طبعاً جملة : "نحنا معتبرنك أختنا " دي قهرتني جنس قهر ! حسيت إنو أنا ما عندي مشكله لو محمد و فاروق و علاء و سليم اعتبروني أختهم بس عمر لا !
عاين لي لقاني ساكته ، قال لي إقتنعتي بكلامي ؟؟ قلت ليهو لا ، سكت مسافه بعدها قال لي آخر موقف بيناتنا صدمني فيك ! ما عارف هل انتِ أصلاً لئيمه و ما عندك أي إحترام لزول ولا دي حاجه اتعلمتيها جديد ! امبارح القريبه دي كنت بقول عليك بت هاديه و رايقه و بتسمعي الكلام لكن صدمتيني فيك !
قلت ليهو انت ذاااتك ما قصرت و بقيت حقار معاي و بتشاكلني على طول ، لمن جيت من السفر كنت مسكين و أحسن من علاء بس هسي بقيت أكعب منو ، على الأقل علاء ما قاعد يرفع صوتو علي و ما قاعد يغصبني على حاجه ، قال لي ما المشكله هنا !
كلهم مخلنك على راحتك ، ماف زول بسألك عشان ما تزعلي و يعني شنو إذا زعلتي ما الناس دي كلها بتزعل !
مها ما عايزك تغتري بنفسك و تهددي الناس بزعلك ، كنتِ ماشه كويس الحصل ليك شنو فجأه كدا و خلاك تبقي لئيمه و ترفعي صوتك على الأكبر منك !
قلت ليهو يا عمر والله انتِ الخليتني اقول ليك كلام شين ، أنا ما بحب زول يهرشني أو يهددني بالذات انت لأني دائماً بسمع كلامك و ما بقول ليك لا .... عاين لي و رجع عاين قدامو بعدها قال لي خير يا زوله ، أنا ما حـ أرفع صوتي عليك بس انتِ كمان خليك بتسمعي الكلام و ما تقوي لي راسك ....

بعدها سكتنا مساااافه ، بعد سكون لحظات ، قلت ليهو عمر ! قال لي نعم ... للحظات إترددت بس بعدها قلت ليهو تاني ما تقول إني زي أختك !

لمن طقطق لي أصابعو و قال لي اها شنو ياداب انتبهت على نفسي ، قلت ليهو ولا شي ، قال لي حاسي انك كنتِ عايزا تعتذري و إتراجعتي في الدقايق الآخيره ! قلت ليهو لا والله ، شغله هي كل مره اعتذر منك ! انت ما حصل اعتذرت مني ، قال لي أولاً انا ما قاعد أغلط عليك و بعدين كلامي القبل شويه دا كلو ما اعتذار ؟! قلت ليهو ايوه ما اعتذار ! عاين لي و سكت و تاني ما اتكلمنا لحد ما رجعنا البيت ، طبعاً عمتي خالص ما اشتغلت بي ، اتعاملت معاي ببرود ، سمعت عمر قال ليها الموضوع دا اتكلمنا فيهو مية مره ! دي أمها في النهايه و من حقها تجي تشوفها و هي من حقها تمشي و تقعد معاها ، زعلك دا ما ليهو أي تبرير ، ليه ما عايزاها تشوف أمها أو تتعامل معاها يا أمي !
طبعاً عمتي ما ردت عليهو ، في آخر اليوم مشيت ليها في غرفتها و أنا مشربكه أصابعي ، عاينت لي بس ما قالت حاجه ، من دون مقدمات مشيت ضميتها بس هي ما أبدت أي ردة فعل ، قلت ليها والله تاني ما حـ أمشي ليها ، قالت لي ليه ؟ مش دي أمك في النهايه و أم أخوانك الحقيقيين !؟ ليه ما تمشي ليها و أساساً أنا منو عشان أمنعك منها !؟
قلت ليها عمتي والله تاني ما بمشي معاها ، أنا عشان كنت زعلانه منك و من عمر مشيت معاها حتى استوري الواتس كتبتو عشان زعلانه منكم ، قالت لي زعلانه مني انا ؟؟ عملت ليك شنو ؟!!
حكيت ليها بكلامها هي و خالتو إعتزاز السمعتو أمبارح ، قالت لي وقت زعلتي مني ليه ما جيتي كلمتيني !؟ و بعدين سكاتي ما معناه إني موافقه على كلامها أو ح اعمل البتقولو ، أنا ماف زول بوصيني عليك و ماف زول مصلحتك بتهمو أكتر مني و ماف زول من حقو يتدخل فيك و يفرض قوانينو عليك طول ما أنا عايشه ، لا عمر لا إعتزاز لا غيرهم أنا ما شغاله بكلامهم ، ما بهمني زول غيرك و أنا بعمل ليك أي شي انتي عايزاه و ما قاعده أغصبك على حاجه ، رجعت ضميتها تاني و قلت ليها عمتي معلييش ، ضمتني شدييد و قالت لي أنا زاتي ما بقدر أزعل منك لزمن طويل ، انتي بتي و حبيبة قلبي والله ❤️

في نفس اليوم دا بليل سمعت صوت حركه جاي من برا ، كنت ماسكه التلفون و قاعده في الهول بتصفح ، طلعت برا عشان حسيت إنو دا عمر الجا و حبيت اتأكد و الشجعني إنو لمبات الحوش كانت شغاله ، طبعاً كلهم كانوا نايمين إلا أنا ما كان جاييني نوم ، أول ما وصلت الحوش بقيت اتلفت ، سمعت حركه جنب باب الشارع ، قلت يمكن دا عمر ، بحذر قربت من الباب و فجأه كدا لمحت ليك زول جاي ناطي بالحيطه !

ختيت يدي على قلبي و كنت حـ أصرخ بأعلى حس عندي بس فجأه لمحت عمر في الحيطه ! قال لي بصوت واطي هوووس ، نزل و قال لي صاحيه للزمن دا ليه انتِ ؟؟ قلت ليهو الساعه ياداب 11 انت ليه ناطي بالحيطه ! لمن جاني قريب و شفت وشو إتخلعت !
قلت ليهو عمرررر دا شنو !
قال لي وطي صوتك ، ما عايزين نصحي زول ! خشي جوه و نومي ، قلت ليهو لا لا إلا تقول لي مالك ! قال لي ماف شي و اتحرك قدامي ، طبعاً انتبهت إنو بعرج بـ رجلو ، إتلفت علي و قال لي في زول صاحي ؟
قلت ليهو لا و أنا بعاين ليهو بإستغراب ، بقيت ماشه وراهو و بسأل فيهو عن الحصل معاهو ، كنت خايفه عليهو شديد ، دخل الهول و قعد ، جيت وقفت قدامو و قلت ليهو انت اتشاكلت مع زول ولا شنو !؟

قال لي لا ، قلت ليهو لكن في آثار ضرب على وشك ، قال لي ياخ انتي مالك شماره كدا !! أمشي نومي عشان بكرا سايقك معاي السوق عشان تشتري مستلزمات المدرسه .... طبعاً هو قايل إنو لمن يقول لي كدا حـ يلهيني و يصرف نظري عن حالتو ، قلت ليهو رجلك دي شكلها واجعاك ، قال لي انتي بس أمشي نومي ، مشيت فتحت المطبخ و سخنت مويه و رميت فيها حب شاي و شوية ملح و شلت قطن و جيتو راجعه ، لقيتو ساند ضهرو على الكنبه و مغمض عيونو ، قعدت على الأرض بليت القطنه و أول ما مسكت رجلو هو فتح عيونو ، سحب رجلو و قال لي مهاوي بتعملي في شنو انتِ ، يعني ما مشيتي تنومي ! قلت ليهو لا ، قال لي طيب قومي من الأرض ، ما أداني فرصه عشان أعترض ، شال مني المويه و القطنه و بقى يمسح بيها على رجلو ، قلت ليهو واجعاك صح !؟ قال لي ما شديد ، لمن خلص شلتها منو و قلت ليهو حـ اعمل ليك وشك عشان بكرا الصباح ما تلقاهو وارم ، بقى يعاين لي و هو ساكت و أنا بمسح ليهو على وشو ، لمن خلصت قال لي تمااام شكراً ليك ما قصرتي ، قلت ليهو حـ أرجّع ديل المطبخ ، قال لي تمام ، لمن رجعتهم و قفلت المطبخ و جيتو قال لي ما عايزك تكلمي أي زول ، لا أمي لا غيرها ، قلت ليهو ليه و أصلاً الحصل معاك شنو يا عمر !؟
قال لي ما ضروري تعرفي ، المهم ما عايزك تكلمي زول ، قلت ليهو طيب ، قال لي عارفك ما بتدسي حاجه من أمي ، بس حاولي المره دي ما تجيبي ليها سيره ، قلت ليهو طيب !! قال لي أوعديني و ياريت ما تخلفي بالوعد دا ! سكته ساااي ، قال لي مهاوي رجاءً ما تكلمي أمي ، ما عايزها تقلق و تخاف علي ، قلت ليهو طيب بس وريني الحصل ليك شنو ، قال لي عملت حادث بسيط بالعربيه ! قلت ليهو شنووو !! متين و وين ؟؟؟! قال لي قبل ساعه كدا المهم ماف شي خطير ، اها حـ توعديني ولا لا !؟ قلت ليهو خلاص بوعدك ما أكلم عمتي ...
مع إنو قال حصل معاهو حادث بس حسيت إنو بكذب ، لكن ما عارفه شنو الحـ يخليهو يكذب ! حيكون حصل معاهو شنو ياربي !!

"قالت له و هي تصالحه :
هيا ابتسم ، كي اطمئن انك قد "رضيت"

فابتسم لها و هو يغمغم في سره :
لم ارضى بعد و لكن تباً "لقلبي" كم يحب ارضائك "🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《24》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏


المهم في اليوم البعدو عمر ما طلع يشرب معانا الشاي ، عمتي قلقت عليهو و قالت عمر ما متعود ينوم للزمن دا ! مالو ياربي ! علاء قال ليها شفتو قبيل صحى بدري صلى الصبح و أظنو رجع نام تاني ، قالت كدي النمشي أشوفو ، طبعاً أنا عارفه و ساكته ، مع إني ما متعوده أدس حاجه زي دي من عمتي بس سكته عشان وعدت عمر ، فجأه هو جا طالع و كان شبه بمشي برجلو بطريقه كويسه ، ما عارفه هل هو ما كان حاسي بألم ولا كان بتظاهر إنو ماف ألم و أصلاً هو ليه ما عايز يكلم زول بالحادث ! قال لينا صباح الخير ، عمتي قالت ليهو صباح النور مالك اليوم قايم متأخر و.... عمرررر مالو وشك دا وارم كدا ! قال ليها امبارح من دون ما انتبه ضربت الباب ، قالت ليهو مالك يا ولدي بقيت ما بتشوف ، كدي تعال أقعد جنبي هنا خليني أشوف الضربه دي ، قال ليها لا لا ماف شي ضربه عاديه ما تشغلي بالك ، فاروق قال ليهو انت أمبارح اتأخرت وين ؟؟ قال ليهو كنت في النادي ، قال كدا و قعد و قال جيبوا لي الشااااي لأني مصدع شديد ، عاين لي و قال لي بعد شويه سايقك معاي السوق عشان تشتري مستلزماتك المدرسيه ، عمتي قالت ليهو والله امبارح كنت عايزا اقول ليك وديها السوق أو جيبهم ليها انت ، لكن خلي فاروق ولا علاء واحد فيهم يوديها ، انت شكلك عيان و حالتك دي ما عاجباني ، قال ليها لا لا أنا كويس و هسي باخد لي بندول و الصداع بروح.....
المهم جهزت نفسي و طلعت مع عمر ، لمن ركبنا قلت ليهو رجلك بقت كيف ؟؟ قال لي شوفة عينك بقت أحسن ، و كمان مشكوووره لأنك ما جبتي سيره لزول ، صراحة ما كنت واثق فيك لأنو خشمك خفيف بس طلعتي عكس توقعي ، قلت ليهو حقو بعد كلامك دا انزل و أمشي أكلم عمتي ، ضحك و قال لي لا لا خلاص ، المهم مشينا السوق و إشتريت كل مستلزماتي المدرسيه ، لمن رجعنا علاء قال لي ما خليتي حاجه في السوق ! فلستي بـ عمر ، قلت ليهو جا شكى ليك !؟ قال لي الأيام الفاتت ديك ارتحت من لئامتك و وجع الراس البتعمليهو لي ، فاروق قال ليهو كضاب والله ، كل دقيقتين بتجيب سيرتها و تقول لو كان مها قاعده كانت حتقول كدا أو تعمل كدا ، قلت ليهو أصلاً أنا غيابي عن البيت بفرق لأني و زي ما بتقول عمتي شمعة البيت دا ، علاء ضحك و قال لي الشمعه بتحرق نفسها عشان تضوي لغيرها بس انتي بتحرقي غيرك عشان تضوي لنفسك ! قلت ليهو عليك الله أنا ما فاضيه لكلامك الخارم بارم دا ، قال لي لمن يغلبك الرد بتقولي كلامي خارم بارم ! فاروق قال لي هو عايز ليهو فرصه بس عشان يتناقر معاك ، لمن مشيتي مع أمك فرقتي معاهو و ما لقى ليهو زول يتجادل معاهو ، عمتي قالت ليهو مها و علاء ديل عاملين زي توم و جيري اليوم كلو شكل و مناقره ، أنا عايزاكم يوم وااحد بس تتفقوا و تقعدوا بهدوء ، عمر قال ليها بت أخوك شليقه و لسانها طويل ، علاء قال ليهو مش عليك الله ! إتلفت على عمر و قلت ليهو و انت ما شايف علاء الحقار دا ! بس كلكم عندكم مشكله معاي ، اصبروا لي بس ، نشوف منو الحـيكوي ليكم تاني ، قلت كدا و إتحركت من جنبهم بس وقفت لمن عمر ناداني ، لمن إتلفت عليهو قال لي اتصل ليك على أمك تجي تسوقك ولا بتمشي براك ؟!... طبعاً قعدوا يضحكوا علي ضحك ، دخلت جوه و خليتهم ...

المهم اليوم البعدو كان يوم الأحد ، أول يوم دراسي لي ، وصلني عمر المدرسه ، لمن نزلت قال لي يوم دراسي موفق ، و حاجه تانيه ، البت ديك الله يرضى عليك يا مها خليك بعيده منها لأنها ما شبهك ، قلت ليهو عمر انت مالك معاها ، قال لي البت دي ما راكبه لي في راسي و أنا شاكي إنو عنادك و لئامتك الظهرت في الفتره الاخيره دي اتعلمتيها منها ، قلت ليهو بري اتعلمتها منك انت دا ، ضحك و قال لي أنا لئيم ؟ قلت ليهو مراااات ، قال لي طيب ليه ما بتتعلمي مني إلا الحاجات الما كويسه ؟! قلت ليهو لأنك ما بتظهر لي إلا الحاجات الما كويسه !... عاين لي كدااا بعدها قال دا شنو الكلام العميق دا ، بتحيريني لمن تقولي كلام منطقي ، قلت ليهو ليه شايفني غبيه ولا ما عندي عقل ! قال لي مها امشي امشي عليك الله عشان ما تتأخري على مدرستك ، أول إتحركت كدا قلت واااي دا شنو دا !! طبعاً ياداب انتبهت إني لابسه الجزمه من دون رباط ! عمر كان حـ يتحرك بس لمن شافني واقفه نزل القزاز و قال لي في شنو ؟؟
قلت ليهو شوف جزمتي ! قال لي دا من الإستعجال ! قلت ليهو بسببك انت لأنك شغال لي لو ما طلعتي سريع حـ أمشي أخليك ، قال لي طيب هسي الحل شنو ! قلت ليهو رباط الجزمه معاي في الشنطه ، قلت لمن أركب العربيه حـ اربطهم و نسيتهم ، قال لي يا بشر ! طيب من قبيل مالك ، تعالي اركبي و أربطيهم ، ركبت ورا و طلعت الرباط من الشنطه ، قلت ليهو بالله شوفو طويل كيف ، ياخ بسببو حـ اتأخر ، مد يدو شال مني الرباط و قال لي مدي لي رجلك دي جاي ، بقى يربط لي في الجزمه و أنا أعاين ليهو ساااي لحد ما خلّص ، قال لي يلا اتفضلي انزلي ، أول ما نزلت و اتحركت قال لي دقيقه اتأكدي ما تكوني ناسيه قروشك كمان ! قلت ليهو لا لا ما نسيتهم ، دخل يدو في جيبو و طلع قروش و مداهم لي ، قلت ليهو عندي ما عايزاهم ، قال لي تمام و كان حـ يرجعهم بس استعجلت و قلت ليهو خلاص جيبهم ، قال لي هسي مش قلتي ما عايزاهم ، قلت ليهو غيرت رأيي ، البحر ما بيأبى الزياده ، ضحك و قال لي يلا يا طالبه على مدرستك ، ودعتو و مشيت دخلت المدرسه و انا مبسوطه ، طبعاً اليوم داك سهى ما جات عشان كدا حسيت نفسي وحيده في المدرسه ، ايوه انا عارفه إنو هي وحده تصرفاتها غلط و شخصيتها ما بتعجب ناس كتار و منهم عمر بس انا ما عندي صحبه غيرها ، هي أول وحده صاحبتها في سادس و هي الدائماً بتدافع عني في المدرسه و بتاخد لي حقي ، علاقتي بيها ليها 4 سنوات و داخله الخامسه ...
لمن رجعت البيت لقيت عمتي بتتونس مع خالتو إعتزاز ، سلمت عليهم و دخلت ، بدلت ملابسي و طلعت عشان أمشي المطبخ ، لمن سمعتهم ذكروا اسم عمر طوالي رجعت خطوات لـ ورا ، وقفت جنب باب المطبخ و بقيت اسمع كلامهم ، عمتي قالت ليها والله البت سمحه و ما فيها كلام يا إعتزاز و اتمنيتها تبقى لي مرت ولد بس الله ما أراد
_ يمكن لقدام يتفقوا ما معروف
= لا لا ما اظن ، عمر قال خلاص خلاها و قنع منها و هو لمن يقنع من حاجه ما بتلفت عليها تاني
_ هو ما قال ليك خلاها ليه !؟
= ما قال شي غير انو ما اتفق معاها ، والله قدر ما حنستو عشان يحكي لي ما حكى لي
_ يمكن حس انها ما جاده معاهو عشان كدا قنع منها
= جايز والله ، لكن ماااف أي مشكله بكرا بعرس ليهو الأحسن منها
_ والله أحسن ليهو بنات أهلو و بنات بلدو و ما شاء الله بنات أعمامو و عماتو راقدااات يأشر بس و يعرس
= بري والله ، أولادي كان يقعدوا عمرهم كلو من دون عرس ما بعرس ليهم من أهل أبوهم ، يوم النور دا قرر يعرس فيني نسوان أخوانو شجعنوا و فتشن ليهو العروس و جابنها ليهو و وقفن ليهو في عرسو ، دايراني بعد عمايلهن دي كلها أعرس بناتهن لـ أولادي !! بتحلمي والله
_ ههههه ، اها لو أولادك براااهم قالوا عايزين بنات أعمامهم حـ تسوي ليهم شنو ؟
= تفي من خشمك يختي ، والله ما أخليهم إلا يسمعوا كلامي
_ يعني نسوان أولادك كلهم حيكونوا غريبات ؟
= و ليه يكونوا غريبات ! بتي مها دي ما شايفاها !

طبعاً لمن قالت كدا أنا نططت عيوني و قلبي عمل شححح ، عمتي واصلت كلامها و قالت ليها ، والله أعمل ليها أحسن عرس و أقعدها معاي
_ لكن بت أخوك دي لسه مشوارها طويل ، أكيد انتي عايزاها تقرا ليك الجامعه و تخلصها
= المشكله وين !؟ أولادي قاعدين ما طايرين ، زيتنا في بيتنا وقت ما أحس انها جاهزه طوالي بعرس ليها
_ أحسن والله ، تعرسي ليها واحد من أولادك و تقعديها معاك ، حتى ما ضروري تنتظريها لغاية ما تخلص الجامعه ، الولد ولدكم و البت بتكم ، عرسوها و قروها
= ممكن برضو بس انا ما مستعجله ، خليها تكبر شويه

طبعاً أنا واقفه بسمع فيهم و لسه مخلوعه ، بقيت زي الزول الكاشحين فيهو مويه بارده ، براااحه رجعت و مشيت دخلت غرفتي و أنا خاته يدي على قلبي ! الجوع ذاتو طار ... قلت معناها عمتي عايزا تعرسني لـ عمر !

جاني إحساس كدا ما عادي ، دقات قلبي زادت و بقيت أضحك براي زي المجنونه ، الشمار حرقني و ما كنت مصدقه السمعتو ، طوالي اتصلت على سهى و أنا خاته يدي على قلبي ، أول ما فتحت الخط ، قلت ليها واااي يا سهى ما شفتي الحصل شنو !! قالت لي شنووو ؟
قلت ليها عمتي حاجزاني لـ عمر ، قالت لي شنووو ؟! كيف يعني !؟ و البت القطريه !؟
قلت ليها عمر خلاها ! قالت لي ليه مالو معاها !؟
قلت ليها ما عارفه المهم إنو خلاها
_ يعني هسي انتي فرحانه و عايزا ولد عمتك المنفسن دا ؟
= .....
_ جاده عليك الله ؟
= ما عارفه يا سهى !
_ مستهبله ساي ، قال ما عارفه ، عشان كدا كنتي بتسمعي كلامو و ما بترضي فيهو و لمن اقول ليك معقوله ماف واحد من أولاد عمتك عاجبك كنتِ بتتغاتتي علي و بتنكري !
= لا لا ما كدا والله
_ خلاص ما حنك ، اها العرس متين ؟
= مجنونه انتي .... لسه بدري على الكلام دا
_ والله البشوف فرحتك دي بقول عرسك بكرا و بعدين تعالي هنا ، الكلام دا قالتو عمتك ولا قالو عمر ؟
= قالتو عمتي
_ يعني عمر ما قال كدا و يمكن ما عارف !
=......
_ ما تتأملي و تعشمي نفسك ساي ، غيتو شوفة عيني ولد عمتك دا ما زول عرس ، و غير كدا هو شايفك زي أختو ، يعني ما اظن يرضى يعرسك لو عرف ، لأنو ماف زول بعرس أختو
= لكن أنا ما أختو... دي الحقيقه
_ بس هو ما شايفك غير كدا
= القال ليك منو احتمال شايفني غير كدا
_ و احتمال ما شايفك إلا كدا ... المهم ما تعشمي ساي !
طبعاً ما إشتغلت بيها رغم إنو كلامها زعلني ، اليوم داك قضيتو كلو فرح و ابتسامتي من الضرس للضرس و العجب لمن جا عمر ، لأول مره أحس إني واصله أبعد درجات الخجل منو ، يعني كأنو قال لي حـ أعرسك بكرا ، طبعاً هو استغرب فيني لأنو اي مكان يجيهو أنا بطلع منو بس بكون مبتسمه و خجلانه ! آخر مره لمن لقاني في الحوش قال لي انتِ اليوم محمومه ولا مالك ؟
والله قربت اضحك رغم إنو ماف شي بضحك ، بس كانت ماسكاني ام فريحانه ، هبش وشو و قال لي في حاجه في وشي بتضحك ؟
هزيت ليهو راسي و نفيت كلامو و أنا منزله راسي ! قال لي أمرك عجيب ، المهم انا طالع ، كلمي أمي لو سألت عني ، ماشي قريب و جاي راجع .... بقيت أعاين ليهو لحد ما فتح الباب و طلع ، بعدها مشيت لميت كل ملابسو و قعدت أكويهم ليهو حتى الما عايزات مكوه كويتهم ، عمتي لمن شافتني قالت لي دا ششنووو دا ! عليك الله عمر دا بخاف الله سيدو ! ليه يخليك تكوي ليهو ملابس قدر دا ! قلت ليها هو ما قال لي بس لقيتهم مكرفسات فـ قلت أكويهم ، قالت لي بري بري خليهم ساي و أمشي اقري قرايتك ، طبعاً ما عرفت أقول ليها شنو فـ اضطريت أخلي باقي الملابس و أمشي أشوف قرايتي ، بس كل ما أمسك كتاب بتذكر كلام عمتي و بتذكر عمر فـ بقعد اتبسم ، سرحت بعيييد بخيالي لحد ما نعست و نمت ...
تاني يوم أول ما وصلت المدرسه سهى إتلقتني و قالت لي أرح أرح أحكي لي سرعه الموضوع دا من بدايتو ، قلت ليها معقوله عشان الموضوع دا الليله جايه بدري و انتي من عرفتك بتجي المدرسه متأخره !
قالت لي ما مهم أرح نقعد هناك و أحكي لي ، فعلاً مشينا و قعدنا ورا الفصول و قعدت أحكي ليها و أصلاً معظم الكلام قلتو ليها أمبارح ، قالت لي و تاني ؟؟ قلت ليها تاني ماف شي ، قالت لي طيب تتوقعي عمر يقول شنو لمن يعرف إنو أمو مفكره تعرسك ليهو ؟
قلت ليها ما عارفه ، قالت لي أنا حاسه إنو ما حيوافق ، أولاً لأنو شايفك زي أختو و تاني شي لأنو حابي وحده و هي البت القطريه ديك ، يعني بما إنو فكر يصل أهلها و يعرسها فأكيد بحبها ، قلت ليها لكن هو قال .... قاطعتني و قالت لي حتى لو إختلف معاها و طوى صفحتها المشاعر ما بتموت يا مها و أكيد هو لحد اللحظه دي بحبها !
طبعاً سكته ساااي و الكلام دا ما عجبني ، قالت لي بالمناسبه ، أنا اكتشفت انك غتيته ! كنت قايله إني صحبتك و ماف بينا أي أسرار بس دسيتي مني و ما قلتي لي انك بتحبي عمر ... لمن قالت لي كدا قلبي عمل شححح ، بقيت اتمتم ليها في الكلام و ما عرفت أقول ليها شنو ، قالت لي خلاص ما تقولي حاجه ، فجأه كدا جرس الطابور رن ، أول ما وقفنا على حيلنا عشان نمشي قالت لي كـ نصيحه ليك مني ما تعشمي في ولد عمتك دا ، ما عارفه كيف و متين انتي حبيتيهو بس اتأكدي إنو أياً كان الشعور البتحسيهو ناحية عمر فهو من طرف واحد ، قالت كدا و مشت قدامي و أنا ماشه وراها ببطء و كلامها ضايقني و بوظ لي فرحتي !
تاني يوم لمن جيت راجعه من المدرسه رنيت الجرس كدا لمن تعبت بس ماف زول فتح لي ، طوالي دخلت على ناس معزه لقيتها جات قبليني بشويه من المدرسه ، خالتو إعتزاز قالت لي مهاوي جيتي ! جات سلمت علي و قالت لي والله من قبيل كل دقيقتين أطلع أشوفك جيتي ولا لسه لأنو ناس عمتك ديل مشوا المستشفى ، قلت ليها لشنو !!؟

_ قالوا إنو عندهم عمهم عمل حادث و كلهم مشوا ليهو في المستشفى و عمتك قالت ليك أقعدي معانا هنا لغاية ما يجوا راجعين ، قلت ليها عمهم منو و متين عمل الحادث ، قالت لي عمهم مصطفى و الحادث قالوا حصل معاهو قبيل الصباح .... المهم جابت لي مويه شربت بعدها ختت لينا الفطور أنا و معزه ، بعد الفطور خالتو إعتزاز قالت لينا الليله ما طالعه مكان حـ اشرب الجبنه معاكن ، معزه قالت ليها خلي نعملها ليك نحنا ، قالت ليها سمح ضوقني جبنتكن دي ، المهم عملنا الجبنه و خالتو إعتزاز قعدت تونس فينا كدااا لحد ما نعست و نامت ، قلت لـ معزه بصوت واطي عايزا اقول ليك حاجه ، قالت لي شنو ؟؟... قلت ليها أرح غرفتك ، طلعنا من المظله و مشينا دخلنا غرفتها ، طبعاً بيتهم فيهو 3 غرف و مطبخ مربوط بالمظله و في ديوان جنب الباب ، قلت ليها الشمار دا حارقني ليهو 3 أيام و ما قدرت أقولو قدام خالتو إعتزاز و انتِ بقيتي ما بتجيني و امبارح كنت جايه اقول ليك بس كان عندي واجب منزلي و بعدين كسلت أجي ، قالت لي قولي شوقتيني ! قلت ليها عمر حـ يعرسني ، قالت لي شنوووو !! متين عمر قال ليك كدا !! يعني خلاص حـ تعرسي !؟ و المدرسه ؟ طيب العرس متين !!
ضحكت و قلت ليها براحه براحه يا بت ، لسه ما اتحدد شي ، الكلام دا سمعتو من عمتي و خالتو إعتزاز ، عمتي حاجزاني لـ عمر ، قالت لي أمي نهاي ما جابت لي سيره إلا كان نست ، قلت ليها اي بتكون نست ، قالت لي عشان كدا وشك منور و بتتبسمي ساااي ، أنا ياداااب فهمت ليه كنتِ بتطيعي عمر اتاريك كنتِ حاساهو راجلك من زمااان 😂😂
طبعاً قعدت اضحك على كلامها و قلت ليها لا لا والله ، قالت لي يلا بعد دا تاني لو شاكلك او قال ليك ما تتمكيجي أو ما تطلعي من البيت تسكتي سااااي ، قلت ليها بري ما بسكت ليهو ، قالت لي كدا حـ يطلقك قبل ما يعرسك ، قعدت اضحك ضحك ، فجأه قالت لي دقيقه دقيقه ! اتذكرت ! مش كان قلتوا عمر عايز ليهو وحده !؟ صريت وشي و قلت ليها خلااااها ! ضحكت و قالت لي بدينا غيره من هسي !
المهم قعدت معاهم لغاااية ما بعد العصر ، لمن ناس عمتي جوا أول ما سمعنا صوت عربيه و حركه في البيت طوالي شلت شنطتي و قلت ليهم مع السلامه ، خالتو إعتزاز قال لي انتظريني اغير توبي ماشه معاك أشوف عمهم بقى كيف ، دخلت جوه و اتأخرت لي فـ بقيت أعاين للباب ، معزه لكزتني و قالت لي تلقاك مستعجله عشان تمشي البيت و تشوفي عمر ، قلت ليها غلطت لمن وريتك ، قالت لي دي التشغيله الجديده ، خالتو إعتزاز أخيراً جات طالعه و قالت لي أرح و طبعاً معزه تنطط لي في عيونها ساي ، لمن ضحكت خالتو إعتزاز إتلفتت علينا و قالت لينا بتضاحكن مالكن ورني معاكن ، قلنا ليها لا لا ماف حاجه ، قالت لينا غيتو انتن ديل !!
المهم طلعنا من بيتهم و وقفنا جنب بابنا ، أصلاً أبوابنا قريبه شديد من بعض ، ضغطت الجرس كدا لحد ما سمعت صوت زول جاي يفتح الباب ، قلت أكيد دا عمر و قلبي بقى شغال دق دق و ابتسمت من دون ما أحس ، أول ما الباب إتفتح اتفاجأت لمن شفتها قدامي.....

" أما بعد ..
فلن أحب أحداً بعدك ..
أما قبل ..
فـ أنا أساساً لم أعرف الحب ..
إلا بك أنت " ...🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《25》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​

خالتو إعتزاز سلمت عليها و قالت ليها سلامة أبوك ، اها بقى كيف ان شاء الله الحادث ما خطير ، قالت ليها والله خطير يا خالتو عليك الله أدعي ليهو ، هسي هو في العنايه المكثفه و لسه ما صحى ، خالتو إعتزاز قالت ليها ربنا يتم عافيتو و ان شاء الله يقوم ليكم بالسلامه ...
طبعاً ماريا هي الفتحت لينا الباب ، كانت لابسه توب من تياب عمتي و كمان لابسه واحد من شباشب البيت حقاتي !
خالتو إعتزاز دخلت سلمت عليهم و اتطمنت على عم ناس عمر بعدها مشت ، أما أنا جوه الغرفه باشكه كراساتي و زهجانه ، فجأه كدا سمعت عمر بناديني ، طوالي اتذكرت إنو عمتي حاجزاني لـيهو ، ابتسمت و حسيت بالخجل و لثواني سرحت بخيالي بعيييد لحد ما تاني جاني صوتو و هو بنادي علي ، نزلت من السرير و جريت عليهو ، كان قاعد في صالون الرجال ، أول ما وصلتو كدا لقيت ماريا واقفه قدامو و كانت بتقول ليهو ثواني خليني أشوفو ليك ، دخلت و قلت ليهو عمر ناديتني !
قال لي ايوه عندي شاحن جديد ما عارف نفسي ختيتو وين فكنت عايز اسألك منو ، قلت ليهو يمكن ختيتو في الدولاب ، الوقت داك ماريا طلعت من الصالون و لمن كنت حـ أطلع عشان أمشي أشوف ليهو الشاحن هي جات داخله و معاها الشاحن ، مدتو ليهو و قالت ليهو لقيتو عند علاء ، قال ليها علاء دا عذبني عذاب ، كل ما اشتري شاحن يشاركني فيهو و لمن أقول ليهو اشتري ليك شاحن بتكاسل !
ضحكت و قالت ليهو علاء ما بعجبو إلا حق الناس ، إتحركت خطوتين و تاني رجعت و قالت ليهو عمر بعد العصر أنا عايزا أمشي المستشفى لأبوي ، توديني ؟
قال ليها أكيد ، أنا ذاتي عايز أمشي عليهو ، قلت ليهو أنا كمان عايزا أمشي معاكم ، قال لي لا لا انتِ خليك قاعده مع أمي ، قلت ليهو فاروق و علاء قاعدين معاها ! قال لي لا فاروق حـ يمشي معانا و علاء دا عندو مشاور حـ يمشيهو بعد شويه ، فعلاً دا الحصل ، عمر و فاروق ساقوا ماريا معاهم و مشوا و علاء طلع فـ بقينا قاعدين في البيت أنا و عمتي ، طبعاً ماريا دي عندها أختين أكبر منها معرسات و أخت أصغر منها ، و أخوانها واحد برا السودان و واحد في السودان ، طبعاً أمها و أختها من المستشفى مشوا بيت خالتهم لأنو قريب من المستشفى و هي جات هنا بيت عمها بحجة انها ما بتتفق مع خالتها ...
تاني يوم في المدرسه أثناء ما نحنا واقفين طابور ، طلعت طالبه و قالت : قال رسول الله : " ....... " بعد رجعت مكانها جات المديره و قالت دقيقه يا جماعه ، وقفت في نص الطابور و قالت الحديث القبل شويه دا حديث غير صحيح ، و أنا ما بلوم الطالبه القالتو لأنو دا الإتعلمتو و للأسف المقوله دي منتشره كتير بين الناس على إنها حديث ، وحده من بنات تالته قالت ليها بالجد يا أستاذه بقينا ما قادرين نفرق بين الأحاديث الصحيحة و الأحاديث الضعيفه أو الغير صحيحه ، يعني مثلاً الحديث القبل شويه دا والله في الروضه و الأساس أدونا ليهو و كانوا بقولوا لينا إنو دا حديث ، قالت ليها ايوه عارفه عشان كدا ما بلومكم ، وحده تانيه قالت ليها والله انا عشان كدا ما قاعده أطلع في الفقره الدينيه ، بخاف اقول حديث أو سبب نزول آيه أو شرحها و يطلع غلط ، المديره قالت ليها بالعكس أحسن الواحد يطلع و يقول العندو حتى لو غلط عشان الناس تصحح ليهو الغلط و توريهو الصح

، يعني هسي ساجده دي لو ما كان قالت المقوله دي كتار منكم ما كانوا حـ يعرفوا انها مجرد مقوله أو حديث ضعيف ، رد ليها طالب و قال ليها هم ما يبحثوا في قوقل بس و يتأكدوا !
المديره قالت ليهو قوقل مجرد محرك بحث ، فيهو الصح و فيهو الغلط ، يعني الناس ما تعتمد عليهو ، الحديث الضعيف القالتو ساجده نبهنا لحاجه مهمه جداً و خطيره ، لذلك كل حصص اليوم حـ تتحول لـ حصص فقهيه ، المعلمين حـ يمروا عليكم في كل الفصول ، يقعدوا معاكم و يتكلموا ليكم عن الأحاديث الصحيحة و الضعيفه و صحيح بخاري و مسلم و حـ يتكلموا ليكم عن أبرز الآيات أو المسائل الدينيه يلي الناس فاهمه شرحها غلط و أي طالب عندو سؤال عن آيه أو حديث أو أي حاجه غيرهم يسأل الأستاذ طوالي من دون تردد ، حتى المعلمين لو في واحد غلبو سؤال طالب يشاور المعلمين المعاهو أحسن من إنو يفتي للطالب في حاجه هو ما متأكد منها ، و اتذكروا إنو اثنان لا يتعلمان ، المستحي و المتكبر ، فـ اسألوا عشان تعرفوا الصح ، ما عايزا أطلّع من مدرستي دي طلاب بعشقوا الكيمياء و بستمتعوا بالفيزياء و بحلوا أصعب المسائل الرياضيه بس ما بعرفوا الحديث الضعيف من الحديث الصحيح و ما بعرفوا الأحكام الفقهية.... و فعلاً دا الحصل ، المعلمين اتوزعوا على الفصول و في كل فصل كان فيهو أكتر من معلم على راسهم مدرس فقه أو دراسات إسلامية ، يعني حتى معلمين الفيزياء و الكيمياء و باقي المواد كانوا موجودين ، طبعاً سهى زهجت زهجه ، قالت دا كلو من البت العارض الإسمها ساجده ديك ، ياخ الخلاها تطلع في الطابور شنو بلا يخمها !.... طبعاً ما قدرت تستحمل ، استأذنت و قالت ماشه الحمام و تاني ما جات ، المهم نهاية اليوم لمن رجعت البيت فتحت لي الباب خالتو إعتزاز ، سلمت عليها و لمن دخلت جوه لقيت عمتي دي تبكي و هي بتتكلم بالتلفون ، كانت بتقول ما تغشني يا فاروق ، قول لي أخوك مالو ، طبعاً استغربت و قلقت ، قلت ليها عمتي في شنو !؟ كانت لسه بتتكلم بالتلفون ، إتلفت وراي بس ما شفت خالتو إعتزاز ، كنت عايزا اسألها و لمن ما لقيتها ظنيت انها رجعت بيتها ، عمتي نزلت التلفون و قعدت تبكي و تقول ولدي ما عمل حاجه ، والله عمر ما بعمل كدا ، طبعاً لمن ذكرت اسم عمر حسيت قلبي حـ يطلع من محلو ، قلت ليها بخلعه عمر مالو يا عمتي !! خالتو إعتزاز جات داخله و قالت ليها سميره ! بتبالغي والله ، ولدك مالو كويس و ما عليهو حوجه ، هسي اتصلت على مازن طمني و قال لي موضوع بسيط و حـ يتحلى ! قلت ليهم في شنو ، عمر مالو !!!
خالتو إعتزاز قالت لي جوا عناصر من الشرطه و ساقوهو قالوا في زول مشتكيهو ، اظنوا اتشاكل ليهو مع واحد و عوقو ، مازن ذاتو ما فهمني كويس ، خليهم لمن يجوا راجعين و يفهمونا الحاصل ....
طبعاً إنخلعت زياده ، عمتي قالت دي مصيبة شنو دي ، اعمل شنو أنا لو سجنوا لي ولدي ، خالتو إعتزاز قالت ليها هو السجن دا ساي كدا ! عمر و كلنا بنعرفو ما زول طايش ولا متهور عشان يورط نفسو في قصص زي دي ، أكيد حصلت مشكله بسيطه بينو و بين المشتكيهو دا ، عمتي قالت ليها لو كانت بسيطه ما كان وصلت القسم لكن أنا متأكده إنو في حاجه غلط ، عمر ولدي و أنا عارفه إنو ما بغلط على زول و بكاي دا ما من قلة ثقتي فيهو ، بكاي خوفاً عليهو من الناس الما بخافوا الله سيدهم ديل و عمر أكيد مظلوم ....
بعد مسافه كدا معزه جات بيتنا تفتش على أمها لقتنا متوترين و لمن سألت خالتو إعتزاز حكت ليها ، بقينا قاعدين على أعصابنا كدا لغاية ما سمعنا صوت عربيه و بعدها صوت الجرس ، أنا أول وحده قمت جاريه على الباب و وراي عمتي ، قلبي كان بضرب بسرعه و عايزا متين افتح الباب و أشوف عمر قدامي ، حسيت المسافه طويله لحد الباب ، لمن وصلتو و فتحتو شفت علاء و مازن واقفين قدامي ، بقيت أعاين وراهم بس ما شفت عمر ، ناس عمتي جوا و قالوا ليهم عمر وين ؟؟
مازن قال لينا كدي خلونا ندخل جوه ، طبعاً أنا خلاااص خفت و قلبي دا حسيتو وصل رجليني !
لمن دخلوا قالوا لينا إنو عمر اتشاكل ليهو مع جماعه كدا و عوق واحد منهم فـ مشوا شكوهو و هو ما نكر ، عموماً عمر حـ يقضي عمر اليوم دا في القسم و بكرا نشوف الحيحصل شنو ، طبعاً عمتي قعدت تبكي و تولول و خالتو إعتزاز تهدي فيها و أنا دموعي نزلت زي المطر ، خالتو إعتزاز قالت لـ مازن ديل منو الإتشكل معاهم ديل و السبب شنو !؟
قال ليها أولاد الحي الورا ، الإشتبكنا معاهم يوم العيد ، عمر من اليوم داك دافنها ليهم و سألني عنهم اكتر من مره بس ما قايلو حـ يتهور و يمشي ليهم ، عمتي قالت ليهو لمن ضربوك انت و فاروق و علاء مشينا اشتكيناهم ؟؟ و ذاتو الكلام دا كلو حصل متين ؟؟
قال ليها هو قبل أيام اتضارب معاهم بليل إلا الناس حجزوهم و امبارح لمن إتلاقوا تاني اشتبكوا مع بعض فـ عوق واحد منهم و أهلو مشوا اشتكوا عمر ، طبعاً بعد كلام مازن دا اتذكرت لمن عمر جا ناطي بالحيطه بليل و حالو حال زول عامله شكله ، معناها كذب علي لمن قال لي عملت حادث ، عشان كدا ما كان عايز زول يعرف ! و أنا

أصلاً كنت شاكه في كلامو خاصة لمن لاحظت إنو العربيه ما فيها ولا خدشه!!
عمتي ختت يدها على قلبها و قالت الله ينتقم منهم و يقطعهم حته حته ، وقفت على حيلها و قالت ليهم هسي دي تودوني ليهو ، حابسنوا في ياتو قسم !؟
قال ليها في القسم الكبير ، قالت ليهو أرح هسي دي وديني ليهو ، طبعاً أصرت إلا تمشي ليهو و أنا كمان قلت إلا أمشي معاها ، المهم في الآخر مشينا أنا و هي و فاروق و مازن ، و علاء قعد لينا في البيت ، طبعاً القسم ما كان بعيد شديد ياهو قسمنا تبع المنطقه ، لمن وصلنا دخلنا طوالي ، طبعاً هو عباره عن سور فيهو زي 3 غرف كدا مربوطات ببعض ، دخلنا المكتب و مازن اتكلم مع الضابط ، قال ليهو جاين نشوف عمر النور ، قال ليهو مش ديل انتوا الكنتوا هنا قبيل !؟
قال ليهو ايوه ديل نحنا ، و دي أمو جات عشان تشوفو ، قام من مكانو فتح لينا باب و قال لينا خشوا ليهو ، لمن دخلنا أنا و عمتي و فاروق لقينا ممر قدامنا ، طبعاً كنت قايله القسم دا صغير بس من جوه زي جحر الفار ، مشينا في الممر لحد ما لقينا عمر مسجون في وحده من الغرف ، كانوا معاهو نفرين ، عمتي لمن شافتو صرخت و قالت عمررر ! لمن شافنا وقف على حيلو و جا وقف قصادنا بس الحدايد القضبانيه كانت فاصلانا عنو ، قال لينا انتوا بتعملوا شنو هنا !
عمتي دي بس بقت تبكي و أنا مره أمسح دموعي و مره أحاول اتكلم معاهو ، قال لـ عمتي أمي عليك الله ما تبكي ، أنا كويس و ماف عوجه بتجيني ، عمتي قالت ليهو انت ذاتك يا ولدي البوديك للناس ديل شنو ، عايزين منك شنو هم و سبب المشكله شنو !؟
قال ليها أمي ما تشغلي بالك ، موضوع بسيط و حـ يتحلى ، قالت ليهو بسيط و انت مسجون هنا !؟
فاروق قال ليهو انت ليه ما قلت انك ضربتو دفاعاً عن نفسك ، ليه إعترفت و ما اعترضت على التهمه دي ، قال ليهو لأنو دي الحقيقه و لو تاني طلعت و هم قلوا أدبهم حـ أكرر الحصل و ما حـ أندم .... طبعاً أنا حرف ما قدرت انطقو من شدة البكى ، عاين لي و قال لي هسي نسكّتك انتِ ولا نسكّت أمي ! يا جماعه انا حي ما مُت عشان تبكوا البكى دا كلو !!
فاروق قال لينا حـ أطلع اتصل على أبوي ، عمر قال ليهو ابوي في المستشفى مع عمي ما تشغل ليهو بالو ، فاروق طلع و ما اشتغل بكلام عمر و أنا طلعت وراهو عشان ما قدرت استحمل اشوف عمر كدا ، خطرت على بالي فكرة إنو عمر ممكن يقضي سنوات من عمرو في السجن 💔
لمن طلعنا برا ، فاروق اتصل على أبوهو ، أول ما رد ليهو قال ليهو آلو أبوي كيف تمام ...
_من قبيل بتصل عليك ما بترد....
_والله ما كويسين يا ابوي.....
_عمر دا اتشاكل ليهو مع ناس كدا و هسي هو في القسم
_ والله من قبيل ...
_ طيب تمام يا أبوي نحنا في القسم الكبير
فجأه كدا سمعنا صوت عمتي بتجوط ، لمن دخلنا جوه لقيناها بتتشاكل مع العسكري ، قالت ليهو العواليق ديل قبل كدا ضربوا أولادي يعني عشان ما جينا شكيناهم عايزين يقلوا أدبهم !
قال ليها يا خالتي أنا متفهم شعورك و ولدك ما قاعد هنا ساي ، الناس ديل ودوا ولدهم الدكتور لأنو انضرب في راسو و اليوم جابوا لينا شهودهم و جابوا معاهم أورنيك 8 و على أساسو طلعنا أمر قبض ضد ولدك !
قالت ليهو خلاص انا هسي عايزا اشتكيهم لأنهم ضربوا أولادي ، قال ليها تمام جيبي لينا أورنيك و تعالي ، قعدت تجوط ساااي فاروق قال ليها أمي روقي عليك الله و أبوي هسي في الطريق نشوف نهاية الموضوع دا ، مازن قال ليها يا خالتي شيلي الصبر و الموضوع دا بإذن الله محلول ، المهم لمن عمو النور أبو عمر جا نحنا قالوا لينا أرجعوا البيت ، عمتي حلفت ما ترجع ، عمو النور قال ليها قعادك هنا حـ يفيد بشنو ؟! يا مراه اسمعي الكلام و أمشي البيت ، قالت ليهو ما بمشي أخلي ولدي ، قال ليها ولدك أنا بنفسي بجيبوا ليك ، أمشي البيت يا سميره و انتظريهو هناك الكلام دا واضح ! ....
طبعاً كلامو كان مطمن نوعاً ما ، حسيتو واثق من كل كلمه بقولها ، ما خلونا نقعد و رجعونا البيت ، بقينا قاعدين على أعصابنا و كل دقيقتين نتصل و نسأل الحصل شنو ، لحد ما بعد صلاة العشاء ماف واحد فيهم جا راجع ، خالتو إعتزاز و معزه ذاتهم كانوا قاعدين معانا و منتظرنهم ، خالتو إعتزاز قالت لي اليوم داك لو ما كان باريتن البت الما بتتسمى ديك ما كان اليوم عمر مرمي في القسم ! عمر اتشاكل مع الأولاد بسببكن انتن ديل ، مع إنو الكلام دا من يوم العيد بس عمر ما نساهو لأنو الموضوع قهرو و استفزاهو ، الراجل ما بنسى اتنين ، المراه الخانتو و الراجل البعتدي على عرضو ، عشاااان كدا أنا دائماً بنبهكن بس منو البسمع مني ، شفتي يا سميره دا الكنت خايفه منو ...
طبعاً كلامها وجعني جنس وجع و حسيت إنو عمر اتسجن بسببي ، طلعت الحوش بكيت كدا لمن صدعت ، فجأه سمعت صوت الجرس ، جريت على الباب و أنا طرحه ما كنت لابساها و ما مركزه مع شي غير عمر و طبعاً قلبي كان شغال زي الدلوكه ، وصلت الباب و أول ما فتحتو شفت عمو النور قدامي و جنبو سليم و فاروق ، طبعاً دموعي نزلت زي المطر ، قلت ليهم بصوت مبحوح : عمر وين ؟!

فجأه عمر ظهر قدامي ، ياخ لمن شفتو دخلت فيني كميه من السعاده ، ياداب حسيت بالإطمئنان و كل خوفي إتلاشى ، قربت أصرخ بصوت عالي بس مسكت نفسي ، عمتي جات جاريه و مسكت فيهو و فتحت بيت بكى جنب الباب ، عمو النور قال ليها ما كدا يا سميره ، البشوفك بقول ولدك مسجون ليهو مية سنه !

لحد ما دخلنا جوه عمتي ما فكت عمر ، قعدت تتحسبن في الأولاد الإتشاكل معاهم و تدعي عليهم ، طبعاً قعدوا يحكوا لينا الحصل شنو ، عمو النور مشى لأهل الولد و اتكلم معاهم و دفع ليهم حق علاج ولدهم و اتفاهم معاهم فـ سحبوا الشكوى بس كتبوا عمر تعهد ، مازن قال لـ عمر على الأقل وقت ختيتهم في راسك و حلفت ما تخليهم كان تكلمني و ما تتهور و تمشي ليهم براك ! هسي لو كان حصل العكس و انت الإتضررت ! خالتو إعتزاز قالت ليهو بري بري بركه الما كلمك ما ناقصين مشاكل نحنا ، و انت يا عمر يا ولدي ليه تتهور و تتصرف تصرف طايش زي دا و أنا الطول عمري بقول عمر فاهم و واعي ! عمتي قالت والله انا من يوم شفت وشو وارم قلبي أكلني و حسيت في شي لكن هو قال لي ضربت وشي بالباب و مع ذلك قلبي ما كان متطمن ، عمو النور قال ليهو تاني أخطى الناس ديل يا عمر ، ما عايزين أي مشاكل ، عمر قال ليهو أنا ما مشيت فتشت المشاكل و لو عادوا حركتهم القذره ديك تاني حـ أكسرهم ، مازن قال ليهو و أنا معاك ، خالتو إعتزاز قالت ليهم حيييا أنا منكم انتوا الإتنين !
طبعاً عمر كان غلطان في نظر أهلو إلا أنا كان بطل في نظري ، كان بغمرني إحساس ما عادي في كل مره اتذكر فيها إنو عمر اشتبك مع الأولاد ديلك عشاني ، عشان الولد ضايقني و إعترض طريقي ، عشان إتافه معانا و حاول ياخد مننا أرقامنا غصب عننا ، الحصل يوم العيد وجعو و قهرو بس ما أظهر لينا الحاجه دي ، كان ساكت بس ما نساها ليهم ❤️
المهم تاني يوم لمن جيت راجعه من المدرسه لقيت معانا ضيوف يلي هم أخوان عمو النور و هو ذاتو كان معاهم و سليم كان بايت معانا من أمبارح ، كانوا قاعدين في الصالون أو الديوان يلي هو قريب من الباب و مفصول من الغرف ، المهم سلمت عليهم و دخلت بدلت ملابسي ، طبعاً خالص ما شفت عمر ، قلت لـ عمتي عمر وين ؟؟؟
قالت لي نايم في الغرفه ديك ، إتحركت على الغرفه و أول ما وصلتها و مسكت المقبض و دخلت اتفاجأت بـ ماريا معاهو و كانت مقربه منو شديد و هو راقد على السرير !!!

"ليه كل ما اشوفك ابتسم
و قليبي يرجف و ينتشي
و عيوني يملاها الكلام
داير اقول و مختشي

كل ما اشوفك بنشرح
بيجيني احساس بالغرام
لكني ما قادر ابوح
و بكون مناي ألقى السلام

كل ما افكر اواجهك
بفقد شجاعتي في حضرتك
ويروح كلامي الشايلو ليك
من أولى لحظات نظرتك"
لكاتبه

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《26》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​

طبعاً لمن شافتني إتلبشت و وقفت على حيلها و لمن رجعت لـ ورا ضربت التربيزه فـ وقعت الكبايه الكانت عليها و البسببها عمر صحى من النوم ! طبعاً في البدايه أنا لمن دخلت ما كنت قايله عمر نايم بس لمن ماريا قامت مخلوعه من جنبو اتأكدت إنو نايم و انها استغلت الحاجه دي و قربت منو !! طبعاً صحى و بقى يعاين لينا نحنا الإتنين بإستغراب ، أنا بعاين لـ ماريا و هي تعاين لي مخلوعه أو خايفه !
عمر قال لينا خير مالكم عاملين كدا !!؟ ماريا بلعت ريقها و قالت ليهو لا لا ماف شي جيت أشوفك لو عايز شي فـ لقيتك نايم و من غير قصد مني ضربت التربيزه فـ وقعت الكبايه و إنكسرت ، معليش صحيتك من النوم ، قال ليها لا لا ماف مشكله ، لمت القزاز و جات مارقه ، لمن مرت جنبي عاينت ليها عشره عشره !
قلت لـ عمر بقيت كيف !؟ قال لي كويس أنا الحمدلله و على فكره السؤال دا انا من الصباح جاوبت عليهو مية مره 😅😂
اول ما قعدت في السرير المقاصدو هو وقف على حيلو ، قال لي ناس أبوي قاعدين ؟؟ قلت ليهو ايوه و كمان في أعمامك ، قال لي تمام حـ أمشي اسلم عليهم ... طبعاً حصلت لحظة صمت كدا حسيت كأنو نحنا قرينا أفكار بعض ، يعني أنا اتحسست لمن هو وقف أول ما أنا قعدت و حسيتو فهم علي و حس إني اتحسست ، قال لي لو حابه تعالي اقعدي معانا و اتونسي ! قلت ليهو لا لا عندي دروس عايزا أراجعهم ، قال لي تمام و موفقه يا زوله ، طبعاً زعلت من حركتو دي ، يعني أنا جايه عشان أشوفو و اتكلم معاهو شويه يقوم يطلع و يخليني !!؟
في نفس اليوم دا لمن دخلت المطبخ لقيت ماريا واقفه بتطبخ ، إتلفتت علي و قالت لي عايزا حاجه !؟ طبعاً هي عامله رايحه من الحركه العملتها قبيل ، ما رديت عليها ، فتحت التلاجه و شلت من العنب الفيها ، قالت لي قبيل حسيت إنو عمر حرارتو مرتفعه عشان كدا ختيت يدي على جبينو ، طبعاً الغبيه قايلاني حـ أصدقها ، فجأه كدا علاء ناداها و قال ليها تلفونك برن ، أول ما هي طلعت أنا مشيت على حلتها ، كانت عامله دمعة جداد ، شلت سكر و كبيتو في الملاح و طلعت من المطبخ ، المهم لمن جا زمن غدا كنت بتبسم سااااي ، قعدنا كلنا سوا و علاء شغال لـ ماريا منظر الأكل و ريحتو بشهوا ، طبعاً ناس عمو النور مشوا بعد ما صلوا العصر ، طبعاً ماريا الغياظه الهارده فشفاشي كانت قاعده جنب عمر ، غاظتني كيف ، سبقتني و جات قعدت جنبو ، عامله فيها ظريفه ، أول واحد دخل لقمه في خشمو كان فاروق ، طبعاً أنا بعاين ليهو سااااي ، كشر وشو و قبل ما يقول حاجه علاء قال دا شنووو دا يا بت !! عمتي قالت ليها ماريا انتِ شكلك شلتي علبة السكر بدل علبة الملح ! ماريا قالت ليها بإستغراب كيف !! عمر قال ليها ضوقي ملاحك ، لمن ضاقتو كشرت وشها و قالت أنا متأكدة إني ما كبيت فيهو سكر ! مستحيل أعمل كدا ! عمر قال ليها عادي بكون ما انتبهتي ، علاء قال يعني الليله ماف غدا ! عمتي قالت لينا أنا فترانه والله لكن إلا أقوم و أشد ليكم حله تاني ، عمر قال ليها لا لا ماف داعي حـ اجيب أكل جاهز ، طبعاً ماريا كانت لسه مستغربه و ما عارفه كيف السكر إتكب في الملاح !.... فعلاً جبنا أكل جاهز و إتغدينا بيهو....

المهم مرت الأيام و أنا كل يوم الإحساس الجواي ناحية عمر بكبر ، خاصة بعد ما عرفت إنو عمتي حاجزاني لـيهو ، بقيت أحس إنو أي حاجه بتخصو بتخصني و كنت مديه نفسي الحق الكامل فيهو ، بهتم بحاجاتو و بضايرها ليهو و سهى دي قدر ما حاولت تبهت مشاعري ناحيتو و تقنعني إنو شايفني زي أختو ما قدرت ، طبعاً ماريا كانت بتجينا على طول من المستشفى و كان في تنافس كبير بيني و بينها ، أنا عارفه انها عايزا تتلصق في عمر و عارفه انها خاته عينها عليهو ، كانت بتحاول تكون واو قدامو و تظهر ليهو انها بت راقيه و بتعرف لـ شغل البيت ، و طبعاً الفتره دي بدت امتحاناتي فـ كنت مركزه مع ماريا أكتر من تركيزي مع الإمتحانات ، مره كانت بتكوي لـ عمر قميصو ، دخلت و قلت ليها ماريا عمر بناديك ، و حقيقة هو كان بنادي بس ما لشخص معين ، لمن قامت مشت ليهو أنا طوالي ختيت المكوه على قميصو و بسبب الحركه دي اتشال أكتر قميص بحبو عمر ، طبعاً عمر اتضايق بس ما قال ليها حاجه و هي تشيل و تعتذر منو ، و مره كانت بتعمل في الشاي ، شلت شطه حمراااء مسحونه و كبيتها ليها في الشاي ، طبعاً لمن ضاقوا الشاي وشوشهم جابت ألوان ، عمتي قالت ليها انتِ يا ماريا مالك الفتره دي ! مره سكر في الملاح و مره تخلي الغاز فاتح و مره شطه في الشاي !
طبعاً هي ذاتا ما كانت فاهمه الحاصل ، بقت تشيل و تعتذر و في كل مره تقول ما قاصده ، عملت ليها جنس مصايب خليتها تشك في نفسها ، طبعاً الفتره ديك نهااااي ما كنت بحكي لـ سهى ، لأنها صاحبت ماريا و أنا عارفه انها حـ تدعم ماريا و تقيف معاها ، المهم يوم كنتِ خاته شنطتي حقت المدرسه جنبي في الهول و بقرا للإمتحان ، عمتي و فاروق مشوا المستشفى و علاء في الجامعه ، كنا قاعدين أنا و ماريا و عمر ، طبعاً هم مشوا المستشفى و لمن جوا راجعين ناس عمتي مشوا ، أنا الوحيده الما بخلوني أمشي معاهم ، عمر بقول لي المستشفى زحمه و حـ تتعبي ساي فأحسن ليك تقعدي في البيت و تركزي مع إمتحاناتك ، طبعاً أنا كان ممكن أدخل غرفتي و اقرا جوه بس ما عايزا أدي ماريا أي فرصه عشان تقعد براها مع عمر ، كنت عين على الكتاب و عين على عمر و ماريا ، عمر مركز مع الشاشه و هي مركزه معاهو و أنا مركزه معاهم الإتنين ، لمن عطشت مشيت شربت مويه و جيت قعدت ، أول ما مسكت القلم كدا ماريا قعدت تضحك بصوت عاااالي ، أنا و عمر عاينا ليها في نفس اللحظه ، كانت ماسكه ورقه و بتقرا فيها ، ضحكت كدا لمن دموعها جرت ، قالت لي و هي بتضحك مها دي شنو دا و لفت الورقه علي !!
لمن شفتها إتخلعت ، نطيت من مكاني و قلت ليها منو القال ليك أفتحي شنطتي ، كنت حـ أخطف الورقه منها بس هي جرتها عليها ، وقفت على حيلها و قعدت تضحك و أنا شغاله ليها جيبي الورقه دي ، عمر قال ليها دي ورقة شنو رجعيها ليها ! قالت ليهو أسمع :

لا أعلم ماذا اكتب ، تهرب مني الكلمات ، احببتك من النظره الأولى ، من يوم شفتك و انتي معشعشه في مخي ، كل يوم تشرقين في قلبي كـ الشمس ، و تمطرين كالمطر في قلبي ، عندما اسلم عليك و أصافح يدك في الصباح عندما آتي إلى المدرسه أحس كأنني في الجنه ، أشعر بسعادة كبيره ، كم أتمنى لو انك تتحدثين إلي ، كم اتمنى لو انك تحبينني كما أحبك
من معشوقك حسن ❤️

طبعاً الرساله دي من اليوم داك و هي قاعده في شنطتي و كنت ناسياها ، ماريا أدت الرساله لـ عمر عاين للورقه و عاين لي ، ماريا قالت ليهو بالجد ضحكوني ، رساله لذيذه والله ، عمر قال لي دي شنو الفارغه دي ؟؟
سكته سااااي ، نهرني و قال لي بتكلم معاك أنا ! دا شنو ؟
قلت ليهو هناي.... قال لي اتكلمي عديل و حسن دا منو !؟
طبعاً قال لي الكلام دا بنبره عاليه لمن اتخلعت و حسيت بإحراج لأنو هرشني قدام ماريا ، ماريا قالت ليهو براحه عليها يا عمر و على فكره الرساله دي عاديه جداً و حاجات زي دي بتحصل بين الطلاب ، بحبوا بعض و برسلوا لبعض جوابات حب و غزل كدا لحد ما يمشوا من المدرسه و بعدها بنسوا بعض ، يعني الموضوع ما خطير و ياها حركات المراهقين ، طبعاً اتجاهل كلامها و كان بعاين لي بنظره حاده و منتظر مني إجابه ، بلعت ريقي و نزلت راسي و قلت ليهو دا واحد بقرا معانا من سادس ، براهو قاعد يرسل لي ، ماريا ضحكت و قالت لي والله شكلو كتب ليك جوابات كتيره ، وريني ليهم عليك الله حبيييت كتابتو ، شكلو جادي في حبو ليك ....
طبعاً هنا حصلت صنه و أنا اتخلعت لأنها قالت الكلام دا قدام عمر ، كانت بتضحك و عامله فيها ظريفه فـ لمن عمر عاين ليها بلعت لسانها و دخلت سنونها !
عمر رفع أصبعو و قال لي أوعك تباري لي الفارغه دي و الولد الزفت دا خليهو يختاك ، لو لقيت ورقه زي دي تاني في شنطتك صدقيني حـ اهد الفصل فوق راسك و راسو ، انتِ ماشه المدرسه تقري ولا ماشه عشان تباري الفارغه !؟

ماريا قالت ليهو ما تبالغ يا عمر ! هم لسه صغار و أياً كان البحسو الولد دا ناحيتها في النهايه حـ ينتهي و..... هنا هرشها و قال ليها انتِ خليك ساكته !!
طبعاً أنا لو ما كنت زعلانه و موقفي لا أحسد عليه كان ضحكت عشان هرشها ، ياخ لمن ملامح وشها اتغيرت ! طبعاً زعلت و طلعت برا ، و أنا بكل هدوء لملمت حاجاتي و عمر دا يعاين لي ساي ، أول ما إتحركت من جنبو قال لي اتمنى انك تسمعي الكلام ، و اتمنى انك ما تخليني اتعامل معاك بأسلوب تاني لا حـ يرضيك لا حـ يرضيني !
ما إتلفت عليهو ، سمعت القالو و دخلت غرفتي و أنا عيوني مليانه دموع ، بكيت كدا لمن قلت بس ، لكن فهمت إنو ماريا عملت كدا قاااصده و يمكن هي حاسه أو عارفه إني ورا الحاجات الحصلت معاها ، زي السكر في الملاح ، و الشطه الفي الشاي ، بس لو عارفه ليه ما قالت حاجه و ليه ما جات واجهتني !
طبعاً معظم اليوم قضيتو في غرفتي و ما وريتهم وشي ، حتى لمن ناس عمتي جوا أنا ما طلعت قعدت معاهم ، لمن جهزوا الغدا و نادوني قلت ليهم ما عايزا ، عمتي جات و قالت لي أجي! مالك ما عايزا تتغدي ؟!!
_ ما جعانه
= ما جعانه أكلتي شنو !؟
_ سااي كدا ما حاسه بجوع
= انتوا يا جماعه في شنو ! ماريا ذاتا قالت ما عايزا !

سكته ساااي ، قالت لي عمر شاكلكم !؟ ما رديت عليها ، طوالي طلعت الهول و سمعتها قالت لـ عمر انت شاكلت مها و ماريا ؟؟ قال ليها ما شكل ، كلام عادي ☺️
قالت ليهو واااي انا منك يا عمر ! هسي مها بسببك ما عايزا تاكل ! قال ليها خليها على راحتها لمن تجوع براها حـ تمشي تاكل ، فاروق قال ليهو عملت ليهم شنو يا مان و زعلتهم الإتنين !؟
قال ليهو انسى و أكل أكلك ، عمتي شالت أكل و جابتو لي ، ما عارفه عملت نفس الشي مع ماريا ولا لا لكن أنا ما رضيت آكل ، قدرت ما حنستني ما دخلت لقمه في خشمي ، في الآخر زهجت و قالت لي أنا فترت منكم انتِ و عمر ، هو عنيد و انتِ أعند منو ، قالت كدا و طلعت من الغرفه ، قعدت كداااا و أنا عيني على الأكل ، لمن ما قدرت استحمل أكتر قعدت آكل ....
تاني يوم قمت بدري عشان أمشي براي و ما أخلي عمر يوصلني ، جهزت نفسي و شلت شنطتي و طلعت و كان معاي قروش ، لمن وصلت الحوش لقيت ماريا بتغسل في وشها بـ صابونه ، قعدت أحمر ليها و انبذها في سري و هي عشان مغمضه عيونها ما شايفاني ، لمن اتذكرت إني نسيت كراسي في غرفتي رجعت عشان أجيبو ، لمن جيت طالعه تاني المره دي شفت عمر واقف مع ماريا و هي بتبكي !!!
كانت بتقول ليهو أنا ما كنت قاصده شي و الموضوع بالجد بضحك و ما كنت شايفاهو خطير و ما حبيت انك تعصب على بت الناس ساي !
قال ليها تمام فهمتك يا ماريا و أصلاً أنا ما كنت قاصد ! قالت ليهو كيف يعني ما قاصد ، هرشتني كأني شافعه قدامك ، عمر أنا ما بحب زول يرفع صوتو علي ، قلبي ما بستحمل ، بالجد ندمتني على اليوم الجيتكم فيهو ، بس ماف مشكله اليوم حـ أمشي من هنا ، ان شاء الله أمشي و أقعد جنب باب المستشفى ، قال ليها يا بت أفهمي قلت ليك ما قاصد يعني ما قاصد فـ ماف داعي تكبري الموضوع !!
قعدت تتباكى ليهو و أنا حسيت قلبي انقسم نصين ! هو ليه واقف معاها ! ليه بحنس فيها و أنا ما حصل مره جا حنسني أو راضاني !
قربت أطرشق من شدة الزعل ، طلعت طوالي و جيت ماره بـ جنبهم لكن لا اتكلمت معاهم لا عاينت ليهم ، أول ما اتخطيتهم ، عمر قال لي ماشه وين انتِ كمان !!
ما رديت عليهو ، قال لي بنبره غليظه بتكلم معاك أنا !!
إتلفت عليهو و قلت ليهو : لابسه لبس المدرسه و شايله شنطتي حـ أكون ماشه وين مثلاً ؟؟!
قال لي بطلي لئامه ، انتظريني أغير قميصي و أوصلك ، أول ما هو دخل أنا طوالي طلعت و غيرت شارعي كمان عشان لمن يطلع ما يشوفني ، مشيت بإستعجال كدا لحد ما وصلت المحطه ، كانت في حافله مليانه بس ناقصها نفر ، فـ ركبت طوالي ، أول ما قعدت لمحت عربية عمر و شفتو لمن نزل منها و بقى يتلفت ، الحافله اتحركت و أنا بعاين ليهو سااااي بس هو ما شايفني ، طول الطريق كنت بمسح في دموعي ، زعلت و إختنقت لمن اتذكرت إنو بفضل ماريا علي ، عملت شنو هي عشان يحنسها ؟! عاجبو فيها شنو عشان يراضيها !!؟

في المدرسه سهى قعدت تحنس فيني عشان أقول ليها أنا مالي ، قالت لي اليوم من جيتي ما عاجباني ، مالك زي العايزا تبكي !
لمن بقت تقول لي كدا ما قدرت أمسك نفسي فـ قعدت أبكي ليها ، قالت لي خليني أخمن ، أكيد بتبكي بسبب عمر حبيب قلبك ! اها اكتشفتي إنو حبك ليهو من طرف واحد ولا هو عرف إنو أمو حاجزاك ليهو و رفضك ؟؟!
رفعت راسي و قلت ليها أصلاً دا العايزنوا انتِ و صحبتك ، قالت لي شنووو !! صحبتي منو يا بت !؟
قلت ليها صحبتك ماريا ، أصلاً الغلط غلطي أنا لأني حكيت ليك رغم إني عارفه انك مصاحبه ماريا يلي هي خاته عينها على عمر ! ما عارفه كيف من دون ما افكر قعدت أحكي ليك و أشاركك أي حاجه بتخصني ، قالت لي مها ثواني فهميني في شنو و علاقة ماريا ببكاك دا شنو !؟

قلت ليها خلي الإستهبال ، استحاله ماريا ما تكون قالت لي انها قاعده معانا في البيت و استحاله انتِ ما تكوني وريتيها إنو عمتي حاجزاني لـ عمر ... سكته مسافه بعدها قلت ليها عشان كدا هي جات ناطه لينا في البيت !!
طبعاً حسيت نفسي ياداب فهمت ! ايوه انا عارفه إنو ماريا خاته عينها على عمر بس لمن جاتنا في البيت ما اتوقعت انها تكون جايه عشان عمر أو عشان سهى حكت ليها ، كنت ظانه إنها بالجد جات عشان بيت ناس عمر أقرب من بيتهم للمستشفى و عشان ما بتقدر تقعد في بيت خالتها !
_ دقيقه ، فهميني واحده واحده ، ماريا بتعمل شنو في بيتكم ؟؟
= عليك الله يا سهى بطلي استهبال ، ماريا ابوها مرقد في المستشفى بس هي جات لأنك حكيتي ليها إنو عمتي عايزاني لـ عمر
_ ابوها في المستشفى و هي معاكم في البيت ؟؟! والله يا مها ما عارفه و أول مره أسمع الكلام دا !!
= أنا عارفه انها عايزا عمر و انتِ داعماها و فهمت الحاجه دي من يوم عرس محمد لمن كنتِ بتجيبي ليها سيرة البت القطريه عشان تحرضيها و تخليها تخت عمر في راسها ، ما عارفاك حـ تستفيدي شنو من الحاجه دي !!
قعدت تعاين لي مسافه بعدها قالت لي :
ايوه صح كنت بحاول أحرض ماريا و أحمشها عشان تعمل حاجه و ما تقعد تعاين لـ ولد عمها و هو بعرسها غيرها ، و أنا عملت كدا عشان بالجد حسيتها بتحبو رغم انها كانت بتحاول تنفي الحاجه دي ، و ايوه خططنا إنو نطير البت ديك من عمر و أنا عندي شريحه ما مسجله جبتها لـ ماريا فـ بقت ترسل بيها للبت ديك و تملى ليها راسها و تقول ليها كلام كلو كذب عن عمر ، و عشان البت بعيده عن عمر و يمكن عشان ما بتعرفو كويس صدقت الكلام الإنقال عنو ، المهم ما خليناها في حالها و بقينا نرسل ليها من رقمين مجهولين أنا من جهه و ماريا من جهه تانيه ، و لمن عمر رسل لينا في الأرقام دي عرفنا إنو العملناه جاب نتيجه و إنو علاقة عمر بـ عنود بقت على الحافه ، طبعاً كان بحاول يعرف نحنا منو و عايزين منو شنو و جبنا رقم عنود من وين ، طبعاً حظرناهو ، و زرعنا الشك في قلب حبيبتو القطريه لحد ما خلاها و دا القلتيهو انتِ ، المهم لمن انتِ قلتي لي إنو عمتك حاجزاك لـ عمر ما قدرت أقول ليك إنو ماريا بتحبو ، كنت عايزاك تفهمي إنو حبك ليهو دا من طرف واحد ، لأنو عمر بعد ما انفصل عن البت القطريه ديك كان متواصل مع ماريا حتى انها رسلت لي دردشات ليهم ، فـ حسيت إنو عمر بدا يميل لـ ماريا و أمورهم بدت توضح بس ما كلموا زول ، ما كنت عايزاك تعشمي فيهو لأنو ما ليك 💔
طبعاً هنا حسيت قلبي إنفطر ! معقوله !
قلت ليها أنا الغبيه كنت قايله روحي أقرب صحبه ليك ! تقريباً كلكم بتفضلوا ماريا علي !
قالت لي أبدأ والله ما بفضلها عليك ، صدقيني لو من البدايه كنت عارفه انك بتحبي عمر كان وقفت معاك بس انتِ ما حصل قلتي لي أو لمحتي لي فـ بقيت خاته فكرة انك شايفه أولاد عمتك ديل زي أخوانك !
سكته سااااي ما اتكلمت معاها ! قالت لي لو كان عمر حابيك معليش حـ اقيف معاك و حـ امنع ماريا من انها تعشم فيهو ، قلت ليها انتِ كلمتيها قاااصده عشان تجي و تعمل حركات و تخلي عمر يركز معاها !
قالت لي والله ما كلمتها يا بت أفهمي الحاجه دي ، و أنا والله ما عارفه انها معاكم في البيت لأنها ما كلمتني ! نحنا من يوم عمر خلى البت القطريه ديك تواصلنا بقى ما زي زمان !
قعدت أعاين ليها بنظرات مليانه شك !!
قالت لي أنا جاده معاك ما تعايني لي كدا ! مسحت دموعي و قلت ليها أنا راجعه الفصل ، أول ما وقفت على حيلي جرتني و قعدتني ، قالت لي صح إنو ماريا صحبتي بس انتِ صحبتي أكتر منها ، و أكيد ما بفضلك عليها ، مدام عمر فارق معاك للدرجه دي و بسببو بكيتي البكى دا كلو فـ أنا المره دي حـ أقيف معاك ، زي ما ماريا جايه تعمل حركات و تلفت نظر عمر انتِ كمان أعملي كدا و أنا حـ اساعدك بس بالأول لازم نخلي ماريا تسقط من نظر عمر ، لمن صورتها تبهت قدامو ما حـ يفكر فيها تاني بعدها انتِ حاولي تلفتي نظرو و تعلقيهو فيك !
طبعاً بقيت أعاين ليها بحيره و إستغراب ، قالت لي أنا جاده ، ماريا ما أحسن منك ولا هي أعز علي منك فهمتي !؟
هزيت ليها راسي بس ، قالت لي بعدين لمن أرجع البيت حـ اتصل عليك و أوريك تعملي شنو تمام !
في نهاية اليوم الدراسي قلت لـ سهى أديني كتاب البلاغه ، قالت لي نسيتو في البيت ، قلت ليها بتبالغي والله ! عايزا اقرا عشان إمتحان العربي بعد بكرا ! قالت لي خلاص شيلي كتاب من أي واحد في الفصل أو أرح معاي البيت أديك ليهو ، قلت ليها ما حـ يدوني عشان حـ يقولوا عايزين يقروا ، و أصلاً أنا ما قاعده اشحدهم حاجه و ما قاعده اتعامل معاهم ، قالت لي خلاص أرح معاي البيت و شيليهو !!

طبعاً اتذكرت إنو عمر مانعني من إنو أمشي مع طالبه بيتهم من المدرسه مالم أصل البيت و استأذن منهم !... لمن سكاتي طال قالت لي أكيد عمر مانعك !!.... عايني أرح معاي و لمن نصل حـ أديك تلفوني تتصلي بيهو على عمر و تكلميهو انك معاي ، قلت ليها بس انا ما حافظه رقمو ! قالت لي أنا معاي رقمو ! لمن عاينت ليها قالت لي مش قلت ليك إنو عمر قبل كدا رسل لينا أنا و ماريا في الشرايح المجهوله ديك عشان يعرف نحنا منو !! يلا عشان كدا الرقم موجود ....
فكرت مساااافه كدا و في الآخر مشيت معاها بيتهم ، جرينا سلك الباب و دخلنا ، قلت ليها ناس بيتكم ما قاعدين ولا شنو ؟؟ قالت لي آي ما موجودين كل واحد في شغلو ، المهم و نحنا داخلين كنا سامعين صوت ونسه و ضحك ، قلت ليها شكلو ناس بيتكم قاعدين ! خلاص بنتظرك هنا ! قالت لي لا لا ما تقيفي هنا تعالي معاي ، يمكن دي سهام أختي و صحباتها ! أول ما دخلت معاها الأوضه اتفاجأت ليك بـ تلات نسوان بشربوا شيشه و عاملين بخور و خاتين جبنه و ودع قدامهم ، و وحده فيهم كانت لابسه لبس قط و قصير شديد و هي ما شاء الله عندها صحه ! طبعاً حسيت سهى ذاتا اتفاجأت و بقت تعاين لي ! المراه قالت ليها سهى جيتي متين !؟ دي صحبتك المعاك دي تعالن سلمن ! قالت ليها جينا هسي ، دخلنا سلمنا عليهم و طلعنا منهم ، سهى قالت لي دي أمي و ديل صحباتها ، ما عارفه اليوم الجابها بدري شنو ، طبعاً كنت ساكته سااااي دخلتني جوه و جابت لي مويه ، قلت ليها وريني دردشات عمر و ماريا ، قالت لي طيب ثواني ، مشت جابت تلفونها و جات ، كنت اول شي عايزا اتصل على عمر و اكلمو بس لمن اتذكرت هرشتو لي أمبارح و كيف هو قبيل قعد يراضي ماريا إتراجعت و قلت أصلاً ما حـ أطول فـ ماف داعي أكلمو ، سهى قالت لي طبعاً كنت حاذفه الواتس و ما عامله نسخ احتياطي للدردشات عشان كدا اتحذفوا بس عندي اسكرينات لجزو من دردشتهم ، المهم ورتني ليهم ، ماريا كانت مرسله لـ عمر و قالت يجيها في مكان معين ، قال ليها الحاصل عليك شنو ؟؟
قالت ليهو لمن تجيني حتعرف ، قال ليها تمام ، مسافة الطريق بس ، و يوم كانت مرسله ليهو : "عمر 😭😭😭" رد عليها و قال ليها ماريا خير في شنو ؟؟
رسلت ليهو ريكورد ، و عمر رد عليها بـ ريكورد ، قلت لـ سهى قالوا شنو في الريكوردات دي !!؟ قالت لي والله ما متذكره و ما عارفه هم قاعدين يتلاقوا وين و بقولوا في شنو ، بس علاقتهم ببعض قطعت شوط طويل ، عشان كدا أنا حاسه إنو حـ تواجهنا صعوبه لمن نحاول نبعد ماريا من عمر !
طبعاً حسيت قلبي بنزف دم ، يعني كونو عمر ما حاسي بي كوم و كونو يطلع بحب ماريا أو معجب بيها كوم تاني خالص ! ياداب حسيت إنو عمر بضيع مني ، لأول مره أحس إنو عمر يمكن ما يكون لي ! أنا ما بقدر اتقبل فكرة إنو يكون لـ وحده غيري ، ما برضى إنو تجي وحده و تشاركني فيهو ، عمر دا أنا أكتر وحده بتحبو ، و أكتر وحده عارفه تفاصيلو ، و أكتر وحده مستعده تعمل أي شي عشانو ، ماريا دي منو أساساً عشان تجي و تشيلو مني بكل بساطه !
فجأه سهى طقطقت لي أصابعها و قالت لي سرحتي وين !؟ قلت ليها والله ما حـ أخلي ماريا تشيل عمر مني ، ضحكت و قالت لي حسستيني إنو عمر لعبه أو شافع صغير ، اتطمني و أنا معاك ماريا ما حـ تقدر تشلبك ، المهم أنا شبه جهزت خطه ظااابطه كدا كـ بدايه ، قلت ليها شنو ؟؟
قالت لي :.............قلت ليها فكره ظابطه لكن عايزا ليها حظ ! قالت لي بتظبط ما تخافي ...
المهم قعدت اتونس معاها ، طبعاً كنت حـ أوريها بالعملتو مع ماريا في البيت بس مسكت نفسي في الدقائق الآخيره ، طبعاً ما حسيت بالزمن إلا لمن سمعت صوت أذان العصر ، قمت مخلوعه و قلت ليها اللييييله اتأخرت ، عمر حـ يضبحني !
قالت لي انتِ وقت خايفه منو للدرجه دي ليه رفضتي تتصلي عليهو و تكلميهو ؟؟
قلت ليها ما مهم و أساساً أنا ما خايفه منو ، جيبي لي الكتاب عشان أمشي ، فعلاً جابت لي كتابي و قدمتني لحد المحطه ودعتها و ركبت ، جاتني بالشباك و قالت لي الفات كوم و الجاي كوم تاااني و ماريا تشيل شيلتها 😎
لمن وصلت من بعيد شفت عمتي و خالتو إعتزاز و ماريا و معاهم اتنين من جاراتنا واقفين جنب الباب و واضح انهم مقلقين ، قبل ما أصلهم معزه إتلفتت شافتني و أشرت ليهم علي ، عمتي طوالي جات ماشه علي ، لمن إتلاقينا قالت لي مشيتي وين انتِ نحنا من قبيل نفتش عليك !! طبعاً كانت بتتكلم بسرعه و نفسها متقطع و الخوف باين عليها ، قلت ليها مشيت مع سهى بيتهم عشان كتابي معاها ، قالت لي كان تجي البيت و تكلميني ، انتِ ما عارفه كمية الخوف الدخلتيها فيني ، لو كان حصلت ليك حاجه لا قدر الله أنا أواجه أبوك كيف و أقول ليهو شنو !!

طبعاً بنتكلم و نحنا ماشين لحد ما وصلنا ناس خالتو إعتزاز ، خالتو إعتزاز قالت لي يا بت مشيتي وين انتِ خليتي كل الناس تطلع تفتش عليك ! عمتي قالت ليها اتخيلي يا إعتزاز نحنا هنا بنفتش عليها و ميتين من الخوف و هي مشت مع صحبتها بيتهم ! خالتو إعتزاز قالت لي بتبالغي والله ! كان ترجعي و تكلمي أهلك ما شفتينا قلقنا عليك كيف و ناس عمر طلعوا يفتشوا عليك و لـ هسي ما جوا راجعين !
المهم اتكلموا معاي و لاموني شديد بعدها دخلنا البيت أنا و عمتي و معزه ، عمتي قالت لي الدخلتيها فيني للآن ما طلعت !غيتو الله يسامحك يا بتي ، كدي النتصل على عمر دا و أقول ليهو انك رجعتي ، لمن مشت معزه قالت لي بالغتي والله ، مشيتي مع سهى ولا منو !؟ قلت ليها اي مع سهى ، كتابي معاها و امتحاني بعد بكرا عشان كدا مشيت أجيبو منها ، قالت لي ما شفتي عمر زهج كيف لمن جا من المستشفى و عرف انك لسه ما جيتي من المدرسه ، غيتو الليله لو جا راجع حـ يبقيك شاورما ، طبعاً كلامها خوفني جنس خوف ! بلعت ريقي و قلت ليها خليهو يجي ساي أنا ما خايفه منو .....
قعدت معاي شويه بعدها مشت ، طبعاً أنا بقيت قاعده على أعصابي و خايفه من جية عمر ، بعد مسافه كدا سمعنا صوت الجرس و أنا قلبي إشتغل زي الدلوكه ، أول مره أخاف للدرجه دي ، أول مره اتمنى إنو عمر ما يجي داخل ، عمتي مشت تفتح الباب و أنا قاعده في الهول ببلع ريقي و بضغط على أصابعي ! بقيت قاعده زي الزول المحكوم عليهو بالإعدام و منتظر حبل المشنقه !

- ‏"و إني أحبُكَ إمتلاكًا و تملكًا و كمالًا و أغارُ عليك تعصُبًا و تجننًا و حناناً "

‏"أرى بك شيئًا مُختلفًا عن البقية لا أعلم ما هو ، لكنه يشبهني ، يناسبني ، و أنتمي إليه كثيرًا."
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《27》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏

طبعاً لمن سمعت صوت حركه من شدة الخوف جريت دخلت جوه و قفلت الباب علي ، بعد شويه جاني صوت عمر و هو بقول لـ عمتي وينا مشت وين ! طبعاً لمن سمعت نبرة صوتو قلت الحمدلله إني جوه الغرفه و ما انتظرتو في الهول ، بقى ينادي علي و عمتي شغاله ليهو الله يرضى عليك يا عمر ما تسألها !! قال ليها وينا هي خليها تجيني مارقه ، فاروق قال ليهو مستحيل تجيك مارقه و انت بتناديها بالطريقه دي !!
جا ضرب لي باب الغرفه و قال لي أطلعي لي برا ، نهاي ما اتكلمت معاهو ، قال لي يا بت الناس أنا بتكلم معاك أفتحي الباب دا !!
طبعاً كل ما يتكلم معاي بخاف منو أكتر ، عمتي قال ليهو البت مشت لصحبتها عشان تجيب منها كتابها ، غلطها الوحيد انها ما جات كلمتنا ، قال ليها المشكله إني نبهتها يا أمي ، و هي عارفه كويس إني مانعها تمشي بيت أي زول من المدرسه مالم تصل البيت ، بس شكلها عايزا تقوي راسها و تتحداني .... طبعاً قعد يجوط و أنا بسمع فيهو و ببكي ، في الآخر لمن كلامو وجعني قررت أفتح الباب و يحصل الحيحصل ، لو عايز يضربني خليهو يضربني ، حركت مقبض الباب و فتحتو ، طبعاً كلهم قعدوا يعاينوا لي لأنهم ما اتوقعوا إني أفتح الباب و عمر لسه فاير و معصب ، ختيت عيوني في عيونو و حاولت أظهر ليهو عدم خوفي منو و أنا من جوه قلبي مقبوض ، جا علي و قال لي كنتِ وين ؟؟
قلت ليهو عمتك ورتك أنا كنت وين ، قال لي كلمتي منو لمن مشيتي مع صحبتك !؟
ما رديت عليهو ، نهرني و قال لي بتكلم معاك أنا ، استأذنتي من منو لمن مشيتي مع صحبتك بيتهم !؟.... أنا مش نبهتك !؟ مش قلت ليك ما تمشي ساي !
طبعاً سكته سااااي ، أول ما اتحرك و كان حـ يقرب مني أكتر ظنيت إنو حـ يضربني كف ، فـ غمضت عيوني و لمن فتحتهم شفت علاء واقف قدامي و مديني ضهرو ، قال لـ عمر أنا ما قاعد اتجادل معاك و ما قاعد اتدخل في قراراتك إحتراماً ليك ، بس المره دي انت زودتها ، فعلاً مها غلطت بس غلطها ما بستاهل ردة فعلك دي كلها ، كلنا خفنا عليها و كلنا بتهمنا مصلحتها بس ما بنعاملها بالأسلوب دا ، عمر قال ليهو ما المشكله هنا ! مدنها حريتها على الآخر و ماف زول قاعد يسألها أو يحاسبها عشان كدا بتعمل الفي راسها و....

_ و انت القاعد يحاسبك منو ؟؟ قايل انك الوحيد الصح و انك الوحيد الما قاعد تتصرف تصرفات غلط !؟

طبعاً دا علاء القال ليهو كدا ! كلنا بقينا نعاين لـ علاء بإستغراب ! عمر قال ليهو تسكت و ما تحاسبها على غلطها حاجه و تقيف و تدافع عنها في غلطها حاجه تانيه خالص !

_ والله لو انت شايف إني بـ تصرفي دا بدعمها في الغلط فـ على كيفك ما عندي ليك أي تبرير....

هنا عمتي اتدخلت و قالت ليهم ، عمر ، علاء جنيتوا انتوا ولا شنو !؟ كفايه لحدي هنا أي زول يمشي و يشوف شغلتو !

عمر اتجاهل كلامها و قال لـ علاء ما محتاج منك تبرير و أصلاً تصرفك دا ما ليهو مبرر غير إنك عايز تقيف معاها و خلاص ، للأسف يعني انت تفكيرك نفس تفكيرها و ما بتقدر تشوف الموضوع من زاويه تانيه ، لو مصلحتها بتهمك ما بتقيف وقفتك دي

_ والله ما ضروري أصرخ عليها و اشاكلها قدامكم عشان أثبت ليك إنو مصلحتها بتهمني أو إني بخاف عليها ، مشكلتك يا عمر انك مفتكر نفسك وصي عليها و مسؤول منها و إنو ليك كامل الحق في انك تحاسبها على تصرفاتها الكبيره و الصغيره ، لو انت بتعمل كدا عشان هي بت خالك فأحب أذكرك انها بتكون بت عمي ، و لو في زول هنا من حقو يحاسبها فـ هو أنا لأنها بت عمي و لأني أولى بيها ، يمكن لو تصرفك دا اتصرفتو مع ماريا أو غيرها من بنات أعمامك ما كنت حـ أعترض لأنك أقرب ليهم مني و أنا مهما كانت صلة القرابه بيني و بينهم ما من حقي أفرض قوانيني عليهم و اتحكم فيهم 😊

عمتي قالت ليهو انت بتقول في شنو يا علاء !! أولادي ما بس معتبرين مها بت خالهم هم معتبرنها أختهم عديل عشان كدا بخافوا عليها !
_ ما إختلفنا يا عمتي لكن ليه عمر في الكبيره و الصغيره بشاكلها و بحاول يسيطر عليها ، يعني إذا أنا ولد عمها ما لمتها و عاتبتها قدر دا هو ليه ينفعل فيها الإنفعال دا كلو كأنها قريبتو هو براهو و كلنا غرباء عنها !؟

فاروق قال ليهو ايوه صح عمر انفعل بس انت كمان ما تاخد ردة فعلو دي لـ منحنى تاني ! والله ماف داعي للكلام دا كلو و مها بتهمنا كلنا و ماف واحد أولى بيها من التاني ، لو انت ولد عمها نحنا أولاد عمتها و في النهايه أمي أخت أبوك و كلنا أهل ! يعني شنو ولد عمها و يعني شنو ولد عمتها !! الفرق شنو قول لي !

عمر قال ليهو خليهو يقول العايزو ، شكلو عندو كلااام كتير كاتمو جواهو ، اتكلم اتكلم و طلع الجواك ، عمتي قالت ليهو عمررر !
_ والله إلا لو انت حابي تسمع مني كلام معين بس انا العندي قلتو ليك
عمتي هرشتهم الإتنين و قالت ليهم اسكتوا ياخ ما تجلطوني ، شفع انتوا عشان تقعدوا تتشاكلوا !! ما تجننوني ياخ الله يرضى عليكم ، فاروق ساق علاء و طلع بيهو برا و عمتي قعدت في أقرب كرسي و هي متضايقه و عمر أداني نظره كدا و بعدها طلع و تاني ما راجع ، طبعاً بعدها كان في صمت حاصل في البيت ، ماف زول اتكلم مع زول ، أي زول قافل بابو عليهو و ساكت ، طبعاً سهى اتصلت و قالت لي ان شاء الله المنفسن داك ما عمل ليك شي ، قلت ليها لا ... و ما حكيت ليها لأنو ما كان لي نفس أحكي شي ، كنت متضايقه و زهجانه و ما عجبني الحصل و الكلام الإنقال لـ عمر ، قالت لي اها حصل شنو في موضوعنا ؟؟! قلت ليها ماريا ما جات و عايزا اقول ليك خلي الموضوع دا لمن نخلص إمتحاناتنا قالت لي تمام .....
المهم عدوا 3 أيام و عمر و علاء الجو بيناتهم بقى مكهرب و بقوا ما بقعدوا في مكان واحد ، عمر كان مقاطعنا نحنا الإتنين ، يعني كأني قلت لـ علاء تعال و اتجادل مع عمر !!
طبعاً كان باقي لي إمتحانين و ماريا تاني ما جاتنا ، يوم خلصنا إمتحانات و جيت راجعه البيت اتفاجأت لمن لقيت محمد و مرتو جوا راجعين من السفر ! طبعاً شوفتو فرحتني شديييد ، مشيت سلمت عليهم و قعدت اتونست معاهم شويه بعدها استأذنت و مشيت غرفتي ، طبعاً محمد كان جايب لي معاهو عطور و مرطبات و شامبوهات و فستانين ، انبسطت شديد بيهم ، أولاد عمتي ديل مستحيل يجوا من السفر و ما يجيبوا لي حاجه ، المهم في اليوم البعدو عمتي قالت حـ تعمل كرامه لـ محمد و مرتو ، في نفس اليوم دا جوا جاراتنا القراب سلموا على محمد و مرتو ، خالتو إعتزاز قالت ليهم طولتو شديد ، محمد قال ليها فعلاً والله لأني نزلت شغل طوالي و ما قدرت أمد إجازتي ، قالت ليهو ربنا يوفقك يا ولدي ، طبعاً كلنا كنا موجودين إلا عمر و علاء ، عمر جا و طلع و علاء من طلع ما جا راجع تاني ، بعد ما جاراتنا مشوا ، محمد قال الحاصل شنو يا جماعه البيت دا هادي كدا و الشباب ديل مشوا وين !؟ عمتي قال ليهو أنساهم ، عمر و علاء ديل ما عندهم أي موضوع ، قال ليها ليه في شنو ؟؟! قولوا لي !! قالت ليهو قبل كم يوم كدا اتناقشوا و زعلوا من بعض ، قال ليها دي شنو حركات الشفع دي ! خليهم لمن يجوا راجعين أنا بتكلم معاهم ، قالت ليهو آي عليك الله اتكلم معاهم و وعيهم ، ما عارفه الصابهم شنو فجأه كدا و بقوا يتصرفوا زي الشفع !!
فعلاً لمن عمر و علاء جوا راجعين محمد قعدهم و بقى يتكلم معاهم ، قال ليهم ما عارف اتناقشتوا في شنو لكن انتوا ما شفع عشان تزعلوا من بعض و تطلعوا تخلوا البيت ! إذا ديل انتوا رجال البيت بتتحامقوا كدا النسوان حـ يعملوا شنو !؟
عمر قال ليهو أنا ما زعلان و أساساً نسيت الحصل و طلوعي من البيت ما ليهو علاقه بـ نقاشي مع علاء و لو سألتني أنا أصلاً ما متذكر نحنا اتناقشنا في شنو !!
علاء قال ليهو نفس الحكايه ! هسي لو ما كلام محمد دا ما كنت حـ اتذكر اننا اتناقشنا مع بعض ، والله انا ما بركز مع الحاجات التافه أو الما مهمه 😊

محمد قال ليهم والله حيرتوني !! هسي ما قادر افهم انتوا كدا زعلانين من بعض ولا اتصالحتوا و نسيتوا الموضوع !؟
عمر قال ليهو اتطمن نسينا الموضوع ، محمد قال ليهو أتمنى ذلك !
طبعاً حسيت إنو عمر بقى غريب علي و البيت كمان بقى لي مسيخ لأنو بطلع على طول و لو جا ما بتكلم كتير معانا و أنا بالغلط ما بتكلم معاي ، قلبي وجعني شديد و ما عجبني الوضع الحاصل فـ قررت أمشي ليهو و اتكلم معاهو بس قبليهو مشيت لـ علاء ، قلت ليهو انت و عمر بالجد اتصالحتوا ولا لسه متزاعلين من بعض !؟
قال لي نحنا ما أطفال عشان نتصالح ، قلت ليهو يعني لسه زعلان منو !؟ قال لي أنا زعلان من تصرفاتو ، ما شايفاهو كيف بحب يتحكم فيك و دائماً برفع صوتو عليك في حاجات ما تستاهل ، ياخ لو غلطتي مفروض يناديك على جنب و يتكلم معاك براااحه و يوريك الصح من الغلط مش يقعد يكورك فوق راسنا ! قلت ليهو عشان هو قبل كدا نبهني !! عاين لي و سكت ! قمت من مكاني و مشيت لقيت عمر برا في الحوش بسقي في الشجر ، كان مديني ضهرو و ما عارف إني وراهو ، مشيت عليهو و لمن وصلتو قلت ليهو عمر !! من دون ما يتلفت قال لي خير !؟
قلت ليهو معليش ما حـ أكررها تاني !... قال لي ما فاهم بتتكلمي عن شنو انتِ !؟
قلت ليهو حـ اسمع كلامك تاني و ما حـ أمشي أي مكان من دون ما أكلمك ، قال لي لا لا إياك تكلميني و أمشي وين ما عايزا و في أي وقت ... طبعاً بتكلم معاي من دون ما يعاين لي ، اتحركت و جيتو من قدام ، و قلت ليهو كان عندي امتحان عربي و كتابي كان مع سهى و ما كنت حافظه رقمك عشان اتصل عليك بتلفونها و أكلمك ، لمن مشيت معاها بيتهم كانت بتشرح لي في حاجات مهمه عشان الإمتحان و ما حسينا على الزمن ، أنا عارفه انك منبهني و أنا ما عملت كدا تحدياً ليك ، صدقني لو كنت حافظه رقم تلفونك كان اتصلت عليك طوالي و كلمتك ! سكت سااااي ، قلت ليهو والله جد ! ما حـ أكررها تاني يا عمر ! قال لي دي جملتك المعتاده ! قلت ليهو المره دي جاده معاك ! قال لي و البت دي أنا حذرتك منها ! قلت ليهو عارفه بس كتابي كان معاها و كنت محتاجه ليهو ! سكت مسااافه بعدها قال لي في اليوم داك ليه طلعتي و مشيتي رغم إني قلت ليك انتظريني عشان أوصلك !؟ قلت ليهو عشان انت شاكلتني !
خت الخرطوش و قال لي شوفي ضيقي و غضبي بنتهي في نفس اللحظه أو الساعه البقول فيها العندي ، مثلاً أنا في اللحظات ديك شاكلتك بسبب الرساله و الفارغه الفيها و بعديها اتعاملت معاك عادي لأني نبهتك لـ نقطه معينه و انتهينا ! يبقى انتِ ذاتك لو شاكلتك أو هرشتك أزعلي في نفس الساعه أو زيدي عليها شويه ماف مشكله بس لمن زعلك يروح ماف داعي تعاندي و تقوي راسك و تزعلي بالأيام على نقاش حصل و انتهى !
قلت ليهو هسي انت ذاتك زعلان من اليوم داك و بقيت ما بتتكلم لا معاي لا مع علاء ! قال لي ما زعلان بس حسيت انكم ما متقبلين كلامي أو ما محتاجين ليهو ! قلت ليهو غيتو انا محتاجه ليهو 😁
قال لي يا مستهبله هسي لو منعتك تعملي حاجه حـ تقومي تزعلي بالأيام و تقوي راسك !
قلت ليهو لأنك مرات كتيره بتغيظني و جنك تشاكلني ! قال لي اعمل شنو لو انتِ وحده بترفع الكثافه و بتجيب الضغط ، مثلاً صحبتك ديك عليك الله أنا حذرتك منها كم مره !؟ سمعتي كلامي ؟؟ قلت ليهو خلاااص اعتذرت منك ! قال لي فايدة الإعتذار شنو إذا انتِ بتعيدي نفس الغلط !!
قلت ليهو شوفني المره دي كان ما سمع كلامك ! قال لي و اها معشوقك صاحب الرساله الفارغه ديك !؟؟
صريت ليهو وشي و قلت ليهو ياخ ما تقول لي معشوقك ! الولد دا انا بكرهو موووت ، قال لي عشان كدا محتفظه برسالتو ، قلت ليهو بالعكس محتفظه بيها عشان بتضحكني و أصلاً أنا كنت ناسياها في الشنطه و ماريا دي ما عارفه الخلاها تفتش شنطتي شنو ! قال لي المهم ما تباري الفارغه و أبعدي عنو و عن كل أولاد مدرستك ، قلت ليهو أصلاً أنا ما قاعده اتعامل مع المدرسه كلها ...
فجأه جانا صوت مازن و هو بقول يا عمر أطلع لي عايزك ، عمر قال ليهو تمام طالع ، طبعاً مازن ناداهو من ورا الحيطه و هو في بيتهم ، عمر قفل الماسوره و نزل أكمام قميصو ، قال لي شعري مرتب !؟ قلت ليهو ايوه مرتب ، ابتسم و مشى على الباب لحد ما طلع ، أخدت نفس عميق و إتحركت و أنا مبتسمه ، أول ما رفعت راسي لقيت علاء واقف جنب باب الهول ، قال لي ياخ عمر دا 24 ساعه بشاكل فيك و دائماً انتِ بتبكي و بتزعلي بسببو و بعد دا كلو بكل بساطه تمشي و تعتذري منو حتى و هو غلطان !! فعلاً الكلب بريد خانقو ، تاني لو شفت عمر دا بمردغك في التراب ما حـ اشتغل بيك ، قال كدا و طلع طوالي و ما أداني فرصه عشان اتكلم !
قلت ماف مشكله هسي حيزعل و بعدين حـ يروق ، المهم تاني يوم كانت الكرامه ، طبعاً ماريا الشومه جات و من شفتها مزاجي إتعكر ، كانت بتتونس مع مرت محمد ، طبعاً مرتو إسمها بيان ، جاهم عمر و سأل بيان عن محمد ، قالت ليهو ما عارفه والله هسي كان هنا ، طبعاً الحاجه اللاحظتها إنو ماريا لا اتكلمت مع عمر لا عاينت ليهو مرتين ، قلت يمكن قنعت

منو و فهمت إنو عمر ما ليها ! الحاجه دي فرحتني و خلت مزاجي الإتعكر بسبب شوفتها يتحسن !
بالعصريه كدا لمن البيت فضى شويه طلعنا سراير في الحوش و قعدنا فيهم ، طبعاً أهل ماريا ذاتهم جوا بس ما طولو رجعوا المستشفى طوالي ، عمتي و أبوي و مرتو و محمد و بيان كانوا قاعدين يتونسوا براهم ، و أنا و معزه قاعدين في سرير برانا بنتكلم و ناس عمر قاعدين برا في الشارع و مازن ذاتو معاهم ، شويه كدا ماريا جات طالعه من جوه و هي جايبه معاها الشاي ، أبوي قال ليها يا سلاااام عليك ، تسلم يدك يا بتي ، قالت ليهو الله يسلمك يا عمو .... عاينت ليها مغيوووظه و قلت عايشه الدور و عامله نفسها ست البيت !
معزه قالت لي بسم الله مالك معاها ! قلت ليها ياخ البت دي شومه ، بكرهاااا موووت ! قالت لي ليييه عملت ليك شنو ! بري ماريا دي بت ظريفه !
قلت ليها شنووو !! ظريفه !؟ ياخ دي وحده خسيسه ، جايه مخصوص عشان عمر ، قالت لي شنو !!.... قلت ليها عايني متذكره يوم عرس محمد لمن هي و ناس سهى كانوا بتوسوسوا ! يلا الحصل ....... الخ
قالت لي مبااالغه ! معقوله هم العملوا مشاكل بين عمر و البت ديك !! و انتِ وقت عرفتي ليه ما كلمتيهو يا مها ! واااي ياخ ما معقوله البينهم ينتهي بسبب ناس ماريا و هم ما عارفين !
قلت ليها عايزاني أمشي لـ عمر و أقول ليهو ماريا هي الزرعت الشك في قلب عنود و هي سبب كل المشاكل عشان كدا أرجع لـ عنود و عرسها !!
_ ما عارفه اقول ليك شنو ، بس عمر لو عرف اول شي حـ يشاكلك انتِ لأنك عرفتي و سكتي و بعدها حـ يعلق مشنقة ماريا و صحبتك الشومه ديك ، أصلاً من يومي ما حبيتها و الحركات الزي دي ياها شبهها !
قلت ليها ما حـ يعرف ، المهم ماريا جايه هنا عشان تتلصق في عمر ، و يوم داك دخلت يدها في شنطتي و طلعت رسالة حسن الكان وريتك ليها ديك ، طلعتها و قرتها قدام عمر و قعدت تضاحك نظام ما قاصده حاجه ، بسببها عمر شاكلني و هرشني قدامها !
_ معقوله ماريا تعمل كدا ! بالجد طلعت خسيسه زي ما قلتي بس ما ظاهر عليها !
قلت ليها دي بتعمل اكعب من كدا ، لكن أنا ما حـ أخليها ، طبعاً يوم داك لمن غاظتني كبيت ليها سكر في الملاح و مره شطه في الشاي و شككتها في نفسها
_ والله ما بصدق ! واااي يا مها مبالغه
قلت ليها خليها تصبر لي كما كرهتها عمر و البيت دا
معزه اتنهدت و قالت لي انتِ مش قلتي عمر عايزك !؟ و بما إنو عايزك انتِ صدقيني لا حـ يعاين لـ ماريا لا غيرها ، عشان كدا ما تتعبي نفسك و ما تعملي أي شي و ابعدي من سهى دي لأنها بتاعة مصايب !
قلت ليها ايوه هو عايزني بس يمكن بسبب ماريا يغير رأيو و يحبها هي !
_ لو حصل كدا معناها إنو ما حباك أو قرر يعرسك ساي كدا من باب إنو عايز يعرس و خلاص !
طبعاً كلامها قهرني جنس قهر ! ختت يدها على يدي و قالت لي ما تملي قلبك حقد و كراهيه ، ماف زول بشيل حاجه ما ليهو ، لو عمر دا مكتوب ليك لا ماريا لا غيرها ما حـ يقدروا ياخدوهو منك ، قلت ليها بس هي مجتهده عشان تخليهو يعاين ليها ! يومتا هي زعلت عشان عمر هرشها و قعدت تتباكى و عملت دراما رخيصه و هو قعد يراضيها ! يعني اتخيلي عمر الما قاعد يراضي زول راضى ماريا و هي صدقت روحها عشان كدا للآن عامله نفسها زعلانه منو عشان يجري وراها !
_ عايني خليها تعمل العايزاه و تجتهد قدرتها ، ريحي راسك على الآخر و ما تجاريها في الحاجات البتعملها و بعدين عمر ما صغير و أكيد عارف نفسو عايز شنو ، لو هو قسمتك طال أو قصر الزمن حيكون ليك ....
طبعاً ما إهتميت بكلامها ، في نفس اليوم دا بعد ما الناس فاتوا ماريا جهزت نفسها عشان تمشي المستشفى ، طبعاً أبوها كان لسه في المستشفى و حالتو ما اتحسنت ، يطلع من عمليه و يدخل في عمليه ، عمتي قالت ليها ماشه وين ! بيتي الليله و أمشي بكرا ، قالت ليها لا لا عايزا أمشي ، فجأه عمر جا و قال ليها الزمن اتأخر أمشي بكرا ، من دون ما تعاين ليهو قالت ليهو لا ، قال ليها ماريا أسمعي الكلام ! بكرا أنا بنفسي حـ أوديك ! عمتي قالت ليها اقعدي و بكرا كلنا حـ نمشي معاك المستشفى ، فعلاً في الآخر قعدت و أنا الحرقه عايزا تقتلني ، عمر مالو و مالها تمشي ولا تقعد ! طبعاً هي عامله نفسها زعلانه منو من اليوم داك !
المهم مرت الأيام و أنا لسه خاته ماريا في راسي بس ما لقيت فرصه عشان اعمل الحاجه الإتفقنا عليها أنا و سهى ، المهم يوم من الأيام ماريا خلت تلفونها في الهول و دخلت الحمام ، براااحه قفلت الباب عليها ، كان في عمر بس في البيت و قاعد في الهول ، قلت ليهو عمر كأنو في زول في الباب ! قال لي ما سمعت صوت ، و لو كان في زول كان حـ يرن الجرس ! قلت ليهو غيتو سمعت صوت زول بضرب في الباب ، دقيقه حـ أمشي اتأكد ، قال لي لا خليك بمشي أنا ، أول ما هو طلع أنا بسرعه شلت تلفون ماريا و دخلت جهات الإتصال و غيرت اسم سهى من سهى لـ حبيبي ❤️ و ختيت التلفون ، مشيت دخلت جوه و اتصلت على سهى و قلت ليها يلااا اتصلي على ماريا ، قالت لي اييييك لمن نسيت الخطه دي ، أخيراً الحظ ضرب ! ثواني طيب ،