اعظم الله لنا ولكم الاجر

#تراث

يا اللهي بالرسول ونوره
غايب الاسلام عجل ضهوره
ــــــــــــــــــــــــــــــــــــــ
ما على حكمتك يارب نعترض
حيث أمرك واجب ونهيك فرض
لاچن النه غايب أو حي عالأرض
أبسهم هجره إچبدونه مفطوره
ــــــــــــــــــــــــــــــــــــــ
سيدي يبن الميامين الاكرام
يبن من ميز الحل امن الحرام
غدت شيعتكم عكبكم جالحمام
بالبوادي تايهه ومصكوره
ــــــــــــــــــــــــــــــــــــــ
سيدي لبجي عله حالك واحن
حنت ام النوح زينب والحزن
واجري عبراتي دمه فوك الوجن
عبرت السجاد حين افطوره
ــــــــــــــــــــــــــــــــــــــ
سيدي واجب الفركاك الونين
ونة اسكينه اعلوالدها الحسين
انت يبن العسكري مالك معين
مثل جدك رايتك مهجوره
ــــــــــــــــــــــــــــــــــــــ
سيدي لنعاك مثل البسمه
ما نعى جبريلها حامي الحمه
واصرخ اعله اجفاك صرخه فاطمه
يوم ابوها اكفه وضعن عن دوره
ــــــــــــــــــــــــــــــــــــــ
سيدي لنخه واحشمنك مثل
ما نخه العباس ابو اليمه النفل
يوم شافه كابع ابعود النبل
والرماح اعليه شابج زوره
ــــــــــــــــــــــــــــــــــــــ
سامع بوكفه احسين اعله العضيد
الشاب من امصابها راس الوليد
حنه اعليه ضهره وايدن فوك ايد
وسف عالرايه المست مكسوره

المرحوم الشاعر
عبود غفله


#اللهم_عجل_لوليك_الفرج

(104)

#تراث

في هلال محرم

هل المحرم والحزن يبراله
ياصاحب الثار بحوالك اشصار
من شافت اعيونك الليله اهلاله
ــــــــــــــــــــــــــــــــــــــ
سيدي بين الوديعه اشحال گلبك هلمسيه
من گمت تذکر مصایب هظم يوم الغاضريه
ما اعز منك على الله با السمه ولا بالوطيه

انشر اچفوفك للدعه
وخل يهل جفنك مدمعه
ونادي يرب الواسعه
ابجاه ظلع امي الزچيه

عجل ابو عدي المنك انترباله
ليلي ولنهار وگلبي يشب نار
ودموع عيني امن الهظم هماله
ــــــــــــــــــــــــــــــــــــــ
یا الاهي اسرع ابوعدي مابعد للگوس مدفع
ملت امن الصبر روحي وناظري من الهظم يدمع
هذا ديني وثار جدي بيه تهتف وانه اسمع

چم دوب اظل أبهالصبر
والگلب بتواگد جمر
عجل يلاهي با الأمر
حتى اسل السيف واطلع

دين الحيا جدي الرسول وآله
وشيده الكرار لمن عليه صار
رايد يهدمه الأعور او جهاله
ــــــــــــــــــــــــــــــــــــــ
اشلون اخلي الدين وحده ابولیت احزاب الجهاله
والعجل يامر وينها ويحكم أويفتي آبخياله
يدعي لفض الشهاده الثالثة بدعة وضلاله

اوبيها الأمر منك نزل
والدين للأمه کمل
حلل حرام أهل الجهل
والشرع حرم حلاله

يرضي النواصب مگصده بفعاله
ولا همته النار وفضيحه العار
يفتخر گام اعلى الخلگ بعماله
ــــــــــــــــــــــــــــــــــــــ
يا الاهي وثار جدي يستغيث وينخه بيه
ياذنب لحسين حتی اعلیه تجور اشرار أميه
عاف من عدها المدينه وگصد لرض الغاضريه

بسما وگف بيها المهر
ونزل اضعونه بن الطهر
گامت رواياها تجر
وشحنت افجوج الوطيه


گامت الحربه الكفر تتناخاله
من اربع اکتار بيه الفزع دار
گطعوا الماي اهل الرده اعلى اطفاله
ــــــــــــــــــــــــــــــــــــــ
رادته ايطاوع لمرها وعيت ايبايع حميته
سایت اعليه المذله وشتره العز ابمنيته
حشم انصاره الضياغم للحرايب وهل بيته

هاجت وبذلتله الجهد
والوالد ایحشم الولد
المن نزل ليها الوعد
غدت تتهاوه ابثنيته

خلصت چتل بالغاضریه اگباله
اهله ولنصار جادت بلعمار
على الگاع نومه وغدت تبچي الحاله
ــــــــــــــــــــــــــــــــــــــ
ظل وحيد آیدیر عينه وغده اعليه الجيش داره
گام يحمل على الكتائب مثل ابوه اليحمي جاره
حته صاب السهم چبده او وگف بحدود المعاره

دارت عليه من کل کتر
وتولته طعن او طبر
لمن وگع من المهر
ودم اصاویبه ایتجاره

أمنت منه وغدت تتدناله
عليه الفزع غار وليت الك فار
گامت تدوسه ابخيلها الخياله
ــــــــــــــــــــــــــــــــــــــ
فر للمخيم احصانه وگام بين الخيم يصهل
يظن يلگه امن الهواشم واحد وعلى الخيل يحمل

طلعت امن الطنب زینب والحرم تصرخ وتعول

صاحت وناضرها دمع
چاوین خيالك وگع
هالعسكر عليمن فزع
ليش دمعت عينك اتهل

گلی عليمن فزعت الرجاله
وبیاکتر صار مهجة المختار
ولیا کتر عگبه تروح اعياله


المرحوم السيد
عبدالحسين الشرع


#اللهم_عجل_لوليك_الفرج

(105)

#تراث

لمن ظل وحید احسين وعليه دایر العسكر
راح ايودع اعياله گبل أفراگ المگدر
ــــــــــــــــــــــــــــــــــــــ
رد امن الحرب مهظوم الاچن گصد لأنصاره
لگاها اعلى الارض نومه او دم الطعن يتجاره
وگف يمهم يعاتبهم اوگلبه تلتهب ناره

يليوث الحرب نومه
اومنكم خاليه الملحومه
ثنيتكم المعلومه

ياهو اليوگف ابجدها اودون الخيم يتعفر
ــــــــــــــــــــــــــــــــــــــ
عفتوا ادیاركم لجلي اوطلگتوا الأهل يكرام
ليش اليوم عفتوني وحید ابين هالظلام
عدكم (حرم) مذعوره والكم بالطفوف اخيام

ياهو اللي يحاميها
العسكر لودوه اعليها
هاي اخيل اجت ليها

گوموا اوسدروا الغاره (اوخلوها) شتت بالبر
ــــــــــــــــــــــــــــــــــــــ
اعاتبكم يهل بيتي ولا چنكم تسمعوني
ليش أوحيد بين الگوم يهل الوفه اتخلوني
دارت علي عدواني اولیکم شابحه اعيوني

چیف الكم يطيب النوم
و آنه أوحيد بين الگوم
جزاكم يهل بيتي اللوم

أعاتبكم اومن عدكم السان الحال يتعذر
ــــــــــــــــــــــــــــــــــــــ
يهل الشيم فرگتكم اشلون الحرم تحملها
بيهن صارت اللوجه اوروحي لاجت الذلها
گامت تضطرب عالگاع ذیچ ابدانها كلها

لمن سمعت المظلوم
رادت تنتهض واتگوم
لاچن حايل المحتوم

مابین اخوته اوبینه اوکلما (تهم) ما تگدر
ــــــــــــــــــــــــــــــــــــــ
(سدر) مايوس من عدهم وتعنه الصواوينه
وگف مابين المخيم وتهل الدمع عينه
صاح ابصوت (یم چلثوم) (یازینب) (اویسکینه)

ليچن چیت متعني
اودعچن اوودعني
بعد ماظن تشوفني

هذا (اليوم) تالي اوداع والميعاد بالمحشر
ــــــــــــــــــــــــــــــــــــــ
لمن سمعت النسوان للتوديع ناداها
طلعت من مبانيها او تتصارخ يتاماها
غدن يبچن على أفراگه أو يتهلف الفرگاها

وحده لزمت ارچابه
اووحدها تحن على امصابه
او وحده اتصيح يايابه

او وحده اتون على افراگه اووحده اعليه تتحسر
ــــــــــــــــــــــــــــــــــــــ
چنك سلمت للموت زینب نادته يحسين
يگلها اشلون ماسلم يختي اولا بگالي امعين
عامي واخوتي نومه اوبيه دایره الصوبين

(چتلي) عداي مگصدها
اوغير الحرب ما عدها
سبعين الف شيردها

وانه امن العطش چبدي يزينب ذاب وتفطر
ــــــــــــــــــــــــــــــــــــــ
طفله امن الخيم طلعت صاحت يا ضوه عيناي
يعمي والدي اوعمي هليوم اعتنوا للماي
ولاردوا بعد لیه او حر العطش فت احشای

اخذني اوياك يعيوني
اوخليهم يشوفوني
ومن المای يسجوني

تراني امن العطش ما شوف دربي اوچبدي اتفسر
ــــــــــــــــــــــــــــــــــــــ
يگلها امن آخذج وياي ليهم بعد شيردج
لاچن رايح آنه الحين واخبر عودج اوعمچ
ردي ياضوه اعيوني اوتاني الماي بخيمچ

تگله اشلون ارد وآنه
مني الروح تلفانه
يعمي احسين عطشانه

واخافن تبطي اوچبدي نار العطش بي تسعر
ــــــــــــــــــــــــــــــــــــــ
سالت دمعته اوناده يزينب عاد سكتيها
تراهی گطعت گلبي هالطفله ابواجها
يختي الحرم لميها والخيمتج رديها

إسمعي اعداي نادوني
أرد للگون يردوني
بعد ساعه او یکتلوني

اوما اقبل يشوفني اوجسمي اعلى الثره امطبر
ــــــــــــــــــــــــــــــــــــــ
لوه اعنان المهر بیده اوراد اعلى الحرب يحمل
لن وحده تصيح بصوت يحسين اودمعها ايهل
صد اوشافها (زینب) گالتله يخويه انزل

راحت حبته ابصدره
اوردت شمته ابنحره
او صاحت يمي (يالزهره)

هاي اودیعتچ ردت وینچ ساعه واتگنطر


المرحوم السيد
عبدالحسين الشرع

#اللهم_عجل_لوليك_الفرج

(106)

تم اعادة النشر بسبب بعض الاخطاء الأملائية 🙏

#تراث

فاطمة الكبرى العليلة وكتابها للحسين
سلام الله عليهما (نصاری)

العليله الوالها من كتبت اکتاب
اجت من دارها او وگفت عله الباب
ــــــــــــــــــــــــــــــــــــــ
اجت او لالها اعله التعب طاقه
تشوف اتروح ساقه اوترد ساقه
اولن هذا الأعرابي ابظهر ناگه
امسرفن للسفر بردان الأثياب
ــــــــــــــــــــــــــــــــــــــ
كالت بالعرابي الله عوينك
ريض منشده بيني وبينك
عساها راشده اليا حد معينك
أريد اعراگها اشعندج امن احساب
ــــــــــــــــــــــــــــــــــــــ
اليابلده يراچب سرعة انیاگ
يگلها طالب الكوفه من العراگ
نقله امن العليله علة أفراگ
اخذلي هالرساله اوياك لحباب
ــــــــــــــــــــــــــــــــــــــ
يهل حره يفلها امنین شنتي
اعيوني جرت والگلبي کسرتي
الرساله شيلها اوياك گلتي
منمن وإلمن اویاهم هالأحباب
ــــــــــــــــــــــــــــــــــــــ
انه بنت الرساله یعرفوني
أبوي احسين وهلي ضيعوني
سارو للعراگ اوفارگوني
وخبره ابحالتي وطيه الكتاب
ــــــــــــــــــــــــــــــــــــــ
بچه اوگال اعله راسي كون أشيله
وخبره ابحالج او عنج احچيله
اكله ابدار کم ضلت عليله
تگول الوعد وين الوعد يطياب
ــــــــــــــــــــــــــــــــــــــ
شال اکتاب خاینها دهرها
اوثور ناگته اوگطعت قفرها
طوت فجها اوفيافيها ابصدرها
نصه الكوفه اولگه الصایح ابكل باب
ــــــــــــــــــــــــــــــــــــــ
نشد عن صایح الكوفه شجتها
گالو طاميه اوكلها طمتها
اسيوف ابکریله الهاشم فنتها
الميت فوت والمجروح ماطاب
ــــــــــــــــــــــــــــــــــــــ
وجه ناگ تغريب ومنير
نخاها او حيه بيها الهمة السير
تزف كل أربعتها زفة الطير
شبه ربد النعام أو تجدح اتراب
ــــــــــــــــــــــــــــــــــــــ
سج البيد وتحمل کلافه
لگه جیمانها والجيش شافه
دایر کربله گطع المسافه
زور امن الجنه امهيش والحراب
ــــــــــــــــــــــــــــــــــــــ
سمع ندبة أحسین اوسمع صوته
يحشم صحبته اوینده بخوته
لگاه أوحيد والكترین موته
الكل منهم بني هاشم والأصحاب
ــــــــــــــــــــــــــــــــــــــ
ريض ناگته او للسير ثگل
تحير بالرساله اشلون توصل
انتخه اوفرع أوطر الگوم وگبل
عله احسن اوبجه وطاه الكتاب
ــــــــــــــــــــــــــــــــــــــ
يگله آمنين هل مرسول مرسول
يگله امن العليله الوالدي اتگول
انه اوحیده بگیت آبخاليه انزول
اخذ وياك مني الوالدي اعتاب
ــــــــــــــــــــــــــــــــــــــ
الدنيه أهمومها أعله أحسین حالن
اجه ودموع إله أمن العين سالن
يزينب نده ياسکنه تعالن
اجانه اكتاب يحزن فوگ المصاب
ــــــــــــــــــــــــــــــــــــــ
اجن يستنادبن من سمعن أنداه
امصاب اللي جره يحسين شفناه
شنهو اكتاب عندك ما عرفناه
منمن جاي هذا بين الأطياب
ــــــــــــــــــــــــــــــــــــــ
وگف مهموم فل طية المكتوب
سلام امن العليله أو بيه معتوب
العين ابعيدها تسلاه الگلوب
الوعد منكم يجي طارش يغياب
ــــــــــــــــــــــــــــــــــــــ
سلام أبدت لبو فاضل علمها
عله اخوتها عدد وأولاد عمها
اوعله عماتها كلمن بسمها
اوعله باجي العشيره كلهم أحساب
ــــــــــــــــــــــــــــــــــــــ
تذكر فاطمه يحسین يابه
تشم خد الطفل عني نيابه
يبويه لا صدیچ اولا گرابه
يجي من بعدك اويوگف عله الباب
ــــــــــــــــــــــــــــــــــــــ
السلام الكدره او كثرة عتبها
يویلي والحرم نوحه ابطنبها
أخذ مكتوبها بيده أوندبها
هلج بافاطمه یا حیف غياب
ــــــــــــــــــــــــــــــــــــــ
أصل للمعرکه وجري مرامج
نيابه واجب اعلیه سلامج
أعيده إعله اخونچ اوكل عمامج
ولو موته هلج وموسده اتراب
ــــــــــــــــــــــــــــــــــــــ
ندبهم يخوتي مكتوب ليكم
سلام الفاطمه اوتعتب عليكم
اتعتب شلفايده ما درت بیکم
رماكم سهم دهري والسهم صاب
ــــــــــــــــــــــــــــــــــــــ
كلها أمطرحه موته الندبها
جثها اتگلبت نومه اتحسبها
جسم عباس أبو فاضل تشبها
جبل وتزلزل اوزال أمن العتاب

الشاعر المرحوم
عبد الامير الفتلاوي

#اللهم_عجل_لوليك_الفرج

(107)

#تراث

نـار بـدلـيـلـي تـسـعـر ... مـاتـنـطـفـي يـالأكـبر
والـنـارشـيـطـفـيها ... تحرگ گلب راعيها ...ماتنطفي يالأكبر
ــــــــــــــــــــــــــــــــــــــ
نـام بـرغـد و تـهـنـه يـالـحققت آمالي ... ياثمر گلبي و عزمه
هـيـج الـولـد يـردونـه مـايعز دمه الغالي ... للدين يصخى بدمه
و ارفـعـت بـالـعـز راسي ادريك نعم الوالي ... و لگلبي تفرج همه

تـدري بـدلـيـلـي اشـصـابـه ... مـن الـفـراگ صـوابه
و لـمـهـجـتـي يـتـاليها ... و النار شيطفيها...ماتنطفي يالأكبر
ــــــــــــــــــــــــــــــــــــــ
يـومـك جـرح دلالي و ماشفت بعدك راحه ... و منين أجيب الراحه
و مـدوهـنـة خـلانـي و بـحربته الجرّاحه ... زيدت گلبي جراحه
و عـيـوني تربي و متشوف گلبي انطفه مصباحه ... يالشوفتك مصباحه

نــيــرانـك الـتـجـويـنـي ... و فـراگك الـمـاذيـنـي
و الـروح شـيـسـلـيـها ... و النار شيطفيها...ماتنطفي يالأكبر
ــــــــــــــــــــــــــــــــــــــ
يـبـنـي تـعبت بأيامك و اتلفت راحة ليلي ... لأجلك يا راحة ليلي
و الـمهد گلب أمك جان وكتي رهنته و حيلي ... يا عزم همتي و حيلي
و مـن طـالعك صفحة نور تنعكس و تضوّي لي ... بالعاطفة تضوي لي

سـهـم الـدهـر خـيّـبـنـي ... مـن صـوَّبـك صـوَّبـني
و الـجـبـدتـي مـاذيـهـا ... و النار شيطفيها ...ماتنطفي يالأكبر
ــــــــــــــــــــــــــــــــــــــ
يـالـمـرتـعـك دلالـي فـرگاك زيَّد نوحي ... و مساهرات عيوني
كَتَّت عليك دموعي و شلون شاغت روحي ... لأجلت يا صدگ ظنوني
ضـلـيـت أداوي جروحي يا بسمتي بجروحي ... و بضيعتك ضيعوني

صـابـت دلـيـلـي الـصـدمـه ... و يَـبِّـسـت دم بـجسمه
و جـروحـي شـيـداويـها ... و النار شيطفيها ...ماتنطفي يالأكبر
ــــــــــــــــــــــــــــــــــــــ
ردتـك ذخـر يـاولـيدي للعايزة ذاخرتك ... و ارسمت صورة حبي
لـوصـحت يبني النخواي بالعزم تشفي بهمتك ... عونج ياشوفة دربي
صـابـت دلـيـلـي الأيام و بكربله ضيعته ... و انطفت شمعة گلبي

أگضـي الـعـمـر بـالـحـسـره ... و دمـع الـعـيون اليجره
فـرگاك الـسـابـيـهـا ... و الـنار شيطفيها...ماتنطفي يالأكبر


الشاعر المرحوم
عزيز الگلگاوي الكربلائي


#اللهم_عجل_لوليك_الفرج

(108)

تنويه ✿

العلامة الاميني (قدس سره)
كان من عادته أن في ليلتي التاسع والعاشر من شهر محرم الحرام يخرج صدقة باسم صاحب الزمان (عجل الله فرجه) وكان يقول أن في هذه الليالي يكون قلب الحجة معتصرا بالألم والحزن ... إرسل هذه الرسالة إن استطعت لتكثر الصدقات في سلامة قلب صاحب الزمان روحي فداه

#تراث

يحسين الخيم يحسين...گوم ولحگ عليهه
حرگوهه العده بنار...وأطفال وحرم بيهه
ــــــــــــــــــــــــــــــــــــــ
أجت نار وشرار النار صار اعل الخيم لهاب
أجت الخيل أجت يحسين تتراكض على الاطناب
أجت تسلب خدر و حجاب حرم عفه وخدر و حجاب
شگول اشكثر جم سلاب أجت سبعين الف سلاب

ولن بس العده ايسلبون
الخيم چان المصيبة اتهون
لچن هم گاموا ايحرگون

الخيم عل الحرم والايتام...ولا واحد يحاميهه
ــــــــــــــــــــــــــــــــــــــ
إذا عندك بعد يحسين بگت مهجة سليمة و روح
اعله زينب خل يحن گلبك وگلهه ابيا كتر مطروح
أخاف احجيلك ابيا حال والجم گلبك المجروح
بين الخيم والميدان مهضومة وترد واتروح

لاتگدر تجي يمك
وتعوف العيلة بخيمك
ولاتقبل يضل جسمك
يتگلب على التربان...بذاك الحر ياواليهه
ــــــــــــــــــــــــــــــــــــــ
أختك تدري بيك أختك أنت اعله الثرى ابيا حال
لجن غصبن عليهه اليوم تحشمك والدمع ينهال
وحيدة وخمسة ثمانين عدهه من حرم أطفال
الحرمة ابوليت السلاب وطفلهه ابسحگت الخيال

وخيمهه ابلهبت النيران
وأنت اموسد التربان
مو حگهه يهل العطشان

تگول الله يساعدهه وأنهض يلولي ليهه
ــــــــــــــــــــــــــــــــــــــ
أجت ليك ابگلب لهفان لچن ما أجت زينب ليك
تريد الحره تشجيلك هضمهه الي جره وتاذيك
أجت ليك الغريبة أتشوف أشصاير يا غريب اعليك
أجت تشوفك اليا حد حر العطش أثر بيك

وإذا تشجي العطش يحسين
تعصرلك أدموع العين
لجن بس أنت للمتنين

لتصد وتشوف أشلون أبسوط العده أموسميهه
ــــــــــــــــــــــــــــــــــــــ
تگدر تسمعلهه الصوت تگدر ما أظن تگدر
صوت الي تحشمك بيه والله أيفتر المرمر
أذا من العطش گلبك هو أمروع أمفطر
بعد يحمل أعتاب أشلون أشد من العطش والحر

اشرايك بعد يامظلوم
تگدر للغريبه اتگوم
لو تبگه اعله هذا النوم

بلحر والشمس وأختك مهظومة تخليهه
ــــــــــــــــــــــــــــــــــــــ
أخذ هاك أخذ هذا الصوت إجاك ابدافع الحسره
صوت وحسرة ويه الصوت كل حسرة أبلف جمره
وتحاچيك وحچيهه وياك كل چلمة تجي بعبره
تگلك ها يمن بجيت بهضمك أمك الزهره
العدة ايگلو لك أختك هاي علتل شابچه العشرة

اشتگلهم للعده ياويل
تگلهم مابگالي حيل
أگوملهه و أرد الخيل
وتضل صابر ولو يحسين يگلو لك أمسلبيهه
ــــــــــــــــــــــــــــــــــــــ
أخوي ومدري شحچي وياك أخوي وحرت بين أمرين
أشوف الأخت حگهه أتگوم تعتب عل الأخو يحسين
أشوف أنت عله التربان بعد وين أنت وأنه وين
أعذرك واسكت واصبر أموت من الصبر يحسين

عليك اعتب أخاف عليك
يبن أمي العتب ياذيك
وأنه أدري بعد ما بيك
نهضة وچبدتك يحسين بلمثلث أمصوبيهه
ــــــــــــــــــــــــــــــــــــــ
عله التل أوگفت يحسين واعاين گمت للحومة
نايم أرد اشوفك وين بطل حيلي عل هلنومة
وردت يحسين اگلك گوم عليك أمك المظلومة
خفت هذا القسم ياذيك اسكتت وابگيت مهضومة

وتالي واحد من أعداك
يزينب صاح اخيچ ذاك
بأخر نفس عفته اهناك

شربت ماي اذا عندچ لخوچ بساع وديهه
ــــــــــــــــــــــــــــــــــــــ
أنكسر گلبه عله حال أخته وثلث مرات گام وطاح
وتحسر وبضعيف الصوت يزينب هاه يزينب صاح
كسرتي ابنخوتج گلبي ودمع عيني ويدمي ساح
تجيني للحرب تردين وبعد لحظة يجي الذباح
واذا من السهم ثلثين من گلبي يزينب راح

اشلون اگدر اگوم اشلون
وصار أظلم بعيني الكون
يأختي راحو ايسلبون

اعيالي رديلي اعيالي امن السلابه خلصيهه
ــــــــــــــــــــــــــــــــــــــ
إلتوت مكسورة الخاطر وصفگت يمنه بليسره
وصاحت آه يخويه آه تظل نايم عله الغبرة
وتگلي رديلي أعيالي شرد أعيالك امطشرة
تگلي أخيامي حاميهه أخيامك گلهه مستعرة

تگلي هودي الأطفال
شوف أطفالك بيا حال
أجت سبعين الف خيال

وگامت تسحگ أطفالك بعد شلون أحاميهه

الشاعر المرحوم
الشيخ هادي القصاب


#اللهم_عجل_لوليك_الفرج

(109)

#تراث

گوم يا حيدر يحامي ادخيلها
دارت اعلى ابنك زلمها وخيلها
ــــــــــــــــــــــــــــــــــــــ
خيل عد خيل وزلم عند الزلم
سربه عد سربه وحزم عند الحزم
بالطف اولها انتخت شام الهجم
أعلامها امصوله ابجهدها وحيلها
ــــــــــــــــــــــــــــــــــــــ
ابحيلها امصوله وعلى حسين انتوت
او جرت البصره وعلى الكوفه انطوت
احتوت بالطف يا علي كلها احتوت
هاي عرصة كربلا وتفصيلها
ــــــــــــــــــــــــــــــــــــــ
هاي كلها اتكورت بالطف سوه
وسدت افجوج الفله وريح الهوى
تعزلت سبعين كل جيمه ابلوه
واللوه ابسبعين الف تعزيلها
ــــــــــــــــــــــــــــــــــــــ
اتعزلت وتصيح يا ثار الوليد
اليوم ياخذ من علي ديونه يزيد
دگت بدمامها وتهجم تريد
هجمت الكعبه بعساچر فيلها
ــــــــــــــــــــــــــــــــــــــ
هتف عباس وحِده وصار الجدال
وآل هاشم گالت اعلينه النزال
والاصحاب تناخت وگالت محال
بالنفوس احنه الذي نبديلها
ــــــــــــــــــــــــــــــــــــــ
شبول هاشم گالت العز بالصگال
والابطال ايهولهه املاگه الابطال
هاشم التنهض بالحمول الثگال
والكلافه أهل الكلافه تشيلها
ــــــــــــــــــــــــــــــــــــــ
گالت الانصار ذله اعله الانصار
لو بدت هاشم نگص و نصير عار
ليش طلگنه النسه وعفنه الديار
كون حگ اهل المجد نجريلها
ــــــــــــــــــــــــــــــــــــــ
نجري حگ المرتضه وحگ البتول تجمعت فرسانها شيب وكهول
گالت الانصار يحسين شتگول
صحبتك لو هاشم التبديلها
ــــــــــــــــــــــــــــــــــــــ
گال تبدي انصارنا وسالت العين
وهز حبيب العلم عد وجه الحسين
اليوم ندمي الزان و نشيّد الدين
اليوم الهموم العليك انزيلها
ــــــــــــــــــــــــــــــــــــــ
انزيلها عنك ونسكن دورها
ونورد الكوثر ونحظى بحورها
اتهبه الكوفه شما كثر مكثورها
بالسيوف الماضيات انشيلها
ــــــــــــــــــــــــــــــــــــــ
شالو اعلام العدم و تنشرت
والغماد اتطايرت وتكسرت
والگلوب اعلى الدروع اتشمرت
والارواح اعلى الحتف مصفيلها
ــــــــــــــــــــــــــــــــــــــ
اصفت ومادت وجادت بالنفوس
وصالت او جالت وچتلت چم عبوس
صار هندس كونها وهمه الشموس
ابدور بالتم والچواچب ليلها

الشاعر المرحوم
عبد الامير الفتلاوي


#اللهم_عجل_لوليك_الفرج

(110)

#تراث

ماتَ التصبرُ في انتظا رِك أيها المُحيي الشَريعه
فانهضْ فما أبقى التحملُ غيرَ أحشاءٍ جزوعَه
قدْ مزَّقَتْ ثوبَ الأُسى وشكتْ لواصلِها القطيعه
فالسيفُ إنَّ بهِ شفاءَ قلوبِ شيعتِك الوَجيعه
كم ذا القعودُ ودينُكُمْ هُدِمَتْ قواعدُه الرفيعه
تنعى الفروعُ أصولَهُ وأصولُهُ تنعى فروعَه
فاشحذ شَبا عضبٍ له الأرواحُ مذعنةٌ مطيعه
واطلب به بدمِ القتيلِ بكربلا في خيرِ شيعه
ماذا يُهيجُكَ إن صَبرتَ لوقعةِ الطفِ الفضيعه
أَتُرى تجىءُ فجيعةٌ بأمضَّ من تلك الفجيعه
حيثُ الحسينُ على الثّرى خيلُ العدى طحنت ضلوعه
قتَلَتْه آلُ أميةٍ ضامٍ إلى جنبِ الشّريعه
ورضيعُهُ بدمِ الوريدِ مخضبٌ فاطلبْ رضيعه


الشاعر المرحوم
السيد حيدر الحلي

#اللهم_عجل_لوليك_الفرج

(111)

#تراث


آه لمـصـابك يـــزين أعــبادهــــا
زلزل العـالم وسـبع أشــدادها
ــــــــــــــــــــــــــــــــــــــ
تضـرب الوادم ابیعـگـوب المثل
شاب راسه وانحنه ظهره اونحل
ومن كثر ما ينحب اودمعه همل
بيضت اعيـونه اوزال اسـوادهــــا
ــــــــــــــــــــــــــــــــــــــ
اشراح منه اشذهب گلولي اشفگد
صـــار بي ما صــــــار دلاله انمرد
گالــو من اولاده الـعشــره ولد
باعته الدنيه على اولادها
ــــــــــــــــــــــــــــــــــــــ
ومطلع یعگــوبها اوعنــده خبر
عــدل يوسف ما عليه مر الخطر
وعشـــره عنده وما الواحد بالعشر
لو غــــده عنها يخـــل بعدادها
ــــــــــــــــــــــــــــــــــــــ
اشجاب یعگــوب النحيبه والونين
ما يجــادي سگم زیـن العــابــدين
يوم واحـــد اخــذمن خيمته البين
سلف والخيمه هــوت لعمادها
ــــــــــــــــــــــــــــــــــــــ
سبعطعش شاب من اخوته والعمام
بين شمس و چـوچــب وچـالبــدر تام
هــوت لاچــن عالسيوف وعالسهام
والتراب امسه يويلي وسادها
ــــــــــــــــــــــــــــــــــــــ
یشــوف شبان اهل بيته والشبول
چالضحايه امطرحه فـوگ الرمول
آه يا ويلي وعلـي اجثثها الخيــول
تلكد وامسـه عليها اطــرادها
ــــــــــــــــــــــــــــــــــــــ
يشوف ابوه احسين من عنده الجسم
بالمــواضي الگـــوم داعيته خذم
ما عليه كفارها خـلـت هدم
آه من شر العــده اوفسادها
ــــــــــــــــــــــــــــــــــــــ
ايشوف روس اهله على روس السمر
حاملتها اعــلــوج سفیان الكفر
ابراس ابو أمسه خــولــه يفتخر
عـد يزيد الرجـس وبن ازیادها
ــــــــــــــــــــــــــــــــــــــ
ایشوف عماته اوخواته امسلبه
وهنــد وسميّه ابملكها امحجبه
وجسم ابوه الخــامس من اهل العبه
اعله الثره اوراسه على ميادها
ــــــــــــــــــــــــــــــــــــــ
وچـم رضیع ایشوف يلعو اویضطرب
والعطش بحشــاه نيرانه تشب
جف حليب امه اوغده ابچيده ايحلب
سهم نمرود اوثمود اوعادها
ــــــــــــــــــــــــــــــــــــــ
وچم رضيعـه ما يفارجها السدر
وهيه متفــارج ثدايه امها التدر
لاچن امها ابكــتر والبت ابكتر
والثنين الخوف ذاب اچبادها
ــــــــــــــــــــــــــــــــــــــ
يبن من ابسيف ابـــوه الله نعبد
ونشكــــر ما زال سعيه ونحمد
جـــاوزت ياسيـدي ابحـزنك الحد حيث
حــــزنك للانــــذال اعيادها
ــــــــــــــــــــــــــــــــــــــ
مايبو محمد وياشبــل الحسين
نفســك تسكّن بچاها والونين
منهو منكم سطه اعلـه افراشه البين
سره السيف اشخاصكـم من عادها
ــــــــــــــــــــــــــــــــــــــ
ماسمعنه الكـم مشيب ولا كهل
عالوسايد مـات بمــراض العلل
انفوسكــم طيبه و عادتها الچتل
حيث لن نلتوا الشهاده امرادها
ــــــــــــــــــــــــــــــــــــــ
سيدي ما دونك الســـان الحزن
صــاح واخرس وگطع لوم اللسن
الجتــل میراث من والد لابن
استارثنه ارواح من اجـدادها
ــــــــــــــــــــــــــــــــــــــ
والچتـل للزلم بحــدود السيوف
فخر عز وشــرف بي ذل ماتشوف
لاچن احچيلي گبـل يوم الطفوف
بالحـــروب الماضيه وطــرادها

الشاعر المرحوم عبود غفلة

#اللهم_عجل_لوليك_الفرج

(112)

#تراث

زينب صارت بيا حال من خان الدهر بيها
تمسي وتصبح على النوح سهم البين ماذيها
ــــــــــــــــــــــــــــــــــــــ
زينب يا دهر شتريد بعد منها اشبعد عدها
ايام وليالي تنوح ظلت لبن والدها
تجيد حسين منها وراح وفراگه الذي ضهدها
تگضي الليل بالحسرات والعبرات تجهدها
يا ليل المصايب طول وعلى النوح ساعدها

والمجروح خله ينوح بايامه ولياليها
ــــــــــــــــــــــــــــــــــــــ
ياليل التمر عالناس بيك الناس يتهنون
بعض ابعض تتسامر احباب وبيك يتجمعون
بعد ما ينگضي منك ويطر للنوم يتجهون
والـفاجد شلون ينام وشلون تغمض له عيون
يظل سهران طول الليل والمافاجده ينامون

والمجروح خله ينوح بايامه ولياليها
ــــــــــــــــــــــــــــــــــــــ
ياليل التمر كل بيت بيك إنجمعت عياله
وكل أم وأبو ياليل البيك يونس أطفاله
لا چن الذي مفجوع لا أم لا أبو شحاله
ويتذكر زمان المر عليه والحزن يبراله
هـذي حالة الأيتام تظل بدموع هماله

والمجروح خله ينوح بايامه ولياليها
ــــــــــــــــــــــــــــــــــــــ
يا ليل الذي مريت إنت بنفسك علينه
شـفت ذاك الخدر والعز شفت ببيوت أهالينه
مزهره وتزهر على الناس وتمثل معالينه
وكل الناس تخدمنه وكلها تريد طارينه
يا وسفه ويا الف يا حيف هذا يصير تالينه

والمجروح خله ينوح بايامه ولياليها
ــــــــــــــــــــــــــــــــــــــ
يـا لـيل الصبر يا ريت لا بين علينه وطر
شگل للناس لو تنشد جواب شلون شتعذر
عن حسين... عن عباس عن جسام.. والأكبر
يـصير مصاب فوگ مصاب علينه عظام بعد واكثر
إذا شمات وينشدون چبدي بهاي يتأثر

والـمـجـروح خـلـه يـنـوح.. بـيـامه ولياليها
ــــــــــــــــــــــــــــــــــــــ
شگول وشـعـتذر مني لو غياب ويعودون
منهم شالته ومنهم حزين وهاللذي ينشدون
وانا انظر ودير العين أخاف من اللي يشمتون
وبيه فرحت الشمات مو منها الگلب مامون
بهاي تحيرت وانتم ياخوتي بحالتي تدرون
ــــــــــــــــــــــــــــــــــــــ
ياريت العمر لاطال ولاشوفنكم بعيني
جـثث فوگ الثرى تظلون وانه الدهر سابيني
تحملت الهضم والظيم ولا واحد يسليني
ماريد الحياة الموت اريده بسهم يرميني
عگب ذاك الـخدر والعز بعد دهري شيراويني

الشاعر المرحوم السيد عباس
السيد كامل الموسوي

#اللهم_عجل_لوليك_الفرج

(113)

#تراث

طفله من يتامه الغاضريه
بالشامات وافتها المنيه
شبت راس الحسين .. والزينب سبتها
ــــــــــــــــــــــــــــــــــــــ
طالعت تاريخ عملة كربلا واندهش نوعي
وسهم من گوس الـمصايب صابني وخيط ضلوعي
ومن دما نحور الضحايه غدت تتواگد دموعي

وشفت الضحايه موزعه
والروس منها مگطعه
وشفت الـحسين ومصرعه
إندهش وضعي وزاد روعي

وگلبي ظل يحوم على الأرامل
ونار الخيم تتواگد مشاعل
واحترگت صواوين .. والزينب سبتها
ــــــــــــــــــــــــــــــــــــــ
چني ويا الضعن ساري من تصدى السبي الكوفه
مررونه على المعاره وشفت بيها شلون شوفه
هذا مسحول المفاصل وذاك المگطعه چفوفه

والـجثث عريه مخدره
وحالة ودايع فاطمه
نشفت من جسمي الدمه
وگلبي عالسجاد خوفه

مكسور الگلب والجسم ناحل
من الجامعه وثگل السلاسل
ومگيد المتنين .. والزينب سبتها
ــــــــــــــــــــــــــــــــــــــ
سايرت سبي الحريم وروحي مسبيه لسبيها
حرم مسبيه وغريبه وبالسياط ملوعيها
شدة الكوفه نستها الشام من بين عليها

چاوين سبع الگنطره
ويشوف بالشام إشجره
وعيال عنده ميسره
وبالخرابه منزليها

ومن ضرب العصي صارت علامه
بمتون الأرامل واليتامى
وتشاجف بالإيدين .. والزينب سبتها
ــــــــــــــــــــــــــــــــــــــ
فزت من النوم طفله والگلب مجمور يلهب
تشوط نوبه على اليتامه ونوبه تتعلگ بزينب
تصيح ابويه حسين وينه گلبي لفراگه تعطب

يا عمه شفته بنومتي
وانمرد چبده الحالتي
وانكسر گلبه الغربتي
وبمصيبتنه تصوّب

عمه وصدر ابويه مكسرينه
وليش بدم وريده مغسلينه
والتربان تچفين .. والزينب سبتها
ــــــــــــــــــــــــــــــــــــــ
هيجت نار الگلوب الچامنه بيها عللها
وخلت عيون الفواطم دمعة الغربه تهلها
ورجنت الشام اليساره وبالنحب لمصاب اهلها

صاح ابن هند على الخدم
شمروع گلوب الحرم
صيوان عزتها إنهدم
خل تنوح الدهر خلها

نادوه اليتيمه تريد أبوها
وبالنوج اليساره يساعدوها
وفاضت دمعة العين .. والزينب سبتها
ــــــــــــــــــــــــــــــــــــــ
صاح يا غلمان هذا الراس ودوه للتريده
وخل تجر لمصابه ونه وتنحب الحزة وريده
وخل تشوف الخيزرانه اشسوت بثغره وتچيده

الله الله اشعمل
والراس لعياله انحمل
وخيم على الطفله الأجل
وراحت الطفله شهيده

وغمضت عالطشت عين اليتيمه
وصاحت يالعلي والله شمصيبه
وارتجت الكونين .. والزينب سبتها
ــــــــــــــــــــــــــــــــــــــ
إنحنت مفجوعه زينب على الطفله وگلبتها
مالگت روح بجسمها وعلى القبله مددتها
والمصيبه على المغسل صاحت اللي غسلتها

مسمومه طفلـتكم گضت
نادوها من تيسرت
بالخيزران تلوعت
والسياط الـوسمتها

ومصرع هاليتيمه على اليتامه
مثل مصرع حسين وعمامه
وأثر عالخواتين .. والزينب سبتها

الشاعر المرحوم
كاظم منظور الكربلائي

#اللهم_عجل_لوليك_الفرج

(114)

#تراث

رحنه ابضعينه هاليوم اجينه
من كربله رحنه ايتام
للكوفه والكتر الشام
ومن يدري بينه هاليوم إجينه
ــــــــــــــــــــــــــــــــــــــ
هاي الضعينه الچانت ابين أطياب
وابهيبة الوليان چانت تنهاب
لن الدهر خلاها ما بين أجناب
ايباريها چتال الأخو والسلاب

وأفتر دهرنه هالشكل صرنه
راحت وجوه الوليان
ورحنه بشماتت عدوان
وجارت علينه هاليوم إجينه
ــــــــــــــــــــــــــــــــــــــ
هاي اختك اتناديك واسمع يحسين
خدها عله اتراب الكبرتجري العين
تدري تگلك چنت يبن أمي وين
هاليوم إجيت الگبرك وجيتي امنين

امن الشام إجيتك ابگبرك لگيتك
عگبك يخويه ابيا حال
يا الكلفتني بأطفال
واميسرينه هاليوم إجينه
ــــــــــــــــــــــــــــــــــــــ
حدك اوياي من اوگعت من مهرك
حدك اوياي السيف من گص نحرك
حدك اوياي الخيل داست صدرك
ومن بعد هذا الناس خلها اتخبرك

حرگوا اخيامك داسوا أيتامك
ما بين نار ودخان
نتراكض ابها الوديان
وامسلبينه هاليوم إجينه
ــــــــــــــــــــــــــــــــــــــ
يا حسين لو مو شايفه ابعيني اشصار
ما چنت أصدگ باليسولف أخبار
چن احنه مو عايلة بيت الكرار
سلبوا نهبوا بالخيم وجوا نار

آخر فعلهم جابوا هزلهم
وباليسر حاديهم صاح
عفناكم ابغير أرواح
عنكم مشينه هاليوم إجينه
ــــــــــــــــــــــــــــــــــــــ
جرحتنه الكوفه أشد من الشام
الشام الها ثارات ابعهود الأصنام
الكوفه شجاها وسببت هالآلآم
عاشت اسنين ابيت أبونه وأيام

اتناست ربانه اشعملت اويانه
جابتنه يم ابن ازياد
والحبل من السجاد
واصل ليدينه هاليوم إجينه
ــــــــــــــــــــــــــــــــــــــ
امن ابدال ما يستنكرون الحاله
وگفوا يقصفون الروايه اقباله
اذبحنه لحسين ابكربله وارجاله
احرگنه الخيم جبنه سبايه اعياله

واحنه ابيسرنه محد نصرنه
كلها ابيسرنه شمات
ولا فضل أثر بالذات
انسمعك حجينه هاليوم إجينه
ــــــــــــــــــــــــــــــــــــــ
إلهم حرم ويانه جو أخذوها
متحجبه وبخيال ما شافوها
وهالعايله همَ الذي ايعرفوها
متحجبه وبخيال ما شافوها

اشبيدي اعله لخوه تسمع النخوه
خليتكم عالتربان
موته كهول وشبان
ورحنه ابسبينه هاليوم إجينه
ــــــــــــــــــــــــــــــــــــــ
رحنه اليزيد الجمع اعلينه الناس
ناس الذي ما عدها ذرة إحساس
كل ساع لن بيده يراوينه راس
راس لحسين وراس أخونه العباس

ابديوانه صرنه وبيده أمرنه
لا والي عندنه ايحاچيه
وشما حچه ايرد اعليه
وليه انولينه هاليوم إجينه


الشاعر المرحوم
عبدالحسين ابو شبع

#اللهم_عجل_لوليك_الفرج

رابط القصيدة
👇
https://youtu.be/pwVCao6RaPs

(115)

#تراث

أمـسه .. راس الـحـسـين ويا الجسم أمسه
والـراس يـشـكي لحاله .. للسحگته الخياله
أمـسه راس الـحـسـين ويا الجسم أمسه
ــــــــــــــــــــــــــــــــــــــ
عـن لـسـان الحال أبين خبر عن راس الحسين
مـن تـلاگه ويـا الجسم بالگبر يوم الأربعين
حـين شاف الجسم راسه انعطف وابداله الحنين

واظهـر الـصوت مـن الـنـحـر
يــاراس بـن ســيـد الــبـشـر
عگبــك عــلــي تـدري شـصـدر
لـعـبـت الخيل على صدري وبالحوافر رضته

دمـي .. غـسـلـني وادي كربلا بدمي
مـتـوسـد عـلى رماله.... للسحگته الخياله
امـسـه راس الـحـسـين ويا الجسم أمسه
ــــــــــــــــــــــــــــــــــــــ
وبـالـشمر تخبر بيوم اللي على صدري إعتله
وافـرزك عـنـي بـراس حسين بن عقد الوله
وارفـعـك عـالرمح وآنه بگيت مرمي بالفله

دمــي مــن جــروحــي يـكـت
ومــن دم وريــدي تــغــسـلـت
بــذاري الــوطــيــه تچفــنـت
الـراس ناده النوب أخبرك حالي واجرت دمعته

راسـك... يـا جـسم تدري بالگطع راسك
عـالـرمـح لـمن شاله..... للسحگته الخياله
أمـسـه راس الـحـسـين ويا الجسم أمسه
ـــــــــــــــــــــــــــــــــــــ
هـنا ياجسمي انچان ذاري الريح سوالك چفن
راسـك بـديـرة الـكوفه ابطن تنور إنسجن
تـشـهـد بهاي الحواري النولت ويا أم الحسن

بــهــودج الــنـور مـن الـسـمـه
يــاجــســم وأمــي فــاطـمـه
مــنــهــا الــمـدامـع سـاجـمـه
ومـاتـم بـدار الـخـوله على مصابي نصبته

مـصـابـي.... وأمي الزهره تحن على مصابي
وعـيـونـهـا هـمـاله.... للسحگته الخياله
أمـسـه راس الـحـسـين ويا الجسم أمسه
ــــــــــــــــــــــــــــــــــــــ
الجسم ناده هنا ياراسي من الضمه چبدي إنفطر
وسـهـم المثلث بگلبي مضى ومطلاعه الظهر
ومـابگى مفصل صحيح وعظم سالم ما انكسر

وتــعـلـم الـجـمـّـال اشـصـنـع
بــالــخــاتــم إغــتـر وطـمـع
وبــخــنــجــره الچفـّـي گطـع
حـتـى نـور الـلـي عـليّه آل أميه سلبته

ظـامـي.... يـاراس مـنـهو المنچتل ظامي
ومـثـلـي إنـفـطر دلاله والسحگته الخياله
أمـسـه راس الـحـسـين ويا الجسم أمسه
ــــــــــــــــــــــــــــــــــــــ
إمـّوذر بـحـد الـمواضي مهشم بحافر الخيل
ومـن بنى سد لعد دفني اگصدت وتعين العليل
بـيـن إديـهـا تـشيل مني كتر والثاني يميل

ومــن بــنــى ســد شــاهـدت
حــالــي عـلـى مـصـابـي جـرت
ومــن عـلـي الـسـجـاد إنـشـدت
هـالـشـهـيد إشچان ذنبه وطاحنيها الجثته

دمـه... مـالـه عـشـيـره الـتطلب بدمه
وتـنـشـد عـلى چتاله... للسحگته الخياله
أمـسـه راس الـحـسـين ويا الجسم أمسه
ــــــــــــــــــــــــــــــــــــــ
الـراس ناده هنا ياجسمي يهون البحالك سدر
لاچن الـلـي جرى بحالي يفسر الصم الصخر
آنـه بـاريـت الـعـيال الدرب كله بهالسفر

وآنــه الــمـشـيـت ويـالـضـعـن
وجــرعــت چاســات الــمــحـن
وانــظــر خــواتــي تــلـوعـن
بـالـعصي وشفت العليل الطوگ جرح رگبته

عـيـالـه ..... شـحال اليشوف بعينه عياله
تـحـمـل عصى الجماله..... للسحگته الخياله
أمـسـه راس الـحـسـيـن ويالجسم أمسه
ــــــــــــــــــــــــــــــــــــــ
يـاجـسم واللي هظمني وخله دمعي يكت حمر
مـن شـفت متن إختي من السوط صاير بيه أثر
وكل عصي اللوعت زينب لچمت صواب الحجر

وعــيـنـي عـلـى اطـفـالـي تـرب
ودمــعــي عــلـيـهـا مـنـسچب
آنــه انــضــرب مـن تـنـضـرب
والـطـفـل مـن يـضـربونه يستجير بعمته

راسـك.... يـاجسم من فوگ الرمح راسك
يـجـري الـدمع لطفاله.... للسحگته الخياله
أمـسـه راس الـحـسـيـن ويالجسم أمسه
ــــــــــــــــــــــــــــــــــــــ
وشـفت بالكوفه مصايب لاچن الأعظم الشام
مـدري الـفرجة الوادم اصد لو ارعى الأيتام
شـفـت بـالـمجلس حريمي واجفه بين اللئام

وزيـنـب الـحـره مـچـتــتــفـه
مــهــبــطــه الــراس واجـفـه
حــارت بــنــات الـمـصـطـفـى
وگام إبـن هـنـد يتخطى يعرف زينب رادته

زيـنـب.... ياجسم ما تدري شجرى بزينب
مـن الـهـر واهـواله ..... للسحگته الخياله
أمـسـه راس الـحـسـيـن ويالجسم أمسه
ــــــــــــــــــــــــــــــــــــــ
الـجـسـم نـاده بهالمصيبه كل مصيبه هونت
لاچن اخـبـرنـي عيالك كلها وياك ارجعت؟
وبـعـد مـنـها يابو السجاد بالشام اعگبت

نــاداه يــتــيــمــه تــعگبـت
مــوعــدلــه لاچنــهــا گضـت
مــاتــت غـصـب مـن شـاهـدت
شـبـيـدي... ياجسم حگك لاچن شبيدي

عـلـيّـه دنـت آجاله.... للسحگته الخياله
أمـسـه راس الـحـسـيـن ويالجسم امسه

الشاعر المرحوم
كاظم المنظور الكربلائي

#اللهم_عجل_لوليك_الفرج

رابط القصيدة

https://youtu.be/waxvm-fQYHk


(116)