በዘለቀ ቂም ልጅ በወረሰው
ስንት ቤት ፈርሷል
ስንት ህዝብ ደቋል
ስንት ሃገር ነጥፏል ዘመን ባፈጀው
ባደፈ ታሪክ በማይመለስ
ባለፈ ውሃ በማይታፈስ
ላይድኑት ነገር መብሰልሰል ታሞ
ትናንትን መኖር ደግሞ ደጋግሞ
ተው አንተ ሰው !
ተው! አስብ ነገን በምህረት ዝጋው
ካንተም አይለፍ ልቀህ እለፈው
ግደል በፍቅር ዝመት በይቅር
አንተን ያመመህ ለዘር አይቅር
ፍትሕ ግን ይወጣል ከሰማይ
አበጥሮ ሁሉን ከሚያይ
የጊዜ ጉዳይ እንጂ ሁሉ ነገር
ከፍርድ ሚዛን የለም ሚቀር
ከፈጣሪ ወንበር ከሰማዩ መንበር
ሳይታይ ከዙፋን የለም አንድም ሚቀር
ፍትሕ ይወጣል ከሰማይ
የበደል ጽዋ ገፍቶ
ሞልቶ ሲፈስ አደብ አጥቶ
ጽኑ ቁስል ነበር ማይጠገን
ግን በፍቅር ሽሯል በይቅር ቀን
ፍትህ ይወጣል ከሰማይ!
ፍታ ካቴናህን
ንደል ተራራህን
በምህረት ፈውስ ይሄን ልብህን
አድን ትውልድህን
ፍትሕ ይወጣል ከሰማይ!
ይክሰኛል ብሎ ያሰበ
የበቀልን እርሾ ያላጠበ
ነግ የራስ-በደል ሊጠምደው
ዳግም ስብራት ደጁ ነው
ሰው ያጭዳል የዘራውን
ሳያፍስ አይቀርም የበተነውን
ደም ላይጠራ በበቀል ደም
ልትቀደም ፍርድ አትቅደም
ፈጣሪን ማየት ትልቅ
ልብ ታሞ በጸጸት ሳይርቅ
በማይወጡት ፈተና
በደል በበቀል ሳይጠና
ጦርን በጦር ሰይፍን በሰይፍ
ጠብ ተመዛዞ ማን ብሏል እርፍ
ከአዳም በቀል የለም ምንም
ያለፍቅር ቂም አይድንም
ግደል በፍቅር ዝመት በይቅር
አንተን ያመመህ ለዘር አይቅር
ፍትህ ይወጣል ከሰማይ!
#forgiveeachother #Love #startforgiving & #stopwar