#وطني
#توزيع_الأسئلة #د.مارك_رحال

الباطنة 72 سؤال (بشكل عام كيف أسئلة الداخليات بتتوزع؟!):
مواد الدرجة الأولى:
1 نفسي (3ص): 2-3س
2 كلية (40ص): 8س
3 قلبية (65ص): 12س
4 دموية (40ص): 7س

مواد الدرجة الثانية:
5 صدرية (65ص): 10س
6 رثوية (40ص): 6س
7 هضمية (100ص): 10س (من ضمنا الكبد: 40ص: 3س)

مواد الدرجة الثالثة:
8 غدية (80ص): 6س
9 عصبية (80ص): 5س
10 خمجية (90ص): 5س

طبعاً ما في شي جديد بالتوزيع.. كل الطلاب بتعرفو عموماً (بس هون بس رح ينحكا عن التوزيع ضمن كل مادة بمادتا😍)، لكن.. بظن اختلف ترتيب الاولويات شوي صغيرة.. ومتل ما قلتلكن السبب هوي مراعاة حجم المادة.. يعني مادة بيجي من صفحتين سؤال اكيد اهم من مادة كل 5 صفحات سؤال.. ولو عدد أسئلة التانية اكتر👍
أهم مثال أنو دائماً بيرتبولنا الهضمية كأهم أو تاني أهم مادة.. لأن عليها أسئلة كتير.. بس بينسو الحجم..
اكيد الهضمييية مهمة كتير.. ومواد الدرجتين 1+2 لازم ينبصمو كلن.. (التالتة فيها مناورات😂😉).. واكيد 10 أسئلة مهمين..
بس اذا ضالل معك يومين لتعيد؟ بتعيد هضمية 100 ص اللي عليها 10 اسئلة؟؟ ولا بتعيد كلية وصدرية اللي سوا بيطلعو كمان 100 ص بس عليهن 18 سؤااال👍😉 يعني ضعف عدد الأسئلة؟!!
الفكرة دائماً ب "الفعالية".. وفي أسرار كتير لسا رح نكتشفا هون😍
طبعاً الدورات معكن.. وعطول فيكن تتأكدو من حكيي👍
اهم فكرة بدي قولا انو التوزيع بشكل أساسي لآخر كم دورة (دورات المرجع) لان سابقاً كان في اختلاف.. +انو هاد توزيع وسطي.. يعني اذا اجا 11 هضمية و8 دم و8صدرية ما خربت الدنيا.. وماتغير عليك شي💪👍

#وطني #د.مارك_رحال
#توزيع_الأسئلة
#كلية
الكلية نصيبها من أسئلة الوطني حوالي: 8س وسطياً (6-9)
1 أعراض (8ص): 1-2س
2 القصور الكلوي(حاد+مزمن) (12ص): 3-4س
3 أخماج الجهاز البولي+ الحصيات (5ص): 2س
4 ما تبقى (15ص): 1-2س

*طبعاً الكلية تقريباً هي أهم مادة عالإطلاق متل ما ذكرنا سابقاً💪👌 وهالشي بسبب حجما الصغير كتير بالمرجع مقارنة بعدد الاسئلة الكبير (40 صفحة ب8 أسئلة).. ولهيك المفروض نظريا ندرسا بصم كاملة..
لكن عالأقل خلينا نفكر بهاد الترتيب للأولويات مشان آخر دور إعادة قبل الكتلة.. حوالي نصف كمية المادة (25/40) بيجاوبو ع7/9.. براتن سؤال او تنين فقط؟!.. اللي بتطلب الإجابة عنهم دراسة كمية تقريباً مماثلة (15/40)..
لهيك في نص لازم افهمو كامل.. وابصمو مع دوراتو.. وعيدو وعيدو.. وحتى قبل الكتلة إعادتو ضرورية.. بينما النص التاني بمشي فيه بسرعة.. وبدرسو منيح لما عندي وقت.. بفهمو من بعيد وما بالضرورة اتعمق فيه أو اتوسع.. وإعادتو قبل الكتلة مو ضرورية.. أو يفترض إعادتو شوامل. مع كم فكرة نحددن قبل👍

#وطني
#توزيع_الأسئلة #د.مارك_رحال
#هضمية:
الهضمية عليها: 10س (9-11س)
تقسم إلى:
الهضمية الخاص: 6-7س:
1 الأعراض: 2س
2 المري: 1 س
3 المعدة: 1 س
4 الأمعاء الدقيقة: 1س
5 الكولونات: 1-2 س
6 البنكرياس: 1س

الكبد (44ص): 3-4س:
1 الأعراض (12ص): 1-2س
2 انتانات الكبد الفيروسية (7ص): 1-2س
3 التشمع+ داء ويلسون (3ص): 1س
4 مااا تبقى (22ص): - (ولا سؤال)

*متل ما شفنا الكبد فينا نختصر نصو برياحة💪👌 بآخر كم دورة أجا سؤال عالتهاب الكبد المناعي الذاتي.. طبعاً سؤال واحد متل ما قلنا مابيخرب التوزيع.. خصوصي أنو من ضمن كمية كبيرة كل كم سنة وارد يجي أو لا.. لهيك باقي الكبد كلو بيتأجل وبيندرس بتركيز أقل من الأعراض والانتانات.. يعني أنت رايح وبتعرف سلف عليهن معظم الاسئلة.. لازم تبصمننن..

*في "تحت توزيع" خطير وفيه أسرار خارقة بالهضمية الخاص😍🔥 منحكي فيه بعدين😉.. بس رح اعطي مثال: هل تعلم انو سؤال المعدة اللي رح يجي هو حصراً (98%) سؤال عن القرحة الهضمية؟!.. يعني عسر هضم وظيفي وسرطان معدة والتهاب معدة ومابعرف شو.. هاد كلو أهميتو أقل من القليلة.. رجاع هلق عالدورات وتأكد😎👍
*بس كملاحظة.. حتى بحياتنا العملية كطبيب عام أو اخصائي هضمية أكيييد القرحة الهضمية أهم مليون مرة من باقي أمراض المعدة😎

هلق رح نحكي عن (تحت التوزيع)😍.. يعني من ضمن الأبحاث شو هي الأفكار المهمة؟..
هالقصة بالهضمية كتير مفيدة لان فعلاً المادة كبيرة عالفاضي.. والشغلات المهمة والشائعة هي ذاتا اللي بتجي كل سنة.. وهي كالتالي:
1 الأعراض: لازم نحفظا بصم كاملة
2 المري: 95% بيجي سؤال واحد وبيكون عن GERD..احتمال يجي غيرو كتير ضئيل.. وغالباً ح يكون قصة سريرية من الدورات بس المطلوب تعرف المرض من القصة هل هوي اكالازيا ولا سرطان ولا تشنج مري.. سؤال مساعدة يعني
3 المعدة: 99% بيجي سؤال وحيد عن القرحة الهضمية.. وطبعاً هالشي بيشمل أمراض الملوية البوابية.. أما أنو يجي شي اخر احتمالو يقارب الصفر (فعلياً بعمرو ما اجا😅🙄).. لهيك أمراض سرطان المعدة واللمفوما والتهابات المعدة مو مهمة..
4 الأمعاء الدقيقة: بيجي سؤال وحيد.. مو حابب قول 100% داء زلاقي🙄💔.. بس ما شفت غيرو من 2011.. لهيك شي 10 امراض بالأمعاء فينا مانركز عليهن كتير.. وهالشي بيشمل داء ويبل واللمفوما والذرب الاستوائي .. إلخ
5 الكولونات: وارد يجي سؤال او تنين.. هون في كذا عنوان غالباً الاسئلة ع واحد منهن.. سرطان الكولون.. الداء المعوي الالتهابي (كرون والقرحي).. متلازمة الأمعاء الهيوجة.. واخيرا التهاب الكولون الغشائي الكاذب بالمطثيات العسيرة.. ما تبقى مستبعد.. خصوصاً داء الملينات وتفاصيل البوليبات وبوتز جيغرز ومدري شو..
6 البنكرياس: هي كلا كلها كم صفحة لهيك تدرس كاملة.. بس السؤال بيجي التهاب حاد أو التهاب مزمن.. أما سرطانات البنكرياس والأمراض الخلقية مستبعدة شوي..

7 الكبد: بظن قلتلكن من قبل.. نص قسم الكبد بصم بصم بصم بصم (أعراض+ إنتانات فيروسية).. التشمع كمان مهم.. ارتفاع توتر الوريد الباب لازم نفهمو بس مستبعد يجي سؤال.. لهيك منقراه بس تفاصيل العلاج والجراحات والتحويلات ما منركز عليها.. داء ويلسون مهم.. الهيموكروماتوز مو كتير..
أما ما تبقى.. النص التاني كاملاً.. يعتبر مو مهم لدرجة اذا مانك مخلص كااامل البواااطن بتركيز ومرتاح كتير ومعك وقت.. فلا تدرسن.. بس قراهن دور بشي ساعتين مشان تخدر الضمير شوي😂💔 وتأكد من الدورات👍 (بركي كنت أنا نسيان شي فقرة😅)
وهالمواضيع بتشمل سرطانات الكبد.. أمراض أوعية الكبد.. كبد وحمل.. كبد وأدوية.. وكتير كتير عناوين تافهة بصراحة🙄😅😂

موفقييين❤️💙
*هالبوست ليساعدكن عتنظيم الوقت وزيادة الإنجاز👍 مو ليحرضكن عالإهمال😐😒😒
ف إذا خلصتو الشي الأهم اللي مؤكد يجي.. والشي المهم.. حاولو دائماً تقرو الشغلات اللي مومهمة ولو قراءة سريعة👍 بس المهم ما تدرسوها بشكل جدي ع حساب أبحاث أو مواد تانية.. الوقت محدود ولازم نستغلو لآخر لحظة.. شدو الهمة💪💪

#نصائح

مسا الخير جميعاً 🌸
بهالوقت ومع اقتراب موعد الامتحان المنتظر، المفروض يلي مبلش بكير يكون خلص الكتلة الأولى وبلش بالتانية
أو على وشك يعني، و يلي ما بلش ما يقلق في وقت كتير متبقي الحمد لله 😌🔥 استعينوا بالله و لا تخافوا..

المهم يلي مبلش بكير لازم بقى يحط برنامج مراجعة مثلاً يحط فترة باليوم لدراسة الشي الجديد (كتلة تانية أو ما تبقى من الكتلة الأولى) و فترة تانية يحط فيها مراجعة دورية للشي القديم يلي درسو ..

مثلاً فترة التركيز الصباحية مادة جديدة و فترة المساء مادة مراجعة..

برجع بعيد الهدف من البوست ليس التشاؤم للي مو مبلش بشكل جدي لحد هلق و إنما لشحذ همم الجميع و لفت النظر لأهمية فكرة المراجعة والإعادة 👌.

موفقين و أي شي بتحتاجو راسلونا عالبوت 😁

إن شاء الله رح نعمل على ذلك..
المهم بلشوا دراسة بشكل جدي 😄

#وطني. #د.مارك_رحال
#توزيع_الأسئلة
#دموية
الدموية عليها: 7س (6-8س)

1 الأعراض (3ص): 1-2س
2 فقر الدم (10ص): 2-4س
3 اضطرابات التخثر (13ص): 2-4س
4 الخباثات الدموية (14ص): 1س

*ملاحظة 1: ضمنت صفحة فقر الدم بالاعراض مع فقر الدم، وكذلك اضطرابات التخثر ونقص الصفحيات والخثار الويدي من الأعراض إلى اضطرابات التخثر (بهدف الاستقلالية التامة للمعلومة.. ونصيحة بس تدرسو درسوها هيك👍)،
*وهيك قسم الأعراض صار فقط العناوين: فرط الخضاب+ اضطرابات تعداد البيض كلن+ ضخامة الطحال+ ضخامة العقد اللمفاوية
*المميعات تدرس مع اضطرابات التخثر كمان
*ملاحظة 2.. للأسف مادة الدم من اكتر المواد اللي ما فيها اي التزااام بتوزيع الأسئلة💔 عكس الهضمية والقلبية.. لهيك ممكن تلاقي جاي 5 أسئلة من أصل 6 بس عفقر الدم.. أو اضطرابات التخثر💔
عموماً التوزيع اللي حطيتو بيحل جزء كبير من هالمشكلة.. يعني بيفرق معك سؤال بأسوأ الاحتمالات..
ومتل ما قلنا الدموية مادة مهمة كتير..صغيرة وأسئلتا كتار.. لازم نحاول نبصما كلا👍
*الجزء الوحيد اللي فينا نناور فيه شوي هوي الخباثات.. لمفوما +ابيضاض هني الأهم.. أما ورم نقوي عديد ومتلازمة تقوية تكاثرية وغير عناوين أهميتها أقل..
*دورات الدموية كتييير كتير مهمين.. لان هي والكلية والقلبية وارد يجي أسئلة شوي خارجية بالكامل أو بعض خياراتها خارجية.. فالتوسع شوي مو غلط..لو كان بس بالشوامل (آخر دورة اجا سؤال كامل عن الشبكيات..وهي موموجودة أبداً بالمرجع؟!!)

#وطني #د.مارك_رحال
#توزيع_الأسئلة
#صدرية:

❎ الصدرية عليها وسطياً حوالي 10 أسئلة: (9-11 س)
🔴 1 ربو: 2 س
⚫️ 2 الداء الرئوي الساد المزمن COPD+ التوسع القصبي: 1-2 س
🔴 3 سرطان الرئة: 1 س
⚫️ 4 ذات الرئة: 2 س
🔴 5 السل: 1 س
⚫️ 6 الصمة الرئوية: 1 س
🔴 7 أمراض الجنب (انصباب+ ريح+ تقيح): 1 س
⚫️ 8 الأعراض+ ما تبقى (من تليف رئة لساركوئيد لأسبستوز): 2 س

❇️ متل ما حكينا سؤال زايد سؤال ناقص مو بيناتنا..
❇️ آخر دورتين أساسيات ما فيهن اي مفاجأة عن التوزيع الثابت..
❇️ وبالتالي النص الأول من قسم الصدرية بالمرجع ((ما بعد الأعراض والتشخيص)) هوي أهم شي عالإطلاق (أمراض انسدادية+أخماج+ سرطان).. وبيضمن 7-8 أسئلة مع انو أقل من نص المرجع!


✅ الأبحاث غير المهمة واللي فينا نحذفا هي:
🟡 1 الأمراض الخلالية: ص304+305+ 306+307: مندرس منن فقط الساركوئيد عالسريع وبس منركز الاستقصاءات وجدول التشخيص.. وفي كم كلمة عن التليف الرئوي البدئي مهمين وبيجو بالدورات عطول وحاج
🔵 2 الأمراض الجهازية (SLE+RA+ الالتهاب الشعاعي): ص308+309: حذف تماماً
🟡 3 الأمراض المهنية: ص310+311+312: حذف بالكامل.. بس مندرس دورات.. ومنتذكر انو الأسبستوز (الأميانت) ممكن يسبب أمراض رئة وأمراض جنب أما السيليكوز ما بيسبب أمراض جنب أبداً.. بس بيصيب الرئة
🔵 4 أمراض الطرق التنفسية العلوية: ص318+319+320+321.. حذف كامل
🟡 5 التليف الكيسي+ انتانات الطرق التنفسية العلوية: ص287+288.. حذف كامل
🔵 6 فقرة فرط الضغط الرئوي: 317+318.. حذف كامل
🟡 7 أمراض الحجاب الحاجز + أمراض جدار الصدر: 324+325.. حذف كامل
🔵 8 الأخماج الفطرية: ص298.. حذف كامل

☑️ هي الفقرات بس درسولا دورات.. إذا كان جاي عليها شي أصلاً😎😌 والكم شغلة اللي قلتلكن مهمين.. ودعولنا..
☑️ أول دور قرا المرجع كلو (إذا كنت من محبي المرجع.. أما مانك من محبينو انتظر ملخص الدنا الشامل الخارق للصدرية😍🔥🔥) بس ما تعامل هي الفقرات اللي وحياتك يا دوب جاي عليها كم سؤال.. متل الفقرات اللي قلتلك غاااية في الأهمية.. وزع جهد صح.. ولقدام اكيد فيكي تقصها تماماً 👌..

☑️ بالنسبة لأول 12 صفحة (الأعراض والتشخيص): من صفحة 265 للصفحة 277.. إذا لحقناهن كلن ممتاز.. إذا ما لحقنا فهي أهم الفقرات فيهن:
🔴 1 فقرة السعال ص 265
⚫️ 2 فقرة الزلة التنفسية نفسية المنشأ ص267+268 (هل توجد أعراض أخرى مرافقة للزلة؟!)
🔵 3 جدول الزلة التنفسية ص269
🟡 4 جدول العقيدة الرئوية الوحيدة ص271 (عالقليلة نبصم الأسباب الشائعة)
🔵 5 انصباب الجنب+ تقيح الجنب (كامل الفقرة مهمة جداً جداً): ص271+272+ 273+274
🟡 6 جدول القصور التنفسي ص275

✅ وهي اختصرنالكن اكتر من ربع المادة😂😂💔 وصارت الصدرية كلها ع بعضها شي 30 صفحة.. فهدول درسوهن بصم بصم.. ودرسو الشوامل منيح.. واذا لحقتو البقايا مو غلط.. ما لحقتو عمرهن😎

#إشراقة ⭐️

صباحُ الخير .. 🤍

أسعدَ اللهُ صباح كل مَن نهض لينهل من علوم الطب فيقرأ كتابًا أو يسمع درسًا أو يُقيِّدُ فائدة، كل مَن جعل لنفسه وردًا من هذه العلوم ليرفع الجهل عن نفسه وليعرفَ من خلقه ولماذا أوجدَه.

من أكثر ما يعيق القارئ والدارس للطب قلة الصبر و استعجال تحصيل المنفعة مما يدرسه، فلتعلم أنّ ما تقرأه اليوم سيفيدك غداً في أي اختصاص يُقسم لك أن تدخله.

لا بأس عليكم، شرفُ جلساتِكم إلى مكاتبِكم من شرفِ ما تجلسون له فكما تعلمون أنّ الطب أشرف مهنة و من أعظم الغايات، ومواساتكم في أتعابكم ما تجدون في قلوبكم من هدوء و هداية بعدما تعالجون المرضى مستقبلاً فيدعون لكم بكل خير.

#وطني #د.مارك_رحال
#قلبية

القلبية عليها: 13 س (12-14 س)
⚫️ 1 أعراض وتشخيص: 2 س
🔴 2 قصور القلب: 2 س
⚫️ 3 صمامات+ حمى رثوية: 1 س
🔴 4 إصغائيات: 2 س
⚫️ 5 داء إكليلي: 2 س
🔴 6 لانظميات: 2 س
⚫️ 7 التهاب الشغاف+ التهاب التامور: 1
🔴 8 ارتفاع التوتر الشرياني: 1
⚫️ 9 أدوية قلبية: 1

🔴 10 اعتلالات العضلة القلبية: -
⚫️ 11 أمراض الأوعية: -
🔴 12 الأمراض الولادية: -

✅ كيف لقيتو؟😍😍🔥 صار فينا بالأبحاث اللي بيجي 2س نتوسع عكيفنا (اذا كنا حابين نتوسع وموعرفانين كيف).. ووارد طبعاً يجي عليهن 3 متل ما قلنا..
✅ بينما الأبحاث الصفرية صار فينا نقصا😍😌 لا لا مو نقصا😒😐 بس نتركا للآخر👍 ندرسا بسرعة لنركز عغيرا.. نركز كبصم بس دوراتا وفقراتا.. يعني بالمختصر نناور عرااحتنا😉.. وارد طبعاً يجي عليها سؤال بس هال3 أبحاث سوا ما بظن يكون اكتر من 2 بأسوأ الاحتمالات👍

❎ هل كان في مفاجآت كبيرة بالتوزيع آخر دورتين؟!
✅ هلق آخر دورة هيك اجت تماماً (14 س): أعراض 2- قصور قلب 2- صمامات ولا سؤال- إصغائيات 2- داء اكليلي 2- ضغط 1- تامور وشغاف 1- لانظميات 2- أدوية 2
⚫️ صمامات كان شي غريب انو ولا سؤال (سؤال الاصغائيات مصنف لحالو).. ولانظميات اخر دورتين 2ب3 (بس سهلين كتييير وما بيبررو كل الحش اللي بالمرجع)..
🔴 في سؤال ASD بس يعتبر إصغائيات.. وسؤالين الأدوية بتقدر تصنفن داء اكليلي.. وفي لسا سؤال جاي بالكلية فيك تجاوبو من هون (تبع تضيق الشريان الكلوي والACE.I)

✅ عموماً منقدر نقول ما كان في مفاجآت.. وبالعكس في اتجاه كأنو لتكون الأسئلة واضحة إذا فهمان👍👌

❇️ هلق بالقلبية بالذات ما كتير فيك توظف البوست ع أرض الواقع متل باقي المواد مثلا الصدرية و الهضمية.. بس اذا حابب تدرس مرجع رح يساعدك كتير👍

#وطني
#توزيع_الأسئلة #د.مارك_رحال
#غدية
الغدية بيجي عليها وسطياً: 6س:
1 أعراض+ درق (20ص): 2س
2 داء سكري (30ص): 1س
3 كظر (10ص): 1س
4 أقناد (7ص): 1س
5 نخامى (8ص): 1س
6 جارات الدرق+ متلازمات MEN+ أورام البنكرياس (8س): 0س

*الغدية من المواد قليلة الأهمية امتحانياً.. أو بالأحرى من اكتر المواد اللي بيتناور فيها.. 5-6س أسئلة ع85 صفحة شي كتير يعتبر قليل.. لهيك منخليها للآخر (هي والعصبية والخمجية).. ولما تفوت بالتفاصيل بتكتشف أمور اكتر واكتر..

*درق طبعاً هوي الأهم.. لكن طبعاً كمان نخامى وكظر واقناد باعتبار احجامهن صغيرة كلن كلن مهمين.. والافضل ينبصمو كل هدول من المرجع.. الا اذا في ملخص جد مرتب كتير👌 الشوامل القديمة مهمة كتير كتير.. وتحديد فقرات الشوامل أساسي.. خصوصي بالدرق باعتبارها كبيرة وممكن ينقص منها شوي..
مثلاً أورام الدرق مستحيل يجي عليها.. بينما داء ديكورفان غالباً هوي أحد السؤالين اللي رح يجو😎😎
*طبعاً متل ما قلت.. هاد توزيع وسطي.. اذا اجا 3 درق و2 كظر وولا سؤال نخامى فهوي شي طبيعي وضمن التوقع😉 أما إذا اجا 3 سكري و3 نخامى ساعتا بيكون صار تغيير حقيقي وجذري🙄 واحتمال يصير هالشي كتييير نادر..
*آخر ملاحظة هي انو الدريقات اللي عأساس من وقت كنا رابعة كتييير مهمة.. وكتير بتاخد وقت وبدها فهم.. ولا سؤال بيجي عليها😂💔 بكل تاريخ الوطني اجا سؤالين تلاتة.. منبصمن وحاج.. عموماً هي 4 صفحات..بس انو تنقرا دور وزيادة.. لان بصراحة وقت قعدت حاول احفظن منيح وافهمن.. صارو ياخدو وقت بحر.. انو بتتذكرو قصور دريقات كاذب.. وكاذب كاذب😂💔
فهالمناورات بتخلي المادة الضخمة مادة صغيرة وسلسة.. (نشالله ما بتطلع معكن 30-40 صفحة..) منتوجه بسهولة ع شو نركز.. ولا تنسو الشوامل دوم هي الأساس بدراستنا..خصوصي الجديدة منها👍

⚠️دائماً كانو يقولولنا السكري هوي أهم شي.. من مبدأ رح يجي عليه أسئلة حتماً.. بس اللي انا شايفو انو ملخص صغير بكفيه وممكن الواحد يغانر يتركو للأخير أقل شي أهمية..

والأفضل اذا ما كنت نيرد وملحق كلشي.. تدرسلو أي ملخص صغير كتير.. صغير قد مافيك.. نقاط وارد منيحة كتير للي مو ملحق..
*أحسن خطة لقيتها انو بحطلو يوم واحد للسكري.. هوي 30 صفحة..بقراه دور سريع واحد وبحدد الأمور اللي مهمة كتير من وجهة نظري.. الأمور العامة يعني.. وبعدها بحدد عليه كامل الشوامل وفقراتها.. ومابدرس وبركز غيرهن👍 هيك ما بيضيع وقت أبدا.. وبكون اخدت فكرة عامة.. ومعد بدرس غير المهم👌

تنويه هام: عادة بيجي سؤال أو تنين لكن آخر دورة اجا 4 اسئلة..

✅ الفقرات الهامة في السكري: (حسب صفحات المرجع)
🔴 فقرة الخضاب السكري: ص 387
🔴 الجدول تبع التشخيص: ص 388
🔴 جدول المقارنة بين نمطي السكري: ص 389
🔴 الحماض الكيتوني السكري DKA: الصفحتين 391+ 392 كاملتين.. خاصة الجدول صفحة 392.. وركزو منيح مين عرض ومين علامة
🔴 نقص السكر الدم: الصفحة 394 كاملة فقط (خاصة الجدول)
🔴 جدول الاختلاطات: ص 399
🔴 الأدوية: الصفحتين 401+402 كاملتين فقط
🔴 جدول عوامل خطر اعتلال الشبكية: ص 406
🔴 عوامل خطر اعتلال الكلية: التعدادات ب أعلى الصفحة 409 فقط
❎ وهيك صار السكري أقل من 10 صفحات بدل 30 صفحات.. درسو عالفقرات مع الدورات ودعولنا.

#وطني #د.مارك_رحال
#توزيع_الأسئلة
#عصبية:
وسطياً 4-5 أسئلة عادة:

1 الصداع: 1-2س
2 الصرع: 1-2س
3 التهاب السحايا+ غيلان باريه+ الوهن العضلي الوخيم: 1س
4 النشبات+ باركنسون+ التصلب العديد+ الأعصاب القحفية+ العته+ ماتبقى: 1س

عطول الأسئلة سهلة وفقرات دورات.. ف كمان كتييير حرام يندرس كامل القسم بالمرجع.. لهيك الأفضل تندرس منيح من عصبية الأطفال (حتى بالأطفال الشغلات النادرة اللي بالآخر كلا للحذف) وبعدين شوامل باطنة.. وهالكم فقرة المهمين:

1 الصداع+ الصرع: (قسمن بالأعراض والتشخيص + قسمن الخاص) وبيشمل الصفحات: 605+607+ 609+610+ 641+642+ 643+644 +645+646 (الحالة الصرعية مهمة كتير.. من السبات فيكن تحذفو عاد)
2 التهاب السحايا: 659+660+ 661+662+663
3 غيلان باريه: ص680+681
4 الوهن العضلي الوخيم: ص683+684
5 باركنسون: ص655+656

*وهيك عملنالكن العصبية 20 صفحة بدل 80ص😌 10 صفحات منهن مهمين كتير واللي هني صرع وصداع.. والافضل يندرسو.. و10 صفحات في الواحد يناور فيهن إذا درس اطفال منيح.. بعدها بيقراهن دور سريع وبس بيركز الدورات وحاج.

#توجيهات
أسئلة الامتحان الوطني غالباً عم تركز عالشي العام والواضح فحاولوا تركزوا بكل مرض على:

🔴العرض الأشيع
🔴 التشخيص الأفضل
🔴طرق الاستقصاءات (تعداد)
🔴 أول اجراء
🔴 استطبابات إعطاء علاج ما
🔴مضادات استطبابات

السلام عليكم ورحمة الله وبركاته

شوية نصائح صباحية حبينا نقدمها الكم 🌸

✨ لا تتعبوا و تملوا هانت بكرا بس تشوفوا علامتكم بعد التقديم رح تنسوا كل التعب يلي تعبتوا إن شاء الله 😌👌..

مازال في وقت للدراسة والمراجعة والمعدل العالي إن شاء الله..

✨ الفحص الوطني رهبتو المعنوية أكتر من رهبة معلوماتو فلا تدرسوا بتوتر وادرسوا برياحة لأن الأسئلة معظمها سهلة إن شاء الله..

✨رح تحسوا حالكم نسيانين وما متذكرين شي هاد الأمر الطبيعي عند الكل، رح تذكروا إن شاء الله كلشي بالامتحان لكن المراجعة ثم المراجعة ثم المراجعة هي الأهم بالتحضير لهالفحص.

✨ أي سؤال بتواجهوه بالدورات وفيه خيارين غلط أو خيارين صح أو في إشكالية فهالشي عادي وأقل من عادي فلا تيأسوا وتقولوا ماعمنعرف ندرس لأنو حتماً الدراسة أول وجه حتكون سطحية نوعاً ما و مع الإعادة رح تقدروا تحلوا أي سؤال إن شاء الله..

#وطني.
#توزيع_الأسئلة #د.مارك_رحال
#خمجية:

ما قبل المرجع كان يجي سؤالين فقط.. ما بعد المرجع صار يجي 5 أو 6.. وآخر دورة كانو 3..
قد ما كانو الأسئلة رح يضل قليل مقارنة ب90 صفحة مرجع💔 فحرااام تندرس كاملة..
إما ملخص صغير وزيادة.. أو بعد ما تدرس خمجية الاطفال منيح بس حل الدورات.. وركزلي هالفقرات ودعيلي😉:

1 الحمى المالطية (داء البروسيلات): ص78+79
2 الحمى التيفية: ص83+84
3 الكوليرا: ص88
4 الإسهالات (جدول اسهال المسافرين+ جدول الإسهال المدمى+ المطثية العسيرة+ جدول الأغذية المترافقة مع أخماج معوية ): ص56 +ص87 +ص88
5 جدول الأمراض المميز للإيدز: ص131
6 فقرة التمنيع: ص50
7 الأخماج المكتسبة في المؤسسات الصحية: ص49

*وهي عملنالكن الخمجية 10 صفحات بدل 90 صفحة😌😎 ونصيحة درسو خمجية الأطفال قبلها.. والدورات بعدها.. ونشالله صار الوضع تمام👌

#وطني
#توزيع_الأسئلة #د.مارك_رحال
#رثوية

الرثوية كلها 40 صفحة وعليها 7 أسئلة ف تعتبر مادة لازم تندرس كتير منيييح.. التوزيع مو ثابت.. وممكن يجي من أي شي
الفكرة انو غاااالبية الأسئلة فهمية ومسائل سريرية.. ف مو شرط ينحفظ كلشي بصم..

انتو درسو المادة كاملة إذا معكن وقت من المرجع (طبعاً منذكر انو رثوية الاطفال للحذذذف فعلياً.. لأن بكل سنين الوطني خلال 26 دورة اجا 4 اسئلة فقط.. كتير سهلين وبيتجاوب عليهن من الباطنة.. أما رثوية الاطفال بالمرجع كتييير ضخمة وصعبة وحش.. ومعبية اورتوبيديا عظمية وتفاصيل داء ستيل وتمرمر العظم ومدري شو شغلات تافهة ما بعمرا بتجي😂💔).. بس ما تبصمو كلشي وتضيعو وقت.. انتو بتقروها كلها وبهاد البوست رح حدد الشغلات اللي مهمة كتييير وبدا بصم والشغلات اللي فينا نحذفا..
إذا وقتك ضيق دروس مصدر مختصر ودورات وحاج👌👍

✅ 1 الأعراض والتشخيص: أول 5 صفحات (561-565) كتير مهمات خاصة أول صفحة.. الجداول صفحة 563+564+565 بصم بصم بصم..
⚫️ تاني 5 صفحات مو كتير مهمات (566-570).. دور سريع ودورات وحاج😌
✅ 2 الداء التنكسي: (576-579) كلو مهم.. ولازم ندرسو ونفهمو.. بس أهم أهم شغلتين هني: مين المفاصل اللي بتنصاب؟! موجودين بالتفصيل بالصورة صفحة 571+ المظاهر الشعاعية الأربعة اللي موجودين بفقرة الاستقصاءات صفحة 574
✅ 3 النقرس: (575+576+577) فصل مهم وصغير وظريف.. بس الشي اللي كتير كتير مهم وبدو بصم بصم هوي الجدول ص575
✅ 4 ألم الليف العضلي: هوي صفحة وحدة (578).. حذف طبعاً!
✅ 5 أخماج العظام والمفاصل: عبارة عن صفحة ونص.. صغار وكتير مهمات.. ومهم كتير نفرق مؤهبات ذات العظم والنقي عن مؤهبات التهاب المفصل الخمجي (مثلاً التقدم بالعمر مؤهب لالتهاب المفصل الخمجي أما العمر الشاب مؤهب لذات العظم والنقي).. العلاج تقريباً نفسو..

✅ 6 الداء الرثياني: (580-585) عموماً فصل مهم.. بس اللي بدو بصم هوي: المفاصل اللي بتنصاب مين؟+ جدول معايير التشخيص ص581 (هاد بصم بصم بصم+ جدول الأعراض الجهازية ص583 + الاستقصاءات ص583 مهمة نوعاً ما.. مو لدرجة الجداول بس لازم ندرسن..
⚫️ آخر صفحتين 584+585 تبعوت العلاج مو كتير مهمين.. قراءة سريعة يعني.. وبالنسبة لجدول العلاج ص584 فاطمنو مو مهم كتير وما بدو هالبصم.. بس قرو دور واذا لقيتو شي عرض جانبي مميز حفظوه وبس..
✅ 7 داء ستيل: ص585.. مو كتير مهم.. منقرا عالسريع
✅ 8 التهاب المفاصل والفقار سلبي المصل: (586-589).. الجدول ص586 بصم بصم بصم كتييير مهم.. وأهم فقرة هون فقرة داء رايتر (التهاب المفاصل الارتكاسي) 588..
✅ 9 أمراض النسيج الضام: (590-595) أهم شي فيهن اكيد الذئبة SLE.. والجدول ص 592 بصم بصم بصم.. باقي البحث درسوه.. المهم تحفظو الدورات منيح والأفكار اللي عم تجي ما شرط تفوتو بكل التفاصيل..
✅ 10 التهابات الأوعية: (596-599) هالفصل ما كتير مهم.. بس الفكرة اللي كتير مهمة معرف التصنيف وكل مرض اي أوعية عم يصيب.. كمان تذكرو كتير منيح انو بهي الأمراض في تظاهرات بكذا جهاز (في سؤال دورة مهم لعب ببساطة عهي الفكرة).. كاوازاكي هون مو مهم.. ب الأطفال غاية بالأهمية ومشروح بالتفصيل ف بتبصموه هنيك اما هون لا.. هينوخ شوئنلاين كمان مشروح ب غير اماكن والمهم فيه بس الأعراض الرئيسية الأربعة الرئيسية.. داء بهجت ص599 مهم حفظوه
✅ 11 أمراض العظام: (599-604) أهمية البحث متوسطة.. أول كم صفحة بيحكو عن تخلخل العظام وتلين العظام.. وهني أهم شي نسبياً.. مو مهم نحفظ كلشي بس لازم نعرف شو الفرق.. أول صفحة ونص هني الأهم (599+600).. الجدول ص599 بصم بصم بصم.. بالنسبة لتلين العظام أهم شي الأسباب.. والمخبرياااات.. (هي غدية عملياً😎😍).. يعني الpth والكلس والفوسفور بالبول والدم مرتفعين ولا نازلين ولا شو؟!
⚫️ آخر صفحتين حذف.. تبعوت داء شويرمان وتكون العظم الناقص والأورام العظمية..

❎ طبعاً الدورات بصم كاملة🔥🔥
❎ المادة سهلة وأسئلتها فهمية.. تعاملو معها ببساطة.. ما تحاولو تحفظو كلشي فيها بصم لأن ما بيجي هيك.. ورح تضيعو وقت كتير عالفاضي.. وبتصير بشعة💔

وهيك خلصنا البواطن كلها😎😍 ونشالله مكفيين معكن بالأطفال..
موفقين جميعاً💙

انتهينا من بوستات الباطنة 😃 رح نكمل إن شاء الله ابتداءً من الغد بقية المواد

هلق بعد شوي في بوست كتيير مهم رح ننشرو فيه جواب لسؤال عم ننسألو كتير ، رح نعطي رأينا بالموضوع إن شاء الله بكل موضوعية.

#من_استفساراتكم #هام_جدا #سؤال_مكرر

بدايةً في عنا تقييمين للموضوع لحتى نعرف إذا معلومات الأطفال2 المذكورة بالدمج كافية، تقييم هو النظر لأسئلة الامتحان والتقييم الآخر هو النظر إلى مرجع الأطفال ، إذا بدنا نقول أنه الدمج غير كافي بالمقارنة مع المرجع نعم غير كافي، أما بالمقارنة مع الأمور المطلوبة للامتحان هو كافي إن شاء الله..

يعني هل تم دمج مرجع الأطفال بشكل شامل مية بالمية ؟ لأ ، حتى الجماعة ما قالوا هيك أنه نحن عم ندمج كل كلمة موجودة بمرجع الأطفال لكن هو كافي بنسبة تفوق التسعين بالمية بالنسبة للامتحان.

يعني عم يجي مثلاً ستة وتلاتين سؤال أطفال 2 بينحل أقل شي 28_30 سؤال من أصل 36 ، هالستة أسئلة مو قصة أنه من المرجع مو موجودة بالدمج بالضرورة، بل برأينا هي أسئلة خلافية ،ممكن أسئلة خارجية، ممكن أسئلة مُصاغة بطريقة معينة ما استوعبها الطالب.

لناخد مثال قسم الصدرية بالأطفال 20 صفحة لو أردنا اختصار و تكثيف هالفصل بحذف الأمور المكررة، ففي كتير سرد و أمور عبتتكرر و حذفنا التمهيدات بشكل مبالغ فيه بضلوا ساعة عم يحكوا ليعطوا الزبدة فنحن بالامتحان بيجينا الخلاصة و ليس شرح الفكرة ، ف لو أخدنا فقط الخلاصات و قاطعنا مع الداخلية رح يطلع معنا الفصل حوالي 11صفحة فهي ك امتحان _ بما أنو عم يجي فقرات الدورات بالوطني بشكل عام_ كافية إن شاء الله لكن ك شمولية تفاصيل و معلومات فهو غير كافي..

نقطة هامة للأمانة ببعض الفصول طريقة الدمج غير مريحة و بتحتاج شغل أكتر لكن عموماً هي طريقة دراسة و كتيرين فضلوها بتختصر وقت و البعض ما ارتاحوا ف الأمر تفضيل شخصي..

عنا اقتراح بيرضي و بطمن يلي دارس دمج 😄 أنو تقرؤوا من مرجع الأطفال أو من شي ملخص الفصول الهامة و تشوفوا إذا في نقص بتضيفوا ع النوط 😃
الخمجية و العصبية و الصدرية (خصوصاً الخمجية و العصبية بالداخلية مو مهمات) و طبعاً اللي ملحق ممكن يعمل هالخطة لكل الفصول ما بطول قراءة الفصل بعد دراسة الدمج.

النصيحة الأهم على الإطلاق بهالوقت المتبقي ما حدا يبدل مصدر مراجعتو و يعتمد نفس المصدر الأساسي يلي لخص و كتب عليه ملاحظاتو 😃 و لحتى تتفعل عندكم الذاكرة البصرية المفيدة 😌

أخيراً لا ننسى أنو طريقة الإجابة عن الأسئلة تحتاج محاكاة و استيعاب السؤال وفهمه حتى نجاوب عليه بشكل صحيح فالأمر توفيق من الله بالنهاية لنختار الإجابة الصحيحة إن شاء الله 👌

الحمد لله على أشرف مهنة وأعظم غاية ❤️
جمعة مباركة و صباح دراسي موفق إن شاء الله 🌸