کندهار انلاين موبايل فروشی

نن چهارشنبه د رمضان المبارك د میاشتي ۲۶مه روژه او د ۲۷م شپه (ليلة القدر ـ شب قدر ـ د قدر شپه) ده!
راسئ چي د دې مبارکي شپې په اړه مختصر معلومات درسره شریک کړم:

د قدر د شپې فضیلت :

له ابوهریره رضی الله عنه څخه روایت دی چي رسول اللهﷺ وفرمایل : څوک چي د قدر په شپه له ایمان سره او له الله تعالی څخه د ثواب د ترلاسه کولو په نیت د عبادت لپاره ودریږي، د هغه ټول تېر ګناهونه بخښل کیږي او چا چي د رمضان د میاشتي روژې له ایمان سره د ثواب په نیت ونیولې د هغه ټول پخواني ګناهونه بخښل کیږي. (صحیح البخاري،۱۹۰۱; صحیح المسلم، ۷۶۰; سنن النسايي، ۵۰۲۷)
په دې شپه ملائکي مځکي ته را کښته کیږي او هغه څوک چي په دغه شپه د الله تعالی په عبادت اخته وي نو دغه ملائکي د الله تعالی په امر خیر، برکت او رحمت ورباندي نازلوي. د ملایکو په دې ډله کي تر ټولو لویه ملائکه جبریل علیه السلام، هغه چا چي ټولو پیغمبرانو علیهم السلام ته د الله سبحانه تعالی پیغامونه او وحي راوړي دي، هم مځکي ته راکښته کیږي، د دې دلیل دا ایت دی:
تَنَزَّلُ الْمَلٰٓئِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ ـ سَلٰمٌ هِىَ حَتّٰى مَطْلَعِ الْفَجْرِ. (القدر، ۴ – ۵ایتونه).
ژباړه: ”په دې شپه د خپل رب په اجازه ملائکي او روح (جبریل علیه السلام) د ټولو چارو لپاره نازلیږي، په دې شپه تر سهاره پوري سلامتیا او امن دی”.

د قدر د لفظ معنا :
دغه ته د قدر شپه ځکه ویل کیږي چي هر هغه تن په کښي قدرمن کیږي چي دغه شپه په خپل عبادت ژوندۍ کړي، او داسي نوري معناوي هم لري...

د قدر د شپې د پټولو حکمت :
عباده بن صامت رضی الله عنه وایي چي رسول اللهﷺ را ووت تر څو موږ ته د قدر شپه را وښیي، چي له مسلمانانو څخه دوو کسانو یو له بل سره شخړه وکړه، نو محمدﷺ وفرمایل : زه را ووتلم تر څو تاسي ته د قدر شپه در په گوته کړم خو فلاني او فلاني یو له بل سره شخړه وکړه، چي له امله یې د قدر شپه پټه کړل سوه، کېدای سي په دې کي تاسو ته خیر وي. (صحیح البخاري ۱/۵۳۷ حدیث شمېره: ۲۰۲۳)
د حدیث څخه ثابتیږي چي مسلمانان د خپل منځي شخړو له امله له لوی خیر څخه بې برخي کیږي، او بله دا چي د قدر شپې ټاکل سوې نیټه پټه سوه، محمدﷺ صحابه وو ته وویل: چي په دې کي خیر دی، دا ځکه چي که چېري د قدر د شپې ټاکلې ورځ معلومه وای، نو هر تن به یوازي د قدر په شپه کي عبادت کولای، او په نورو شپو کي یا د کال په اوږدو کي به په دې ډاډه وای چي د کال په اوږدو کي د عبادت اړتیا نسته، د قدر شپې عبادت د درې اتیا کلونو او څلورو میاشتو د عبادت سره برابر دی.
امام بغوي رحمه الله وایي : اللهﷻ د قدر شپه پټه کړه تر څو بندگان د رمضان په شپو کي د عبادت هڅه وکړي، لکه څرنگه چي اللهﷻ د جمعې د ورځي هغه گړی پټ کړی دی، په کومه کي چي دعاء ژر قبلیږي، او دغه راز منځنی لمونځ یې په پنځو لمونځونو کي پټ کړی دی تر څو بندگان د ټولو لمونځونو ترسره کولو هڅه وکړي او اسم اعظم یې پټ کړی دی، تر څو د اللهﷻ ټولو نومونو ویلو ته مخه کړي، او د قیامت ورځ یې پټه کړې ده تر څو بندگان هر وخت ورته چمتو و اوسي.

ايا د قدر د شپې ليدل ممکنه ده؟!
هو! د قدر شپه لیدل ممکنه ده داسي چي اللهﷻ یې ځینو بندگانو ته ور وښيي او هغوی په دې شپه کي داسي څه وویني چي هغه د عادت خلاف وي، لکه وني په سجده وویني، انوارات او برکات وویني، خو دا اړینه نه ده چي هر څوک دي د قدر په شپه کي د عادت خلاف کارونه ویني، بلکي پکار ده چي د قدر په شپه کي عبادت، داسي الله جل جلاله ته زارۍ، او ورڅخه مختلفي دعاګاني وغواړي.

د قدر د شپې نښي :
د قدر د شپې لاندنۍ نښي په احادیثو کي راغلي دي:
لومړۍ نښه : د قدر د شپې په سبا باندي به لمر داسي راخیژي چي وړانگي به نه لري. (مسند احمد بن حنبل، حدیث شمېره ۲۱۱۹۷)
دوهمه نښه : د قدر شپه معتدله وي نه گرمه او نه هم یخه، او نه په کښي شیطانان په شهاب ثاقب(سوځوونکې لمبه) ویشتل کیږي. (کنز العمال، حدیث شمېره : ۲۴۰۵۱)
درېمه نښه : د قدر په شپه کي د نورو شپو په پرتله زړه زیات ډاډه وي.
څلورمه نښه : د قدر په شپه کي عبادت کوونکی د نورو شپو په پرتله له عبادت څخه زیات خوند اخلي.

يادونه: ځیني خلک د قدر د شپې داسي نښي بیانوي چي په احادیثو کي اصل نه لري، لکه وایي چي: په دې شپه کي سپیان نه غاپي، باران به په کښي نه اوریږي، حال دا چي د بخاري شریف په یو روایت کي راځي چي د قدر په شپه کي باران سوی ؤ او محمدﷺ په خټو کي سجده کړې وه، چي په تندي او پزه یې د خټو نښانې لیدل کېدې، ځیني خلک وایي چي د قدر په شپه د سیند مالگیني اوبه خوږیږي، چي دا هم اصل نه لري.

👍1

661 views18:45