Turkmancha kitob chiqmish...ag‘darishibdi...

Seni rosa sog'inyapman Bonujon,
Kitobingni o'qib biroz ovunyapman Bonujon.
Taqdirimiz o'xshash ekan Bonujon,
Onasiz yashash qiyin ekan Bonujon..

Men sabrni sendan oldim Bonujon,
Sen aslida ko'zguyim san Bonujon,
Taqdir bizni o'yin qildi Bonujon,
Yashash buncha qiyin ekan? Bonujon.

Tuni bilan o'ylab chiqdim Bonujon,
Bu azoblar tugarmikan Bonujon.
Onajonim sog'inyapman Bonujon,
Biroz mehr menga bergin Bonujon...

Muhabbat Baxtiyorovna.
Buxoro viloyati

МЕН ЎЗИМНИ ЕНГДИМ

Мен ўзимни енгдим – сени унутдим.
Яна бакор келди кучли иродам.
Яна гул ҳаётга юзимни тутдим,
Яна эл қатори одамман, одам.

Аммо йўл қўймайман унутишингга,
Чеккан жабрим учун тортгайсан жазо.
Кечалар шарпадек кириб тушингга
Эслатавераман мен – Иқбол Мирзо.

Китоб муқовасин эшикдек очиб,
Ўрнашиб оламан фикру ўйингга.
Қайгаям борардинг замондан қочиб,
Қўшиғим бостириб кирар уйингга.

Абадий тирикдир шоир қарғиши,
Мен ютсам, сени деб изтироб ютдим.
Алвидо! Буёғи худонинг иши,
Мен ўзимни енгдим – сени унутдим.

© Иқбол МИРЗО

СОАТ

Малайзиянгниям кўрсатдинг, шукур!
Сув урилган тандир буғланар шундай.
Елкага ёпишар кўйлагинг қурғур,
Булути заминга туташ тутундай.

Иссиқ ёмғир қуяр шовиллаб бирдан,
Зум ўтмай тепангда офтоб чарақлар.
Деҳқончилик қийин бунақа ерда,
Фақат мева берар лалми дарахтлар.

Бу ерда ёғмайди қолган ишга қор,
Фурсат ғанимат деб ҳеч ким уринмас.
Бетоқат ер тепиб турмаслар зинҳор,
Кўча-кўйларда хеч соат кўринмас.

Тўғри-да, не керак тошсиз тарози,
Чексиз тушунча-ку бу зорманда вақт.
Соатсиз ҳам халқи ҳаётдан рози,
Соатбай келмайди агар келса бахт.

Хотиржам юксалган эгизак бино,
Равон йўллар тушган бамайлихотир.
Кунлари фил каби одимлар гўё,
Не қайғу? Фалакда Ғаффор ва Қодир.

Фақат биз, кунгира соатлар тақиб,
Шошамиз боқмасдан ойга, қуёшга.
Олтин лаҳзаларни лаҳзага чақиб,
Асабий чопамиз наҳорги ошга...

© Иқбол МИРЗО
08.05.2018 йил. Путражая

#Yoshlik_daftaridan

ЯШИЛ ОДАМ

Суюниб кетасан қанчалар
Дўстларинг келишса йўқлашиб.
Мен шодман: бултурги майсалар
Чиқдилар қайтадан кўклашиб.

Ялпиз ҳовучидан хуш бода –
Биллурий шудрингни симириб,
Мастона довдираб шаббода
Азонлаб келибди қидириб.

Мен уни қучоқлаб оҳиста,
Ям-яшил бир бўйни туяман.
Борлиғим бўялар шу тусда,
Ўзимни йўқотиб қўяман.

Мен яшил одамман кузгача,
Ям-яшил қўшиқлар айтаман.
Куз келар...
Сарғайиб бир кеча
Дўстларсиз уйимга қайтаман.

© Иқбол МИРЗО
10.II.1988.

БОНУНИ ЎҚИБ...

Олдиндадур ҳаммаси, Бону,
Ёниб турар қалбимизда чўғ.
Тушимизда учамиз ҳали,
Учмоқликнинг эрта кечи йўқ!

Иккимизнинг қисматимиз бир,
Бу кунларни мен ҳам кўрганман.
Вафолининг кўнглидан қолиб,
Бевафога кўнгил берганман.

Билмайман мен, қандай ўйлайсан,
Балки фикринг буткул батамом.
Менинг учун Юсуфлар эмас,
Олмосларнинг борлиги ёмон.

Яқинлардан нолиймиз кўпроқ,
Оқибат ҳам ўлиб ётибди.
Атрофга боқ, атрофимизда
Шоиралар тўлиб ётибди.

Кўтарилар олдиндан парда,
Олдиндадур чўққимиз, Бону
Суҳбатдошмиз узун тунларда,
Қисматдошмиз иккимиз, Бону.

© ОБИДХОН

https://t.me/Iqbol_Mirzo_ijodi

СИНГЛИМГА

“Кўнгил” деган сўзга қофия “сингил”.
Синглим!
Сени десам исийди кўнглим.
Юрак хинагулдек ўйнайди енгил,
Мунисгинам, синглим,
анисим, синглим!

Эсимда
қировлар боғлаган дала,
Туманда адашган икки мурғак жон.
Пахта жондан азиз бўлган маҳаллар,
Ғўзапўчоқдек хор бўлганди инсон.

Жовдираб-жовдираб турардинг қақшаб,
Қўлчаларинг куҳлаб иситардим мен.
Тушида гапирган тентакка ўхшаб,
Алмойи, пойма-пой шеър айтардим мен.

Шеър юпанч эдими, таскин эдими,
Шеър афсун эдими, афсусмиди ё?
Саккиз яшар дилга илҳом бердими,
Ачиндими худо, кулдими худо?

“Кўнгил” деган сўзга қофия “сингил”.
Синглим!
Сени десам исийди кўнглим.
Хирмонин кўтарди бугун ўттиз йил,
Яна Фарғонага бошлади йўлим.

Шўх эдим, урушқоқ, безори эдим,
Ҳайдалган пайкаллар тайёр жангмайдон.
Қаҳрамонлигимни сен кўрсанг дердим,
Мақтангим келарди сенга, сингилжон.

Токи сен ғурурлан акангга қараб,
Хотиржам бўл, сенинг ҳимоячинг бор.
Дунё бир тарафу ўзим бир тараф,
Яна нима керак?
Сенга не даркор?!

Мунисгинам синглим,
анисим синглим,
Туйғу сўзга кўчса – сийқа, бачкана.
Ўйласам бузилиб кетади кўнглим,
Уни шеърга солиб турибман, мана…

Сенга ҳасратимни қандай айтайин,
Сочга қиров тушди кузак келмасдан.
Ёмонга яхшилик қилдим атайин,
Яхшига ёмонлик қилдим билмасдан.

Ҳамма юракка тиғ урар албатта,
Нишон сифатида керакман асли.
Не қилай, юрагим ўзимдан катта,
Одам шаклидаги юракман асли…

Қисмат кимни сийлар,
кимни камситар,
Ким обрў – мартаба истаб овора.
Бечора эмасдир мажруҳ кимсалар
Аслида синглиси йўқлар бечора!

Мени шоир қилди ўша далалар,
Мени пахтазорга кўминглар, ўлсам…
Кечир мени, синглим,
ғафлатда агар
Ёмон кун ёнингда бўлмаган бўлсам.

Сен борсан, ёнимга келолмас ўлим,
Мен борман, кулфатлар тентирайди хор.
Кўнглимга энг гўзал қофия синглим,
Хотиржам бўл, сенинг Иқбол аканг бор!

© Иқбол МИРЗО

«Топарман»

© Иқбол Мирзо
_________________
Kanalga ulanish 👇
@Iqbol_Mirzo_ijodi

_____________
Kanalga ulanish 👇
@Iqbol_Mirzo_ijodi

#Mushtariy_fikri

Bonu...

Kitobni o'qib bo'lishim bilan "esiz umr", dedim, ishonasizmi...? Esiz bir gulday qizning umri, orzulari, umidlari, muhabbati... kitob yoqdi menga, kundalik o'qigandek bo'ldim, sababi o'zim ham kundalik yozib boraman... judayam ko'p gaplarim bor, yozolmayapman ochig'i... O'qib azoblandim, nega...? Sababi, men musofirlikda yashaganim, aynan Bonu ko'rgan ko'rguliklarga qisman guvoh bo'lganim, begona emas, balki o'zingnikilarning xiyonati, g'oyibdan omadning kelishi, hammasi bo'ladi musofirlikda... lekin Olmos... Bonu qayerda ekan ...? Balki "Huvaydo" bobosiga o'xshab, shaharni tark etib cho'lda yashayotgandir... balki...?
Bonu hammani kechirdi...
Bonu judayam kuchli ekan...
Endi qaydadir go'zal qiz ko'rsam Bonu deb o'ylashim aniq...

Gapim ko'p-u, ammo yozolmayapman...

#Noz... kundaligidan🌸

МАКТУБ

Сендан мактуб олдим: бўм-бўш бир варақ,
Юрак сенсиз бўм-бўш деганингми бу?
Ёки оқ ниятга ёзувсиз бир шарҳ,
Ёки бўш кўнглимга тутдингми кўзгу?

Ёки муз ўлкасин эслатиб шундоқ
Ёдга солмоқчисан қиш-қаҳратонни?
Ёки совуганман дедингми мутлоқ,
Беҳуда ўтларга солма деб жонни.

Менга хат ёз деган бўлсанг, эҳтимол...
Ипак қоғозингга лабимни босдим.
Кўчамда шовуллаб оқаркан шамол,
Сенинг мактубингга шу шеърни ёздим.

© Иқбол МИРЗО

Тилло узук

©ИкболМирзо

Чиройли киз

©ИкболМирзо

#Иқбол_Мирзо_бир_сафар

ШОГИРД

Шеърият кечаларининг бирида даврада шеър ўқиган ёш ижодкорнинг машқидан завқланган Иқбол ака ёнидаги устоз шоирлардан бирига:
— Шеърлари яхши экан-а? — деса ҳалиги шоир:
— Мени шогирдим-да, — деб мақтанибди.
— Барибир яхши экан, — деб ҳазил қилибди Иқбол ака.

@Iqbol_Mirzo_ijodi

Iqbol Mirzo o‘zi o‘qigan maktabida

#Mushtariydan

"BONU"ning ikkinchi kitobi ham tezroq chiqsaydi..."

Ustoz Iqbol Mirzoni "Bonu" romanini oktabr oyida o'qib chiqgan edim..
Asarni o'qib chiqib to'g'risi bir insonga bunchalik azob ravo ko'rganiga, hayot beshavqatligiga yana bir bor iqror bo'ldim...Hayot bir qattiq qo'l ustoz bizga juda ko'p og'ir vazifalarni beryapti.. Nima ham qilamiz, sabr va yana SABR...

Ota-bobolarimiz qorong'i kunlardan, yuborilgan sinovlardan sabr bilan o'tgan bandasini Alloh o'z sovg'asi bilan siylaydi deyishardi.Lekin bilmadim, Bonu ko'rgan bu kunlar uchun, sabr toqati uchun qachon unga Alloh o'z sovg'asini yuborarkin, bilmadim....

Yaqinda yana yuragimni yutib, ko'z yoshlarimni artib, biroz o'zimni qo'lga olib "Bonu" romanini ikkinchi marotaba qo'lga oldim...

Afsus... Yana ko'z yoshlar, yana yurak og'rig'i, kitobni o'qishga yo'l qo'ymadi.
Har safar Bonuni otasi o'lgan joyiga kelib jonim bo'g'zimga tiqilgandek asarni o'qib bilmay qolaman.
Balki Bonuni otasi ham maktab o'qituvchi bo'lganlari uchunmi yoki kitobda keltirilgan ta'riflar meni otajonimda ham borligi uchunmi, yoki men ham dadasini erkasi bo'lganim uchunmi asarni bu joyiga ko'z yoshlarsiz o'tib bilmayman. Asarda Bonuni otasi hayotdan ko'z yumayotgan joyni o'qir ekan man karavotda uxlab yotgan otamga, javonda qo'yilgan onamning suratiga qarab ko'zimda yosh bilan kitobni o'qishda davom etyapman...
O'sha zahoti buvimni o'lim to'shagida so'ngi nafasini olagani, shifoxonada Onamni o'limning qo'liga jim topshirganim yana og'riqli juda azobli xotiralar yodimga tushdi..
Bonuning otasi joni chiqganini, a'za marosimi o'tgan joyigacha o'qib bildim, xolos. Ko'zimda yosh bilan uxlab qolibman...

Balki bu gaplarim kim uchundir bo'rtirish, asarni maqtash uchun yozilgan gaplardek tuyulayotgandir, lekin bu gaplarimga Allohim, "Bonu" kitobi va yostig'im guvoh...
Ustoz Iqbol Mirzodan "Bonu" romanining ikkinchi kitobni tezroq chiqarishlarini iltimos qilib so'rab qolaman..

Hurmat bilan
Muhabbat Baxtiyorovna

@Iqbol_Mirzo_ijodi