عِندما تَبتَسمين يَتقلصُ البؤس ويَنتصرُ السَّلام.♥️

صباح الخير جدا؛♥️

الا أيُها القَلب الذي قاده الهوىٰ ... أفِق! 🩶

املك تعابير رائعة تخفي
تماما انني الشخص
الذي ذاق كل تلك المرارة🩶

- يَبدأ كُل شَيء بِالتغيّر فِي
اللحَظة التي يَدق جَرس الإنْذار
فِي قَلبِك مُعلنًا أنَّ هَذا الأمر
يَجِب أنْ يَتَوقف لأنهُ لا يَليقُ بِك.🩶

وتبقى تلك الذكريات كالندوب
مهما حاولنا أن ننسى
جرحًا قديمًا ذكّرنا بهِ الأثر.🩶

كُلنا بذلنا جهدًا زائدًا للحفاظ
على السكين التي تجرحنا.🩶

مُهيبٌ أن أعودَ وحيدَةً إلى
كُلِّ شيءٍ لَمَسناهُ معًا،
هذا الإغترابُ شجاعٌ وَمُتعب🩶

- ‏أسوأ مَا قَد يُصيْب الإنْسَان
أن يَفقد شَهيته في القَول
، في الضَحك،
في إظهَار ردّات الفِعل، أسْوأ
ماقد يُصيبه أن يَموت حيّاً!🩶

تمنح الذي تُحبّ قلبك
ثمّ تَمضي بقيّة عمرك مثقوبًا.🩶

‏لقد فقدت القدرة على العتاب، على الركض في الطرق المجهولة، المناقشات الطويلة، لا أملك طاقة كافية لبدأ علاقات جديدة، لا أستطيع التشبث بأي شخص، فقدت الشغف اتجاه الكثير من الأشياء التي إنتظرتها طويلاً، أصبحت شخص أخر لا ينتظر، لا يتمنى، لا شخص ينتظر فقط أن تمر أيامه في هدوء وسلام تام .🩶

مساء الكئابة ؛ 🩶

نَستحقُ أنْ يُسعَى إلِينا! 🩵.
We deserve to be sought out! .

رواية من" الاعماق " للكاتبة " مها حولي الزاكي "♥️

*#من~الأعماق~《01》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​

يا الله يا معزه ما قادره أصدق ، أقرصيني ، أقرصيني عليك الله عشان أستوعب إنو دي حقيقه ما حلم ، أنا عايزا أطير من الفرح ، أخيراً حـ أعرس عمر ، أخيراً حـ أبقى مرتو ، وااااي ياخ يا معزه قادرهـ تستوعبي معاي إنو عمر حيكون لي !! لي براااي !؟😍

_ مها بطلي البتعملي فيهو دا !! افهمي إنو دا ما اسمو حب دا اسمو هوس و جنون !... سألتي نفسك عمر حـ يعمل فيك شنو لو عرف انك كذبتي عليهو عشان تصلي للعايزاه ؟؟ تبريرك حيكون شنو لمن يجي يقيف قدامك و يسألك عن الكذبه الكذبتيها و يواجهك بكل العملتيهو !؟

طبعاً لمن قالت لي كدا عكرت لي مزاجي ، قلت ليها ما حـ يعرف إلا لو انتِ مشيتي و كلمتيهو ، قالت لي عاجلاً أم آجلاً الحقيقه دي حـ تنكشف و انتِ عارفه كويس انك ما حـ تقدري تخفيها لفتره طويله و انتِ فاهمه أنا هنا قاصده شنو !.. قلبت عيوني و قلت ليها اففف ياخ ! اصلك لو ما عكرتي لي مزاجي ما بترتاحي ، ختيت الفستان الكنت شايلاهو على السرير و قلت ليها أنا كل البهمني إنو الزواج دا يتم ، و الحقيقه دي لو ظهرت حتظهر بعد العرس ، يمكن عمر يزعل يوم ، يومين أو اكتر بس بعدها حـ يتقبل الواقع ، لأنو ما حيقدر يغير شي بعد ما أبقى مرتو ، و بعدين الغايه تبرر الوسيله ... قلت كدا و إبتسمت بس إبتسامتي دي إتلاشت لمن معزه قالت لي كيف ما حـ يقدر يغير شي !؟ ناسيه إنو دا عمر !؟ أقل شي ممكن يعملو فيك إنو يطلقك بعد ما يعرف الحقيقه و يعرف عمايلك ، ساعتها موقفك حيكون شنو ؟؟ تبريرك حيكون شنو و الأهم حتكوني إستفيدتي شنو ؟؟
صدقيني عمر عااادي يحفر ليك و يدفنك حيه !
طبعاً غضبت غضب ما عادي ، غمضت عيوني و لمن فتحتهم قلت ليها معزه أطلعي برا ، قالت لي مها أنا بس عايزا مصلحتك لأنو.... قاطعتها و قلت ليها أطلعي براااا ما عايزا أكرر الجمله دي تاني !... بقت تعاين لي بـ يأس شديد ، مسكتها من يدها و طلعتها من الغرفه و قفلت الباب ، أخدت نفس عميق و إتخلصت من كل الأفكار السلبيه و اتناسيت كل القالتو معزه ، شلت الفستان و مشيت وقفت بيهو قدام المرايه و قعدت أتخيل في يوم بكرا ، يلي هو يوم عقدي أنا و أكتر انسان بحبو في الدنيا دي ، سرحت بعيد بخيالي و أنا مبتسمه ....

قبل ما أحكي ليكم بعدها الحصل شنو عايزا أقول ليكم إنو
حياتنا عباره عن روايه فيها فصول كتيره ، كل واحد بطل حكايتو ، و الأكيد إنو كل قصصنا أو رواياتنا زي ما فيها أفراح فيها أتراح و زي ما فيها فوز كمان فيها خساره و زي ما فيها شده فيها رخاء و زي ما فيها مصائب و مصاعب فيها سهوله و يسر ، بس كيف نحنا نقتنع بالحاجه دي و كيف نتعلم من أغلاطنا و كيف نجاهد أنفسنا و نمشي في الطريق الصحيح ، و كيف نستفيد من كل تجربه أو درس بتعلمنا ليهو الحياة ، كل واحد فينا قصتو بتختلف عن التاني حتى و إن كان في تشابه كبير بين قصصنا إلا انها مختلفه ، قصة كل شخص بتبدا من أول ما يجي على الدنيا دي ، بس مرات بحصل موقف معين أو مجموعة مواقف معينه كدا بتخلي الواحد يقول إنو دي البدايه الفعليه لـ قصتي ....

و أنا ممكن أقول إنو قصتي فعلاً بدت لمن عمتي سميره ساقتني أعيش معاها في بيتها في بري و لمن علاء الدين ولد عمي جا من البلد عشان يمتحن تالته و يقرا الجامعه ، عمتي سميره ما عندها بنات بس عندها 4 أولاد أكبرهم محمد بعدو عمر بعدو سليم و أصغر واحد فاروق ، عمتي لمن جابتني بيتها كنت ماشه سادس ، نقلتني من مدرستي الحكوميه في أمدرمان و سجلتني في مدرسه خاصه و مختلطه ، بطبعي كنت بت هاديه و ما بحب المشاكل و الجوطـه و كنت إنطوائيه شديد ، في مدرستي القديمه بعد سلة روح صاحبت بنتين بس لمن إتنقلت للمدرسه الجديده حسيت نفسي بديت من الصفر ، بيئه جديده و ناس جداد !! بس ما خليت دا يأثر على مستواي ، كنت شاطره شديد و بركز في الحصص و بصحح أول بأول ، و عشان جيت المدرسه بعد بداية السنه قعدوني ورا ، كنا 5 أنفار في الكنبه ، أنا و معاي 3 بنات و ولد ، البنات أساميهم مواهب و فاديه و رؤى و الولد إسمو أسامه ، مواهب دي أكبر وحده في الفصل ، عايده أكتر من مره ، يعني مفروض تكون في الثانوي ، طبعاً ما قدرت أدخل في الناس و لحد ما إمتحنا إمتحانات الفتره الأولى ما كان عندي صحبات ، لمن النتيجه طلعت جيت التالته و عمتي فرحت شديد و قالت لي خليك دائماً شاطره و مركزه كدا ، عايزاك تجيبي لي مجموع كبير في تامن ، علاء الدين قال لي متأكد إنو لو حافظتي على مستواك دا حـ تتذاعي مع الميه الأوائل في شهادة الأساس و الشهاده السودانيه ، عمتي قالت ليهو ان شاء الله أنا متفائله بيها شديد و انت ذاتك يا علاء شد حيلك برضو لأني عايزا أفرح بيك ، ضحك و قال ليها أنا بعد الإعادات الكتيره دي بقى كل همي أجيب نسبه تدخلني الجامعه ، ان شاء الله 50 بس ، عمتي قالت ليهو هووووي يا ولد ما تقول كدا و خلي سقف طموحك عالي ، و بما انك عُدت أكتر من مره مفروض تستفيد من الحاجه دي و تستغلها لصالحك و المقرر دا مفروض تكون شاربو شراب !! المهم اجتهد بس و أنا ما حـ أقصر منك ، بعرف أساتذه شاطرين ممكن أخليك تمشي ليهم في بيوتهم أو اجيبهم ليك البيت ، قال ليها ماف داعي يا عمتي ، قالت ليهو لا في داعي ، بكرا حـ أمشي و أشوف ليك أستاذ إدريس دا إذا عامل معسكر في بيتو أو في المدرسه ، بيتو ما بعيد من هنا .....
المهم يوم في المدرسه قبل الطابور كنت فاتحه كراسي و براجع في التمرين الحليتو عشان أمشي أجمع كان مفروض أجمع من أمبارح بس في مسائل ما كنت فاهماها فـ قلت أحسن أرجع البيت و اقراها بتركيز و بعدها أحل ، جات مواهب داخله و وراها فاديه ، قالت الحاصل شنو يا جماعه !!؟ ليه كل الناس دي مطلعه كراساتها و بتكتب ؟!! وحده من البنات الكانوا في الفصل ، قالت ليها ناسيه إنو أستاذة الرياضيات قالت نكتب التمرين و نجمع ليها قبل موعد حصتها الجايه !! قالت ليها ياخ دي مالا عايزا تكرهنا ! اها موعد حصتها الجايه متين ؟؟ قالت ليها اليوم و أول حصه كمان ، و قالت أي زول ما جمع ما ينتظرني في الفصل ، فاديه قالت ليها أحسن ذاتو ، اليوم الله ريحنا من حصة الرياضيات ، البت قالت ليها و كمان قالت حـ تعاقب أي زول ما جمع ، يعني طرد و ضرب ، مواهب قالت اووووف ياخ !! جات عاينت في كراسي و قالت ياخ التمرين دا كتير و ذاتو ماف زمن عشان نكتب و نحل ، فاديه قالت ليها خليهو ساي ، فجأه جات رؤى داخله و ناس مواهب حكوا ليها بالتمرين ، قالت ليهم أنا ذاتي كنت ناسيه زيكم كدا لكن لمن جيت الصباح بدري أسامه ذكرني و كتب معاي التمرين و حلينا سوا و مشيت جمعت ، فاديه قالت ليها يا خااااينه ! قالت ليها انتوا ما جيتوا بدري اعمل شنو ! فتشتكم ما لقيتكم ! مواهب قالت يعني المره دي حـ نتعاقب أنا و فاديه بس !! والله تعبت من الضرب دا !! و أستاذة مروه دي دقها حار !.....
ما كنت عايزا أتدخل و اتكلم معاهم لأسباب كتيره أهمها إني ما برتاح ليهم ، لأنو هم التلاته و معاهم الولد الإسمو أسامه بعملوا حركات تافه و بقولوا كلام قليل أدب شديد ، عشان كدا ما بحب اتكلم معاهم ، قلت ليهم أبدوا هسي و اكتبوا سرعه سرعه ، فاديه قالت لي ماااف زمن ياخ ، رؤى قالت ليهم جربوا ما خساره ، ان شاء الله تكتبوا نص التمرين و تجمعوا ، في ناس كتبوا سطرين بس و مشوا جمعوا ، مواهب قالت لي عليك الله أكتبي معانا ، أو نحنا نكتب و نخلي ليك فراغ تحلي لينا فيهو التمرين ، سكت ساااي ، قالت لي عليك الله يا مها ، ما قدرت أقول ليهم لا ، فعلاً هم بدوا يكتبوا ، بس ما كملوا التمرين للنهايه عشان الجرس رن ، أدوني كراساتهم و بديت أحل ليهم التمرين من كراسي ، قالوا لي أجمعي لينا معاك ، لمن خلصت شلت التلات كراسات و مشيت جمعتهم و وقفت الطابور ، بعد الطابور كانت حصة أستاذه مروه ، كملت لينا باقي درس أمبارح و لمن خلصت قالت لينا جمعتوا الكراسات ؟؟ قالوا ليها ايوه ، قالت الما جمع عندو فرصه لحد نهاية اليوم ، بعدها ماف زول يجيني الصباح جاري عشان يجمع ، بكرا ضرب بس ، طبعاً افتكرنها حـ تجي داخله و هي شايله ورقه فيها أسامي الناس الجمعت و إتخيلناها حـ تعاقب الما جمعوا بس شكلها

عايزا تديهم فرصه تانيه....بعدها عدا اليوم عادي ، تاني يوم برضو كان عندنا حصه معاها بعد الفطور ، جات داخله و هي شايله الكراسات ، ختتهم قدامها و قالت :
منتصر و عزام و إبتهال و منيره و خالد و حسن و احمد و مصطفى و لدن تعالوا مارقين ، لمن طلعوا ليها من دون أي تفاهم مسكت السوط و جلدتهم جلد نضيف ، قالت ليهم كاتبين لي تلات سطور بس و جامعين كراساتكم ! و فوووق دا كل الكاتبنوا كلو غلط !! ما بتخجلوا هسي !!... بعد شاكلتهم كويس كل واحد رجع مكانو ، بعدها قالت مها و مواهب و فاديه تعالوا لي مارقين سرعه ، قالوا ليها فاديه منو عشان في 3 أسمهم فاديه ، عاينت للكراس و قالت فاديه جمال ، طبعاً عاينا لبعض ، لمن مشينا ليها قدام ، قالت ديل كمان عملتهم بطاله شديد !! قايلين نفسكم حـ تستغبوني ؟؟ ...انتوا يا سنه سادس قايلين الأساتذه ديل هُبل و سهل تغشوهم؟؟ عليكم الله شايفننا طيور ؟؟... عاينت لي و قالت لي انتِ الكتبتي ليهم التمرين دا مش ؟؟... قلت ليها بصوت واطي آي ، مسكت السوط و جلدتنا التلاته جلده نضيفه خلت لون يدينا يبقى أحمر ، طبعاً أنا ضربتني أكتر منهم و قالت لي عشان تاني تتراشقي و تكتبي للناس ، هم مالم يدينهم مكسرات ؟؟ ....ختوا في بالكم يا سادس إنو أي طالب هنا نحنا بنعرف خطو و بنعرف إذا هو الكتب الكلام دا ولا لا ...ارجعوا و تاني كدي أشوف لي طالب كاتب لـ طالب ... طبعاً لمن رجعت البيت حكيت لـ عمتي ، شاكلتني و قالت لي انتِ ذاتك ليه تكتبي ليهم هسي جبتي دقه لـ روحك و و و .... جاطت شديد بالذات لمن شافت آثار السوط على يديني....
المهم في حصه من الحصص ، مواهب و المعاها كانوا بتونسوا ، أسامه قاعد بالطرف و أنا بالركن جنب الشباك و مواهب و فاديه و رؤى قاعدين بيناتنا ، كانوا بتضاحكوا و بقولوا في كلام تافه شديد ، صح إنو في كلمات ما عرفت معناها بس اول ما سمعتها منهم حسيتها كلمات ما تمام و قليلة أدب ، هم ما إكتفوا بكدا و بس ، كانوا بعملوا حركات مقرفه شديد و أنا بعمل نفسي ما شايفاهم بس كنت بتضايق شديد و بخاف من حركاتهم دي ! اول مره تمر علي تصرفات زي دي !! أكتر من مره فكرت أكلم عمتي بس ما عرفت أبدا ليها كيف و أقول شنو ! ما قدرت أقول ليها الكلام البقولوا هم و الحركات البعملوها ! ...
يوم من الطابور جينا داخلين الفصل و اتفاجأنا لمن لقينا كل الحيط مكتوب عليها : "أسامه بحب وفاء " حتى في السبوره كان مكتوب كدا ! طبعاً أنا إنخلعت و حسيت إنو دا كلام عييب و عيب شديد و قلبي قعد يدق بسرعه كأنو اسمي أنا الإنكتب على الحيط دي ! لما ناس مواهب جوا داخلين و شافوا الكلام قالوا دي أكيييد وفاء الكتبتو ، وحده من بنات الفصل قالت ليهم وفاء ذاتا ما جات ، مواهب قالت معناها دي وحده من صحباتها ديل و طوالي هي و فاديه و رؤى اتشاكلوا مع صحبات وفاء و أسامه و معاهو واحد إسمو حسن كانوا بحاولوا يحجزوهم و يبعدوهم عن بعض ، طبعاً الناس كلها إتلمت عشان تسمع و تشوف الشكله و الفصل بقى جايط لحد ما فجأه كدا سمعنا صوت عالي بقول في شنووو ؟؟؟
لمن إتلفتنا لقيناهو عاطف أستاذ الإنجليزي ، كل طالب مشى و قعد في مكانو ، أستاذ عاطف عاين في السبوره و للحيط و إبتسم ، قال وين أسامه ؟؟ كلهم وصفوا ليهو على أسامه ، قال و وين وفاء ؟؟ قالوا ليهو ما جات ، قال ليهم اها الحرب الكانت حاصله قبل شويه دي سببها شنو ؟؟ طوالي حكوا ليهو ، ضحك و قال لأسامه بناتك كتار ، شكلك لاعب على حبال مش حبلين بس !.. المهم تعال أمسح لي السبوره دي يا أسامه ، أسامه مشى ليهو بتردد و شال المساحه ، أستاذ عاطف قال ليهو مالك متردد كدا ، ما عايزا تمسح إسم حبيبتك ولا شنو ... هنا الفصل كلو قعد يضحك إلا أنا ، لأني كنت متخيله إنو الكلام المكتوب دا لو شافو أي واحد من الأساتذه حـ يوقف الفصل كلو على رجل واحده لحد ما يعرف الكتبو منو و يعاقبو بس دا كلو ما حصل !!
نهاية اليوم مواهب و فاديه و رؤى كانوا فاتحين تحقيق مع أسامه ، سمعتو قال ليهم وحاة اسم الله أنا ما عارف الكتب كدا منو ! مواهب قالت ليهو أكيد دي وفاء قالت لـ صحباتها يكتبو كدا ، فاديه قالت ليها و صحباتها نكروا حطب !... طبعاً رؤى كانت عامله فيها زعلانه ، العرفتو الفتره ديك إنو علاقتها هي و أسامه ما زي علاقتها بـ مواهب أو فاديه أو حسن ، هي و أسامه دائماً بمشوا و بجوا سوا و أنا أكتر من مره بالصباح بشوفهم قاعدين في الفصل براااهم و الشبابيك مقفوله !!
مواهب قالت ليهو يا أسامه حنس رؤى لأنها زعلانه منك ، قال ليها وحاااة اسم الله أنا ما بحب وفاء بحبك انتِ يا رؤى!... طبعاً أنا نططت عيوني و بعد جملتو دي عقلي شطب ! و ما قدرت أستوعب الجمله القالها دي !

طبعاً لحد ما رجعت البيت كنت مستغربه في الحصل ! كيف يعني واحد يكتب إنو فلان بحب فلانه !! و كيف يعني ولد يقول لـ بت بحبك !
ايوه كنت بشوف حاجات زي دي في التلفزيون و بسمعهم بقولوها كتير بس ما اتخيلت إنو حاجات زي دي ممكن تحصل في المدرسه و بين طلاب لسه صغار !!
المره دي ما قدرت أسكت ، أول ما وصلت البيت حكيت لـ عمتي ... طبعاً ما قدرت أقول ليها الكلام البقولوهو ، قلت ليها أنهم قليلين أدب و حكيت ليها الحاجات الحصلت خلال اليوم ، ضحكت و قالت لي شفع الزمن دا حقو الواحد ما يقول عليهم شفع ، من خامس لـ فوق بقوا ما هينين ، بس انتِ ما تشتغلي بيهم ، ديل أكيد طيش الفصل ...
في البدايه كنت مستغربه من ردة فعل الأستاذ و لمن رجعت البيت زاد إستغرابي بعد ما شفت ردة فعل عمتي !! حسستني كأنو الموضوع عادي !! عقلي عايز يطرشق ! يعني طالب يقول بحب طالبه و طالب يكتب إنو فلان بحب فلانه حاجه عادي ؟!! و عشان كدا ماف زول حسسني إنو عيب أو غلط !؟

" كأن الحياة منذ صغري كانت تجمع لي الحظ في صندوق ، و عندما كبرت ، وهبتني إياك "🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡عـــــــــــــــــبـــــــــــــــد البـــــــــــــاقــي أحــــــــــــمــد مـحــــــــــمد زين ♡*

*#من~الأعماق~《02》*
*#بقلم~مها~حولي~الزاكي~*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​

بعد يومين من الكلام دا ، عمتي مشت السوق و ساقتنا معاها أنا و علاء الدين ، اشترت لينا ملابس و كذا حاجه و اشترت ملايات و ستاير جديده و حلويات و مخبوزات ، لمن رجعنا البيت علاء قال ليها خميتي السوق كلو ، قالت ليهو والله حاسه كأني ما إشتريت شي ، قال ليها مش كنتِ عايزا تشتري بوهيات ؟؟
قالت ليهو اخخخ منك يا علاء مالك ما ذكرتني ! قال ليها ما اتذكرت إلا هسي ، بس ماف مشكله خليني أمشي بكرا و أشتريهم ، قالت ليهو سمح ، قلت ليهو ذاكرتك بقت ذاكرة ذبابه !قال لي و انتي مالك ما اتذكرتي ! قلت ليهو عشان انت تسأل ! قال لي شافعه ما عندك موضوع ! عمتي قعدت تضحك ، قالت لينا كما اتناقرتوا أصلكم ما بترتاحوا ، قال ليها البت دي إلا ما أفتح خشمي ، طوااالي بتتلائم معاي ، البشوفها هسي ما يشوفها لمن جات معاك أول يوم ، كانت مسكينه ولا كاتله حيلها ما عارف !قلت ليهو المسكين سكين ، ضحك و قال لي بالجد شافعه !.... طبعاً أنا مع الناس الغرباء بكون هاديه و في المدرسه إنطوائيه و كنت كدا لمن جيت مع عمتي بيتها بس لمن إتعودت عليها هي و علاء بقيت اتناقر معاهو عادي ، بس اول ما يجي زول غريب بسكت طوالي أو بدخل جوه ، المهم عمتي إتصلت على ولدها فاروق ، قالت ليهو ابوك و أخوك ديل جاين يوم السبت ، عشان كدا لاااازم تجي البيت ، في شغل عايزاك تشتغلو لي مع علاء الدين ، و يوم السبت عايزاك تمشي تستقبلهم في المطار ، و كمان ما تنسى تتصل على أخوك المغضوب داك و تكلمو ، بعد قفلت علاء ضحك و قال ليها أخوهو المغضوب داك منو ؟؟ قالت ليهو سليم منو غيرو ، قال ليها دا أي ولد من أولادك الجاي راجع دا ؟ قالت ليهو أجي يا علاء ما بتعرف أولادي ؟؟! دا عمر جاي مع أبوهو من قطر و محمد ولدي في السعوديه ربنا يرد غربتو هو كمان و يجيبو لي بالسلامه ، قلت ليها أنا ذاتي أولادك ديل ما بعرفهم شديد ، علاء قال لي عشان هم دائماً في حالة سفر ، أنا ذاتي ما بعرفهم معرفه شديده و طولت منهم ، عمتي قالت لينا شينه والله كونو الواحد يكون بعيد عن قرايبو و ما متواصل معاهم ، علاء قال ليها بسبب الظروف و ضغوطات الحياة ، الزمن دا ماف زول فاضي لزول ، يعني لو ما كدا أكيد كانوا حـ يجونا في البلد و يسلموا على أهلهم ، عمتي قالت ليهو برضو دي ما حُجه والله ، لكن ان شاء الله لو أدوهم إجازه طويله حـ اخليهم يسافروا و يصلوا أهلهم كلهم و أول شي يبدوا بالناس الهنا....
المهم يوم الخميس فاروق جانا من الصباح ، من يجي بكون في حركه و فرفشه في البيت ، هو دمو خفيف و جنو ضحك و هظار ، من جا عمتي شربتو الشاي و قالت ليهو يلااا انت و علاء قوموا طلعوا لي الأثاث الفي الهول دا و الحيط دي أدوها لي بوماستك ظاااابط كدا ، طبعاً فاروق بقرا في الجامعه سنه تانيه و قاعد في داخليه لأن الجامعه بعيده من البيت ، لمن خلصوا عمتي عملت الجبنه و معاها كيك و قالت ليهم اعتبروها جائزه أو مقابل لـ تعبكم ، فاروق قال ليها و المقابل دا نحنا قلنا ليك عايزنوا كيك و جبنه ؟؟ طلعي الكاش يا حجه 😂

قالت ليهو يكشوك من الجامعه إن شاء الله ، بري الجامعه خربتك والله ، بقيت مادي حقير ، علاء ضحك و قال ليهو أنا عمتي دي مستعد أفديها بروحي ، عمتي قالت لـ فاروق اتعلم اتعلم عليك الله!
شويه كدا تلفون فاروق رن ، رد و قال وين انت يا مان من قبيل بتصل عليك ما بترد ! .... المهم ناس أبوي ديل قالوا جاين بعد بكرا و أمي عايزاك تجي ... خلاص تمام ... بعد قفل عمتي قالت ليهو دا المغضوب ؟ .. قال شنو ؟ ضحك و قال ليها يااااهو ذاتو و قال حـ يجي ، قالت ليهو حـ يجي الليله ولا بكرا ولا يوم السبت ؟؟ قال ليها والله ما حدد لي يا أمي بس غالباً حـ يجي يوم السبت ، قالت ليهو عشان ما فاضي لينا ، مرت أبوهو دي عاملاهو زي الخاتم في إصبعها ، شغال خادم عندها و ببلاش كمان !... فاروق قال ليها يا أمي كلامك دا هو الطفشو من البيت ! عليك الله لمن يجي ما تتكلمي معاهو أي كلام شين !
قالت ليهو فالحين لي أنا بس و أخوكم دا ماف واحد فيكم فتح خشمو معاهو و قال ليهو البتعمل فيهو دا غلط !!
قال ليها نقول ليهو شنو يا أمي و انتِ مدياهو كل الأسباب البتخليهو يطفش من البيت ! يعني نعالجها بيجاي نلقاك قديتيها بيجاي !
طبعاً عمتي زعلت شديد ، قالت لـ علاء سامع ؟؟ عليك الله هسي دي ولاده و دا كلام زول يقولو لـ أمو ؟... علاء قال ليها والله انا ما فاهم حاجه و ما عارف بتتكلمو عن شنو ، قالت ليهو سليم السنه الفاتت طلع ليهو بفكرة عرس و هو لسه ما جاهز و ذاتو صغير على العرس ، كان باقي ليهو سنه و يتخرج ، لمن جا و كلمني و وراني البت العايزها صراحة أنا اعترضت عليها و لي حق طبعاً ، أول شي هي ما سمحه و غير كدا أبوها طافش و ما معروف أراضيهو وين و أمها معرسه 3 رجال و من كل راجل عندها دستة شفع ، ديل كلهم لو سليم كان عرس البت دي حـ يضطر يتحمل مسؤوليتهم ! يعني ولدي مالو و عيبو شنو عشان يعرس بت بـ بلاويها !؟
فاروق قال ليها يا أمي للمره المليون البت دي أبوها معروف عايش في الولايات ، معرس و قاعد هناك ! و ما تنسي إنو أم البت شغاله و ماسكه نفسها و أولادها ، يعني في وجود سليم أو عدمو هي متحمله مسؤولية أولادها ، قالت ليهو قايل سليم لو عرس بتها حـ يخلي نسيبتو تشتغل و هو يعاين ليها من دون ما يحشر نفسو ! النسوان الزي ديل انت ما بتعرفهم ، الوحده بتعرس لـ بتها واحد غنيان عشان بتها تستفيد و هي تستفيد ، قال ليها ما شاء الله والله ! يعني سليم طلع غني في النهايه عشان كدا أم البت طمعت فيهو؟؟
قالت ليهو انت ليه كلامك كلو إستهتار ! قال ليها ما استهتار يا أمي لكن خليك منطقيه ! سليم دا كان طالب و ياداب بحاول يبني في نفسو و الرفض دا ذاتو كان مفروض يجي من أم البت لأنو العريس ما جاهز و بتها عندها خيارات كتيره غيرو ، قالت ليهو ئههه !! ترفضو كيف و هي عارفه إنو أبوهو و أخوانو الإتنين مغتربين !؟
علاء قال والله عمتي نوعاً ما معاها حق ، هي أم في النهايه و طبيعي تقلق و تشيل هم مستقبل أولادها ... هنا عمتي إبتسمت إبتسامة نصر و قالت أخيراً لقيت زول بفهم ، قال ليها بس دا كمان ما معناه إنو سليم غلطان ، هو زول كبير ، حتى لو كنتِ شايفاهو صغير يا عمتي و زعلو مبرر لأنو لقى نفسو واقف في النص بين أمو و البت العايزها ، لكن لاحظي يا عمتي إنو رغم زعلو منك اختاركِ انتِ و ما كسر كلمتك و ما عمل أي خطوه جاده بدون رضاك في حين إنو كان ممكن يتجاوزك و يعرس البت بكل بساطه ! قالت ليهو ئهه ! منو القال ليك اختارني و منو القال ليك ما كسر كلمتي ؟؟
الولد وقف لي فوق و رفع صوتو علي ، ما كان باقي ليهو إلا يكفتني عشانها ، و كان مقرر يعرسها بموافقتي أو بدونها ، علاء قال ليها طيب عرسها أو خطبها ؟؟ قالت ليهو لا ، البت لقت الأغنى منو و عرستو ، عشان كدا عامل فيها زعلان ، فاروق قال ليها لا إله إلا الله يا أمي !! البت دي عرست بسببك انتي ! مشيتي ليها لحد البيت و مسحتي بكرامتها الأرض و ما خليتي ليها جنبه ترقد عليها ، و ما خليتي ليها صفه سيئه كدا و ما قلتيها ليها ، و أكدتي ليها انك ما موافقه عليها ، ولا حتقبلي بيها ، يعني عايزاها تعمل شنو بعد كلامك دا و تنتظر منو و عشان شنو !!؟
قالت ليهو هي أصلاً دايره ليها سِبله و لقتها ، حتى لو كان ما مشيت ليها كاااانت حتعرس واحد تاني ، ما صدقت إني جيت و شاكلتها طوااالي اتصلت على أخوك و شكتني ليهو و نقلت ليهو كلامي بـ ضبانتو و عاشت دور المغلوب على أمرها ، و أخوك الغبي لـ هسي مصدق انها خلتو بسببي ، زعل و طلع من البيت ، و انتوا بدل تقيفوا معاي و توعوا أخوكم الجاهل دا و تقولوا ليهو تصرفك دا غلط ساكتين و مخلنوا على راحتو ! فاروق قال ليها خلاص يا أمي الحصل حصل و ما بنقدر نغير شي بس عليك الله لمن سليم يجي البيت ما تسمعيهو أي كلام فارغ ....