ـ
عيونك

گنطره لآخر جرف بالـروح

احمد المرشدي
ـ

ذب روحك اعله الجرف
لاتنغر وتغرك
القبلك طفه ابلايه اثر
من استحه وغمك
ياصاحبي الفي عتب
بس الشمس عفيه
شوف السجج تنشبك
مادامها مكفيه

————————-

العظيم احمد المرشدي❤

هذا الغيم جنطة هم
شلي بخيوط ماكطعن نزيف الدم
شلي بصاحبي لماشوف بعيونه الوفه محزم.
.
احمد المرشدي

(اعترفلك)
.............

تــذكــر بساعات (جرحك)
مــن اگــلك..

بالسلامة..
مودع ..
وناسي اعتبرني..

تذكر ؟شگد گتلك اتهنى اويــه غيري

و دبرت ضحكات صلفـه

وگبعت بيهن دمعتى ورجفتي وشوغات حزني..

وتذكر شگد چنت اگلك
انــت ياهو؟ ومــا تهـمنــي.!

چنت اكابر يا حبيبي وچنت اضنك تفتهمني ..

اخ لو بس تفتهمني..

(چنت اطول بالموادع )
بلچي منك تطلع احچايه التردني..

ردتك تحسسني اهمك
من اگلك هدني ترفض ما تهدني..

ردت لو بس مره چفك
من تهل دمعاتي ( يلعب دور ردني)..

واعترفلك

چانت اكبر امنياتي
لمن ازعل..
تعتنيلي بـ أسف وردلي ودخيلك..

وانت تدري ..
تدري بـ أول چلمة اردلك!
لااااا ....گبل ما تحچي بس انوي بدليلك..

(چنت اقدسك)
حتى من تجرحني ارد ليك اشتكيلك ..

چنت يحبيب احميمه
تهدني يم غربه واهد كلشي واجيلك..

غيرت روحي اعلمودك
زغــررت احــلامــي يـمـك
گـمت امــد شــوفي اعـلى ليـلك..

اسف لـ هالچلمة لكن

(والله يحبيب چنت نعمة بشليلك)

طشرتني

وما حسبت احساب روحك ..

بعدي ياهو اليعتنيلك؟..

ضيعتني...


سمر الخالصي

عايش مثل زعل المساجين
بودي امشي وتردني الحياطين
وجه بوجه وگلوب ماشين

كرار وحيد

انا شوكَ الغريب الكَرب ولاح
انا حسرة هذاك الأيس وراح
تعنيت اليخوف جلمتي سلاح
انا العن الشماتة بوجعته ارتاح
انا الكلما تحصده يردله سباح
ذهب من زيج حلوة وبالدرب طاح
هوه عذيبي على روحي الشكر فاح
يالمضيعين عمري هنا يالوكاح
اجر بالليل جن مجرار ملاح
يطليعة البعد ماضاكَت اللكَاح
يفيضة وبحضنها خيار قداح
يسلطان الحباري الفارش جناح
يماي الدلع صدره وطفطف وساح
رهم عشكَك عليه ارهام مفتاح
وانا وهمي عرايا ثنين بوشاح
كَصت روحي على جرحي ولحت اللحاح
اخذني بطيبتك ياريع مسطاح
تعت بيه ومرامي بياكتر داح
ازر وحدة على وحدة امنيبر انياح
نمت وكَفة شكَف عن لجم الصفاح
تهت والضيفوني طلعوا اشباح
اداور بالمرادي وكَيش ماصاح
علت هامة الخورة ولاكو ملواح
يهالتحلب بروحي منيلها امناح
هلب ويدوخ بي قباض الارواح
انا المامش وراها جنازتي صياح

————————

الراحل _ محـسن الخياط

عشكت الموت للكبير محسن الخياط ..

انا البضلوعي دكيت البسامير
لخنجر ماحسبت احساب ذبحه
بعد يمته انتبه وأخذ تدابير
وطم عار الشداد اليدي جرحه
هويت وماعرفت عليه شيصير
ولافد يوم اشوفن حالي وصحه
جبت بيدي الاصيله لنواعير
وانه منيدي الظلام الضاع صبحه
عشت عمري ظلام بلا زرازير
ادورن والرمح مشخوخ رمحه
عكب عش الحمامه والعصافير
لفاني غراب شد جنحي اعله جنحه
انا البضلوعي دكيت البسامير
لخنجر ماحسبت احساب ذبحه
عشكت الموت سكته وماتنخيت
وعبنهه الطيبه بيه اضواي يمتد
خشف ميته امهاته بهيمه ضليت
وغلبني الغالبه والبيه يشتد
الوكت من شافني بعكازه رديت
بنه جالي اعله جالي وكالي اصعد
واجب ماخذت بس واجب اطيت
وانه ذنبي وفيت الراح والرد
والمعزب طردني من المساير
وحويت من الحصاد تراب رحه
انا البضلوعي دكيت البسامير
لخنجر ماحسبت احساب ذبحه
بعد يمته انتبه واخذ تدابير
واسولف ع الشدادي البيه جرحه



الجبل السماوي محسن الخياط ...

عريان السيد خلف

" توصيني "



توصينــــــــــي
اعله يا ذمّة توصيني؟؟؟....
وحياتي انت ونبض يسري بشراييني...
ويظل اسمك علامة توسّم اسنيني.....
ولوَنك مو دمع ....ما شالتك عيني....
ويلوموني....أحسّك تكبر بروحي...
ويلوموني....ونه بلا شوفتك
شينفعن اعيوني...؟؟؟؟
يشوكي...ورجوتي...ودنياتي ولوني....
وعذابي ولهفتي....وشكواي واضنوني....
يخيّعونك عليّه ...وبيك خيّعوني....
يواهس تضحك الدنيه عله اشفافك....
يبو الليل الحلو اليلعب عله اجتافك....
أحس روحي تآمن بيك واتخافك....
واحسّك ....مدري شنهو انت.....
لغز لا حجي ولا سكته...
ولا غيرك نبع بالشوك يرويني...
وتوصيني ....
لونّك مو دمع ما شالتك عيني....

عريان ال سيد خلف


خطوة بأثر خطوة لكبتك ماشين
بينة جروح كثرة وحيل مهضومين
حيرةوليل عاصف.والظنون كصار
ومناحط الحسره... ايفزز الميتين
يامكصدوحكك. كصه ويانه الحيف
حد ناب الضرر .وتبشروا العفنين
نغفه اعلى الجروح امهدهدين الحيل
ونصيح بعبرة قهر ..مخنوكين..
لا ينفض حزنه ولا جرحنه ايطيب.
من غدر الليالي ولا وكتنه ا يلين .
ودنيا الطلكتها بزهدك وعلياك .
شدت حيلها.. ترد ثارها بقاطين..
ياغوث الهضم يا سيد السادات .
يا باب النجاة..واول الداعين ..
ياعصاة موسى..وياشفيع الحوت يامنحر بدر يا زلزلة صفين...
يا فارس الخندك والمنايا تحوم
وامعلي الفخر .ومحير الصوبين
ياثابت ابخيبر ...واللوه بيمناك.
ياداحي المنع وميسر العاصين..
ياعادل.وسيفك بالعدل ميزان
ينصف الفوارس لو جسم نصيين
ياصوت المناية...بنهروان الموت..
وبيوم الجمل...تستاهل العفرين..
ياروح الرسالة .وهالة الايمان
ياطاهر لبن من لحظة التكوين
علي رحمة.وعطف من قدرةالرحمن
والحبك ربح..والخاصمك يخسر ..
علي تكوين قدرة..بلحظة التكوين.
علي سورة قبس سبحان من صور
علي آية وبلاغ ..ولازمة وتوكيد بالقرآن..وبكل سطر يتكرر...
علي نهج البلاغة ودقه التفسير..
وحل المعضلة..لكل عقل يتحير..
علي نفحة الجنة وتين والزيتون..
وآية )هل اتى( ويشرف عل الكوثر
علي هارون موسى..لسيدالتوحيد
وبجناح البشير النزل ...يدثر..
علي أول شهادة...بأول الاسلام..
واول سيف..بركاب الكفر ...كبر..
علي منهج دلالة...وشاهد وعنوان
وحرية فكر للراد يتحرر..

رسالتين للـحسين (ع)

غانم الفياض



اولآ ......

ماتقره الحياة اجدام ياهو الچان
لا ..
ولا يبقى ابصدرها آثار
كلمن مر

وانته بدم وريدك زوكيت الگاع
هاثگل السنين اعليك من تمر
ها ثگل الجرح لمن يمر بالروح
يوميه الدموع اعليك تتفجر
تنذل الرجوله ... وبيك تتحرر
حررت الزمن من قبضة السجان
تتعدى السنين وبيك تتسمر
چانت كربلائك اول البيبان
بس حر الرياحي
چان اخر حر

ثانيآ.......

مره شفتك : نجمه ،، وخدود ،، ونواظر
ومره شفتك : خبز ،،وشموع ،، ومشاعر
ومره شفتك : قلم ،، وكتاب ،، ودفاتر
ومره شفتك : درب ،، و ولاية ،، وگناطر
ومره شفتك ثورة ما ساوم عليها شراع ثاير
و مره شفتك

(امس) يزرع امل فضي بوجه (باجر)
بس أبد ما مره شفتك
مثل ما فهمني ابوي

باقي وحدك بالطفوف
دارت اعليك السيوف
وچنت حاير ......

ناظم السماوي

بچيتك ...

بچيتك ياا قصيدة ليل
ويهنياله البچه بعينه

يعگدت شوگ ماا تنفل
بچيتك مو بچي البطران
مثل بچيي الگصب لو حن عله المنجل

وبچيتك ياا شبج صايود
حلو خيطك .. يفاله وابد ماا تبخل

بچيتك والدهر طشنه
مثل طش الغريب الما بعد يندل

بچيتك والمن نعاتب
حلاة العتب لو صار العتب مگبل

نعيتك نعي الگوالات
ياا سرب التفگ .. ياا چيله ماا تندل

الشاعر الخليجي ...

مهذّل مهدي الصقور


أتظن أنك بعدمـــا أحـــرقتنــي
ورقصت كالشيطان فوق رفاتي

وتركتنـــي للذاريــات تـذرنــي
كحلاً لعين الشمس في الفلـواتِ

أتظـن أنك قـد طــمست هويتي!!!
ومحــــوت تاريخي ومعتقـــداتي

عبثا تحاول …. لا فنـــاء لثائر
أنــــا كالقيامـــةِ ذات يـــــوم آتِ

أنا مثـلُ عيـسى عــائدٌ وبقــــوةٍ
مــن كـــل عاصـــفةٍ ألـم شتـاتي

سأعــود أقدم عاشــــق متمــردٍ
سأعـود أعظـم أعظم الثــــوراتِ

سأعود بالتوراة والإنجيـل والــ
قـــرآن والتسـبــيح والصـــلواتي

سأعــود بالأديـان ديــناً واحـــداً
خــــــال مـــن الأحقـاد والنعراتِ

رجل من الأخدود ما من عودتي...

بـد .. أنا كل الزمــــــان الآتِ

عزيز عسكر


انا البية ضريح يموت ليلية
وانا البية صلاتي تموت ليلية
اكض الاخ من كلبي نهر فوك الصبح ويموت ليلية...
كلها اوجوه
والكمره المشت ع الماي جانت ظنك وظني وكلت بية..

يشربني التعب والقلق والحرمان بس ماموت
مازال الفرح للناس ياخذني اعله باجر دين
والكه الجامع ابنية..
انه الروحه جنوبية وحبيبة كلبه فختايه
جميله بلون اغانية..

انا هاي المدن كلها من اموت يموت كلشي وياي
صوت امي وحنين الطين والفقره العمر كله بليالية..
انه مجنون ياروحي
الوتر لامس ضميري وغنت جروحي..
غنه طيور الصبح وي طلعت العمال..
غنه الحلوين للموال..

الشموس البيها اصابعها وشعرها الكال..
العلم والشال..
والدم والصبر يرادله خيال..

انه شموسه وانه بخدود كل الناس ارق بوسه..
انه المعشوك والعاشك جسر ماتكدر ادوسه..

جسر عبر شمس تشرين للغربه
عرف معنى الوطن وشلون
يرسم خارطة دربه..
الورد ربه..

محمود اليزل


تمنيتك حلم ياطف..

ولا شوفنها زينب تركظ اعله التل
ولا شوفن يتامه متيها ماتندل
ولا شوف الحسين يودع بعباس..ويجي العاشر ومانعرف شنو المقتل..

تمنيتك حلم ياطف..
وافز ما الكه حرك خيام.. وزينب يمها واليها..
وباوع للرباب بخير
وبعد عبد الله بيديها
وروحن يم رقية حسين.. وتلمس تراجيها..
رسايلهم جذب يحسين.. ويرد ماصدّكت بيها

تمنيتك حلم ياطف.
ولا شوف العيال ميسره للشام.
ولاشوفنها زينب حايره بايتام
ولاشوفن جروح حسين ماتلتام

تمنيتك حلم ياطف..
ويفز من نومته التاريخ ويسولف صدك عنك..
ومسح هالحجي يحسين ابد ما سابح بدمك
وكتب عله الرسايل ذيج سوالف خاف ياذنك

يحسين يمرايت محمد
الكتبوها مو عالشيعه تنعد
بالك تجي للكوفه مولاي .
يغدرون بيك الله ولحد

الراحل ...جبار رشيد


عفت كلشي ...وجبت كلشي
ومدري شلون اجيت امشي ..
اجيتك ردت اگلك شوف ...
ردنه نعوف كلشي وماگدرنه نعوف

كون تشوف
حالي شگد الك ملهوف ..
جبت كلشي اليسولف بيك
خيالي وصحوتي وطيوف
جبت دگات گلبي
الگطعن گلبي بجفاك سيوف
جبت صفنات روحي
السودنت روحي .....
مثل جن بمسيه وعاليتيمه يحوف

كون تشوف .....
بشفافي الحزن ماخله بسمه تعيش
وكلمن گمت ابوسه بخده اطبع اوف

كون تشوف .....
دموع الجدم مايدري وين يروح
والخطوات عميه
وتايه بلاشوف

كون تشوف ....
..خلصت الوجوه وشفت كل الناس
كلها وجوه غربه ولا وجه معروف
وين الگاك يالموصوف
اليه وأنه الك موصوف ؟...
يالفرگاك غربه وكلشي مامألوف ...
انه بلياك مدري شبيه مابيه ..
زلف وبلايه ترچيه ...
درب مابيه كل جيه...
نهر فاض وتبع ميه
رجع بس مالگاله جروف

كون تشوف....
روحي شخله بيها الخوف
مطلوبه نذر وتخاف ...
ماتوصل حضرتك
من بعيــــــــــــــــــــــ ـــــد تطوف

كون تشوف....
روحي شخله بيها الخوف
مثل دم العروس الجايه على اجناب
ويصبر عليهه
وجابها الزافوف

وشوف شخله بيه الخوف
مثل حلت مدارس
روحي احسها اطفال
حلت وتركتني ...
وباقي بس صفوف

ويا وحشتي صفوفي ومن يجيني الليل
ويالون الوجه
بعدك الضل مخطوف

ويا قسوة ضنوني الماتريد ارتاح
وانه الصاير اسير
وبيدهن مجتوف

كون الگاك واشكيلك على جروحي
لگيت الغشمه بيها تروف
وكون الگاك وابجيلك
واسوي خدودي سبوره
ودمعتي حروف

وكون الگاك واحجيلك
بكتاب السنين انحذف كلشي الچان
بس اسمك لگيته الباقي مامحذوف
واذكرك من مسحت دموعي باخر يوم
على خدودي
احس لهسه طبع چفوف

وكون تشوف....
عيوني مضيف تصير وكت النوم
وهلبت بالحلم لنك
تجينه ضيوف
كون تشوف حالي
شكد الك ملـهوف.....

العظيم _ نوفل الصافي


الطريق ابعيد
والسچه جرح
خارطه من الدم مُدنها اتنث ملح
ورمح شايل راس بعيونه صُبح

الطريق بعيد
والسچه جمر
وسمّ جديد.. يِدْبي بعروگ الجزيره القادت اشرس انقلاب اعله العرش..
أول بيان.. ايحللّ الدم النظيف
يكفر ابخدّ الربيع ويسجد اباب الخريف

الطريق بعيد
والمشايه روس!!
وليل زينب يغزل الدمعه حنين
يحوك سجادة مواجع علي زين العابدين.
ولافته بعرض السما اللّه اليعين..
وخمسه وثمانين طفله
بحلم لعّابه وصبي
لِم جناسيهم وأقره..
تلگه اسم الجد نبي!!
الله اكبر قافِله جدها نبي..
هذا أول (كارت احمر) الى تاريخ الشهامه العربي
قافله من الآه..
جدها ابدونه ماترهم صلاه!!
هذا اخطر انقلاب اعله الاله..

عقيل العرد



شعطلك عن الحلم

استاحشتك هوايه

شايف بروحي ذنب ؟

لو سامع حجاية ؟

يحسين هاي السنه طيفك ولا مرلي

وجف ابو فاضل طلع بالماي واشرلي

وكبل اربعينك نذر راح امشي مشايا

عطشان يا ابو علي

ردتك تمر غيمة

ما يمي اثر علكمي

ومطلوب الف هيمه

وكلما امر زينبك يزغر بروحي الحجي

وجفني اليجمل البحر

يستحي يهل ضيمه

اتذكرتك ودخنت
وبصدري ثغبت مرة

بجرة الجكارة طلع يمكن حرك خيمة

واكف بنص كربله

واتخيل اخيامك

هنا طاح رب الوفه

هنا ركضت ايتامك

ومكسور خاطر رحت

يم كنطرة نوحي

وطاحن جفوف وعلم وتلاكن بروحي

يحسين بيه حجي ما ينحجي لغيرك

لو ما اشوفك وطن جا ماصرت طيرك
يحسين دربك عدل
من اوله اندله
منك عرفت الزلم لو موت لو ذله
عاشورك بخاطري

وباهلت الولاية

تراوالي وجهك نهر بس ما ضكت ماية

تانيت بس ماطلع

صوت من المراية

أشايف بروحي ذنب ؟

لو سامع حجاية ؟

عاشورك بخاطري

وفريت الولاية

ويطيح مني وجه كلما شفت راية

جواد زغير


أعذرني ،
أعله شعري الـ ما رضى أيكتبك

أعله حزني الـ ما فهم معناك ،
من ينگل اجدامي بـ درب مو دربك

أعذرني ،
بعدني أقراك مثل الناس

بعدني اغفى أويه راسي وحضنك أبلا راس

محد توب أضنوني

محد گلي ياهو حسين ،
كلها أتنث دمع چذاب بـ عيوني

هذا انا ،
وهذاك انت ،
غريب أيحب غريب هناك عـ الفطره

يمتى الگاك تتمشى بـ نوايا الناس ما تتحجم بـ حضره

سيد سعيد الشريفي

مثل کل یوم أرد تعبان..
و أشمر روحي بفراشي
و یلولیلي التعب و أغفة
مثل کل یوم..
أگول الدنیة ما تسوہ

من طفّو جگارتهم علی اگلیبي ضحکتلهم
دنیة اترید ناس گبالها یضحکون
یحوکون الجروح حروف و یغنّون
یصبّون الحزن بالکاس و یسکرون
أضحک حیل
آخر هالطریج تراب!.
آخر هالرکاض تراب..
یا عابر سبیل..
تراب

یبنادم تراک أیام..
و الدنیة جسر ..
و یعبرن یعبرن

یه دنیة احنه بعدنه زغار..
بس هدومنه الکبرن
بس همومنه الکبرن

بعد بینه لعب و أرکاض مدري الوین
مدري الیاحضن یا عین
أضحک حیل
آخر هالطریج اتراب

دگ باب الله یبنادم
تدگ یا باب!