قلت ليهو دا شنو قال لي ما عارف لمن نصل نفتحو، رجعنا مع المغرب ناس ابوي كانو لسه ما جو خنساء ابت تخش معانا رجعت بيتهم طوالي، بعد صلينا فتحنا الكيس كان فيهو مصلاية كبيرة زرقاء وملمسها ناعم ومصحف كبير وكم كتاب تفسير وسيرة قال لي عارفه يا ميسم شيخ صابر دا بريدني ريدة كان طوالي بتونس معاي وبحكي لي هو حفظ القران كيف قال لي كنت في نفس عمرك لمن حفظت، قبيل لمن كنت واقف مع زملائي ناداني ووصاني كتير قال لي ما تقول انت حافظ وخلاص تنوم على كدا كل فترة اقرا وراجع حفظك عشان ما تنسى وقال لي انت زول طيب و قلبك صافي ما تخلي الدنيا تغيرك وما تصاحب الا الطيب زيك، قال لي كلام كتير حتى الكيس دا.. قلت ليهو يا حليلو ما قصر والله ربنا يديه العافيه... قال لي اللهم امين يارب بستاهل كل الخير والله..
بعد اتونست شويه مع طلال قمت سخنت الاكل ، وانا بصلي العشا تلفوني ضرب لمن انتهيت لقيتو استاذ والي رجعت ليهو سلم وسأل من ناس البيت بعد داك قال لي داير اتكلم معاك في موضوع فاضيه؟ قلت ليهو ايوه فاضيه اتفضل.. قال لي تتذكري الوكالة الرسلتك فيها؟ قلت ليهو مش نبراس ولا كان اسمها شنو؟؟.. قال لي اي ياها، افتتحو فرع جديد في العربي وعايزين موظفين بتاع الوكاله اتواصل معاي بنفسو وقال داير ناس من طرفي قلت ليهو الشغالين معاي كلهم مسوقين ما حصل اشتغلو في وكالة قبل كدا قال لي بدخلهم كورس ١٥ يوم بكونوا جاهزين، المهم قلت اكلمك انتي اول .. قلت ليهو انا ؟؟ ااا ما بقدر والله.. قال لي يا زوله! ما حتلقي فرصه زي دي تاني.. قلت ليهو عارفه والله لكن ما عندي اي طريقه انا ماسكه بيت واسرة يا استاذ والي وشغل التسويق دا ياداب قادرة اوفق بينو وبين البيت.. قال لي خلاص تمام ما حاضغط عليك لكن لو غيرتي رائك في اليومين ديل كلميني طوالي.. قلت ليهو ان شاء الله شكراً ليك شديد والله.. قال لي العفو على شنو..
بعد قفلت سرحت مسافه اتخيلت نفسي اشتغلت بالجد، ما بنكر انو عندي الرغبه في الشغل ورغبه شديده كمان لكن اعمل شنو وضعي ما بسمح لي ولا افكر حتى في حاجه زي دي.. شتت الافكار من راسي وقمت مشيت جوا لي طلال لقيتو لسه في الكرسي قدامو مصلايه وماسك المصحف بقرا بصوت عالي، صوتو سمح ومريح بقيت واقفه بعاين ليهو لمن انتبه لي كمل الايه وعاين لي قال لي تعالي اقعدي واقفه ليه.. قلت ليهو ااا لا انا نعست وعايزه ارقد لكن ناس ابوي ما جو اتأخرو الليله.. قال لي فعلاً اتأخرو ان شاء الله خير .. قلت ليهو كدي اتصل على طارق.. طلعت برا شلت التلفون واتصلت ليهو ما رد قلبي قبضني ما من عوايدهم لحدي الوقت دا ما يجو ولا يتصلو يقولو حيتأخروا.. الساعه ٩ ١٠ جات ولسه ما جو هنا ما قدرت اقعد اكتر لبست توبي ومشيت بيت ناس عمو عبدالله جريت السلك ودخلت لقيت خالتو صفيه لابسه عباية وجاريه طالعه من باب الصاله قلت ليها خالتي بسم الله مالك.. وقفت وبقت تعاين لي وهي مصدومه قلت ليها في شنو يا خالتو صفيه.. ساقتني قعدتني في سرير الحوش وقالت لي بصوت متقطع طارق في المستشفى... قلت ليها طارق مالو يا خالتي طارق مالو قولي.. قالت لي وقع في السبتن ودخلت في ظهرو سيخه..

___
مشهد من الفصول الجايه..

--انتي يا بت كل ما تحصل ليك مشكلة مع راجلك تجينا جاريه البيت؟ الناس يقولو عليك شنو، مشاكلكم اقعدو وحلوها مع بعض انتو ناس كبار وعاقلين ما مراهقين
__ حياة اهدي ما شايفه البت حالتها كيف، تعالي يا بتي اقعدي.. غيم جيبي لي اختك دي مويه.. اقعدي يا بتي وقولي لينا الحصل شنو خلاك تطلعي زي الوقت دا وتجي هنا
قالت بحرقة ودموعها ماليه وشها: باسل عرس يا ابوي باسل عرس فيني
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《11》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
قال لي وهو بكورك بأعلى حس: زحييي مني قلت ليك خليني في حالي.. ختيت كباية المويه وقلت ليهو لمتين حتتصرف بالطريقه دي؟ قايل كواريكك دي حتحسن وضعك؟ وريني انت بتعمل كدا لشنو، كلنا في البيت دا بنحاول بقدر الإمكان نساعدك ونخفف عليك وما بنلقى منك غير الشكل والنِّهير... قال لي انا ما طلبت من زول مساعده ولا دايركم تجو جنبي خلوني في حالي بس.. قلت ليهو وحتعيش كدا كيف؟؟ اذا يدك ما قادر ما ترفعها حتاكل وتشرب كيف ولا داير تموت؟... سمعت صوت نحنحه وضربات عكاز قبلت وراي لقيت طلال خاشي بلبس المدرسه قال لي ميسم ختي الصينيه واطلعي.. طلعت وانا زعلانه ومليانه من طارق من يوم الحادث الحصل ليهو وهو اليوم كلو زهجان ويكورك في الماشي والجاي.. السيخه الدخلت في ظهرو عملت ليهو شلل وبقى قاعد في الكرسي ما بقدر يتحرك عملو ليهو عملية اخدت ٦ ساعات وطلع منها بالشلل دا اترقد في المستشفى اسبوع والليله ١٠ ايام من طلعوه، كلنا اتأثرنا بالحصل ليهو واكترنا ابوي لأنو بعتبرو ضراعو اليمين، بقى هو البأكلو وبشربو وبقضي ليهو حوايجو كلها، طارق كان ما بخلي زول يقرب منو ولا يهبشو غيرو مستعد اليوم كلو يقعد جعان لحدي ما ابوي يرجع من الشغل.. مشيت عريشة المطبخ وقعدت في السرير خاته يدي في راسي تعبت انا تعبت من الحاصل دا.. رفعت راسي بصوت طلال بقول لي ميسم مالك؟.. مسحت دمعتي وقلت ليهو ماف شي .. قعد جمبي في السرير وقال لي ما صح القلتيه لي طارق دا.. قلت ليهو قسيت عليهو صح؟؟ قال لي شديد.. دموعي تاني جات جاريه بكيت قدرتي وطلال كان بعاين لي بدون ما يقول حاجه بعد قشقشت دموعي قال لي غسلي وشك وتعالي عندي معاك كلام.. مشيت الحمام غسلتو وجيت قعدت مكاني قال لي داير اسألك سؤال لمن تجيك الملاريا الكعبه ديك وترقدك في السرير كم يوم احساسك بكون شنو؟.. قلت ليهو بكون زهجانه وعايزه اتعافى سريع.. قال لي ليه؟.. قلت ليهو كيف ليه؟ عشان ماف زول ماسك البيت غيري اكلكم وشرابكم النظافه ،الغسيل، المكوه.. قال لي ما خالتي صفيه ما مقصرة قعد تجي وتعمل دا كلو لحدي ما انتي تقومي.. قلت ليهو فعلاً ما بتقصر لكن برضو هي عندها مسؤوليات تانيه وبتتعب شديد بين بيتنا وبيتهم.. قال لي طيب شوفي انتي ملاريا رقدتك يومين ما استحملتيها فما بالك بي حالة طارق هسي، زهجو وكواريكو دي كلها بسبب الحاله النفسيه الداخل فيها.. طارق يا ميسم بين يوم وليلة لقى نفسو قاعد في الكرسي واقل حوايجو ما قادر يقضيها, الحمام لا مؤاخذه الا بمساعدة ابوي وطارق بالذات انتي عارفه طبعو قادرة تتخيلي احساسو كيف بعد التغير الجذري الحصل ليهو في حياتو؟.. زي ما انتي شايفه اننا بنتقِّل على خالتو صفيه لمن تمرضي هو كمان بقى شايف نفسو متقِّل علينا وعلى ابوي شايف انو ابوي بقى براهو الماسك مسؤوليتنا كلنا... عشان كدا نحاول الفترة دي نستحملو بقدر الإمكان لأنو محتاج وقفتنا معاهو بدون ما نحسسو بالنقص، لمن يشوفنا حنينين عليهو هو زاتو بحن عارفه هسي بعد طلعتي واتكلمت معاهو براحه قِبل يشرب من يدي المويه؟؟ الكلمه الطيبه بتغير حال انسان ١٨٠ درجه دا غير الأجر البنؤجر عليهو ليه نحن نبخل بالحاجه دي؟..... كنت منزلة راسي زي الطفل البسمع عتاب امو على غلطه عملها رفعت راسي وقلت ليهو انت كيف قادر تكون كدا؟ .. قال لي كيف ما فاهمك؟..

قلت ليهو خلاص انسى امشي غير ملابسك لحدي ما اسوي ليك حاجه تاكلها.. قال لي ما تسوي حاجه بحاول تاني مع طارق عشان يفطر وباكل معاهو..
بالرغم من انو طارق كان كل يوم بوجه لي طلال الإهانات على اعاقتو ويحسسو انو ناقص في كل فرصة لكن طلال نسى كل الكان بعملو ليهو لا وبعمل عكس اللقاه منو، انا كل يوم بنبهر بي طلال وبقتنع انو قلبو ابيض وواسع لدرجة ما بقدر يشيل مقدار ذرة زعل من زول، ياريت بس لو كنت زيو..
جاني بعد ساعه قال لي ابى ياكل لكن اتكلمت معاهو شويه وكان متجاوب معاي.. بعد المغرب ابوي جا ومشا لي طارق طوالي قبل يغير ملابسو عمل ليهو الروتين بتاع كل يوم حتى قعد يتغدى طلال قال ليهو ابوي انت ما تتكلم معاهو وتقنعو يخلينا نساعدو زي ما انت بتعمل.. ابوي قال ليهو انت ما عارف اخوك؟ راسو يابس وبعد الحادث دا بقى اكعب خلوهو كدا بس بجي يوم براهو بناديكم تساعدوه.. قلت ليهو لكن ما بنفع كدا يا ابوي طارق عندو ادويه مفروض ياخدها بعد الفطور وهديك قاعده زي ما هي لأنو ما بفطر كدا بنفع؟؟.. قال لي ياتو ادويه دي ليه ما وريتوني؟ .. قلت ليهو انت ما عارف؟.. قال لي البعرفني شنو بدون ما تقولو لي، خلاص من بكرا بجي بفطرو وبديها ليهو.. قلت ليهو بدل تقطع شغلك كلمو يخلينا نأكلو نحن.. ما رد علي سكت تاني، بعد لميت الحاجات وجيت ارقد ابوي جا قال لي القروش العندك فضل منها كم؟؟.. قلت ليهو اقل من ١٠٠.. قال لي حاولي ما تصرفي منها كتير القروش العندي دي زاتا شويه.. قلت ليهو كويس.. كان قايم اترددت شويه قبل اقول ليهو ابوي دقيقه، قال لي في شنو؟؟.. قلت ليهو ااا انا انا جاتني فرصة شغل كويسه.. قال لي شغل شنو دا؟.. قلت ليهو ياهو شغل الوكالات زاتو.. قال لي ما هدي انتي شغاله.. بلعت ريقي وقلت ليهو لا يعني المره دي امشي الوكاله واشتغل عديل.. سكت وكان سرحان قلت ليهو الوكالة في العربي وقروشهم كويسه.. طلع وما قال حاجه لعنت نفسي على غبائي كيف قدرت اصلا افتح معاهو موضوع زي دا وانا عارفه ان ماف احتمال ١٪ انو يوافق..
تاني يوم الصباح بعد شربنا الشاي وطلال طلع دخلت اغسل العده وانا قاعده فيها ابوي ناداني غسلت يديني وقمت قال لي الشغل حقك دا نظامو كيف.. مسافه حتى قدرت استوعب هو بقول شنو معناها من امس كان بفكر في كلامي قلت ليهو من الاحد للخميس الدوام ببدا ٨ صباحاً لي ٢ ظهر.. قال لي بترجعي قبل المغرب يعني ؟؟ قلت ليهو اي اذان العصر بكون وصلت من هنا للعربي اقل من ساعه.. قال لي انتي العرفك شنو متين مشيتي العربي قلت ليهو ما مشيت قبل كدا لكن عمو عبدالله شغال هناك وسمعتهم بقولو كدا.. قال لي والشغل دا مضمون؟ قلت ليهو من ياتو ناحيه؟.. قال لي يعني شغل كويس وقروشو حلال؟؟.. قلت ليهو اكيد طبعاً يا ابوي لو ما كدا ولا كنت بفكر اشتغل فيهو اصلا.. سكت مسافه بعدين قال لي خلاص انزلي لو دايره.. قال كلامو دا ومشا خلاني واقفه مصدومه ما عارفه وقفت كم وانا بالمنظر دا، قعدت في السرير وانا بضحك معقوله ابوي وافق كدا طوالي؟؟؟ حاسه الدنيا ما شايلاني بالفرحه.. غسلت عدتي سريع ونظفت البيت بعد داك لبست التوب وقلت لي طارق ماشه ناس عمي وجايه.. عاين لي وقبل بدون ما يرد، مشيت لقيت خنساء ياداي صاحيه بتشرب في الشاي وشايله التلفون قلت ليها ايامك والله.. قالت لي ايامي شنو تعالي تعالي شوفي المنشور دا.. قعدت جنبها وشلت التلفون كان مكتوب فيهو انو نتائجهم حتكون خلال الاسبوع دا قلت ليها جد الكلام دا؟؟ قالت لي بري ما عارفه اصلا ليهم كم يوم بقولوا قربت ما كنت مصدقه لكن الناشر الكلام دا استاذ معروف ما بقول كلام ساي.. قلت ليها والله يمكن هسي دا الشهر الرابع من انتهيتو اتأخرت زاتا السنه دي.. قالت لي واي يا ميسم انا خايفه والله.. قلت ليها ما تخافي الكاتبو ربنا بحصل وانتي زاتك اجتهدتي شديد ربنا حيعوض تعبك ان شاء الله.. قالت لي ان شاء الله يارب ياخ.. قامت دخلت المطبخ وجات شايله كبايه وبراد الشاي رفعتو وقالت لي هسي سخنتو .. قلت ليها عاملاه انتي ولا خالتو صفيه؟؟ قالت لي بري دي امي انا صحيت هسي .. قلت ليها لو كدا بشربو شاي اللبن حق خالتو صفيه لا يُعلى عليه.. قالت لي جزمه وانا شايي مالو.. قلت ليها حقك برضو ما كعب لكن ما بلحق حق امك صحي هي وينها؟.. قالت لي مشت تجيب ملوحه من حجه سعاد الليله خالتي الرضيه وبناتها جايين وقالو ليها اعمليها لينا.. قلت ليها ايواا كويس والله ،ما وريتك بت عمك نازله شغل.. قالت لي شغل شنو انتي اصلا شغاله.. قلت ليها لالا شغل في وكاله عديييل.. حسيت البسكويته وقفت في حلقها بقت منططن عيونها وبتعاين لي شربت من الشاي ختت الكبايه ورفعت رجلها في السرير وهي بتقبل علي قالت لي دقيقه دقيقه قلتي شنو؟؟؟. قلت ليها وانا بخلف رجولي ورافعه كباية الشاي: زي ما سمعتي.. قالت لي ناويه تشردي من البيت يعني وتستقلي براك؟ .. ضحكت وضربتها في كتفها قلت ليها اشرد في عينك،تتذكري العرض القالو لي والي؟ بس كلمت بيهو ابوي ووافق ..

قالت لي ابوك دا ياهو عمي عثمان البعرفو دا ولا واحد تاني؟؟ .. قلت ليها ياهو زاااتو.. فجأة قامت حضنتني وهي بتكورك: واااي يا ميسم ما مصدقه أخيراً حلمك حيتحقق.. قلت ليها ما تبالغي هو ما كان حلم.. زحت وقالت لي اها حتنزلي متين؟ قلت ليها لسه ما كلمت والي بتصل ليهو بعدين اشوفو حيقول لي شنو.. قالت لي ياخ انا فرحانه شديد لازم نحتفل بالمناسبه دي رايك شنو تجي تبيتي معاي الليله ونساهر سوا؟؟ قلت ليها بياته عديل؟ ما بنفع والله.. قالت لي ما بنفع لشنو عايني انا اصلا عندي حاجات كتيره عايزه احكيها ليك وناس هاله وسهى جايين ما بقدر احكي قدامهم .. قلت ليها تعالي بيتي معاي انتي.. قالت لي ااا طيب خلاص ما مشكلة.. ختيت كباية الشاي بعد خلصتها وقلت ليها هي يلا انا ماشه خليت طارق براهو وجيت.. قالت لي صحي هو عامل كيف.. قلت ليها والله ياهو في نفس حالتو ديك.. قالت لي يا حليلو ياخ والله بقيت احن عليهو بعد الحادث دا.. اتنهدت وقلت ليها الحمدلله بس، عايني لمن امك تجي ناديني دايراها في موضوع.. قلت لي طيب بكلمها.... بعد رجعت البيت اتصلت لي والي وسألتو لو لسه ما لقو موظفين قال لي لسه.. لمن وريتو اني موافقه فرح شديد وقال لي بتصل ليهم هسي اوريهم..
__ ___

"زفته ياخ ردي ردي".. جدعت التلفون بعد اكتر من ١٠ محاولات.. بقت ماشه وجايه في الغرفه وبتسأل نفسها سبب تجاهلو ليها الفترة دي كلها شنو ما كان برد على مكالماتها ولا رسايلها حتى مروة ما كانت بترد عليها.. وقفت في نص الغرفة وهي خاته يدها في نصها بتفكر فجأة مشت على الدولاب وطلعت فستان ابيض منقط باسود بصل لنص رجولها ضيق من فوق وواسع من تحت.. استحمت ولبستو مع اسبورت بنفس الوان الفستان وطرحه بيضاء لمت شعرها كعكة بعشوائية عملت ميكب خفيف وختت الطرحه في كتفهاشالت شنطه بدون يد صغيرة دخلت فيها تلفونها وفتحت باب الغرفه لمن سمعت صوت غسان رجعت سريع وصلحت الطرحه حتى طلعت لقتو مشا قدامها ونازل بالدرج بتكلم بالتلفون.. في الصاله كالعاده حياة وعبدالرحيم بشربو القهوة وغسان قاعد ولسه بتكلم..
حياة: على وين ان شاء الله
غيم: مسجله زيارة لي غدير ومروه
حياة: ما كان تطلعي مع اختك قبيل
غيم: صحيت قبل شويه ولقيتها طلعت
عبدالرحيم: ما ماشه معانا لي ميسم؟
غيم: يمكن الحقكم مع مروة بهناك
حياة: هسي لو كان اشتغلتي انتي زاتك ما كان قعدتي عاطله كدا واتحاومتي لي كدا، يومتها شفت صحبتك ديك الكانت بتجي ايام الجامعه
غيم: ملاذ؟ شفتيها وين
حياة: لمن مشينا انا وابوك نعمل الفحوصات، لقيتها شغاااله في المستشفى
غيم: اي اشتغلت بعد التخريج طوالي
حياة: وما كان تشغلك معاها
غيم: قالت لي بشوف ليك طريقه انا براي ابيت
حياة: انتي يا بت عوقه؟؟ ابيتي لشنو؟؟
غيم: امي انا عايزه استمتع بحياتي اول واعوض سنين الجامعه ديك كلها حتى افكر في الشغل
حياة: مششششم وحات الله بت بتفكيرك دا ما لاقتني الواحده ما تصدق تتخرج متين وتلقى ليها شغل وانتي تقولي "عايزه استمتع بحياتي"
عبدالرحيم: مالك على البت يا حياة خليها براحتها الناقصها شنو عشان تشتغل؟
حياة: تشتغل عشان تنفع نفسها هي وتعوض سنين القرايه التعويض دا بالشغل ما بالراحه
عبدالرحيم: وقت دايرة تشتغل بتشتغل
غيم قامت باست ابوها في راسو: يخليك لي يا سيد الرجال
غيم: خلاص ما تتأخري وتتحاومي هنا وهناك يا امشي بيت اختك يا ارجعي البيت
اتأففت وهي بتعاين لاخوها، ليها ايام بتحاول تسأل من طارق فوق فوق بدون ما يحس ولمن سألتو " الزول داك الكان بجي البيت طوالي مالو بقى ما بجي شغلتو ولا شنو؟ الكان اسمو طارق داك" اداها نظرات اوحت انو فِهمها ف سكتت وقامت من جمبهم قبل يمطرها باسئلة استجواب...
غسان: لالا يا زول نحن لينا قريب الشهر متحيرين في موضوع الموظفين دا، بعد بكرا ان شاء الله تمام يديك العافيه
قفل ومعالم الفرحه ظاهره في وشو
غيم: خير ان شاء الله ابسطنا معاك
غسان: دي مواضيع شغل، انتي ماشه وين
غيم: ماشه الشركة لي مروة وغدير
اداها نظره متفحصه من فوق لتحت، غيم بقت تجرجر الفستان عشان قصرو ما يبان..
غسان: الفستان دا تاني ما تلبسيه انتي ما صغيرة عشان تلبسي حاجات زي دي رجلك كلها برا
حياة: مالو هسي الفستان دا
غسان: امي مليون مره قلت ليك لمن اتكلم مع البنات ديل في شي غلط ما تدخلي وتدافعب ليهم
سكتت وقامت شالت الصينيه متهربة من نظراتو

فتحت الباب ومدت راسها: هاااي
غدير: بسسم الله الجابك شنو
غيم: ادخل ولا مشغوله؟
غدير: خشي خشي
دخلت وقفلت الباب وراها قعدت في كرسي جمب مكتب غدير وسألتها من الشغل قالت وهي بتلعب بخصلة شعرها الطالعه من الكعكة
-- مروة مالها الليله مشيت مكتبها لقيتها ماف السكرتيرة قالت لي ما جات

غدير وهي شغاله في الكمبيوتر: بري ليها كم يوم ما جات ما بعرفها مالها
سرحت مسافه وهي بتعاين للشباك " معناها في قصة كبيرة ورا اختفاءهم المفاجئ دا" قامت وصلحت شعرها في مراية الشباك
-- طيب انا حامشي ليهم اصلا امي وابوي كانو ماشين لي ميسم الليله انتي حتجي؟
غدير: ما اظن انا الليله عندي شغل كتييير ومروة زاتا وصتني على حاجات اعملها ليها
قبلت عليها باستغراب و نزلت يديها من شعرها: مروة؟ مش هسي قلتي ما عارفاها مالا؟
غدير: اي ما عارفه اتصلت لي بس قالت لي اعملي لي كدا وكدا ولمن سألتها من سبب غيابها ما ردت علي
طلعت من الشركه وفي بالها الف سؤال " ياربي مروة عرفت بعلاقتنا انا وطارق ولمن واجهتو نكر وسلبطها فيني؟؟ ما بستبعد منو عملة زي دي.. ولا ياربي فكانا الاتنين عكس الهوا؟.. اصبر لي يا طارق مهما كانت العمله العملتها حاحسبك عليها" ... ركبت تاكسي واتجهت على وجهتها فتحت ليها الباب احلام سلمت عليها ودخلت
غيم: ناس امي جو؟؟
احلام: لالا لسه ما وصلو اتفضلي

"ناديها تجي تجهز معاي الفطور دا ما ممكن انا شغاله براي من الصباح في المطبخ"
" عمتي انا دخلت عشان انظف الغرفه ١٠ دقايق ما تميتها ما هدي جهزت اي شي في شنو تاني"
غيم: السلام عليكم
اتحركت ميسم على باب الصاله وسلمت على اختها همست ليها وهي حاضناها: عشه دي مالا هايجه من الصباح
ميسم: اسكتي بس دا حالها كل يوم .. اتفضلي ناس امي وين ما جو معاك؟؟
غيم: لالا جايين وراي.. خالتو امال كيفك
امال: اهلين يا بتي كيفك اخبارك
غيم وهي بتقعد في جلسة الصاله: كويسه الحمدلله
امال واحلام دخلو المطبخ وميسم قعدت مع غيم
غيم: مروة وينها مافيشه؟
ميسم: قاعده جوا في غرفتها هسي وقت جيتي دخلت
غيم: مالا عيانه؟
ميسم: بري ليها كم يوم كدا ماااا على بعضها
غيم: انا فقدتها بتصل ليها ما بترد الليله قلت امشي ليها في الشركه غدير قالت لي ما قعد تجي
ميسم: اي قالت مؤجزه
غيم: خلاص انا داخله ليها
ميسم: انا زاتي اقوم على الفطور دا قبل ما عمتي تجي تطنطن لي

طق طق طق
مروة: اتفضل
دخلت ولقتها راقده في السرير متغطيه بالبطانيه والغرفة مضلمه وبارده
غيم: بت مروه
مروه: خشي يا غيم
قعدت في السرير وزحت منها البطانيه المغطيه بيها نص وشها هبشت ليها راسها بكفها وهي بتقول: مالك عيانه؟
مروة: فترانه بس
غيم: ما مشيتي الدكتور
قامت واتكلت في راس السرير رفعت رجولها وشبكت ايدينها فوقهم: لالا ما بحتاج
نزلت راسها عليها وهي بتقول: في شنو احكي لي
اتسللت منها دمعه نزلت راسها مسحتها بسرعه وشفطت انفها: مافي شي
غيم طوت رجلها الشمال في السرير وصلحت قعدتها وسألتها مرة تانيه: متأكدة مافي شي؟؟
رفعت راسها وبعد مسافه حتى غيم لاحظت لعيونها الوارمه والمحمره
قالت بصوت مبحوح: انا وطارق انفصلنا
لولا الظلام السائد في الغرفه كانت شافت شبح الابتسامه في وش غيم.. قدرت بصعوبه تخفي فرحتها بالخبر الزفتو ليها شريكتها في حبيبها، رسمت ملامح الزعل على وشها وهي بتقول: كيف يعني انفصلتو؟ متين حصل الكلام دا وليه ما حكيتي لي؟
مروة: الاسبوع الفات، ليهو اسبوعين كان سافهني قبليها كان مختفي لفترة تلفونو قافل وما بستلم رسايلي.. بعديها بقى بفصل في وشي وبقرا الرسايل وما برد لمن قلبني اكلني وحسيت في حاجه حاصله ليهو اتصلت لي صحبو محجوب..
غطت وشها ونحيبها ذاد شهقاتها كانت بتظهر من اهتزاز اكتافها.. غيم كانت بتعاين ليها مستنياها تكمل وقلبها بضرب بخوف
غيم: اها قال ليك شنو؟
نزلت يدينها وقالت ودموعها لسه جاريه: قال لي كويس ما حاصله ليهو حاجه قلت ليهو انا دايرة اتكلم معاهو ضروري هسي امشي ليهو، لمن مشى الخط فاتح ساعه ما داير يتكلم بكيت وحنست وهو ما شغال بي في النهايه قال لي تاني ما تتصلي لي والبينا انتهى.. اتخيلي يا غيم بكل البرود الفي دنيا قالها لي وبكل بساطه نسى كل البينا بدون ما يوضح لي شي خلا في راسي الف سؤال بدون جواب واحد شككني في نفسي مع اني متأكده ما زعلتو في حاجه
اشرت بي يدها المضمومه على نفسها وبحيل مهدود واصلت: انا.. انا يا غيم ما حبيت زول في الدنيا دي زي ما حبيتو كنت بحكي ليهو اي شي حتى مواعيد البريود بتاعتي عارفها وثقت فيهو لدرجة حتى صوري بالبجامه رسلتها ليهو (جرت كم القميص) البجامه دي زاتها كنت متصورة بيها ورسلتها ليهو
غيم: د.دقيقه كيف يعني؟؟
اتنهدت بصوت متقطع وغطت وشها مره تانيه.. غيم نزلت يدينها بقوة وهي بتعاين ليها وعيونها مولعة : هو كان بطلب منك كدا ولا انتي براك كنتي بترسليها
مروة: هو كان بطلب مني وانا ما بقدر ارفض ليهو طلب
بالغضب شفايفها بدت ترتجف بللتهم وهي بتحاول تمسك اعصابها مسحت ليها دموعها ورسمت ابتسامة حنينه على وشها: طيب اهدي وروقي واحد زي دا كان بستغلك ما بستاهل الزعل دا كلو

ضمتها عليها وعيونها بقت مركزة على الدولاب ونفسها قايم..
بعد اتأكدت انها هدت مشت غرفة اختها قفلتها عليها وطلعت تلفونها فتحت الواتس ورسلت تسجيل صوتي
" اسمعني هنا يا حيوان، بتغشني انا؟؟ تغشني تقول لي بحبك انتي وخليت مروة من زمان وبهناك تقول ليها رسلي لي صورك بالبجامة يا تافه.. زهجت مني ولقيت واحده تانيه وداير ترميني زي فلانه ديك، لو قايلني حاتبكى ليك زيها كذااااب، انا بعرف احاسبك كيف بعرف لامثالك ديل كويس وصلت لي غايتك واشتغلت في المصنع مش كدا؟؟ لو ما خليتك تنطرد منو زي الحمار ما ابقى غيم عبدالرحيم"
___

بالليل عملت كيكه قلت نشرب بيها شاي بعدين انا وخنساء، بعد العشاء ختيت منها في صحن ووديت لي ابوي وطارق.. دخلت لي طلال لقيت حولينو الكتب وبقرا ختيت في التربيزة الصينيه الفيها عصير ليمون وصحن كيك قال لي جزاك الله خير.. قلت ليهو وجزاك.. بقيت قاعده وبحاول افتح معاهو موضوع الشغل ما عارفه ليه كانت فيني خوفه وحاسه انو ما حيوافق... قلت ليهو طلال دايرة اقول ليك شي.. ختا القلم والكراس وقال لي خير ان شاء الله.. قلت ليهو وانا بدعك يديني: انا نازلة شغل.. قال لي شغل؟ وين وشغل شنو... حكيت ليهو الحاصل كلو من لمن والي عرض علي شغل الوكالة.. سكت في البدايه بعدين قال لي وطارق؟ البقعد معاهو منو في وضعو دا.. قلت ليهو فكرت في الحاجه دي لكن لقيت انو وجودي مع طارق ما بعمل شي غير يضايقو ولا بخليني اعمل ليهو حاجه.. قال لي اي هو ما بقبل لكن الظروف ما معروفه زول بوضعو دا يخلوه براهو يوم كامل؟؟.. قلت ليهو فكرت كدا وقلت اعمل ليهو الفطور قبل اطلع واصلا ابوي هو البجي يفطروا قبيل لمن جا كلمتو قال لي ما مشكله وكلمت خالتو صفيه تظهر عليهو كل ما تكون فاضيه.... فضل ساكت ما رد علي قلت ليهو شكلو كدا موضوع الشغل دا ما عجبك.. قال لي في الوضع الطبيعي كنت حانبسط ليك شديد لكن في وضعنا دا ما حاسي انو الشغل مناسب قلت ليهو يعني اخليهو؟؟.. قال لي والله ما عارف يا ميسم، انتي استخرتي؟... قلت ليهو امممم لا.. قال لي مفروض اول شي تستخيري حتى تكلمي ابوي لكن ما مشكله هسي صلي استخارة ولو الشغل دا فيهو خير ربنا بسهلو ليك... ابتسمت وقلت ليهو حاضر..
بعد اتكلمت مع طلال حسيت نفسي ارتحت لكن في نفس الوقت موضوع طارق شلت ليهو الهم صليت استخارة ودعيت ربنا يسهل لي اموري.. بعد قمت جات خنساء قالت لي قلت بتكونوا نمتو قلت ليها ابوي وطارق بس النامو، اقعدي اسوي الشاي واجي عملت لي كيكه قبيل.. قالت لي يا سلاام دا الكلام الليله سهرة صباحي... عملت الشاي وقعدنا في العريشة بقت تحكي لي عن مرتضى وانا مره اركز معاها مره اسرح.. فجأة وانا سرحانه قالت لي انتي رايك شنو؟؟ قلت ليها رائي في شنو؟.. قالت لي اجي لي ساعه بقول ليك عايزه اكلم امي في اليومين ديل ومحتارة بالك وين انتي ؟؟ قلت ليها معاك بس سرحت شويه، والله كلميها اي احسن قبل تعرف براها.. قالت لي انتي الشاغل بالك شنو؟.. قلت ليها ولا شي.. قالت لي علي انا؟؟ بطلي وقولي مالك.. اتنهدت ووريتها بكلامي مع طلال قبيل بعد انتهيت سألتها : انا انانيه يا خنساء.. قالت لي منو انتي؟؟؟ حاشاك يا بت عمي.. قلت ليها جد كدا، حاسه اني كان مفروض افكر في طارق قبل اوافق على الشغل.. قالت وانتي عايزه تشتغلي عشان شنو؟ مش عشان ناس بيتكم؟؟ وين الانانيه هنا الليله لو ظروفكم ممتازه وما محتاجه للشغل دا معليش نقول ما بتفكري الا في نفسك لكن انتي ما اشتغلتي عشان نفسك عشانهم هم... قلت ليها ما عارفه ياخ احترت.. قالت لي يا زولة ما تفكري في الموضوع كتير انتي استخرتي بعد كدا امورك براها بتمشي وزاتو بعدين بشغلك دا لو لقيتي طريقة جيبي ليهو ممرضة تقعد معاهو في البيت عشان ما تحسي نفسك قصرتي تجاهو، نحن زاتنا ما بنخليهو براهو لكن عشان ترتاحي.. قلت ليها ممرضة تقعد معاهو براهم كدا؟؟.. ضحكت وقالت لي يا بت انتي عويره هي جايه لي مريض ولا جايه بيت دع*اره.. قلت ليها استغفر الله بتعرفي الحاجات دي من وين انتي.. ضحكت تاني بصوت عالي وقالت لي مالي قايلاني لسه صغيرة ؟؟ المهم يا زوله كدي احكي لي حاسه بشنو وانتي حتبقي زولة شغل بعد دا.. قلت ليها ما عارفه احاسيسي ملخبطه.. قالت لي كدي بس بكرا تجي تقولي تعبت من الشغل ودايرة اخليهو، بضبحك سامعه.. ضحكت وقلت ليها سمح بسنن ليك السكينه من هسي

____

*" قلوبنا تتناسب طردياً مع المسافات فهي تعشق اكثر بعد البُعد"*
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《12》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
قمت اذان الصبح صليت ومشيت المطبخ ركبت الشاي وفتحت التلاجه طلعت حلل الملاح العملتهم امس بتاعت الاسبوع كلو سخنتهم ولحدي ما نظفت وشربت الشاي كانو بردو لمن الواطه فتحت كوركت لي خالتي صفية ورفعتهم ليها تختهم لي في الفريزر حقتهم.. طلال قبل يطلع قال لي خلي بالك وانتبهي على نفسك ربنا يوفقك يا اختي ويحفظك.. قلت ليهو امين ويحفظك يا اخوي الغالي... بعد انتهيت مشيت استحميت ولبست عبايه رماديه بابيض وطرحه بيضاء.. بحب الابيض شديد ولبساتي كلها لازم يكون فيها اللون دا.. لبست شبط اسود وشلت شنطة يد سوداء دخلت فيها التلفون وقروش المواصلات وكيس فيهو الفطارة الخاته فيها سلطة اسود وعيشتين للفطور.. بعد انتهيت مشيت لي طارق كان قاعد في العريشة وبحضر في التلفزيون الصغير الجابو ليهو ابوي امس عشان يتلسى بيهو قلت ليهو انا طالعه عايز حاجه؟.. ما رد ولا كأني واقفه بتكلم معاهو.. مشيت على ناس خنساء ووريتهم اني طالعه حتى مشيت الزلط ركبت ووريت الكمساري المكان المفروض انزل فيهو.. سرحت بالشباك في الشارع الناس كلها طالعه مع الصباحيه تفتش رزقها ربنا يفتحها على اي زول بتعب ويشقى عشان يأكل اطفالو لقمة حلال💙..اتذكرت والي قال لي لمن تطلعي كلميني فاتصلت لي ووريتو اني نص ساعه وحـاصل .. اول ما نزلت لقيت المكتب قصادي كان في النص يمينو في وكالة تانيه وشمالو بقالة كبيره، ركبت الخمسه عتبات حقات السلم وياداب قدرت اشوف الراجلين القاعدين في كرسين جمب الباب كان واحد منهم لاقيتو في الوكاله المره الفاتت اسمو غسان لو ذاكرتي ما خذلتني.. كان رافع رجلو الشمال فوق اليمين ومثبتها الشمال بي يدو اليمين ويدو التانيه ماسك بيها كباية قهوة بحكي للمعاهو حاجه ومندمج لدرجة لمن سلمت ما انتبه لي الراجل التاني رد السلام.. دخلت طوالي والمكتب كان نظامو نفس الفي العمارات، كان فاضي الا من بت قاعده في واحد من التربيزتين شكلها حتكون زميلتي فرحت وحمدت ربي انها بت كنت شايله هم لو طلع ولد حاتعامل معاهو كيف .. اول ما دخلت قالت لي اتفضلي بقدر اساعدك بشنو؟؟.. قلت ليها انا ميسم المفروض اشتغل معاك.. قالت لي اهاا ميسم اقعدي طيب انا حـانادي غسان من برا
لمن قامت ياداب انتبهت للبسها كانت لابسه اسكيرت اسود ضيق وبلوزه مورده بالوان كتيرة وطرحه باللون الفوشي .. قعدت في الكراسي المرصوصه بتاعت الانتظار بعد اقل من دقيقه جو خاشين سوا وكانو بضحكو البت قالت ليهو غايتو انت يا غسان .. مدا يدو وقال لي السلام عليكم ميسم.. قلت ليهو وانابصافحو : وعليكم السلام.. قال لي اتفضلي معاي في المكتب... طلع علاقة فيها مفاتيح كتيره شديد وبواحد فيهم فتح باب المكتب الجوا .. دخلت واستغربت جد المره دي، كأنو نقلو المكتب داك بنفس تفاصيلو هنا قعدنا وشبك يدينو ختاهم في التربيزة الكبيره القدامو قال لي طيب يا استاذه ميسم المفترض انك تنزلي كورس طوالي من اليوم لكن لقينا حل تاني أمثل، انتي طبعاً حتمسكي شغل التذاكر وتسويق العقود والي الدين وراك مش كدا؟؟.. قلت ليهو ايوه وراني.. قال لي ظريف أساساً التسويق انتي ممتازة فيهو - حسب ما شفت في عقد مندوب شركة stc- صراحه دي اول مره عقد مننا يتباع لاكتر من ١٠ انفار في فترة شهرين ودا الخلاني اوافق اشغلك معانا اول ما والي كلمني بيك..

المهم، كدا حيفضل شغل التذاكر ودا اماني بتعرف ليهو كويس، كانت ماسكاه في الوكالة الكانت شغاله فيها قبل تتوظف عندنا ف انا اقترحت عليها انها تدربك عليهو لحدي ما تتقنيه كويس.. اها انتي رايك شنو؟.... قلت ليهو ما عندي مشكله، قال لي تمام ابدو طوالي لانو حنعلن افتتاح الوكالة الاسبوع الجاي واول ايام الشغل حتكون ضاغطه شديد.. قلت ليهو طيب تمام..
طلعنا سوا وكلم اماني انها تبدا معاي من الصفر وقال لي لو وقفت ليك اي حاجه ما تتردي اسأليها طوالي وهي حتشرح ليك، يلا انا طالع... اماني قالت ليهو ماشي؟؟.. قال ليها اي في حاجه؟.. قالت ليهو افتكرتك حتقعد معانا لحدي ما نطلع، ما حترجع تاني يعني؟.. قال ليها لا مشغول لنهاية اليوم ..
بعد طلع جبت واحد من كراسي البلاستيك وقعدت جنبها ،اماني سألتني: معاك ورقه وقلم؟.. قلت ليها لا قالت لي كيف لا مش عارفه انو كان مفروض تنزلي كورس؟؟ ..قمت وقلت ليها بشتريهم وبجي.. قالت لي لا ما ضروري افتحي الدرج داك بتلقي دفاتر واقلام شيلي منهم وتعالي.. مشيت على المكتب المفترض يكون حقي شلتهم وقعدت.. بقت تشرح لي في اللابتوب وماشه سريع وكل ما اوقفها تتزهج وتقول لي كل مرة اعيد ليك انتي ما تركزي عشان تفهمي كويس... بعد شويتين جات مرا شايله صينية فيها كبايتين قهوة ختتهم وقالت لينا غسان طلبها ليكم.. اماني قالت لي تسلمي يا خالتو فوزيه.... واصلنا وكنت نص الشرح ما لاحقة اكتبو بسبب سرعتها وحاجات كتيره ما فهمتها لكن بقيت ما بسألها كتير عشان ما تضايق وتتزهج فيني، لمن الساعه ١٢ جات قالت لي نوقف لحدي هنا الليله.. قلت ليها تمام قالت لي المفتاح حيكون معاي لأني قريبة وبجي بدري..
طلعت وكنت مصدعه وراسي حاساه حينفجر ما بتذكر اخر مره عصرت مخي قدر كدا متين ، ضحكت في نفسي واتذكرت انو اخر مره كانت قبل قريب الـ١٠ سنين في سنه تامن اخر سنه ومنها وقفت قرايه... كنت جعانه لكن ماف طريقه اكل الا اصل البيت حسيت الشارع اتمط، والحافلة كانت بتقيف كتير ولا عشان انا جعانه بتخيل لي ما عارفه.. المهم ما صدقت متين وصلت البيت اول شي دخلت الغرفة لقيت طارق نايم شكلو ابوي رقدو لمن جاهو للفطور.. قبل ما اقلع عبايتي طوالي طلعت العلبة وقعدت اكل واتذكر تفاصيل اليوم البت الاسمها اماني دي من شفتها ما ارتحت ليها مع اني ما من النوع البحكم على الزول قبل يعرفو كويس ويعاشروا لكن جاني احساس عدم راحه تلقائيا كدا تجاهها.. بعد اكلت استحميت وصليت الظهر حتى رديت على رسائل العقد بتاع المندوب.. طبعاً من جاتني فرصة الشغل دا ووافقت وقفت تسويق لأي وكالة تانيه بطلب من والي وبقيت شغاله على عقد المندوب بس... بعد رديت على الرسائل كلها رقدت نمت
___ __

يا ولد رامي بتكلم معاك... كان بعاين لجهة محدده وبضرب بقلم الحبر على الكنبه بضربات متتاليه.. عاين طلال للجهة المركز عليها صحبو وشاف مجبتى مع شلتو بعاينو ليهم وبعملو حركات بِكى ويضحكوا ويضربو يدينهم ببعض.. طلال سألو: ديل مالهم معاك؟؟ .. رامي قال ليهو كان ما ادبتو وخليتو يدفع تمن عمايلو دي ما ابقى اسمي رامي بس خلي السنه دي تنتهي، اصلا حاقرا سنه تالته في مدرسة خاصه بنتقم منهم كلهم وبمشي.. طلال خاف من النبرة البتكلم بيها رامي ونظراتو المولعه ختا يدو في كتفو وقال ليهو استهدى بالله يا صحبي والعن الشيطان الزي ديل ما بنفع معاهم الا الطناش لمن تطنشهم هم زاتم بزهجو وبخلوك.. رما القلم وقبل عليهو وهو بقول: ما بخليهم قايل نفسو منو عشان يعمل لينا حركاتو دي والله لو ما امو وكيلة واصحابو المعضلين المصاحبنو عشان المصلحه ديل كان قعد زي السيوسيوة.. طلال قال ليهو انت لسه ما ناسي موقف السنه الفاتت؟ يا زول ما تخلي قلبك اسود كدا.. رامي قال ليهو بداية السنه برضو اتشاكلنا ولمن طلعت وقفوني في الشارع وضربوني لمن خشمي نزف.. طلال اتخلع وقال ليهو اتشاكلتو في شنو انت البديت المشكله ؟؟.. قال ليهو ما انا البديت هو العملها قاصد عشان يجو يضربوني... لاحظ للدموع الاتجمعت في عيونو وقال ليهو عاين يا رامي الاولاد ديل اصلا خاتنك في بالهم حاول تتجاهلهم بس وتبعد منهم لأنو لو ساويت راسك بي راسهم العواقب ما حتكون سليمه... رامي قال ليهو انا ما مرا عشان اخاف واتدسى منهم هم قايلني خايف لكن كلو دافنو ليهم... طلال غلبو اليعملو مع صحبو رامي الحيورط نفسو مع جماعة مجبتى، فضّل السكات على النقاش الـعلى ما يبدو ما حيجيب معاهو فايده واختار انو يدعي ليهو بظهر الغيب عسى ولعل دعائه ينقذو..
__ __

اتنهدت بتعب وهي بتستلقي على السرير وبتخت كفها في راسها، من يوم العمال بدو يشتغلو ليهم في الشقه وهي ماسكه اكلهم وشرابهم العصير القهوة الشاي الفطور ما بتصدق متين يطلعوا عشان تاخد راحه لحدي ما باسل مواعيدو تجي و تقوم تاني تجهز ليهو الاكل... سرحت وهي بتتذكر الاجازه الطويلة الاخدتها لنفسها براها، المدير اصلا داير سبب عشان يفصلها بسبب تأخيرها المعتاد وشكلو لقاهو..

ابتسمت وهي بتقول لنفسها " اه ويروح في داهيه، المهم هسي بيتي الجديد يكتمل وبعدها بفتش شغل في مكان تاني"...
صحت بـلمسات خفيفه على خدها فتحت عيونها ببط وشافتو راقد على يدو اليمين قصادها وبعاين ليها ابتسمت وقالت بصوت واطي ونعسان: شكلي نمت كتير وما سمعت صوت المنبه، جيت متين؟؟
اتكل بوشو على كفو اليمين : ما عارف لي كم وانا بالوضع دا
ابتسمت بخجل: اتغديت؟
_ تؤ
قامت من السرير ولبست شبشبها اتثآبت وقالت ليهو: ما صحيتني ليه
_ ما نمتي كتير، انا الجيت بدري الليله
-- خير ان شاء الله
قام ووقف قصادها مسك ايدينها الاتنين وقال : عشان نفسي في عشا رومانسي وسهرة معاك، طولنا شديد ما قعدنا سوا
-- ليه ما كلمتني من بدري وخليتني اجهز ليهو، خلاص خليه بكرا
_ هأ.. ما حتعملي اي شي
-- شنو؟
_ حنتعشى برا
قتلت حيلها ونعسّت عيونها: اوووف تعبانه والله يا باسل ما فيني اي حيل للطلعه
_ لا ما عارف بس حنطلع يعني حنطلع
-- قمت لي حركات الشفع خلاص؟
_ اي يا زوله، انا جاهز انتي اجهزي لحدي ما اسوي ليك قهوة تصحصح بيك
-- جاهز؟؟ ماشي بملابس الشغل؟؟
رجع ورا ورفع يدو: مالها وسخانه ولا اتكرفست؟؟
-- ولا واحد لكن استحاله اخليك تمشي بيها
_ خلاص ما حنك انا في نص ساعه بجهز الكلام فيك انتي
-- ما تقعد تنق لي من هسي خليني اجهز بمزاجي
_ عندك نص ساعه لحدي ما القهوة تطلع بس والقاك انتهيتي

طلع من الغرفة وهي اتجهت على الحمام.... جا داخل لقاها لابسه فستان جزري نص كم مقبوض بلستك من الخصر وضيق من فوق.. كانت بتستشور شعرها وتبرمو قال وهو بخت الصينيه: لسه؟
-- لحدي ما تجهز بكون خلصت

في واحد من المطاعم الهادئه والقريبه لـحيّهم كانو في طاولة جمب الشباك ومطلة على النيل بستمعو للموسيقى الهاديه وميسم سرحانه بالشباك
باسل: انا ما جبتك عشان تعايني للنيل
ميسم: منظرو مع المراكب حلو شديد، ما عجبك ولا شنو
_ صراحه ما ركزت فيهو، في حاجه تانيه واخدة عقلي وخلتني ما انتبه لحاجة غيرها
جا الويتر بالطاولة المتحركه وختا الطلبات
شالت معلقه وشربت من طبق الشوربة الكان قدامها: خلاص بديت للبكش بتاعك؟
شال الشوكه وضاق من طبق الباستا الايطالية: دا ما بكش دي حقيقه
-- سمح يا رومانسي انت
_ وريتك انو العمال قربو يخلصو؟؟
-- ما وريتني لكن عارفه
_ ااا نسيت انك كل يوم بعد يطلعو بتمشي تكشفي وتجي نازلة
-- ههههه امممم ما من حقي؟
_ من حقك ونص كمان
-- صحي انا ما سألتك العفش وديتو وين ولا اجرت البيت بي عفشو؟
_ ءاجرو بعفشو كيف؟؟.. وديتو في المخزن بتاع مصنع غسان
-- اااه اوكي..... بتعاين وين؟
قبلت وراها وشافت البت القاعدة في الطاولة الوراهم وبتعاين لي باسل.. رجعت عاينت ليهو لقتو بياكل
-- كنت بتعاين ليها مش؟؟
_ ما عاينت ليها
-- عاينت
_ والله شكلها زاتو ما شفتو كويس
-- باسل انا شفتك بتعاين ليها بتكذب علي ليه؟؟
ختت المعلقه وشبكت يدينها فوق التربيزة وابتسمت: عجبتك؟
_ يا بت الناس وحيات الخلقني ما عاينت ليها قاصد
قالت بحزم: في النهايه عاينت، واشمعنى هي بس؟؟ عشان سمحه
_ ميسم
-- هي برضو كانت بتعاين ليك
قال بنفاذ صبر: ما عشان هي بتعاين لي من قبيل عاينت ليها قلت يمكن اكون بعرفها ، لمن اتأكدت اني ما حصل شفتها صرفت نظري
-- هسي ما قلت شكلها ما حفظتو
مسح وشو وختا يدو في حنكو وغلبو الرد.. لمن انتبه لعيونها البدت ترقرق قام على حيلو، تابعتو بنظراتها لحدي ما وصل للبت ودنقر وهو بتكلم معاها، حاولت تسمع البقولو لكن ما قدرت بصوت الموسيقى.. بعد مده قصيرة عدل وقفتو وشافت البت ملامحها اتغيرت وبقت تعاين ليها.. رجعت لوضعها القبيل ومن جواها كانت تموت وتعرف الحاصل شنو بهناك.. قعد في مقعدو القبيل وكان مكشر قال ليها: كدا تمام؟
رجعت قبلت وراها وكانو البتين ماف!!! قبلت عليهو وقالت: وينهم؟
_ ما عارف
-- ما عارف كيف قلت ليها شنو قامت من مكانها وطلعت من المطعم ؟
_ ما مهم قلت شنو المهم انك ارتحتي هسي
-- وانت مالك زعلان؟
_ ما زعلان
-- زعلاان ما بعرفك انا يعني
_ كملي اكلك عشان نقوم
-- نقوم نمشي وين
_ نمشي البيت، مش قبيل قلتي تعبانه؟؟
سكتت وما أعقبت على كلامو كملو عشاهم بدون ما واحد ينطق بحرف ذيادة... لحدي ما رجعو ما اتكلم ولا كان بعاين ليها حست بتأنيب الضمير وانها قست عليهو حبتين..
مسحت باقي الميكب وقامت غسلت وشها، لمن طلعت لقتو راقد ومديها ظهرو... رقدت على ظهرها وقبلت عليهو بوشها نادتو بصوت واطي: باسل
_ اممم
-- انت صاحي؟
قبل بوشو عليها وقال: في شنو؟
ممكن ارقد هنا.. اشرت بي يدها على صدرو، صلح رقدتو بحيث انو تقدر ترقد زي ما طلبت منو.. رقدت ولفت يدها حولين بطنو وبقت سامعه ضربات قلبو

-- زعلان مني؟
_ عارفاني ما بقدر ازعل منك
-- طيب مالك قالب وشك من وقت الموقف الحصل قبيل
_....
-- زهجت مني يا باسل
_ دا شنو البتقولي فيهو دا؟
-- انا عارفه اني خنقتك بغيرتي الذايده عن اللزوم وقعد احاول كتير اني اضبط نفسي لكن ما بقدر بلقى روحي تلقائياً انفعلت فيك
_ وانا بحب غيرتك، لكن لمن تختي اللوم فيني دا ببقى شك ما غيرة
-- اوووفف .. انا اسفه
قال وهو بمشي يدو على شعرها بحنان: يا نور عيني.. قلت ليك قبيل انا ما زعلان ولا بقدر ازعل منك ولا دايرك تغيري طبعك لأنو اكتر شي بحسسني بحبك لي هو غيرتك دي بس حاولي ما تحسسيني انو عيني زايعه.. انا عيوني مليانه بيك ولو جا يوم وزاغت بقلعهم من مكانهم دا واجدعهم البحر
ضحكت وضربتو: بطِّل
_ جادي انا
-- يعني ما حتفكر يوم تعاين لي غيري؟
_ ابدا
-- ولو عاينت
_ الا تكون وحده بتشبهك
ضربتو مرة تانيه: حيوان.. صحي قبيل قلت للبت شنو خليتها تطلع من المطعم
_ قلت ليها انا راجل متزوج ومرتي شافعه بتغير علي وما بعيد هسي تجي تعضيك.. قامت خافت ومشت
ضحكت وقالت: جاده انا ياخ
_ قلت ليها بتعرفي صاحب المطعم دا منو؟ قالت يب لا قلت ليها البت القاعده معاي مرتي وابوها صاحب المطعم لو قعدتي هنا ثانيه ذيادة حتنطردي ف احسن تقومي براك
انفجرت بالضحك لمن عيونها دمعو: جادي يا باسل؟
_ والله جد
-- وهي صدقت وخافت قامت طلعت طوالي؟
_ اي
-- تستاهل، عشان تاني تعاين لي راجل مرا تانيه
__ __

بالمساء ابوي سألني من الشغل، بالفرحه لقيت نفسي حكيت ليهو اي شي حتى جوعتي والبت الغياظه ديك.. لقيتو بضحك هو وطلال على تعليقاتي فيها والله الفرحه الدخلت فيني ما حصل حسيت بيها.. بعد خلصت من شغلي لقيت والي متصل لي تاني، قبيل بعد صحيت لقيت منو مكالمه لكن ما قدرت ارجع ليهو لأني انشغلت.. اتصلت ليهو مكالمة واتس قفل ورجع لي مباشر سألني: اها الشغل كيف ماشه كويس؟؟... قلت ليهو تمام اي ماشي حالو.. قال لي غسان وراني انو ما نزلتي كورس والبت المعاك حتعلمك شغل التذاكر.. قلت ليهو اي صح.. قال لي فهمتي منها كويس ولا بتحتاجي لي كورس؟؟.. قلت ليهو فهمت.. قال لي ميسم ما تجاملي في حاجه زي دي الشغل دا ما زي التسويق لمن ما تفهمي سؤال زول ترجعي تسأليني عادي.. وغسان زول صعب اقل غلطه حيحاسبك عليها وما بعيد يفصلك نهائي ..... في البدايه ما كنت عايزه احكي ليهو بعمايل البت ديك لكن كلامو خوفني انا ما لقيت الشغل دا بالهين وما دايرة اخسرو عشان غلطه انا ما عندي فيها ذنب بعد صمت طويل قال لي معناها في شي حاصل ما فهمتي منها مش؟؟.. قلت ليهو والله صراحه كدا يا استاذ والي البت بتشرح سريع يعني شكلها هي اصلا بتتكلم بسرعه وانا ما بقدر اوقفها كل دقيقتين هي شرحت كتير ما قصرت لكن شكلي انا الما بفهم سريع... قال لي تمام انا بكلم غسان يشوف حل.. قلت ليهو لالالااا ما تكلمو يقوم يفصل البت.. قال لي روقي، انا فهمتك وعرفت قصدك شنو الزيها مرو علي كتير ومن غسان وراني زميلتك بت كنت متوقع حاجه زي دي، حاوريه نفس الكلام القلتيه لي لكن لو حصل اي موقف منها تاني وريني عشان لو ما وقفناها من هسي حتتعبي معاها لي قدام.. قلت ليهو تمام بوريك...

___

*"غداً كلٌ سيدفع ثمن اي دمعه تسللت من عينيك، سأحاسبهم جميعاً"*
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《13》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
تاني يوم مشيت لقيتو قاعد مع نفس الراجل الامس ونفس القعده المره دي من قطعت الزلط شافني بعد سلمت دخل وراي اول ما اماني شافتو قامت على حيلها قالت ليهو هي انت لسه قاعد.. قلت ليها صباح الخير اماني كيفك.. قالت لي الحمدلله.. غسان قال ليها قاعد اي الليله ما عندي حاجه وقلت اشوفكم ماشين كيف.. قالت ليهو طوااالي ونحن لاقنك وين .. لو ما بخاف الكذب حسيت بيها حتقوم تحضنو ما عارفه بتخافف كدا لشنو لمن تشوفو قعد في واحد من كراسي الانتظار وطلع تلفونو بقى شغال بيهو.. انا جريت كرسيي وطلعت الدفتر والقلم وبقيت مركزه معاها قالت لي متذكرة كلام امس؟؟ قلت ليها ايوه بس عيديه لي تاني عالسريع كدا... بقت تشرح وشتان ما بين شرح امس والليله دي الحاله قلت ليها على السريع، بدت لي من الاول وياداب كدا فهمت.. بعد دونت ملاحظة رفعت راسي اشرب من قارورة المويه لقيت غسان بعاين لينا لمن شافني غمض عيونو وفتحها ما فهمت حركتو وارتبكت.. القارورة وقعت من يدي والمويه اتكشحت في اسكيرت اماني قامت تكورك وتشاكل فيني: دا شنو ما بتشوفي قدامك انتي اووووففف .... اتخلعت من طريقة كلامها معاي قلت ليها معليش ما قصدي اكشحها فيك اتزلقت من يدي.. غسان قال ليها روقي هي كلها مويه ما حتعمل ليك حاجه... قالت ليهو وهي ماسكه الحته المبلولة: مويه اي لكن حاقعد بيها كيف لحدي ما تنشف؟؟.. قام من كرسيهو ودخل تلفونو في جيب البنطلون قال ليها ارح معاي.. قالت ليهو امشي وين بي حالتي دي؟؟.. قال ليها نشوف ليك حاجه من محل الملابس البي جاي دا..قالت ليهو اطلع كيف بي منظري دا؟؟.. قال ليها يا بت الناس من هنا للعربيه للمحل ماف زول شايفك.. قالت ليهو خلاص ارح... بعد طلعو قلت لنفسي فالحه يا ميسم اصلا البت شاماك وهسي شمتك ذيادة.. قعدت وبقيت بعاين لشاشة الكمبيوتر.. انا أساساً ما بعرف بفتحوه كيف لكن ما قدرت اقول لي اماني عشان ما تتزهج، بعد ننتهي بكلمها توريني.. وهي زاتا حافظة الازرار كلها بتشتغل سريع سريع ياربي انا حاقدر اشتغل زيها كدا؟؟.. شكلك يا ميسم حتنفصلي قبل تبدي أساساً الله يستر بس... بقيت بشخبط في الدفتر لحدي ما رجعو قربت افك الضحكه لمن شفت منظرها بالإسكيرت الواسع اللابساهو غطيت خشمي وحكيت جبهتي وانا مدنقرة عشان ما اتفضح.. الغريبه انها كانت فرحانه قعدت وقالت لي نواصل؟ قلت ليها اي... غسان رجع لنفس قعدتو وتاني ما عاينت ليهو ما ناقصه ارتباك تاني وشوشرة.. الساعه ١١ لمن جات قال لينا بنات معليش على المقاطعه، نقوم نفطر؟.. اماني طوالي قامت وقالت يلا.. بقو بعاينو لي قلت ليهم انتو امشو انا جايبه معاي فطوري.. اماني فكت ضحكه لكن سكتت سريع عاينت ليها باستغراب قلت ليها مالك بتضحكي قلت حاجه تضحك؟.. قالت لي لا بس اتذكرت حاجه نمشي يا غسان؟.. غسان قال لي ارح عشان ما تقعدي براك.. قلت ليهو لا ما مشكلة بقعد ما بجيني شي.. عاين لي مسافه بعدين طلعو، زعلت من حركة اماني زعل ضحكتها دي كانت استهزاء بي واضحه ما دايره شرح... بالزعل الاكل طلع من نفسي بعد طلعت العلبه دخلتها راجعه ورقدت في التربيزه دموعي جات نازلة لمن اتذكرت الموقف تاني اصلا انا غبيه ما كان مفروض اقول ليهم كدا كنت اقول شبعانه بس، منظري بقى بايخ زي طالبة المدرسه..

سمعت صوت خطوات داخله المكتب مسحت دموعي سرعه سرعه ورفعت راسي لقيت اماني رجعت ووشها ما بتفسر، كانت شايله كيس طلعت منو سندوتش ومدتو لي قلت ليها شكراً انا شبعانه.. قالت لي شبعانه كيف نحن جبناه ليك شيليه ساي قلت ليها ما عايزه لو جعانه كنت اكلت من الجبتو معاي.. سكتت ورجعتو في الكيس قعدت في كرسيها وبدت تاكل قالت لي هسي لو مشيتي كان فطرنا برا.. قلت ليها انا مالي؟.. قالت لي عشان ما نخليك براك غسان شال لينا سندوتشات وجينا راجعين.. قلت ليها هسي قومي افطري محل عايزه انا ما ماسكاك.. بقت منططه عيونها ومخلوعه فيني قالت لي مالك انتي هسي قولي بسم الله.. قلت ليها ما فيني شي انا ماشه اجيب لي موية وجايه دايرة؟ قالت لي هدا جبنا موية وبارد معانا ماف داعي تمشي.. قلت ليها بالعافية عليكم وطلعت لقيت غسان في الكرسي حقو البرا بياكل وبعاين للتلفون.. الواطه كانت نهار لكن الحته البقعدو فيها ضل ما بتصلها الشمس.. دخلت البقالة شلت قارورة مويه وطلعت لقيتو بنفض بنطلونو عاين لي وعاين للقارورة، اتجاوزتو ودخلت اماني كانت بتاكل وتتكلم بالتلفون.. " قلتي لي شنو شلبتيها؟؟ غايتو انتي قاادرة يختي.. اي هي زاتا عشان تاني تشوف روحها علينا هي قايلة روحها اول وحده تتخطب؟ هههههاي خلاص يلا لي بعدين انا هسي شغاله" .. ختت التلفون وقالت لي تعالي نكمل رجعت مكاني وواصلنا مكان وقفنا بقت ماشه سريع الا بعد غسان جا خاشي حتى شرحت زي قبيل.. قعد في مكانو القبيل شويه حتى قام دخل المكتب بتاعو.. المرا بتاعت امس تاني جات شايلة تلاتي كبابي قهوه ختت لينا كبايتين ودخلت بالتالته جوا.. للساعه ٢ كنا شغالين وراسي كبس عديل ما قدرت اقول ليها وريني بفتحوه كيف... المهم بعد خلصنا طلعنا التلاته سوا غسان قال لينا اركبو اقدمكم... بنفسي قلت دا مالو الليله ولا اصلا هو كدا؟؟.. اماني قالت ليهو ما دايرين نعذبك قال ليها ماف عذاب اركبي.. اماني ركبت وانا قلت ليهو انا بركب من الموقف.. قال لي عارف.. عاينت ليهو بتساؤول قال لي انا دايرك في موضوع بعد ننزل اماني برجعك تاني لو دايره... سكت وبقيت بفكر ما حصل ركبت مع زول غريب في عربية وبالنسبه لي دي جريمة عديل لكن ما كان عندي مفر طالما قال عايزني في موضوع معناها بخص الشغل.. ركبت ورا واماني كانت معاهو قدام، اتونسوا لحدي ما وصلها قريب لي شارعها بعد نزلت قال لي تعالي قدام قلت ليهو لشنو اجي قدام؟؟.. حكا راسو وقال لي عشان انا ما سواقك.. اتحرجت وقمت طوالي كنت خايفه وحاسه اني غلطت لمن وافقت اركب معاهو حسيت العربية كاتمه والاوكسجين ناقص قلت ليهو كنت دايرني في شنو؟.. قال لي البت دي قاعده تضايقك؟.. قلت ليهو منو اماني؟ لا مافي حاجه زي دي. قال لي والي كلمني بالحصل امس لكن انا شايف شرحها كويس وما فيهو كلام... قلت ليهو يعني انا كذابة؟؟.. قال لي في الحالتين انتي كذابة يا اما بتكذبي عشان تدافعي ليها او هي شرحها كويس وانتي كذبتي وقلتي بتشرح لي سريع.... سكت وما عرفت اقول شنو بقيت بدعك يديني ودموعي وقفت طرف عيني قلت ليهو انا ما كذبت.. قال لي ياتاا فيهم الصح اذا ما جاوبتي حامشي اسألها هي والكلام البتقولو لي حاصدقو واتصرف على اساسو.. قلت ليهو انا ما عارفه مالا الليله لكن امس ما كانت بتشرح لي بالطريقه دي.. قال لي وليه بتكذبي... سكت وما قدرت امسك دموعي اكتر عاين لي نظرة سريعه ورجع عاين للشارع قال لي مالك بتبكي هسي؟.. جرا من المناديل الفي العربية ومداهو لي مسحت دموعي وشكرتو قلت ليهو كنت خايفه تفصلها وانا ما عايزه اكون سبب في قطع رزق زول .. قال لي انتي شايفه الموضوع من زاوية غلط، هسي البت دي لو كانت واصلت معاك بالطريقه بتاعت امس كنتي حتكوني مؤهلة لأنك تشتغلي؟.. قلت ليهو لا.. قال لي وانا كنت حافصلك طوالي لأنو حاكون خاتي في بالي انك زوله ما جاده اسبوع كامل البت تعبانه معاك وبتشرح ليك وانتي ما جايبه خبر.. ولا كلامي دا ما صح؟؟.. قلت ليهو صح.. قال لي انا حاجي كل يوم لحدي ما فترة التدريب دي تخلص بعدها إذا حصلت اي مشكلة بيناتكم تعالي كلميني تمام ؟.. قلت ليهو تمام... كنت بردد وراهو زي الهبله، سألني من الموقف القعد اركب منو ووريتو وصلني لي هناك بعديها اعتذر لأنو اخد من وقتي...
___ __

"انتي مش قلتي مصدعه ما بقدر امشي المدرسه الليله؟"
اسراء عاينت لاختها الواقفه جمب الباب ورجعت عاينت للتلفون بدون ما ترد.. خنساء دخلت ووقفت جمبها مدت يدها وهي بتقول: جيبي التلفون دا
اسراء: ليه ان شاء الله؟
خنساء: عشان ما يذيد ليك الصداع
اسراء: ما تعملي فيها خايفه علي عارفه انا فهمك شنو
خنساء: اسراء انا ما دايرة معاك قلة ادب جيبي التلفون دا وارقدي ارتاحي ولو الصداع راح امسكي ليك حاجه اقريها عشان تستفيدي من قعدتك دي

اسراء: ما عندك شغله بي
خنساء خطفت التلفون وطلعت، اسراء جات جاريه وراها وهي بتكورك: دا شنو اديني تلفوني يا زوله ما دايره معاك عواره انا
صفيه: مالكم يا بنات بتكوركوا في شنو ؟
اسراء: امي قولي لي بتك دي تديني تلفوني
صفيه عاينت لي خنساء الكانت مربعه يدينها ومنتظره ردها
اسراء: امييي
صفيه: جيبيهو
خنساء مدتو ليها وعاينت لي اسراء بانتصار.. صفيه رجعت ليها وقالت ليها اقفليه دخليهو جوا.. اسراء شالتو ودخلت
خنساء: دا شنو يا امي رجعتي ليها ليه؟
صفيه: قلت ليها تقفلو ما رجعتو عشان تشتغل بيهو
خنساء: وليه ما قلتي لي انا؟؟
صفيه: ما في النهايه حيتقفل يا خنساء ما تعملي من اي شي موضوع عليك الله، امشي اغرفي من الرجلة ديك في صحن عشان اوديها لي طارق لحدي ما البس التوب
اخضعت لامر امها وبعد طلعت عملت مكالمه
-- مرتضى كيفك
_ كويس يا قلبي انتي كيف عاملة
-- الحمدلله
_ صوتك ما عجبني، مالك؟
-- متضايقه
اتنهد وقال: هسي لو بتسمعي كلامي كان جيت سوقتك وطلعنا سوا
--تاني يا مرتضى؟
_ خلاص سكت احكي لي المضايقك شنو اسراء برضو؟
-- اي
_ اخخخ انا البت دي بعدين حاتفش فيها حق السنين الفاتت كلها
ضحكت: حتعمل شنو يعني
_ اول شي بديها شكلة على الكانت بتعملو زمان كلو وما حاخليها ترفع صوتها عليك تاني، حتى لو امك ما رضت انا ما حاسكت
-- اممم خليني اطلع من البيت دا بس تاني تعمل الدايراهو
_ حاطلعك يا خنساء ولو دايرة بكرا دي لكن انتي...
-- لو ما فتحت السيرة دي في كل مكالمه بتموووت بتموت
_ اسوي شنو ما قادر اصبر انا، عايني لو ما قادرة تكلمي امك اديني ليها انا بفهمها اي شي بطريقتي
-- لا طبعاً انا حاكلمها اول
_ متين؟
-- قريب
_ عندك مدة اسبوع ما كلمتيها بتصل ليها انا
-- وحتجيب الرقم من وين
_ عندي
-- عندك؟؟
_ مره ايام الامتحانات اتصلتي لي منو
ضربت راسها لمن اتذكرت: اخخخ
_ وريتك انا عشان بعدين ما تتفاجئ لي
-- طيب بكلمها ان شاء الله
____ ___

فترة الاسبوع دي خلصنا تدريب.. غسان كان بجي كل يوم يقعد معانا لحدي ما نخلص وقت الفطور بجيب لينا السندوتشات ويقعد برا بعد نفطر تاني بجي راجع ويقعد في مكتبو لحدي ما نخلص وبعد نطلع بنزلني في الموقف وبوصل اماني يوم.. كان كل ما اماني تكورك فيني بشاكلها ويقول ليها براحه عليها ياداب بتتعلم...
يوم قالت ليهو خربت طبعنا يا غسان بعد تمشي مننا حنتعب.. قال ليها ما تتعودوا كلها اسبوع.... اخر يوم كان خميس جيت لقيتها مافي غسان لمن خشا قال لي اماني جات ياداب ودخلت البقاله شغلي الكمبيوتر وافتحي الموقع لحدي ما تجي ... لمن قال كدا حسيت بقبضة انا ما بعرف بشغلوه كيف وكل يوم بقول اجي بدري عشان اشوفها لمن تفتحو بلقاها قاعده وفتحو.. تلفونو ضرب رد وطلع ،مشيت قعدت مكانها وبقيت بعاين للتوصيلات، شلت وصلة الشاشة والجهاز وركبتهم في الوصلة الشاشه نورت وبقيت بعاين ليها وما عارفه اعمل شنو.. تاوقت بي برا لقيتو واقف مدخل يدو في جيب البنطلون وبتكلم.. قلت كان جا لقاني لسه واقفه حيسألني ليه ما فتحتو.. مديت راسي وعاينت جهة البقاله اووف اماني دي اتأخرت كدا ليه ياخ.. لمن قبلت عليهو لقيتو جاي داخل قال لي مالك؟.. قلت ليهو ااا مافي شي بس مستنيه اماني.. عاين بي برا وقال لي فعلاً اتأخرت.. رجعت قعدت مكاني وهو جا وقف جمبي لمن شاف الشاشه الرئيسيه قال لي ليه ما فتحتي الموقع؟؟.. سكت ما رديت قال لي ما بتعرفي تفتحيه؟؟.. قلت ليهو بصوت واطي لا... ختا يد في التربيزة ويد في الماوس ودنقر بقى بوريني بفتحوه كيف، اتوترت من قربو لي وبقيت نفس ما قادرة اتنفس شميت ريحة عطرو وبقيت بحاول اطرد التوتر واركز لكن ما قدرت وما فهمت اي شي.. ما اخد وقت طويل بعدها قام وقال لي عرفتي؟؟.. قلت ليهو اي شكراً.. اماني جات خاشه اللحظه دي قالت هاي صباح الخير.. قلنا ليها صباح النور.. غسان رجع كرسيهو واماني قعدت مكانها قالت لي يلا الليله حتحجزي تذكرة براك وانا بتابع معاك.. قلت ليها انا؟؟.. قالت لي اي انتي، هي فتحتي الموقع براك؟؟... غسان قال ليها انتي ما وريتيها بفتحو كيف ليه؟؟.. قالت ليهو ما انتبهت الا هسي المهم خليك قاعده مكاني وابدي طوالي... ادتني الجواز بقيت شغاله وهي متابعه وكل خطوة بسألها كدا صح؟ تقول لي اي.. بعد انتهينا قالت لي كويس بقيتي معلمه.. قلت ليها بي فرحة: شكراً.. ما عارفه الخلاني اعاين لي غسان شنو لقيتو مبتسم وبعاين لي نزلت راسي طوالي اماني قالت ليهو اها الليله خلصنا بدري نرجع ولا نعمل شنو؟.. قام وقال انا طالع انتو بطريقتكم لو عايزين تبرمجوا.. قلت ليهم انا حارجع اماني قالت خلاص انا برضو حارجع اهو اخدنا تلاته ايام اجازه.. طلعنا وكالعاده ركبنا معاهو اتفاجأت بيهو وصل اماني اول بعد نزلت قال لي شايفك خلاص بقيتي جاهزة.. قلت ليهو ان شاء الله ما انسى في اليومين ديل قال لي ما حتنسي ان شاء الله، حكا جبهتو بابهامو وقال لي اااا زي ما قلت ليك لو البت دي ضايقتك تاني كلميني..

قلت ليهو كويس قال لي ولو وقفت ليك اي حاجه في الشغل وريني انا ما حاكون معاكم تاني لكن بتقدري تتصلي لي في اي وقت وتسأليني.... لمن قال كدا زعلت اتعودت على وجودو ونظراتو لي اماني لمن تشاكلني ولا ترفع صوتها علي هسي بعد يمشي حترجع زي الاول ويمكن تفش غبينة الاسبوع دا كلو.. اتنهدت وقلت ليهو طيب.. لمن وصلت البيت لقيت ابوي جا وبفطر مع طارق قال لي مالك رجعتي بدري الليله ؟؟ قلت ليهو خلصت فترة التدريب ومن يوم الاحد حنبدا نشتغل.. طارق كان بعاين لينا من سكات، فطرت معاهم وسويت ليهم الشاي بعدين مشيت بيت ناس عمي الليله نتائج ناس تالت وخنساء من امس خايفه ومتوترة مشيت لقيتها بنفس حالتها واكعب خاشه ومارقه زي ام العروس قلت ليها يا بت روقي الكاتبو ربنا بحصل.. قالت لي الساعه كم المؤتمر لسه؟؟.. شفت تلفوني وقلت ليها ياداب ١٢ .. خالتي صفيه قالت ليها باقي ساعتين لسه.. هي زاتا حالتها ما كانت احسن من خنساء قلت ليهم وترتوني انا زاتي معاكم.. ميساء جات من المطبخ شايلة صينيه فيها ٤ كبابي ختتهم وجابت جك قالت اشربو العصير دا يهدي ليكم اعصابكم شويه.. خالتو صفيه شربت منو وقالت ليها الله يبردها عليك دنيا واخره يا بتي .. ما عارفه الساعتين ديل عدو كيف لكن جو البيت كان كلو توتر ومن الساعه ١ فاتحين قناة السودان لمن بدا خنساء قالت اسكتو اسكتو... كانت مركزه بكل حواسها وماسكه التلفون كل شويه تعاين لو رسلو ليها النتيجه.. فجأة نطت من السرير وكوركت: ٨٦ يا امي ٨٦ .... خالتي صفيه قامت حضنتها وبقت تبوس فيها مسكو بعض مساااافه وهم ببكوا.. انا زاتي بكيت معاهم منظرهم كان مؤثر شديد.. اتذكرت امي اتمنيت لو كانت موجوده وحضرت معاي يوم زي دا بعد امها فكتها ميساء باركت ليها فكتها وضحكت في نص دموعها مشيت سلمت عليها بالحضن وقلت ليها الف الف الف مبروك يا خنساء ما بتصدقي فرحت ليك كيف .. قالت لي حبيبتي يا ميسم الله يبارك فيك... بعد داك ناس الحله بدو يجو يباركو مشيت جبت علبتين حلاوة وبقيت بوزع المويه والحلاوه مع ميساء.. فجأة وكلنا قاعدين معانا حريم الحله جات اسراء جاريه من برا وهي بتنادي خنساء .. خنساء قامت مخلوعه، جات عليها بخطوات سريعه وحضنتها كانت بتهمس ليها بكلمات ما سمعناها خنساء ضحكت وقالت ليها يا جزمه، الله يبارك فيها وعقبال ليك بالنسبه الاعلى من كدا.. اسراء فكتها وباركت لي امها برضو.. سلمت علينا وباركنا ليها خالتو صفيه قالت ليها انتي الوراك نسبتها منو؟؟.. اسراء قالت ليها من بداية الشارع لقيت هيام وورتني.. بعد داك طلال جا برضو يبارك سألتو من طارق قال لي خليتو نايم..... قعدت مع ناس عمي لحدي قريب المغرب ولسه الناس كانو بجو قلت لي خالتو صفيه انا ماشه عشان طارق من الصباح براهو وطلال بكون بقرا زي الوقت دا... قالت لي امشي يا بتي ما قصرتي من الصباح واقفه معانا..
مشيت لقيت رامي قاعد مع طلال بقرو سوا قلت لي طلال اتغديتو؟ قال لي اي قبل شويه... قلت ليهو وطارق ؟؟ قال لي ابى قال بتغدى مع ابوي لمن يجي.. رامي شال معاي سراير الحوش وفرشتهم، مشيت لي طارق لقيتو بحضر قلت ليهو اطلعك الحوش؟.. قال لي لا.. رقدت في السراير الطلعتها وبقيت شغاله بي تلفوني، وانا بتصفح في الفيس جاتني مكالمه من والي رديت بعد سلم قال لي اها قالو لي خلصتو.. قلت ليهو اي الحمدلله.. قال لي كدا جاهزه ما عندك اي مشاكل مش كدا؟.. قلت ليهو ايوه حتى قطعت تذكره قبيل .. قال لي ياا زولة خلاص كدا انا اتطمنت ياداب.. قلت ليهو استاذ والي دايره اسألك سؤال.. قال لي اسألي بدون استئذان.. قلت ليهو ليه بتعمل لي دا كلو..يعني انت حالياً ما عندك مسوقة غيري وانا خلاص اشتغلت وكمان قلت لي وقفي تسويق لي اي وكالة تانيه والبسوق ليهم كلهم من طرفك انت يعني كدا حتكون خسارة بالنسبه ليك... سكت شويه بعدين قال لي انا ابدا ما شايفها خسارة بالعكس شايف اني عملت انجاز كبير كوني قدرت اساعد انسانه مكافحة زيك ولو بي شي بسيط، صراحه يا ميسم اي بت بتشتغل ومجتهده وبتعافر في الدنيا دي عشان تساعد اهلها انا بتكيف منها فما بالك بي وحده زيك ماسكه بيت واسرة وفي نفس الوقت شغاله.. لمن وريتيني بوضعك وانك ما حتقدري تقبلي عرض الشغل اصريت انو ماف واحده حتتوظف غيرك كان عندي احساس انو حيجي يوم و تقبلي وكلمت غسان انو يديني فترة شهر، حتى انو اعترض وقال ما بقدر يستنى شهر كامل بصعوبة اقنعتو وقلت ليهو لمن تنزل معاك حتشكرني شديد... اتنهد وقال لي وفعلا قبيل وانا بتكلم معاهو سألتو ولقيتو مبسوط منك شديد... قلت ليهو ما حانسى ليك الخدمه القدمتها لي دي ابدا يا استاذ والي الله يقدرني واردها ليك.. قال لي رديها لي بانك ما تخذليني بس.. قلت ليهو ما حيحصل ان شاء الله.. بعد قفلت منو سرحت مسافه، لسه في ناس زيو في الدنيا دي؟؟ سبحان الله زي ما قال الرسول صلى الله عليه وسلم " الخير في امتي حتى تقوم الساعه" ... اتذكرت لمن قال لي غسان مبسوط منك شديد بقيت بتبسم براي، ضربت خدي وقلت بت اوعي اوعي...

تاني يوم كان جمعه واجازه غسلت وباقي اليوم بقيت قاعده ساي حسيتو طويل مع اني كنت بجي منتهية ومتمنيه الجمعه تجي متين وهسي زهجت.. يوم السبت عملت اكل الاسبوع زي المره الفاتت وكويت الملابس خلصت بعد المغرب وكنت منتهيه بعد اتغدينا وصليت العشا طوالي نمت... يوم الاحد مشيت لقيت اماني قاعده وشغاله قالت لي ابدي طوالي عندك لحدي هسي ٥ تذاكر والايميل ما وقف رسايل.. قلت ليها متين بسم الله.. قعدت وبديت اشتغل كنت مرات برجع للدفتر عشان ما اسألها هي زاتا كانت مشغولة.. بعد داك جابت لي تاني كم واحد.. الناس كان بجو واحد ورا التاني والمكتب ما فضا الا بعد الظهر.. اشتغلنا لمن روحنا طلعت ما لقينا وقت للفطور الا بعد انتهينا .. قلت ليها طمنيني وقولي لي دا ما الوضع الطبيعي.. قالت لي لالالا اول مره من اشتغل يمر علي يوم زي دا.. قلت ليها الحمدلله يعني حيخف لي قدام.. قالت لي ان شاء الله غايتو تمشي تفطري معاي ولا جايبة اكلك زي كل يوم؟؟ قلت ليها لا جايبه تاكلي معاي؟؟.. قالت لي لالا اتعودت على اكل الكافتريا دي.. طلعت قروش وقلت ليها خلاص جيبي لي معاك مويه.. مشت وانا طلعت فطوري وقعدت اكل وافكر يعني انا خلاص بقيت شغالة؟؟ منو كان متخيل اني في يوم اصل الحته دي.....
اول يومين كانو ضاغطين لكن بعد داك الشغل خف شويه.. عدو علينا اسبوعين وكنت سلكت خلاص بس حركات اماني ذادت وكانت واقفه على الهبشة اقل حركه غلط اعملها تشاكل وتكورك فيني ومرات قدام الناس.. في الاسبوعين ديل غسان تاني ما جا كل مرة بعاين للباب على امل انو يجي داخل.. يوم بعد اماني طلعت وانا بفطر وكعادتي سرحانه سمعت صوت بقول السلام عليكم.. رفعت راسي لقيت غسان داخل بدون ما احس لقيت نفسي وقفت وقلت ليهو وعليكم السلام.. قال لي ميسم كيفك.. قلت ليهو تماام الحمدلله انت كيفك يا استاذ.. قال لي الحمدلله، اماني وين ما جات الليله؟؟.. قلت ليهو جات لكن طلعت تفطر.. لمن انتبهت اني كنت باكل وما عزمتو قلت ليهو فطرت؟ اتفضل معاي.. قال لي والله ما فاطر وجعان .. قلت ليهو تعال طيب.. جرا كرسي وقعد .. اتفاجأت من حركتو ما اتوقعت يوافق ويفطر معاي كنت جايبة قيمة وطعميه عملتها الصباح لي طلال وشلت منها.. بعد اكل شويه قال لي انتي العملتي الاكل دا؟؟.. قلت ليهو اي كعب ولا شنو؟؟.. قال لي لا طاعم شديد.. رفع قطعة طعمية وقال لي حتى الطعميه عملتيها انتي؟؟.. قلت ليهو اي.. قال لي ما شاء الله.. ابتسمت وقلت ليهو بالعافيه عليك... ونحن بناكل جات اماني اول ما دخلت قالت غسااااان.. غسان قبل عليها ومن ملامح وشو فهمت انو اتخلع قال ليها اهلين يا اماني.. سلمت عليهو وقعدت طرف التربيزة قالت ليهو جيت متين؟؟.. قال ليها قبل شويه .. قالت ليهو ومالك مطول مننا كدا.. قال ليها كنت مشغول... قالت ليهو لو عارفاك جاي كنت استنيتك وطلعنا فطرنا سوا..... بنفسي قلت البت دي جاده؟؟ دي شنو الحركات البتعمل فيها دي قلت ليها بي غيظ: هدا قعد يفطر... لقيتهم الاتنين بعاينو لي ياداب انتبهت لي نفسي وطريقة كلامي حاولت اصلح الموقف وقلت ليها اتفضلي انتي برضو .. قالت لي انا اكلت.. غسان قال وهو بشيل من القيمه: فوتي عليك فطور زي دا واكلتي من برا؟؟.. قالت ليهو لو كان عزمتني كنت بفطر... ضحكت وقلت ليها نسيتي اول يوم لمن قلت ليكم جايبه فطور معاي ضحكتي فيني كيف؟؟ وبعد دا برضو عزمتك يوم وابيتي حسيتك زي الكاشه مني تاني البخليني اعزمك شنو؟؟...... بقت تعاين لي باستغراب وللأمانة انا زاتي مستغربه من نفسي في الوضع الطبيعي ما كنت بقدر ارد عليها كدا مالي هسي وجاتني القوة دي من وين؟؟؟... ضحكت وقالت لي مالك يا بت متحسسه كدا كنت بهظر انا ولمن عزمتيني المره الفاتت قلت ليك اتعودت على اكل الكافتريا ما عشان حاجه... سكت ما رديت، غسان قام وقال الحمدلله.. قلت مالو الليله ما دافع لي؟ في نقاشنا دا كلو ما قال حاجه ولا كأنو قاعد .. طلع وجا خاشي بعد دقيقتين شايل حاجه اماني قالت ليهو دا كولر؟؟ قال ليها اي .. ختاهو جمب تربيزتي لأنها كانت على جوا وتربيزة اماني جمب الباب.. رجع تاني شايل حاجه شكلها تبعو فيها مويه قلبها فيهو وختاها بفوق ... اول مره اشوف الكولر دا، عارفه انو بشربو منو مويه لكن كيف ما عارفه.. رجع تاني وكان شايل كبابي ورق كتيرة جوا بعض ختاهم بفوق وشال وحده بقيت مركزة معاهو عشان اشوف حيكب منو كيف لمن رفع راسو شافني بعاين ليهو كشر حواجبو باستغراب ما عرفت اعمل شنو بقيت بتمتم قلت ليهو ااا اديني معاك.... قال لي حاره لسه ما بردت، قلت ليهو ما مشكلة.. لميت الفطارة ودخلتها الشنطه مدا لي الكباية شلتها بدون ما اعاين ليهو وعملت نفسي مشغوله في الكمبيوتر... سمعت صوت خطواتو بعدين صوت اماني بتقول ليهو ماشي؟؟ قال ليها لالا قاعد برا.... اماني قلبت اللافته والناس تاني بدت تجي واصلنا شغلنا وتاني ما اتكلمنا مع بعض.. كنت شغاله مع زبون ولمن سألني من حاجه ما عرفتها قلت ليهو امشي لاماني..

بعد طلع قبلت علي وقالت ليه تقولي للراجل امشي ليها؟ هسي حيقول نحن ما بنعرف نشتغل وحتجيبي سمعة للوكالة.. قلت ليها وكان مفروض اعمل شنو بعدين هو اساسا ما عايز تذكرة ولا سأل من عقد عمل ف الطبيعي اني ارسلو ليك.. قالت لي مالك بقيتي تطولي لسانك علي؟؟ ولا عشان شايفه غسان قايلاهو حيقيف معاك زي كل مره ... قلت ليها ما عشان غسان ولا حاجه لكن انتي كترتيها وبقيتي تهيجي في الفاضي والمليان.. قالت لي والله؟؟ يعني انتي لمن تثبتي للزباين اننا ما بنعرف اي شي انا مفروض اقيف واصفق ليك؟؟.. قلت ليها اماني خلاص ماف داعي للنقاش دا هسي اقفلي السيرة... سكتت تاني وما ردت.. الساعه ٢ لمن جات غسان جا قال لينا ما طالعين ولا شنو يا شابات.. اماني قالت ليهو دقايق شغاله في حاجه.. انا شلت شنطتي وقمت قلت ليهم مع السلامه.. بعد طلعت غسان ناداني قبلت لقيتو جاي علي قال لي استني نوصلك معانا الموقف.. قلت ليهو ما بحتاج اصلا الموقف قريب وقعد امشي بي رجليني كل يوم.. قال لي تمام براحتك... مشيت وانا زعلانه اول عشان عدم تدخلو قبيل لمن اماني اتناقشت معاي وهسي عشان خلاني امشي براي وحيودي اماني، لكن .... دي ما اسباب تخليني ازعل للدرجه دي هو ما مجبور يحنسني عشان يوصلني ولا انو يتدخل ويدافع لي كل مرة... وقفت واخدت نفس طويل عسى ولعل يهديني شويه.. ركبت وقعدت في المقعد الجمب الكمساري اتكلت بي يدي على الشباك وذاكرتي بقت تعيد لي المواقف القبيل غصباً عني...
__ _____

دور العربيه بعد أخيراً اماني نزلت وخلصت الرغي بتاعها الخلاهو يبطل العربية.. اتحرك وسأل نفسو "السبب الخلاها ترفض تركب معانا شنو.. كان واضح من طريقة كلامها انها زعلانه، طيب انا مالي ".. انتشلو من افكارو صوت رنة التلفون رد وقال: اهلا
باسل: ان شاء الله ما تكون طلعت من المكتب
غسان: طلعت ، في شنو؟
باسل: دور وارجع
غسان: ليه
باسل: إسماعيل دق لي هسي وقال شايل الاوراق وجاي عليك
غسان: خليهو هو يرجع انا تاني ما برجع المكتب
باسل: كيف الكلام دا يا مان
غسان: باسل من الصباح انا قاعد منتظر الزول دا قلت لي بجي الظهر ومن الساعه ١٠ انا هناك
باسل: ياخ الراجل اخروهو في السفارة يعمل شنو
غسان: انا مالي ومال السفارة هو لو عندو شغل ما يضبط مواعيدو ولا يأجلو لي يوم تاني
باسل: خلاص اعذرو ودور ارجع عليك الله الزول بكون وصل ومستنيك
اتنهد ومسح وشو بزهج
باسل: يلا انا بدق ليهو اقول ليه قربت

فتح الباب الحديدي ورفعو وبعدها فتح البوابة الزجاجيه
غسان: اتفضل ادخل
اسماعيل: لالا انا مستعجل هاك ديل الطلبتهم كلهم شوف لو في شي ناقص
قلب غسان الاوراق وقال ليهو لا كدا تمام ... دخل الوكالة وفتح مكتبو دخل الاوراق ورجع قفلو، نظرو تلقائيا اتوجه لتربيزتها لاحظ للدفتر المفتوح وفي نصو قلم رصاص مشى على التربيزة شال الدفتر وبقى بقلب فيهو " دا خطها ؟؟؟" ختا قبضة يدو على خشمو وهو بحاول يكتم ضحكتو قبل يمين وشمال كأنو في زول مراقبو " خطها شين شديد" ابتسم ابتسامه جانبيه... " لكن... هي سمحه"
_____

*" عدم انتظام التنفس وضربات القلب هي اول دليل على انك وقعت في فخ ما يُسمى الحب"*
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*

*#كفة~مائلة《14》*
*#بقلمي~لينه~جمال*
*ہہہہـہہہہہـہہـہہـہہہہہـہہہـہہہہہـہہـہہہــــــــ*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
سلااام ناس البيت (بصفق بي يدو ويدخل)..
رد طارق من العريشة: وعليكم السلام محجوب؟؟ اتفضل اتفضل
دخل العريشة سلم عليهو وقعد في السرير القصادو: اخبارك شنو
طارق: زي ما شايف
محجوب: ربنا يصبرك يا صحبي وين ناس البيت
طارق: اي زول مشى على شغلو
محجوب: قاعد براك يعني ؟
طارق: اي
محجوب: كيف الكلام دا واختك وين؟
طارق: نزلت شغل
محجوب: شغل شنو وانت في حالتك دي يا زول وابوك رِضى ليها كيف
طارق: من زمان خاته فكرة الشغل في راسها ولمن بقيت في الكرسي ما صدقت
محجوب: لالالا الكلام دا ما بنفع اتكلم مع ابوك خليهو يوقفها من الشغل دا وتقعد معاك في البيت
طارق: المشكلة وضعنا ما زي زمان يا محجوب ابوي براهو ما بقدر على مصاريف البيت ومدرسة طلال
محجوب: طلال دا زاتو مدرسة شنو ليهو،داير يقرا لحدي متين وعشان يشتغل شنو بعدين.. شوفو ليهو شغل يناسب حالتو ووقفوه من القرايه كفاهو بعد دا
طارق: حيشتغل شنو يعني عليك الله انت بتتكلم كيف يا محجوب
محجوب: مش حافظ القران خلون يشتغل شيخ ان شاء الله المهم يدخل ليكم قروش
طارق اتنهد بدون ما يرد
محجوب ختا يدو في رجول طارق وقال: عاين يا صحبي انا بقول كدا عشان انتو كلكم زي اخواني وانا لو مكانك ما كنت بسكت على الحاصل دا انت راجل البيت دا والدايرو مفروض يحصل غصباً عن عين اي زول ما تشوف حالتك دي وتقول انا ضعفت خلاص وماف زول يسمع كلامي لالالا انت الكبير وحتفضل الكبير
طارق: كلامك صح، من يوم قعدت في الكرسي دا واي زول بقى بمشي بي مزاجو، بعدين بقعد مع ابوي وبتفاهم معاهو
محجوب: اي دا الكلام.. يلا انا ماشي فتك بي عافيه
طارق: ماشي وين فطرت انت؟
محجوب: لالا والله
طارق: انا وابوي فطرنا قبل شويه جوا الاكل مغطى امشي جيبو وتعال افطر
محجوب قعد جمب طارق ياكل ويونس فيهو.. وطارق بعاين للتلفزيون وبالو في حته تانيه فجأة قاطعو وهو بقول ليهو اتصل ليها
محجوب: لمنو؟ ياتا فيهم
طارق: مروة
محجوب: مروة؟؟ يا زول متأكد؟
طارق: اي، لكن داير منك خدمة اول
محجوب: قول طوالي ويتنفذ
طارق: بكرا حاطلع
محجوب: وين
طارق: بوريك بعد اخلص المكالمه
محجوب: خلاص قدام، بجيك بي عربية ابوي لكن متين بالظبط
طارق: بعد الفطور كدا يعني قبل الظهر
محجوب: ظابط
طارق: التلفون فوق التلاجه
محجوب شال التلفون عمل المكالمه وفتح الاسبيكر وختا التلفون جمبو
محجوب: حامشي اغسل يدي واشرب لي سيجارة بي برا لمن تنتهي ناديني
_ _

غدير: بت امي بتناديك
غيم: عايزه شنو؟
غدير: ما بعرف
عاينت لصحبتها الفي السرير التاني وماسكه كتاب بتقراهو : تنزلي معاي يا مروه؟؟
مروه: لا امشي انتي
دخلت التلفون الكانت شغاله بيهو في جيب البجامه وطلعت ورا اختها..
غدير: ما قالت ليك ناويه تنزل شغل متين؟
غيم: ما قالت ولا سألتها هي جات تقعد يومين عشان تريح راسها من اسئلة ناس البيت اقوم انا اكرهها بي جاي

امها و ابوها وغسان كانو في الصالة وانضمو ليهم هم الاتنين
غيم: اي يا امي
حياة: اخوك لقى ليك شغل في السعوديه

عاينت لي اخوها الكان ماسك كباية القهوه وشغال بي تلفونو
غيم: شغل شنو؟
غسان: امي انتي مصره؟؟
حياة: ااي مصره انت مالك معترض وريني سبب واحد بس، قلت ليك بتقعد مع ناس خالك مش الشغل دا في الرياض؟
غسان: انا مشكلتي في قعادها ، غيم ما حتقدر للشغل دا
حياة: ليه ما تقدر، نان قرت خمسة سنين عشان شنو؟
غيم: كدي فهموني وختوني في الصورة، دا عقد عمل يعني؟
حياة: اي
غيم: والقال ليكم منو انا عايزه اشتغل؟
غسان اشر عليها بي يدو وعاين لي حياة تأكيداً على كلامو
حياة: استغفر الله العظيم يارب اللهم طولك يا روح، ليه ما دايرة تشتغلي وريني سببك يمكن اقتنع انا زاتي.. دايرة العرس
غيم: لا دا لا دا
عبدالرحيم: حياة مالك انتي على البت؟ قالت ليك ما دايرة تشتغل حتشغليها بالغصب؟
حياة: خلاص خليك قاعده كدا لا شغله لا عمله قضي حياتك دي كلها بين طلعاتك مع صحباتك وبين غرفتك طيري يلا من قدامي
الدموع اتجمعو في عيونها عاينت لامها مسافه وبخطوات سريعه مشت غرفتها
غدير: امي بالغتي لكن
قامت ورا اختها وحياة تابعتهم بنظراتها لحدي ما اختفو
عبدالرحيم: ما عارف انا مشكلتك مع البت دي شنو
حياة وهي بتقوم: المشكلة بقت فيني انا مش؟ ما لازم اكون انا لاازم
وقامت هي زاتا غسان قام ووقف جمب ابوهو حكا حنكو وقال: انا شايف تعمل زي غدير وتلحق القنبلة قبل ما تنفجر

طلع وهو بضحك ركب عربيتو واول ما اتحرك جاتو مكالمه.. لفا بالشارع البطلعو على الزلط وهو برد
_ ابو النسب
__ الحبيب
_ الاخبار شنو
__كلو تمام
_ مشيت الوكاله ؟
__ لا، كنت حاتصل ليك بخصوص الموضوع دا، فاضي الليله نتلاقى؟
_ الليله؟؟؟ ما اظن القى طريقه، في شنو خير ان شاء الله
__ داير امسك وكالة العربي
اخد مسافة يستوعب السمعو: تمسكهم الاتنين يعني ؟
__ لا حقت العربي بس
_ والغير رايك شنو مش كنت بقول ليك امسكها واتحججت لي بالمصنع وبتاع؟
__ يا زول كان ما داير برجع للعمارات عادي
_ لالالا بس اتفاجأت، يعني الموظفات لسه دايرين تدريب ومتابعه؟
__ ياخ انت مالك حكاك كدا
سكت شويه بعدين قال: غسان هوووي انا اتذكرت حاجه
__ شنو؟
_ ايام كنت بتزاوغ من ناس الفِرقة ايام الحفلات وبعد جات ميسم بقيت كل يوم ناطي ليهم
فكا غسان ضحكة طويله وهو بعشق العربيه عشان يقيف في الاستوب: برجع ليك بعدين
_ اهاا الضحكه دي وراها سر، يا زول لمن نتلاقى ان شاء الله.. حتمشي الليله طوالي؟
غسان: لا عندي شويه حاجات حاخلصها في العمارات وبكرا بمشي ليهم
باسل: تمام

غسان قفل منو، اتكل بي كوع يدو في الشباك وبقى بحك راسو بسبابتو وسرحان في الشارع، ما وعى الا على صوت البوري وصوت زول بشتم جاي من ورا، طلع راسو بالشباك وهو بنفض يدو وبقول : ياخ ما هدا الشارع ما تتحرك ما تطلع ميتينا..
اتحرك ومزاجو الرايق اتعكر بسبب غباء بعض الشباب السواقين البلاقوه في الشارع

غدير: غيم يا بت انتي ما عارفه امي يعني خلي العوارة قومي
غيم: غدير خليني في حالي
غدير: يوم متين كنتي بتزعلي من كلامها للدرجه دي لمن تبكي
مروة وهي بتهزها من كتفها: قومي ياخ ما تبكي
تن تن تن تررن تن تن

قامت غدير عشان تمد التلفون لي مروه، سألتها مروه قبل تصلها: منو؟
غدير وهي بتعاين للتلفون: مكتوب طارق
غيم قامت من تحت المخده مسحت دموعها وهي بتقول لغدير: امشي خلاص
استغربت غدير لكن فهمت انو مروة محتاجه خصوصية للمكالمه الجاتها وبما انو هي وغيم صحبات مقربات وماف خصوصية بيناتهم معناها وجودها بس الحيضايقهم... اول ما غدير طلعت غيم قامت وقفلت الباب
غيم: ردي

" الو نعم.. ايوه يا طارق قول العندك سريع لأنو انا ما فاضيه (عاينت لي غيم) تشوفني؟.. متين ووين...." تمام
قفلت الخط وعاينت لي غيم القلبها كان بضرب بجنون وهي مستنيه مروة تحكي ليها الحصل
غيم: اها ؟
مروة قعدت وقالت: قال داير يلاقيني
غيم جات قعدت جمبها: وما وراك ليه؟
مروة: لا
غيم: حتمشي؟
مروة: اي قال الموضوع ضروري
غيم: انتي غبيه ؟ توافقي طوالي لشنو؟؟ بعد ما رماك زي الحاجه الكعبه ترجعي ليهو بالسهولة دي؟؟
مروة: انا ما رجعت ليهو يا غيم، ووافقت اقابلو عشان خاطر الكان بينا لأنو ما كان شي هين دي عشرة ٣ سنين، حامشي اشوفوو داير شنو واقفل الصفحه دي خلاص
غيم: اممم وحتتلاقو متين؟
قامت ومشت على الشماعه تشيل عبايتها: بكرا بعد الظهر يلا انا حامشي
غيم: تمشي وين؟
مروة: ماشه البيت، ما عندي حاجه البسها لي بكرا
قالت وهي بتتظاهر باللامبالاة عشان تصل لنقطة معينه: اممم كان تقعدي ساي بديك تلبسي مني ولا ماشين محل راقي يعني؟ هههه
مروة قالت وهي بتلبس العبايه: اه محل راقي شنو ياهو الكافيه عبدالواحد حقنا دا
غيم: امممم طيب وريني حصل شنو بعد ترجعي.. وما تضعفي ليهو ولا تتأثري بكلامو لأنو دا واحد ما بستاهل
اتنهدت وقالت: ان شاء الله
حضنتها وطلعت ووراها غيم عشان تقدمها
__ ___

المساء بعد رجعت من الشغل اصلا كنت زهجانه وطارق قفلها معاي ذيادة رجع لحركاتو القديمه وكورايكو من اقل شي... لكن من ناحيه كنت مبسوطه لأنو على الاقل طلع من حالتو ديك، بعد رقدنا ما قدرت انوم طوالي كنت بتقلب اتذكرت غسان ليهو فترة ما ظهر ولا اتصل في تلفون المكتب حتى المرتب رسلو لينا مع منصور.. يا ربي بكون مالو؟.. معقوله اتعودت عليهو للدرجه دي ؟؟ وجودو في المكتب بعمل الجو وبكون مرتاحه ما عارفه ليه.. يمكن عشان بتصرف زي ما دايرة وما بخاف من اماني لأني متأكدة انو في زول يدافع لي ويقيف معاي.. اتذكرت اخر مره جا فيها لمن ما اتدخل ياربي كشفني وزهج من حركاتي؟؟....
بقيت بتكلم مع نفسي واسألها لحدي ما رحت فيها.... تاني يوم صحيت بصوت طلال وهو بهز فيني كنت نعسانه شديد ويا الله فتحت عيني جريت البطانيه وقلت ليهو مالك يا طلال؟.. قال لي ميسم انتي كويسه؟ .. قلت ليها كويسه اي... هبش راسي وقال لي حرارتك عاديه، طيب مصدعه ولا حاسه بحاجه؟؟.. قلت ليهو لالا نعسانه بس انت المصحيك بدري شنو؟ قال لي ما صاحي بدري انتي المتأخره... كنت بتكلم معاهو وانا مقبله بالجهه التانيه لمن قلل كدا قمت مخلوعه وقلت ليهو الساعه كم؟... قال لي ماشه لي ٧ .. شهقت وقمت سريع لبست شباشبي وانا بقول ليهو واي ليه ما صحيتني يا طلال؟؟.. قال لي صحيتك كم مره لكن ما قمتي.... قلت ليهو ابوي، ابوي طلع ؟.. قال لي اي لكن سويت ليهو الشاي ... قلت ليهو طيب دقيقه... دخلت المطبخ شلت قروش من البراد وجيتو قلت ليهو كنت عايزه احمر ليك بطاطس للفطور لكن شيل دي ما عندي وقت ياداب الحق البس واطلع... شالهم وقال لي طيب...
استحميت ولبست وصليت سريع سريع لميت القدرت عليهو في المطبخ حتى طلعت... الساعه كانت ٨ الا قلت الليله اماني لقت ليها سبب عشان تفش زهجتها حقت الصباح فيني يارب احصل سريع يااارب.... ركبت هايس عشان الحافله بتقيف كتير، كنت كل دقيقتين بعاين للساعه في النهاية دخلت التلفون في الشنطه عشان ما اتوتر ذياده... لمن وصلت الساعه كانت ٩ ونص، اخدت اكتر من ساعه لأني طلعت وقت الزحمه مشيت بسرعه والمكتب كان من برا ظاهر انو مليان دخلت ولقيت غسان قاعد في تربيزتي فرحت فرحه لأنو اماني ما حتقدر تشاكلني وحتى لو فتحت خشمها معاي حاقدر ارد ليها... اداني نظره ما فهمت معناها وقام بعد انتهى من الزول الكان قاعد معاهو دخل مكتبو وانا قعدت في تربيزتي لمن عاينت لي اماني لقيتها بتحمر لي قلت بي نفسي حمري سمح ما بتقدري علي الليله.... اشتغلنا قريب ساعه حتى المكتب فِضى، انا خلصت قبلها وبقيت مستنيه شكلتنا الحتبدا بعد شويه بعد الزبون طلع قبلت علي وربعت يدينها انا زاتي ربعت يدي وقبلت عليها قالت لي كان تتمي نومتك وتاخدي اليوم اجازه بالمرة قلت ليها ما تبالغي كلها ساعه.. مطت شفايفها وقالت لي والله؟؟ .. في اللحظه دي باب مكتب غسان فتح قال بي حده وهو ماسك المقبض ومادي راسو: ميسم تعالي ... قال كدا ودخل طوالي، قمت بعد مسافه دخلت لقيتو متكل في الكرسي وماسك قلم حبر بطق بيهو في التربيزة قعدت وقلت ليهو استاذ غسان كيفك.. خت القلم وشبك يدينو فوق التربيزة قال لي الاخرك شنو؟.. سكت ساي قال لي انا اي شي ممكن اقبلو الا التأخير جني وجن زول يتأخر في مواعيد شغلو لا وفوق كدا ما معترف بتأخيرو وشايف انها ساعه ما حتعمل حاجه.. (قال وهو بأشر بي يدو على باب المكتب) ممكن توريني يا استاذة لو انا ما كنت جيت زميلتك كانت حتخلص الشغل كيف؟ ولا في الساعه دي حتلف بين تربيزتك وتربيزتها؟؟...... كنت منزلة راسي وماسكه دموعي بالعافيه حاسه القدامي دا ما غسان البعرفو اول مره يتكلم معاي بالطريقة دي قلت وانا بجاهد عشان دموعي ما تنزل: اتأخرت لأنو شالتني نومه.... سكت مسافه بعدين قال لي تمام، اول واخر مره ما تتكرر تاني... هزيت راسي وقلت ليهو عايز مني حاجه تاني؟... اشر على الباب وقال لي اتفضلي على شغلك..... قمت وطلعت برا طوالي لأني لو قعدت ثانيه كنت حانفجر بالبكا قدام اماني، سمعتها بتناديني لكن ما اشتغلت بيها.. مشيت مسافه وانا ببكي بحرقة ما بتذكر اخر مره بكيت متين لكن المره دي طلعت حق الشهور الفاتت كلها.. اصلا انا كدا بكتم جواي كتيييير ولمن تجي اللحظه الببكي فيها بنفجر وبتذكر الفات كلو... لمن وعيت لي نفسي لقيت اني فتا الموقف البركب منو الحمدلله اني كنت ماشه بنفس طريق المواصلات والا ما كنت حاعرف ارجع كيف.... رجعت بنفس الشارع الجيت بيهو، ما كان في زول في المكتب اماني ماف وغسان بابو مقفول قلت لنفسي يكون قاعد وقافل الباب؟؟ وانا مالي ومالو قاعد ولا ماف ولا طار... قعدت في تربيزتي ولاحظت ياداب للعلاقة مقلوبة معناها مشو يفطروا، قمت قلبت اللافته وقعدت مكاني.. جو كم نفر الكانو تبعي اشتغلت ليهم والتبع اماني استنوها.. جو داخلين الاتنين سوا وكانو بضحكو واماني ضربتو في كتفو براحه وهي بتقول: بطل يا ود....

حسيت بشعور غريب حتى انا نفسي ما قادرة افسرو بس كان نفسي اقوم اخنقهم الاتنين يعني انا يشاكلني عشان اتأخرت ساعه ويمشي يضحك ويهظر مع اماني ويخليها تتظارف كدا عادي... قبل يلاحظو لي عملت نفسي ما شايفاهم ومركزه في الكمبيوتر.. لمحت بطرف عيوني اماني قعدت مكانها وفي زبون جاها طوالي .. سمعت صوت غسان بسألني: فطرتي؟؟ ... زحيت عيوني سريع سريع وقلت ليهو الحمدلله... بسألني عادي ولا كأنو كان بشاكلني قبيل..... ما عارفه اليوم دا عدا كيف لكن كنت زهجانه شديد وما اتكلمت مع واحد فيهم اصلا غسان بعد دخل تاني ما طلع الا وقت الصلاه واماني زاتا ما اتكلمت معاي..حتى القهوة الجابوها ما شربتها، لمن الساعه ٢ الا خمسه دقايق جات قمت طوالي وقلت لي اماني انا مشيت.. قالت لي اوكي وهي زاتا قامت دخلت مكتب غسان عضيت شفتي السفلي وانا بعاين ليها عارفاني طالعه ودخلت ليهو جوا فهما شنو يعني؟؟؟ طلعت وانا دمي بغلي ما عارفه الحاله الدخلت فيني دي شنو.... اول ما وصلت شارعنا دخلت بيت ناس عمي لو ما لاقيت خنساء واتكلمت معاها النار الجواي ما بتنطفي دخلت لقيت مافي زول برا في الصاله لمن ناديت جاتني اسراء سلمت وقلت ليها خنساء ماف؟ قالت لي قاعده دقيقه.. كانت داخله مسكتها قلت ليها لو نايمه خليها بس لمن تصحى كلميها اني جيت وخليها تجيني بعدين قالت لي طيب... مشيت البيت لقيت طارق مافي وطلال نايم صحيتو قلت ليهو طارق وينو؟؟ .. قال لي الصباح كان بقول لي ابوي طالع مع محجوب.. قلت ليهو طالع وين؟؟.. قال لي ما عارف والله.. خليتو رجع رقد وطلعت، صحبو محجوب دا ما بنزل لي من حلقي وما برتاح ليهو نهائي حتى لي نظراتو وكلامو.. قلت لكن احسن طارق يطلع يفرق شويه، من حصل ليهو الحادث ما طلع من البيت يمكن نفسيتو تتحسن...
___ ___

كان قاعد في الكافيه وكل شويه بقبل على الواجهه الزجاجيه يشوفها اذا جات اتأفف وهو سرحان ببرا وبسأل جواهو من سبب تأخرها... قبّل لمن سمع صوت الكرسي بتجرا، ارتسمت ابتسامه في وشو اختفت سريع اول ما شاف القعدت قصادو وهي خالفه رجلها
-- ازيك يا... استاذ طارق
رمش كم مرة وهو بعاين في حتات مختلفه
-- ااا معليش ما سلمت عليك
مدت يدها وبقت مستنيه يصافحها، استنت طويل بس ما كان في استجابه منو غير نظراتو الغير مفهومه رجعت يدها مطت شفايفها ورفعت حواجبها: ولا حتى سلام ما عايز تسلم؟؟ هئه اليشوف تحانيسك لي عشان نربط ما يشوف تصرفاتك دي.. ممكن افهم دا شنو البتعملو معاي دا؟؟
_ مروة وينها؟
-- ما عندك شغله بي مروة انا القاعده هنا وبتكلم معاك وما حامشي من هنا قبل توضح لي سبب عمايلك دي
رجعت لي ورا وربعت يدينها وهي بتعاين ليهو: وريني الخلاك تتصل ليها هي شنو؟ مش قلت لي انفصلتو؟ من ٣ شهور وانت ما بترد علي ورديت عليها هي... وحتى لمن فكرت تتصل اتصلت ليها هي.. وانا؟؟ انا المستنياك الفترة دي كلها ما بستاهل ولا رسالة؟
_ ما بتستاهلي
-- ههههههه وهي بتستاهل؟
_ اي
-- انت متخلف صح؟؟
_ عايزه تعرفي كنت مختفي ليه؟
-- يا ريت
قبل على الكرسي المطوي ومسنود في الحيطه جمب كرسيهو عاين ليها ورجع عاين ليهو تاني ورفع حواجبو.. رفعت أكتافها وهي بتقول: ما فاهمه
_ حبيبك بقى مُقعد
ضحك وهو بعاين لملامح وشها الكانت بين مصدومه وبين غير مستوعبه
ضحكت وقالت : دا حنكك؟
_ قومي تعالي
-- شنو؟
_ تعالي ارفعي يدي
بلعت ريقها وكأنها ياداب استوعبت قامت ببطء وقفت جمب كرسيهو ورفعت يدو اول ما فكتها جات واقعه.. شهقت ورجعت عاينت ليهو لقتو مبتسم ابتسامه جانبيه كأنها هي الفي وضعو دا ما هو.. رجعت كم خطوه لي ورا وثبتت في الكرسي بتاعها، قعدت وشربت من المويه الكانت جمبو
_ مالك؟
-- انا انا بس مصدومه
_ اتصدمي ما مشكلة من حقك، ما جاوبتيني لسه مروة وينها وحتجي متين؟
شالت تلفونها من فوق التربيزة ويدها بترجف.. التلفون وقع من يدها رفعتو تاني وقالت ليهو حتصل بعد دا ا..اانا مفروض امشي قبل تصل ما.. ما توريها اني كنت معاك
لبست شنطتها وطلعت ورجولها بتضرب في بعض

غسان: ما ورتك لمن كانت طالعه؟
اماني: ورتني
غسان: وليه خليتيها تمشي
اماني: الله!! حامسكها بالغصب يعني؟ ما هي عارفه انك بتوصلنا لو كانت عايزه تمشي كان براها استنت.. ما جاوبتني يا غسان
غسان: انا اتأخرت عندي موعد بعد نص ساعه وياداب احصل
اماني: غسان والمواعيد
ابتسم ابتسامه مجاملة اول ما نزلت اتحرك قال بنفاذ صبر: ابو دي معطة زاتو
فتح درج العربية وطلع ورقه ضحك للمره التانيه وهو بعاين ليها: ياخ دي لو طفلة عمرها ١٠ سنين ما بكون خطها زي دا... عامله فيها زعلانه الليله، لكن كان لابد من هرشة عشان ما تشوف نفسها وتعمل العايزاه في النهاية الشغل شغل..
___ ____

بعد المغرب خنساء جاتني كنت مشتاقه ليها وطولت ما قعدت معاها ورتني انها قدمت للجامعه قبل كم يوم ومرتضى مشا معاها في التقديم.. قلت ليها صحي هو اخبارو شنو، قالت لي كويس والله يمكن امشي ليهم في اليومين الجايين ديل .. قلت ليها وين بيتهم؟ قالت لي اي مرتضى كرهني ياخ قال كل يوم امو بتسألو.. قلت ليها ما وريتي امك؟ قالت لي ما قادرة والله يا ميسم كل ما اكون عايزه افتح معاها الموضوع بتراجع.. قلت ليها ما حاجه هينه لكن لازم تكلميها يا خنساء.. قالت لي بكلمها بكلمها خليك مني كدي احكي لي انتي اخبارك شنو مع الشغل ؟؟.. قلت ليها والله تمام ماشي حالو.. قالت لي ومديرك المز داك.. قلت ليها مز شنو يا بت.. قالت لي مش قلتي لي وجيه وشخصيه كدا.. قلت ليها يعني ما للدرجه دي .. لكزتني في كتفي وقالت لي شكلو في كلام كتيييير جواك يلا احكي سامعاك... ربعت رجولها وختت يدها في حنكها حكيت ليها مواقفو معاي كلها لحدي موقف الليله وزعلتي منو... قالت لي وهي سرحانه فيني: يعني انتي لمن شاكلك زعلتي ولمن اتونس مع البت الكريهه المعاك ديك غرتي؟؟... قلت ليها غرت شنو يا بت ما غرت لكن حركة ما ظريفه منو.. قالت لي اجي يعني عشان انتي غلطتي وحاسبك يحاسب البت المعاك برضو؟ ذنبها شنو هي... سكت لأنو كلامها صح قالت لي ميسم دايراني اكون صريييحه معاك.. عاينت ليها باستغراب قالت لي ما تبحلقي فيني كدا دايرة ولا ما دايرة.. قلت ليها دايرة.. قالت لي انتي رِدتي الولد دا يا بت امي.. قلت ليها خنساء انتي جنيتي ريدة شنو وكلام فارغ شنو انا متين عرفتو عشان اريدو.. قالت لي ماف تفسير غير كدا يا زوله حبيتيهو بس الحكايه واضحه ما دايرة ليها ذكاء

__

*" كنت دائماً بجانبي ما الذي حل بك؟ ام انك مللت من طفولتي المتأخرة، لا تلُمني انت من افقتها من ثبات دام لسنين وانت من ستتحمل عواقبها"*
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*