#Admin專欄 #暴風雨前嘅平靜 #暴風雨前嘅平靜係最撚平靜 @Windseasonbro

未睇呢篇文章之前，請大家Share畀你所有朋友同1️⃣2️⃣3️⃣4️⃣5️⃣本Channel先😂。

近幾個颱風，連登學術臺都有一班假膠發放假消息，有人話個風好勁，又有人話係廢風。對我哋有少少氣象知識嘅業餘愛好者還好，但對其他網友實在難以理解孰真孰假。

風巴有一個舊同事Whatsapp Group，佢哋知道我熱愛颱風(唔知道我Run緊Channel)，就問我究竟乜先係真資訊。

其中有一個人係實測派，佢今朝六點鐘就落樓『感受風力』，而家同我講個風不外如是。

唔係Exact wording，但係差唔多意思：『XXX，呢個風仲廢過上個風Wor。』

首先，蘇拉呢個風經歷不斷嘅眼牆置換之後，雲團綿密，對流集中，佢而家都未揩到香港就梗係無風啦，而當佢喺香港南掠或者登陸時，颱風旋臂掂到香港，甚或眼牆掃到香港，到時個風速將會係幾何式提升，就好似以前睇龍珠，孫悟空喺常態同變咗做超級撒亞人個戰鬥力嘅分別。

而有d連登假膠同埋我同事都質疑政府點解咁早就八號風球，我想講其實今次政府做得好好，如果要好似林超英年代追求嘅風力達標，大概今日黃昏時間先掛八號風球，然後成班人趕頭趕命返屋企，到時就收得皮。

早幾日都有舊同事問我究竟幾時會八號，我當時話9月1黃昏至夜晚個風力先達標，但如果天文臺臺長鬆手，係可以全日嘅。

提早掛八號風球嘅意義，唔係單單在於一日半日風假(關於風假心態詳情我會再寫一篇Admin專欄，此處不贅)，更重要嘅係當有一個怪物級颱風出現之前，大家可以足夠時間準備。

例如將架車泊去安全地方；怕颱風引致電壓驟降繼而斷水斷電而做足準備工夫（煲定水備用Etc.）；窗門貼定膠紙；住村屋嘅將室外嘅盆栽放回室內...大把可做同要做嘅嘢。

天文臺或者氣象局，理應係預鬆，雖然你話日本地震都要返工，不過按風險=機率x嚴重性嚟講，我認為應該要預鬆。

再加上，此一時彼一時，香港股市日日跌，不如停一日市重好，又或者咁講，八號風球反而帶動消費，係一個難得你會無啦啦使多咗錢買物資嘅日子。

喺如今美麗新香港，之前口口聲聲話『活化工廈』，如今因為政治打壓黃店而燒埋工廈餐廳嘅香港，經濟根本就停滯，反而喺八號甚至十號風球嘅氛圍下，一班港豬又好，有危機意識嘅人都好，反而重使多咗錢。

所以呢個風係要提早掛，百利而無一害。

風巴再三提醒各位唔好落街追風，唔好因為而家無風，就以為個風好廢。請大家唔好追風，尤其戶外，會死人。

大家請繼續留意本臺 @windseasonhk 或其他氣象channel及天文臺最新資訊。如果中意風巴鳩噏，不斷叫朋友同tg 細group睇呢個Channel就係對我最大嘅支持同鼓勵。