مطمن وحاسه باحساس ما كويس، ختيت يدي في قلبي وبقيت بستغفر لحدي ما السواق قال لي وصلنا.. عاينت يمين شمال كنا في حته اشبه بالخلا قلت ليهو انت متأكد دا المكان؟.. قال لي اي نفسو الفي الموقع.. قلت ليهو طيب استناني هنا... نزلت ومسكت شنطتي قوي، قدامي كان في حاجه زي الغرفه كدا ولا ما فهمت هي شنو لكن نفسها الصورها لي غسان ورسلها.. بلعت ريقي ومشيت عليها دخلت وكانت عبارة عن خرابه وريحتها كعبه شديد، لفيت وشي بالطرحه ودخلت... اتجمدت مكاني وحسيت الدم وقف في عروقي حاولت امشي ما قدرت جسمي بقى برجف حاولت اتكلم واناديه لكن شفايفي كانت بترجف اتقدمت خطوه خطوتين رجولي خذلتني ووقعت في الارض، بقيت بزحف لحدي ما وصلتو كان واقع في الارض وبتنفس بصعوبه وعيونو بتغمض وتفتح زي الزول الصاحي من النوم ياداب قلت بصوت مبحوح وانا برفع وشو من الارض: غ.. غسان.. غس.. غسان قوم
حسيت بزول واقف جمبي كان ملتم افتكرتو حيعمل لي حاجه لكن ما هبشني بس شال الشنطه طلع منها تلفوني ومشى بقيت بناديهو: هيييي انت منو اقيف انت العملت كدا في غسان؟؟... سمعتو بناديني بصوت واطي ومتقطع: مي سم.... رفعت راسو فوق رجولي وقلت ليهو وانا ببكي وبضحك في نفس الوقت: غسان انا هنا انا ميسم.. ابتسم وهو مغمض عيونو قال لي انا بريدك يا ميسم بريدك اكتر من اي شي في الدنيا.... قال كدا وغمض عيونو للحظات كنت بعاين ليهو بس بعدها فكيت صرخه لمن صوتي راح بعدها : غسااااان غسان قوم الله يرى عليك قوم ما تمشي يا غسان قوم قوم..... بقيت ببكي وبهز فيهو فجأة سمعت صوت بقول: يا حيوانه يا كلبه يا بت الحر** ام
طارق كان شايل حديده وجاي علينا رقدت وضميت غسان علي وانا ببكي.....

بعد شال التفون من الشنطه وطلع اتصل في الرقم " ٩٩٩ "
محجوب: الو السلام عليكم عندي بلاغ بجريمة قتل في """ مشتركين فيها ولد واختو، ايوه شارع """ سجلو بـاسم مجهول
دخلو التلفون راجع وعاين للمخزن بعدها مشا وهو بقول " game over "

_______

*" عانق من تحب وصالح من اخطأت بحقه واعفُ عمن ظلمك، فانت لا تعلم متى سيرحلون"*
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《25》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
ابوي قال لي الوداك المكان داك شنو.. كنت منزله راسي وساكته ساي لكن جواي النار مولعة قلت ليهو ابوي انت عارف الحصل شنو، محجوب اتقبض واتسجن وغسان هسي راقد في المستشفى.. قال لي دا ما جواب سؤالي... حاولت اسكت وامسك نفسي بقدر الإمكان لكن ما قدرت.. رفعت راسي وقلت ليهو ابوي انت ليه دائماً بتخت الحق علي؟ انا بس دايرة اعرف انا بتك ولا بت جايبها من الشارع؟؟ ليه بتعاملني بالطريقة دي، لو انا ارتكبت ذنب يخليك تكرهني للدرجه دي يوريني يمكن ارتاح، ياخ حتى لو بتكرهني ما كنت عاملتني كدا..اي مشكله تحصل في البيت دا بتلفو وتدوروا لحدي ما تختوها في راسي في النهايه، ليه انا اتعاقب على اغلاطكم انتو؟.. طارق قال لي قفلي خشمك دا قبل ما... مشيت عليهو وقلت ليهو قبل شنو؟؟ داير تعمل لي شنو المره دي؟ حتقتلني؟ ياخ اقتلني وريحني من العيشه دي، انا خلاص ما قادره استحمل تعبت وجاتني نفسيات وجنيت عديل اااي جنيت، ياخ انا اخوي الصغير زاتو جنا بسببكم، طلال اتسجن ٣ ايام وماف واحد كلف نفسو ساي يشوفوا لييه؟ عشان وطا راسكم قدام الناس في جريمه هو ما عندو فيها ذنب.. ياخي طلال صحبو مات وانتو ما فكرتو حتى تواسوه بعد اثبتو براءتو وطلع هسي انتو عارفنو وين ؟ جاوبوني عارفنو؟ لا طبعا لأنو ما فاضيين من انو ترمو اللوم علي وعليهو.. ابوي دايره اسألك سؤال جاوبني عليهو بي صراااحه.. لو انا وطارق ما كنا طلعنا منها كنت حتعمل شنو؟ خليني انا اصلا ما عندي عندك اي قيمه (اشرت بي سبابتي على طارق) ولدك دا كنت حتعمل ليهو شنو؟ كنت تخليه مقبوض بدون ما تجيب خبرو؟ مستحيل طبعا ما دا ولدك ونحن اولاد الشوارع....ابوي سكتني بي كف ومدا لي سبابتو ، يدو كانت بترجف قال لي ولا كلمه ذياده.. قلت ليهو لا ما حاسكت لأنو السكات هو الوصلنا للحال دا انت يا ابوي عندك طارق في كفة ونحن في كفة تانيه، هههه لا طارق في الكفتين ونحن برا الميزان أساساً وانت ما بتقدر تنكر الحاجه دي عشان كدا هسي كلامي وجعك وكفتني، لكن خلاص انا الفيني كملت وتاني ما بسكت يعني ما بسكت..... دخلت الغرفه لبست عبايتي وجيت طالعه قلت ليهم انا ماشه لي غسان... طلعت بدون ما اسمع ردهم، على عكس المرات الفاتت الكنت بحاول ابرئ فيها نفسي قدامهم المره دي ما نزلت مني ولا دمعه وما حسيت بذرة ندم على الكلام القلتو ليهم.. بالعكس ارتحت شديد وما كان هاميني ردة فعلهم ابدا، اول شي مشيت بيت ناس رامي "الله يرحمو" الناس كان بدت تخف لكن ناس بيتهم متجرسين شديد وامو دي ابت تفك طلال نهائي، وطلال حالتو ما كانت احسن من حالتهم اليوم كلو سرحان وكل ما يشوف زول يقول ليهو انا شفتهم طعنوه وغزوها ليهو جوا بطنو.. الخلعه الدخلت فيهو ما اظن تمرق بالهين💔💔........

يوم مشيت لي غسان وطارق لحقنا كان حيقتلنا الاتنين لو ما جات الشرطه في نفس الوقت، ركبونا في عربيه وركبو غسان في عربية براهو انا كنت بكورك وبقول ليهم ودوني ليهو لحدي ما وصلنا القسم وهناك اتفاجأت بي بتاع الترحال معاهو محجوب.. لو ما هو كان قاعد اللحظه ديك وشاف محجوب طالع من المخزن كنا انا وطارق اللحظه دي في السجن وحاكمين علينا.. المهم محجوب قبضوهو ومنها طوالي مشيت المستشفى الرقدو فيها غسان ولا استنيت طارق يطلع حالتو كانت صعبه شديد كسور في جسمو كلو واصبعو الكبير مقطوع ودخل في غيبوبه كم يوم..

في نفس اليوم عرفت انو طلال قبضوه بتهمة قتل لمن عرفت انو رامي بقيت بضحك.. دخلت في حالة بتاعت صدمه وما وعيت الا تاني يوم.. لحدي ما طلال طلع وغسان حالتو استقرت شويه انا كنت عايشه حياه بدون روح ما عارفه انا وين وبعمل في شنو، لو ما خنساء وخالتي صفيه انا كنت جنيت رسمي وشعبي هم الكانو بسوقوني مره المستشفى مره لي طلال... بعد طلال طلع وقبضو مجتبى حتى دفنو رامي، طلال دا يومتها بكى زي الشافع والحمدلله انو بكى لأنو لو دخل في حالة صدمه تاني ما كان بقى كويس مع انو هسي كمان مخلوع لكن اخف قدر...
بعد ما رقنا من البكا شويه رجعت البيت وحصل النقاش دا بيني انا وابوي وطارق، في اليوم دا كان حيخرجوا غسان مشيت المستشفى لقيت في ابوهو وامو وميسم سلمت عليهم كلهم، هم طبعاً عرفوني من جياتي الفاتت وعرفو بعلاقتنا انا وغسان، وواحده من المفاجآت الجات ورا بعض انو ميسم مرت باسل طلعت اختو لي غسان.. سألتهم لو لسه مواعيد الطلوع قالو لي باسل ومرتضى قعد يعملو في الإجراءات... كان نفسي اخش ليهو لكن ما قادره ادخل براي قدامهم، ميسم شكلها انتبهت لي قالت لي تعالي معاي نلم حاجات غسان من الغرفه، الوقت دا قربت امشي احضنها.. امها قالت ليها ارتاحي انتي انا بلمهم ..ميسم قالت ليها انا من قبيل قاعده فترت من القعاد.. دخلنا سوا وعيني وقعت عليهو كان راقد وبعاين للسقف مشيت وقفت جمبو وقتها قبل علي ابتسم ومسك يدي الكانت في السرير جمبو ضغط عليها وغمض عيونو وابتسم.. رمشت كم مره عشان امنع دموعي ما تنزل فتح عيونو وقبضني بعاين ليهو قال لي ياداب كدا ممكن يخرجوني.. ضحكت ومسحت دمعتي النزلت قال لي اقعدي.. قلت ليهو لالا هسي حيجي زول داخل .. قال لي ما يجو.. قلت ليهو فكني ماشه الم حاجاتك مع ميسم.. قال لي لا.. حاولت افك يدي ما قدرت قلت ليهو غسان بطل هسي بجو داخلين عاين ميسم زاتا بتعاين لينا.. قبل عليها وقال ليها انتي هوي شوفي شغلك ما تركزي معانا.. ميسم ضحكت وهزت راسها قلت ليهو غسان ياخ فكني انا ما قعد اهظر معاك.. قال لي هسي شايفه حالتي دي حالة زول بهظر؟؟؟... الباب اتفتح قبلت بخلعه كان الدكتور قبلت عليهو عشان يفكني لكن لسه كان ماسكني الدكتور عاين لينا الاتنين انا بالاحراج دنقرت وما قدرت ارفع عيوني لحدي ما فكا منو الدرب وباقي الاجهزه وبقى بتكلم معاهو، ناس بيتهم دخلو وهو لسه قابضني خجلت خجل واتمنيت الارض تتشق وتبلعني قلت في نفسي انا الغلطانه الجيت وقفت جمبو .. باسل جا وكان شايل اوراق عاين لينا وحكا راسو حسيت بيهو حيضحك لكن ماسك نفسو قال للدكتور خلصنا الإجراءات ... الدكتور قال ليهو تمام بتقدروا تطلعو بعد دا.. باسل ومرتضى جو عشان يسندو غسان قال ليهم لالا ارجعو انا مسنود... كلهم قعدو يضحكو وانا جريت يدي بي قوة لكن ما قدرت اتفكى منو خالتو حياة قالت لي من قبيل شايفاك تجرجري في يدك ما تتعبي نفسك ساي ولدي دا راسو زي الحجر لو ما داير يفكك ما بفكك.. باسل قال ليهو امس عامل لينا فيها تعبان وداير تموت هسي القوه دي جاتك من وين ؟... غسان قال ليهو ما بخصك... ميسم قالت ليهو هوي مالك مع راجلي... قال ليها راجلك امسكيهو عليك ما تخليه يدخل في خصوصيات غيرو... قعدو يضحكو وانا زاتي ضحكت معاهم.. بعجبني جوهم كيف، في الايام الفاتت مع انو كنت بنفسن لمن اشوف حالة غسان لكن لمن اقعد معاهم بحسهم كأنهم اسرتي كان بعاملوني كأني منهم.. لمن طلعنا ميسم ركبت مع باسل وغسان كان حيركب معاهم.. وخالتو حياة وعمو عبدالرحيم مع مرتضى.. ركبو كلهم وانا وغسان كنا واقفين بي برا قلت ليهو لمن تصل اضرب لي.. فتح الباب وقال لي اركبي.. قلت ليهو ما بقدر امشي معاكم، الوضع في البيت لسه مكركب.. سكت شويه بعدين قال لي عارفه اول شي حاعملو بعد استرد تمام عافيتي شنو؟ قلت ليهو شنو؟؟.. قال لي حاجي اعقد طوالي ما داير خطوبه ولا كلام فارغ بعقد وبسوقك معاي.. سكت ونزلت راسي.. قال لي سامعه؟ من هسي كلمتك عشان ما تتفاجئ لي بعدين.. قلت ليهو طيب يلا.. قال لي يلا وين اركبي نوصلك.. قلت ليهو لالا بمشي براي.. قال لي ما تخليني اتجنن واشيلك ادخلك قدام الناس دي كلها.. باسل طلع راسو بالشباك وقال لينا شنو يا اخوانا عندنا زولة حامل هنا وقاعده من صباح الرحمن.. غسان قال لي سامعه؟ ... ركبت معاهم وغيرو لي مزاجي بونستهم لحدي ما وصلوني كنا بنتونس..... بالمناسبه ميسم حامل في التالت وانا طفلي اجهضتو يوم حصلت الحادثه..
وصلت البيت لقيت ابوي وطارق قاعدين.. عملت ليهم الفطور ودخلت جوا رقدت وانا بفكر في كلام غسان، ياربي لو جا ناس ابوي حيوافقو؟.. جاتني خنساء قالت لي غسان كيف؟ قلت ليها كويس الحمدلله.. قالت لي الحمدلله، انا حابدا اتحبس بكرا.. قلت ليها جد؟ كويس طيب.. قالت لي ان شاء نتحبس سوا.. وغمزت لي.. قلت ليها الخلاك تقولي كدا شنو.. قالت لي دعيت ليك قولي امين... طلال رجع العصر قلت ليهو ناس خالتو رباب كيف؟ قال لي الحمدلله.. ودخل مشيت وراهو كان بطلع في غيارو قعدت في السرير وقلت ليهو طيب وانت كيف..

قال لي الحمدلله يا ميسم.. قفل الدولاب وكان طالع انتبهت لي جرحة في رقبتو قلت ليهو دا شنو؟.. قبل علي وقال لي شنو ؟.. قمت وهبشتها كانت زي الزول الضربو بي سكين قلت ليهو الجرحك كدا شنو.. هبش رقبتو وقال لي ااا اتضربت بالغلط.. مسكتو قبل يمشي وقلت ليهو بتدس مني انا يا طلال؟.. عاين لي بنظرة عتاب وقال لي انا عمري ما دسيت منك شي، لكن انتي البتدسي يا ميسم... قال كدا وطلع فهمتو قاصد شنو، استنيتو لحدي ما طلع من الحمام وقلت ليهو تعال اقعد عايزه اتكلم معاك.. جا قعد قلت ليهو اول شي انا اسفه.. قال لي ما زعلان منك.. قلت ليهو زعلاان.. قال لي كنت زعلان لكن هسي لا، ما بقدر ازعل منك يا ميسم... ابتسمت وانا بعاين ليهو قام وقال لي راجع تاني بيت ناس رامي.. قلت ليهو استنى عايزه اقول ليك حاجه.. قعد وقال لي خير ان شاء الله.. نزلت راسي وبقيت بلعب بي طرف الطرحه قال لي في شنو؟.. قلت ليهو غسان حيجي يتقدم لي.. سكت مسافه بعدين قال لي استخيري وربنا يكتب الفيهو الخير.. قلت ليهو ان شاء الله... قال لي مش مره باسل كان قال ليكم بطلع في برنامج ويحكي الحصل ولا حاجه بالشكل دا؟.. قلت ليهو اي.. قال لي يعني بعرف ناس شغالين هناك؟.. قلت ليهو ما متأكدة والله لكن شكلو كدا .... سألني لو معاي رقمو .. قلت ليهو لالا لكن ابوي عندو.. قال لي كويس.... استغربت من كلام لكن ما سألتو ..
بعد يومين غسان كان بتكلم معاي قال لي انا جاي يوم الجمعه، قلت ليهو الجمعه الجايه دي؟.. قال لي اي اديني رقم ابوك... مليتو ليهو وبعد اتونسنا شويه قفلنا.. مشيت لي خنساء لقيتها تتناقر مع خالتي صفيه كالعاده في موضوع الدخان🤣 خالتي صفيه قالت ليها يا بت ما تخليني اتكلم كتير.. خنساء قالت ليها امي انا ما تميت ساعه من قمت عليك الله خليني اشم هوا شويه.. خالتي صفيه قالت لي عليك الله عايني البت دي بتسوي في شنو.. خنساء قالت نص ساعه بس يا امي، تعالي يا ميسم.. مشيت معاها الغرفه سألتني من غسان قلت ليها كويس بقى احسن.. قالت لي الحمدلله ومحجوب اخبارو شنو.. قلت ليها ما عايزه اعرف عنو اي شي.. قالت اي ان شاء الله يموت ويتعفن في السجن داك وماف زول يجيب خبرو.. قلت ليها آمين يارب دي زاتا شويه فيهو..
____ _____

احلام: ميسم شوفي لي الفرن دا بعد شويه انا ماشه استحمى
امال:فرن شنو التشوفو ليك تمي حاجتك بعد داك استحمي ميسم ما بتقوم من مكانها
ميسم: مالو يا خالتي ما تخليها تستحمى
امال: لالالا انتي من الصباح داخله ومارقه ياداب قعدتي الحركه الكتيره اول شهور دي ما كويسه يا بتي
احلام ضحكت وقالت: غايتو يا ميسم الله يعينك لحدي ما تلدي امي ما حتسكت
ميسم: مش كدا
باسل جا خاشي: السلااام عليكم
كلهم ردو ليهو السلام قعد جمب ميسم وختا يدو وراها في الكرسي
امال: مالك الليله اتأخرت
باسل: كان عندي شغله كدا تميتها
ميسم: شغلة شنو
باسل: طلال اخو ميسم الصحبو انطعن داك
امال: اها
باسل: اتصل لي وقال اظبط ليهو موضوع طلعه في برنامج وكدا
ميسم: لشنو
باسل: استنو لحدي ما يطلع في البرنامج واحضروه
امال: دا الولد الاعرج داك مش
باسل: اي
امال:مرة في المستشفى جا مع اختو والله من شفتو قلبي رادو الجنا دا
ميسم: نفس الشي والله برتاح نفسيا لمن اشوفو، جا مع ميسم كم مرة
امال: انتي دقيقه مادام الموضوع دا اتفتح انسألك
باسل لكزها براحه بي ورا
امال: البت دي كان دايرين بعض هي واخوك ولا قصتهم شنو
ميسم: ااي لي هسي غسان دايرها
امال: عاد وقفت معاكم لكن هي زاتا شكلها مسكينه ورايقه
ميسم: اي طيبه شديد وعلى نياتها

____ ___

طلال لمن وراني بموضوع البرنامج فرحت وشجعتو قال لي لسه ما كلمت ابوي.. قلت ليهو نكلمو سوا لو داير.. قال لي كويس.... فعلاً لمن جا وريناهو وقال ما عندو مشكله، قال لي طلال عشان كدا امس قلت داير تتكلم مع باسل يعني؟.. طلال قال ليهو اي..... باسل اتصل ليهو يوم الاربعاء وقال ليهو حددو ليك مواعيدك حتكون بكرا بجي بعد المغرب اسوقك.. طلال قال ليهو تمام.. باسل قال ليهو الورقة بتاعت الاسئلة بصورها وارسلها ليك عشان تجهز اجوبتك.. طلال اداهو رقمي لأنو ابوي شايل تلفون صغير ما عندو واتس بعد رسلها بقينا نتناقش فيهم ونشوف افضل جواب ممكن يقولو.......
يوم الخميس الساعه ٨ كنا انا وابوي جمب التلفزيون ومستنين البرنامج يبدا فجأة تلفون ابوي ضرب رد وقام من جمبي، لمن البرنامج بدا عليت الصوت وقربت اكتر المذيعه بعد سلمت وقالت مقدمة البرنامج...

المذيعه: اليوم معانا طلال عثمان الشيخ طالب في تانيه ثانوي واستصفناه اليوم معانا لأنو لفت نظرنا لموضوع مهم جدا واغلبنا بتغافل عنو (قبلت عليهو) اتفضل يا طلال كلمنا عن الحمله بتاعتك

طلال: السلام عليكم ورحمة الله والصلاة والسلام على رسول الله.. انا اليوم جاي اتكلم عن الحمله بتاعتنا انا وزملائي في الصف حملة كلنا واحد.. اغلب الطلاب السودانيين بعانو من مشكلة التفرقة في التعامل داخل المدرسه سواء كان من ناحية اكاديميه او غيرو، الاستاذ لمن يفرق بين الطالب المستواهو فوق الممتاز والطالب المستواهو شويه ضعيف وبين ابناء الاستاذة و باقي الطلاب دا بولد جواهم حقد وغيره بتخليهم يكرهو الشاطر وولد الاستاذ بسبب الحاجه دي، أحياناً بكون الطالب دا ما عندو ذنب وببدا يسأل نفسو ليه زملائي كلهم بكرهوني وينفرو مني؟ .. واحيانا بكون شايف الاساتذة دائما واقفين معاهو ف بشوف نفسو على باقي الفصل ويعمل الدايرو والفي راسو لأنو ماف زول بقدر يسألو.. ودا برضو بولد عداوات بين الطلاب.. يمكن انتو تشوفو دا موضوع عادي وما بستاهل اطلع واتكلم فيهو في برنامج لكن انا بسببو فقدت صحبي وبسببو واحد بقرا معانا حالياً في السجن بتهمة قتل زميلو، دمر حياتو ومستقبلو عشان حكاية الظلم دي وحاليا داخل في حالة صدمه وحيفضل عمرو كلو عايش بتنأيب الضمير... ومن هنا انا بناشد وزارة التربيه والتعليم وكل العاملين عليها انو يقيفو معاي في حملتي دي ويلفو على كل المدارس عشان يسمعو مشاكل الطلاب المن الناحيه دي ويعالجوها
المذيعه: رينا يرحمو ويغفر ليهو ويصبر اهلو يارب
طلال: اللهم امين

ابوي جا خاشي عاين لي وقعد حضر معاي باقي البرنامج بعد انتهو قلت ليهو ان شاء الله حملتو تنجح وتكبر.. قال لي آمين، غسان ضرب لي هسي... حسيت زي الضربتني كهرباء نسيت عديل الموضوع دا بقيت ساكته ومنزلة راسي.. قال لي استخرتي؟.. هزيت راسي يعني اي... ما قال حاجه تاني
تاني يوم كلمت خالتي صفيه فرحت وقالت لي هسي عمك عبدالله كلمني، ابوك قبل يمشي الشغل جا كلمو هسي سوقي معاك اسراء وميساء ينظفو معاك انا شويه كدا وبجي... فعلاً مشو معاي نظفنا وخالتي صفيه جات ساعدتنا بعد داك ابوي جا جاب لينا حاجات خالتي صفيه وصتو عليها قبل يطلع...
بعد المغرب كنت قاعده في الغرفة جات خنساء اشرت لي بي ابهامها يعني كلو تمام قلت ليها فرشتو؟.. قعدت جمبي وقالت لي اي، ضربو لي عمو عثمان قالو ليهو في الطريق ... قلت ليها طارق ما جا لسه؟.. قالت لي ما جا.. اتنهدت بضيق ابوي قال لي كلمو لكن ما قال حاجه.... لمن جو انا وخالتي كنا في المطبخ بنجهز حاجات الشاي والقهوة واسراء وميساء بمدوهم لي ابوي وطلال.. كنت متوتره وكل شويه بعاين بشباك المطبخ لكن ما شايفه حاجه خالتي صفيه قالت لي تعالي نقعد في العريشة مادام انتهينا....
طلال جا خاشي قال لي ابوي قال ليك تعالي سلمي.. كنت اصلا لابسه العبايه صلحت الطرحه وطلعت وانا جسمي برجف عديل كان في ٤ انفار معاهو الباقين ما عرفتهم ولا عاينت ليهو كويس اصلا.. وطارق كان قاعد ما عارفاه جا متين، بعد ابوي قال ليهم دي بتي ميسم دخلت جوا قعدت في السرير وقلت لي ميساء الحقيني بي مويه.. شربت الكوز كلو خالتي صفيه ضحكت وقالت لي دا كلو خوف؟.. بعد مشو ابوي جا، خالتي صفيه استأذنت ومشت هي وبناتها... ابوي قعد جمبي وقال لي نحن الناس ديل بنعرفهم وسألنا منهم قبل كدا لمن جو اتقدمو لي خنساء عشان كدا اديناهم الرد طوالي.. رفعت راسي وقلبي كان بضرب شديد قال لي وافقنا وقالو حيعملو العرسين سوا يعني نفس يوم عرس خنساء.... ما كنت مصدقه السامعاهو يعني ابوي وافق؟!!!!! دموعي جات جاريه وما نطقت بكلمه، قام وكان طالع قمت على حيلي وقلت ليهو ابوي.. قبل علي مسحت دموعي وقلت ليهو شكراً.. ابتسم لي ومشا ..
حملة طارق كبرت شديد وبقت تريند في مواقع التواصل اتواصلو معاهو ناس الوزارة ووافقو على اقتراحو، كان مره مره بمشي معاهم للمدارس وبجي بحكي لي ما كنت قايله انو المدارس دي كلها بتعاني من المشكله دي...... اتحبست طوالي وخالتي صفيه يا حليلها كانت تعبانه بين بيتنا وبيتهم اما خنساء كانت اكتر واحده مبسوطه قالت لي انا وانتي في بيت واحد؟ خلاص تاني ما متمنيه حاجه..
__ __

سمعنا صوت ضرب النار خنساء قبلت علي وعيونها مليانه دموع حضنتني وقالت لي عقدو، مبروك لينا... كنت حاسه اني بحلم قلت ليها خنساء اقرصيني.. قرصتني قرصة حاره قلت آي ما للدرجه دي.. ضحكنا وتاني حضنا بعض.. الباب دقا فكتني ومسحت دموعها، كنا اصلا لابسين عباياتنا صلحنا الطرح وقلنا اتفضل.. طارق جا خاشي اتفاجأت، افتكرتو حيكون مرتضى وكنت حاطلع... قال لي خنساء الف مبروك ربنا يسعدك.. قالت ليهو الله يبارك فيك يا طارق وعقبال ليك.. بعد داك استأذنت وطلعت، جا خاشي ووقف قدامي كان بعاين بنظرات اول مره اشوفها فيهو حسيت انو البعاين لي دا ما طارق ، عيونو رغرغروا وفجأة ضماني.. اتجمدت مكاني وما قدرت اتكلم، عرفتو ببكي لمن حسيت بجسمو بهتز بادلتو الحضن وبقيت ببكي معاهو..

ختا راسو في كتفي زي الطفل وقال انا ما عارف اقول شنو ولا قادر انقي كلام يعوض كل الالم والمعاناه السببتها ليك، انا كاره نفسي شديد يا ميسم ومتمني اني ما اتولدت في الدنيا، انا عالة على المجتمع دا لأني ما عرفت اكون ولد ولا اخو ولا صاحب.. فكاني ونزل راسو وهو مغطيهو بعد شويه مسحو بي يدينو الاتنين قال لي ما عارف لو حتسامحيني ولا لا لكن انا بعتذر، بعتذر على كل دمعه نزلت منك بي سببي وكل كلمه طلعت مني وجرحتك بيها وفي كل مره عليت صوتي عليك فيها انا آسف آسف جدا وبتمنى تقبلي اعتذاري.. قشيت دموعي وابتسمت قلت ليهو انا مسامحاك بدون ما تعتذر لي.. قال لي مسامحاني؟.. قلت ليهو اي، ومن يوم الليله امنتك على طلال اخوي.. قال لي ما بتوصيني، طلال اخوي انا برضو... بعد طلع كنت لسه بعاين ليهو لحدي ما اختفى، لو انا فرحانه الليله ففرحانه عشان طارق اكتر من فرحتي بزواجي من غسان... طلال جا بارك لينا ووراهو ابوي ضماني لأول مرة من وفاة امي، اعتذر مني برضو ومشا.... بعديها مشينا الكوفير، كنا عاملين حفلة في صاله لحدي المساء غسان ما اتصل لي.. جو ساقونا وكان بعاين لي بس بدون ما يتكلم..

دخلنا الشقه واول شي ناداني قال لي ميسم تعالي.. وقفت قصادو باس راسي وساقني لحدي ما قعدنا في كرسي الجلوس الكبير الفي الصاله مسكني من يديني وكان بعاين لي جوا عيوني قال لي ربنا اخد حقنا... كشرت حواجبي باستغراب قال لي محجوب مات الليله اتقتل بطريقه بشعه شديد وكفين ما قدرو يكفنو... قلت ليهو الله يرحمو ويغفر ليهو.. قال لي انا داير ادعي عليهو وانتي بتدعي ليهو؟... قلت ليهو انا عفيت ليهو حقي لوجه الله ما دايره انوم في يوم وانا شايله في قلبي من زول الدنيا ما بتستاهل ... قال لي ياخ انتي شنو؟؟ كيف قادرة تكوني كدا وريني.. سكت ساي، كان ليه بعاين لي قال لي عارفه انا داير شنو تاني من الدنيا دي؟.. قلت ليهو شنو.. قال لي ربنا يقدرني واعوضك عن كل السنين الفاتت، يقدرني ابسطك كل يوم اكتر من القبلو وما يجي علي يوم واشوف فيهو دمعتك، ميسم انتي الشفتيهو ما هين ولا اي بت غيرك كانت بتقدر تستحملو، عشان كدا انا شايفك بت قويه وبي مية راجل، بوعدك ما اخليك تندمي في يوم انك اخترتي تكوني معاي حاكون ليك الزوج والصاحب والاخو والابو باختصار حاكون ليك السند والملجأ التلجأي ليهو في حلوك ومرك، بوعدك انو مافي شي تاني في الكون حيقدر يفرقنا.. دايرك تنسي كل الشفتيه وتبدي معاي حياه جديده كلها حب وامان وسكينه.... حسيتو بقول لي الكلام الكنت عايزه اسمعو بس ابتسمت ونزلت راسي قال لي مجهز ليك مفاجأه بعد نرجع.. قلت ليهو شنو؟.. قال لي ما بوريك.. قلت ليهو عليك الله وريني.. قال لي بتخص طلال، ما بقول ليك اكتر من كدا، يلا يا مرتي شوفي لينا حاجه نتعشى بيها لأني من امس ما اكلت حاجه.. قلت ليهو انا عروس ما بشتغل.. قال لي الله الله بدينا من هسي؟.. ضحكنا وضماني وهو بقول:بعملو انا، مع انو مشتهي لاكل من يدك الطاعم لكن يلا امري لله... قمت وقلت ليهو بتعرف تحنك، خلاص قايمه.. ضحك وقال لي خلاص عرفت ليك..
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《26》*
*#☆الاخــــــــــــــــــــــــــــــــــــــــيرة☆*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
خنساء: دا شنو دا يا مرتضى كم مره قلت ليك ما تخلي لي المطبخ بالحاله دي؟؟ يعني امشي اخد مع ناس امي يومين واجي القى الدنيا مقلوبه فوق تحت؟؟ خلاص قلت ليك اعمل الدايرو في باقي البيت لكن المطبخ لا يا مرتضى المطبخ لاااا
كانت بتلملم في العده الوسخانه المجدعه في المطبخ بعشوائية وهي بتعاتب فيهو.. اما هو متكل على الباب ومربع يدو.. جا خاشي وكانت بدت تغسل فيهم، ضماها من ورا وباسها في خدها
خنساء: ما تغشني وتسايسني بحركاتك دي
مرتضى وهو راقد في كتفها وبعاين ليها: الواحده بتجي داخله البيت تقول لي راجلها ازيك حبيبي اشتقت ليك.. لكن العندي دي بس هرجي هرجي هرجي
خنساء: ما انت لو ما بتستاهل الهرج ما كان سألتك هسي عليك الله غالبك تغسل الكم كبايه وكم صحن ديل؟؟ياخ خلي الغسيل ختهم لي في المغسله بس انا براي بجي اغسلهم، لكن خلاص وقت اصلا ما قادر تلملم وراك انا تاني ما بطبخ ليك قبل امشي، بفضي التلاجه دي واخليك تاكل من برا بس
مرتضى: هو بعد اتعودت على طبخك تاني بقدر اكل حاجه من يد زول تاني؟؟
خنساء: فالح بس في الزي دا
نشفت يدها وطلعت من المطبخ على غرفتهم، جا لاحقها وهو بقول ليها
مرتضى: خلاص اسف اخر مره
قلعت العبايه وعلقتها في الشماعه: اخر مره دي اتقالت كم مره؟؟
مرتضى مطا شفايفو وهو بحرك راسو ويدو : يعني ٦ ٧ مرات كدا
اتقدم عليها ومسك ذراعها وهو بتفحصو: نقشك حلو
خنساء: همم وبغسيل العده راح
فتحت الدولاب وبدت تطلع ملابسها
خنساء: امك اتصلت وقالت السمايه بكرا
مرتضى: والله؟
خنساء: اي، جيب لي الشنطه ديك ادخل الملابس دي
مرتضى: ماشه متين
خنساء: بمشي العصر، انت حتجي بكرا مش ؟
مرتضى: والله ما عارف، عندي محاضره الساعه ١١
خنساء: تعال افطر بدري واطلع، عارف خالتو حياة انت، لو ما جيت ما بترحمنا الاتنين
مرتضى: انتي مش نازله بكرا؟
خنساء: اي لكن ما حيدونا محاضرات من اول يوم، بنزل الاسبوع الجاي
__ ____

غيم: اوووف يا مروة اووف زهجت منك انا
مروة: مالك يا بت سألتك انا؟ انتي الجايه تتلصقي
غيم: يا بت الناس لمتين حاعيد واكرر ليك؟ طارق اتغير يا بت امي طارق اتغير طارق اتغير طا...
مروة بنفاذ صبر: خلااااص فهمت الله هداهو وان شاء الله يثبتو انا مالي
غيم ختت يدها في نصها وحمرت للراقده في السرير وماسكه كتاب بتحاول جاهده تركز فيهو : انتي مالك؟ اصبري اوريك انتي مالك
نطت بي فوقها وبقت تمعطها من شعرها ومروه بتقاوم وتكورك
مروه: يا سجم فكيني امييييي امي الحقيني ااااي شعري
حياة جات جاريه وغيم اول ما سمعت خطواتها فكت مروه
حياة: في شنو يا بنات جنيتن؟؟
غيم وهي بتصلح شعرها: مافي شي يا خالتي مافي شي
مروه وهي بتقوم: مافي شي شنو عايني غيم دي معطت لي شعري كيف
حياة رفعت يدينها: يا الله تصبرني على البلوتين يااا رب ، يعني مخلياتني اجري من تحت عشان عوارتكم دي؟ والله تاني اسمع حسكم انادي ليكم غسان اصلو ماف زول غيرو بقدر عليكم

غيم: خلاص يا امي بنتأدب والله
مروه: اوعى يا خالتو امس كمان عشان ضحكنا بصوت عالي ناديتيه لينا
حياة: يا كلبات يا معفنات
طلعت بعد حدرت ليهم
غيم: كنا واقفين وين
مروه شالت كتابها وقالت وهي بتطلع بخطوات سريعه: ما كنا واقفين في اي حته اختيني يا بت الناس اختيينييي
غيم وهي بتجري وراها: ما بختاك ابيت يا زوله
مروه: اللهم طوووووولك يا روح

في واحده من غرف البيت الارضيه
قالت وهي بتصلح ولدها عشان ترضعو: ما عارفه يا باسل كلم امي وخالتي امال هم بعرفو للحاجات دي
باسل وهو بقلب في الورقه: ياخ انا حاسي الحاجات دي بسيطه شوفي كاتبين رطلين شاي بس؟ وانا عازم امة لا اله الا الله كلها
ميسم: انت زاتك البخليك تعزم ناس قدر دا شنو، كان ما سمايه.. خلاص كلمهم قول ليهم الناس حيكونوا كتار
باسل وهو بمشي يدو على راس الطفله: كويس.. ولدي البطل اصبح كيف الليله
ميسم: حمودي امس عمل لينا غلبه شديده الليل كلو ما نام
باسل: مالو؟
ميسم: يبكي بس
باسل: نوديه للدكتور تاني؟
ميسم: لالا هو اتحسن شديد في الاسبوع دا لكن امس ما عارفه مالو
باسل: لو عمل ليكم كدا الليله بكرا نوديه
ميسم: ان شاء الله، ناس خالتي امال جايين متين؟
باسل: الصباح لمن طلعت كانو ياداب صحو قالو لي استنانا نجهز قلت ليهم بجي اسوقكم بعدين
ميسم: ايواا، فرودس طبعاً للان ما جاتني؟
باسل: مالا؟
ميسم: ما بعرفها اصلا من امك اتغيرت معاي هي قلبت مع انها زمان كانت بتقول لي استحمليها وحيجي يوم وتتغير
باسل: يمكن ما فاضيه
ميسم رفعت حواجبها بعدم اقتناع: اه ما علينا جات اهلا وسهلا ما جات هي حره
باسل: خلاص انا بمشي اجيب ناس امي وبعدين بكلمهم ونشوف حنذيد شنو
ميسم: طيب

طلع برا لقى غسان بشرب القهوة وبحضر في الاخبار
غسان: وين انت يا زول قهوتك بردت
باسل: انا شربت في البيت
غسان: يا زول قهوة امي دي بتفوتها؟
باسل: والله ما بقدر افوتها
قعد وضحكو الاتنين
باسل: امك دي ما تعلم لينا حريمنا ديل قهوتها دي
غسان: ميسم اختي كان سمعتك بتندمك اليوم القلت فيهو كدا، انا مرتي متصالحه مع نفسها بتقبل الكلام دا عادي
باسل: هي زاتا عارفه وريتها قبل كدا وزعلت مني يومين ما اتكلمت معاي
غسان: عشان كدا قلت ليك اسكت قبل تجي
باسل: ما انا عارفها ما حتجي عشان كدا بتكلم على راحتي
غسان فكا ضحكه عاليه وبادلو بيها باسل
حياة: بتضاحكو في شنو ضحكونا معاكم
غسان: دي مواضيع رجال يا حجه
حياة وهي بتقعد: مشششم، انت ماشي تجيب مرتك متين؟ وانت التاني امك مالا ما جات معاك
غسان: طالع هسي اجيبها
باسل: انا زاتي ماشي عليهم
حياة: عليك الله جيبو معاكم طلال والله اشتقت ليهو شوق ليهو زمن ما جانا
غسان: اي لو قاعد بجيبو، الايامات دي عندهم حصص اضافيه يوم السبت
حياة: ايواا (قبلت على باسل) قول لي امك تجيب معاها البخور حق ميسم الغبيانه دي نستو
باسل: كويس، اي اوامر تانيه يا خاله؟
حياة: سلامتكم بس يا اولادي
باسل قام وغسان قام وراهو طلعو واي واحد اتوجه على طريقو
_ ___

بعد خلصت طبيخي وشغلي في المطبخ رقدت في العريشة وانا حاسه بتعب شديد، الجو كان مغيم بي برا وفي نسمة هوا سمحه وابوي راقد في ضل الحوش جمب الغرفه، لمن شافني جا قال لي انتهيتي؟ قلت ليهو اي خلصت عملت ليكم باميه مفروكه وفاصوليا ورجلة وسلطة اسود.. الباميه اعملوها بكرا في الفطور كلمت خالتي صفيه ترفع ليكم القراصه.. قال لي يديك العافيه يا بتي لكن انا قلت ليك ما تتعبي نفسك قدر دا اعملي لينا حله واحده بنمشي بيها روحنا طارق زاتو بقى بطبخ لينا.. قلت ليهو دا كلام شنو يا ابوي بسم الله، اها انت ما ماشي معانا؟... قال لي والله ما بقدر.. قلت ليهو ليه لكن؟تعبان ولا حاسي بحاجه؟.. قال لي لالا الحمدلله ما فيني شي.. اللحظه دي الباب ضرب كان داير يقوم قلت ليهو دا بكون غسان خليك انا بفتحو.. فتحتو وفعلاً كان هو دخل وقفل الباب وبقى بتاوق بي وراي، حفظت حركتو دي وكنت ماشه بسرعه قبضني من ذراعي وجراني عليهو، ضماني وقال لي بصوت واطي: ماشه وين قايله روحك حتنفدي مني اصبري لي نتحاسب في البيت.. ضماني اكتر وقال لي هسي شوقي ليك ما حيخليني اعمل شي غير افضل ضاميك كدا لحدي ما ابوك يناديك ويقول ليك منو في الباب يا بت... ضحكت وقلت ليهو بقيت حافظ يعني.. فكاني لمن سمعنا صوت ابوي بقول منو في الباب؟... ضحكنا ضحك بعد داك لفا يدو حولين كتفي ودخلنا سلم على ابوي في راسو وقعد قال ليهو كيف يا حاج عثمان ان شاء الله طيب.. ابوي قال ليهو الحمدلله في نعمه نحمدو ونشكرو انت كيفك واهلك كلهم .. غسان قال ليهو بخيير والله الحمدلله، الليله قلت اجي القاك جنب دكان الطيب.. كان بتكلم بصوت عالي لأنو ابوي ليهو فترة بقى ما بسمع كويس، ووقف الشغل بسبب ظهرو... ابوي قال ليهو والله طولت ما مشيت قعدت معاهو.. غسان قال ليهو القعاد الكتير ما كويس معاك اتحرك امشي اخد ليك قعده معاهو امشي الزلط امشي لي حاج مصطفى، تفرق شويه زاتو.. ابوي قال ليهو مشينا زمان لمن كرعينا فترو بعد دا خلاص نرتاح..

غسان قال ليهو لالا ياخ انت لسه شباب شوف هسي انا شيبت قبلك.. ضحكو وابوي قال ليهو انا عشان صلعه شيبي ما ظاهر انت زاتك احلق زيي عشان ما تطير البنات يشوفن الشيب ويقولو عجوز.. غسان ضحك بصوت عالي وقال ليهو البنات اخير ليهم يشوفو الشيب لكن ما يشوفوا الصلعه.. جيت طالعه من المطبخ وانا شايله صينية القهوة قلت ليهو هي يا ابوي داير تخلي البنات يعاينو لي راجل بتك؟... ابوي قعد يضحك غسان قال لي دا شنو الفطور وين؟.. قلت ليهو يوم متين بتفطر الساعه ٩؟.. ابوي قال لي شيلي شيلي الجبنه دي سوي لينا الفطور.. غسان قال مادام جبتيها خلاص بشربها .. ختيتها ليهو وعملت الفطور كنت عامله ملاح ويكه وشعيريه سويت القراصه وقطعت السلطه وختيتو.. قاعدين بنفطر الباب فتح جا طارق لمن شاف غسان سلم وكان طالع قلنا ليهو تعال افطر قال فطرت.. بعد طلع عاينت لي غسان... علاقتهم ما كانت كويسه مع بعض، لقيتو بتونس عادي عكس المرات الفاتت البشوفو فيها ومزاجو بتقلب....
بعد شربنا الشاي غسان قال لي طلال ما بجي هسي؟.. قلت ليهو مفروض يجي بعد دا ، قبل يرد علي الباب دقا غسان قام فتحو وجو وهو طلال خاشين قلت ليهو هسي كنا في سيرتك❤️...
بالمناسبه، بعد زواجنا انا وغسان سافرنا الامارات وكان معانا طلال.. مفاجأة غسان كان مفروض انو طلال وطارق يسافرو هناك يشوفو دكتور لي طلال ولو في طريقه يرجع يمشي عادي، وفي الفترة دي نحن نكون رجعنا من شهر العسل وانا اكون ما عارفه حاجه.. لكن طارق رفض قال ما بقدر يخلي ابوي براهو وقال لي غسان امشو انتو وسوقوه معاكم.. فسافرنا وقابلنا كم دكتور لكن قالو لينا مافي امل من علاجو.. انا اتأثرت شديد وكنت كل ما نرجع من دكتور ببكي وغسان وطلال يصبروني كأني انا المريضة.. لحدي ما في يوم طلال قعدنا وقال لينا انا مقدر مجهودكم معاي لكن انا ما داير امشي لي دكتور تاني وصراحة موضوع السفر والدكاترة دا ما كان داخل راسي، ما عشان عارف انو مافي امل لكن انا راضي بالابتلاء الابتلاني بيهو ربنا وما راضي وبس بالعكس مبسوط بيهو جدا لأنو ربنا حيأجرني عليهو بعدين وانا داير اجر الآخرة، انا متيقن وواثق انو ابتلائي دا لي خير يعلمو ربنا يمكن لو قدرت امشي استخدم كرعيني ديل في شي حرام والعياذ بالله عشان كدا ربنا حارمني من النعمه دي وانا الحمدلله راضي بقضاء وقدرو، ربنا يجزيك كل خير يا غسان على وقفتك العمري ما حنساها معاي، انا مبسوط لأنو ميسم بقت مع واحد زيك وهي زاتا زوله ما هينه وما اي راجل بستاهلها، لكن انت بتستاهلها❤️... بعد كلام طلال دا ما كان عندي مجال تاني للزعل، اخوي كل مره ببهرني بي عقلو الكبير وفهمو الفايتنا بمراحل...
ابوي قال ليهو مالك اتأخرت الليله؟.. طلال قال ليهو مشيت على ناس عمي مصطفى " ابو رامي" .. ابوي قال ليهو لقيتهم كيف طولت منهم انا.. طلال قال ليهو كويسين سألو منك و سلمو عليك.. ابوي قال ليهم تسأل منهم العافيه بمشي عليهم بعدين.. غسان قال ليهو بعدين متين نحن سايقنك معانا يا عمي ؟.. ابوي قال ليهو لالا والله.. غسان قال ليهو كيف الكلام دا والله ابوي يرجعنا كلنا كام ما مشيت معانا، امس الليل كلو يذكرني ما تخلو عثمان وتجو ما تخلو عثمان وتجو.. قلت ليهو كلمتو قبيل لكن ابى.. ابوي قال ليهو والله اتصل لي امس قلت ليهو لو لقيت طريقه بجي.. غسان قال ليهو هسي المانعك شنو؟ انت يا عمي والله بقيت زول كسلان شديد قوم قوم سايقنك معانا.. عاين لي طلال وقال ليهو انت زاتك ماشي.. طلال قال ليهو انا؟.. غسان قال ليهو اي امي وصتني عليك.. ضحكت وقلت ليهو انا ماف زول دايرني؟.. قال لي انتي امي حالفه ليك اول امس لمن رجعت وقلت ليها قالت بتقعد يومين تاني قومت الدنيا.. قلت ليهو سجمي يعني اشيل شيلتي.. قال لي بالظبط.. طلال قال ليهو والمدرسه؟.. غسان قال ليهو يوم بكرا بس يوم واحد ما بعمل بعمل حاجه
غسان قعد يحنس ابوي لحدي ما وافق، لمن دخلت الغرفه عشان البس جاني قال لي دخلي ليهم غيارات ما برجعهم الليله.. قلت ليهو ابوي ولا بقعد ليك.. قال لي لالا بقعد دخلي بس.. قلت ليهو ومدرسة طلال؟.. قال لي شيلي ليهو ملابس المدرسه بوصلو انا..
شلت ليهم غياراتهم وطلعنا الطريق كلو ابوي وغسان يتونسوا بنبسط شديد لمن اشوفهم سوا تحسهم كأنهم ولد وابوهو.. لمن وصلنا خالتي حياة استلمتني محاضرة طويله عريضه وانبسطو بسطه لمن شافو طلال وابوي جو معاي عمي عبدالرحيم قال لي ابوي كويس سمعت الكلام وجيت.. غسان قال ليهو جبناهو بالقوه..
دخلت لي ميسم لقيتها ماف وحمودي كان نايم جات خاشه وراي شكلها كانت بتستحمى.. قالت لي هي جيتو.. سلمت عليها قالت لي مشتاقين والله شنو الغيبه دي.. قلت ليها تقولي شنو شغل البيت الغسيل المكوه الطبيخ ما قدرت اخلصو في يومين بس.. قالت لي الله يعينك والله ما تقولي لي ما جبتو طلال بس.. قلت ليها لالا جا ابوي زاتو جا معانا.. قالت لي كويس والله غريييبه الاقنعو منو.. قلت ليها غسان وقف ليهو في حلقو لحدي ما اقتنع... قالت لي البركه فيهو🤣..

خنساء نسابة ميسم جو بالعصر تاني بقينا مع تجهيزات السمايه وباسل وغسان مشو تاني جابو ذيادة حاجات.. كانو ضابحين تور وخروفين وما شاء الله الناس كانو كتار شديد عرس بس.. لحدي قريب العصر الناس كان بجو.. غدير طبعاً سافرت الكويت واشتغلت هناك اتصلت لينا مكالمة فيديو ولمن شافت لمتنا بكت عديل يا حليلها.. كنا عاملين غدا خفيف للاهل القراب القعدو... المهم بقينا واقفين على حيلنا لحدي بعد المغرب كان البيت راق شويه وفضل معانا ناس خالتي صفيه بس، بناتها ما قصرو نظفو البيت مع ناس مروه وغيم وبخروهو.. بعد صلينا العشا عملنا قهوة وغيم كانت عامله بسيمه ختيناها معاها وقعدنا كلناا في الصاله بالرجال نتونس ونشرب القهوة... كانت لمه سمحه شديد واتمنيت انو اليوم دا ما يخلص ابداً ابداً.. بعد داك ناس خالتي صفيه قالو ماشين حلفو ليهم الا يبيتو لكن ابو نهائي، مرتضى كان مشى يودي ناس اهلهم ف غسان اتزاوق من ناس ابوي ومشا يوصلهم.. ابوي كان في الحمام لمن جا عشان يطلع معاهم عمي عبدالرحيم قال ليهو ماف ليك طريقه مشو خلاص.. احتج لكن في النهاية اقتنع.... انا وخنساء كنا بنتونس مع ميسم وشايله حمودي بلعبو.. خالتي حياة جات قالت لينا هي يلا قومو نوموا النهار كلو تعبانين.. ميسم قالت ليها خليهم مونسني يا امي.. قالت ليها انتي يختي قاعده في السرير المساكين ديل الكانو واقفين في راس الشغل قومن قومن انتو التلاته كان قعدتو في الونسه ما بتقومو لي الصباح.. ضحكنا ورضخنا لكلامها لأنو بالجد كنا تعبانين...
___

قالت وهي بترقد وبتجر الغطا: فاتتك الونسه الليله
مرتضى: ونسة شنو؟
خنساء: بعد مشيت توصل ناس عمك عملنا قهوة بي بسيمه وقعدنا كلنا اتونسنا
مرتضى: يا زوله، خسارة ياخ.. خلاص داير تعويض
كشرت حواجبها باستغراب
قال وهو بقبل عليها كويس وبتكل بكوعو على السرير: عوضيني انتي
خنساء: ام سووو سوري بس انا نعسانه وتعبانه جدا جدا وما فيني حيل لونسه خالص
مرتضى: وقبيل كان فيك حيل واتونستي معاهم عادي مش؟
مطت شفايفها وقالت بتعب: مرتضى
مرتضى: بهظر معاك حبيبتي، تعبتي شديد الليله نومي طيب
خنساء: وانت ما حتنوم؟
مرتضى: في كورة حتبدا بعد شويه بحضرها وبنوم
خنساء: طيب بس ما تعلي الصوت
مرتضى: حاضر
____

مشيت الغرفه البنقعد فيها انا وغسان لمن نكون معاهم، وهي نفس غرفتو القديمه، استحميت واثناء ما بتمسح جا خاشي قلت ليهو مالك اتأخرت، قال لي قعدت مع عم عثمان شويه.. قلت ليهو ايواا.. قمت جا وقف قصادي وربع يدينو قال لي مدينه لي باعتذار.. ربعت يدينو زيو وقلت ليهو على شنو ان شاء الله.. رفع حواجبو وميل راسو قال لي على شنو ؟؟؟.. اتقدمت عليهو ولفيت يدينو حولين رقبتو قلت وانا بلعب بازرار القميص بتاعو: اسفه، لكن لو عرفت انا قعدت ليه حتعذرني... رفعت راسي وقلت ليهو ما قدرت اتم شغل البيت في يومين بس عشان كدا قعدت.. لفا يدينو حولين خصري وقال لي ميسم انتي ليه ما.. رفعت سبابتي وقلت ليهو لو فتحت لي موضوع الشغاله تاني بزعل منك جد المره دي.. قال لي طيب سكت لكن وريني ليه انتي رافضه الفكره دي.. اتنهدت وقلت ليهو غسان ليه نجيب ليهم شغاله وبتهم قاعده؟ ابوي دا تعبان سنينو دي كلها بربي فينا وفي اخر عمرو ما يلقانا جمبو؟ طيب انا فايدتي شنو في الدنيا دي لو نسيت تعبو دا كلو وخليت وحده تاني تخدمهم، انا مستحيل ارضى بالحاجه دي ولو اضطريت كل يوم امشي واجي ما حاقبل بكدا... كان بعاين لي من سكات ابتسم وقال لي كل يوم بتخليني اكتشف فيك حاجه جديده واحبك اكتر من القبلو بأضعاف صدقيني انا ما كنت متخيل في يوم القى انسانه زيك لا وتكون شريكة حياتي كمان، انا محظوظ بيك جدا ومفترض اقيم الليل شكر لربنا على النعمه الاداني ليها على هيئة زوجه اسمها ميسم.. ابتسمت وقلت ليهو وانا كمان محظوظه بيك وبحمد ربنا انو رزقني بزوج زيك.... قرب مني شديد، فجأة سمعنا صوت عالي بي برا اتخلعنا وغسان جرا، لبست التوب وجريت وراهو لمن نزلنا لقينا مروه وغيم ماسكين ليهم حلل وكمش وبضربو فيها عشان يصحونا
غيم: يا ناااس المطره صبت اصحوو
مروه: عوووك هوي يا نوامين
فجأة كلهم طلعو من غرفهم غسان كان ماشي عليهم جريت مسكتو وانا بضحك بدموعي.. مروه وغيم جرو اتدسو ورا عمو عبدالرحيم وابوي.. غسان كورك فيهم قال ليهم انتو مجانين ولا شنو؟ واقفين تكوركوا نص الليل عشان مطره؟ ... كان ماشي عليهم مسكتو تاني وقلت ليهو بصوت واطي: حبيبي اهدى ما عارفهم انت؟... خالتو حياة قالت ليهم الله يازاكن ويازا يومكن .. غيم قالت ارحكم الحديقه برا يخوانا ما صابه شديد رزاز بس.. غسان قال ليها تفتحي خشمك دا تاني بكسر راسك.. كان مخلوع شديد بقيت بمسح على كتفو عشان يهدى قال ليهم تاني اسمع حسكم دا ما بخليكم فاهمين؟.. غيم قالت ليهو اصلا انت من يومك بايخ امشي نوم نومك لكن خلي لينا ميسم.. بدو يطلعو كلهم، عاين لي قلت ليهو ارح معاهم عليك الله خمسه دقايق بس النبي يا غسان..

اتنهد ومشينا سوا، قعدنا في الطاولات البرا في الحديقه والجو كان سمح شديد والمطره خفت بس في رزاز.. غيم قالت اها يخوانا اي واحد يتمنى امنيه في المطره دي.. عمي عبدالرحيم بدا وقال ليها انا امنيتي تفصل اسرتنا الكبيرة دائماً مبسوطه وعامره كدا.. ابوي قال انا امنيتي زي امنية عبدالرحيم.. خالتي حياة قالت انا دايرة لي طقم دهب زي حق وصال مرت اخوي.. ضحكنا ضحك عمي عبدالرحيم قال ليها الدهب العندك داك كلو ما مالي عينك؟.. قالت ليهو العندي كلو ما بسوى الطقم بتاعها ما شاء الله تبارك الرحمن.. مرتضى قال انا متمني ولد يشبه امو وبت تشبهني.. غيم ومروه قعدو يشغلوها لي خنساء وهي تتخجل🤣.. ميسم قالت انا بتمنى ربنا يخلي لي حمودي ويديهو اختين كدا يشبهوه.. كلنا قلنا آمين.. عاينو لي كلهم قلت ليهم انا امنيتي زي امنية ابوي وعمي عبدالرحيم.. خنساء قالت ما حاذيد حاجه في كلام ميسم.. غيم قالت انا دايرة لي عريس يكون مغترب في واحده من دول الغرب ويسوقني معاهو وتاني ولا بعرفكم ولا بتعرفوني.. خالتي حياة قالت ليها عشان كدا ما حيجيك الا في احلامك.. مروة قالت انا بتمنى اقدر اسامح الناس الغلطو في حقي.. انا وغيم عاينا لي بعض لأنو الوحيدين الفهمناها.. عاينت لي غسان لقيتو بعاين ليها بنظرة ما فهمتها حزن ولا عتاب .. طلال قال في الاوقات المباركه دي بنعمة الغيث والاهل بتمنى ربنا يجمعنا نفس اللمه دي في جنات الفردس بدون عذاب.. كلنا قلنا آمين يارب.. جا دور غسان كان ساكت بعد شويه قال ليهم دعيت.. بقو بسألوهو دعيت بشنو ابى يوريهم قال ليهم قولو آمين بس.. فعلا قالو امين.. اتونسنا شويه بعدها دخلنا رقدت وكنت منتهيه بالتعب قلت لي غسان دعيت بشنو قال لي نفس دعوة مروة.. قلت ليهو طارق قبل كم يوم اتكلم معاي وقال داير يتقدم ليها.. قال لي عارف.. استغربت قلت ليهو عرفت كيف؟.. قال لي كلمني وجا اعتذر مني قال لي اتكلم مع باسل قلت ليهو باسل اصلا ما عارف حاجه لو دايرها اتقدم ليها.. قلت ليهو بفرحه: بالجد؟؟؟.. هزا راسو قلت ليهو طارق اتغير شديد يا غسان والله ما بتصدق هو ندمان كيف على الحاجات الكان بعملها زمان، انت عارف مرات انا بصحى نص الليل بلقاهو قاعد في المصلايه بدعي وببكي الشافع عمري ما اتخيلت طارق يصل المرحله دي لكن الحمدلله ربنا استجاب لدعواتي.. قال لي انا عارف وزي ما قلت ليك دعيت ربنا انو اقدر اسامحو واتعامل معاهو عادي... قلت ليهو ان شاء الله حيجي اليوم دا.. قام وقال لي ان شاء الله، ماشي احضر الكورة نومي انتي.. قلت ليهو طيب
غمضت عيوني وبديت استرجع تفاصيل اليوم..
كتير مننا بمر بفترة يحس فيها انو ربنا خلقو عشان يبتليه بس، مشاكل ورا مشاكل ورا مشاكل ودوامه ما بتنتهي، لكن لو جينا عاينا ليها من ناحيه تانيه بنلقى انها اختبارات من ربنا وطريق ختاهو فينا ونهايتو فرج كبييير.. عِوض عن كل ذرة الم حسيت بيها وكل ما المشاكل تكبر والفتره تطول بتلقى عوض ربنا اكبر❤️....
انا عمري كلو ما اتخيلت ربنا يخت قدامي ناس زي غسان واسرتو، عشت احساس الاسره بعدما فقدتو اكتر من ١٠ سنين.. خالتي حياة وعمي عبدالرحيم بقو لي الام والابو ميسم وغيم بقو اخواتي الرزقني بيهم ربنا بعد عشت حياة بدون اخوات، مرتضى بقى اخوي البلجأ ليهو لمن انا وغسان نتناقش في حاجه وهو اليصلح بينا.. والحمدلله انو خنساء بقت عديلتي لأنو كنت متخوفه من حكاية انو اي واحده فينا تتزوج وتنشغل بحياتها بعيد عن التانيه... والاهم من ديل كلهم غسان.. مهما اتكلمت عنو ما حاوفيه حقو ما حاقدر اقول شي غير انو هو عوض السنين الفاتت كلها❤️ انا متأكده وواثقه انو ما حيجي يوم واندم انو اخترتو ما لأنو وعدني بالحاجه دي لا لأني واثقه من حبو لي.. ليوم الليله ما حصل خلاني انوم وانا زعلانه منو ولا رفض لي طلب طلبتو وحتى مرات قبل اطلب بلقاهو نفذ كأنو حافظني عن ظهر قلب....

فجأة حسيت بطمام قمت بسرعه ودخلت حمام الغرفه، رجعت الاكل الاكلتو الصباح كلو بعدها غسلت وشي.. فجأة اتذكرت الاعراض الليها كم يوم ملازماني دي مرت بي قبل كدا.. ختيت يدي في بطني وانا بعاين لنفسي في المرايه بعدم تصديق .. طلعت برا وجري على الصاله غسان كان قاعد براهو في الصاله ومندمج، لمن شافني واقفه كدا قدامو قام بخلعه وقال لي ميسم؟ في شنو مالك؟.. قلت ليهو ودموعي في عيوني ولسه ماسكه بطني: غسان، غسان انا حامل... قام من الكنبه وقال لي شنو؟.. قلت ليهو انا حامل يا غسان هنا في ولد في بطني.. وقف وهو بعاين لي مسافه بعدها شالني وبقى لافي بي في الصاله وبكورك : مرتي حااامل مرتي حامل يا ناس... قلت ليهو غسان انت جنيت حتصحي الناس نزلني سريع .. فجأة الصاله كلها اتملت وبقو بسألو الحاصل شنو.. نزلني وقال ليهم وهو فاتح يدينو حفيد آل عبدالرحيم المغربي التاني في الطريق... طبعاً خجلت خجل وخفت لأني لسه ما اتأكدت من الموضوع دا..