Юрагимда оёғининг изи қолди...


✒️ Холбиби Садинова
🎤 Комрон Кабулов

t.me/irmoqsheriyat

Ўт тушган саҳрога бошлади йўлим,
Куйди дил, куйди дил... Куйиб битмади.
Юлдузларга етган менинг бу қўлим
Ёнгинамда турган гулга етмади.

Ойсан – мен заминда ёполмаганим,
Кўнгилда илоҳдек тутганим менинг.
Излаган кунимда тополмаганим,
Кутмаганда келган кутганим менинг.

Худойимнинг мендан яшириб, мубҳам
Қайси сандиғида ётган сирисан?
Дафъатан келаркан бахт ҳам, бало ҳам,
Билмайман, гулим, сен қайси бирисан.

Кўрдим мен тақдирнинг қасос олганин,
Розиман, мен ҳамма нарсага шайман.
Ўтган умрим ўтди... Аммо қолганин,
Хонгулим, мен сенсиз қандоқ яшайман?

Хаёлингда менга жаннат тўрт тараф,
Оловинггда ҳечдир дўзаҳ деган чоҳ.
Сени севмоқ наҳот шунчалар шараф,
Сени севмоқ наҳот шунчалар гуноҳ?..

✍️ Усмон Қўчқор

Вақтлар ўтган сайин ўтмишимиз ва хотираларимиз ҳам кўпайиб бораверади. Яхши ва ёмонларимиз орқамизда қолаверади..

Мен сени олисдан севиб яшадим.
Усмон Азим.

Қанча осмон билан ернинг ораси,
Ўт билан оловда борми ўхшашлик?
Энди орамизда минглаб масофа,
Эҳ, ёшлик, ёшлик...

Сен ширин тушдайин ўтдингу кетдинг,
Дилда хотиралар, бошимизда қор.
Йигитнинг қўлидан музқаймоқ олмоқ,
Кинога боришлик ор эдида, ор.

Замон бошқа эди, замонлар қолоқ,
Битта мактуб билан кўнгил тўларди.
"М.с.с." ёзилган парча қоғозни,
Мактуб деб ташувчи кимдир бўларди.

Нома ўқиларди кимсасиз жойда,
Кимсасиз жойда ҳам қизарарди юз.
Ногаҳон дуч келса севган юраклар,
Ерга боқиб ўтиб кетар эди кўз.

Бегона кўзлардан яшириб ҳисни,
Жавобсиз қоларди қанчалар нома.
Ўтган, қайтганида парда ортидан,
Боқсам, сирим билар эди бир хонам...

Ҳаётимга яна кириб келдинг, Ишқ,
Яна ўчган ўтга ўзни ташлайман.
Ёнингда тургандек сезиб тафтингни,
Мен Сени узоооооқда севиб яшайман.

✍️Холбиби Садинова

https://t.me/irmoqsheriyat

***
Йиғламанг, кўз ёшга арзимас дунё,
Қатра ёшингизга арзимайди у.
Йиғламанг, арзимас, арзимас, гўё
Муқаддас нарсадек кўринган туйғу.

Йиғламанг, ёшингиз арта олмайман,
Юпатай дейману қўлим етмайди.
Бир томчи ёшингиз юракка тушса
Доғ бўлиб қолади - кейин кетмайди.

🎙Шуҳрат Дарё.
✍Воҳид Луқмон.

@mujdauz

Ҳаётжон Шариповдан ажойиб туҳфа.


Кетдинг...
Қолдирмайин кўнглимда бир мунг,
Қандайдир сокинлик чўкди кунларга.
Энди юрагимни куйдирмас алам,
Ҳар кун ўч олмайди соғинч тунлардан.

Кетдинг...
Аста секин совий бошладим,
Ўзи аслида ҳам эмасдим олов.
Югурдаги эдим аччиқ армоннинг,
Фақат сабрларга бўлардим қалов.

Кетдинг...
Балки бўлган шундайи афзал,
Ахир қонимизни ичиб бўлдикку?!
Қолмадику ахир муроса- мадор,
Кутавериб, ахир у ҳам ўлдику?!

Кетдинг...
Балки ўрнинг тўлмас ҳеч қачон,
Қачон гурунч ўрнин боса олган нон?!
Кўзда ёшим билан ош ошагандан,
Бир тишлам қотган нон тинч,  афзал, ишон!

🖊️ Холбиби Садинова
🎤 Ҳаётжон Шарипов

t.me/irmoqsheriyat

Шу осмон остида, шу ер устида,
Менга таскин берар Сенинг борлигинг!

(Мирза Кенжабек)

t.me/irmoqsheriyat

Манга атаб ёзганми дейман бу шеърини Мукаррама опа Саъдий Шерозийга ўхшаб?! 😊😊😊

... Ширмой юзга седона,
Бунисин қора холи.
Ишқилиб шу холига
учмаганми хаёлинг?!

🖍️ Мукаррама Муродова

t.me/irmoqsheriyat

Яқин қадрдонимнинг қизлари 35 ёшида оналик шарафига муяссар бўлди! Аллоҳим ўғил фарзанд билан сийлади. Дуо қилиб қўйинглар, кўнгилдошларим, Аллоҳим чақалоқнинг умрини учун, ризқи ва бахтини бутун, ўзи ва ота- онасининг тану жонини соғу саломат, бахту иқболини буюк қилсин! Омийн!

t.me/irmoqsheriyat

ФБга қўйилган "Сизни ёқтирмайман..." шеъримга  Халқаро Фанлар академиясининг академиги, Бутунжаҳон халқ  ижодкорлари         
уюшмасининг аъзоси,
шоир ва адабиётшунос Ғафуржон ТОЖИБОЕВ нинг гўзал изоҳи.

"Ассалому алайкум!
Шеърларингиз замирида Холбиби Садинова деган шоира шахси  "Мана, менман" деб туради. Сабаби, аввало, самимийлик, сўнг эса кўнгилда бори тўкилади ва бу жараёнда эътиқоддан оғишмайсиз. Ортиқча сўз йўқ, ортиқча безак бермайсиз. Олди-қочди ва сохта муносабатлар ифодаси сизнинг ижодингизга бегона. Шунинг учун ҳам сўзларингиз кескир ва юракларга ҳақиқатнинг ҳам ширин, ҳам аччиқ озуқаси бўлиб сингиб кетади. Мана шу сингиб кетмоқлик ҳақиқий ва тоза шеъриятнинг эътирофли фазилатидир. Қолаверса, ижодингиздаги соддалик,  ҳаётийлик ва ўзига хосликни ҳам қутламоқ керак. Бугунги шеърингиз ҳам фикрларимнинг исботидир. Мухлисларингиз ёзаётган ижобий фикрлардан хурсандман.  Қаламингиз бундан-да ўткир бўлаверсин!
Сизга ҳурмат билан

Ғафуржон ТОЖИБОЕВ".
                               2024.28.02.

Ҳижроннинг оёғи юзимда,
Чалинмайди юракнинг сози.
Қачонлардир Сенга етарми,
Синган қалбим жим-жит овози?

Ҳар сатримдан сачраётган ўт,
Кўзларингга кўчарми бир кун?
Юрагимни кемириб ётган,
Соғинчларинг топарми якун?!

Андазага рангимни олган,
Куз жойини бермас Баҳорга.
Етмаслигин билсада кўнглим,
Осилади энг баланд дорга.

Ўз-ўзимни аврайман тинмай:
"Кел, азизим, бўлди энди кеч".
Иродамни қанчалик йиғмай,
Нима қилдим тош босмаса ҳеч?

✍️Холбиби Садинова

https://t.me/irmoqsheriyat

Ҳозирча насибам ишқинг шираси
Исмингни исмимни ёнига ёздим.
Шаҳриёр Шавкат

Исмингни исмимнинг ёнига ёздим,
Битта белги қўйдим, "қўшув" аталар.
Тенглик белгисини қўйсам сўнгига,
Бу ҳиснинг номи не... не деб аталар?

Тенглик белгисига қай биримиз тенг,
Менинг қанотим йўқ, Сенга учгани.
Келолмайсан Сен ҳам тақдирдан ҳатлаб,
Сенинг йўлларинг-чи, очиқми, қани?

Ёришмайди ҳатто чироқ ёқсам ҳам,
Ёнбошлаб олишган кўнглимга Тунлар.
Эшигида Азоб қиличин қайраб,
Сенинг ҳисларингни киргизмас улар.

Сенинг сўроғингга йўқ менда жавоб,
Кўнглимни ювганман ишқнинг қонига.
Кутма мендан бошқа ўзгасин, фақат,
Исмингни ёзаман исмим ёнига.

✍️Холбиби Садинова

https://t.me/irmoqsheriyat

Дўстим, кўнглингизни номардга берманг,
Мен каби товондан тиканлар терманг,
Мард бўлиб, пастлардан номардлик кўрманг,
Дунёга дарз кетган, армонга тўлган.

Мендан содиқ дўст йўқ деса, ишонманг,
Лафз қилиб, ҳеч қачон лафздан тонманг,
Милтиллаб ёнингу, ловуллаб ёнманг,
Дунёнинг дони йўқ, сомонга тўлган.

Қаранг, чап кўзингиз ўнгини алдар,
Айтинг-чи, ҳақиқат, адолат қайда,
Одамлар бунча ҳам майдадан майда?
Дунёда яхши кам, ёмонга тўлган.

Дўстим, ишқ ҳақида менга сўз қотманг,
Севиб, менинг каби азобга ботманг,
Ҳисларингиз жойлаб, шеър ёзиб ётманг,
Дунёнинг рости йўқ, ёлғонга тўлган.

Умримни ўтказдим номардни кутиб,
Армон, пушаймонлар боради ютиб,
Юракдаги доғлар кетарми битиб?
Ишқ йўқ, мажруҳ кўнглим пушмонга тўлган.

Дунёга дарз кетган, армонга тўлган,
Дунёнинг дони йўқ, сомонга тўлган,
Дунёда яхши кам, ёмонга тўлган,
Ишқ йўқ, мажруҳ кўнглим пушмонга тўлган.

🖋 Холбиби Садинова

t.me/irmoqsheriyat

Туйғуларга қўясан оёқ,
Баъзан ростинг ўтмас пичоқдек.
Чўғ устини босиб борар кул,
Ловуллаб ўт ёнган ўчоқда.

Ёмғирлардек тинмай ёғади,
Соғинчларинг кўнглим қатига.
Султон бўлиб кирдинг юракка,
Эга бўлиб тожу тахтига.

Эгалладинг, овга кетдинг сўнг,
Бошқа диллар мамлакатига.
Армонларим қат-қат тахланди,
Юракдаги сатр қатига.

Кутавердим, ўтди ёз-қишлар,
Юракка дарз кета бошлади.
Тутавердим ҳар сасга қулоқ,
Куну тунлар кўзим ёшлади.

Кунларини санайди сабр,
Соғинч қани олақолса тин.
Қайтсанг, ташла қадам секинроқ,
Кўнглим синиб кетиши мумкин...

✍ Холбиби Садинова

t.me/irmoqsheriyat

Кафтимга сиғмаган дуоларимсан,
Сен ҳайратим - кўзимда қотган.
Ерман - етолмаган зангор осмоним,
Армонсан - кўксимга муҳрдек ботган.

Сен қорлар остидан унган бойчечак,
Кузман - қишдан ўтиб баҳор бўлмаган.
Сенсан эркатойи бахтли онларнинг,
Мен - Сенсиз кунидан кўнгли тўлмаган.

Қирғоғидан тошган жўшқин сойсан Сен,
Мен-чи? Манзилига етмаган ирмоқ.
Сойингнинг тагида қолган тошман мен,
Йилу ойларида ҳеч бир мазмун йўқ.

Сўқмоқман, қадаминг айлаган тавоб,
Қолдирган изларинг ҳамон кетмаган.
"Доим тақдиримда борим қил!"-деган,
Дуомсан Оллоҳга етган, етмаган.

✒️ Холбиби Садинова

t.me/irmoqsheriyat

Мен синдим, шикастландим, оёқ ости бўлдим, ҳеч кимга кераксиз, хору зор бўлдим. Шамоллар қадрдонларимдан узиб, учириб, чирпирак қилиб, узоқларга улоқтирди. Узоқ вақт ёмғирларнинг тагида қолдим. Қуёшнинг жазиримаси тиғида куйдим, қуридим, бўлакларга бўлиндим. Қаҳратон қишнинг қорларию аёзлари азобларини тортдим. Кераксиз бўлиб, бир чеккаларда қолиб кетдим. У мени излаб топди. Сўрамасдан қаддимни, қадримни тиклади. Эъзозлаб, яна қадрдонларим оғушига олиб чиқди. Юксалтирди. Унинг эъзози, қадрлаб - қимматлаганига яраша жавоб қайтардим. Унинг ўзини, жуфтини, полапонларини кўксимга жойладим ва кўтариб турдим. Шунчалик ғамхўрлик қиланингга беадад ҳамду санолар, Оллоҳим! Мен бору йўғи ҚУРИБ ҚОЛГАН, ДАРАХТИДАН УЗИЛИБ ТУШГАН, БИР СИНГАН НОВДА ЭДИМ холос...

Бир синган новдангга шунчалик меҳр-саховат, мурувват кўрсатган, Худойим! Ман ҳам синган кўнглимни энди Ўзингга топширдим. Сенга юзландим. Ўзинг эъзозингда тут! Ўзинг авайла энди бу мажруҳ кўнглимни... У энди фақат Сеники...

✒️ Холбиби Садинова

t.me/irmoqsheriyat