📖 #ቁርአን_ብርሀን_ነው 💡

ምስጋና ለአላህ ለቁርአን ባለቤት፣
ወንጀልን መሀሪ ለባሮቹ እዝነት።

ሶላትና ሠላም ለኛ ባወረሱት፣
በነብያችን ላይ በዓለሙ ማብራት።

በሶሃቦቻቸው በነዚያ ከዋክብት፣
ቁርአንን ጠብቀው ለኛ ባደረሱት።

እንዲሁም ተምረው በተጅዊድ ለቀሩት፣
ከአላህ ይድረሳቸው ሠላምና እዝነት።
---
ያንን ጣፋጭ ቁርአን እስኪ እኛ እናዉሳዉ፣
ሚያስታዉሰዉ አጥቶ ሁሉም እንዳይረሳዉ።

የቁርአንን ዉበት ብናገር ብገልፀዉ፣
ብጀምረዉ እንጂ መችም አልጨርሰዉ።

ከወሬዎች ሁሉ በላጩ ንግግር፣
በፍቅር ሲነበብ ልብን የሚያሳምር።

ገራሚ መፅሃፍ ነው ባለ ብዙ ታዕምር፣
604 የገፆቹ ቁጥር።

ተሸምዳጅ የሆነ ያለ ምንም ችግር፣
ያለፈውን ታሪክ አብራርቶ ሚናገር።

ያሁኑንም ክስተት ሳይቀር ምንም ነገር፣
ተራኪ ደብዳቤ ያንን የሩቅ ሚስጥር።

ሌሎች መፅሃፍትን ልቆ ሚቆጣጠር፣
ቢፈለግ እንደርሱ በዚች ሰፊ ምድር።
ከቁርአን ውጭ የለም እንዳንጠራጠር።
---
ማየት ባሻን ጊዜ የንግግር ምጥቀት፣
ትካዜ ሲገባን ስንፈልግ መፅናናት።

ልብም እንዳይፈራ እንዳይዘው ድብርት፣
ቁርአንን ከመቅራት አንራቅ ለቅጽበት።
---
ይህ ክቡር የአላህ ቃል፣
ጥፍጥና ዉበቱ ዘላለም ይዘልቃል።

ከግጥም ልብ-ወለድ ከሁሉ ይልቃል፣
ከዳይመንድ ከአልማዝ ከወርቅም ይበልጣል።

ማራኪ ገፅታዉ ልቦችን ይሰርቃል፣
ጣፋጭ ነዉ ጣዕሙ ማርንም ያስንቃል።

በጥሩ እያዘዘ ከመጥፎ ያርቃል፣
በዱንያ ተጠልፈን እንዳንወድቅ ያደርጋል።
ጥልቀት ባለዉ ጥበብ ወደ ሀቅ ያደርሳል።
---
ታላቅ ነዉ የአላህ ቃል የመፅሀፎች አዉራ፣
አያልቅም ሚስጥሩ ቢነገር ቢወራ።

የጨለማ ጠላት የብርሃን ባንዲራ፣
እዉነትን የያዘ ከስህተት የጠራ።

በአላህ መንገድ ላይ ብርሃኑን ያበራ፣
ባለዉ ደማቅ ብርሃን ወደ እዉነት ሚመራ።
---
በእውቀት ምክክር ብጤውን ለማምጣት፣
ምሁሩም ቢያስብ ስለ ቁርአን ምጥቀት።

ያንዲት አንቀጽ መስመር አምሳያ ለማግኘት፣
ፊደላት ተመርጠው ቢፈጠሩም ቃላት።
ለድንቁ መጽሃፍ መግለጫ ታጣለት።
---
በነብዩ አንደበት የተመሰከረው፣
ከሰው ልጆች ሁሉ በላጭ የተባለው፣
ቁርአንን ተምሮ ያስተማረ ሰው ነው።
---
ወላጆች አደራ ልጆቻቹን አቅሩ፣
ልጆችም በደስታ ቁርአንን ተማሩ፣
በሁለቱም ዓለም እንድትከበሩ።
---
በዚያ በጭንቁ ቀን ነገ በአኼራ፣
ሸፈአ እንዲሆነን ሰዉ ሁሉ ሲፈራ።

ደረጃ ሆኖልን ስማችን ሊጠራ፣
ምንፈልግ ከሆነ ሰዎች ሆይ አደራ።

ቁርአንን በአግባቡ በተርቲል እንቅራ።
---
ቁርአንን ለማንበብ ብናሳልፍ ዘመን፣
ጉልበታችን አልቆ እጅጉ ቢደክመን።

ከድካሙ ብዛት ቢርበን ቢጠማን፣
አይናችን ቢጠፋ በቁርአን አልቅሰን።

ጊዜያችን ያለፈዉ በከንቱ ቢመስለን፣
ሁላቹም አድምጡኝ እጅግ ተሳሳትን።

ቁርአን በማንበብ ላይ በማሳለፍ ጊዜን፣
አላህን ከማመፅ ከወንጀል ጠበቀን።

ከአኼራ ቅጣት ከጉድ አተረፈን፣
የአላህን ፍቅር ዉዴታ አገኘን።
---
ይህ ክቡር የአላህ ቃል የምድራችን ዉበት፣
ከምስጉኑ ጌታ ለዕንቁ ፍጥረታት።

አላህ ያወረደው የምድር በረከት፣
ስጦታ ነው ለኛ ለነብዩ ኡመት።

አንዱ ፊደል ብቻ በአስር ሀሰናት፣
ተባዝቶ እንዲሰጠን በመቆሚያዉ እለት።

ወዳጅ ዘመድ ሁሉ ጥቅሙ በሌለበት፣
መፍትሄዉ ይሄ ነዉ ከእንግዲህ እንስራበት።

ኒያችንን አጥበን ከሪያእ ማሰማት፣
ልንለፍ ይገባል ቃሉን አሳምረን በቅጡ ለመቅራት።

ከፍ ወዳለዉ ስፍራ ወደዛ ለመዉጣት፣
መንገዱ ይሄ ነዉ የብርሃኖች አባት፣።
እሱን በማንበብ ላይ እንልፋ አመታት።
---
መች ተነግሮ ያልቃል የቁርአን ታምሩ፣
ብዙ መፅሀፍቶች ታሪክን ቢያወሩ።

ምርጥ የሚባሉቱ ባንድ ቢደመሩ፣
አሳመርን ብለው ድርሰት ቢቀምሩ።
የቁርአንን ያህል መቼ ተናገሩ።
---
የቁርአን ጣዕሙ ቢከተብ በቀለም፣
የጥበብ አባት ነዉ የተባለዉ በአለም።

በዚያ ትልቅ ብዕር በማያልቀዉ ቀለም፣
ድርሰት ቢፅፍለት ቢገጥምለት ግጥም።

ተናጋሪ ነኝ ቢል ብዙ ቢፎክርም፣
ስለ ቁርአን ጥበብ ሚስጥር ቢያወራም።
ሚስጥሩን ሊጨርስ አመታት ቢቀራም፣
ስለ ቁርአን እዉቀት ጨርሰናል ቢሉም።

ተናጋሪዉ ምራቅ፣ ፀሀፊዉም ቀለም፣
አጥሮት ነዉ የተወዉ ጨርሶት አይደለም።
---
የግጥም አዘጋጅ፡ አብዱልባሲጥ እና ሀያቱዲን
ዓ.ል. 2014

🗓️የዘመን መለወጫ⭕️

​🕌የጁመዓ ቀን ሱናዎች 🌙

🚿​ ገላን መታጠብ ፦ የጁመዓን ሶላት ለመስገድ ገላን መታጠብ የነቢዩ ﷺ ፈለግ ነው።

​🤩 ንጹህ ልብስ መልበስ፦ ካሉን ልብሶች ውስጥ ያማረውንና ንጹሁን መርጦ መልበስ።

​⭐ ሽቶ መቀባትና ሲዋክ መጠቀም፦ ለወንዶች ሽቶ መቀባትና ጥርስን በሲዋክ መፋቅ።

​📖 ሱረቱል ካህፍን መቅራት፦ በዕለቱ ሱረቱል ካህፍን መቅራት በሁለቱ ጁመዓዎች መካከል ያለውን ብርሃን ያበራል።

​📿 ሰለዋት ማብዛት፦ በውድ ነቢያችን ﷺ ላይ ሰለዋት ማውረድ (اللهم صل وسلم على نبينا محمد)።

​🤲 ዱዓ ማብዛት፦ በዕለቱ ዱዓ ተቀባይነት የሚያገኝባት ልዩ ሰዓት ስላለች አጥብቀን መለመን።

​👳‍♂️ ቀድሞ መስጂድ መገኘት፦ የጁመዓ ኹጥባ ሳይጀመር ቀድሞ በመገኘት የጭንቅላት ሰላምንና ምንዳን ማግኘት።

​🟧 ኹጥባን በጥሞና ማዳመጥ፦ ኢማሙ ኹጥባ በሚያደርጉበት ወቅት በዝምታና በትኩረት ማዳመጥ።
​

መልካም ጁመዓ! 🙏 ዱዓችንን እና ኢባዳችንን ይቀበለን። 🩶✨