تفاصيل اجراءات ترخيص مزاولة المهنة و القيد في النقابة

الحمد لله اغلب الناس عدت الامتحان و اللي معداش ان شاء الله كله هيعدي في المحاولتين الجايين متقلقوش

علشان تاخد ترخيص المزاولة رسمي ده يتطلب انك تعمل الورق ده كله و تخلصه
فخد نفس عميق كده و اقرأ البوست ده
معلش البوست طويل بس كنت لازم اتكلم بالتفصيل شوية
الورق من رقم 1 لـ 12 + رقم 16 ممكن تبدأ فيه أواخر فبراير

أولا :- الورق المطلوب :
1- شهادة التخرج :
او احيانا بيتقال عليها الشهادة المؤقتة اللي هي شهادة البكالوريوس
- في اواخر الامتياز بتقدم عليها في شئون الخريجين بالكلية
- حاول تطلع بتاع خمس ست شهادات كده ؛ هتحتاج
*واحدة علشان ترخيص مزاولة المهنة
*واحدة علشان القيد في النقابة
*واحدة لاستلام التكليف
*واحدة لاستلام الزمالة (لو جالك زمالة )
*واحدة او اتنين في كشف الجيش (الذكور)
*لو حد ليه نيابة جامعة بيقدم واحدة و هو بيستلم
*و يبقي معاك واحدة او اتنين في البيت علشان لو هتقدم في حاجة تانية زي نيابات الجامعات الجديدة او المعاهد البحثية اللي بتنزل اعلانات نيابات
- ابقي اتأكد ان الشهادة مكتوب عليها تاريخ الاعتماد من مجلس الكلية و مجلس الجامعة
- بالمرة ابقي اسأل علي الشهادة الكارتون في الكلية او في الجامعة
- بالنسبة للجامعات الخاصة بيبقي فيه شهادة المعادلة من المجلس الاعلي للجامعات و دي بتاخد وقت ممكن شهر فحاول تقدم عليها بدري

2- شهادة الامتياز :
- في اواخر الامتياز بتقدم عليها في شئون الاطباء في مستشفي الجامعة اللي انت اتخرجت منها
- تخلص كل اللوج بوكات و الامضاءات و الكورسات او الدورات المطلوبة
- لو كنت واخد امتيازك بره الجامعة بيطلبوا جواب الاخلاء من المستشفي اللي كنت فيها و احيانا بيطلبوا جوابات انتظام عن كل شهر
- حاول تطلع بتاع خمس ست شهادات امتياز لانك هتقدمها تقريبا في كل الاماكن اللي هتقدم فيها شهادة التخرج
- فيه بعض الجامعات ممكن تأخر شهادة الامتياز علشان تاخدها مع شهادة امتحان المزاولة بس لسه مفيش تأكيد علي النقطة دي

3- بيان الدرجات او التقديرات :
مش هتحتاجه في استخراج مزاولة المهنة و لا في استلام التكليف
- هتقدم عليه في شئون الخريجين في الكلية و بيطلبوا صور شخصية برضو
- حاول تطلع شهادة او اتنين هتحتاجها لو ليك نيابة جامعة ؛
ولو هتقدم علي تكليف جيش او شرطة
و لو هتقدم في اعلانات نيابات الجامعات الجديدة او المعاهد البحثية
و كمان لو ناوي تقدم ماجستير (اذا كان متاح يعني) هتحتاج واحدة

4- بالنسبة للثلاث شهادات اللي فاتوا دول (التخرج - الامتياز - التقديرات)
حاول يكون عندك في البيت شهادة او اتنين احتياطي ؛
العدد اللي انا كاتبه ده الحد الادني و ممكن تحتاج اكتر من كده كمان فحاول تطلع العدد ده علي الاقل لان استخراج الشهادات دي بياخد وقت علي ما يطلع علي حسب كل جامعة و ممكن توصل احيانا اسبوعين ثلاثة ؛ فمتكسلش و تقول هبقي اطلع بعدين ؛ ممكن تتفاجئ باعلان جامعة او حاجة هتقدم فيها و انت مش معاك شهادة و علي ما تروح تطلع يكون مدة الاعلان عدت وممكن متلحقش تقدم
اينعم معظم الاعلانات بياخدوا صور بس برضو امن نفسك

5- لو انت لسه فاضلك تربية عسكرية مخلصتهاش او مواد تكميلية زي العربي و الدين لخريجي المدارس الاجنبي ؛
حاول تخلص كل ده علشان اغلب الكليات مش هتديك شهادة التخرج و لا هتبعت اسمك لوزارة الصحة علشان التكليف الا لما تخلصهم ؛
و التربية العسكرية مثلا بتبقي دورات بمواعيد و ممكن متلحقش تدخل اي دورة و تلاقي نفسك التقديم علي التكليف قرب يقفل و اسمك لسه مرحش الوزارة و تلبس في التظلمات

6- شهادة النجاح في امتحان المزاولة :
هم قالوا هيبقي فيه شهادة للنجاح في الامتحان ؛ بس الدفعة اللي قبلكم اكتفوا بس بسكرين شوت من الموقع مش عارف معاكم بقي هيطلبوا الشهادة نفسها و لا ايه خصوصا ان دفع رسوم الامتحان هتبقي مع الترخيص
لسه مش معروف الشهادة دي هتستلموها امتي ؛ و ازاي

7- البطاقة الشخصية :
- اتأكد ان البطاقة سارية لغاية شهر 8 علي الاقل ؛ لان ممكن تتأخر في استلام التكليف لاي سبب و تيجي تستلم تلاقي البطاقة خلصانة ؛ و ساعتها تيجي تجددها متلاقيش جهة تختمها لك لانك خلصت امتياز و مش علي قوة اي حاجة لسه ؛ و مش هينفع تختمها من النقابة ؛ و تقعد تدوخ علي السجل المدني تتحايل عليهم و ممكن يرضو و ممكن لا انهم يكتفوا بشهادة البكالوريوس و يكتبوا في البطاقة حاصل علي بكالوريوس الطب و الجراحة و ساعات يطلبوا ورقة الاخلاء من الامتياز و حوارات انت في غني عنها
- لو بطاقتك قربت تخلص او خلصانة الحق جددها قبل ما تخلص امتياز ؛ هات استمارة بطاقة و روح اختمها من شئون الاطباء في المستشفي هيتكتب لك فيها طبيب امتياز مستشفي كذا ؛ مش مشكلة اي حاجة المهم تكون سارية
- لو حد بطاقته مازالت سارية و مكتوب فيها طالب مفيش مشكلة برضو
- ابقي صور البطاقة عشر صور و خليها معاك

8- موضوع محل السكن في البطاقة مش هيفرق الا لو جالك ممارس عام و عايز ترجع محافظتك و عندك حاجة من التلاتة دول ؛ انما الزمالة مفيش اعتبار لمحافظة السكن هو المجموع و بس
- لو واحدة متزوجة و جالها ممارس عام محافظة غير محافظة سكن الزوجية و عايزة تتظلم و ترجع علي محافظة سكن الزوجية ممكن تثبت سكن الزوجية بالقسيمة او ببطاقة الزوج او ورقة مختومة من مكان عمل الزوج او عقد الشقة (تمليك) ؛ ويفضل انها لو كتبت الكتاب تغير بطاقتها ؛ لكن عادي حتي لو مغيرتش البطاقة الحاجات التانية دي تكفي
- لو الطبيب نفسه عنده مرض مزمن و جاله ممارس عام في محافظة غير محافظة سكنه ممكن يقدم تظلم صحي و في الحالة دي لو اتقبل تظلمه هيرجع لمحافظة سكنه.
- لو الطبيب عائل الاسرة + مرض احد الوالدين و حاله ممارس عام في محافظة غير محافظة سكنه ممكن يقدم تظلم ويرجع محافظة سكنه
الباقي بقي لو حد جاله ممارس عام محافظة بعيدة من حقه بعد سنة يعدل تكليف علي محافظة السكن

9- شهادة الميلاد:
حاول تطلع 3-4 شهادات ميلاد كمبيوتر من السجل المدني
و فيه دلوقتي في السجل المدني بالعباسية ماكينة السجل المدني بتدخل البيانات و تدفع الفلوس و تطلع لك الشهادة بدون ما تتعامل مع موظفين و شغالة 24 ساعة
و ابقي صورها عشر صور كده و خليها معاك

10- الموقف من التجنيد :
- لو انت ملكش اعفاء بتطلع حاجة اسمها " إلي من يهمه الامر "
بتاخد معاك شهادة الامتياز و التخرج و البطاقة و شهادة الميلاد (يكون فيها الرقم الثلاثي) و ممكن يحتاجوا 6 جند بس غالبا مش هتحتاجها
و تطلع علي منطقة التجنيد اللي انت تابع لها (حسب المحافظة اللي طلعت منها البطاقة الشخصية او شهادة الميلاد اول مرة ) و تقدم الورق ده صور و يبقي معاك الاصل للاطلاع هيديك ورقة مختومة بموقفك
- هتروح المشوار ده مرتين لو انت مواليد نص اول او ثلاثة مرات لو انت مواليد نص تاني ؛
- اول مرة علشان تقدم الموقف من التجنيد وانت بتعمل ترخيص مزاولة المهنة في الوزارة يعني في اول مارس كده و هيكتب لك فيها موقفك لغاية اول ابريل او اول مايو
- و تاني مرة علشان تقدم الموقف من التجنيد و انت بتستلم التكليف يعني ممكن في شهر ستة كده و هيكتب لك فيها موقفك لغاية اول سبعة
- و لو انت مواليد نص تاني (يعني من يوليو لـ ديسمبر) هتروح اول سبعة علشان يكتب لك موقف تاني لغاية اول عشرة
- لو الورقة ضاعت منك ممكن تروح تطلع موقف تاني عادي
- و لو انت ليك اعفاء و معاك شهادة الاعفاء مش هتحتاج خطاب لمن يهمه الامر و ابقي خد معاك شهادة الاعفاء و انت بتطلع الترخيص في الوزارة هيطلعوا علي الاصل و ياخدوا الصورة
و حاول تطلع شهادة اعفاء تانية احتياطي لانك هتسلم الاصل و انت بتستلم التكليف في شهر 7 ان شاء الله
و ممكن تروح شئون الاطباء في المستشفي و تعمل صورة طبق الاصل مختومة من شهادة الاعفاء

11 - الفيش :
اللي هو صحيفة الحالة الجنائية
هتروح اقرب قسم تطلع منه فيش كمبيوتر ؛ و مفروض هتحتاج اتنين
هتعمل واحد موجه لـ النقابة العامة للاطباء
و التاني مفروض يبقي موجه لمديرية الصحة اللي هتستلم التكليف فيها لكن في شهر مارس مش هتكون نتيجة التكليف ظهرت ؛ فالافضل ممكن تستني لما النتيجة تظهر و اعمله موجه لمديرية الصحة اللي ظهر لك النتيجة عليها مثلا مديرية الصحة بالقاهرة
لان صلاحية الفيش 3 شهور و ممكن تتأخر في استلام التكليف و تكون صلاحية الفيش انتهت و هتضطر تعمل واحد تاني ؛ فيبقي من الاول ريح دماغك و اعمل واحد قبل ما تطلع ترخيص المزاولة و واحد قبل ما تستلم تكليف
- لو انت ليك نيابة جامعة هتحتاج تطلع واحد موجه لمستشفيات الجامعة ؛ بس ده خليه لما يجيلك حاجة في الجامعة الاول
- و لو انت خريج جامعة خاصة ممكن تحتاج فيش موجه لوزارة الصحة علشان الترخيص
يبقي لو خريج جامعة خاصة يبقي هتحتاج اتنين فيش علشان الترخيص واحد للنقابة و واحد للوزارة

12- صور شخصية :
طلع بتاع 20 صورة شخصية هتحتاج صور كتيير

كل اللي فات ده من رقم 1 لــ 12 هتحتاجه و انت بتطلع ترخيص مزاولة المهنة و هتحتاجه و انت بتستلم تكليف
ترخيص مزاولة المهنة بيطلع في اوائل مارس تقريبا
و بالتالي ممكن تبدأ في الورق ده من نص فبراير كده
ما عدا موقف التجنيد لانه بيحتاج شهادة الامتياز ؛ فلازم تستني لما تطلع شهادة الامتياز و ده هيبقي في اخر فبراير

اما الاوراق اللي جاية دي من رقم 13 لــ 17 هتحتاجها و انت بتستلم التكليف يعني غالبا في شهر ستة مش دلوقتي
متعملش فيها اي حاجة دلوقتي و يفضل تبدأ فيها قبيل ظهور نتيجة التكليف كده ما عدا استمارة 103 حاول تخلصها من دلوقتي

13- إقرار الذمة المالية :
عبارة عن 3 ورقات كده و تقدر تجيبه من اي مكتب بريد
و علي حظكم بقي بـ 100 جنية

14- الرقم التأميني :
لو عايز تريح نفسك متعملوش دلوقتي الا لما تيجي تستلم تكليف ما عدا لو بتاخد معاش كمل قراية
- بيتعمل من مكتب التأمينات و المعاشات اللي انت تابع له او اي مكتب تقوله عايز الرقم التأميني مطبوع و يكون معاك بطاقتك و ممكن يحتاجوا شهادة الميلاد و لما تاخده صوره كذا صورة
- مش شرط يبقي موجه لحاجة بس لو سأل يعني موجه لمين اعمله موجه لمديرية المحافظة اللي ظهر لك عليها النتيجة
يعني مثلا جالك القاهرة سواء ممارس عام او زمالة يبقي تعمله موجه الي "مديرية الشئون الصحية بالقاهرة" وهكذا
او اعمله موجه لوزارة الصحة وريح دماغك
- مش شرط يبقي مختوم ختم النسر ؛ هو اكلاشية التأمينات و خلاص و لو ختمه بالنسر خير و بركة ؛ مختمش عادي برضو
- بالنسبة لصلاحيته هو في الغالب بتعدي عادي محدش بيسأل علي صلاحيته متنبهش الموظف لحاجة مش مطلوبة اصلا علشان ميتلككش
- و انت هناك هيقولك ادفع في فوري وصل بـ 15 جنية هتسأل كده جنب المكتب غالبا هتلاقي مكنة فوري قريبة
- مفروض لما بتطلعه بيبقي مكتوب فيه "لا توجد بيانات تأمينية لهذا الشخص" و قدام القطاع بيبقي فاضي
- لو بتقبض معاش ممكن تلاقيه كاتب "يرجع للتامينات و المعاشات" و قدام القطاع رقم "1"
بص هو في الغالب هيعدي سواء مكتوب فيه كده او كده يعني معظم الناس محصلش معاهم مشاكل كتير ما عدا يمكن بورسعيد الموظفة هناك اصرت علي كلمة "لا توجد بيانات تأمينية لهذا الشخص"
و لو نفترض الموظف رخم يعني و كان البرنت مكتوب فيه كده و اصر انك تغيره ممكن تروح التأمينات في الألفي في العتبة و مؤخرا يقال انه ممكن يتعمل في مكاتب التأمينات في المحافظات كمان هتطلب منهم تفرغ رقم القطاع بس يكون معاك شهادة الميلاد و قرار التكليف وقت ما يطلع يعني
او ممكن تجيب من مكتب التأمينات مفردات المعاش موضح فيها رقم الربط وجهة الصرف مطبوعة و مختومة و تحاول معاهم و انت بتستلم في المديرية

- بالنسبة للي بياخدوا معاش ، مفروض المعاش هيتقطع عنه
و بعد ما المعاش بيتقطع بيبقي فيه حاجة اسمها المنحة اللي هي تساوي نصيبك في المعاش لمدة سنة
موضوع قطع المعاش الوضع بيختلف شوية ما بين الولد و البنت

- قطع المعاش و صرف المنحة بالنسبة للبنات بيبقي عند الزواج ، اما عند التعيين لو متزوجة هيتقطع نصيبها ، و لو مش متزوجة لو نفترض نصيبها في المعاش اكبر من المرتب اللي هتاخده يبقي ممكن تقدم طلب انها تاخد الفرق هو بياخد وقت شوية بس عادي اي فلوس متأخرة هتاخديها بأثر رجعي ، اما لو نصيبها في المعاش يساوي او يقل عن المرتب اللي هتاخده يبقي هيتقطع المعاش عنها

- اما بالنسبة للولاد بيبقي عند سن 26 سنة او التعيين ايهما اقرب
لو انت ولد و كملت 26 سنة كده كده هيتقطع المعاش لوحده و لو ساعتها كان لسه قرار التعيين مطلعش روح قدم علي المنحة
لو انت ولد و مكملتش 26 سنة يبقي هيتقطع المعاش بسبب التعيين بتاخد قرار التكليف او بيان حالة وظيفية او اقرار استلام عمل من مكان عملك اي حاجة تثبت انك اتعينت يعني و تروح لهم في التأمينات و الموضوع بياخد حوالي شهرعلي ما المنحة تنزلك

- بعد ما بيتقطع نصيبك في المعاش و كان ليك اخوات في المعاش لسه فكده الجزء اللي اتقطع منك بيرجع لهم تاني

- المشكلة هنا في ايه بقي انهم بيعتبروا ان تاريخ التعيين هو تاريخ بداية الامتياز علي اساس انك كنت بتقبض في امتياز و بتاخد فلوس و بيتخصم منها تأمينات ، فهنا بقي لو انت رحت لهم في اخر الامتياز او في اول التكليف
لو ليك اخوات تانيين في المعاش يبقي مش هتدفع حاجة و مش هيتخصم من المنحة حاجة ، اما لو انت اخر ولد في المعاش يبقي ساعتها لو (ولد او بنت متزوجة او بنت غير متزوجة و نصيبها في المعاش يساوي او اقل من مكافأة الامتياز ) ساعتها هيخصموا من المنحة الفلوس اللي خدتها ضمن المعاش طول فترة الامتياز و ساعتها ممكن يحتاجوا مفردات مرتب الامتياز علشان يعرفوا المبلغ بالضبط
اما لو بنت مش متزوجة و نصيبها في المعاش اكبر من مكافأة الامتياز يبقي هيحسبوا لها الفرق ما بين نصيبها في المعاش و مكافأة الامتياز

15- استمارة 111 الكشف الطبي :
- من اي مستشفي تأمين صحي كبيرة في محافظتك
مثلا في القاهرة ممكن تطلعها من اللجنة الطبية اللي عند صيدلية الاسعاف
في الجيزة ممكن من اللجنة الطبية اللي في شارع مدكور قدام موقف بولاق او فرع هيئة التأمين الصحي اللي في الهرم
او اي مستشفي تأمين صحي مش شرط الاماكن دي
- دي مش هتتاجها دلوقتي دي لما تيجي تستلم التكليف بعد صدور قرار التعيين يعني في شهر ستة كده ؛ بتروح المديرية المُكلف عليها تمضيها وتختمها وبعدين تروح بيها لأقرب مستشفى تأمين جنب مديريه التكليف تكشف وترجع المديرية تخلص ورقك
- الاستمارة بـ 15 جنية

16- استمارة 103 :
- دي بخصوص ضم سنة الامتياز لسنين الخبرة
و تخلصها من مستشفي الجامعة بعد ما تخلص سنة الامتياز
هتلاقيها في الصور هنا في البوست ممكن تطبعها او هتلاقيها في مستشفي الجامعة
ده لينك تحملها منه
https://drive.google.com/file/d/1feHV1qggAR1DoxfHLlbWGP6TV2s9GsVr/view?usp=sharing

- هتملاها كالاتي :
- الاسم
- الوظيفة الحالية = طبيب
- الجهة = حكومية
- الوظيفة = طبيب امتياز بشري
- دائم او مؤقت = مؤقت
- التاريخ = تاريخ بداية و نهاية الامتياز
- الماهية الشهرية
- سبب ترك الخدمة = انتهاء سنة الامتياز
- بعد كده تمضيها من اتنين نواب بالمستشفي و تختمها من شئون الاطباء ، لو ملقتش نواب مش مهم المهم انها تكون مختومة
- بعض الجامعات بيرخموا في امضاء استمارة 103 ؛ مش مشكلة ممكن تقدمها فاضية للمدريات
- ابتداءا من تكليف 2018 حصل مشكلة علي ضم سنة الامتيازو معظم المديريات مبقتش تضمها ؛
بس في كل الاحوال اطبعها و سلمها مع الورق برضو

17- استمارة 105 :
دي بخصوص المعاشات ؛ هتلاقيها هنا في الصور في البوست اطبعها و سلمها فاضية للمديرية برضو
ده لينك تحملها منه
https://drive.google.com/file/d/1feHV1qggAR1DoxfHLlbWGP6TV2s9GsVr/view?usp=sharing

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثانيا :- اجراءات القيد في النقابة و استخراج ترخيص مزاولة المهنة :
هتبدأ في الاجراءات دي بعد ما تكون جهزت الورق اللي انا اتكلمت عليه من رقم 1 لـ 12

18- انت عندك حاجتين
قيد بالنقابة + ترخيص مزاولة من الوزارة
اللي حصل السنة اللي فاتت انه الناس قدمت ورقها في النقابة اول مارس عادي بس الترخيص اتأخروا علشان كانوا بيقولوا هيعملوها منظومة الكترونية ، المهم انه بعد التأخير اكتر من شهر و نص الناس استخرجت الترخيص ورقي برضو
مش عارفين السنة دي ايه اللي هيحصل
لكن دي الخطوات لو الموضوع هيمشي ورقي زي السنين اللي فاتت

19- الاجراءات دي مش هتبدأ فيها الا لما تخلص امتياز رسمي و تاخد شهادة الامتياز يعني مع بداية شهر مارس
- التسجيل فى النقابة بيبدأ من أول مارس فى النقابة العامة أو النقابات الفرعية
- التسجيل دا بيبقى تسجيل مؤقت فى النقابة العامة لحد لحين استلامك العمل فى المديرية ، ساعتها بتروح تجدد الكارنية فى النقابة الفرعية التابعة لمديرية تكليفك

20- بالنسبة لموضوع امتحان مزاولة المهنة ؛ الدفعة اللي قبلكم اكتفوا بس بسكرين شوت من الموقع مش عارف معاكم بقي هيطلبوا الشهادة نفسها و لا ايه خصوصا انهم قالوا ان دفع رسوم الامتحان هتبقي مع الترخيص
لسه مش معروف الشهادة دي هتستلموها امتي ؛ و ازاي

21- انا هقول الخطوات لو حد راح يعمله بنفسه في القاهرة ، و في النقابة بيبقي مندوب من الوزارة و بتستلم الترخيص في نفس اليوم من مكان واحد اللي هو النقابة العامة بالقاهرة
و غالبا النقابة بينزلوا جدول كده محدد فيه ايام معينة لكل جامعة من جامعات القاهرة اللي هي القصر و عين شمس و الازهر،
لكن لو حد من جامعات بره القاهرة ممكن يروح النقابة العامة بس بعد الايام المحددة للجامعات اللي في القاهرة
او لو مش عايز تروح القاهرة ممكن تقدم في النقابة الفرعية بمحافظتك بنفس الورق برضو و هم هيبعتوا الورق للقاهرة و يسلموك الترخيص و الكارنية بعد كام يوم بس التكلفة هتبقي اكتر شوية
كل محافظة بيبقي فيها نقابة فرعية هتروح هناك تسألهم و هم هيخلصوا لك الورق
اللينك ده فيه عنوانين النقابات الفرعية بالمحافظات

https://www.ems.org.eg/ar/sub-syndicates

22- فى النقابة العامة بتروح السجلات تشترى عدد 2 ملف فيهم ورق وشوية دمغة ب 40 جنية
مقر النقابة العامة للاطباء - شارع القصر العيني قريب من القصر الفرنساوي
بتنزل محطة مترو السيدة زينب و تخرج تتمشي شوية

23 - الملف الاول اللي هو " القيد في النقابة " لونه اصفر
هتملأ البيانات و هتجهز فيه الورق ده و هتقدمه و هتدفع الرسوم في الخزنة 530 جنية و تاخد ايصال و احيانا بيخلوا الـ 40 جنية مع 530 و تدفع الوصل بـ 570 مرة واحدة
ده الورق اللي مفروض يبقي في الملف الاول
- طلب قيد بالجدول العام (موجود جاهز بالملف)
- شهادة التخرج أصل
- شهادة الامتياز أصل
- فيش موجه للنقابة
- صورة البطاقة
- صورة شهادة الميلاد
- 2 صورة شخصية

24 - الملف التاني اللي هو " ترخيص مزاولة المهنة " لونه ازرق هتجهز فيه الورق ده
- طلب استخراج مزاولة المهنة (موجود جاهز بالملف)
- ايصال سداد رسوم القيد بالنقابة
- شهادة التخرج أصل

- شهادة الامتياز أصل
- صورة البطاقة
- صورة شهادة الميلاد
- 2 صورة شخصية
- ما يثبت النجاح في امتحان المزاولة (سكرين شوت من نتيجة الامتحان)
- شهادة المعاملة العسكرية (الموقف من التجنيد) أو صورة من شهاده الاعفاء مع الاطلاع علي الاصل
- هتدفع ايصالين واحد بـ 150 + واحد بـ 151
ده هو رسوم امتحان المزاولة + رسوم الترخيص

25- هتستني شوية كده في القاعة لغاية ما ينادوا علي الاسامي و هتستلم الترخيص ،
بالنسبة لكارنية النقابة وارد يسلموه في نفس اليوم و وارد يتأخر شوية لسه هنشوف هيحصل ايه
الترخيص اللي هتستلمه هو ورقة زرقاء كده هتاخد نسختين اصل
و هتلاقي مكتوب فيه انه صالح لمدة خمس سنين من تاريخ صدوره هتلاقيه كاتب تاريخ الإنتهاء

26 - لو انت رحت متأخر في شهر ابريل او مايو و كان مندوب الوزارة مش موجود يبقي بعد ما تخلص في النقابة هتطلع علي وزارة الصحة - ادارة التراخيص - شارع الفلكي - محطة مترو سعد زغلول - بجوار مجلس الشعب
مسافة مش كبيرة من النقابة ممكن تاخد تاكسي علشان تنجز
و هتقدم هناك الملف التاني اللي هو " ترخيص مزاولة المهنة " و تدفع رسوم في الخزنة ايصالين 150 + 151 جنية و تنزل تستني تحت لغاية ما ينادوا علي الاسماء علي الساعة 2 كده ، هيسلمك 3 نسخ ترخيص مزاولة المهنة
هترجع علي النقابة تاني و تسلمهم نسخة من ترخيص مزاولة المهنة علشان الكارنية

27- حاول تروح النقابة بدري قبل الساعة 10 علشان الزحمة
و متقلقش من ترتيب الاوراق و لخبطتها ؛ هتلاقي زملاء هناك كتير و الموظفين هيساعدوك
و لو كان الموظف مش موجود و هتروح الوزارة يبقي قبل الساعة واحدة علشان خزنة الوزارة بتقفل الساعة 1

28- ينفع أى حد بتوكيل رسمى يقدر يخلص اجراءات النقابة والوزارة لحد تانى
و غالبا الزوج يقدر يخلص الورق لزوجته بس البطاقة يكون فيها متزوجة من فلان او يجيب القسيمة معاه

29- لو انت مش عايز تعمل خطوات القيد في النقابة و ترخيص المزاولة في اول مارس ممكن تتأخر عادي ؛ بس طبعا قبل ما تستلم التكليف لازم تكون مخلص الاجراءات دي

30- لو عايز تستفسر عن اي حاجة دي ارقام النقابة
(27943812 - 27923672 - 27940738 - 27923682 )
محمول 01001676081

31- بالنسبة لاستلام التكليف ؛ ده هيبقي بعد ظهور نتيجة التكليف و صدور قرار التعيين ؛ غالبا في شهر ستة - سبعة كده بس تبقي ساعتها مجهز الورق اللي انا اتكلمت عليه من رقم 1 لـ 17

32- خلي معاك دايما فلوس بزيادة و كمان صور شخصية بزيادة
- بعض الاوراق بتختلف من جامعة للتانية في العدد و التكلفة المادية
- صور دايما اي ورقة او مستند حكومي قبل تسليمه
- حاول تطول بالك و تظبط مودك لانك هتتعامل مع كمية موظفين و روتين هتخليك تكره نفسك

33- اجمالي التكلفة :
- بالنسبة للترخيص و قيد النقابة لو هتعملها من القاهرة يبقي = 871 جنية
اما لو هتعملها من النقابة الفرعية يبقي ممكن توصل ألف او اكتر

- شهادات التخرج و الامتيازتكلفتها متفاوتة ما بين جامعة و التانية ، فيه جامعات عادي 200 - 300 و فيه بيوصل لـ 700 - 800 و علي حسب هتخرج كام شهادة

- الفيش + شهادة الميلاد + لو هتجدد بطاقة + صور شخصية

يعني دلوقتي في استخراج الترخيص ممكن التكلفة في حدود ألفين - ألفين و نص

ساعة استلام التكليف بقي هتحتاج استمارة 111 + الكشف الطبي + اقرار الذمة المالية + الرقم التأميني + فيش تاني ساعتها + مصاريف الزمالة لو جالك زمالة
كده ممكن تزود بتاع ألف و نص

طبعا ده غير مواصلات و اكل و شرب

34- بالنسبة للتكليف و الزمالة و القصص دي لسه اعلانكم بينزل في شهر 3
ممكن تشوف البوست ده كده فيه كل ما يخص النظام الجديد
https://www.facebook.com/groups/420522365698962/posts/444464306638101/

الصور دي كان عاملها د كريم مدحت الله يكرمه دفعة 2013
عبارة عن ملخص سريع للخطوات
اخر صورتين هتلاقي استمارة 103 و 105
و ده لينك تحملهم منها
https://drive.google.com/file/d/1feHV1qggAR1DoxfHLlbWGP6TV2s9GsVr/view?usp=sharing

اي حد بيفكر في تكليف الجيش يشوف الفيديو دا الاول من زميلنا د.احمد صفوت
https://youtu.be/0EUG8ekRung

شباب اي حد يجيله رسالة زي دي ميتواصلش معاها، الهيئات الرسمية مش بتطلع في شكل ارقام. و حتى لو في شكل رقم محدش يشارك اي معلومات عن البطاقات البنكية بتاعته الا في فرع رسمي للبنك دا (حتى البريد) مش على الموبايل

مساء الخير يا شباب،
أنا فرح صفوت دفعتكم وInstructor & Coordinator of the Surgical Skill Lab السنادي. لو فاكرين، ده نفس الحاجة اللي اتدرستلنا واحنا في round الجراحة في سنة ساتة وكان عليها خمس درجات، واللي الدفعة اللي أكبر مننا سلمتهالنا في بداية السنادي مع الامتياز وبعد حبة application process وinterviews كتير، بقينا أنا و٥٩ شخص تانيين معايا بندرسه للدفعات الأصغر.

المهم، احنا عادةً الSkill Lab مش بيتفتحله recruitment غير كل سنة مرة وقت تسليم الامتياز من دفعة للتانية؛ بس صراحةً أنا حسيت إنه السنادي تستاهل إنه نفتح الباب ده بدري شوية على آخر شهرين لعدة أسباب:
- في ناس كتير وقت ما post منة عياد (coordinator السنة اللي فاتت) نزل بعد امتحانات الfinals بتاعتنا، مشافوش الpost أصلاً وعرفوا عنه بعد ما الinterviews كانت خلصت واختاروا الناس. وكان نفسهم إنهم يشاركوا في حاجة زي كده بس كان عدى معاد الدخول للأسف.
- في ناس كانت دور تاني، ف منفعش إنهم يقدموا لإن كان لسه قصادهم كام شهر كمان على سنة ساتة والfinals بتاعتها، ف بردو فاتهم مرحلة الinterviews ديه.
- السبب التالت وهو السبب الأساسي اللي فتحنا باب التقديم علشانه دلوقتي، إنه احنا فعلاً بندرس دفعات كتير، وflow طلبة مهول. أحياناً يوازي flow المرضى على القصر العيني واللي احنا بردو بنستقبلهم وبنعملهم شغل كامتياز.

حالياً احنا بندرس سنة أولى، وتانية، وتالتة، وخامسة، وساتة. مش كلهم في نفس الوقت الحمدلله، بس بيعدي أسابيع ساعات بيكون التدريس لدفعتين وتلاتة في نفس الوقت؛ مع العلم إن أعداد أولى وتانية بقوا ضعف عدد الدفعة العادية على أيامنا (وأكتر، around 3000 students).
ف علشان كل الأسباب ديه، أنا فكرت إنها هتكون win-win situation نفتح التقديم دلوقتي: منه الناس اللي كانت عايزة تدخل يبقوا أخدوا فرصة لده وهما فاتحين social media ومش قافلين كله زي بعد فترة الامتحانات، ومنه الteam الحالي الموجود يتشال من عليه الload شوية. لإن هما team حقيقي أبطال، ودرسوا عدد ساعات وdifferent kinds of topics لسنين وأعداد مختلفة، بلا مقابل على ده ولا شيفتات امتياز بتتلغي من عليهم.

ف آخر حاجة، عشان أسيبلكوا link التقديم ومضيعش من وقتكو كتير:
عدد الساعات المتوقعة من الnew instructors هتكون من ١٣ ل٣٠ ساعة على مدار الشهرين الجايين بحالهم. ف around ٦.٥-١٥ ساعة في الشهر.
مقابل ده، هيكون ليكم شهادة من قسم الجراحة بتقول إنكم درّستم كل الدفعات ديه، وإنكم عملتوا ده كعمل تطوعي وتدريسي منكم وإنكو كنتم very committed وdedicated له.

أي حد هيدخل يا شباب فعلاً لازم يكون committed وميكونش ده كلام على ورق وخلاص، وأما يبقى فيه مواعيد تدريس، لازم تبقى filled ومنحتاجش نطلع بأي أعذار أو حجج مختلفة كل مرة.

ده مش رخامةً من حد، احنا زمايل ودفعة واحدة كده كده، بس لإنه اللي هيدخل هياخد نفس الشهادة اللي غيره هياخدها وهو أو هي كانوا بيدرسوا على مدار كل الشهور اللي فاتوا. ف هيكون أغلب الشغل على الناس اللي هتدخل جديد، وهتبقى وظيفة الinstructors الحاليين يعملوا training للجداد وبس يبقوا موجودين to guide في أول فترة كده، وأكيد هيشيلوا معاهم شغل بردو.

You’ll find the application link below:
https://docs.google.com/forms/d/e/1FAIpQLSfv1kkwwixw7EGSY-GpbMv6HJmCpjE9_PVcNWICHWXU8DfZPw/viewform

التقديم هيفضل مفتوح ٤ أيام يا شباب بالظبط، من الليلة إلى آخر ٤/١ بالليل (١٢ بالظبط).
الinterviews هتبدأ بعدها من آخر الاسبوع ده لحد نص الاسبوع اللي بعده، بحيث تبدأوا تدريس معانا على طول، بالكتير من أول الاسبوع التالت من شهر يناير إن شاء الله 🙂

I look forward جداً إنني أشتغل أنا والناس اللي موجودين حالياً مع اللي لسه هي-join us جديد.
تجربة التدريس حاجة مثمرة جداً يا جماعة وإنكم تفيدوا حد وتنقلوله علم عندكو، ديه حاجة بالدنيا، بالذات أما يبقى في talent وdedication للموضوع ده.
وأنا عارفة إن احنا خلاص بنفنش الامتياز وأغلبنا تعب، بس هتبقى حاجة لطيفة جداً إنه نختمها بحاجة زي كده لو مكنتشوش joined من الأول وحاسين إن موهبة التدريس والالتزام بيه موجودة عندكو.
وهتكون طبعاً بشهادة موثقة من قسم الجراحة زيكو زي اللي موجودين حالياً في الSkill Lab.

كل سنة وانتو طيبين، وسنة جديدة ولطيفة علينا كلنا إن شاء الله 😌♥️✨

إعلان حركة التكليف الإلزامي للأطباء الخريجين دفعة ديسمبر ٢١ اللي هيخلصوا امتيازهم في فبراير الجاي (اللي هو الدور الأول بتاعنا) نزل يا جماعة
..
تسجيل بياناتك لمعرفة رقم الخريج بتاعك المطلوب لتسجيل الرغبات هيبدأ من الأحد ١٥ يناير بعد بكرا و حتى آخر الشهر و الرغبات هتبدأ في فبراير

https://www.facebook.com/groups/286723126845889/permalink/553584186826447/?mibextid=Nif5oz
..
دا لينك الجروب الرسمي لأطباء التكليف لدفعتنا ٢٠٢٣ اللي عليه د.أحمد صفوت و د.محمد شرف من النقابة، بيتابعوا كل سنة مع الامتياز في حوارات التكليف و ما يتبعها و بيشرحوا كل حاجة بضمير بأمانة يا ريت كل الناس تخش هنا

هو اولا متقلقوش اكيد بعد تسجيل البيانات هنزلكم فيديو تفصيلي قبل الرغبات ف قبل يوم ٥/٢
وعد اكون شارح كل حاجه
(عشان مشغول سيكا اليومين دول) فبلاش نبانيك بس كل يوم او يومين هنزلكم بوست
وبعد تسجيل البيانات هشرح بالتفصيل الممل
.
.
اهم حاجه دلوقتي البيانات بتاعتنا
وهسجل ايه
١-المكان المتاح ليك هيكون ايه ؟؟
أ-محافظه السكن(اللي هيا متسجله عند الكليه ..طب لو انا غيرت بطاقتي هروح اعدل بياناتي ف الوزاره لو حابب تعدل محل السكن عايزه زي ماهو خلاص سيبه زي ماهو)
ب-او محافظه التخرج (الكليه)
ج-او اي مكان نائي تختاره ومجموعك يجيبه
٢-النائي عباره عن ايه ولمين ؟
النائي قلنا نائي اداري ونائي حدودي
رأي الشخصي اللي ياخد نائي اداري ده يكون حد ساكن ف منطقه نائي اداري
قررت تاخد نائي يبقى روح نائي حدودي
٣-انا ساكن ف جنوب سينا كدا انا هستفاد ؟؟
اه
انت محل سكنك ف جنوب سينا
ليك تختار القاهره عشان خريح القصر العيني
او تختار جنوب سينا
طب لو انا اخترت جنوب سينا هاخد مميزات النائي وهيا محل سكني ؟؟
اه هتبقى جنب بيتك وتاخد مميزات النائي زيك زي اللي جاي من اسكندريه
٤-هل بلبس ف مكان التكليف باقي عمري ؟؟
اه ومش اه
بمعنى مكان التكليف هو نقطه العوده بالنسبه ليك
بمعنى انا ماضي اخدت تكليفي ف الغربيه محافظه السكن واخدت نيابه تعليمي ٥ سنين وخلصتها
بعد ال٥ سنين هرجع ع الغربيه واشتغل ف تخصصي ف الغربيه
ملهاش حل ؟
اه ليها حل بعد ماتعدي سنه هتطلب تعديل محافظه التكليف
ساعتها لما اخلص نيابه التعليمي هرجع اتوزع ع تكليف ف القاهره واشتغل اخصائي بتخصصي ف مستشفى ف القاهره تابعه لوزاره الصحه
ايه مش خاضع للتوزيع الجغرافي ؟؟
النائي بس
يعني المركزي والجهات الخارجيه كلها لازم تملاها بترتيب النطاقات الجغرافيه
#التكليف_وسنينه

بأذن الله لو تسجيل البيانات فتح بكره , هنمشي زي الخطوات اللي في الفيديو ده بالظبط باختلاف بس التواريخ , الفيديو ده كان للدفعه اللي قبلكم و هي هي نفس خطوات التسجيل , عموما اي مشكله ف التسجيل متقلقش هتتحل و اللي مش هيلحق يسجل بيانات في الاسبوعين الخاصيين بتسجيل البيانات هيقدر يسجل بياناته وقت تسجيل الرغبات عادي باذن الله

https://youtu.be/m-az756YRFc

تسجيل البيانات فتح على الموقع
..
يا ريت محدش يدخل اي حاجة و خلاص و يبقى متأكد من كل كلمة بيدخلها... المتلخبط يشوف فيديو صفوت الاول
http://mhealthatb.cu.edu.eg/

موقع تسجيل البيانات فتح لدفعة تكليف مارس 2023
براحة كده و محدش يتخض
انت عندك التكليف بيبقي علي مرحلتين
الاولي هي دي تسجيل البيانات و التانية تسجيل الرغبات
1- تسجيل البيانات غير تسجيل الرغبات
تسجيل البيانات ده انك تسجل الاسم والمجموع و العنوان ...الخ
ملوش علاقة بالاستلام ده مجرد تسجيل بيانات
و كمان ملوش علاقة انت خلصت امتياز و لا لا و لا خدت ترخيص مزاولة و لا لا ، انت هتخش تسجل مش هتاخد معاك خمس دقايق
2- طيب لازم اسجل بيانات دلوقتي
لا مش شرط ، ممكن تسجل دلوقتي و ممكن تسجل البيانات مع الرغبات لما تنزل ان شاء الله
لو مش ناوي تسجل دلوقتي بس اتاكد ان اسمك موجود علي الموقع
3- اما تسجيل الرغبات اللي هو توزيع التكليف علي المحافظات و كده بس بيبقي ممارس عام بدون تخصص
و ده لسه هيفتح بعد ما تخلصوا تسجيل بيانات
4- طيب كده الاستلام علي امتي
بص هي المواعيد مش بتبقي شارب كده و كل مرحلة بتلاقيها مطت بزيادة بس الملاحظ السنة دي ان الدنيا ممكن تمشي اسرع فخلينا نقول انه ممكن علي نص ابريل او اول مايو يعني ممكن قبل عيد الفطر بحاجة بسيطة او بعد العيد مباشرة و ده الاحتمال الاكبر
5- تسجيل البيانات اوله النهارده و هيقفل يوم 29/1
و تسجيل البيانات هيفتح تاني مع تسجيل الرغبات ان شاء الله يوم 5 فبراير ان شاء الله
فاللي مش هيلحق يسجل بيانات دلوقتي ؛ يبقي يسجل بيانات مع تسجيل الرغبات
6- لو حد بيسأل : لو مسجلش بيانات ايه اللي هيحصل
لما تفتح الرغبات هيبقي متاح تسجل بيانات ساعتها تاني ان شاء الله
لو نفترض حد من دفعة ديسمبر 2021 و مقدمش في الحركة دي و عايز يقدم في الحركة الجاية يبقي ممكن يقدم لما الحركة التكميلية في شهر 11 تفتح ان شاء الله ساعتها ممكن يقدم عادي
7- ده لينك التسجيل و لو هتسجل علي الموبايل انسخ اللينك و افتحه في متصفح منفصل غير الفيسبوك
http://mhealthatb.cu.edu.eg/
- اول حاجة هتلاقي مكتوب علي اليمين " الجامعة " تختار جامعتك و بعد ما الصفحة تحمل هتختار اسمك من خانة " الاسم " اللي علي الشمال
8- اتأكد ان اسمك مفيهوش اي غلط و زي اللي في البطاقة بالضبط
لو فيه غلط ؛ كده هتضطر تروح لهم او حد يروح لهم بأصل و صورة البطاقة علشان يصلح الاسم
عنوان ادارة التكليف محطة مترو سعد زغلول تخرج شارع الفلكي تتمشي شوية هتلاقيها جنب مبني الوزارة
9- لو انت ازهر ممكن تلاقي خانة تختار منها محافظة المعهد الازهري اللي خدت منه الثانوية ؛ بس عادي ممكن متظهرش مفيش مشكلة
10- المجموع التراكمي :
هتكتب المجموع التراكمي بالدرجات زي اللي في شهادة التخرج بالضبط و لو فيه كسور اكتبها برضو بس اتأكد انك كاتبها صح و الارقام بالانجليزي
لو فيه كسور في المجموع
بتحط نقطة ( . ) و لو الموقع مقبلش حط العلامة دي ( , )
ماتعملش مسافات ولو في كسر نص درجة تكتبها ,5 او .5
مثال 5753,5 او 5753.5
لو المجموع فيه غلط و لسه الموقع مش قابه شوف رقم 34
جامعة الازهر شوف رقم 32
جامعة ماست شوف رقم 33
11- رقم الخريج اللي مكتوب بالاحمر ده هيظهر اول ما تختار اسمك و ده مختلف لكل خريج عن الاخر و احفظه عندك في اي ورقة علشان هتحتاجه في تسجيل الرغبات و لو ضاع منك متقلقش هتقدر تجيبه تاني وقت تسجيل الرغبات بيبقي حاطين لينك كده
12- الحالة الاجتماعية:
لو متزوجة هتكتب رقم و تاريخ القيد بسجل الاحوال المدنية اللي في قسيمة الزواج هتلاقيهم في القسيمة فوق في نص الصفحة
و لو مطلقة هتكتب نفس الكلام رقم و تاريخ القيد اللي في قسمية الطلاق
13- تاريخ الميلاد و محافظة الميلاد
لو بره مصر اختار اخري
14- محافظة السكن و العنوان :
الموقع بيبقي متسجل عليها محافظة السكن اللي كانت في ملفك اللي عند الجامعة اللي انت اتخرجت منها و الجامعة بتبعته للوزارة
لو انت غيرت محافظة السكن و مكنتش غيرتها في الجامعة و عايز تغيرها علي الموقع ، يبقي هتروح لادارة التكليف بالوزارة و يبقي البطاقة الشخصية متسجل فيها محافظة السكن الجديدة و تقدم عندهم طلب تغيير محافظة السكن هناك في الوزارة
و شوف رقم تحت 27 علشان تعرف هل انت محتاج تغير و لا مش فارقة
15- تاريخ نهاية فترة الامتياز
اكتب التاريخ المتوقع تخلص فيه المعتاد انه كله بيخلص 28/2/2023 الا لو مأجل او هتعيد كام راوند هتكتب التاريخ اللي متوقع تخلص فيه
16 - الرقم القومي :
الافضل تكتبه في نوت او ملف تكست و تنسخه و بيست في الموقع
هتكتبه كامل بالارقم الانجليزي من الشمال لليمين
و اتأكد انك كتبته صح
و اتأكد انه مطابق لتاريخ الميلاد اللي انت كاتبه فوق
لو مظبطش معاك حاول تسجل علي متصفح تاني او علي الكمبيوتر
لو مظبطش شوف رقم 26

17- اسم الوالدة الرباعي :
هتكتبه زي اللي في شهادة ميلادك بالضبط او في بطاقتها
هم عاملين الخطوة دي زيادة امان علشان محدش هيعرف اسم الام رباعي الا الشخص نفسه
18- الهاتف : التليفون الارضي لو مفيش ممكن تكتب المحمول عادي
19- المحمول : الموبايل
20- بعد كده تدوس حفظ و هيظهر لك تم الحفظ بنجاح و يمكنك تسجيل الرغبات وقت فتح التسجيل
21- بعد كده لو عايز تعدل حاجة في البيانات اللي انت سجلتها ؛ ممكن تعدلها ؛ ممكن تدخل علي الموقع تاني كأنك بتسجل من الاول و تختار الجامعة و الاسم و تملأ البيانات و تدوس حفظ هيظهرلك تم تعديل البيانات بنجاح
22- عنوان ادارة التكليف محطة مترو سعد زغلول تخرج شارع الفلكي تتمشي شوية هتلاقيها جنب مبني الوزارة

شوية ملاحظات :
23- لو اسمك مش موجود:
احيانا بيبقي اسماء ناقصة من بعض الجامعات و بيضيفوها بالتتابع ان شاء الله
لكن لو حد كل جامعته اساميها نازلة و هو اسمه مش موجود يبقي الكلية مبعتتش الاسم للوزارة ، ممكن بسبب ان لسه عليك تربية عسكرية او مواد تكميلية عربي او دين لخريجي المدارس الاجنبي او اي سبب تاني
هتستني كام يوم يمكن يضيفوا الاسماء الناقصة
لو مضافوش يبقي هتروح الوزارة - ادارة التكليف بنفسك
و يكون معاك
شهادة التخرج
صورة بطاقة
تقدم طلب ادارج اسم هتلاقي صيغته متعلقة هناك
و تستني يومين كده هتلاقي الاسم نزل
عنوان ادارة التكليف محطة مترو سعد زغلول تخرج شارع الفلكي تتمشي شوية هتلاقيها جنب مبني الوزارة
24- طيب لو هيخلص امتياز متأخر عن تاريخ 28 فبراير 2023
لو متأخر شهرين تلاتة سجل عادي التاريخ اللي متوقع تخلص فيه و اللي حصل مع الدفعة اللي فاتت انه اللي كان فاضل له شوية و يخلص امتياز قدم عادي و كده كده علي ما يجي ميعاد الاستلام هتكون بقينا في مايو فساعتها هتكون خلصت او قربت تخلص امتياز
25- لو حد من الدفعة التكميلية اللي فاتت و خلص امتياز في شهر سبتمبر 2022 و لسه متكلفش يعني مظهرش ليه نتيجة في التكليف ، يبقي ممكن تقدم مع الدفعة الاساسية دلوقتي ، بس مش هتلاقي اسمك علي الموقع و هتحتاج تعمل ادراج اسم في الوزارة زي الل فوق كده بس هيبقي معاه زيادة شهادة الامتياز
26- لو ظهر لك خطأ في الرقم القومي او فيه خطأ في اسمك علي الموقع او فيه خطأ في محافظة السكن يبقي هتروح الوزارة - ادارة التكليف و تقدم طلب تعديل بيانات هناك و يكون معاك شهادة التخرج احتياطي
27- هل العنوان هيفرق في التنسيق
لو هتسجل مركزي مفروض بيبقي فيه خيارين يا اما تسجل حسب محافظة السكن يا اما محافظة الجامعة
و سواء كده او كده بيبقي فيه نطاقات جغرافية بيفرضها عليك لازم تكتبها بالترتيب و بتبقي علي حسب المحافظة اللي سجلتها
زي مثلا الجيزة لازم بعدها الفيوم و هكذا
الشرقية و الاسماعيلية لازم يكتبوا شمال سيناء بدري شوية و هكذا
اما لو هتسجل نائي يبقي مش هتلتزم بالنطاقات و تقدر ترتبهم براحتك
و في النهاية سواء مركزي او نائي كده كده انت لازم تكتب كل الرغبات في كل المحافظات و هيتم تنسيق بالمجموع و الاحتياجات و الرغبات لكل واحد و بالتالي مش معني انك سكنك محافظة كذا انه هيجيلك عليها التكليف لا مش شرط
يبقي فايدة محافظة السكن هنا هو بس لو هتسجل مركزي انه هيفتح لك النطاقات الاقرب فالابعد فانت هتكتبها بدري شوية في الرغبات بس دي مش هتحس بفايدتها الا لو مجموعك عالي لانك كده هتكتب كل المحافظات من اسكندرية لاسوان الفكرة في الترتيب ها
الفايدة التانية في التظلمات زي ما في النقطة اللي جاية
28- طيب افرض جالي محافظة بعيدة و عايز ارجع محافظة السكن
دي بنود التظلمات اللي نزلت للدفعة اللي فاتت
- البنات
- المتزوجات
- عائل اسرة
- حالة صحية للطبيب
- اماكن شاغرة
لو منطبق عليك بند منهم يبقي لما تتقبل في التظلمات هيرجعك لمحافظة السكن اللي متسجلة في الموقع
و بالتالي لو انت منطبق عليك بند منهم و انت غيرت محافظة السكن الفعلية و عايز ترجع علي المحافظة الجديدة ، كده ممكن تبقي تحاول تغير محافظة السكن في الوزارة و ده بيبقي متاح اثناء الحركة او في التظلمات ان شاء الله
29- طيب انا متزوجة اكتب اي عنوان
الموقع دلوقتي هيبقي فاتح لك محافظة السكن اللي كانت متسجلة في الجامعة و انتي طالبة ، لو انتي اتجوزتي في نفس المحافظة يبقي مش محتاجه تغيري محافظة السكن في الوزارة ، اما لو غيرتي المحافظة يبقي هتحتاجي تروحي الوزارة تقدمي القسيمة و بطاقة الزوج علشان تثبتي المحافظة الجديدة
و كده كده لو مجموعك مجابش المحافظة من الاول ممكن ترجعي عليها في التظلمات ان شاء الله
بس طبعا الرجوع في التظلمات علي محافظة سكن الزوجية انما التوزيع جوه المحافظة ده علي حسب نظامهم و احتياجهم يعني ممكن تتوزعي علي اي مركز في المحافظة مش شرط جنب البيت

30- طيب المتزوجات يودوا اي ورق للوزارة دلوقتي
اللي حصل في الحركة الاساسية ان اللي غيرت محافظة السكن عن اللي متسجلة علي الموقع بس هي اللي تودي القسيمة الوزارة
(غيرت محافظة ها مش غيرت عنوان داخل نفس المحافظة)
31- لو بنت لسه هتكتب الكتاب قريب يعني
اللي حصل في الحركة الاساسية انه مكنش فيه فرق في الحركة نفسها و لا التظلمات بين متزوجة و غير متزوجة ، في التظلمات الكل رجع لمحافظة السكن بتظلم الكتروني و مكنش فيه ميزة زيادة للمتزوجة ، فلو مستبعدة المشوار و مش عايزه تودي القسيمة خلاص مش مشكلة الا في حالة واحدة زي ما قلت فوق لو غيرتي محافظة سكن الزوجية كده لازم تروحي الوزارة بالقسيمة و بطاقة الزوج علشان تثبتي المحافظة الجديدة
32- بالنسبة لخريجي الازهر المفروض يتخصم المواد الشرعية من المجموع الكلي ؛ و ده المجموع اللي بتتوزع و التنسيق بيتم علي اساسه
و مفروض الكلية طلعت كشوفات فيها النتيجة من غير الشرعي
هتدور علي اسمك فيها
و ممكن تشوف بيان الدرجات لو معاك و تخصم المواد الشرعية
لما تيجي تسجل بتخصم الشرعي و تسجل مجموع المواد العلمية بس
33- بالنسبة لجامعة مصر
مفروض بيبقي فيه كشف مجمع فيه اسماء الدفعة كلها و قصاد كل اسم المجموع بالدرجات اللي هو النهاية العظمي
او لو معاك بيان الدرجات احسب منه الدرجات
34- لو ظهر لك خطأ في المجموع او حد رافع قضية و خد درجات و المجموع الجديد الموقع مش قابله يبقي هتروح الكلية - شئون الخريجين و تطلب منهم يبعتوا المجموع للوزارة
35- بالنسبة للجامعات اللي لسه ممتحنوش مزاولة المهنة
هتشوف اسمائكم علي الموقع و لا لا و ان شاء الله تلاقوها ، لو لقيت اسمك سجل بيانات عادي و ان شاء الله علي ما تيجي الرغبات هتكون خلصت الامتحان