💎اريد احجي بالعامية علمود الكل يفهمني :

💎انكس شي بالحياة ، من تكون صاحب سلطة وتستغل هل سلطة علمود ترضي رغباتك وشهواتك...الخ

💎من جنت طالب ولحد يومنا هذا ، دائمًا اسمع اذا الطالب ما جاوب او درجته مو زينة .. السبب :
💎الطالب ما دارس
💎الطالب ما محترم اهله وتعب الاستاذ
💎الطالب مستواه مو زين
💎الطالب مخلصها بس لعب...الخ

💎والله العلي العظيم ، اكو طلاب مستواهم
مخيف ، يرهب حتى الاستاذ ، دارس بما يرضي الله والضمير ، مخلص كل الافكار الوزارية وكل افكار المنهج ورايح مسيطر ومرتاح للامتحان المدرسي ويطلع الدنيا طالعه من عيونه ( متحطم ، يبجي ، منهار ، افكار سلبية... الخ)

💎سؤال واريد اجابة ، هو اسمه طالب سادس اعدادي لو طالب دراسات عليا؟
انت جاي تدرسه قواعد السادس اعدادي؟
لو قواعد اللغة العربية بصورة عامة؟

💎ليش هاي صيغ الاسئلة الي يحتار حتى استاذ المادة بفهمها؟ ليش هاي الافكار الي من بداية الوزاريات الى يومنا هذا ما مطروقة بي هيج فكرة؟
اسئلة لا منهجية ، لا وزارية ، لا قريبة على المنهج او الوزاري ...الخ

💎الغاية شنو ؟
فلان استاذ ضايج منه ، فلان طالب ما داخل عندي دورة ، فلان طالب يدرس على ملزمة غيري او يدرس على غيري او يحب استاذ غيري او ضايج من ولي امر طالب معين او من طالب معين...الخ

💎شنو ذنب الطالب اذا انت شخصيتك ضعيفة او عقليتك طفولية او ضعيف التدريس او ماعندك اصلًا موهبة توصيل المعلومة... الخ

💎اسأل نفسك سؤال ، لو تدريسك 100‎%‎ او ما مقصر بالمادة ومنطيها حقها بما يرضي الله ...الخ ، يعوفك الطالب؟ يشوف غيرك؟ يحب غيرك؟

💎هم مقصر بالشرح وهم ما الك خلك تشرح وهم مخلص المادة تحجي على فلان وتاخذ غيبة فلان ..الخ وبالاخير تجيب اسئلة الغاية منها تشوف الطالب منهار ومتحطم ويبجي ويفكر يعيد ويفكر باشياء سلبية بسبب رغباتك وشهواتك

💎تريد تبرز عضلاتك؟
ابرزها بقلمك وسبورتك اذا بيك حظ،
مو تستغل منصبك وتصير حالك حال السياسي ( لا والله حتى السياسي اشرف منك ، لان انت مستغل الحلقة الاضعف وهو الطالب ومخلي حتى ولي امره يدخل انذار من ورا استهتارك واستغلاك)


💎واكو سؤال محيرني ، اريد اجابة ،
الطالب اذا فشل بالاختبار او ما جاب درجة ترضيك ك استاذ ، غير لازم تجتهد وتخلي الطالب مالتك يجيب اعلى درجة علمود يعلي شأنك ويرف اسمك ك استاذ تدريسي؟ الطالب اذا فشل وجاب درجة ضعيفة ترا الكلام السلبي راح يرجع عليك ك استاذ ( راح يكولون شكد استاذ فاشل والدليل درجات طلابه)

💎للعلم ترى هي مو بكثرة الاختبارات ولا بصعوبة الاختبارات ...الخ
بيك حظ ، اجتهد واشتغل على الطالب وخلي جاهز لمواجهة اي امتحان منهجي وزاري ، مو تجتهد وتشتغل على ارضاء شهواتك ورغباتك يا انكس مخلوق بالكرة الارضية


💎اذا اكو شخص يكون ولي امر الطالب بمرحلة السادس هو الاستاذ نفسه ( لان الطالب يشوف الاستاذ اكثر من شوفته ل اهله وناسه، يتعلق ويتأثر بالاستاذ اكثر حتى من اهله نفسهم)

💎لذلك من حقي ك ولي امر للطالب احجي ب اسمه وادافع عنه

💎وانت ابو الرغبات والشهوات ( استاذ او استاذة ) وراك (الله) وهناك خلي تفيدك رغباتك وشهواتك لو سمحت

💎وانت ك طالب ، دير بالك تخلي هل مخلوق يوصل للي يريده ويحطمك او تفكر باشياء سلبية او تضعف ،،، طيح طبيعي بس كَوم واسحك على كل واحد يريد يشوف دمعتك ، كَوم وفكس عيونهم وفرح الناس الي منتظرتك بنهاية الطريق وتريد تصفك وتبجي وتفرح وياك ،، كل سلبي يصادفك بمرحلة السادس ( استاذ ، صديق ، اهل ، كرايب ، مرض ، كلام ، ظرف مو زين ... الخ) خلي ابالك هاي ابو الوزاري دزها الك ( لان ابو الوزاري عدوا ، وهل عدوا ماعنده منافسة شريفة لان يعرف شنو امكانيتك ك طالب اذا توفرت الك كل متطلباتك الي هي من حقك)
دير بالك تضعف وتبقى طايح وتخليهم يوصلون لهدفهم ، ازرف عيونك والله

💎محاضرات حضوري
💎تصوير الكتروني
💎سفر
💎كتابة ملزمة
💎مونتاج
💎كتابة اسئلة
💎رد على الاستفسارات
💎تفكير وتخطيط
💎اهل بعيدين
💎اصدقاء بعيدين
💎تنطيف عليك
💎طبخ عليك
💎غسل ملابس عليك
💎تعتني وتهتم ب الاف المزاجيات والعقليات (الطلاب)
💎اشتياق
💎غربة
💎قلة نوم
💎قلة اكل
💎ضغط من الكل
💎الكل يريد منك


💎شايف من تجتمع كل هل امور عليك :
ويجيك شخص يزعل لان ما رديت على مسج او اتصال معين ، او ما سائل عنه..الخ

💎يابه تدرون اعز شي بالدنيا ( امي وابوي)
تمر ايام مااحجي وياهم ( تمر اسابيع واشهر مااشوفهم)

💎يابه تدرون عند اخت وحدة راح تصير ماجستير وما شابع من شوفتها

💎يابه تدرون اخوتي كبروا وصاروا شباب وانه ما شايفهم ( وعلي من اجاني اخوي استحيت منه لان من زمان ما شايفه وحسيت ما متعود عليه😂)

💎يابه تدرون صارت من امنياتي انام 3 ساعات سوه

💎يابه تدرون صارت من امنياتي اطلع وي اصدقائي اغير جوو ومحد يصيحيلي استاذ
وينسوني حسين عبيدة

💎شايف من تباوع الك الناس ك مشهور وكل تفكيرها عندك هواي ناس بحياتك ،
وكل تفكيرهم حياتك كلها شباب وبنات وفلوس وضحك وسفر ...الخ
وانت تتمنى تسمع كلمة حسين محتاج شي؟ حسين منو وياك؟ حسين مرتاح؟

🟡رسالة ل كل شخص يحبني :
اذا منتظر عذر علمود تزعل وتاخذ بخاطرك ، انه اكلك ازعل ومع السلامة

🌟لان عندي اهل، مساعدين ، اصدقاء
الله خلاني وسيلة وسبب لرزقهم

🌟لان عندي طلاب ،جاي يفهمون عليه وماعدهم الامكانية المادية وجاي ينتظرون محاضراتي بكل شغف

🌟لان عندي احلام ، لازم احققها ومااخلي احد من اهلي او اصدقائي باجر يتحسر على شي معين ويكول ليش فلان احسن مني


🌟لان عندي عائلة بالمستقبل( زوجتي واطفالي) ، تريد تعيش ب افضل عيشه ، تريد توصل لمرحلة تكول الف الحمدالله
على هل نعمة

🌟لان عندي موهبة الله انطاها الي ( علمود انفع بيها ناس هواي مو علمود
ابقيها لنفسي )




🟡تحبني من صدك ، خلاص تحملني وقدر ظرفي وافهمني بالايجابي ، لان كل اهمال يطلع مني ثق مو متقصد ( انسان صريح لدرجة احجي على نفسي) بس هاي الفترة حاليًا صعبة عليه فسامحني ولا تزعل مني لان واصل لمرحلة ماعندي مجال اراضي واعتني بنفسي مو اراضي الناس الزعلانة وداعت حبنا😂