المهم فضلناهم و دخلنا معاهم جوه ، أمي قعدت معاهم و أنا دخلت جوه جبت ليهم مويه ، فاروق قال لي بقيتي هاديه ، فعلاً الكبر حسنات ، خالتو إعتزاز قالت ليهو والله الهدوء زينة البنات ، المهم بعدها قعدت معاهم و هم بدوا يتونسوا ، بعد مسافه أمي كانت حـ تقوم و تمشي تعمل الجبنه ، طوالي سبقتها و قلت ليها بعملها أنا و طوالي مشيت المطبخ ، أحسن أمي تقعد معاهم و أنا اعمل الجبنه بدل ما تعملها هي و تخليني أقعد معاهم ، والله حاسه نفسي غريبه كأني بعرفهم أول مره ، المهم و أنا بعمل في الجبنه فجأه كدا معزه جات داخله ، قالت لي كيفك ؟؟
قلت ليها كويسه الحمدلله ، كان في كرسي قعدت فيهو و قالت لي أخبارك شنو ؟! قلت ليها تمااام و انتِ ؟ قالت لي ياهو مع جري الجامعه ، قلت ليها صحي بتقري شنو و وين و جبتي كم في تالته ؟
قالت لي جبت 85 و حالياً بقرا تمريض في جامعة السودان للعلوم و التكنولوجيا ، قلت ليها والله ما شاء الله ، اها لقيتي الجامعه كيف !؟ قالت لي والله لسه ما إتعودت عليها ، قلت ليها ليك كم شهر ؟؟
قالت لي طولت ، قلت ليها و مع ذلك لسه ما اتعودتي ! غيتو بتبالغي يا معزه !
_ والله ما مبالغه يا مها لكن أنا ما قدرت اتأقلم و ما قدرت ادخل في الناس بسرعه
= و السبب ؟ ناس دفعتك ما كويسين ؟
_ لا ما كدا بس انا الما متعوده على الناس ، هسي بتشوفيني بتونس معاك عادي بس انا ما إجتماعيه و ما حصل إختلطت مع الناس ، كنت من المدرسه للبيت و من البيت للمدرسه ، أمي ما كانت بتخليني أمشي لزول ، انتِ البت الوحيده الأمي خلتني أجي ليك لأنكم جيرانا
= والله ما قايلاك إنطوائيه كدا !
_ ايييك و اكتر من كدا والله ، انتِ عارفه اول مره أحس إنو أمي ظلمتني لمن قفلتني في البيت و أول مره أحس إني ما بشبه الناس ، أول مره اكتشف إنو حياتي كلها قيود ، أنا لو اتأخرت دقيقتين بس بلقى أمي واقفه لي جنب الباب و بتجوط
= عادي من خوفها عليك
_ عارفه يا مها لكن هي خانقاني ، بقيت ما قادره أفهم هي بتعمل كدا خوفاً علي و لا خوفاً مني !
= المهم لمصلحتك
_ عارفه يا مها ، أصلاً كل أم بتتمنى الخير لـ بتها بس أمي يا مها خانقاني ، زمان ما كان بفرق معاي لو طلعت أو قعدت في البيت ، لو إختلطت بالناس أو ما إختلطت بيهم بس هسي الوضع إختلف ! أنا هسي جامعيه كبيره بس مع ذلك ما بقدر اتكلم قدام نفرين ! ما بقدر اسأل الدكتور و أقول ليهو ما فاهمه عيد أو اشرح لي النقطه دي ، بخاف اتكلم قدام الناس ، بحس إنو لو اتكلمت الناس حـ تضحك علي
= رغم إني ما جربت احساسك دا و ما مشيت الجامعه لكن حسيت فيك ، المهم حاولي ما تخافي و ارخي أعصابك ، و ختي في بالك إنك ما أقل من زول ، زي ما هم بشاركوا و بتكلموا انتِ كمان شاركي و اتكلمي و زي ما هم بسألوا انتِ كمان اسألي ، ما تتعودي على الخوف ما تتعودي تقعدي في ورا أو في المنطقه المظلمه ، اظهري للنور ، اتحدي خوفك و عززي ثقتك في نفسك و اياك تخلي الخوف و عدم الثقه بالنفس يأثروا عليك
_ بالجد كلامك حقيقه ، طيب يا مها بما انك عارفه دا كلو و فاهمه نفسك بتقولي في شنو فـ ليه ما بتطبقي الكلام دا على نفسك !؟... ليه ما خليتي المدرسه ؟؟ ليه ما عايزا تدخلي الجامعه و تتخرجي و يكون عندك شهاده ؟!
= ما ضروري أي نصيحه أو كل حاجه نقولها لغيرنا نطبقها على نفسنا ، مرات كتيره بنكون عارفين الصح بس ما قادرين نصل ليهو أو ما عندي طاقه و شغف عشان نصل عليهو ، عادي نوصف لغيرنا طريق كويس نحنا ما عندنا رغبه نمشي بيهو
_ مها عليك الله ما تضيعي نفسك ، صدقيني الناس القاعدين برا ديل كلهم شايلين همك و عايزين مصلحتك بالذات عمر ، والله هو عايزك بأي طريقه تواصلي قرايتك ، لمن ناس أمي اتفقوا يجوا يزوروكم فاروق اتصل على عمر و طلب منو يوصف لينا بيتكم وصفو ليهو و طلب مننا نحاول نقنعك ترجعي تاني و تواصلي تعليمك ...
_ اففف أفهمو يا ناس ، أنا فقدت الشغف و ما حاسه إنو عدم مواصلتي للقرايه حيكون منقصه في حياتي ! أنا كدا مرتاحه و ياريت تاني ماف زول يفتح معاي الموضوع دا
= مها عليك الله ما تظلمي نفسك !.... ما معقوله بسبب حاجه حصلت و انتهت توقفي حياتك ! ايوه عارفه الحصل معاك ما هين ولا ساهل و عارفه إنك مجروحه و مكسوره ، بس دي ما نهاية العالم ! يعني شنو لو إتطلقتي ، يعني شنو لو حبيتي و ما لقيتي المقابل ! ... ما تنسي إنو الطلاق دا ريحك من زواج و زوج انتِ ما عايزاهم فـ مفروض تحمدي ربك ، أنا ما قادره أفهم عمر و ما بقدر أفتي ليك بحاجه بتخصو بس حتى لو كان هو ما عندو ليك حاجه دي ما حاجه سيئه ! الحياة دي ما واقفه على عمر ، عمر دا لا أول لا آخر راجل ، بكرا تنسيهو و تلقي الأحسن منو و بكرا تقولي معزه قالت ...

قلت ليها بصوت مبحوح اليدو في النار ما زي اليدو في المويه ، و الجمره بتحرق الواطيها عشان كدا ما حـ تحسي بي و مستحيل تقدري تختي نفسك مكاني ، قالت لي بالعكس أنا فاهماك و عارفه إحساسك و عارفه يعني شنو حب من طرف واحد ... لأني جربتو !
طبعاً لمن قالت كدا أنا إنخلعت ، قلت ليها شنووو !! كيف يعني ؟! عاينت للباب و قالت لي هوووس هوووس وطي صوتك ما يسمعونا !
قلت ليها طيب وطيت صوتي !... قولي لي دا منو و من متين ، قالت لي ما بقدر أقول ليك دا منو ، بس كنت بحبو من زمان و هو ما عارف و للأسف كان حابي وحده تانيه ، كنت لمن ألمحو ساي بحس بالسعاده ، و لو سمعت صوتو بحس كأنو بتكلم معاي ، مع إنو ما حصل مواقف كتيره بيناتنا إلا إني كل يوم كنت بحبو أكتر من اليوم القبليهو ، و هو لا شايفني لا حاسي بي ، صدقيني يا مها أنا جربت شعورك و مريت بالمريتي بيهو بس اول ما اقتنعت إنو بحب غيري دفنت مشاعري و قفلت قلبي بطبله ، للآن ما نسيتو و مشاعري ناحيتو لسه زي ما هي بس ما كل البنحس بيهو بنظهروا ، ما كل حاجه جوانا لازم تطلع ، ما كل البنفكر فيهو لازم نقولوا و ما كل ما يتمناه المرء يدركه !
قلت ليها دا منو البتحبيهو من زمان دا !؟ بالجد يا معزه ما قادره اصدق ! انتِ و الحب !... معقوله انتِ بتحبي !
قالت لي مره وحده بس في حياتي كلها ، قلت ليها اتخيلت لو أمك عرفت مثلاً ، اييييك حـ تفرمك و تطلعك وحده قليلة أدب و تافه ... قالت لي فعلاً ، نفسي أفهم علاقة الحب بـ قلة الأدب و التافهه شنو !؟.... الحب إحساس لا إرادي بجينا فجأه كدا اتجاه شخص معين و قد يكون الشخص دا ما عارف ذاتو إنو في إنسان في الكون دا بحبو !... الحب إحساس زيو زي الكراهيه و الحزن و السعاده ، إذا حاصل العكس مثلاً و أمي عرفت إنو بدل الحب بكره إنسان معين فـ هل حأكون قليلة أدب و تافهه في نظرها !
قلت ليها طريق الحب ما نفسو طريق الكراهيه ، قالت لي الإتنين مشاعر !
المهم إتكلمنا شويه بعدها شلنا الجبنه و معاها شوية مكسرات و طلعنا بيهم برا ، طبعاً فتحوا لي موضوع القرايه و عمتي اكتر وحده أصريت علي ، قلت ليهم كلامي واحد ، ما عايزا أكمل ، شويه كدا سمعنا صوت الباب ، مشى فاروق فتحتو و جات معاهو مره داخله ، سلمت علينا و قالت إنها ساكنه في البيت الفاتح علينا ، أمي قالت ليها ايوااا انتِ أم الولد داك ، قالت ليها ايوااا أنا أمو ، ولدي اسمو شادي و أنا محاسن ، أمي قالت ليها و أنا أماني و عرفتها على الموجودين ، قالت لينا معليش إنشغلت و ما جيت داخله عليكم ، أمي قالت ليها لا لا ماف مشكله والله ، نحنا ذاتنا ما جينا داخلين عليكم ، المهم المراه قعدت معانا شويه بعدها مشت ، فاروق قال لي ما شاء الله جبنتك سمحه ! قلت ليهو ياداب جاك طعمها و عرفتها سمحه ! مازن قال لي ياداب راسو إستعدل ، خالتو إعتزاز قالت لي ما شاء الله بقيتي تدخلي المطبخ ، اها بتعرفي تطبخي ولا جبنه بس !؟
أمي قالت ليها بتعرف ، براااها اتعلمت ، ما شاء الله عليها بقت ماسكه لي المطبخ ، خالتو إعتزاز قالت ليها هي مفروض تكون بتعرف تطبخ من زمااان ، البت من تبقى بت بخلوا ليها المطبخ ، هسي معزه دي مريحاني من زماااان !
أمي قالت ليها نحنا بنعلم بناتنا الطبخ عشان الوحده لو طلعت أو حصل ليها أي ظرف خلاها تغيب عن البيت بتها تسد خانتها و عشانها هي بعدين لمن تعرس و تسوي ليها بيت ما عشان أتعبها و أخليها تريحني ! غيتو أنا راحتي من راحة أولادهم و بالنسبه لي الوقوف في المطبخ عشان أطبخ ليهم ما حاجه بتتعبني ... طبعاً تاني خالتو إعتزاز ما قالت حاجه ، قعدوا معانا لحد العصر صلوا و مشوا ، بقيت قاعده في الهول و برسم و أنا بردد في :

" لو كُنتَ حَقّاََ مِنَ الأعَماقِ تعشَقُني
أهديتني يا كَثيرِ القولِ "جَوّالا "

أو كَانَ حُبُّكَ حُبّاََ غيرَ مُختَلقٍ
حوّلتْ لي مِنَ حِسابِ البنكِ أمَوالا "

طبعاً كنت مندمجه شدييد مع الرسم و بيت الشعر دا و ما مركزه مع شي لحد ما فجأه كدا سمعت رهف بتقول مها عمر جا ، لمن رفعت راسي لقيت عمر واقف جنب باب الهول و رهف معاهو ! طبعاً إنخلعت و ما عرفت أجري على وين ، توب أمي كان جنبي ، خطفتو بسرعه و لفيت بيهو نفسي ، أمي جات طالعه من جوه و هي بتقول الجا منـ..... لمن شافت عمر ، قالت ليهو أهلاً و سهلاً اتفضل ، دخل سلم علينا و قعد و أنا قمت براااحه لميت حاجاتي و دخلت الغرفه جوه ، خليت الرسم و مسكت تلفون أمي و أنا بفتش على فيديو معين لحد ما لقيتو فـ طوالي شغلتو ، كان مقطع لـ اغنية من الأعماق ، من أول ما سمعتها أمبارح و هي رافضه تطلع من عقلي ، رقدت على السرير و بقيت اسمع الغنيه و أنا بردد معاها :

من الأعماق أسرتني عيونك

و كيف عايزني أعيش من دونك
و انت حبيبي البتمناه
من الأعماق ناداني حنينك
و عشت أمل أيامي سنينك
و كل جوارحي تقول بهواك
اه لو كنت عرفت حناني
ياريت يا حبيبي قليل تهواني
كنت أكيد حققت مناااااي
من الأعماق يا حبيبي يا غالي
شويه كدا أمي جات و قالت لي تعالي عمر عايز يتكلم معاك ، قفلت الفيديو و قلت ليها شنووو ! عايز مني شنو دا كمان ياخ ما يكرهنا حياتنا ! قالت لي يا بت مالك مع ولد الناس ! قلت ليها ياخ زعاط و معاط و حاشر نفسو في أي شي !
قالت لي أطلعي قدامي من دون قلة أدب ، المهم في الآخر طلعت معاها ، كان بعاين لي لحد ما قعدت ، أمي قالت ليهو نحنا حاولنا معاها قدرتنا بس ما سمعت الكلام غيتو لو عايز تتعب خشمك معاها ساي يا عمر ياها قدامك ، المهم انا ماشه أصلي ، بعد ما مشت عمر قال لي انتِ عايزا الناس دي تنزل تبوس رجلينك ولا شنو عشان ترضي تواصلي قرايتك ! قلت ليهو برااكم متعبين روحكم معاي ! أنا قلت ليكم العندي و كلااامي واحد بس المساخه حقتكم !... لمن قلت ليهو كدا رفع راسو و عاين لي !!
قال لي ما تشوفي سكاتي دا و مسايستي ليك دي و تقولي خايف منك أو ما قادر عليك ، ما تفتكري انك بقيتي كبيره و ماف زول ليهو حق يتدخل فيك و في قراراتك ! قلت ليهو والله دا المفروض ! ياخ أنا مصلحتي ما هاااماني انت مالك ! قال لي عايني ما تتكلمي معاي بالأسلوب دا عشان ما تشوفي الوش التاني ، أنا لحد الآن ما عايز أرفع صوتي عليك ولا عايز اتعامل معاك بأسلوب غير اسلوب اللين و المسايسه لأني فاهمك و عارف صعوبة المريتي بيهو بس كمان دا ما حجه ليك ولا مبرر لأسلوبك و قوة راسك !
قلت ليهو افففف أنا نفسي اعرف انت عدم مواصلتي لقرايتي و قعادي في البيت مضايقك بشنو !! أنا كدا مرتااااحه ، قال لي اسمعي الكلام ، انتِ حالياً ما حـ تقدري تعرفي أهمية مواصلتك لقرايتك ، حتشوفي انها حاجه ما مهمه و انها ما حتفيدك بشي بس غلطانه لأنو لقدام و لمن تكبري شويه صدقيني حـ تندمي و تقولي ياريتني واصلت قرايتي ، اعتبريني جاي من المستقبل و بنصحك بأكتر حاجه حـ تفيدك ، ياخ ان شاء الله تمتحني تالته دي ساي بس ما تقعدي لي كدا !... وقفت على حيلي و قلت ليهو عمر عليك الله خليني في حالي ، قلت كدا و اتحرك ، ناداني بنبره حاده بس ما إتلفت عليهو ، طبعاً عشان في بيتنا ما قدر يرفع صوتو علي ، المهم تاني يوم المراه قريبة صاحبة البيت إتصلت على أمي و قالت ليها عايزين البيت ؟! أمي قالت ليها بري والله ما عايزنوا ... طبعاً المراه قعدت تحنس في أمي و قالت ليها خليني أجيك في البيت و حـ نتكلم في الموضوع ، لو اقتنعتي خلاص و إذا لا فـ خيرها في غيرها لأنو صدقيني البيوت بقت ما بتتلقي بالساهل ، أمي قالت ليها يا عرفه البيت كاتلين فيهو زول و حالياً مختوم بشمع عايزانا نعمل بيهو شنو بس لو جايه تعالي .... المهم المراه جات و بقت تقول لأمي والله البيت سمح و قريبتي دي حـ تخت ليكم سعر إيجار مناسب ، و الشمع المختوم دا ما حـ يقعد فيهو للأبد أصلاً خلاص القضيه دي حـ تقفل لأنو القاتل معروف و اعترف و كان في شهود ، أمي قالت ليها صحي الحصل شنو في البيت دا ؟؟
قالت ليها البيت دا كان ساكنه فيهو مراه مع تلاته بنات ، طبعاً نسوان براااهم و المراه دي الله اعلم بتشتغل شنو بس بتاعة أمور و حركات شي ودع و شي شيشه و القرف دا و الرجال ديل داخلين و طالعين من بيتها ، اها قالوا إنها كانت متدينه من واحد مبلغ كبير و كل مره تغش فيهو و الراجل صبر عليها ، اها بقى يجيها كل يوم يجوط فيها و يعمل ليها فضيحه قدام الناس و نهاي ما ريحها و كل مره يقول ليها أديني قروشي و قالوا آخر مره لاقاها جنب بيتها و هددها قدام الناس كلهم ، اها قالوا بيجاي بيجاي غشتو و جابتو البيت اظن طعنتو ولا سممتو ما عارفه و دفنتوا في البيت و بناتها هم الساعدوها في الحفر و دفنوا معاها الراجل ، اها الراجل اهلو يومين يفتشوا ليهو و بعدها مشوا فتحوا بلاغ و الشرطه بدت تحقق في الموضوع لحد ما وصلوا ليها و لمن فتشوا البيت و جابوا معاهم كلاب بوليسيه لقوا الراجل مدفون في الزقاق ، طبعاً هي كانت بتجهز نفسها عشان تهرب مع بناتها لكن مسكوهم و حالياً بتتم محاكمتهم !
طبعاً أنا إتخلعت ! بس ما شفقت على سهى ولا حنيت عليها ، أصلاً هي بقت ما فارقه معاي ، من يوم كذبت على علاء و حاولت تعشمو فيني و تخرب علي فرحتي كرهتها ، أصلاً كان أفهم الحاجه دي من زمان ، أفهم انها وحده غداره و خاينه و قليلة أدب و ما مربيه و كل صفه سيئه فيها و كمان ... خاته عينها على عمر !
الزمن كلو عامله فيها بتكرهو و ما بتطيق تسمع اسمو بس هي عكس كدا و دا أكتر تفسير منطقي لتصرفها ، أصلاً أنا كنت شبه حاسه كدا بس عشان هي دائماً بتقول عليهو منفسن و بتحسيني انها بتكرهو استبعدت الفكره دي رغم إنو كان في شك جواي !

بس شكلها كانت مخططه للحاجه دي من بدري ، وقفت مع ماريا عشان تطير عنود و بعدين جات وقفت معاي أنا عشان تطير ماريا و هي أظنها في نفس الوقت كانت متواصله مع علاء و بتحفر لي عشان تطيرني .... و الحاجه الأكدت لي انها كانت متواصله مع علاء إنو علاء قال لي سهى صحبتك هي القالت لي انك بتحكي ليها عني !... يعني لو ما علاء دا جايب سيرتي ليها و محسسها إنو بحبني ما كانت طوالي كدا جاتو قبل يوم من العقد و قالت ليهو مها قاعده تحكي لي عنك ! شكلو من بدري بحكي ليها عني و هي بتوهم فيهو !
بس لو ما عمر في اليوم القبل العقد مشى لـ علاء و شاكلو و قال ليهو إنو إعتدى علي ما كان علاء اتصل على سهى عشان يسألها ليه انا كذبت فيهو كذبه زي دي ، عشان سهى كانت صحبتي هو مفتكر اننا متواصلين مع بعض و أكيد ظن إني حكيت ليها فـ عشان أنا ما برد على إتصالاتو اتصل عليها هي و طبعاً هي أكيد اتخلعت من الكلام السمعتو و أكيد اتخلعت لمن عرفت إنو أنا و عمر في الوقت داك عرسنا كان حيكون بكرا ، للسبب دا قلبت الموضوع و كذبت على علاء و عملت نفسها انها عااارفه بـموضوع العقد دا و أنا أصلاً ما متواصله معاها عشان تعرف ، يعني بس عمر دا لو كان لاقى علاء بعد العقد كان الوضع إختلف ... لو بس انا ما كذبت الكذبه دي ما كان دا كلو حصل ، أنا السبب ، أنا البراي خربت حياتي بـ يدي ، أنا المليت حياتي كلها أغلاط و عشان حاجه زي ما قال عمر تافهه !؟💔
في الآخر أمي قالت للمراه خلاص نشوف لقدام حـ يحصل شنو لكن لو لقيت بيت تاني طواالي حـ أرحل فيهو ....
تاني يوم عمر تااااني جانا ! عاينت ليهو و صريت ليهو وشي عشان أوصل ليهو إحساس إنو هو عمل لينا وجع وش ، كان جايب لينا حاجات معاهو ، اشترى لأمي توب و لـ رهف و ريل فساتين ، طبعاً قعدوا يجربوا فساتينهم قدامنا ، أمي قالت ليهو عليك الله يا عمر ما تخجلني ! هسي انت مالك متعب نفسك ماف داعي والله ! قال ليها ماف أي تعب والله ، وقفت على حيلي عشان أمشي ، أول ما إتحركت عمر قال لي هاك ، لمن إتلفت عليهو مد لي كيس أسود ، قلت ليهو دا شنو ؟! قال لي شوفيهو براك ، اترددت و ما مسكت منو الكيس فـ طوالي رهف الشفقانه شالتو منو و قالت إلا تشوف فيهو شنو و أمي شغاله ليها رهف عييب عييب و هي ما شغاله بكلام أمي ، فتحت الكيس لقت فيهو كرتونه صغيره فتحت و قالت بصوت عاااالي تلفون !!... مها جاب ليك تلفون !.... طبعاً أنا ذاتي اتفاجأت ! أمي قالت ليهو بتبالغ يا عمر والله كترتها ! ياخ انت ليه مكلف نفسك قروشك دي محرقاك ولا شنو ! اعمل ليك بيها حاجه تنفع بيها نفس ما تقعد تصرفها علينا ! قال ليها التلفون حـ يفيدها بما إنها مقويه راسها و ما عايزا تمشي المدرسه ، ممكن تتعلم منو حاجات كتيره ، طبعاً رهف و ريل بقوا يشوفوا في التلفون و أنا مره أعاين للتلفون و مره أعاين لـ عمر و كل ما أعاين ليهو بلقاهو بعاين لي لمن وترني !!
بعد مشى أنا التلفون بـ يدي ما لمستو ، قلت لأمي ما عايزاهو ، قالت لي قبييل كان تقولي ليهو كلامك دا ، قلت ليها هو عبيط و غياظ ما بسمع مني ، قالت لي بعد التلفون دا عبيط و غياظ ؟! والله انتِ نكارة جميل !
المهم مروا يومين و أنا ما قربت من التلفون كنت مره مره بشيل تلفون أمي ، يوم و أنا شايلاهو عمر اتصل ، جريت أفتش أمي لقيتها في الحمام و قالت لي ردي انتِ ، الخط فصل و تااااني اتصل و أمي من جوه الحمام قالت لي ردي شوفي في شنو و ما تخليني اتكلم و أنا جوه الحمام ... دخلت بالتلفون جوه و هو لسه برد و أنا ما عارفه أرد ولا لا ، بعد مسااافه قلت بما إنو اتصل كتير كدا معناها في حاجه !!
لمن تاني اتصل طوالي فتحت الخط و لمن قلت ليهو آلو سكت مسافه بعدها قال لي أمك وين !؟ قلت ليهو بعيده عن التلفون ، قال لي تمام حـ اتصل بعدين ... بعد كلامو دا كنت حـ اقفل الخط بس اتكلم و قال لي لسه مخزنه التلفون !؟ قلت ليهو ايوه لأنو ما عايزاهو 😊
اتزهج و قال لي لا عايزا تمشي المدرسه لا عايزا تشيلي التلفون ؟؟ عايزا تصلي لـ شنو انتِ ؟
قلت ليهو عايزا اصل للإستكاااانه بس ، اتزهج زياده و قال لي بالطريقه دي انتِ بتأذي نفسك قبل ما تأذي أي زول غيرك ، بتنتقمي من نفسك عشان الإنتقام يصل غيرك !
قلت ليهو اأذي نفسي ؟؟! انتقام ؟! بتقول في شنو انت ، قال لي أنا عارف ليه انتِ بتعملي دا كلو 😊
قلت ليهو ايوه عارفاك عااارف و كلكم عااارفين إني رافضه اواصل قرايه عشان مرتااااحه كدا !
قال لي انتِ عارفه أنا بقصد شنو ، قلت ليهو والله انا ما قاعده جواك ولا بقرا أفكارك عشان أعرفك بتقصد شنو ... قال لي ما تستهبلي ، بتحاولي تلوي لي يدي و تضري نفسك عشان تشوفي الضرر فيني أنا و كلو بسبب آخر موقف !

طبعاً هنا قلبي اشتغل زي الدلوكه ، جبت ليها ضحكه بالغصب و قلت ليهو استغفر الله ! كيف يعني لمن اضر نفسي الضرر بظهر فيك انت !؟ ليه انت مرآيه ولا شنو ما فهمت ؟!
قال لي ما تستهبلي لي !
قلت ليهو استهبل شنو أنا بالجد ما فاهمه ، يعني هسي أنا لو طعنت نفسي بسكين الطعنه حـ تجيك انت ؟🤣🤣 غيتو أستغفر الله يا عمر كلامك غريب لكن ضحكني بالجد ، معناها برضو لو أديت نفسي كف الكف حـ يجيك انت ! و العجب لو عملت روج و فاونديشن و ركبت رموش.... واي يا عمر ما قادره اتخيل منظرك !
طبعاً هنا طوالي قفل الخط في وشي ...

" أتظاهرُ بِـ اني تخطيتُك و لم أعد أتذكرُك لأُكمل يومي بِلا دموع و لَكن الليل يأتي و يعصفُ بِقلبي و عقلي بِـ ذكرياتك التي لم أستطع محوها ، يُذكرني بـِ أني لا زِلت أفتقدك و أُفكر بك أنام لأتناسى هَذا الشُعور الموجع ، و لكنني في كُل مرةٍ أصحو مِن نومي خَائفة و أبكي ، أحتاجُ مِنك اي كلمةً تطمئن."

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《39》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​

مشيت بتفكيري بعيد و بقيت اسأل نفسي عمر لييه بتصرف كدا !؟ ليييه بلمح لي ! أو يمكن هو بتعامل عادي و شايفني زي أختو و أنا البوهم نفسي مره تانيه !.. لا لا ما عايزا أعشم نفسي تاني ... طوالي نفضت الأفكار دي من بالي ، أمي جات و قالت لي عمر قال شنو ؟؟ قلت ليها قال بتصل عليك بعدين ، قالت اللهم أجعلو خير !
المهم و أنا برسم كدا و قاعده براي مشيت طلعت التلفون الجديد و شغلتو ، قلت حأشوفو و أصلاً عمر ما حـ يعرف إني استخدمتو ، المهم ركبت الشرايح المعاهو و فتحتو و بقيت اكشف و اشوف فيهو ، بالجد عجبني شديييد ! والله من لمن بعت تلفوني و أنا نفسي في تلفون جديد ! بس عمر كيف عرف إني عايزا تلفون ! ... أكيد عرف من أمي أننا بعنا تلفوني من زمان ، طبعاً عمر كان منزل لي رصيد كتيير في الشريحتين ! نشطت و دخلت اليوتيوب و بقيت أحضر في فيديوهات ليها علاقه بتصميم الأزياء ، شويه كدا أمي جات داخله و قالت لي أبوك جا هسي أطلعي سلمي عليهو ، قلت ليها ابوووي !؟ بالجد ؟... طوالي طلعت برا الغرفه لقيتو في الهول ، سلمت عليهو و قعدنا معاهو أنا و أمي ، رهف و رفيف جوا سلموا و طلعوا يلعبوا في الحوش ، أبوي قعد معانا شويه و مشى و قبل ما يمشي أداني قروش ، أصلاً هو جا يتطمن علينا و يتفقد أحوالنا ، مع إنو ما قالها بس كنت شايفه الندم في عيونو ، شايفه الحنيه و الإعتذار في عيونو ، أيوه أنا في البدايه زعلت شديد منو و حسيتو ظالم بس في الآخر اتفهمتو و ختيت ليهو العذر و أصلاً أنا السبب و أنا البديت الكذبه دي ، الأب دا أب في الأول و الآخر ، و مهما عمل حـ تفضل مكانتو ساميه ، حـ يفضل الحصن المـنيع و عمود البيت و زي ما بـقولوا سند البنيات أبوهن ❤️
المهم بعد ما مشى أمي قالت لي الحمدلله قبيل عمر إتصل و فهمني سوء الفهم الحصل ، قلت ليها بالنسبه لشنو ؟؟! قالت لي الولد شادي داك مش كان سمعناه بتكلم بالتلفون و قلنا إنو بتكلم مع أصحاب البيت و فهمنا إنو حـ يجوا راجعين و ساااي تعبنا نفسنا و طلعنا نفتش بيت !... عمر قال لي إنو شادي كان بتكلم عن حاجه تانيه إنو أصحاب البيت ما حـ يجوا قريب و قال لي ليه ما كلمتوني ، يعني إذا ناس البيت ديل جد جد كانوا جاين انتوا ما حـ تتصلوا و تكلموني و حـ تطلعوا تفتشوا بيت من وراي !... غيتو لامني شديد ، قلت ليها دقيقه هو عرف من وين ؟!
قالت لي واحد من ناس الحي بعرف عمر و لمن عرف اننا بنفتش على بيت اتصل على عمر و قال ليهو أنا عندي ليكم بيت
.. طبعاً عمر استغرب و سألو بيت شنو و الراجل قال ليهو شايف قرايبك ديل طلعوا و بفتشوا ليهم على بيت ، المهم عمر إتصل على شادي و سألو إذا أصحاب البيت جاين و كدا ... فـ شادي قال ليهو ماف كلام زي دا و و و بعدها عمر اتصل علي و حكيت ليهو الحصل كلو ...
المهم بعد أيام كدا أمجد و أحمد جونا في البيت مع أبوهم ، قعد شويه و مشى و خلاهم معانا ، اليوم كان يوم خميس ، قعدوا معانا الخميس و الجمعه و أبوهم جا ساقهم يوم السبت بالعصر كدا ، طبعاً عمو النذير كان بحاول يقنع أمي ترجع معاهو بيتو و تشيل فكرة الطلاق دي من راسها بس هي رفضت و قالت ليهو تاني ما عايزا أي وجع راس ، خلينا بعاد كدا أحسن و الأولاد يكبروا بيناتنا يوم هنا و يوم هناك ، في اليوم البعدو جونا

مازن و معزه !
مازن قال لينا معليش عملنا ليكم وجع وش بس معزه دي أصرت إنو أجيبها لـ مها ، أمي قالت ليهو الله يسامحك ، وجع وش شنو هو نحنا لاقنكم ! و متين انتوا جيتونا عشان تعملوا لينا وجع وش !
معزه قالت لي بقيتي كعبه ، من جيتي ما حصل فكرتي مره إنو تجيني في البيت ، حتى لمن جيتي لـ ناس عمتك ما غشيتي بيتنا !
أمي قالت ليها اتلومت معاك لكن حـ تجيك ان شاء الله ، المهم قعدنا نحنا الأربعه و شربنا الجبنه سوا ، مازن قال لي والله انا غير إصرار معزه عشان تجيك جيتك و أنا عشان فيك ... طبعاً لمن قال كدا عاينت ليهو بإستغراب و أمي نفس الشي ! قال لي طبعاً أنا و عمر عندما محل بتاع ملابس ليهو سنه و شويه و الشغل الحمدلله ماشي تمام بس فكرنا إنو بدل ما نشتري فساتين جاهزه نصمم فساتين على حسب رغبة الزبون ، الحاجه دي حـ تساعدنا نكبر شغلنا و نعمل ماركه خاصه بينا و يكون عندنا تصاميم بإسم المحل تبعنا و عمر شكرك لي و قال إنو شاف عندك تصاميم خرافيه فـ عشان كدا فكرت فيك و خطر على بالي إنو ممكن تجي و تشتغلي معانا و تصممي لينا فساتين أو غيرهم ، أمي فرحت و قالت ليهو آيي والله مها بترسم فساتين خطيييره شديد ، معزه قالت لي عليك الله جيبيهم لينا خلينا نشوفهم ، ناديت رهف و قلت ليها أمشي جيبي لي دفتري و فعلاً مشت و جابتو ، أديت الدفتر لـ معزه فـ بقت تشوف فيهو هي و مازن أخوها ، و كل ما يشوفوا تصميم يقولوا لي ما شاء الله والله إبداااع إبداااع !
في الآخر مازن قال لي عليك الله ما تحرجيني و عليك الله ما ترجعيني خايب ، أنا اقتنعت بتصاميمك دي و ما شاء الله عندك الموهبه ، يعني إذا انتِ من دون ما تدخلي كورسات أو ورشات تصميم الأزياء بتبدعي كدا إذا لقيتي فرصه حـ تعملي شنو ! حـ تكوني واحده من أبرز مصممي الأزياء في البلد دي بإذن الله ، ضحكت و قلت ليهو ما تمشي لـ بعيد ، دي كلها شخابيط و رسومات نهايتها حتكون في سلة الوساخه ! أمي قالت لي انتِ مالك بت جاحده للنعمه كدا ! لو مشيتي و اشتغلتي معاهم مالك ! منها تنمي موهبتك و منها تملي وقت فراغك بدل قعادك في البيت !... معزه قالت لي كلامك أمك حقيقه ، عليك الله يا مها ما تدفني الموهبه دي ، وقت ما رضيتي تواصلي قرايه اتبعي موهبتك و تعالي اشتغلي مع ناس مازن ، مازن قال لي يا جاااحده ، الناس بشهاداتهم لافين و ما لاقين شغل و انتِ لمن الشغل يجيك لحد عندك و يدق بابك ترفعي قزاز !😂
أمي قالت ليهو البت العويره دي ما بعرف فهمها بوين !... معزه قالت لي أنا ذاااتي لو لقيت طريقه بمشي و بشتغل معاهم ، شكلي في الآخر كدا حـ أجيهم راااجعه ، المهم قعدوا يتكلموا معاي كدا و يحنسوني لحد ما إقتنعت ليهم في الآخر ، مازن قال لي يلاااا حـ تبدي من بكرا طوالي ، الساعه 8 ألقاك في المحل ، قلت ليهو اها بدينا !؟ ضحك و قال لي لا خلاص تعالي في الوقت البناسبك ، عارفه موقع المحل صاح ؟؟!
قلت ليهو ايوه عارفه موقعو ، قال لي تمام بكرا ألقاك هناك و إياك تنسحبي ، قلت ليهو لو كنت حـ انسحب ما كان وافقت ، أمي قالت لي والله أحسن ليك يا بتي و ربنا يوفقكم و يفتح ليكم أبواب الرزق ... معزه قالت لأمي أديني رقمك عشان تاني اتصل لـ مها فيهو ، أمي قالت ليها مها بتلفونها عمر اشتراهو ليها ، قالت لي كويس معناها أديني رقمك و فعلاً أدتني رقمها هي و رقم مازن أخوها....
المهم تلف في اليوم البعدو إترددت في المشي و للحظات كنت حـ أتراجع بس أمي شجعتني و أصرت إنو أمشي و قالت لي لو بتخافي بمشي معاك أنا أوديك و أجي راجعه عشان أخواتك بجوا راجعين من الروضه و من المدارس ، قلت ليها لا لا ما بخاف بمشي براي ، قالت لي شلتي معاك تلفونك مش !؟ قلت ليها ياتو تلفون ؟! قالت لي الجابو ليك عمر ! قلت ليها لا ما شلتو ، قالت لي عايزا تجلطيني مش ! اها ماشه من دون تلفون عايزاني اتصل و اتطمن عليك كيف !؟... طوالي مشت و جابت لي التلفون و شيلتني ليهو بالغصب ، قالت لي سجلت ليك فيهو رقمي و رقم عمر ، قدمتني لحد المحطه ، ركبتني و رجعت .... طول الطريق كنت بفكر حـ أمشي أعمل شنو و كيف أكون مع عمر في مكان واحد و أمي كل دقيقه تتصل و تقول لي وصلتي وين ، كنت بفكر كدا لحد ما وصلنا المحطه ، نزلت و ركبت مواصلات تانيه ، طبعاً أنا عارفه موقع المحل بس لمن نزلت حسيت نفسي دايشه و ما عرفت أمشي على وين ، طلعت التلفون و اتذكرت إنو أمي سجلت لي رقم عمر ، كنت حـ اتصل عليهو بس في الدقايق الآخيره غيرت رأيي و اتصلت على مازن ، رد و قال آلو منو معاي ؟! قلت ليهو مازن دي أنا... مها ، قال لي يا زوله وينك الآن ، بس ما تقولي لي غيرتي رأيك ؟! قلت ليهو لا لا ما غيرتو أنا جيت بس راسي داش و هسي ما عارفه أمشي على وين ، قال لي طيب وين انتِ حالياً ...

لمن وصفت ليهو قال لي ما بعيده ، دقائق و أكون عندك ، اقيفي لي في حته بارزه و أعملي حسابك لنفسك و تلفونك ، قلت ليهو طيب ، فعلاً شفت لي مكان مناسب كدا و وقف فيهو و دخلت التلفون جوه الشنطه ، فجأه تلفوني رن ، قلت أكيد دا مازن بس لمن طلعت التلفون لقيتها أمي ، رديت عليها و طمنتها علي و قلت ليها أنا كويسه و وصلت بس منتظره مازن يجيني عشان ما عرفت مكان المحل كدا بالتفصيل ، قالت لي أنا اتصلت و كلمت عمر يتلقاك قايلاهو في محلو بس قال لي في مكان تاني و قال حـ يتصل و يشوفك وصلتي وين ... طبعاً كان في الوقت داك عمر كان خاشي لي ، قلت ليها ياهو اتصل هسي ، قالت لي خلاص لمن تصلي أرجعي لي و كلميني ، قلت ليها طيب ، أول ما قفلت منها عمر اتصل تاني ، كنت حـ أرد بس لمحت مازن جا ماري قريب مني و ما شافني و مشى قدامي ، استعجلت و بقيت ماشه وراهو و مع الزحمه و كواريك الناس ناديتو بس ما سمعني و التلفون كان برن و الرد صعب علي مع الزحمه دي و كنت خايفه على التلفون ، دخلتو جوا الشنطه و عجلت خطواتي و لمن بقيت قريبه من مازن ناديتو ، لمن إتلفت علي وقفت و بقيت اتنفس بصعوبه ، قلت ليهو من قبيل بنادي عليك بس ما سمعتني ، جريت وراك كدا لمن تعبت ، قال لي معلييش بس ما سمعتك مع الزحمه دي ! قلت ليهو زحمه مبالغه ، قال لي خلينا نطلع منها و فعلاً طلعنا منها ، قلت ليهو المكان قريب من هنا ولا بعيد ؟!
قال لي نص نص ، قلت ليهو بتمشي بالرجلين ولا لا ، قال لي بتمشي لكن بعد تعبك دا أحسن أركبك ركشه و فعلاً ركبنا ركشه و مشينا المحل ، طوالي إتصلت على أمي و كلمتها ، كنت حـ اتصل على عمر و اكلمو بس سمعت مازن بتكلم معاهو و كان بقول ليهو ايوه وصلت ... لا لا كويسه بس راسها كان دايش نزلت في المحطه و ما عرفت تمشي على وين لكن اتصلت و كلمتني ....
قلت خلاص بما إنو مازن كلمو ماف داعي اتصل و هو تاني ما اتصل علي ، مازن لف بي في المكان ، كانوا مشغلين معاهم 3 بنات ببايعوا الزباين وداني ركن كدا نهاية المحل نفسو الكان قعدنا فيهو أنا و بيان لمن جينا لـ عمر ، كانوا عاملين تربيزه شكلها ظريف كدا فيها أوراق كتيره و ألوان و أقلام بمختلف الأحجام و الأنواع و مساحات مختوته على جنب معاها كرسي و جنبها جلسه بسيطه كدا ، مازن قال لي الكرسي دا ليك ، أقعدي هنا و فجري طاقتك الإبداعيه ، كل حاجه حـ تحتاجيها موجوده قدامك ، طبعاً لحد اللحظه ديك ما كنت مصدقه ، قعدت على الكرسي و حسيت نفسي زي البحلم ، مازن ضيفني و بعدها قال لي أخدي راحتك أنا حأشوف شغلي و لو إحتجتي حاجه ناديني ، قلت ليهو طيب ، قعدت و بقيت اشخبط سااااي و ما رسمت ولا شي لأنو ما كان لي مزاج ، أنا برسم لمن أكون رايقه ، شويه كدا معزه اتصلت علي ، لمن رديت قالت لي اها مشيتي ولا موسرتي مازن !؟ قلت ليها لا لا مشيت و هسي في المحل ، قالت لي ممتاز شديد و أنا أول ما اخلص محاضراتي حـ أجي ماره عليك ، قلت ليها طيب ، بعدها اتكلمنا شويه و قفلنا من بعض ، بقيت قاعده في الكرسي و سانده فيهو ضهري و بلف بيهو ، طبعاً هو كرسي متحرك ما ثابت ، عملتو لي لعبه ، ألف بيهو زي الشفع ، حسيت نفسي في شركه و قااعده في مكتبي ، ضحكت على نفسي و قلت أنا شهاده ثانويه ما عندي دا مكتب وين دا الحـ أقعد فيهو !... المهم بعد مساااافه كدا معزه جات و مازن جاب لينا الفطور و نادى البنات الشغالين مهام يجوا يفطروا و هو طلع يفطر برا ، بعد خلصنا البنات قعدوا اتعرفوا علينا و اتونسوا شويه و مشوا على شغلهم ، مازن لمن جا راجع لقاني بتونس مع معزه ، شال الأوراق القدامي و ما لقى فيها غير الشخابيط ، قال لي دي معزه العارض دي ما خلتك تشتغلي صاح !... معزه قالت ليهو هييي ما تتهمني ساي أنا من جيت ساعه ما تميتها و هي من قبييل خاته ورقها قدامها !😂 قلت ليهو فعلاً معزه ما ليها علاقه ، والله من قبيل ضغطت نفسي و حاولت ارسم شي بس ما قدرت ، قال لي سحرناك ولا شنو ! معزه قالت لي ما تضغطي نفسك ، استرخي و حسسي نفسك انك قاعده براك ، مازن قال لي ماف مشكله يا زوله ، دا اليوم الأول و سامحناك ، معزه قالت ليهو والله شغلكم الفيهو مسااامحه دي عجبني ، شغلوني معاكم ، قال لي والله إلا تشتغلي لينا مراسيل ، كفى الله الشر اسم موهبه سااااي كدا ما عندك عشان نشجع عليها !... ضحكت و قلت ليهو حرام عليك ! معزه قالت ليهو والله عندي مواهب كتيييره بس ما فاضيه ليها ، المهم انا حأمشي بعد دا ، مازن قال ليها بالمناسبه البت القالت ليك انها بتفتش على زول يصمم ليها فستان زي ما هي عايزا مشت وين ؟! قالت ليهو خلتو ، قال ليها أصلاً أي زول بجي من طرفك بكون ما جادي ، قالت ليهو كتر خيري أنا القاعده أعلن ليكم مجاااان ....

المهم أخدت معانا خشم خشمين كدا بعدها ودعتني و مشت ، مازن ذاتو مشى يشوف شغلو و أنا بقيت شغاله بالتلفون بحضر فيديوهات لتصاميم و بحاول أستلهم منها ، مازن جا و مد لي تلفونو ، قال لي مشغول مع زباين واقفين لي ، إذا ما فيها تعب ممكن تردي على استفسارات المتابعين و تعليقاتهم في حساب المحل !؟ قلت ليهو طيب لكن أرد أقول ليهم شنو و أنا ما عارفه شي عن شغلكم دا ! طلع لي ورقه من جيبو و قال لي كان مفروض أديم ليها من قبيل ، المهم دي كل المعلومات عن المحل تبعنا ، موقعو و أوقات العمل و طريقة البيع و الخدمات البنقدمها و الأسعار ، قلت ليهو طيب تمااام ، أداني تلفونو و مشى فـ بقيت أرد على إستفسارات الناس ، طبعاً كنت كل ما اسمع صوت حركة زول أقول دا عمر جا بس بطلع دا ما هو ، ما عرفتو مشى وين ، المهم مر أسبوع و أنا شبه إتعودت على الشغل ، كنت بس بمشي أقعد و بحاول اعصر مخي و أطلع تصميم حلو و بعدها بسلم التصاميم لـ مازن بشوفهم و إذا حس إنو في حاجه لازم تتعدل بقول لي عليها و بعدها بشيل التصميم و القماش و بوديهم للترزي الجنب المحل ، قال لي لو كنتِ بتعرفي تقصي و تخيطي البتصمميهو كنا حـ نعتمد عليك في الموضوع دا ، قلت ليهو دي ما حاجه سهله و عايزا ليها ورشات و كورسااات مكثفه ، قال لي فعلاً ، قلت ليهو انتوا ليه ما بتشغلوا معاكم زول محترف هنا يصمم و يقص و يخيط ليكم ! يعني هسي بدل ما تجيبوني أنا كان جبتوا ليكم زول ينفعكم ما كان أحسن !😅
ضحكت و قال لي ما تكوني إتحسستي بسبب كلامي ! والله ما قاصد شي ، ما تفهميني غلط ، قلت ليهو لا لا ما اتحسست أصلاً أنا مبتدئه و عارفه نفسي و في ناس أفضل و أحسن مني بمية مره لأنهم دارسين المجال دا ، قال لي والله نحنا عايزنك تستفيدي و تفيدنا معاك و صدقيني ما ندمانين ، أقعدي اتعلمي ساااي و ما تتحسسي من شي ... كنت عايزا اسألو و اقول ليهو عمر وين و ليه ما قاعد يجي ! بس ما قدرت ، طبعاً طول الأسبوع دا ما شفتو ، من جيت اشتغلت معاهم و هو ما جا كان بتصل على أمي و سامعاها بتتكلم معاهو بس لا بتصل علي لا أنا بتصل عليهو ، المهم في نفس اليوم دا كنت بصمم في فستان كدا شكلو غريب ، يعني فجأه كدا لقيت نفسي برسم فيهو ، لمن خلصت حسيتو مختلف عن كل الحاجات الكنت برسمها ، شلت الورقه و مشيت لـ مازن ، كان ببايع زبونه انتظرتو لمن خلص بعدها قلت ليهو مازن سوف ، رأيك شنو في دا ؟! شكلو غريب بس عجبني !
مسك مني الورقه و بقى يعاين فيها ، قال لي ما مجامله مني بس دا أفضل و أجمل حاجه انتِ صممتيها ، بديتي تتحسني و كل يوم بتتفوقي على نفسك ، قلت ليها ايوه ايوه كسر لي تلج ، قال لي ليه بحسك دائماً بتقللي من نفسك !؟ ليه بتحسي إنو الناس بتكسر ليك تلج لمن تمدحك ! ما واثقه في نفسك يعني !؟
قلت ليهو عشان واااثقه في نفسي عشان كدا بقول ليك ما تكسر لي تلج ، ضحك و قال لي انتِ انسانه ما طبيعيه ، المهم شوفي عندي شوية ملاحظات مع إني ما واو في المجال دا بس حـ اقول ، قلت ليهو قول قول عادي أنا ذاتي ما واو ، قال مثلاً هنا ممكن .... و بقى يتكلم لي و أنا مركزه معاهو و الإتنين مركزين في الحاجات البنقولها و ما جايبين خبر لزول ، و لمن يجوا زباين بمشوا ليهم البنات الشغالات معانا ، المهم و نحنا مندمجين فجأه كدا رفعت راسي و لقيت عمر قاعد في الجلسه خالف رجل على رجل و بعاين لينا !... مازن لمن رفعو راسو و شافو قال ليهو بسم الله جيت متين انت و بعدين إختفيت يا مان و قام سلم على عمر بس هو كان بارد شديد معاهو ! طبعاً أنا نهاي ما عاين لي تاني ولا سلم علي ، كلامو كلو كان مع مازن ، طبعاً مازن كان يشيل و يشكرني ليهو و هو ما علق و ما قال شي ، حسيت في شي اتغير ، رغم إنو ماف شي واضح بيني و بين عمر بس في آخر فتره حسيت إنو حتى لو ما كان في شي حيكون في شي بس هسي و بعد تصرفو الغريب دا حسيت إنو كل واحد طريقو بختلف عن التاني ، حسيت إنو أنا جد جد كنت واهمه نفسي ، بالجد اليوم داك ما عرفت عمر مالو بس اتأكدت إنو نحنا الإتنين سكتنا ما واحده و دا بسبب تصرفاتو معاي طول اليوم داك و الأيام البعدها ، بقى يحسسني كأني ما موجوده ، كأنو ما شايفني و لو سألت أو اتكلم هو ما بتكلم و معاي أو يرد على اسئلتي مازن هو الكان بجاوب علي وهو ذاتو حس انو عمر متغير فـ سألو بس عمر قال ليهو ماف شي ، المهم يوم اتأخرت في البيت و لمن وصلت الساعه كانت 9 ، أول ما جيت داخله اتفاجأت بشوفة ماريا مع عمر ، البت دي لمن قربت أنساها تاني ظهرت لي ، ما عارفه مالا بس عيونها كانت وارمه و مليانه دموع و كانوا قاعدين في الزاويه ، طبعاً عملت نفسي ما شايفاهم ، دخلت طوالي و عشان المكتب البقعد فيهو هم قاعدين في الجلسه الجنبو ما مشيت قعدت فيهو ، بقيت لافه و بعاين في الملابس و أنا بالي في حته تانيه ، طبعاً هم ما كانوا شايفني ، شويه كدا مازن قال يا مها ...

أول ما قال كدا أنا و عمر و ماريا إتلفتنا في نفس اللحظه ، لمن مشيت ليهو قال لي نزلت فيديوهات مهمه شديد ممكن تستفيدي منها هاك شوفيهم و حوليهم لـ تلفونك ، قلت ليهو طيب و انتظر عشان أديك تلفونك ، حولت منو الفيديوهات و أديتو تلفونو ، طبعاً ما عاينت لـ عمر و ماريا عشان ما يقولوا شفتهم و ما سلمت عليهم ، أول ما إتحركت كدا جانا صوت ماريا و هي بتناديني ، أخدت نفس و إتلفت عليها و عملت نفسي متفاجأه بشوفتها ! قالت لي ماف داعي للتمثيل ، عارفاك شايفاني من قبيل ، قامت من مكانها و جات حضنتني و سلمت علي و قالت لي معليش ما لقيت فرصه عشان أجيك لمن جيتي راجعه بعد الغيبه دي كلها ، طبعاً ما كنت عارفه اقول ليها شنو !
هزيت ليها راسي بس و هي طوالي رجعت و قعدت مع عمر ، قبل ما اتحرك جوا بنات داخلين و ماريا لمن شافتهم نادتهم و جات سلمت عليهم ، قالت ليهم ليه ما قلتوا لي انكم جاين هنا !!... طبعاً بتتكلم معاهم و هي ماشه بيهم على عمر ، لمن وصلتو قالت ليهو حابه اعرفك على صحباتي و ذكرت ليهو أساميهم و قالت ليهم يا بنات دا عمر ولد عمي و.... وحده استعجلت و قالت ليها و خطيبك !! وااااي حلوين شديد مع بعض والله ! ليه يا غتيته يا خسيسه ما قلتي لينا ! وحده تانيه قالت ليها بالجد زعلت منك يا ماريا ، معقوله تتخطبي من ورانا ! ... طبعاً عمر كان بعاين ليهم عشره عشره ، جنو و جن الحركات دي ، أول ما كان حـ يتكلم ماريا ضحكت و قالت ليهم كل حاجه حصلت بسرعه المهم انتوا تعالوا عايزا أوريكم فستان عجبني شديد و طوالي ساقتهم بسرعه و خلت عمر محتار فيها بعدها رجعت ليهو في نفس اللحظه و قعدت تتكلم معاه ، ما عارفه كانوا بقولوا في شنو بس استغربت في حتة إنو عمر سكت و ما قال شي !! ليه ما قال إنها ما خطيبتو !؟ عجبو الموضوع يعني ولا عايز يخطبها جد جد ؟!

"هُناك دائماً ذلك الشَخص الرمادي بحياتك، لا يكتمل بياضه ولا سواده، عالق بمنتصف كل شيء، شَخص تدرك أنه لن يكُون لك، ومع ذلك تَعجز عن إقتلاعِه منك، أنتَ دوماً في إشتِياق له، تحبه وتقبله ..كما هو🖤🍁

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《40》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​

المهم عدت فتره بتاعة شهرين كدا أو أكتر فيها علاقتي بـ عمر باظت على الآخر و في نفس الوقت حسيت إنو علاقة عمر بـ ماريا ماشه تطور ، غيتو انا ما متأكده إذا عمر بحب ماريا أو لا بس هي كانت كل مره جايه ناطه لينا في المحل ، ما بتجي إلا لمن عمر يكون قاعد .... ما غباء مني بس انا بالجد ما كنت عارفه هو مالو معاي ، ما عارفه أنا غلطت معاهو في شنو عشان يتغير فجأه كدا ، لو كان بسبب المكالمه القلت ليهو فيها روج و فاونديشن...كان حـ يزعل يوم يومين و يرجع تاني بس تعاملو دا انا متأكدة إنو ما بسبب القلتو ليهو في المكالمه ! عمر واحد غتيت و غامض و ما مفهوم عشان كدا ما قدرت اسألو و اقول ليهو في شنو ، حتى مرات لمن يوصلني البيت بنكون ساكتين لحد ما نصل ، كنت محتاره شديد و بسأل نفسي أنا عملت ليهو شنو ! في الآخر وصلت لـ فهم معين و هو إنو عمر بتعامل معاي كدا بسبب ماريا ، يعني أنا قبل كدا غلطت كتييير مع ماريا و أكبر غلطه عملتها في حقها و يلي لحد الآن بلوم نفسي عليها هي لمن باريت سهى و فتحت الباب لـ راجل غريب عشان عمر يشك في ماريا ... عمر عارف بكل عمايلي دي و أكيد ماريا ما قصرت و حكت ليهو و يمكن زادت حاجات من عندها ، لحد الآن ما متأكده إذا دي ماريا أو سهى الرسلت لـ عمر و حكت ليهو و إتهمتني بـ قصة عنود بس الأكيد إنو الإتنين ديل ما عايزين لي الخير ، ماف وحده فيهم حـ تقصر لمن تلقى فرقه فيني ، ماريا أنا عارفه هي بتعمل كدا ليه و ليييه لاصقه في عمر بس هو ليه مديها فرصه !؟ أيوه هو بعد معرفتو لـ حقيقتي اتضايقت مني و لمن اختفيت و لقانا خت كل حاجه على جنب و إتعامل معاي عادي كأنو ما حصل شي و فجأه كدا اتغير ، ما أكذب و أقول إنو تغير عمر و وجود ماريا ما أثروا علي و ما وجعوا قلبي ، كنت بتوجع لمن أشوفهم مع بعض و بزعل شديد بس بكتم جواي و ما بظهر ليهم الحاجه دي ، يوم غشتني معزه في المحل بعد ما خلصت محاضراتها ، و نحنا بنتونس قالت لي عمر مالو معاك ؟! ما قاعده اشوفكم بتتكلموا مع بعض ولا بتعاينوا لبعض ! قلت ليها ولا شي و أصلاً نعاين لبعض ليه ! يا بت نحنا جاين هنا عشان نشتغل و بعدين هو قاعد يجينا في البيت و لو ما بتصل على أمي ... قالت لي ماريا هي السبب صح !؟ من بقت تجي كتير في بيت ناس خالتو سميره و هنا شكيت في الموضوع !
قلت ليها معزه عايني الموضوع كالآتي عشان تاني ما تسأليني :
عمر عارف بكل حاجه أنا عملتها لـ ماريا و عااارف بحكاية الراجل الغريب الأنا فتحت ليهو الباب عشان يدخل و بقصة عنود و متهمني بيها هنا ، انتِ عارفه إنو ماريا و سهى هم الكانوا برسلوا لـ عنود بأرقام مجهوله عشان يخربوا علاقتها بـ عمر و يشككوها فيهو ، المهم في الآخر المصايب دي كلها وقعت في راسي أنا ، ماريا أو سهى أو الإتنين سوا اتفقوا و رسلوا لـ عمر و قالوا أنا الكنت برسل لـ عنود عشان أخرب علاقتهم و شاكلني رغم إنو عارف أنا عملت كدا ليه و أنا هسي ما بلومو لأني عرفت و فهمت إنو العملتو بالجد تافه و حقير شديد و حبي لـ عمر ما مبرر لـ دا كلو ، المهم عمر شاكلني و أهاني بعد ما عرف و حصلت فجوه بيناتنا المهم باقي الموضوع داك ، بعد مشيت مع أمي و عمر لقانا بعد فتره طويله ، أتعامل مع عادي و أداني إحساس إنو اتناسى

أغلاطي و عايز يفتح صفحه جديده بس شكلو ماريا لمن ظهرت تاني اتذكر العملتو معاها و اتذكر إنو زعلان و متضايق مني عشان كدا رجع لـ موقفو .... دقيقه ظهور ماريا كان مفاجئ بالنسبه لي أنا لأني كنت غايبه بس أكيد ما مفاجئ بالنسبه لـ عمر ! أنا و ماريا اختفينا من حياة بعض بس أكيد ماريا ما حتكون مختفيه من حياة عمر خاصة و انها بتحبو و غير كدا هي بت عمو و أكيد متواصله معاهو و بتجي بيتهم !... المهم يا معزه الإتنين ديل لو بحبوا بعض أو حبهم من طرف واحد انا تعبت و قنعت لا عايزا اعمل شي لا عايزا اتكلم في الموضوع دا ، بعد دا أي زول حر في حياتو و أي زول ياكل نارو 💔
معزه سكتت مسافه بعدها قالت لي مبالغه ! ليه ما حكيتي لي قبل كدا !... يعني يمكن عمر... قاطعتها و قلت ليها أنا ما عايزاك تواسيني و ما عايزاك تقولي لي كلام خارم بارم و تدافعي عن عمر ، عليك الله لـ مره وحده قولي الحق و ما تحاولي تلمعي عمر و تبرري ليهو !
بعد مسااافه قالت لي فعلاً عمر دا ما مفهوم !.... شكلو الشي دا عندهم وراثه ، غيتو أولاد خالتو سميره ديل كلهم غتيتين و غياظين !
قلت ليها نعم !! لا لا يختي كلهم كويسين و ما فيهم كلام إلا الإسمو عمر دا ، واحد غيااااظ و بارد و غتيت !.... قالت لي صدقيني ما هو بس ، أولاد عمتك ديل كلهم غياظين !
قلت ليها دقيقه انتِ ليه بتقولي كدا !!؟
قالت لي ما بسبب موقف أو شي معين بس بحسهم غياظين ، قلت ليها ياخ ما تتكلمي ساي ، لا محمد لا فاروق لا سليم بشبهو عمر في تصرفاتو ، ديلك في كفه و دا في كفه تااانيه خالص ، فجأه رفعت صوتها و قالت لي كذابه والله سليم غياظ !... لمن انتبهت على نفسها ختت يدها على خشمها و بقت تتلفت عشان تتأكد إنو ماف زول سمعها ... طبعاً بقيت أعاين ليها و أنا مستغربه ! قلت ليها سليم !! مالو سليم و أصلاً انتِ لقيتيهو وين لمن تقولي عنو غياظ !
قالت لي أنسي أنسي ، قلت ليها بتسلي روحي عشان تعرفي أخباري و أي حاجه داساها عنك و لمن أجي اسألك عن شي يخصك تقولي لي أنسي !؟ المهم ماف مشكله يا زوله على راحتك 😊
سكتت مسااافه بعدها قالت لي لا ما كدا يا مها بس أنا أصلاً ما عارفه اقول ليك شنو أبدا ليك من وين ... إتلفتت حولينها و قالت ان شاء الله مازن ما يسمعني... المهم مش كان قلت ليك إني زمااان كنت حابه واحد و هو حابي وحده غيري ؟!.... ضيقت عيوني و قلت ليها ايوه !.... بتردد قالت لي أنا كنت بتكلم عن سليم !
طبعاً نططت عيوني و قلت ليها شنووو ! سليم ! واااي يا معزه ! قالت لي هوووس وطي صوتك عايزا مازن يسمعنا ولا شنو !
قلت ليها أصلو ما بصدق ! سليييم ! سليم دا أصلاً قعد في بيتهم متين يا بت عشان تحبيهو !
قالت لي ياااخ من زمان قبل ما يزعل من أمو و يمشي يسكن في بيت مرت أبوهو !
قلت ليها وااي ياخ يا حليلك ! بس انتِ ذاااتك البوديك تحبي سليم دا شنو ، كان تحبي فاروق مثلاً ، ظريف و متواجد في بيتهم و الحي لو فتحتي الباب ساي حـ تشوفيهو 😂 ما زي سليم البجي البيت في السنه مره ، قالت لي نفس السؤال دا تسأليهو لـ نفسك ليييه حبيتي عمر و ما حبيتي فاروق أو أي واحد من أخوانو ؟!... قلت ليها هوووس وطي صوتك ! خلاص فهمت شكلي نسيت نفسي ، بس اتخيلي لو كان حبيت واحد تاني من أخوان عمر ، سليم مثلاً !😈
قالت لي و اتخيلي لو كان أنا ما حبيت سليم و حبيت واااحد من أخوانو المتواجدين ديل ، عمر مثلاً !😈
قلت ليها حبييهو ساااي ما فارقه معاي ، أصلاً هي كدا كدا خربانه ، قالت لي أنا ما قادره اتخيل عمر مع غيرك ولا قادره اتخيلك انتِ مع واحد غير عمر ، بحس إنو انتوا الإتنين بأي طريقه لازم تكونوا لبعض !... قلت ليها إجباري هو ! و على فكره انا بعد دا لا عايزا عمر لا غيرو و عليك الله تاني ما تجيبي لي سيرتو ، أنسيناااا منو !
قالت لي رغم إني الكنت قعد أنصحك بس هسي عايزاك تنصحيني ، عايزاك تقولي لي كيف أتجاوز سليم و ما أركز معاهو... كنت مفتكره إني لو جا يوم و رجع فيهو سليم بيتهم مشاعري تجاهو حـ تموت بس صدقيني أول ما شفتو حسيت إنو حب ليهو بدا من أول و جديد ، شوفتو أحيت لي مشاعري المدفونه .... قلت ليها معزه !! أجي شفتيهو وين انتِ سليم دا ؟؟
قالت لي ما عارفه يعني ؟! سليم رجع بيتهم ! قلت ليها بالجددد ! غريبه نحنا قبل أيام كنا معاهم بس ما شفناهو في البيت و ماف زول جاب لينا سيرتو !
قالت لي من جا ليهو أسبوع ، يمكن جا بعد ما انتوا جيتو ، قلت ليها أخيراً عقلو رجع ليهو ! سبحان الله عمتي سميره و أخوانو من زمااان كانوا بحنسوا فيهو عشان يرجع و هو مقوي راسو و هسي لمن سكتوا و خلوهو و ماف زول بقى شغال بيهو جا راجع !
قالت لي عمتك قالت إنو تعامل مرت أبوهو معاهو اتغير ، اتضايقت من قعادو معاهم و بقت تطاعنو بالكلام عشان كدا شال حاجاتو و جا راجع بيتهم ، قلت ليها سليم دا قاعد مع مرت أبوهو دي قريب الـ 7 سنوات ياداااب حتى اتضايقت منو ! و هو ذاتو يستاهل لأنو خلى أمو و مشى لـ مرت أبوهو ، الواحد مهما لف و دار مصيرو يرجع بيتو و ماف زوجة أب بتاخد مكانة

الأم ، ماف أم زي أمك و ماف بيت زي بيتكم ، هسي شوفي أنا لفيت كدااا لحد ما في الآخر رجعت لـ أمي و حالياً ساكنه معاها ، عمتي ما قصرت مني و كذلك أولادها بس الواحد مهما بعد مصيرو يرحع و مهما لف مصيرو يرجع لـ مكانو الأصلي اللازم يكون قاعد فيهو ... المهم إتونسنا شويه كدا بعدها معزه مشت ، بعد شويه كدا وحده من البنات الشغالين معانا كانت بتتناقش مع واحد من الزباين ، هي كانت بتتكلم معاهو بكل إحترام و هو رافع صوتو عليها و بقل في أدبو ، ما عارفه عمر و مازن كانوا وين ، مشيت عليهم و قلت للبت خير في شنو ؟؟ قالت لي دا قبل 3 أيام اشترى مننا تيشيرت و كم حاجه كدا ، المهم هسي جاي عشان يرجع التيشيرت و قدر ما حاولت أفهمو إنو البتباع ما برجع تاني خاصة بعد ما تمر عليهو أيام رافض يفهم و حالف انو يرجع التيشيرت و أرجع ليهو قروشو و المشكله يا مها إنو مرجع لينا التيشيرت مشروط !... طوالي الولد جاااط و قال ليها انتوا البعتوهو لي كدا ، لو كان انتبهت ما كان اشتريتو منكم ، انتوا ناس خداعين و محتالين ، ما بعرف بس رجعوا لي قروشي دي بأي طريقه عشان ما استخدم أسلوب تاني ، قلت ليهو بتهددنا كمان ! قال لي أفهميها زي ما عايزا المهم قروشي ترجع لي ، قلت ليها طييب بس رجع لينا التيشيرت زي ما شلتو عشان تاخد قروشك 😊
طبعاً كل الزباين الكانوا موجودين ركزوا معانا ...
الولد صرخ فيني و قال لي انتِ هبله ولا شنو أقول ليك انتوا البعتوا لي تيشيرت مشروط تقولي لي رجعوا لينا زي ماهو !... رمى التيشيرت في وشي و قال لي اها رجعتوا ليكم زي ما شلتو !.... طبعاً أنا خلااااص أعصابي باظت و حسيت بالإهانه قدام الناس دي كلها ! بالجد الموقف كان بايخ و الولد لسه شغال يكورك ، فجأه كدا جا عمر ، طبعاً مشت وحده من البنات نادتو و جات معاهو ، قال ليهو خير يا شاب مالك مصدع بينا ؟!.... قال ليهو ياخ أنا ما ببغاء عشان أقعد اكرر ليكم الكلام كل مره ... إتلفت عاين لي و رفع لي أصبعو و قال لي رجعت ليك التيشيرت فـ رجعي لي قروشي ، عمر طواالي جا وقف في نصنا و نزل ليهو أصبعو و قال ليهو أحسن تحترم نفسك عشان ما تطلع من هنا و يدك فيها 4 أصابع !.... قال ليهو ما طااالع قبل ما آخد حقي و محلكم الزفت دا تاني لو بقى المحل الوحيد في العالم دا كلو ما حـ أجي ليهو ، عمر قال ليهو اتفضل أطلع برا عشان ما استخدم معاك أسلوب تاني ... البت الكانت بتتناقش مع الولد أول حاجه حكت لـ عمر الحصل من البدايه ، لمن قالت ليهو إنو الولد رمى التيشيرت على وشي إتلفت عاين لي و طوالي أدى الولد كف و قال ليهو حيوان انت ولا شنو ، طبعاً الولد هاااج زياده و اشتبك مع عمر و أنا ما عارفه اعمل شنو و البنات يصرخن ! كنت ماسكه التيشيرت و شغاله لـ عمر خلاص خليهو و يضرب فيهو زياده ، شال مني التيشيرت و قال ليهو انت رميتو على وشها و أنا حـ أضوقك طعمو ، طبعاً الولد كان بنبذ و بقول كلام ماف داعي ليهو ، طوالي عمر حشر ليهو جزو من التيشيرت في خشمو و ضربو كف و جراهو و طلعو برا المحل و الناس تتفرج و جزو يضحك !... طبعاً أنا كنت خايفه إنو الولد يكون معاهو آله حاده و يقوم يغدر بيها عمر ، طبعاً لحقناهم و طلعنا برا و أنا كنت أول وحده ، قلت ليهو عمرر كفايه خليهو ! طبعاً ولا كأني بتكلم معاهو و الزاعجو إنو الولد لسه بقل في أدبو ، فجأه جا مازن و حجزهم و بقى يقول لـ عمر خلااااص خلاص يا عمر خليهو و طوالي فك الولد من عمر و ساق عمر دخلو جوه و نحنا وراهو ، مازن قال ليهو هدي نفسك و ما كان تتصرف بالطريقه دي !
قال ليهو بنبرة زهج عايزني اتصرف معاهو كيف يعني الحيوان دا ، عشان لاقيها بت براها عايز يقل أدبو عليها ، عاين لي و قال لي بنهره و انتِ لييه ما ناديتيني ! هسي لو كان اتمادى اكتر أو ضربك ! قايله نفسك حـ تقدري عليهو مثلاً و بعدين دا ما شغلك ، ما عندك أي شغله بالوباين و البيع و الشراء ، خليك بس قاعده في مكانك .... طبعاً كنت بعاين ليهو بس ! ديك كانت أول مره يعاين لي و يتكلم معاي مسافه طويله من يوم اتغير علي !
طبعاً ما قلت ليهو حاجه و بعدها كل واحد مشى على شغلو و أنا رجعت قعدت مكاني ، اتنهدت و شلت قلم و بديت ارسم على الورقه القدامي ، كنت مركزه شديد و لمن رفعت راسي لقيت عمر قاعد في الكرسي المقاصدني ، إنخلعت طبعاً لأني ما حسيت بيهو لمن جا و قعد !
عاين للورقه و قال لي دا شغلك ، تاني ما تدخلي في المواضيع التانيه ، نحنا موجودين ، هزيت ليهو راسي بس و واصلت رسم رغم إني كنت متوتره شديد و حاسه بنظراتو علي ، بعد مسافه قال لي ناس البيت كيف ؟؟
من دون ما أرفع راسي قلت ليهو كويسين ، هز لي راسو و قبل ما يقوم قال لي ما كنت عايز أرفع صوتي عليك قدام الناس بس كنت منفعل ... طبعاً بقيت أعاين ليهو بس ، أول ما إتحرك قلت ليهو عمر !

إتلفت و قال لي ايوه !
كنت عايزا أقول ليهو أنا لو غلطت صارحني بغلطي ما تعمل رايح ، كنت عايزا اقول ليهو ليه اتغيرت علي و ليه شغال معاي صامت بس اتراجعت في الدقايق الآخيره و قلت في نفسي ليييه اسألو ، ليييه اظهر ليهو ضعفي ، ليييه احسسو إنو تجاهلو لي و عدم كلامو معاي مؤثرين علي !؟
قال لي نعمم !
قلت ليهو خلاص ماف شي ، قال لي لا في شي !.... في حاجه مفروض أعرفها ؟! ... قلت ليهو لا فـ طوالي مشى ، قعدت و انا مستغربه فيهو ، مره يكون كويس و فجأه يتغير بس موقفو القبل شويه دا حسسني بالإطمئنان ، جاني شعور ما عادي ، اتطمنت عشان عرفت إنو عمر ما برضى فيني ، حتى لو زعلان مني و مخاصمني ما برضى زول يقل أدبو علي ، للحظات إبتسمت بس لمن اتذكرت ماريا و لصقتها فيهو و برودو معاي قلت هو اتصرف كدا مع الولد عشان أنا بت خالو و يمكن كان حـ يتصرف كدا مع أي بت تانيه !
المهم بعدها مرت الأيام و الوضع بيني و بين عمر زي ما هو ، طبعاً كنت متواصله مع معزه و بندردش مع بعض في الواتس و هي تحكي لي عن سليم ، يوم قلت ليها انتِ حـ تقعدي تحبي فيهو كدا لـ متين و هو ما عارف ! قالت لي ما عارفه بس أكيد ما حـ أمشي اقول ليهو سليم أنا بحبك ... قلت ليها غيتو يا معزه من دخلتي الجامعه بقيتي جريئه شويه و مصطلحاتك قويه 😂
قالت لي خلاص أكيد ما حـ أمشي و أقول ليهو سليم أنا بريدك !.. طبعاً ضحكت عليها ضحك ، رسلت لي ريكورد و قالت لي والله يا مها انتِ ما عارفه أنا قلبي واجعني قدر شنو ، الحب البكون من طرف دا صعب و موجع شديد ، على الأقل انتِ عمر عارف انكِ بتحبيهو ، بس انا سليم يمكن ذاتو ما عارف إنو أنا مولوده و عايشه في الحياة دي !
قلت ليها يعني أنتِ شايفه إنو معرفة عمر بـ مشاعري حاجه كويسه و بتخفف وجع القلب !... قالت لي ايوه على الأقل طلعتي الجواك و ما عندك حاجه تدسيها تاني ، أما سليم دا لو قعدت أحب فيهو عمري كلو ما حيعرف و ما حـ يحس بي ، خايفه إنو يجي يوم يعرس فيهو سليم و يكون عندو أولاد و أنا لسه أحب فيهو !
قلت ليها عليك الله أمشي قولي ليهو و ريحي نفسك ، قالت لي يا بت انتِ مجنونه ! والله لو أقعد عمري كلو أعاين ليهو من بعيد ما أمشي أقول ليهو كدا !
المهم في يوم عمتي جاتنا في البيت و جوا معاها فاروق و سليم ، طبعاً هو قبل كدا جانا في البيت و سلم علينا ، المهم طوالي رسلت لـ معزه و قلت ليها سليم معانا في البيت ، قالت لي قووولي والله !! قلت ليها والله العظيم ، جا مع عمتي و فاروق ، قالت لي قلبي شغال زي الدلوكه التقول شايفاهو قاعد قدامي !... قلت ليها حالتك بقت صعبه ، البشوفك زمان ما يقول إنو الهسي دي إنتِ 😂
قالت لي ماف أي فراق ، زمان كنت صغيره بس عارفه إنو دا حب بس ما ينفع أتكلم و كنت خايفه و دا شي طبيعي و أصلاً اتكلم أقول شنو و لـ منو ، أما هسي الوضع إختلف و أنا ما صغيره و عارفه مفروض أكون واضحه قدام منو و غامضه قدام منو !... قلت ليها معزه أنا بهظر معاك ! قالت لي خلاص معليش ! طبعاً استغربت فيها بقت قاعده على الهبشه !
قبل ما أقفل الشبكه قالت لي مها أنا بالجد آسفه والله ، كلامك ما فيهو شي بس براي منفعله و زهجانه ، انتِ ما قصدك شي بس براي فسرت كلامك بطريقتي و حسيت إنك بتقولي لي : زمان كنتِ مؤدبه و هسي لا ، قلت ليها أبداً والله ، معزه انتِ صحبتي الوحيده و أنا مستحيل اجرحك و اقول ليك كلام زي دا ، كنتِ مؤدبه و هسي مؤدبه و حتفصلي مؤدبه و أنا عارفه أخلاقك و مستحيل أشكك فيك ، قالت لي حبيبيتي والله ، بالجد خجلانه منك يا مها فـ عليك الله أعفي لي و لو زعلتي ما تمشيني ساي ، قلت ليها والله العظيم ما زعلت !
المهم اتكلمنا شويه و بعدها طلعت من الدردشه ، انتبهت إنو عمر رافع إستوري ، لمن فتحتها لقيتو خاتي صورتو و هو لابس جلابيه و نظاره و كاتب : الواحد خجلان يقول إنو داخل على الـ 32 و لسه أعزب 🙆 أرح يخوانا رشحوا لي عايز أعرس من طرف "
طبعاً حسيت بوخزه في قلبي ، من غبائي رديت عليهو و قلت ليهو عندي ليك عروس منااااسبه ، طبعاً لمن استوعبت الكتبتو طوالي حذفت الرساله و قلبي كان شغال دق دق ، كنت حـ اقفل الشبكه بس فجأه جات رساله منو ، شفتها من فوق كانت إستفهامات ، قفلت الشبكه و مشيت قعدت مع ناس أمي ، المهم ناس عمتي ما طولوا معانا جوا يسلموا علي و يمشوا ، طبعاً رغم إنو أنا و عمتي بنجي نزور بعض عادي بس علاقتنا اتغيرت و أنا رغم إني اعتذرت منها على الكلام القلتو ليها قبل كدا بس في حاجات لمن تنكسر ما بتتصلح و الإعتذار ما كفايه ، الكلمه زي السهم لو طلعت ما بترجع تاني ، أحياناً كتيره الكلام البنقال في لحظات زعل و غضب بهدم علاقات ليها سنين 💔

المهم بعد ما مشوا ، بليل مسكت تلفوني و فتحت الشبكه ، طبعاً لقيت عمر مرسل لي تاني ، أول رساله كانت استفهامات على الكتبتو فـ عرفتو مستخدم الواتس الخسيس و تاني رساله كاتب لي : آي عليك الله اختاري لي أي عروس و ألحقي بيها ولد عمتك دا ... طبعاً دائماً كلامو بوجعني ، قلت ليهو طوااالي حـ أفتش ليك ... كان داخل فـ رد علي و قال لي مش قلتي عندك عروس جاهزه ؟
قلت ليهو فعلاً بس حسيتها ما حـ تناسبك ، قال لي خليني أشوفها و أجرب حظي معاها ما عايز أضيع وقت ، قلت ليهو خلاص بعد أكلمها ، قال لي إستعجلي لي في الموضوع دا ، قلت ليهو ما عندك أي مشكله ، بساعدك و بقيف معاك و بعدين انت ذاااتك ساعدني و ألقى لي عريس و كدا نكون إتعادلنا 🙊
قال لي ابشررري .... في نفسي قلت ليهو تبشر في التجاني الماحي ان شاء الله ، ياخ واحد غياظ و براي هارده فشفاشي معاهو ، عنو خليهو يعرس عشان أرتاح منو ، قفلت الشبكه و أول ما ختيت راسي على المخده دموعي جات نازله ، بقيت أمسح فيها و هي تنزل ، قلبي كان واجعني شديد و كنت حاسه إني بلف في حلقه ، في متاهه ، في نقطه بمشي و برجع ليها مره تانيه ، عمر دا أنا ما قادره انزعو من جواي ، ما قادره أقتلع جذور حبو المتكوم جواي ، مسحت دموعي و تاني فتحت الشبكه و رسلت ليهو ، قلت حـ اقول العندي و يحصل الحيحصل ، عارفه إنو ما من حقي أقول كدا و ما من حقي أخطي الخطوه دي ، فكرت أكتر من مره قبل ما أكتب حرف واحد بس في الآخر اتهورت و كتبت ليهو :
_سليم كيفك
_ عايزا اقول ليك حاجه مهمه بس ما عايزاك تكلم زول
_ عارفه انك حـ تتفاجأ و تنخلع من الحـ اقولو و حـ تستغرب فيني بس خلاص قررت اتكلم و يحصل الحيحصل
_ معزه يا سليم بتحبك من زماااان من قبل ما أنا اجي و أقعد معاكم في البيت ، صدقني هي لحد اللحظه دي بتحبك و انت ما جايب خبر ، عارفه إنو يمكن الموضوع يفاجأه بس كمان يمكن ما يفرق معاك و عارفه إنو ممكن تضحك علي و تقول حركات مراهقين أو هباله مني ، بس دا الحسيت إني لازم أقول

طبعاً رسلت ليهو الكلام دا و أنا يدي بترجف ، ما عارفه ردة فعلو حتكون شنو و كمان ردة فعل معزه لمن تعرف ، ما عارفه إذا الكلام القلتو لـ سليم دا حـ يغير حاجه أو لا بس انا متمنيه إنو سليم يحس بمعزه و يحبها و يعرسها ، على الأقل تكون وحده فيني حصلت على حاجه حبتها من سنوات ❤️
تاني يوم و أنا طالعه ماشه الدكان لاقيت شادي ولد جيرانا ، سلم علي و قال لي ماشه وين ؟؟ قلت ليهو الدكان ، قال لي أنا ذاتي ماشي ، عايزا شنو ؟؟ قلت ليهو زيت و بصل ، قال لي تمام أرجعي البيت و أنا بجيبهم ليكم ، لمن مديت ليهو القروش قال لي أكيد ما جاده ، يا بت خشي بيتكم قال كدا و مشى طوالي و لمن جا راجع و دق الباب فتحت ليهو أنا ، طبعاً كان جايب حاجات تانيه مع الزيت و البصل ، لمن مداهم لي قلت ليهو يا زول أدينا بصلنا و زيتنا بس ، قال لي بطلي عوايره ! يعني أمشي ارجعهم لـ سيد الدكان ولا أجدعهم في الشارع ، قلت ليهو شيلهم بيتكم ! مش قلت مرسل ، قال لي المهم يا زوله دي حاجاتكم و مسكني ليهم بالغصب ، المهم بعد أسبوع من الكلام دا يوم لمن جيت من الشغل لقيت أمي فرحااانه و بتتبسم ساي ، قلت ليها أحمد و أمجد جاين ولا شنو ؟! قالت لي أي جاين لكن سبب فرحي حاجه تانيه ، قلت ليها شنو ؟؟! قالت لي بعد ترتاحي ، المهم بعد مسافه طويله لمن جيت و قعدت معاها ، قالت لي قبيل جاتني محاسن أم شادي و قالت شادي قال عايزك .... طبعاً إنخلعت !نططت ليها عيوني و قلت ليها شنووو !! قالت لي الولد ما فيهو كلام والله لكن برضو حـ نسأل عنو ، حـ اتصل أكلم ابوك و عمر ، لأنو عمر بعرف الولد دا ، قلت ليها طيب و أنا يا أمي رأيي ما مهم ، قالت لي أكيد مهم ! انتِ شايفه فيهو عيب الولد دا ؟! قلت ليها يا أمي العيب دا بكون مكتوب على قميصو ولا على جبينو !... عاينت لي جوه عيوني و قالت لي عندك زول ولا شنو ؟؟
اتوترت و قلت ليها لا زول شنو يا أمي !... وقفت على حيلي و قلت ليها أعملي العايزاهو و طوالي مشيت دخلت غرفتي ... طبعاً أنا ما عايزا شادي و حـ أرفضو بس ما عارفه حسيت إني لازم أخلي أمي تكلم عمر ، عايزاهو يعرف إنو في زول جا و اتقدم لي ، المهم لمن طلعت مره تانيه أمي قالت لي اتصلت على أبوك و كلمتو قال بعد يجي و يسأل عنو و برضو كلمت عمر و برضو قال لي بعد نسأل عنو ... طبعاً أنا لمت نفسي و قلت دي شنو دي الهباله دي ، أنا متوقعه شنو من عمر ، قلت ليها أمي و كنت حـ أقول ليها إنو أنا ما عايزا شادي بس فجاه سمعت صوت تلفوني ، قلت معناها دي معزه ! خفت إنو سليم يكون واجها و قال ليها إني الكلمتو ، طبعاً خلال الأسبوع دا هي كل ما ترسل لي أو تتصل علي بقول خلاص معناها سليم كلمها ، المهم لمن مشيت و دخلت جوه لقيت عمر هو المتصل ، استغربت طبعاً ، أول ما فتحت الخط و قبل ما أقول أي حاجه ، قال لي العريس الجاك دا أرفضيهو الليله قبل بكرا ، قلت ليهو نعممم !

قال لي كلامي واضح !
قلت ليهو لا ما واضح ! كيف يعني أرفضو و أصلاً أرفضو ليه ؟ قال لي ما مناسب ، قلت ليهو خلي أبوي بعد ما يسأل عنو ، و قال لي و لو أبوك قال ليك إنو ما مناسب ؟😊
قلت ليهو صراحة صراالحة أنا شايفاهو مناسب و موافقه عليهو و أبوي حتى لو بحث و سألو عنو في النهايه القرار قراري أنا ، قال لي انتِ عرفتيهو متين عشان توافقي عليهو طوالي ،قلت ليهو عمر يا أناااني عايز تعرس و تدخل المؤسسه براك و ما عايزني أعرس 😹 رايك شنو نعمل عرسنا مع بعض ... قال لي دا شنو الكلام البتقولي فيهو دا !! عايني أنا ما بهاظر معاك ، هسي دي تمشي لأمي و تقولي ليها انك ما عايزا شادي و تتصل على أبوك و كمان تكلميهو حتى قبل ما يسأل عنو ! قلت ليهو عمر انت عندك لي عريس ولا شنو !؟
قال لي ياخ دا شنو جن العرس القام عليك فجأه كدا ! مالك شابكاني عرس عرس !
قلت ليهو كل الناس دي بتعرس ، قال لي و انتِ مالك و مالهم ، قلت ليهو و أنا جن ما برضو من الناس ديل !
قال لي مها أنا ما عايز كلام كتير ، اتصلي على ابوك و كلميهو ، قلت ليهو بري ما بقدر ، قال لي كدا مش ؟؟ تمام أنا بتصرف و طوالي قفل الخط ...

" ظَنَنْتُ ..
أَنَّ قَلْبَكَ سَـ يُخْبِرُكَ يَومــــاً
بـِ انتظاري ...!
بـِ بَعْض الشَّوْقُ الَّذِى يجرفني إلَيْك
وَ بَعْض الْأَنِينِ الَّذِى يَنَالُ مِنًي كُلَّ لَيْلَةٍ ..

- ظَنَنْتُ ..
أَن غيابكَ لَن يَطُول
أَنَّ بَعْضَ مِنْك يُرْحَلُ إِلَيَّ ..

- ظَنَنْتُ ..
أَنَّ قَلْبَك سَـ يُخْبِرُك إلَى أيَّ قُيُودٍ
أوصلتني .. إلَى ذلك الصَّمْت القاتل

- ظَنَنْتُ ..
وَ لَكِنْ أَدْرَكْت الآنَ .. أَنَّ بَعْضَ الظّن إثْم ! "

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《41》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​

طبعاً بقيت قاعده و بفكر ، كنت متوقعه أمي تجي داخله في أي لحظه و تقول لي عمر قال إنو شادي ما مناسب ليك و لازم نرفضوا بس أمي ما جات ، فتحت الشبكه و دخلت الواتس ، طبعاً كل مره بدخل عشان أشوف سليم رد علي ولا لا ، طبعاً من يوم رسلت ليهو و قلت ليهو الكلام داك قرا رسايلي بس ما رد علي ، طبعاً حسيت نفسي إتسرعت شديد و اتدخلت في حاجه ما بتخصني !
فجأه كدا معزه إتصلت علي ، بلعت ريقي و فتحت الخط ، أول ما قلت ليها آلو قالت لي واي يا مها ما حـ تصدقي !... قلت ليها في شنو ؟!
قالت لي سليييم !... قلت ليها بخلعه مالو !؟ قال ليك حاجه ؟؟ قالت لي لا لا لسه ما قال لي حاجه بس بقيت أحس إنو يمكن بقى مركز معاي !... زمان لو جيت بيتهم غير يسلم علي ما بقول شي و بمشي طوالي بس هسي بقى يقيف يسلم علي و يسألني عن ناس البيت و كدا ! امبارح طلعت الشارع عشان أقول لـ مازن أمي قالت ليك أمشي الدكان بس ما لقيتو فـ قررت أمشي أنا مع إنو أمي ما بتخليني ، أول ما إتحركت هو جا طالع من بيتهم ، سلم علي و قال لي ماشه وين ، قلت ليهو ماشه الدكان فـ طوالي رجعني و مشى هو !... يعني بقيت أحس إنو ياداب بقى منتبه لي ، زي الكأنو كان مغمض عيونو و فجأه فتحهم و بقى شايفني !
طبعاً كانت بتتكلم معاي و هي فرحانه شديد ! قلت ليها يمكن حس إنو كان جاري ورا حصحاصه و في بيت جيرانهم في ماسه هو ما كان منتبه ليها!... ضحكت و قالت لي كسري لي تلج كويس !... المهم أخبارك شنو !؟
طبعاً في البدايه إترددت ، في الفتره الآخيره بقيت ما بحب أحكي تفاصيلي و أشارك الناس بأي حاجه بتحصل معاي ، يعني حتى لمن أرجع البيت من الشغل و أمي تسألني عن يومي ما بقول ليها شي غير تمام حتى لو كانت حاصله معاي حاجه ، مثلاً زي الولد العمل لينا مشكله في المحل داك ، بعد مسافه قلت ليها ولد جيرانا إتقدم لي ، قالت لي بخلعه شنووو شنووو ! كيف و متين و وافقتي ؟؟
قلت ليها كلمتني أمي قبيل و أتصلت كلمت أبوي و عمر و قالوا حـ يسألوا عنو ، بس انا أكيد حـ أرفض ، قالت لي ردة فعل عمر كانت شنو ! معقوله قال ح يسأل عنو و ما قال حاجه تانيه ! قلت ليها إتصل و قال لي أرفضيهو ، قالت لي حيييا أنا الغتيت اتغاااظ و ما قدر يتحمل ، قلت ليها دي ما حاجه مهمه ، على فكره عمر بعرف الولد الإتقدم لي دا و يمكن قال كدا عشان شايف فيهو عيب ، قالت لي الكلام دا عايزا تقنعيني بيهو أنا ولا عايزا تقنعي بيهو نفسك ؟؟
قلت ليها لا دا لا دا ! دي الحقيقه !

_ مها انتِ ليه ما عايزا تقولي إنو عمر عمل كدا لأنو بحبك !... ايوه انا معاك إنو عمر غامض و ما واضح بس كل تصرفاتو تقول إنو بحبك !

= أنا ما عايزا تصرفاتو تقول لي كدا ، عايزاهو هو يلي يقول كدا دا في حال إنو ما شايفني أختو و للصراااحه و الأمانه أنا بقيت ما منتظره منو حاجه ، كفايه لحد هنا ، عمر واحد ما جادي و أنا غبيه و هبله عشان ما قادره اتخطاهو بس الأكيد إني حتى لو ما قدرت اتخطاهو ما حـ أقعد أعشم نفسي فيهو و على فكره هو بفتش ليهو على عروس و شكلو بلمح لـ ماريا

_ يا مها يمكن أنا ما بعرف عمر شديييد كدا بس بحكم إنو ولد جيرانا من زمااان و صاحب مازن أخوي من أكتر الحاجات الأنا بعرفها عنو و الظاهره عليهو إنو عمر ما من النوع البجي يقول ليك أنا بحبك و شنو ما بعرف من الكلام دا ، عادي عمر دا يعيش عمرو كلو من دون ما ينطق كلمة بحبك ، فـ لو عشمك فيهو واقف على الكلمه دي فـ صدقيني يمكن تعيشي كتير بس ما تسمعيها ، و بالنسبه لـ ماريا لو عمر بحبها ما بحتاج يلمح ليها ، لو عايزاها طوااالي حـ يمشي يتقدم ليها ، غيتو موضوعك انتِ و عمر معقد بس أنا متأكده إنو انتِ بالنسبه لـ عمر أكتر من أخت ، صدقيني هو ما عندو شغله غيرك ، و على فكره هو الكلم مازن و خلاهو يقترح عليك تشتغلي معاهم في المحل ، أظنو حس انو لو هو جا و طلب منك تشتغلي معاهم في المحل حـ ترفضي عشان كدا كلم مازن ، لو عمر بعمل دا كلو عشان شايفك أختو طيب ليييه لا محمد لا سليم لا فاروق ما فكروا كدا ؟! ليييه إهتمام أخوان عمر بيك ما زي إهتمام عمر بيك !؟ لييه لمن انتِ إختفيتي كلهم فقدوا الأمل إلا عمر ، فتشك و أصر يلقاك لحد ما لقاك !... انتِ عارفه حب عمر ليك واضح شديد بس ما عارفه هو مالو ! يعني لو ما قادر يقول ليك مفروض يمشي و يطلب يدك من أبوك... غيتو أنا ما فاهمه المسكتو شنو بس صدقيني عمر بحبك !
طبعاً كلام معزه عشعش في مخي بس كنت عند موقفي ، ما عايزا أعشم و ما عايزا اتوقع منو أي حاجه !
تاني يوم كنت مصدعه فـ أمي ما خلتني أمشي الشغل ، طبعاً أحمد و أمجد أبوهم جابهم لينا من الصباح ، طبعاً من جوا البيت بقى فيهو جوطه و كواريك رغم إنو رهف و ريل ما مقصرين ، عاد رهف دي لمن تتلمى مع أمجد فوضى شديده ، من جا قعد يتشاكل معاها و أمي شغاله ليهم أقعدوا ساااي يا أولاد عشان ما أشيل ليكم السوط ، بعد الفطور قعدت أقري أخواني ، مسكتهم واحد واحد و بديت بـ أحمد ، بعد صلاة العشاء أمي نادتني في الهول ، لمن مشيت و قعدت معاها قالت لي بالنسبه لـ ولد محاسن أبوك رافضو بس قال يشوف رأيك شنو !... قلت ليها قولي ليهو إني كمان رافضاهو ، قالت لي هسي الولد دا عيبو شنو !؟ قلت ليها يا أمي إلا يكون فيهو عيب يعني !؟ أنا ما عايزاهو و ما عايزا أي زول غيرو ، خلوني كدا بس ! قالت لي البنات ضيفات في بيوت أهلهن و إلا ما يجي يوم يعرسن و يفوتن من بيت أهلنا ، قلت ليها معناها انتِ مستعجله و عايزاني أفوت بسرعه ، قالت لي انتِ هبله ! والله انا ما عايزا شي غير أشوفك مرتاحه و مع ولد ناس كويس و محترم ، لو كنتِ بتقري و عندك رغبه تكملي دراستك كنا حـ نأجل موضوع الزواج دا شويه ، بس بما انك خليتيها فـ فكري في العرس ، قلت ليها يعني يا عرس يا قرايه ! الواحد ما ممكن يشتغل أو يقعد ساي ! قالت لي انتِ عايزا تقعدي ساي لـ متين ؟؟ حددي لي زمن حـ ينتهي فيهو قعادك الساي دا عشان افتح ليك موضوع العرس دا ! قلت ليها أمي خلاص عليك الله....!
تاني يوم لمن مشيت الشغل إتلاقيت مع عمر جنب الباب ، قال لي أمبارح مسجله غياب ! قلت ليهو اتصلت و كلمت مازن ! كنت مصدعه و أمي ما خلتني أجي ، قال لي ايوه عارف أمك كلمتني ، هزيت ليهو راسي بعدها دخلت جوه و سلمت على البنات ، أول ما قعدت في مكاني هو جا و قعد في الكرسي المقاصدني ، قال لي ان شاء الله الصداع ما يكون بسبب إنو العريس طار منك !... قلت ليهو اسكت ساي صداع شديد ! قال لي دي حاجه طالعه موضه ولا شنو شايف العرس شاغل تفكيرك لدرجة انك عايزا تعرسي من طرف و خلاص ! قلت ليهو المشكله وين ما انت ذاتك عايز تعرس من طرف و خلاص ، قال لي أنا خلاص عجزت و الكبر دخل عشان كدا عايز أعرس من طرف بس انتِ مالك يا رابحه !
قلت ليهو يا زول الرجال بعرسوا في كل أعمارهم ما زينا نحنا عديل عشان كدا عايزا ألحق نفسي ، قال لي و لمن تلحقيها تلحقيها بـ غريب !؟
قلت ليهو غريب قريب ما مهم الأهم أخلاااقو ، قال لي انتِ عرفتيهو متين عشان تعرفي أخلاقو ، قلت ليهو ظاااهر عليهو ، شكلو واحد محترم و أخلاقو عاليه ، قبل كدا لمن كنت ماشه الدكان رجعني و مشى هو اشترى لينا حاجاتنا ! قال لي يا سلاااام عليك ! عايزا تعرسيهو عشان بس مشى ليك الدكان ! لا دي ماف زول سبقك عليها !😊
قلت ليهو بالمناسبه انت قلت شنو لـ أبوي و خليتو يرفض ولد الناس قبل ما يسأل عنو حتى !... قال لي قلت ليهو إنو شادي ما مناسب ، قلت ليهو بالله !... و أبوي طوالي صدقك ! قال لي لا قلت ليهو حاجه تانيه ... عاينت ليهو بإستغراب شنو ؟؟
فجأه جانا صوت بقول عمر ... لمن إتلفتنا لقيناها ماريا ، طبعاً أنا من شفتها حسيت الدنيا ضلمت في وشي ، طبعاً نادت عمر بصوت مليان زعل و عيونها كانت حمراااء و ظاهر إنها كانت بتبكي ، عمر قال ليها خير في شنو ؟؟

عاينت لي و رجعت عاينت ليهو و قالت ليهو ممكن نتكلم برانا !... طوالي قمت من مكاني و قلت ليها تعااالي أقعدي و أخدي راحتك ... طبعاً هي عامله كدا عشان تغيظني و أنا نهاااي ما أظهرت ليها حاجه ، كنت عاديه و مبتسمه ، وقفت على حيلي و طلعت برا المحل و بقيت واقفه جنبو و أنا حاسه حلقي مقفول من شدة الزعل ، ما قادره أعرف طبيعة العلاقه بيناتهم ولا قادره أعرف طبيعة العلاقه بيني و بين عمر !... و أنا سرحانه بعيييد و بفكر فجأه حسيت بأصابع بتطقطق قدام عيوني ! لمن إنتبهت و عاينت قدام اتفاجأت لمن شفتو !... قال لي السلام عليكم كيفك ؟ قلت ليهو بإستغراب كويسه الحمدلله! قال لي سرحانه وين ، حاصل معاك شي ؟ قلت ليهو لا لا ساي بس ، قال لي ما تستغربي ، أنا عارف انك شغاله هنا ، قبل كدا أمك قالت كدا لأمي ، المهم قال لي طيب ممكن نتكلم !
قلت ليهو والله يا شادي.... قاطعني و قال لي ما حـ آخد من وقتك كتير ، قلت ليهو طيب اتفضل ، قال لي أكيد ما و نحنا واقفين ، تعالي في مطعم قريب من هنا ، طبعاً إترددت ، قال لي ما حـ نتأخر ، قلت ليهو لا لا خلينا نتكلم جوه طيب !... قال لي خايفه مني ولا خايفه زول يشوفك معاي !... قلت ليهو لا لا ما كدا بس... فجأه ماريا جات طالعه ، عاينت لينا بإستغراب كدا و جات سلمت على شادي و قالت لي ما عرفتينا !... طبعاً ما إشتغلت بيها ، قالت ليهو أنا ماريا ، عمي راجل عمة مها ، قال ليها ايوااا و أنا شادي اتشرفنا ... طبعاً هي كانت عايزاهو يقول ليها هو منو عشان تتشمر ، قلت ليهو خلينا ندخل جوه ، قالت ليهو انت صاحبها !؟... في اللحظه ديك أتمنيت أديها كف و اكسر ليها سنونها ديل ، طبعاً شادي ذاتو استغرب فيها ، عاين لي و قال ليها لا أنا ولد جيرانهم ، قالت ليهو ايوااا ، فجأه كدا عمر جا طالع و لقانا التلاته واقفين ، جا سلم على شادي سلام عادي كدا و قال خير يا جماعه !؟
شادي قال ليهو خير خير بس جيت و عايز اتكلم مع مها في موضوع كدا ، عمر عاين لي و قال ليهو موضوع شنو ؟😊
قال ليهو لا لا ما تفهم غلط يا عمر ، عارفها بت خالك و الموضوع الجيت عشانو كلو خير والله ... طبعاً عمر عامل نفسو رايح و ما عارف شادي بتكلم عن شنو !... ماريا ضحكت و قالت لـ شادي عايز تعرسها ولا شنو !؟
طبعاً في اللحظه ديك أنا و عمر عاينا ليها !... شادي ما عرف يقول ليها شنو ، قال لـ عمر بعد إذنك ممكن تسمح لي اتكلم معاها شويه !؟
طواالي عمر قال ليهو أنا حيطه ولا مزهريه ! قول العندك قدامي يا شادي عشان ما افهمك غلط ، قال ليهو انت بتعرفني من زمااان يا عمر معقوله تفهمني غلط !
قال ليهو لو انت مكاني كنت حـ تعمل شنو ؟؟ ماريا قالت ليهو عمر معاهو حق ، مها زي أختو و ماااف أخ بقبل بحاجه زي دي ، كيف يعني قدامو تقول عايز تتكلم مع أختو براكم !... طبعاً لمن قالت كدا أنا كرهتها شديد و كلمة أختو دي وجعتني جوه قلبي ، شادي قال ليهم تمام يا زول حـ أحكي ليك ، قبل كم يوم كدا أنا اتقدمت ليها ، و أمها قالت إنو أبوها رفض ، فـ عايز اتكلم معاها و اعرف هي رأيها شنو و أبوها متين لحق يسأل عني عشان يرفضني من دون ما يشوفني حتى !
عمر قال ليهو ماف قول بعد قول أبوها ، شادي قال ليهو فهمت بس هو على أي أساس رفضني ! عايز أفهم أنا !... ماريا تاااني اتدخلت و قالت ليهو من حقك تعرف طبعاً و أنا رغم إني ما بعرفك بس حسيتك محترم و زول جادي ، عاينت لي و قالت لي وافقي عليهو ساااي و أنا متأكده لو انتِ أصريتي على أبوك في الآخر حـ يوافقك و.... قبل ما تتم كلامها عمر قال ليها بنبره غليظه انتِ خليك ساكته ! ... طبعاً حسيت جبهتها دي طارت هناك و ملامح وشها اتغيرت ، بالجد لو الظرف و الزمان و المكان كان ضحكت ! البت التقول دفعو فيها موية وساخه !
قلت لـ شادي والله انت ما فيك عيب بس... قال لي بس شنو عايز أعرف ! ايوه عارف إنو نحنا ما بنعرف بعض شديد فـ ممكن نعمل خطوبه و ناخد فتره نتعرف فيها على بعض ! طبعاً عمر طوالي قرن حواجبو و ضيق عيونو و عاين لي كأنو أنا الإقترحت على شادي الفكره دي !
قلت ليهو يا شادي.... عمر قاطعني و قال ليهو اسمع ما عندنا بت نديها ليك ، قالت ما عايزاك معناها ما عايزاك ! شادي قال ليهو معليش يا عمر بس رجاءً خليها تتكلم هي ! عمر قال ليهو عايزها تتكلم تقول ليك شنو مثلاً !؟ عايز تضغط عليها و تخليها توافق عليك بالغصب !
طبعاً أنا ما اتوقعت إنو ماريا بعد إحراج عمر ليها ممكن تفتح خشمها تاني و تتكلم ! فعلاً الغيره نار بتحرق القلب و هي رغم الإحراج بس عشان غيرانه و متغايظه مني تاااني فتحت خشمها و قالت لـ عمر ملييش لأني حـ اتدخل ، بس أنا ما شايفه سبب مقنع يخلي مها ترفض ولد الناس ... عمر قال ليها كفايه جداً انها ما عايزاهو ، شادي قال ليهو دا الأنا عايز أعرفو ليييه ما عايزاني !؟
طبعاً هنا حسيت إنو عمر شويه كدا و حـ يضربو ! طبعاً من بدينا نقاش أنا كنت بعاين لـ عمر و شايفه انزعاجو و ضيقو بسبب الموضوع دا و عايز متين النقاش دا يخلص

_ قلت لي عايز تعرف هي ليه رفضتك ؟؟
= ياريت والله
_ رفضتك لأنو أنا خاطبها و عرسنا قرب

طبعاً لمن عمر قال ليهو كدا أنا و ماريا إتلفتنا عليهو في نفس اللحظه ! كنت بعاين ليهو بخلعه و ما مستوعبه القالو و ماريا كانت مخلوعه زيي و وشها جاب ألوان !.... شادي عاين لي و قال لي بس أمك ما قالت لينا كدا !؟
كنت حـ اتكلم بس عمر سبقني و قال ليهو إذا أمها قالت ليكم كدا أو لا النتيجه واحده ، المهم انك عرفت ليه أبوها رفضك ، طبعاً شادي ما عرف يقول شنو ، بعد مسافه قال لـ عمر خير يا زول و ربنا يسعدكم و يهنيكم و طوالي مشى ، أما ماريا حسيت انها داقنها بـ مسمار ، كانت بتعاين لـ عمر بس و هي عيونها مليانه دموع ، جات عليهو و وقفت قصادو و قالت ليهو انت قلت كدا عشان تمشيهو صح ؟؟ كذبت عليهو مش كدا !؟
طبعاً أنا كنت واقفه جنب عمر و هي واقفه قصادنا الإتنين ، قالت ليهو عمر انا بتكلم معاك ، كنت بتكذب عليهو صح ؟؟... لمن قال ليها لا للمره التانيه أنا و هي ننخلع و نقعد نعاين ليهو ، طبعاً قلبي عمل شححح و بقى شغال زي الدلوكه و حسيت نفسي عايزا أسيح و أنا واقفه جنبو ، أما ماريا دموعها نزلت زي الشلال ، قالت ليهو كيف يعني ما بتكذب !!... عمر انت واعي للبتقولو !... قال ليها ايوه 😊
جاطت و قالت ليهو طيب و أنا ؟ مسحتني طوالي و فضلتها علي ! قال ليها أنا ما وعدتك بـ شي و الحصل كان سوء تفاهم و الجوطه دي كلها سببها أبوي و أنا ما حصل قلت ليهو عايز ماريا ، طبعاً قعدت تبكي و الكلام غلبها و أنا بعاين ليهم بإستغراب و ما فاهمه شي ، قالت ليهو كل الناس قايلانا مخطوبين أو حـ ننخطب ما فكرت منظري حيكون كيف بعد ما يعرفوا انك خليتني و مشيت لوحده تانيه !... قال ليها بحده براك نشرتي الكلام دا و انتِ عارفه أنا رأيي شنو بخصوص الموضوع بس براك واهمه نفسك ... طبعاً جاطت شديد و قالت ليهو عمر ما تنسى إنو البت دي أذتني ، البت دي عملت المستحيل عشان تبهت صورتي قدامك ، البت دي شدة ما بتكرهني يا عمر وصلت لمرحلة انها جابت لي راجل عشان يعتدي عليك و في نص بيتك يا عمر !... صدقني البت دي ما عندها ليك أي حاجه و عملت كدا عشان تغيظني و تقهرني ، هي بس عايز تخرب و تفتن بين الناس ، خربت البيناتنا زي ما خربت الكان بينك و بين عنود !
طبعاً أنا بقيت منططه عيوني و مستغربه في كذبها دا ، قلت ليها ماف زول غير سهى بفوتك في الكذب و التمثيل ! انتِ عارفه كويس منو الكان برسل لـ عنود و بكذب عليها ! انتِ و سهى الخططتوا للحاجه دي و على فكره سهى زي ما ساعدتك عشان تطيري عنود كانت مستعده تساعدني عشان أطيرك و بعدها تطيرني أنا عشان.... طبعاً هنا سكت و انتبهت للبقولو ، ما قدرت أقول عشان هي يمكن بتحب عمر !
ماريا رفعت اصبعها علي و قالت لي إياك تكذبي فيني ، كفااايه العملتيهو فيني ، انتِ عارفه إني لحد اللحظه دي بخاف أنوم براي !؟ لحد اللحظه دي بخاف أقعد في البيت براي ، بسببك أنا بقيت أخاف من ضلي و..... عمر قاطعها و قال ليها سؤال و جواب :
انتِ من وين عرفتي بقصة عنود ؟!
طبعاً أنا ذاتي ما كنت منتبه للنقطه دي ، طبعاً هي إترددت و بعد مساااافه قالت ليهو عرفت من سهى ، قال ليها و سهى ليه تحكي ليك و إذا حكت ليك ليييه ما جيتي قلتي لي ؟!
قالت ليهو ما بعرف يمكن كانت متناقشه مع مها المهم أنا جات حكت لي بكل حاجه هم عملوها لحد عملتهم الجابوا فيها راجل غريب و طبعاً دي فكرت الخبيثه دي و طوالي أشرت علي ! قالت ليهو ما حكيت ليك لأنك أكيد ما كنت حـ تصدقني زي ما هسي انت ما حـ تصدقني ، والله العظيم يا عمر مها قدامك عامله نفسها بريئه بس هي ما كدا ! يعني إذا وحده قدرت تخاطر بسمعتها و تكذب كذبه زي الكذبتها في علاء ديك فـ كيف انت حـ تصدق كلامها فهمني يا عمر !
طبعاً أنا كلامها وجعني جنس وجع ! ... عاينت لـ عمر و قلت ليهو كل الحـ اقولو إني لا رسلت لـ عنود لا معاي رقمها ، ماريا و سهى هم الكانوا برسلوا ليها و أنا حكيت قبل كدا قلتها ليك ، هم عايزين يرموا العملوهو علي ، المهم انت حر إذا عايز تصدقها صدقها أصلاً أنا ما منتظره منك حاجه ، يعني إذا انت صدقت كلام زول رسل ليك برقم غريب فكيف ما حـ تصدق كلام بت عمك !
طبعاً كان بعاين لي جوه عيوني ، قلت ليهو كدا و أول ما إتحركت قال لي أنا مصدقك !.... وقفت و إتلفت عليهو ، ماريا قالت ليهو كيف تصدقها دي وحده منافقه و كذابه ، هرشها و قال ليها انتِ الكذابه ، قالت ليهو عمر والله انا ... قاطعها بنهره عاليه خلعتني و خلعتها ، جاها غريب و هو خلاص زهج و غضب غضب ما عادي ، قال ليهو إياك تكذبي علي ، قولي الحقيقه زي ما هي و إذا كذبتي فـ كلمه واحده اقسم بالله ما يحصل خير يا ماريا و حـ أنسى انك بت عمي ... قعدت تبكي و تقول ليهو ليه تصدقها هي و تكذبني أنا و و و ...

طبعاً أنا زهجت ، قلت ليها إذا بتعملي دا كلو عشان عمر ياهو قدامك قولي ليهو الكلام دا بس ما تجي تكذبي فيني ، و على فكره هو ما لعبه ولا طفل عشان نقعد نتجادل فيهو أو نتشاكل بسببو ، انتِ مش حاسه إني عقبه في حياتك و عايزا تتخلصي مني ؟؟ ريحي نفسك أنا من يوم مشيت مع أمي و إختفينا زحيت من حياتك ، سنه و زياده عمر دا كان قاعد قدامك ليه ما قدرتي تقنعيهو بيك ؟؟ ليه ما قدرتي تخليهو يعرسك !؟ ليه ما قلتي ليهو انك بتحبيهو ؟! ولا انتِ ما بتتذكري انك بتحبيهو إلا لمن أكون أنا موجوده !؟
طبعاً عمر قعد يعاين لي سااااي ، دموعي كانت حـ تنزل بس منعتها ، قلت ليها أنا مليت و زهجت من الحاجات دي كلها ، عمر دا لو بنشال ليك عليك الله دخليهو في جيبك ، أنا ما عايزا شي غير انك تخليني في حالي ، من اليوم لا اتدخل في حياتك لا تدخلي في حياتي ، و ياهو عمر قدامك ، سوقيهو و أمشي و رجاء تاني ما تدخلي فيني و ما تصدعي بي !... قلت كدا و طوالي مشيت دخلت جوه ، طبعاً كان لازم اقول كدا و كلامي ما كان موجهه لـ ماريا و بس ، كان موجهه لـ عمر برضو ، شربت مويه و قعدت و أنا يدي بترجف و قلبي بضرب بسرعه و دموعي كل ما أمسحها تجي نازله ، طبعاً تاني عمر ما جا داخل ، خلصت شغلي و رجعت البيت طوالي ، أمي أول ما شافتني قالت لي مالك يا بت في شنو ؟؟
قلت ليها ماف شي تعبانه بس و عايزا أنوم ، طبعاً اليوم داك قضيتو نوووم بس و اكل زي الناس ما كنت باكل و يومين ما مشيت الشغل ، في اليوم التالت أمي جات داخله و هي بتقول دا كلام شنو ! قلت ليها أمي مالك !؟ قالت لي انتِ عمر دا متين قال دايرك ! متين خطبك عشان يمشي و يقول لـ شادي إنو خاطبك عشان كدا رفضناهو ! دخلنا في حته ضيقه مع محاسن ، قالت لي انتِ ليه ما اتكلمتي و قلتي لي إنو بتك مخطوبه ، والله قدر ما حاولت اقنعها إني أول مره أسمع بالكلام دا ما صدقتني !
طبعاً أنا عملت نفسي رايحه و قلت ليها أنا ذاتي ما عارفه ! قالت لي و ابوك نهاي ما جاب لي أي سيره ! والله ما أخليهو إلا اتصل و اسألو ... فعلاً شالت تلفونها و إتصلت على أبوي....

"أرجو أن تكون النِّهاية السَّعيدة
‏في مكانٍ ما سأصل إليه ‏يومًا
‏وأن تنتهي جولتي من الرَّكض وراء أحلامي
‏بنيلها لا بالنَّدم عليها
‏وأن تستحق الوجهة الأخيرة
‏عناء الوصول إليها مُنذ البداية "❤️
_____

"أتساءلُ كيف سيكونُ شعورُ النهايةِ السعيدةِ لشخصٍ أعتادَ على أن يخذلَه الطريقُ،

كيف هي العلاقات الآمنة بالنسبةِ لإنسانٍ قضى عُمرَه مُرتجِفًا،

كيف هو النوم بلا مُحاربة الأرق،
وكيف هو اليوم بدون رعشةِ اليدين!

أودُّ أن أعيشَ هذه اللحظةَ
عندما تعطينا الحياةُ فرصةً حقيقيَّةً لنحيا، لا أن نتظاهرَ بأننا على قيدِ الحياةِ.."❤️

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*