امريکا په سيمه کې د کومو هېوادونو د سياسي نفوذ مخه نيسي؟
عبدالله لغمانی
د امريکا متحده ايالات چې د نړۍ په هره ستره او کوچنۍ سياسي پرېکړه کې په يو نه يو ډول دخيل پېژندل کېږي، د دنيا په بېلابېلو سيمو کې د خپلو موخو د ترلاسه کولو او خصوصا په اسيا کې د خپلو هدفونو لپاره له چين او روسيې سره ښکر په ښکر ده. او د همدې موخو د ترلاسه کولو لپاره د دوی لپاره ښه حربه په دې منطقه کې روانه مذهبي توندلاري ده، چې امريکا یې پرمټ کولای شي خپلو هدفونو ته په رسېدلو او سيالو هېوادونو ته سرخوږي په پيدا کولو کې ترې مستقيم او غېرمستقيم کار واخلي. امريکا ته په سيمه کې لومړی نمبر اقتصادي او دويم نمبر سياسي رقيب چين دی، چې امريکا هڅه کوي د چين په سينګکيانک کې د ايغور مسلمانانو د حق تلفي کيسې تازه او روانې وساتي او هلته د مېشتو مسلمانانو او نورو هېوادونو کې د مسلمانانو احساسات پرې راوپاروي او د خپلې موخې په توګه یې وکاروي. امريکا او برتانيا دواړه په دې کوښښ کې دي چې د خپلو ميډياوو فوکس ټولې همدې خواته راوګرځوي او ددې سيمې له خلکو سره د نسل پر بنسټ د ترکي ژبو هېوادونو دخلکو له جذباتو هم استفاده وکړي.
همدارنګه چين په کور دننه د بيان د ازادي له اړخه يو ديکتاتور او داسې یو هېواد معرفي کړي چې په خپلو خلکو یې بې شمېره بنديزونه لګولي او د هغو په هر ډول ايسارولو کې درېغ نه کوي ، او همدارنګه غواړي د چين لپاره د تايوان او هانک کانګ په مسئلو کې د ناټو سره په همغږي ددې هېواد پر وړاندې سيستماتيک مخکې لاړ شي او مصروف یې وساتي او د همدې سيمو له سيمه ييزو حکومتونو سره يې په لانجو کې ښکېل کوي او غواړي يو دوامدار او مسلسل سرخوږی د چين لپاره د چين په شاوخوا کې د تل لپاره موجود وي ترڅو د سياسي نفوذ مخه یې نيولې وي او هم امريکا خپلو موخو ته ځان پکې ورسوي، خو چين د سياسي نفوذ نه ، بلکې تر اوسه پورې په نړۍ کې د اقتصادي نفوذ په حال کې دی او غواړي په اقتصادي لحاظ له امريکا مخکې او د نړۍ هېوادونه په اقتصادي پروژو د ځان ملګري کړي او دوه اړخيز تړونونه ورسره وکړي، چين له اقتصادي اړخه غواړي په شاته پاتې او لږ پرمختللو هېوادونو کې عمراني پروژې پلې کړي او په دې سره د هغو خلکو په زړونو کې ځای ونيسي که څه هم دا پروژې دوی د بلاعوضه مرستو په ډول نه کوي ، بلکې د پيسو او پور ډول یې ترسره کوي خو بيا هم د نړۍ د هېوادونو په ګرمو پېښو او صورتحال کې غواړي نرم او ارام او يا هم کله کله بې پرې دريځ لري.
همدارنګه د کرونا وايروس د خپرېدا د سرچينې په اړه د چين حکومت تورنوي چې نړيوالو ته رښتيا نه وايي او دوی د ميډياوو له لارې دا د جهانيانو په ذهن کې ورکوي چې ګويا وايروس د چين د بې غوري له امله خپور شوی دی او يا هم چين په خپلو لابراتوارونو کې په مصنوعي ډول جوړ کړی دی.
له بل پلوه د امريکا بل ستر سيال روس دی په سياسي لحاظ روسيه د امريکا لومړۍ نمبر رقيب دی او متحده ايالات د پخواني بالقوه سيال په توګه ورته ګوري او غواړي په لويديځو سرحدونو کې لکه د اوکراين په مسئله کې او له ناټو سره په اړيکو کې مشکلات ورته جوړ کړي او په دې توګه هڅه کوي په ختيځ اروپا کې د روسيې د سياسي نفوذ مخه ونيسي او په يو ډول کوښښ کوي د هغو سيمو په خلکو کې د روسيې پر وړاندې د خلکو اذهان بدل کړي، په تېره بيا د اوکراين په مسئله کې د ناټو له لارې کوښښ کوي د اوکراين حکومت په لوی لاس يوه لوی ناورين ته ورټېله کړي چې راتلونکې پايلې یې ددې سيمې او اوکراين د دولت لپاره ښې نه دي. او همدارنګه غواړي د نورو هېوادونو لکه چک، پولېنډ او نورو سره د روسيې اړيکې د خپګان کچې ته راټيټې کړي تر څو روسيه په دې سيمه کې کوم خواخوږی هېواد ونه مومي او هم د منځني ختيځ کې يوازینی سيال د امريکا روسيه ده چې د سوريې په مسئله کې او په نورو مسئلو کې اوس او هم د تاريخ په اوږدو کې سره مخامخ شوي او ان د يو ستر اتومي جنګ د وروستۍ شېبې تر بريده سره رسېدلي دي خو په هر حال دا نو د هېوادونو په خپلو سياسي ارزښتونو او سياسي ليدلوري پورې اړه لري چې څه ډول د نړۍ له هېوادونو سره په تعامل او توازون اړيکې برابرې کړي او خارجي پاليسي داسې عياره کړي چې د خپل هېواد ګټې یې ايجابوي .
https://wp.me/p8XUyy-ufF

کوم سړی چي په خپله داسي کار کوي چي په هغه سرہ نورو ته د بدگمانۍ موقع لاس ته ورسي نو هغه دي پر ځان بدگماني کونکي نه ملامتوي.(حضرت عمر رضی الله عنه)

https://wp.me/p8XUyy-jV0

کورنيو چارو وزارت: د Cpharm کمپني په افغانستان کې د چرسو د پروسس کارخانه جوړوي
کابل ټکی کام (چهارشنبه، ۳ ليندۍ، ۱۴۰۰ل)
د افغانستان د کورنيو چارو وزارت د معلوماتو له مخې، ‏د Cpharm کمپني غواړي په افغانستان کې چرسو د پروسس کارخانه جوړه کړي.
د ياد وزارت وياند قاري سعید خوستي نن چهارشنبه نومبر ۲۴ (لېندۍ ۳) ليکلي، چې پرون د کورنیو چارو وزارت د مواد مخدر سره د مبارزې معینیت د Cpharm کمپنۍ له نماینده سره کتلي دي.
خوستي زياته کړې:«د Cpharm کمپني غواړي په افغانستان کې د چرسو د پروسس کمپنۍ جوړه کړي چې ورسره به په هیواد کې چرس یواځې ‏همدې کمپنۍ ته ورکول کيږي چې دوی ترې دوا او یو ډول کریم جوړوي.»
په ياده غونډه کې د Cpharm نماینده وویل، چې افغانستان کې په ۲۰ زره جریبه زمکه چرس کرل کيږي او دغه کمپنۍ ۳۰ زره جریبه چرسو ته اړتیا لري.
نوموړی زياتوي، په دې کارخانه به Cpharm کمپنۍ د ۴۵۰ ملیون ډالره پانګونه وکړي.
د خوستي په خبره، ‏د Cpharm سره د قرارداد ټول مراحل بشپړ شوي او په لنډو ورځو کې به دا پروژه رسما پيل شي چې ورسره به ګڼ شمیر هيوادوالو ته کار پيدا شي.
https://wp.me/p8XUyy-ufI

د ټولنیزو رسنیو زیانونه!
فېسبوک او ټویټر له موږ نه څه واخیستل؟
دوه شیان:
یو «وخت»
بل « حیا»
موږ خو له افراط سره هسې هم روږدي یو؛ خو د ټولنیزو رسنیو په استعمال کې افراط بیا وژونکی دی( البته چې د سالم هدف او سالمې موخې له پاره نه وي.)
مثلاً:
ما یو ۱۵ کلن ځوان راپورته شي یوه ۵۵ کلن مشر ته چې د ده عقل یې په پورتني جېب کې دی او د ده د پلار د عمر په اندازه تجربه، علم، تحصیل، انسانیت او عزت لري سپکې سپورې ووايي او د «حیا» حد مات کړي.
یو د دوه افغانیو کس راجګ شي او یوه درانه مشر او معزز مخور ته سپکې خبرې کوي.
آیا د ملگري انتخاب هم شرایط لري؟
هو!
که یو ښه ملگری ۱۰ صفتونه لري؛ اوس چې په دغو صفتونو کې یوازې یو صفت چې هغه «حیا» ده، موجود شو. دا پاتې ۹ نور به هم په کې پیدا شي.
له داسې خلکو سره ملگرتیا وکړئ چې «حیا» ولري.
هر دین اخلاق لري او د اسلام اخلاق «حیا» ده.
حیا او دین لازم او ملزوم بلل کېږي.
نو:
زما په نظر، څنگه چې په عملي ژوند کې موږ د سپین ږیرو او مشرانو په مخې کې بې حیا خبرې او بې ځایه خبرې نه کوو؛ دغسې باید دلته هم هغه صفات خپل کړو. هر هغه څه چې د «بې حیايۍ» په تعریف کې راځي له هغو نه باید ډډه وشي.
موږ باید داسې شیان نشر یا خپاره کړو چې زموږ د ټولنې له شرایطو، فرهنگ، ارزښتونو، اخلاقو او چاپېریال سره سازگاري ولري.
دا سمه ده چې، اکونټونه شخصي دي، هر څوک پوه شه او شخصیت یې؛ خو چې «حیا» ولرو، موږ خپله ښه ښکارو او دا زموږ په خیر دی.
لنډیز : انسان سراسر په زیان او تاوان کې دی. نوش جان دې د مؤمنانو او صالحانو شي. زموږ د خبرو خلاصه دا شوه چې که «سالمه» استفاده وشوه او ارزښتونه تر پښو لاندې نه شول او یو مثبت مفهوم مو خپلو ملگرو ته ور انتقال کړ، دلته بیا موږ له پېښېدونکي زیانه تر یوه حده په امان یو. موږ سره باید د «حیا» ترازو او تله وي، خپلې خبرې، پوسټونه او نشریات پرې لومړی وتلو، که په تول سم وو، بیا یې نشر کړو. له دې سره موږ خپله ښه ښکارو.
لیکوال: تمیم تکل
https://wp.me/p8XUyy-ufM

له خپل دوست سره هم په احتیات کي اوسئ، خو که هغه امانتدار وي نو بیا ددې ضرورت نسته او امانتدار هغه کيدای سي چي د الله (جل جلاله) څخه بیریږي.(حضرت عمر رضی الله عنه)

https://wp.me/p8XUyy-jUV

څوک چي خپله روزي ډيره او عمر زيات غواړي نو هغه ته پکار دي چي خپلوي ښه پالي.( رسول اکرم صلی الله علیه وسلم)

https://wp.me/p8XUyy-jh1

اميرخان متقي او ورسره پلاوي د قطر د بېلا بېلو وزارتونو او ادارو له مسئولینو او استازو سره ګډه ناسته ترسره کړه
کابل ټکی کام (شنبه، ۶ ليندۍ، ۱۴۰۰ل)
‏د افغانستان د بهرنيو چارو د وزير ښاغلي امير خان متقي په مشري د ااا لوړ رتبه هيئت د قطر د بهرنیو چارو وزارت کې د یاد هیواد د بېلا بېلو وزارتونو او ادارو له مسئولینو او استازو سره ګډه ناسته ترسره کړې ده.
د بهرنيو چارو وزارت وياند عبدالقادر بلخي وايي، په ناسته کې په سیاسي، بشري، اقتصادي او تعلیم اوتربیې په موضوعاتو تفصیلي ‏خبرې شوي دي.
د غونډې په ترڅ کې د قطر هیواد مسئولینو وويل چې دوئ به د افغانستان د خلکو تر څنګ ولاړ وي او راتلونکي وخت کې به ورسره مرستې وکړي.
افغان پلاوي د قطر هيواد له مرستو او په تیرو مذاکراتو کې د دوي له مثبت رول څخه مننه کړې.
https://wp.me/p8XUyy-ufP

غلا څوک کوي او له غله نه دفاع څوک کوي؟
انجنیر کمالدین (امین)
څو ورځې وړاندې په خواله رسنیو کې یو خبر خپور شو چې؛ استخباراتو په پکتیا ولایت کې هغه لارۍ موټر نیولی؛ چې څورلس سوه (1400) میله (M4) امریکایي ټوپک پکې بار وو او له افغانستان څخه (په قاچاقي توګه) د پاکستان پر خوا روان و.
یاد خبر ډېر ځوروونکی او دردوونکی ثابت شو ! مجاهدینو او عامو وګړو تند غبرګونونه پرې وښوول، آن تر دې چې؛ د قاچاقبرو اشدترین مجازات (اعدام) یې وغوښت.
مګر پرون د کورنیو چارو وزارت ویاند (ښاغلي قاري سعید خوستي) تند غبرګون وښود او یاد خبر یې کاذب او خپروونکي یې ناخبره وبلل.
خوستي نه یوازې دا چې؛ رسنیو ته یې پدې اړه څه ګونګ معلومات ورکړل؛ بلکې په ثبتي بڼه یې هم پر واټس اپ خبر خپور کړی و چې ((له نظام سره باید خیانت و نه شي! مشران باید بې ځایه ملامت نه کړل شي، چې تحقیق نه وي شوی؛ خبر باید خپور نه شي او...))
خوستي دا هم زیاته کړې وه چې ((موږ ته دې یوازې سل میله یو څوک ثابت کړي؟))
د ښاغلي خوستي دلائل پر ځای او عاقلانه وو ! مګر موږ بیا بل څه وایو! او هغه داسې: په شریعت کې به نو دا هم نه وي چې؛ د لس میله ټوپکو غله ته دې یو ډول سزا ورکړل شي او د سلو ، یا زرو میلو غله ته بل ډول!
دغه محترم ویاند پرون دا هم وویل چې: څورلس سووه میله نه! بلکې خالي دیارلس میله وسله وه! M4 هم نه! بلکې کارمولي وو.
بلې! ښاغلي خوستي دا هم منلې چې؛ آته سوه عدده د M4 جاغورونه / شاجورونه او زر عدده خفیفه مرمۍ وې.
ښه کورنیو چارو وزارته! نو تاسو ولې دا خبر هغه مهال نه خپرولو، چې دا خائنین مو نیولي وو؟
ولې مو غله په ښکاره مجازات نه کړل؟
دا غله د کوم غله ملګري او هغه غل بیا د کوم خائن او غله ملګری و؟ دومره وسلې چا ورکړې وې او یا یې له کوم نظامي ارګان څخه ایستلې وې؟
وسلې خو یا په دفاع وزارت پورې اړه لري او یا هم په داخله پورې ! تاسو ولې د دغو غلو د نیولو او ځړولو پر ځای! د دوی دفاع کوئ؟
ښه! څورلس سوه میله اېمپور نه! تش څورلس میله کچه توپنګچې یې غلا کړې! نو تاسو ولې دغه خائنین درسره ساتئ؟
زموږ خو خولې ستړې شوې چې: وا واکمنو! د خدای خاطر وکړئ! زموږ دا سپېڅلی نظام په داسې پلیتو او ناولیو خپلوانو او دوستانو مو! مه رامرداروئ.
موږ په بار بار درته ویلي چې؛ وسلې او وسیلې مو شپه او ورځ د خوست او کندهار خواته روانې دي او ملت ته بلکل معلومات نه ورکوئ چې؛ ګواکي دا سامانونه چېرې او د څه لپاره وړل کیږي؟
موږ یې درسره وینو! چې پخواني اربکیان د چریکي مجاهدینو په نوم درسره ګرځوئ او داسې غلاګانې پرې کوئ، بیا یې دفاع هم کوئ! همدا یې دفاع ده چې: نه یې نومونه موږ ته ښیئ او نه یې اصلي څېرې.
موږ غواړو چې؛ باید داسې غله علني محاکمه شي او ترڅنګ یې باید د غلو مکمل آدرسونه هم موږ ته وړاندې کړئ! چې د کوم ځای او د چا ملګري وو او اوس په کوم ارګان کې، چا مقرر کړي دي.
کله مو چې ملت ته دغه پلیت اقشار ښه ور وپېژندل، بیا به یې ټول همکاران او خواخوږي هم مجازات کوئ او د تل د پاره به یې له دغه پاک صف څخه باسئ.
که داسې و نه شي! نو موږ پوهېږو چې؛ همدا تاسو یې راولئ، غلاوې پرې کوئ او بیا یې دفاع هم کوئ.
ملت ړوند نه دی، لږ پام وکړئ ! هسې نه چې خدای مکړه زموږ هم لکه د پخوانیو کباړیانو نوم بد شي.
https://wp.me/p8XUyy-ufS

نن دوحه کې د افغان حکومت د استازو او امریکايي چارواکو ترمنځ خبرې پیلېږي
کابل ټکی کام (شنبه، ۶ ليندۍ، ۱۴۰۰ل)
د افغانستان د بهرنیو چارو سرپرست وزیر امیر خان متقي نن شنبه د افغانستان لپاره د امریکا له ځانګړي استازي ټام وېسټ او ورسره پلاوي سره په دوحه کې د تازه خبرو لړۍ پيلوي.
د امریکا د بهرنیو چارو وزارت تېره اوونۍ وویل چې ښاغلی وېسټ به د دوو اونیو لپاره په دوحه کې پاتې شي.
د افغان حکومت مرستیال ویاند بلال کریمي ويلي: "عمده مسایل چې بحثونه به پرې وشي دا دي چې د دوحې تړون ته باید درناوی وشي او په بشپړ ډول تطبیق شي، د افغانانو پیسې چې د امریکا او نورو بهرنیو په بانکونو کې کنګل شوي باید ازادې شي، بل دا چې باید بامفهومه ډپلوماټیکو اړیکو ته لاره پرانیستل شي، څو تعاملونه ته په مسوولانه ډول ترسره شي او هغه ننګونې او اندېښنې چې په مخکې پرتې دي له منځه ولاړې شي."
له بله پلوه امریکايي چارواکو ویلي، چې د افغان حکومت له استازو سره د ترورېزم پرضد د مبارزې، له افغانستانه د امریکايي وګړو او هغو افغانانو چې خپل ژوند تر ګواښ لاندې بولي د هغو د وتلو، د بشري مرستو او د افغانستان د اقتصادي وضعیت په اړه خبرې وشي.
https://wp.me/p8XUyy-ufV

هند: د ترافیکي‌ پيښې له امله ۱۸ تنه مړه او ۵ ټپيان شوي
کابل ټکی کام (يکشنبه، ۷ ليندۍ، ۱۴۰۰ل)
د هندوستان د لویدیځ بنګال ایالت د نادیه په ولسوالۍ کې د ټرافیکي پيښې له امله لږ تر لږه ۱۸ تنو ته مرګ ژوبله اوښتې ده.
د لویدیځ بنګال پولیس وايي، یو بس موټر چې مړی يې هندو سوزان ته انتقالاوه او ګڼ شمیر کسان هم پکې سپاره ول په لاره کې د ولاړې یوې لارۍ سره ټکر شوی دی.
د پوليسو په وينا، پدې پيښه کې لږ تر لږه ۱۸ تنه مړه او ۵ تنه نور ټپیان شوي‌ دي.
پېښه د موټرو د زيات رفتار له امله رامنځته شوې ده.
https://wp.me/p8XUyy-ufZ

ولس ته د رئیس الوزراء د لومړنۍ وینا لنډیز
نن (۲۲ ربیع الثاني = ۶ لېندۍ) رئیس الوزراء ملا محمد حسن اخند د ملي ټلوېزون له لارې ولس ته لومړنۍ وینا وکړه. لاندې د رئیس الوزراء د وینا خلاصه کړل شوې بڼه ده، چې ستاسې حضور ته یې وړاندې کوو.
وینا
نحمده ونصلي علی رسوله الکریم. اما بعد:
تر ټولو دمخه خپل ګران او ځورېدلي ملت ته خپل سلامونه وړاندې کوم. الله جلاله دې ستاسې د پلرونو، زامنو او وروڼو تکلیفونه، شهادتونه، زندانونه او هر ډول سختۍ، چې پرتاسو تېرې شوې دي، په خپل دربار کې قبولې کړي. کوم کسان چې زخمي شوي، د بدن غړي یې له لاسه ورکړې او معیوب شوي وي او ژوندي پاتي وي، د دوي تکلیفونه دې هم الله جل جلاله قبول او مقبول وګرځوي.
ګران او ځورېدلی ملته!
غواړم چې پر روانو حالاتو له تاسو سره یو څو خبرې وکړم او څه وضاحت ستاسې حضور ته وړاندې کړم.
ګران ولسه، شل کلن تاریخ او د الله له لوري لوی امتحان پر تاسې تېر شو. تاسې او ستاسې بچیانو مجاهدینو دا شل کلن جهاد په ډېرو سختو تکالیفو، زندانونو، چاپو او قربانیو تېر کړ؛ مجاهدینو د هر څه پر وړاندې ځان سپر کړ، چې په پایله کې یې الله جل جلاله دا لوی نعمت ورپه برخه کړ.
ټول ګران ولس ته دا وینا کوم چې اوس موږ او تاسې له یوه بل امتحان سره مخ یو.
محترمو مجاهدینو! تاسې له الله جل جلاله سره د درو شیانو ژمنه کړې وه: چې موږ به له وطنه د کفارو ګیلم ټولوو، اشغال ته به د پای ټکی ږدو؛ پر ځای به یې یو اسلامي حکومت او نظام قایموو؛ او ټول هېواد ته به امنیت راولو.
ګران ملته! له تاسې سره مجاهدینو وعده کړې وه چې تر څو چې اشغال ختمیږي موږ به جنګېږو؛ تر څو چې دلته اسلامي حکومت او نظام راځي، موږ به جنګېږو؛ او په دې هېواد کې به [داسې] امنیت راولو چې د ټولو حقوق، مال او عزت به خوندي وي، څوک به چا ته ضرر نه شي رسولای – مجاهدینو په درې درو واړو وعدو د الله تعالی په نصرت وفا وکړه.
اوس مو خبره دا ده چې اې ملته!
پر تاسې د دې نعمت شکر لازم او واجب دی. محترمو وروڼو، خدای مه کړه، که د دې نعمتونو شکر ادا نه شي او نارضایتي ښکاره شي، نو څه به پېښ شي؟ د امارت په اړه بعضې ناپوهه اشخاص داسې څرګندونې کوي چې سړی وویریږي چې که ملت د دې عظیم نعمت شکر ادا نه کړي نو په یوه بل عذاب به اخته شي. له یوه طرفه چیغې وهل کیږي چې د کار نشتوالی دی، د امارت له راتلو سره نرخونه لوړ شوي دي. سبحان الله، اې ملته! دغه به انصاف وي چې دا د نرخ لوړوالی له امارت سره وتړل شي؟ ایا نیستي، قحطي له امارت سره راغلې او که دا له پخوا په دې هیواد کې موجوده وه؟
ګران او مهربان ولسه !
تاسې له خپل ځان سره فکر وکړئ چې امارت خو له تاسې سره د رزق وعده نه ده کړې. امارت خو پر خپله کړې وعده وفا درسره وکړه، د رزق وعده خو الله جل جلاله له خپل مخلوق سره کړې ده. باید موږ ټول خپل بادار جل جلاله ته فریاد وکړو چې پر موږ د رحمت بارانونه راووروه ترڅو زموږ له هېواد څخه د وچکالۍ لمنه ټوله شي او شته مشکلات مو حل شي. دا د الله لوی امتحان دی، [ځکه چې] بنده ګانو له الله څخه سرکشي شروع کړې ده. الله جل جلاله دې موږ ته توفیق راکړي چې الله جل جلاله ته فریاد وکړو او زموږ ستونزې هوارې شي.
الحمدلله، په دې ملک کې چې څه واکداران دي، خاینان نه دي، پیسې ګټونکي نه دي چې خپل جېبونه ډک کړي؛ دا د پیسو شایقین نه دي – دا هغه کسان دي چې خپل سرونه یې د اسلامي نظام راوستلو او د دې ملت لپاره د الله په لار کې وقف کړي وو.
ولسه! دغه خلک له تاسې پیسې نه غلا کوي. دلته چې زه موجود یم د دې ځای واقعه به تاسې ته وړاندې کړم تر څو تاسې ته دا په ثبوت ورسیږي چې دلته حکومت کوونکي خلک غله، جېب ډکوونکي نه دي. په ارګ کې موږ او مجاهدین ګوزاره کوو، دلته چې له موږ څخه مخکې څوک وو، کله چې تښتېدلي وو په لارو کې پیسې ترې لوېدلې وې. سړی تعجب وکړي د دې خلکو ایمانونو ته: یو کشر طالب به یو لک دوه لکه ډالر ځای پر ځای پیدا کړل، په داسې حال کې چې له الله جل جلاله پرته به بل هېڅوک هم نه و، خو دوي به هغه پیسې ما ته راوړې چې دا مو په فلاني ځای کې پيدا کړې. حتی یوولس لکه ډالر د ارګ په بیلابیلو برخو کې طالبانو موندلي وو او ما ته یې راوړل چې دا واخله. په هرځل پیسو راوړلو به ما د دوی په ایمان او وجدان تعحب کاوه. دا دا ډول انسانان دي.
نو که چیرې د افغانستان د خلکو پیسې، چې د ملت سرمایه ده، ازادې شي، زه یقیني یم چې شته ستونزې به ټولې هوارې شي، هغه ستونزې چې د ولس په مخ کې دي الله جل جلاله به یې په خپل نصرت سره هوارې کړي او افغانستان به له دې مشکلاتو وباسي.
نو اې ملته! هوښیار اوسئ. د مخکیني نظام بعضې کسان چې په دې ملت کې پاتې دي او پټ دي داسې څرګندونې کوي چې ټول ملت ته تشویش وراچوي، ټول ملت په خپل دې مبارک نظام شکمنوي. ډېر هوښیار اوسئ چې دښمن مو بیا یرغمل نه کړي. خدای مه کړه چې په خپل داسې مبارک نظام، امنیت او حکومت باندې بدګومانه شئ، یا په د

ې اړه یوه بېکاره خبره درنه وشي، الله جل جلاله به درنه ناراضه شي. پخوا به مو نه د شپې ځای و او نه د ورځې، نه د پټېدو او نه د شپې تېرېدو او نه د خوب ځای – الله جل جلاله دا ټول مشکلات حل کړل او داسې ډاډمنه فضا یې رامنځته کړه چې د شپې او ورځې ارام خوب او هوسا ژوند پکې تیرولای شئ؛ د شپې له مخې هم تګ او مزل کولای شئ او د ورځې هم. هېڅ کومه ستونزه مو پر وړاندې نشته، نه مو څوک مخې ته درېدلای شي. که د دې نعمت شکر ادا نه کړو، الله به مو په سختترین عذاب اخته کړي.
داسې خبرې اورم چې ویل کیږي طالبان راغلي دي، کار نه پیدا کیږي، کارونه نشته. د کار زمینه خو اصلًا پخوانۍ ادارې بنده کړې وه. د یو کلي اوسېدونکی بل کلي ته نشوای تلای، چا به په خپلو کروندو کې اوبه نه شوای لګولای، چا به خپل روزګار نه شوای چلولای. اوس خو شکر الحمدلله که د ورځې یا شپې سفر کوې، که کار کوې، که خپل روزګار چلوې، بزګري کوې بڼوالي کوې، هره چاره چې پر مخ بیایې، هېڅ مشکل دې نشته – ارامه او ډاډمنه فضا درته چمتو ده. نو د کار زمینه اوس ښه برابره ده که هغه وخت چې قدم په قدم به پوستو او ټوپکوالو درنه پیسې اخیستلې؟ د مخکیني نظام پیسه-خوارو او هغوی ته تبلیغ کوونکو – هغه که دلته په افغانستان کې دي که په بهر کې دي – په دې شکل تبلیغ پیل کړی چې طالبان راغلي او افغانستان کې یې کاروبار زیانمن کړی دی. ملته! که داسې فکر له چا سره موجود وي، نو دا به بیخي بې انصافي وي. ګران ولسه! بیداره اوسئ، که خدای کول، زما یقین دی چې په لږ وخت کې به الله جل جلاله له موږ او تاسې مشکلات ختم کړي. الله ته مې ډېر امید دی چې الله پاک به بارانونه راباندې ووروي، او زموږ، د ملت او د خدای جل جلاله دښمنان به په دې کار کې هم شرمنده او ذلیله کړي. دا مې تاسې ته وینا ده چې د دې لوی نعمت شکر ادا کړئ او ناشکري یې مه کوئ.
مجاهدینو او مسولینو ته مې دا وینا ده چې اې محترمینو، کشرانو او مشرانو، د امارت کارکوونکو! له موږ او تاسې سره پروردګار عالم ډیر لوی کمک وکړ، که د دې نعمت شکر ادا نه کړئ، آیا تاسې له دې نه وېرېږئ چې الله تعالی به تر دې [شل کلنې سختۍ] سخت عذاب درباندې راولي؟ ګوره مجاهده وروره، باید پر خپل ولس رحم او ترحم وکړئ، زهیر یې نه کړې. د یتیم په سر یې د ترحم لاس کش کړه. دا هغه ولس دی چې شل کاله یې له تا سره تکلیفونه اوږه په اوږه تېر کړي، ته یې په خپله غېږه کې ساتلی یې. ته له دوی سره ښه چلند کوه، ځوره یې مه، ضرر مه وررسوه، درڅخه مه یې خوابدی کوه، خپلې دروازې دې د ملت پرمخ مه تړه. اوس که ته د دې ملت او د لوی الله بادار شکر ادا نه کړې، ای مجاهده، الله تعالی به تا ته هم سختترین عذاب درکړي.
داسې مه کوه چې دروازې دې په ځان پسې بندې کړې وي، پر ځان دې زنځیرونه او پاټکونه راګرځولي وي، او ولس نشي کولای چې خپلې ستونزې له تا سره شریکې کړي او یا په اساني ستا لیدل ورته مهیا شي. دا خصوصا والیانو او امنیه قومندانانو ته وایم. اې ورووره! تهپخپله فکر وکړه، دې ولس پوره شل کاله په خپله غېږ او کور کې ساتلی یې، څومره ناځواني او نامردي ده چې دوی اوس ستاسې دروازې ته په شواروزو ولاړ وي خو ته دومره موقع نه ورکوې چې خپلې ستونزې درسره شریکې کړي. ده د خپل کور د حرام سرای دروازه ستا پر مخ خلاصه کړې وه، خو د ډېر افسوس ځای دی چې دوی اوس په هفتو او شواروزو ستا دروازو ته ولاړ وي یو خط کاغذ او خپله چیغه ستا تر دره نشي دررسولای ځکه چې ستا پیره داران، زنځیرونه او ساتونکي ولاړ دي او ستا د لیدو اجازه څوک نه لري.
ټولو والیانو، قومندانانو، قاضیانو او مسولینو ته مې دا قاطع امر دی چې د ولس لپاره باید ستاسې دروازې خلاصې وي؛ که مو خلاصې نه کړې، زما دې په الله قسم وي چې د الله د رحمت دروازې به ستاسې پرمخ بندې وي. د دې مسلمان ملت او مجاهدینو خدمت وکړئ. ناشکري مه کوئ. که ته د تېرو چارواکو په څېر کارونه کوې، نو ستا بهتري به په هغوی څه وي؟ چې د الله د نظام ساتنه نه کوې، د دې ولس خدمت نه کوې، د مجاهد خدمت نه کوې، نو ته به څنګه پر الله ګران یې؟ ستا خیال څه دی چې تر څو به په دې ښایسته بنګلو کې ناست یم، تر څو به په دې لویو لویو موټرونو کې ناست یم؟ الله به دې داسې د قدرت په څپېړه ووهي چې فکر به دې هم نه وي کړی، هیڅ تصور به دې یې نه وي کړی. بیا به وایې چې دا څه راوشول. الله دې موږ له داسې کار او انجامه وساتي. کوم خلک چې تر موږ وړاندې دلته وو شل ورځې مخکې به یې فکر هم نه و کړی چې په ارګ یا فلاني ولایت کې به طالب ګرځي – خو الهي فیصله دا وه چې په لسو ورځو کې یې د دوی حکومت پر بل مخ راواړوه. نو که د الله سرکشي دې وکړه، که ولس یې یا مجاهد، الله جل جلاله ته هر څه اسان دي، هر څه درسره کولای شي.
ما ته خبرونه رارسيږي چې په ځينو ځایونو کې یو څوک د چا کور ته واوړي، څوک د چا له دوکانه یو شی غلا کړي. فکر وکړئ، دا مجاهدین نه دي، بلکې دا توپکی دی، غل دی، دا د الله دښمن دی، د مجاهد

په څېر یې ځان جوړ کړی دی. ټولو مشرانو ته مې دا امر دی (فرد وي، ډلګی مشر وي او هر څوک چې وي) که له خلکو سره په داسې خیانت ونیول شو، خالي سلاح دې شي او راپور دې حتما ضرورًا ما ته اطلاع راکوي چې فلانی مو په دې جرم نیولی دی.
قاضي صاحبانو ته مې دا هدایت دی چې د خپل ولس پر مخ دې دروازې خلاصې کړي. د خلکو ستونزې په لږ وخت کې حل کوئ. که مشکلات یې ډیر وو، موږ سره دې رابطه کوي. موږ هڅه کوو چې د الله جل جلاله په کومک یې ستونزې حل کړو.
ګرانو وروڼو او مهربان ولسه! بله خبره د هغو کسانو په اړه ده چې په تېر حکومت کې یې کار کړی او اوس یې خبر رارسیږي چې دوی وايي موږ دلته خوندي نه يو. که چېرې له دې خلکو سره د انتقام معامله مجاهدینو کولای، اول چې راغلل او لا نظام معلوم نه و هرڅه یې چې کولای شوای کول یې؛ که یې واژه، تاړه او یا بندي کاوه یې، هره لوبه یې ورسره کولای شوه – خو هېڅ یې هم ورته ونه ویل. د فتحې په ټول دوران کې به څوک دا ثابته نه کړي چې یو کس ته دې هم زیان رسېدلی وي. تاسې ټول د دې شاهدان یاست چې تېر شل کاله پخواني حکومت په دې مجاهدینو څه مشکلات راوستي وو، څومره تکلیفونه یې ورکړل څومره یې وکړول. اوس هم موږ وینو چې له رېګونو د حافظانو او مجاهدینو جسدونه راایستل کیږي. همدې خلکو په دومره سختیو او تکلیفونو سره په شهادت رسولي وو، خو همدا خلک چې مجاهدینو ونیول، ایا یو یې ویشتلی یا یې ورته تکلیف رسولی دی؟ ایا د بشر په تاریخ کې دومره ګذشت، ترحم او شفقت تېر شوی دی لکه اوس چې مجاهدینو د تېر حکومت له کسانو سره کړی دی؟ موږ یې شل کاله په اور کې سوځولي یو. داسې شواهد له موږ سره شته چې دې کسانو له مجاهدینو په ژوندانه د بدن اعضاء پرې کړي دي، تېل یې پرې اچولي، په ژوندون یې په اور سوځلي دي. داسې سلګونه مثالونه شته. خو کله چې مجاهدین پر دوي مسلط شول، دوی ټول یې وبخښل او عفوه یې ورته وکړه. دې ته ورته مثال څوک په دنیا کې وړاندې کولای شي؟ یوې خبرې ته باید متوجه واوسو: کومو کسانو چې په تېر نظام کې داسې جنایت کړی او له عفوې یې ګټه نه ده اخیستې او بیا هم خپل جنایت او خباثت ته دوام کوي، نو د دې مطلب دا نه دی چې دوی ته به بیا هم عفوه کیږي، دوی ته تر قیامته عفوه نشته، دوی به بیا د خپل جنایت سزا ویني. ګرانو وروڼو او ګران ملته! دې ته متوجه اوسئ چې په دې نامه مو څوک غلط نه کړي.
دولتي ادارې په خپل حال دي، هماغه پخواني مامورین یې ورځنۍ چارې پرمخ بیایي، په ارامه او ډاډمنه فضا کې خپل کارونه ترسره کوي. د دوی پر وړاندې هیڅ مشکل نشته.
بله خبره دا ده چې ځینې کسان د ښځو حقوق ښکته او پورته کوي چې د ښځو حقوق باید پرځای شي، د بشر حقونه باید پر ځای شي او تر څو چې په افغانستان کې همه شموله حکومت جوړ نه شي، دا نظام موږ په رسمیت نه پیژنو.
ایا د بشر حقوق همدا وو چې دوی خلکو ته ورکول؟ ایا د ښځو حقوق هغه وو چې سابقه ادارې ورکول؟ الحمدلله، د ښځو حقوق خو امارت ورکړل، د ښځو عفت یې ور خوندي کړ، ابرو او عزت یې ورخوندي کړ. په ټول افغانستان کې داسې نر نشته چې د یوې ښځې عزت ته په بد نظر وګوري. اوس هم په افغانستان کې د ښځو تعلیم تر ډېره حده روان دی، او هیله من یم چې نور به هم د داسې زده کړو زمینه برابره شي – په هغه طریقه او چوکاټ کې چې الله جل جلاله یې له خپلو بندګانو غواړي. پر مسلمان (ښځه وي که نر) تعلیم فرض دی. البته الله تعالی له بنده شرعي علم غواړي، پر بنده شرعي علوم حاصلول فرض دي؛ نورو علومو ته که وخت پیدا شي او موقع برابره وي، مشکل نه وي، هر څوک کولای شي چې حاصل یې کړي – په دې شرط چې نور مشکلات ورسره نه وي [تړلي].
ښځې الحمدلله په امن کې دي. د دوی امن به مهم وي. په مخکیني نظام کې موږ او تاسې حالات لیدل چې په نظام او ادارو کې به یې کار کاوه او مشکل به ورته پېښ و. آیا دا د ښځو حقوق دي؟ اوس الحمدلله په هر ځای کې که [ښځې] راوځي، که زده کړو ته ځي، که په صحت کې کار کوي، که کار او خدمت کوي، یا د بچیانو خدمت کوي – په ټولو ځایونو کې محفوظې او په امن کې دي. امید شته هغه نور حقوق به هم چې څه کمزوري پکې وي په هر ځای کې ورکړل شي. [هغه ټول حقوق به ښځو ته ورکول کیږي] چې په هره برخه کې الله تعالی، نبي علیه السلام او شریعت محمدي ورکړي وي. امارت کله داسې کوي چې الله-ورکړي حقوق به [له ښځو] راګرځوي؟
او د افغان شموله حکومت په اړه باید ووایم: هغه حکومت چې تر موږ وړاندې و ایا دا همه شموله یا افغان شموله و؟ په یوه ځاي کې دوو ادارو کار کاوه او په دواړو به خپل خپل پلویان راټول وو. ایا دا همه شموله حکومت و او که دا اوسنی نظام همه شموله دی؟ دا قضاوت باید ولس وکړي چې د اشرف غني نظام همه شموله و او که اوسنی نظام؟
د دنیا همدا قانون دی – که هغه انتخابات وي یا بله کومه لاره – یو ګوند چې ټاکنې وګټي نو پخواني چارواکي له یوې مخې لیرې کوي او په خپل حکومت کې ورته ځای نه ورکوي، خپل خلک راولي. ښکاره ثبوت یې د امریکا اوس

نی نظام دی چې پخواني چارواکي یې ټول لیرې او پرځاي یې نوي کسان راغلل. د پخوانیو کسانو ټولې پریکړې یې لغوه کړې او پرځای یې خپل کارونه عملي کړل. په هره اداره کې یې خپل کسان وټاکل. ایا دا همه شموله نظام دی او که د افغانستان، چې هر قوم او هر قشر پکې ځان لیدلی شي؟
غواړم چې د ا.ا.ا په داخلي او بهرني سیاست وضاحت وړاندې کړم:
موږ ټولې نړۍ ته دا ویلي چې موږ به د نورو په کورنیو چارو کې مداخله ونه کړو او له سره دا پالیسي نه لرو. په هیڅ مجلس کې ما له هیڅ مشر یا کشره دا خبره نه ده اورېدلې چې سره راټول وي او وايي راشئ په فلاني هېواد کې د ناامنۍ یا لاسوهنې په اړه مشوره وکړو. موږ د هیچا د کور او هېواد ناامنه کولو پالیسي نه لرو. سره له دې چې امریکا زموږ پر خاوره تعرض کړی و، زموږ خلک یې شهیدان کړل، موږ د دې توان درلود چې د دوی په خاوره کې عملیات ترسره کړو، خو داسې مو ونکړل. په راتلونکې کې هم نه غواړو چې چا ته ضرر ورسوو، بلکې موږ په دې هڅه او فکر کې یو چې خپله خاوره اباده کړو او خپل ولس ته خدمت وکړو. موږ خپلو ګاوڼدیانو او لیرې پرتو هېوادونو ته دا ویلي او وایو چې زموږ لخوا تاسې ته کوم تکلیف نه رسېدلی او نه به درورسیږي؛ موږ اوس د خپل هېواد ابادۍ او په خپلو پښو درولو ته فکرمن یو.
کوم نظام یا کوم اداري تشکیل چې زموږ له راتګ وړاندې تېر شوی او حاکم و، ځینې خلک یې تخصصي نظام بولي. خو د دې په څېر فاسد او خراب نظام به د نړۍ په تاریخ کې پیدا نه کړئ. د هغه تشکیل ډېره شکېدلې بڼه درلوده. هیڅ شی یې هم منظم او مناسب نه دی یوځای کړی. هغه وزارتونه چې دوی به ورڅخه عاید درلود د ارګ چاپیره وو او ټولې پیسې به یوازې د اشرف غني په لاسلیک تللې او راتللې.
الحمدلله، کله چې موږ راغلي یو، موږ دې چارې ته منظم کمیسونونه رامنځته کړي تر څو د پیسو لېږد او رالیږد په منظم ډول وڅېړي او هیڅ کومه غلطي پکې رامنځته نه شي. اقتصادي کمیسون مو رامنځته کړ تر څو په دې کار وکړي چې څنګه کولای شو په افغانستان کې شته بانکونه له موجوده ستونزو راوباسي او یو مناسبه حل لاره ورته پیدا کړي. په دې کمیسون کې سوداګر، د اقتصادي چارو کارپوهان او وړ متخصص کسان شته چې شپه او ورځ د افغانستان په اقتصادي مسایلو کار کوي. بل مو سیاسي کمیټه جوړه کړې چې سیاسي امور پرمخ بیایي. همدارنګه تشکیلاتي کمیټه مو رامنځته کړې چې هغه د اسلامي امارت په تشکیلاتي برخو، د مامورینو په معاشاتو او په نورو مسایلو کار کوي.
موږ شپه او ورځ په ځان یوه کړې تر څو د خلکو هغه ستونزې هوارې کړو چې زموږ له بشري توانه پوره دي. ګڼ شمېر کسان په پورته یادو شویو او نورو کمیسونونو کې د دې هدف لپاره نه ستړې کېدونکې هلې ځلې کوي. موږ د ولس د خدمت لپاره رسمي او غیررسمي وخت په نظر کې نه دی نیولی، بلکي تل د دوی په خدمت کې یو. له الله جل جلاله د لا زیات خدمت توفیق غواړو. همدارنګه ولس ته دې هم الله جل جلاله دا توفیق په نصیب کړي چې د دې لوی نعمت شکر ادا کړي او د دې عظیم نعمت ناشکري ورڅخه ونه شي. له تاسو مو دا هیله ده چې د خپل اسلامي نظام ترڅنګ ودریږئ، د هېواد او اسلام دښمنانو ته دا موقع مه ورکوئ چې په خپلو منفي تبلیغاتو مو اغیزمن کړي.
په پای کې مې له ټول ولس او مجاهدینو دا غوښتنه ده چې د دې اسلامي نظام په جوړښت او پایښت کې له یو بل سره اوږه په اوږه ودریږئ او په ګډه د یوې ښې راتلونکې لپاره کار وکړئ. ټولو هېوادونو ته ډاډ ورکوم چې موږ ستاسې په کورنیو چارو کې مداخله نه کوو او له تاسو سره د ښو اقتصادي اړیکو پالل غواړو. له ټولو نړیوالو مرستندویه ټولنو مو دا هېله ده چې له افغانستانه بشري مرستې ونه سپموي او په دې سختو شرایطو کې د افغانانو [لاسنیوی] وکړي.
والسلام
https://wp.me/p8XUyy-ug2

د روغتیا نړیوال سازمان: د کورونا نوې بڼه د اندیښنې وړ ده
د روغتیا نړیوال سازمان د کوېډ ـ ۱۹ ناروغۍ نوې بڼه د اندېښنې وړ بللې ده او د دوی د خبر له مخې په اروپایي هېوادونو کې د یاد ویروس مثبتې پېښې مخ په ډېرېدو دي.د کورونا ویروس د نوې بڼې د خپرېدو د مخنیوي لپاره یو شمېر اروپایي هېوادونو د مسافرو پر تګ راتګ بندیزونه لګولي دي.
د کورونا وېروس دغې نوې بڼه ته چې د اومېکرون نوم وړکړل شوی لومړی ځل يې پېښه په جنوبي افريقا کې د نومبر پر ۲۴ نېټه د روغتيا نړيوال سازمان سره ثبت شوې وه.
د روغتيا نړيوال سازمان وايي چې په راتلونکو څو اوونيو کې به ساينس پوهان معلومه کړي چې د دغه وېروس په کومه اندازه لېږدول کېږي.
د امریکا د جان هاپکینز پوهنتون د جمعې د ورځې نومبر ۲۶پورې د شمیرو له مخې په نړۍ کې د کروناویروس د پیښو شمیر څه دپاسه ۲۶۰ میلیون ته رسیدلی او ددې ناروغۍ په وجه د مړینو شمیر له ۵.۲میلیون تنو څخه اوښتی دی.

https://wp.me/p8XUyy-ug5

عمل له علم څخه پرته داسې دي لکه په بدن کې چې روح نه وي. ( امام ابو حنيفه رحمه الله )

https://wp.me/p8XUyy-j8C

د ملي تدارکاتو ادارې ته نوی سرپرست رئیس او مرستیال ور وپېژندل شول
کابل ټکی کام (سه شنبه، ۹ ليندۍ، ۱۴۰۰ل)
کابل: د افغانستان اسلامي امارت د وزیرانو شورای په وړاندیز او د امیر المؤمنین د فرمان پر بنسټ د ملي تدارکاتو ادارې لپاره مولوي حمدالله زاهد د سرپرست رئيس او شېخ عبدالرحیم د مرستیال په توګه ټاکل شوي؛ چې نن ورځ د لیندۍ میاشتې په نهمه نېټه؛ د چارو ادارې لوی ریاست سرپرست لخوا؛ د ملي تدارکاتو ادارې کارکوونکو ته په رسمي توګه ور وپېژندل شول.
د پېژنغونډې په پېل کې د اسلامي امارت د چارو ادارې لوی رئيس مولوي احمدجان احمدي خبرې وکړې او ویې وئیل؛ اوس د کار ښه زمینه برابره شوې او د دې فرصت څخه په ګټې اخیستو ټول باید په ګډه کار وکړو او هېواد د ځان بساینې پر لور روان کړو.
نوموړي د ملي تدارکاتو اداره په اقتصادي برخه کې یوه مهمه اداره وبلله، چې د ده په وینا په دې اداره کې مسلکي او تجربه کاره کادرونه شتون لري، چې د هېواد په ابادۍ او بنسټيزو کارونو کې ترې لازمه ګټه واخیستل شي او زیاته یې کړه، د دې لپاره چې دا اداره لا پياوړې شي؛ د ادارو ترمنځ باید لازمه کاري همغږي رامنځته شي او په پوره اخلاص او رښتینولۍ سره د خپلو کاري صلاحیتونو په چوکاټ کې کار وکړو.
هغه ووئیل که چېرې غواړو چې خپلواک او پر ځان بسیا افغانستان ولرو، باید خپله لاس په کار شو.
د ملي تدارکاتو ادارې نوي سرپرست رئیس مولوي حمدالله زاهد هم خبرې وکړې او د اسلامي امارت له مشرتابه څخه یې مننه وکړه چې پر دوئ یې باور کړی.نوموړي ووئیل مونږ ژمن یو، چې د هېواد د ابادۍ او پرمختګ لپاره په ګډه کار وکړو.
ښاغلي زادهد زیاته کړه چې شاوخوا څلور لسیزې افغانستان او د افغانستان خلک له ګڼو فرصتونو محروم شوي او هېواد مو د پرمختګ پرځای شاتګ کړی؛ خو اوس په ټول هېواد کې یو حاکم نظام منځته راغلی چې په هره برخه کې د کار زمینه برابره شوې او اوس په کار ده چې د دې فرصت څخه په ښه توګه ګټه پورته کړو.
د غونډې په جریان کې د ملي تدارکاتو ادارې ته نوي مرستیال محترم شېخ عبدالرحیم هم د امیرالمؤمنین او د وزیرانو شورای له باور څخه مننه وکړه او ژمنه یې وکړه چې په ټول اخلاص او صداقت سره به د ملي تدارکاتو ادارې له کارکوونکو سره په ګډه کار کوي. نوموړي په دې ټینګار وکړ چې هر مسؤل کس باید ملي ګټې تر شخصي ګټو لوړې وبولي او ملي ګټو ته لومړیتوب ورکړي.
https://wp.me/p8XUyy-uga

بهرنيو چارو وزارت: د امريکا له ځانګړي استازي او مل پلاوي سره مجالس مثبت و
کابل ټکی کام (سه شنبه، ۹ ليندۍ، ۱۴۰۰ل)
‏د افغانستان د بهرنيو چارو وزارت وايي، چې د بهرنيو چارو وزير امير خان متقي په مشرۍ د ا.ا.ا لوړ رتبه هيئت د متحده ايالاتو له خوا د افغانستان خاص استازي ټام ويسټ او مل لوړپوړي هيئت چې بيلا بېلو ادارو استازو پکې شتون درلود سره دوه ورځنۍ تفصيلي خبري ترسره کړې.
د بهرنيو چارو وزارت وياند عبدالقهار بلخي په خپله رسمي ټويټر پاڼه ليکلي، چې ‏هيئتونو په سياسي، اقتصادي، بشري، صحي، تعليمي، امنيتي، مرستو رسولو په هکله او همدارنګ بانکي او نغدي پیسو رسولو کې د لازمو تسهيلاتو برابرولو په اړه بحثونه وکړل.
د بلخي په وينا، د افغانستان پلاوي د امنيت ډاډ ورکړ، غوښتنه يې وکړه چې د افغانستان کنګل شوي پيسې بايد بې له قيد او شرط خلاصي شي، تورلستونه ‏او بنديزونه ختم او بشري موضوعات له سياسي موضوعاتو بیل شي.
نوموړي زياته کړې، دواړو هیئتونو کې د موضوعاتو په اړه د ښه برمختګ په موخه مسلکي او تخنیکي ګروپونو هم جلا جلاغونډي وکړې چې په وينا يې:«مجالس په ټوله کې مثبت و او طرفيونو هوکړه وکړه چي په راتلونکي کي به هم دا ډول ناستو ته دوام ورکوي.»
https://wp.me/p8XUyy-ugd

د رياست الوزراء د دوهم مرستيال عبدالسلام حنفي په مشرۍ د اقتصادي هيئت ناسته ترسره شوه
کابل ټکی کام (سه شنبه، ۹ ليندۍ، ۱۴۰۰ل)
نن سه شنبه د روانې ليندۍ مياشتې په ۹مه نيټه له ماسپښين وروسته د رياست الوزراء د دوهم مرستيال عبدالسلام حنفي په مشرۍ د اقتصادي هيئت ناسته ترسره شوه.
ناسته کې د ماليې، کانونو او پټرولیم، تجارت، مخابراتو او معلوماتي ټکنالوژۍ، اقتصاد او زراعت وزيرانو برخه درلوده، غونډه کې پر اقتصادي موضوعاتو، د شاه عروس او کمال خان بندونو د پاتې کارونو بشپړولو، سوداګرو ته د سوداګریزو جوازونو د تطبیق په بهیر کې د اسانتیاوو برابرولو، له دغه ډول جوازونو څخه د ناوړه ګټې اخیستنې د مخنیوي په موخه د تعرفې کمېټې بیا فعالولو په هکله بحثونه وشول.
دغه راز پرېکړه وشوه، چې د خصوصي سکټور د ستونزو د هواري او د وارداتو په برخه کې د صنعت او کانونو خونو د پرله پسې غوښتنو له مخې د وارداتي توکو په ځانګړې توګه د تېلو او ګازو د نورم او سټنډرډ دفتر فعالیتونه قانوني او معیاري کړي.
دغه راز پرېکړه وشوه، چې هېواد ته د بې کيفيته وارداتو د مخنيوي لپاره به د اړوندو وزارتونو يو ګډ هيئت د نورم او سټنډرډ ادارې فعاليتونه په دقيقه توګه وڅېړي او وړانديز شوې موندنې او حل لارې به يې اقتصادي بورډ ته وړاندې کړي.
د سوداګرۍ د اسانتیا او د ګمرکي چارو د چټکتیا په موخه، د ایران او ازبکستان په غوښتنه د امکان په صورت کې د هېواد په بندرونو کې د سرحدي پولو کاري ساعتونه ۲۴ ساعتونو ته لوړولو پرېکړه وشوه.
همدارنګه د دوه اړخیزو همکاریو د څرنګوالي په اړه د ایران او افغانستان د ګډې کمیټې له خوا پر شویو پرېکړو هم خبرې وشوې.
https://wp.me/p8XUyy-ugl

سعودي عربستان په کابل کې د خپل سفارت د کونسلي څانګه بيا پرانيسته
کابل ټکی کام (چهارشنبه، ۱۰ ليندۍ، ۱۴۰۰ل)
د راپورنو له مخې، سعودي عرب په افغان پلازمېنه کابل کې د خپل سفارت د کونسلي خدمتونو څانګه بېرته پرانيستې.
د سعودي د بهرنیو چارو وزارت پر ټویټر پاڼه یوۀ لنډ پيغام کې راغلي چې دې څانګې پرون سې شنبه افغانانو ته د بشپړو کونسلي خدمتونو د وړاندې کولو په موخه په کار پیل وکړ.
په تېر اګست میاشت کې پر افغانستان د اسلامي امارت له واکمنېدو وروسته سعودي عرب خپل ټول دیپلوماتان له افغانستانه ایستلي وو.
اوسمهال په کابل کې د پاکستان، ترکیې، چین، او روسیې په ګډون د یو شمېر هېوادو سفارتونه پرانېستي دي او يوشمير هېوادونو د خپلو سفارتونو د پرانيستلو په اړه غور پيل کړی دی.
https://wp.me/p8XUyy-ugo

امريکا: په يوه ليسه کې د وسله وال برید له امله ۹ تنو ته مرګ ژوبله اوښتې
کابل ټکی کام (چهارشنبه، ۱۰ ليندۍ، ۱۴۰۰ل)
د امریکا متحده ایالاتو په میشیګان ایالت کې د وسله وال برید له امله ۹ تنو ته مرګ ژوبله اوښتې ده.
دا بريد د میشیګان ايالت د اوکلانډ ولسوالۍ د اکسفورد په لیسه کې د يوه زده کوونکي له خوا نورو زده کوونکو ترسره شوی دی.
پوليس وايي، د همدې ليسې زده کوونکي له ځان سره د وسلې د راوړولو نه وروسته په نورو زده کوونکو ډزې وکړې چې په ترڅ کې يې ۳ تنه زده کوونکي‌ ووژل شول او ۶ تنه نور ټپيان شول.
پولیسو ویلي چې برید کوونکی يې له خپلې وسلې سره يوځای نیولی دی.
د پولیسو په وينا، په تحقیقاتو کې څرګنده شوې چې په برید کې کارول شوې وسله د برید کوونکي‌ د پلار لخوا ۴ ورځې مخکې پیرودل شوې وه.
برید کوونکی پنځلس کاله عمر لري او تر اوسه يې نه دي ويلي چې د څه هدف لپاره يې دا بريد ترسره کړی دی.
https://wp.me/p8XUyy-ugr