مبادرة ساعة للتدريب

*دا ليك و لغيرك*

في بداية مرحلة الجامعة بكون في خوف من حاجات كتير ومن أول سمستر وبكون الوضع غريب شويه على الطلاب من كل النواحي و تحس رأسك جايط كدا و تسأل نفسك كيف أقرأ و كيف أكون شلة وأصحاب و كيف أقدر انجز و كيف وكيف لحاجات كتيرة ؟!

تعال نمسك ثلاث نواحي مهمه و نحلها ببساطة كدا ناحية ناحية.

*من الناحية الأكاديمية :*
ح تشوف انو الوضع الدراسي صعب و محاضرات كتيرة لكن لو ركزت شويه و من المحاضرة كتبت نقاط و فهمتها ما بكون في مشكلة.
لكن في نفس الوقت ممكن يكون ما عندك شغف لان عقلك بفكر في حاجات كتيرة.
*وعشان تحل المشكلة العاوز تعمل الآتي *

*وتحفزك اعمل الآتي* :
°دايماً كل طالب لازم يفكر بالنجاح ويتخيل النجاح هو راكب المواصلات ح تقول لي كيف يعني؟!
ح اقول ليك العقل بتأثر بالسرعة و الحركة و مع خيال ح يحصل جذب للفكرة .
يعني في لحظة المواصلات دي تركيزك وتفكيرك ح يكون أعلى من المعتاد.
لو فكرت يومياً في المواصلات تلقائي ح تلقى نفسك احسن من ناحية التحفيز .

°في البيت اول ما توصل لازم ترتاح شوية وبالليل حاول اتمشى لمدة ساعة🚶🏻‍♀️🚶🏻‍♂️ وأنت بتفكر في النجاح و حاول أذكر المحاضرات.
لو عملت دا كلو خلال فترة قصيرة بتحس براحة و بكون القراية سهلة بالنسبة ليك و التحفيز بكون عالي و بكون ليك رغبة و دافع للنجاح.
في نهاية بقول موضوع التحفيز كلو تأثير حركي و تخيل (الخيال هو كل شيء و أهميته اكبر من المعرفة) .
*من ناحية اجتماعية* :
في البداية بتحس نفسك في مكان غريب و وسط ناس ما بتعرفهم.
يلا اتعرف على زملاءك و في أيام قليلة ح تعرفهم وشويه ح تعرفهم كلهم .
و لازم تعرف أو تصاحب الأشخاص العندهم هدف وخاصة الطلاب الجايين عشان النجاح.
حاول حلل الشخصيات و اعرفهم كويس من ناحية التصرفات و الطِباع.

ولما تلقى البفهمك و النفس فهمك و بتحس براحة و انك عاوز كل ايام الاسبوع تكون في الجامعة عشان هم ناس على قدر مقاسك.
خلي كل الزملاء و الزميلات اصحابك بس.
ما تحاول تحب و تعمل علاقات حب بس خليهم كلهم أصحابك .
لان لو حبيت حتكون مع الشخص البتحبو بس و بعيد من باقي الزملاء وكدا ح تكون فقدتهم.

ما تنسى دايماً حاول حفز زملاءك و كون ليهم سند واقيف معاهم.
ما تنسي انك تتعامل معاهم كلهم انهم أصحابك وزملاءك وليس منافسين ليك.

*من ناحية نفسية* :
ممكن تكون النفسيات صفر لأنك عاوز تنجز حاجة و ما قادر و كل مرة تأجل.
في البداية بقول ليك بتحس بشيء من الصعوبات .
بقول ليك انت حاول ابدا بس لكن ما توقف.
أبدا شوية شويه وفي نهاية يكون ليك عادي وما في صعوبات و ما تنسى أنك عندك هدف.
و ما تنسى حاول اتمشى.
و انت راكب مواصلات فكر واتخيل ودا بساعدك في تحفيز نفسك و تحس براحة نفسية و ح تجي تنجز كل حاجة والموضوع ح يبقى ساهل.
والله تاني مافي شيء بوقفك و ح تحس بنفسك انك صاعد القمة بسرعة.
وممكن النفسيات تكون صفر خاصة لو انت جاي من ولاية تانية او مدينة تانية.
ح تحس بفقد ناس البيت و في البداية بتحس انك ما قادر تكون بعيد من دونهم.
لكن أذكر حاجة واحدة بس أن أنت (الأمل) حقهم و انت حلمهم و لازم أنت تنجح عشانهم و أذكر انك جاي من بعيد عشان تنجح.
اذكر الجملة دي دايما : ( الجاي من بعيد لازم ينجح و مصيره ينجح)

يلا فكر وحفز نفسك و أبدأ صح ما تقيف و أكيد أنت الناجح.

واظب على صلاتك و أدعي ربنا كتير و ربنا معاك.
انت ساعي للنجاح ومجتهد و ربنا بقيف معاك.

(لو عندك هدف كل ظروف الدنيا ح تكون في صالحك) .

مافي شيء مستحيل انت بس حاول و كرر المحاولة واكيد ح تنجح في النهاية و تتغلب على كل الصعوبات و تحديات..

اذكر أن كل عقبة مقابلها نجاح كبير.
🤘🏻💪🏻🏃🏻‍♂️🏃🏻‍♂️🏃🏻‍♀️🏃🏻‍♀️🔝

قناة مبادرة ساعة للتدريب :
https://t.me/Hour4Training

#يلا_أبدا
#النجاح_راجيك_قدام
#احمد_الشريف.
#مبادرة_ساعة_للتدريب
#ساعة_ليك_وساعة_لغيرك