​ماعرف منين ابدي الصراحة خايف احجي كلام ممكن يكون جارح او مامسموحلي انشره لكن اليوم موضوعنا او طلبنا منكم تحديداً عن شاب عراقي مكفوف فايت بمجال على مر تاريخ المكفوفين ماكو احد بيهم اتجراء يدخل هالمجال لان يعرف بنفسه مارح يفلح بيه بسبب ظرفه اللا ارادي وخصوصاً بالعراق البلد الرائع الذي لا يدعم أي انسان كان حتى لو كان من ذوي الاحتياجات الخاصة.. أخذتلي سيرج سريع ويكبيديا اشوف منو من المكفوفين استطاعوا ان ينجحوا بمجال البرمجة او ينعرفوا ما كدرت الكه أي مكفوف داخل مجال تقني ومعروف على عكس علي اللي ديشق طريقة في سبيل أن العالم يعرفه هو مو بس اسمه علي هو المبرمج والسستم ادمن و أحد المناضلين بمجال البرمجيات المفتوحة وخريج ادأب الإنكليزي المهتم جداً ومن اشد المعجبين بالأوبن سورس واللينكس تحديداً

ولآنه يحب الالكترونيات داخل هذه المجال وديكدر يثبت نفسه تماماً امام زملائه بمجاله.. وعن طريق الصدفة ولآنه بطل ومايتاثر بالكلام سلبي ابداً رغم كل العثرات اللي تصير امامه كونه بالعراق وبسبب كل اللي يعرفوا من أصدقائه او ناس تتعرف عليه يحاولون قدر الإمكان يساعدوه باللي يكدرون عليه حتى كَدر يحصل على وظيفة يحبها عند دعوته لجروب المطورين العراقيين وقدم على شركة أير ثلنك للاتصالات وتم قبوله مباشرتاً.. (حجي بيناتنا هذه الشغلة المفيدة والوحيدة اللي سوتها أير ثلنك بحياتها بالعراق أنها انطت فرصة لناس هواية اختصاصهم الاكاديمي مو اي تي لكن انتاجهم يوصل افضل من الاكاديمي احياناً) ما عرف اذا الشاب رح يكدر يستمر بهذه المجال وماحب اقيم احد لكن اللي اعرفه الولد بأزمة كورونا مثل اي شاب مثلنا محبوس بالبيت ورة الحاسبة دتمر عليه حالة نفسية بسيطة وديحس بكئابة قوية وقافلة عنده الا يخلي الناس كلها تعرف قناته اللي سواها (Funny tech man) حتى يتقرب من الناس وتحديداً لآنه أعتقد ديضوج من عدالة الحياة مو لآن لله او اي شيء بهالكون ما خلاه يشوف لكن هو ضايج لان ديدرس ويتعلم بمجال اللي بيه ينظلمون اعلامياً واللي عدهم وقت يظهرون للعلن همه التافهين تقنياً.

وحتى نجيب مثال معروف الاخ الكبير العلامة سوبرمان العراق او هذه الثاني الهكرز العميق احمد النعيمي غالباً أي واحد بالمجال يشوف القذارة التقنية اللي ينشروها ينقهر مو لآنهم احسن منه بل لآن المستمع ديشوف شي كلش غلط وجذب بجذب بنفس وقت اذا قرر ينطي رائييه رح يدخل العنصر الانثوي بالموضوع ويخرب ام العقل ويصير الأغلبية للأحلى :/ لذلك تشوفون اغلب التقنيين من ينفتح طاري السكيورتي والهكرز العميقين مثل الغالب والنعيمي يشيل نفسه ويسوي لو أكزت من الكروب لو بلوك للبيج او يشاركوهم ويه اصدقائهم ويحششون عليه بصمت بيناتهم بكروباتهم السرية..

علماً أنو اكو فعالية جداً لطيفة باحد سيرفرات الدسكورد العراقية اي واحد يدور طشه أو يعتبر نفسه متمكن بمجاله يتم دعوته لسيرفر دسكورد فويس سشن ويتم سواله كم سوال بالمجال اللي ظهر عليه بالأعلام يفيك بيه اني واني.. علماً انو غالبية مارح يكدرون يتأقلمون على الأقل محلياً مع أعضاء IQDevs اللي هو تجمع لعدد قليل من التقنيين داخل وخارج العراق اللي همه اما واصلين مرحلة لطيفة بمجالهم أو انهم يعملون بشركات جبيرة سواء محلية او عالمية (سمعت ان أخر شيء الانضمام باشتراك شهري) المهم الولد علي قرر ويه نفسه أنه يسوي قناة تيليكرام ويجمع بيها اي شخص مهتم بالتقنية ويشاركه يومه ويطلب منهم انهم يستغلوه ويستفيدون منه قدر الامكان لآنه بالازمة الحالية محتاج جداً يتعرف على ناس جدد اكثر ويكون قريب اكثر عن طريق كتابة التسجيلات الصوتية.. اللي اتمناه منكم شغلتين عفواً ثلث شغلات

اولاً: كونوا لطيفين وياه من الناحية الاجتماعية ولحد يساله أسئلة شخصية خارج توجه قناته الا اذا هو حجه

ثانياً: لا تكونون لطيفين وياه تقنياً ابداً وهالشي بصالحه اسالوه كل اللي تحتاجوه وناقشوه على كد ماتكدرون رح يكون الكم بالمرصاد لآنه يحب يبحث ويملك اجوبة كلش لطيفة اضافة الى انه اللي محتاجه حاليا هو يعرف انوا هل رح يكدر يتأقلم من يتعرف ويتواصل مع ناس هواية او لا.

ثالثاً: أعتبرو نفسكم ماقريتوا هالبوست وعلساس فتوا لقناته عن طريق الصدفة لا اكثر حتى يتشجع انه يستمر وحده وأتمنى تشاركون رابط قناته او اللي يكدر يساعده سواء تصميم او ترتيب مواضيع او مشاركة رابطه او ايشي يخليه يعبر هاي الازمة حيكون متفضل مو لآحد وانما لنفسه أنه سوا شيء لطيف اونلاين xD.

رابعاً: الولد كثير بنات وطالبات وداعمين اله من الاناث يتابعوه لذلك لحد يزحف رجاءاً كلها كم يوم واجيبلكم كورس ب 200$ رح يفيدكم كلش بالسيطرة على هالمشاعر المؤقتة

تكَدرون "تستغلوه علمياً" بـ ( تعلم اللغة الإنكليزية هو ادأب انكلش / تعلم البرمجة / إدارة السيرفرات / اخبار واستفسارات عامه عن التقنية )

https://t.me/Funny_TechMan

نتفلكس العرب المجاني

850+GB من كورسات الهاكانك الاخلاقي