𓆩 MUST∆F∆ 𓆪

اريد احجي بموضوع وكلش مهم
هو موضوع الكانسرز
اذا ما تعرف شنو كانسرز
هي كلمة تنكال لكل شخص اسمه
يكون من الاسماء الي جانت مشهروة ب 2012 مثلا عاشقة الاحزان و بصمة امل و وردة خجولة والخ من الاسماء
و الناس يلي يكون اسمهم مزخرفة
والناس الي تسمع عراقي ونور الزين والخ
والناس الي تدز صور جمعة مباركة وادعية
هذوله الناس ينكال عنهم كانسرز
طبعا منو طلع التسمية ما اعرف
اذا هي يم الاجانب هيجي او بس يمنه يقصدون هيجي ما اعرف
بس المقصد منها هاي الفئة من الناس
ومع الايام تطورة هاي التسمية وصارت تنكال على كلشي على كلشي حرفيا
والي يتسمه كانسرز هذا بعد لا يخلوه بكروب ولا احد يحجي وياه
والكل يضحكون عليه
هذا اصلا اذا احد رد عليه
واذا جرب يدخل كروب حينطرد بعد ثانية
زين ليش لهذا المستوى وصل التعجرف مالتكم وتعاليكم
ليش دتحسون نفسكم ناس كلش مختلفة عن الكل ليش دائما تحسون نفسكم ما اكو مثلكم
ترا انتو بالنهاية عراقيين شئتوا او ابيتوا
ف انتوا عراقيين
ولدتوا بالعراق وتعيشون بالعراق فليش تحاولون تغيرون كلشي بحياتكم
حتى بس ينكال عنكم واووو كولز
وبداخلكم هذا الانسان الكانسر
لذلك بطلوا هذا التعالي مالتكم
بطلوها لان فعل انتو صرتوا كانسرز اكثر من اي شي
لتنسون انه الي تسموهم كانسرز
يجوز يكونون اهلكم
او شخص قريب منكم
امك/ج بفونها مليان صور ادعية وجمعة مباركة ...هي سرطان بحياتك؟؟؟
اخوك الي اكبر من عندك يسمع نور الزين
هو سرطان بحياتك ؟؟؟؟
ترا الكانسرز ما جايين من مريخ ومستوطنين ب العراق
الكانسرز هم اهلكم وناسكم الي دتحاولون تنكرونهم حتى يثني عليكم البعض ويكلك انت مختلف
منو بيكم ما يسمع اغنية عراقية وتعجبة ويرجع يعيدها بس ما يكول لاحد عليها لان يخاف لا ينكال عليه كانسرز
من منكم ما يحب يضحك على نكات عراقية
بس ما يشاركها ويا احد لان حيكولون كانسرز
ويروح يشارك نكته انكلش تكول عندما اشعر بالجوع اذهب للثلاجة قهقهقهقهقه
عود شوفوني داضحك على شغلات ما تضحك اني غريب عليكم *مختلف عنكم *
منو منكم يتكاسل كم مره يحول اللغة من عربي لانكلش بالكيبورد بس حتى يكتب كلمة بالجملة الخريط الي كتبها
يكتب كلمة بالانكلش او مصطلح حتى ينكال عليه يعرف انكلش واو هذا كول
صدك هاي ثقافتكم وتطوركم وانفتاحكم
ونكرانكم لواقعكم الي عايشين بيه
وكرهكم لناس انتم تنتمولهم
خلص كافي وكفو هلشي
والمصطلح الي يشبه هذا هو النورمي
عود هذا انت يسموك نورمي اذا جنت تمشي ويا اي شي يشتهر
يعني اغنية حلوه تشتهر ف تشغلها وتستمتع بيها فيسموك نورمي او شي جديد يشتهر وتسويه فانت نورمي
فلازم ما تسوي اي شي يشتهر اي شي يطش ما تسويه
وتكول لا لازم ما اسوي هيج حتى لينكال عني نورمي
كافي صرتوا تلعبون النفس كلش من صدك حجيكم هذا كلش صار ما ينطاق
حسوا عنفسكم
واذا صدك مثقفين فابسط شي المفروض تسوونه هو احترامكم لاراء وتوجهات الاخرين هذا اهم شي
لذلك كافي نكول كانسر
كافي نسوي الكانسرز ناس منبوذين
كافي ما نندمج مع الشغلات الي الكل يسويها حتى لا نكون نورمي
احترموا الناس

1.05K views𖤐 MUST∆F∆ '☬' #1, 22:39

𓆩 MUST∆F∆ 𓆪

Forwarded from 𓆩 MUST∆F∆ 𓆪 (𖤐 MUST∆F∆ '☬' #1)