UPDATE: Golaha dagaalka ee Israa’iil, ayaa ansixiyay ballaarinta howlgalka ciidanka Israa’iil ee Rafah, tan oo sare u qaadi karta khasaaraha dhimashada ee weerarrada Israa’iil ay ka gaysanayso Rafah, oo ah goobta u dambeysa ee ay gabaad ka dhiganayeen Falastiiniyiinta.

Fiiro gaar ah;

Mareykanka ayaa maalin ka hor ku hanjabay inay joojinayaan hubka ay siinayaan Israa’iil , haddii la ballaariyo howlgalka Rafah, sababo la xiriira weerarrada inay ka dhalan karaan dhimasho aan xad lahayn oo ay la kulmayaan qoysaska deggan teendhooyinka Rafah, laakin sida laga arkay warbixin ay soo bandhigtay warbaahinta Axios , waxaa lagu sheegay ballaarin howlgalka Rafah inan la gaarsiin doonin, waxa uu Biden u arko khadka cas.

UPDATE: Safiirka Israa’iil u fadhiya Qaramada Midoobay, Gilad Erdan ayaa maanta nuqul ka mid ah Axdiga Qaramada Midoobay ku jarjaray mishiin yar oo uu la yimid xarunta guud ee QM, kaddib markii goluhu meel mariyay qaraar siinaya Falastiin xuquuq cusub iyo dib u soo noolaynta xubinnimada Qaramada Midoobay. Go’aanka Qaramada Midoobay , ayaa ku sheegay mid soo dhaweynaya maamul ‘argagixiso ah’.

Muuqaal kale oo ay Xamaas ku soo muujisay toogasho toos ah oo ay la beegsanayaan ciidanka Israa’iil!

UPDATE: 2 milyan oo qof ayaa maanta ka qaybgalay isku soo bax lagu taageerray Falastiiniyiinta Qasa oo ay ka soo qabanqaabiyeen kooxda Xuutiyiinta.

UPDATE: Gantaallo ay ku weerarreen kooxda Xisbullah deegaannada ay Israa’iil haysato ee waqooyiga ayaa dhaliyay dab weyn oo qabsaday aag ku dhow Kiryat Shmona.

UPDATE: Amiirka Kuwait, Sheekh Mishaal Al-Axmed Al-Sabah ayaa kala diray baarlamaanka, wuxuuna laalay qodobbo dastuuri ah, sida uu baahiyay telefishinka dawladda Kuwait. Lama bixin faahfaahin la xiriirta waxa is beddelka deg degga ah ku dhaliyay Amiir Mishaal.

UPDATE: Amiirka Kuwait, Mishal Al-Sabah ayaa hadal ka jeediyay telefishinka Kuwait, isagoo ka hadlay go’aanka uu ku kala diray Baarlamaanka , oo sidoo kale uu ku laalay qaybo ka mid ah dastuurka, wuxuuna amar ku bixiyay in wax laga beddelo dastuurkii 1962-kii markii ugu horreysay abid, isagoo ku sababeeyay in loo baahan yahay in dalka la ilaaliyo.

Go’aanka Amiirka, oo soo muujiyay inay Kuwait joojisay iskudaygeedii tijaabada hannaanka dimuqraadiyadda, wuxuu u sababeeyay inay Baarlamaanka iskudayeen inay isku ballaariyaan go’aamada qaranka, ayna wadaan dhagar ka dhan ah Amiirka, iyagoo isku dayaya inay saameyn ku yeeshaan cidda noqon doonta dhaxal sugaha.

Waxa uu si buuxda ula wareegay arrimaha siyaasadda; isagoo markaa laalay dhammaan hay'adaha dimuqraadiga ah. Sidoo kale waxa uu hakiyay qodobbo kala duwan oo ka mid ah dastuurka, muddo illaa 4 sanno ah.

UPDATE: Madaxweynaha Colombia, Gustavo Petro ayaa ku baaqay si loo joojiyo xasuuqa ay Israa’iil u gaysanayso Falastiiniyiinta in la soo xiro Netanyahu, isagoo markaa usoo jeediyay maxkamadda dambiyada caalamiga ah inay ku dhaqaaqdo tallaabadan,sida ay ku warrantay Al-jazeera.

Colombia, waxay toddobaadkii hore si rasmi ah u jartay xiriirkii diblomaasiyadeed ee ay la lahayd Israa’iil, iyagoo ka jawaabaya xasuuqa ay wajahayaan dadka Qasa.

UPDATE: Warbaahinta Masar ayaa billowday kacdoon ka dhan ah Israa’iil, kaddib duulaanka ay ciidanka Israa’iil ku qaadeen Rafah, oo ah xadduudka Masar iyo Qasa , halkaa oo sidoo kale ah goobta u dambeysa ee Falastiiniyiinta gabaadka u ahayd , sii socoshada weerarrada Israa’iilna waxay dhalin karaan dhimasho badan oo ay la kulmaan Falastiiniyiinta, si taa loo joojiyo warbaahinta Masar ayaa diiradda saaraysa ka hadlida iyo baaq la xiriira inay Masar qaadato go’aan ay uga baxayso heshiiskii Camp David.

Dhinaca kale, wargeyska Israa’iil ee Maariv ayaa warbixin uu soo bandhigay ku sheegay in mas’uuliyiinta Masar ay u sheegeen madaxa hay’adda sirdoonka Mareykanka ee CIA-da, William Burns,inta uu booqashada ku joogay Masar in Maraykanku uu “Israa’iil ku cadaadiyo inay joojiyaan dhammaan hawlgallada ay ka wadaan Rafah, dibna ay u galaan wada-xaajoodyo dhab ah oo la xiriira xabbad-joojinta, haddii kale Masar inay baabi’in doonto heshiisyada Camp David.

Fiiro gaar ah;

Israa’iil ayaa u muuqata hadda inay jabisay heshiiska Camp David, kaddib markii ay ciidan iyo hubkeeda keentay marinka cariiriga ah ee isgoyska Filadelphi oo isku xira Masar iyo dhulka Falastiiniyiinta, halkaa oo ay khad cad u aqoonsantahay Masar haddii ay soo gaaraan ciidanka Israa’iil, taa oo dhacday labo maalin ka hor mana jirto wax tallaabo ah oo ay qaaday Masar.

Muxuu ahaa heshiiska Camp David?

46 sanno ayaa kasoo wareegtay Markii la saxiixay heshiiskii Camp David ee ay gaareen hoggaamiyayaashii hore ee waddamada Masar iyo Israa’iil, September 17-keedii sannadkii 1978.

Heshiiskan ayaa ahaa kii ugu horreeyey ee ay kala saxiixdaan Israa’iil iyo waddan carab ah oo ay deris yihiin, si looga dhex dhaliyo nabad iyo iskaashi dhexmara, meeshana laga saaro isku dhac labada dhinac dhexmara. Camp David waxa loogu magacdaray halka uu ka dhacay oo ah beerta ay ku nastaan madaxweynayaasha Maraykanka ee ku taal duleedka Washington.

UPDATE: Wasaaradda caafimaadka Qasa, waxay maanta sheegtay tirada dhimashada duulaanka Israa’iil ee Qasa inay gaartay 34,971, halka 78,641 ay ku dhaawacmeen.

UPDATE: Israa’iil ayaa sheegtay inay duulaan horleh ku qaadi doonto waqooyiga Qasa, iyadoo wargelisay dadka deggan xerada Jabalia inay u guuraan goobo nabdoon, sababo la xiriira howlgallo militari oo ay halkaa ka fulin doonaan, tan ayaa ku soo aadaysa iyadoo sidoo kale howlgal ay ka wadaan ciidanka Israa’iil koonfurta Qasa illaa Rafah.

Fiiro gaar ah;

Siddeed bilood oo uu socdo dagaalka Qasa, waa markii u horreysay oo si isku mid ah ay u doonayso inay dabka wada gaarsiiso Israa’iil dhammaan marinka Qasa illaa Rafah, mar kale ayay sidoo kale Israa’iil muujisay jahwareerka qorshaha dagaalka Qasa, maaddama ay sheegayaan 8 bilood kaddib halkii u horreysay ee duulaanka ay ku qaadeen ee waqooyiga Qasa inay dib ugu laabanayaan, iyagoo ku andacoonaya inay dib usoo laabatay awoodda Xamaas ee waqooyiga Qasa. Haddii aad xasuusatis faalladii u dambeeysay ee dagaalkan aan ka qoray; waa natiijo aysan waligiid arki doonin Israa’iil inay ciribtirto Xamaas , taa beddelkeeda waxay ku socon doonta Israa’iil inay xasuuq kula kacdo rayidka.

UPDATE: Telefishinka CNN ayaa soo bandhigay warbixin naxdin leh oo ay ku jireen sawirro si qarsoodi ah loo soo qaaday oo soo muujiyay xabsi ay Israa’iil ka hirgelisay saxaraha dulleedka Qasa, halkaa oo lagu xiray maxaabiista ragga ah ee Qasa ay ka soo qabteen tan iyo 7 October.

Maxaabiista Falastiiniyiinta ayaa loo ciqaabay si darran oo naxariis darro ah , waxaa laga jaray xubnaha jirkooda, waxaana loo ciqaabay iyadoo aan laga rabin in laga hadalsiiyo ee ciqaabka looga aargudanayo weerarkii Xamaas. Kuwa dhaawaca daran loo gaysto waxaa laga xiraya gacmaha iyo lugaha intii sariirta la dulsaaro, iyagoo xiran xafaayad, cuno ahaanna maxaabiista oo dhan waxaa la siinaya cows , warbixintana waxay sheegtay in goobta ay tahay mid aad usoo uraysa oo kaliya dhawaqa ciqaabka ay la kulmayaan maxaabiista laga maqlayo, loomana oggala inay maxaabiista hadlaan.

UPDATE: Afhayeenka guutooyinka hubaysan ee Xamaas, Abu Cubayda ayaa horraantii caawa sheegay in mid ka mid ah maxaabiista Israa’iil oo haysta dhalashada Ingiriiska uu u geeriyooday dhaawac ka soo gaaray duqeymaha diyaaradaha Israa’iil.

Nadav Bublabil, oo 51 ah ayaa warbixinta lagu sheegay inuu u geeriyooday daryeel xumo, sababo la xiriira go’doominta iyo beegsiga goobaha caafimaadka ee Israa’iil.

UPDATE: Wargeyska Washington Post, ayaa isagoo xiganaya ilo sirdoon, wuxuu soo bandhigay warbixin uu ku sheegay inuu Mareykanka usoo bandhigay Israa’iil inay siin doonaan xog sir ah oo la xiriira hoggaamiyayaasha Xamaas ee ku sugan Qasa iyo gododka muhiimka ah haddii ay Israa’iil ka laabato howlgalkeeda Rafah. Warbixinta ayaa intaa ku dartay inuu sidoo kale Mareykanka u sheegay Israa’iil inuu ka caawin doono dhismaha magaalo teendho ah oo qalabaysan oo loo daad-gureeyo dadka rayidka ah ee deggan Rafah.

Sidoo kale , warbixinta ayaa soo muujiysay sida ay Masar diyaar ugu tahay soo afjarida gododka, iyadoo Mareykanka uu sheegay inay Masar si dhow uga wada-shaqeyn doonaan sidii loo heli lahaa marinnada dhulka hoostiisa mara ee xadka u dhexeeya Masar iyo Rafah.