يا طاالب أقفل كتااابك
يا ثااائر ألفيين حباابك
يا كووز أعمل حساابك
يا رئييس لملم كلااابك

ويا وطن الحصة في حضرة جنابك🔥💪

#الحصة_وطن 🔥💪
#مدن_السودان_تنتفض

منقوووووووول

بسم الله الرحمن الرحيم

شوفو ياناس هوووي تاني بعيد وبكرر اولا انا لا سياسية ولا بفهم في السياسة لكن سودانية وبحب بلدي وبتمني اننا نمشي لقدام لكن في الشايفاهو عيني ده كل ما نتقدم خطوة المتربصين برجعونا الف خطوة ونحنا خلااااص تعبنا من الشتات وتعبنا من الفرقة وروحنا طلعت من العنصرية الدول دي كلها شعوبا موحدة الا نحنا لي يوم الليله في انت فعلتك وانت تركتك خلونا نتفق اننا سودانين والسودان للسودانين ..يخ جنوبنا الانفصل ليوم الليله هارد كبدتنا تاني دايرين تعملو فينا شنو ما تبقو انتو الادا البيضربنا بيها النظام خلاص الاعيبهم بقت مكشوفة وما جديدة علينا عطبرة طلعت الفيس كلو بقي نبز في باقي السودان انتهينا منها مسكنا في الصادق المهدي قال يخ اختشو الصادق يقول ولا يكسر رقبتو مالكم ومالو الصادق زعيم حزب كبير رضيتو ولا ابيتو وغير كده راجل كبير في السن استخدم مثل سوداني قديم مالنا ومالو لييه الإساءات النازلة فيهو دي !! نحنا اكبر من كده وده ما هدفنا ...البشير مشي الجزيرة كلكم عارفين الاعيب الكيزان وما جديدة عليكم والله القرية المشي خشش ليها الكهرباء دي انا زاتي أول مره اسمع بيها ومعروف اهلنا الفي الحلال البعيدة دي مساكين لا ليهم شغلة بحكومه ولا وسائل تواصل قد يكونو ماعارفين الحاصل في البلد وغير كده كتيير شفنا الكيزان لما يكون عندهم برامج عايزين حشود بلقطو طلبة الخلاوي ومرات قواتهم النظامية زاتا بلبسو ملكي ويجو يقيفو مع الناس تمامة عدد واساليبهم كتيرة وكلكم عارفنها ..وقعتو نبز في ناس الجزيرة في حين انو الخرطوم معروفا فيها عدد كبير من ناس الجزيرة ومعظم قبائل السودان الطلعو ديل كانو من جنس معين مثلا ..الكلام ده عيب عليكم بعدين عليكم الله عرب ظوط دي شنو كمان ليه التقليل من شان الناس والاستفزاز نحنا من الحكومة دي جات شتتنا وخلتنا ننهش في بعض والله لو ماغيرنا نفسنا وخلينا القبلية والعنصرية ما بنمشي لقدام ..الحاجة التانية يجيبو سيرة حميدتي تقعو فيهو نبز يجيبو سيرة الميرغني تقعو فيهو نبز ..ده ما وقتو وده ما هدفنا خلونا نطلع من كترت بيين دي ...نتخارج من الكيزان أول بعداك نجي نشوف الباقي وفي شي تاني برضو كنت بشاهد في لايف لواحد من اهلنا ناس دارفور ومعروف عندنا في دارفور في ناس لسانا اعجمي يعني بشقلبو الحروف ده شي ما بيدهم دي لهجتهم كده بالله اللايف كلو نبز في الراجل كدي اعرف اتكلم أول ويقلدو في كلامو ...يخ عييب عليكم والله لا يسخر قوم من قوم ....ودارفور دي بالسنين الطوال الكيزان واقعين فيهم ابادة المجتمع الدولي ده كلو وقف في قضية دارفور الا نحنا السودانين وليييه عشان اعلامنا مغيبنا وما بعكس الحقائق..عشان كنا بنطبل للبشير...البشير المن مسك الحكم واقع مجازر في اولادنا وأعوذ بالله من الراجل ده ما بشبع من الدم وسبحان الله في البداية خمو الناس بالجهاد شي دفاع شعبي وشي عزة السودان والشنو داك ما بعرفو فلذة كبدك يموت يجوك يهللو ويكبرو ومبروك ولدك في الجنة ويعلقو ساوناتم ويرقصو وانت حشاك محروق علي جناك قتل الشباب بالالاف في الجنوب وفي النهاية فصلو بكل بساطة وبعدين هسه اخرتا يجيب طلاب دارفور ويقول عليهم خلايا نايمه طيب الضرب اولادنا امس منو ..عليكم الله خليكم واعيين خلونا يد واحدة انا سوداني وكفي وكلنا عدونا واحد الكيزااااااااان ما عندنا عدو غيركم والبوستات الهايفة اتجاوزوها وما تعلقو عليها اي زول كبير ليه التوقير والاحترام حتي لو عندنا فيهو راي نقولو بادب ما نستخف ببعض ده الدايرنو هم لانهم ماشين معانا بسياسة فرق تسد اياكم والشتات نحنا خلاص اتحدينا الخوف الجوانا و وعينا لالاعيبكم وبعد ده الشعب قال كلمتو وتاني ما بنرجع ورا قدام بس مايلهوكم بالشائعات وما تروجو لشي انتو ما متاكدين منو واحذرو في احياكم ناس الدفاع الشعبي والشرطة المجتمعية واللجان الشعبية دي اياديهم البتضربنا خليكم واعين
.
واقعدو عافية

جيل البطولات

كان ساكت والناس بتقلل منه .. بتسميه الجيل الخايب .. جيل بنطلونات السيستم والكباية والجيل المفلفل شعره .. وجيل القعدات والجنبات وستات الشاي ..
-
فجأة لما قرر ينفجر .. خلى الناس تتبكم وتتفرج .. فيديوهات لشباب من مواليد 1990 وانت جاي .. يجروا ناحية الرصاص والبمبان وكأنها لعبة ما قصة موت !!
-
في زمن كان الرئيس اللي عمره 80 سنة .. بيسافر مدني محميا بآلاف الجنود والمدرعات ومضادات الطائرات ولابس سترة واقية ومع كده مرعوب ..
-
كانوا أولادنا وأخوانا بيخوضوا النار ولا هاميهم .. صور القناصة فوق البيوت الكل شافا قبل المسيرة وما فرق معاهم .. تهديدات الأمنجية المسبقة ((الراجل يطلع الشارع)) استفزت دواخلهم وطلعوا وقالوا للأمنجي ديل نحن عاين لينا ..
-
شاب .. أو شافع زي ما بنقول عليهو .. انحنى عشان اخته المابيعرفا ما تنحني .. لا أنكسر لا خلاها تنكسر .. دخلوا مول الواحة .. والحالة فوضى .. ونفوسهم تشتهي معروضات المول .. من أطايب حرمهم منها النظام الإجرامي .. لكن نفوسهم كانت كبيرة ..
-
اخوي الصغير .. أثناء المظاهرة سمعت انه هناك .. الطبيعي نمنعه ولا نخاف عليهو .. لكن المرة دي ما خفت عليهو قدر ما خجلت من نفسي .. شفته واقف في مكان عجزنا نحن نقيف فيهو ..
-
دخلت الواتس قبل شوية اطالع حالات الناس .. اندهشت من أنه ناس أتولدوا أول أمس .. شلناهن ولعبناهن .. ما اتخيلت ليهم علاقة بالسياسة .. لقيتن بيتناقلوا صور المسيرة .. وبكل فخر بيقولوا لينا ولكل من قلل منهم .. ((ديل نحن .. انتوا منو)) .. خجلت أقول ليهم نحن جيل ((أكل عيشك مالك ومال السياسة!!))
-
ديل عارفين حقهم كويس .. عارفين الفلس ما رجالة .. وإستحمال الضيق ما من الدين .. والعيشة الكعبة الخشنة لما ترضاها ما معناه إلا أنك عجزت تاخد حقك ..
-
ده جيل ما بيقرأ لأسحق فضل الله .. ولا بيسمع الكاروري .. ولا بيهتف للفارغة .. ولا بيحب العنتريات المابتكتل ذبابة .. ده جيل بيسكت لحدي يجي وكت الكلام ..
-
ديل دخلوا النت واتثقفوا .. عرفوا العالم عايش كيف .. وعرفوا حقهم كويس .. التعليم حق .. والعلاج حق .. والوظيفة المحترمة حق ..
-
صدقوني .. مش البشير بس .. الجيل ده عصي على التطويع .. عصي على الإستغفال .. الجيل ده ما حيحكمه طاغية .. ما حيحكمن مغفل .. ولا حتمشي فيهم الهتافات الفارغة .. ولا حيخدعه كاهن السلطان .. الجيل ده حيحكم نفسه بنفسه .. وبراه حيردم الفرق بين بلده وبلدان العالم ..
-
أولاد وبنات التسعينات والألفية .. القومة ليكم ..
أبقو عشرة على البلد ..
#سيد_نفسك_مين_اسيادك
#جيل_البطولات
#نحنا_مرقنا
#مرحب_رزاز_الدم_حبابك

ما ننسى البت الوقفت في صف الصراف عشان ابوها في المستشفى ولمن قرب دورها ابوها اتوفى.
ولا ننسى مهند الود المحترم الهادئ الخلوق الكان بقفل في دكانم وجاتو طلقه في نص راسو ومات .
ولا ننسى اليدو انفجرت ولقطو الاصابع لقيط.
وما ننسى الطفلين الاعمارهم 15 و9 سنوات .
والحامل الاتعرضو ليها ، والمره الماتت في ام روابه ، والبنات المعتقلات لليله بطلعو الاولاد والبنات مابطلعو ..
ما ننسى انو الحكومه ماقدرت تعمل مدرسه للاطفال الماتو في نهر النيل ورؤساء الدول المجاورة رسلو التعازي حتى البشير خجل على روحو ومشى ليهم
يخوانا ما ننسى الناس البتمشي تصرف الدواء وبتلقى سعرو زاد وهم ومعاشيين معاشاتم ما بتفوت ال500 جنيه .
الدول التانيه عندها مدفوعات ضمان اجتماعي عندها حوافز عندها فروقات عندها اعانات عندها زكاة نحن مرتبات الناس مابصرفوها ليهم ويقولو مافي سيوله ويصرفو الامنجيه لحدي مرتبات شهر 1 بالحوافز ...
ولسه...💔
لو حياتك ماشه وساهله خليها عشانهم عشان الناس البتمووت جوع
عشان احفادنا وعشان سودانا وعشان #حاجه_امنه الكملت الصبر✌🏻
ما تفكروا في حدود نفسكم وبسس
#جمعة_المليونية
#مدن_السودان_تنتفض

اضراب الاطباء في مستشفى الدويم ، ووقفتهم الاحتجاجية والتضامنية مع الشعب السوداني اليوم

اللابكوت لايفارق الاحداث

#مليونية_الجمعة
#مدن_السودان_تنتفض
#العصيان_المدني_واجب_وطني

من مجموعه هكر الدوله السودانيه:

الموضوع : قطع الانترنت عن المواطنين السودانيين
بالاشاره الي الموضوع أعلاه نرجو ارسال الرساله التاليه الي الشركه القوميه للاتصالات وكل شركات الاتصالات التاليه
زين وMTNوسوداني
لقد تماديتم في افعالكم الغير قانونيه في حرمان الشعب السوداني من حريه الاتصال بالانترنت وهدا مايتعارض مع القوانين الدوليه لحقوق الانسان
وانا مجموعه هكر الدوله السودانيه نحزركم اشد التحزير من ان تتمادوا في افعالكم بعد الان ونمهلكم فقط مده زمنيه لارجاع الأمور الي ماكانت عليه والا فاننا نتوعدكم بحرب الكترونيه تطيح بكل مواقعكم الالكترونيه تعطيلا دائما وابديا
فقد تحصلنا علي الفايروس الذي استخدمه حمزه بن دلاج في الاطاحه بالبنوك الاسرائليه وقمنا بتطويره وبالرغم من ان هذا الامر غير قانوني الا ان ماتفعلونه بحق الموطنين هو مادعانا لذلك ومعنا كل الحق ان لم تلتزموا بما نقول
نفيدكم علما اننا أيضا تحصلا علي عدد72 ثغره اتصال في شبكه سوداني
وعدد51 ثغره في شبكهMTNوعدد 12 ثغره في شبكه زين حيث تعد هي الاقوي من بين الشبكات

سنقوم بنشرها لكل المستخدمين وسنجعل من انظمتكم مهزله امام العالم
هذا ان لم تلتزموا ب اطلاق وفتح المواقع التي قمتم بحظرها
فلاعزر لمن انزر
والله اكبر والعزه للسودان
هكر الدوله السودانيه
صدر بتاريخ 26\12\2018
الساعه الرابعه وثمانيه دقائق صباحا
#مدن_السودان_تنتفض
#انتفاضه_الهاكرز_السودانيين

ياخ بالجد الزول قدر م كان كاره السودان وم داير يقعد فيهو بعد الحصل دا الزول بقى يشعر بالفخر إنو من اهل السودان💙ويتمنى ليهم الخير كلهم وحتى بتدعي للناس كأنهم وأهلك وتزعل معاهم وتفرح لي فرحهم ربنا ينصرنا كلنا❤
#much_love_FOR_Sudanese_people
#مدن_السودان_تنتفض

ويقولو ليك السودانين م عندهم وطنيه!

طيب:

واحدي منزلة بوست انو تلفونها راح ولقاه واحد من أطفال الشوارع، قال ليها بعد قلت الله اداني، خفت، وكمان قلت يمكن عندك فيه شغل وح اعطلك، حنستو تدعمو كيف، تعفف، في الاخير طلب هدوم تدفيه من برد الليل، لسه الدرس ما انتهى.. واحد من المتداخلين في البوست التزم بكفالة الطفل دا وقال يكون زي اخوي السغير واحد.
وطنية ول ما وطنية يا اولاد المدارس؟💖

صوت التعازي في شهيد عطبرة وحيد ابوهو ودموع ابوهو ودموعنا..
وسطها صوت رجال عطبرة بقولوا : عطبرة كلها اولادك.

وطنية.. ول لا.💖

الموية الادوها للبوليس المهنضبهم... دا شي اعمق من الوطنية.💖

الود الحاني ضهرو ساويهو سلم للبنية تطلع عليه..
دا نسميه شنو؟💖
بس بقول الانقاذ فشلت تغير اخلاقنا كلنا، الشايفنو دا بقول الاغلبية لازالوا سودانيين حتى النخاع.

السيدة الواقفة في الزلط براااها تلوح لموكب البشير وتهتف طير طير يا البشير. دي نقول عليها أيه.💖

البنات القالن البمبان ملون وريحتو ذاتا حلوة، الود الاتقطعت اصابعو
جيل ربتو الانقاذ وفشلت في تربيتو طلعوا بنات واولاد يسدوا عين الشمس.💖

بقول ليهم،:

صدق اللي قال البلد بقت قبيلتين فقط:
سودانيين وكيزان
والتفرقة جايبنها الكيزان لتشتيتنا بس م ف تاني ❤✊

اختار قبيلتك يلا..

ثورة حتى النصر🌹

#مدن_السودان_تنتفض

‏وزير الصحة في الولاية الشمالية عبد الرؤوف قرناص يتقدم باستقالته من منصبه
وينحاز إلى الشارع السوداني

#الحصه_وطن
#مليونية_الجمعة
#مدن_السودان_تنتفض

‏حنمرق من كل حتة! من كل منطقة من كل بيت من كل حي من كل شارع من كل زقاق من كل مسجد! وحنتلاقى كلنا! ‏⁧ #كلنا_وطن ⁩ ‏عايزين الناس تجهز اعلام السودان! ‏عايزين الناس تجهز الهتافات! ‏عايزين مكبرات صوت! ‏عايزين سماعات نشغل فيها اغاني ثورية! ‏عايزين تنظيم! ‏عايزين نعمل فرق! ‏⁧ #مرقنا ⁩ 🇸🇩✌🏻♥️

حنصلي الجمعه في ميدان ابو جنزيره وبعد كده ح نكون متماسكين مع بعض والجمعه دي جمعه الرجال ما عايزين النساء معانا عشان م نتغيد بيهم نركز علي الكمامات المنقوعه بالخل نحن ح نقيف وقفه سلميه الجمعه م حنصلي في المساجد الجمعه ح نصلي في الميادين انسخو معي عشان الحاضر يكلم الغايب
#مدن_السودان_تنتفض

- حكومه تخلي أمي وأبوي يكونو شايلين الهم وراسهم يضرب كيف يجيبو لي ولي اخواني قروش الجامعه والمدارس كاش ، تسسسقط.
- حكومه تخخلي أبوي يرجع البيت الساعه وحده ونص صباحاً لانو بفتش على عيش لينا ، تسسسسسقط.
- حكومه تخلي العيشه الوحده بي جنيه ، تسسقط.
- حكومه تخلي الطعميه الوحده بي جنيه ، تسقططط.
- حكومه تتزيد البيبسسي من ٥ ج لي ١٨ ج ، تسسقطط.
- حكومه تخلي الاندومي بي ١٢ تسسقطط.

Comments💬:
الناس اللي بيطلعوا مظاهرات ..#اتوضوا من بيوتكم ولما يدخل #وقت_الصلاه الشباب يصلوا #جماعه في مكان واحد ..براكم شفتو الموت بعيونكم كيف تكون ماشي للموت ومامصلي !!!! ..ربنا قال للماجهدين في زمن الرسول عليه الصلاة والسلام ..(رجالا او ركبانا )بمعنى #اثناء_الحرب صلوا وقولوا الفاتحه وقولوا ذكر الركوع والسجود سواء ماشي على رجولك او راكب الخيل ..فما تغفلوا عن الحاجه دي ياخوانا ..وكمان لما يشوفوا منظركم انتوا بتصلوا والله #حترعبوهم اكتر وحيحسوا انو ربنا حينصركم عليهم لانكم اتصلتوا بي ربنا ..اعملوا شير لكلامي ده ..نأدي فرض الله عشان الله ينصرنا ويقلب حال البلد #لأحسن..🌸🇸🇩

Comments💬:
وأهمّ شي تكونوا مصليين الصبح في جماعة
روى مسلم (657) عن جندب بن عبدالله رضي الله عنه قال : قال رسول الله صلى الله عليه وسلم : ( مَن صَلَّى الصُّبحَ فَهُوَ فِي ذِمَّةِ اللَّهِ ، فَلا يَطلُبَنَّكُمُ اللَّهُ مِن ذِمَّتِهِ بِشَيْءٍ فَيُدرِكَهُ فَيَكُبَّهُ فِي نَارِ جَهَنَّمَ ) .
عن سمرة رضي الله عنه قال: قال رسول الله صلى الله عليه وسلم: ( من صلى الصبح في جماعة فهو في ذمة الله تعالى.) رواه ابن ماجة