سيكوباتي ولا نرجسي؟ لا لا… استنى ده غالبًا Borderline. 😄

زمان لما اتنين كانوا بيسيبوا بعض كان السؤال:

سابني ليه؟ إيه اللي حصل؟ أنا عملت إيه؟
هو عمل إيه؟ إيه اللي بوّظ العلاقة؟
يا تري ممكن نرجع؟

دلوقتي الموضوع اتطور جدًا. 😄

العلاقة تخلص… فنفتح بعدها عيادة نفسية للطرف الآخر.

هي تقول: أصل ده نرجسي

صاحبتها تقول لها: نرجسي إيه بس ده سيكوباتي
ده Toxic وGaslighter كمان

وهو الناحية التانية قاعد مع أصحابه: يا جماعة أنا عايز أفهم حاجة بس…

هي الهانم شخصيتها إيه؟

واحد يقول له: دي Borderline يا ابني.

والتاني بعد فيديوهين Reels: لا يا باشا… دي واضحة جدًا. 😄

وفجأة…

اتنين كانوا من أسبوع بيقولوا لبعض بحبك بقوا النهارده لجنة تشخيص لبعض.

وهنا الهزار يخلص.

لأن اللي بنعمله مش بسيط زي ما إحنا متخيلين إحنا أخدنا مصطلحات نفسية لها معنى وتشخيص ومعايير…

وحولناها إلى شتايم والقاب اجتماعية حديثة.

نرجسي سيكوباتي Borderline. Bipolar.

وكأنها كلمات مرادفة لـ: وحش كذاب أناني أو مؤذي

وده مش تحضر ومش علم مش حاجه علي الموضه

ممكن شخص يؤذيك من غير ما يكون عنده اضطراب نفسي.

ممكن يكذب عليك من غير ما يكون سيكوباتي

ممكن يكون أنانيًا من غير ما يكون عنده اضطراب شخصية نرجسية.

وممكن مزاجه يتغير من غير ما يكون Bipolar.

التشخيص مش انطباع.

ومش بيتعمل من حكاية طرف واحد بعد خناقة ومش من Checklist على السوشيال ميديا.

ومش لأن خمس علامات في Reel فكّروك بالإكس يبقي هو كده

لأن لما نستخدم أسماء الاضطرابات كاتهامات…

إحنا مش بس بنظلم الشخص اللي قدامنا.

إحنا كمان بنعمل وصمة للناس اللي فعلًا عايشة مع اضطرابات نفسية وبتتعالج منها.

والأغرب إننا ساعات بنشخص اللي حوالينا مش علشان نفهم الطرف الآخر…

لكن علشان نخرج من العلاقة وإحنا مطمئنين إن:

المشكلة كلها كانت فيه وده مريح جدًا بس مش دايمًا حقيقي.

بعد أي علاقة من حقك تقول:

هو كذب عليّ.

هي أذتني.

هو ما احترمش حدودي.

إحنا ما نفعناش لبعض.

لكن مش من حقنا نحول وجعنا إلى شهادة تشخيص للطرف الآخر.

يمكن العلاقات مش محتاجة بعد نهايتها دكتور جديد…

قد ما محتاجة شوية صدق.

العلاقة فشلت؟ نفهم ليه.

لكن بلاش كل Ex يخرج من العلاقة ومعاه تشخيص مجاني. 😄

وسؤالي بجد:

إمتى المصطلحات النفسية اتحولت من وسيلة تساعدنا نفهم الإنسان… إلى سلاح نضرب بيه بعض؟
-مساء الورد