آه اعليك يالمرتضى

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

يا قـــدره الباري الرفــع چفك علم لــلإســـلام
وابسيفك الدين انحكم ساسه وثبت ياضرغام
هالچيف ابن ملجم جسر طر منك ابسيفه هام

گلب اليودك سيدي وجت بيه نار الغضه

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

نيص الحرايب بالحرب وامجفل اسباع الكون
أبذات العلم منهو النزل غيرك يراعي الميمـون
تنصاب يامير النحل تنصرع مصيـوب اشلـون

ابطيحتك ضاگت ياعلي عالإسلام وسع الفضه

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

العمــرو بن ود منهو البرز غيــرك يسيف المله
وانته استرت للمصطفى ابكل الأحروب الخله
شائت الحكمه تنچتــل والـــدين ينكـــف ظله

ادموع التودك أصبحت مثل أدماك متفايضه

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

من چتل مرحب من فتح خيبر او چاد لأوثان
غيرك او منهو ابصارمه حطم ارگاب الشجعان
بدماك شيبك ينخضب هالچيف ياعالي الشان

دمك ابمحرابك سفح للعدوان طاب الغضه

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

نامت اعيون المسهره چانت عگب حامي الجار
والدين اسهــر ناظــره وابظـــامـــره أتشب النار
بين الثــــريا والثــــره صــــوت اميـــن الجبـــار

الله واكبر والشرك بالإيمان سيفه مضه

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

عـــروة الوثقى اتفصمت وانهـــدم ركــن الإيمان
اعلوم التقى اليوم اطمست منفجد معنى القرآن
او خيمة الإسلام انطــوت وانهدم منها الصيوان

او عـزّة المله الشامخه أضحت آه متخافضه

ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ

أبچتل الصميده لا تظن يا دهر نلت المگصود
راح الأسد خلف شبل حي أبو محمد موجـود
يستارث اعلـــوم النبي أينفذ احكــام المعبود

من يرگه منبر والده يهدي الضـال بالموعظه

المرحوم
كاظم منظور الكربلائي

(4)

.

سهم  لو  بسمار صاب إبن الطهر
ضـلع  كسروا بالحوافر لو صدر
ــــــــــــــــــــــــــــــــــــــ
جـاوبوني  الأصل بسمار وضلع
مـن  هجوم الدار شجع هالجمع
والـسهم والصدر صار إلهن فرع

على  حسين التنجمع شرك وكفر
ــــــــــــــــــــــــــــــــــــــ
هـاي  بـاب بنار تسعر لو خيم
هـذا  طفل حسين مذبوح بسهم
حـمل هذا السگط لو طفل إنفطم

لـو محسن سگط من كثر العصر
ــــــــــــــــــــــــــــــــــــــ
جـاوبوني ودم حمر تسچب العين
ذبح طفل حسين من سگط الجنين
فـرع هذا الأصل من ظلم الثنين

والـحـسين إنغدر من ذاك الغدر
ــــــــــــــــــــــــــــــــــــــ
هـاي زينب طالعه وتنخه الحسين
هـذا  گنفذ  لو زجر بيده اليمين
لـو  الـزهره الطالعه بيوم الثنين

الـسـوط  ولزينب تولاها بزجر
ـــــــــــــــــــــــــــــــــــــ
هـذا الـمچتف علي زين العباد
جـاوبوني  هالفرع  عالأصل زاد
لـو  علي  حامي الحمه لمن إنگاد

مـصـايب  الجرعت حتى الصبر
ــــــــــــــــــــــــــــــــــــــ
هاي زينب شابچه العشره وتصيح
لو  الزهره  تصيح من قلب جريح
عـلى  التل وگفت تندب ياذبيح

خـلـو  بن عمي بمدامعها الحمر
ــــــــــــــــــــــــــــــــــــــ
وگف بـالـمـيدان ياخذ راحته
مـسح  دمه وسهم صابه بچبدته
لـن  إجـاه  الحجر صكه بجبهته

والـجسم مشحون طعنات وطبر
ــــــــــــــــــــــــــــــــــــــ
رجـع  لـلـتوديع سابح بالدمه
صـاح  يـازينب  يابضعة فاطمه
وگف مـتـحـير ابـّاب مخيمه

لـيـه طلعت والگلب يسعر جمر
ــــــــــــــــــــــــــــــــــــــ
صـاح  يـازينب  اجمعيلي لعيال
لـيـه  طلعن نادبات بأشد حال
ارد اودعـهـم وودع هالأطفال

حـيث لن صابه الكسر ماينجبر


المرحوم عبود غفله

#اللهم_عجل_لوليك_الفرج

(9)

يا حيدر ما تدري اشصار بالغاضرية
يا بوية ما تدري اشصار بالغاضرية
لا صيواني و لا ولياني         
يا بوية ما تدري اشصار بالغاضرية


ناديتك بصوت او صحت يا حيدر          
كِلتك يبوية ابشدة صرنه احضر
راحت زلمنه او دوده اعلينا العسكر          
و احنا الودايع يا بوية احسين او خدر

ما بقت عدنه وليان طاحت كهول او شبان

فوك الوطيه

ما ظل عدنا          اليحمي حدنه

يا بوية ما تدري اشصار بالغاضرية

*

أول جرح يا بوية من أول شاب
رد لينه من المعركة جمر امصاب
الأكبر شبيه المصطفى بدره غاب
منه او غدت تستمر يا داحي الباب

كل جسم شفناه اجروح كل نحر شفناه مذبوح

(جسمه رمية )

جمرة بجمرة          حسرة بحسرة

يا بوية ما تدري اشصار بالغاضرية



اولادك من ام البنين الطيبين
أربعة اللي جانوا يحاذون احسين
تدري يحماي الحمه صاروا وين 
العباس فوق النهر مطفيه العين

قطعوا اجفوفه و الراس     او غايب قمرنه عباس

خّمدوا ضيه

الأخوه مثله          ضحوا قبله

يا بوية ما تدري اشصار بالغاضرية

***

حوفة العريس الذي نصبوها
يا بوية من دم النحر صبغوها
او شمعة الصارت للعرس طفوها
او حوفة زفافه اوي الخيم حرقوها

من بعد شمعة هالشاب          صارة الحوفة بمصاب

نار السرية

صارت دمعة          عقب الشمعة

يا بوية ما تدري اشصار بالغاضرية

*

قوم انظر المعركة او شوف اشبيها
تلقى جثث يا حيدر امخذميها
تلقى يا حيدر روسها امقطعيها
جثة احسين او ريت تنظر ليها

امهشّمة اضلوعه صوبين    ريحانة الهادي احسين

روح الزجيّة

گطعوا نحره          هشموا صدره

يا بوية ما تدري اشصار بالغاضرية

*

ولياني ما ظل واحد اليحمينه
اسأل يبوية عد من امخلينه
و الخيل من هجمت يبوية اعلينه 
و الله يا حيدر اشسوت بينه

قاموا يدوسون أيتام         ما دعوا يا بوية اخيام

عل الفاطمية

اخيام التهبت          عيله انسلبت

يا بوية ما تدري اشصار بالغاضرية

*

جان المخيم بالأبطال الأحرار 
اولادك التحمي الخدر يا كرار
جان المخيم يحرسونه الأنصار
او لا واحد اليوم الذي يطفي النار

او لا من الأنصار اتقوم       او لا من الأخوه هاليوم

راحوا مني          غابوا عني

يا بوية ما تدري اشصار بالغاضرية

*

يا بوية هم شايف رضيع ايقتلوه
يردوا له ماي ابرمي النبلة ايفطموه
بيد الحسين او يجتلوه ايطلعوه
جسروا اعلى نحره يا بوية او قطعوه

الله و اكبر و اشلون          راس الرضيع ايقطعون

أشرار اميه

لا ما صارت          هاي و دارت

يا بوية ما تدري اشصار بالغاضرية


الشاعر المرحوم
الشيخ عبد الحسين ابو شبع



#اللهم_عجل_لوليك_الفرج

(10)

«شيعتي»


يا النايم اعله العلگمي من نومتك گوم
يهنالك النوم
ما تگعد اتسوي العليلك والحرم چاره
* * *
هالله هالله اشلون وگفه اوگفت مفجوعه العقيله
گابلت شاطي الفرات وصاحت ابونّه ثجيله
يعباس الضعن هذا رَد يودعك ياچفيله

ويخبرك الصار وسدر
من طحت مرمي على النـهر
وانصاب الحسين ابحجر
والسهم مرد دليله

فرهود صاحت بالخيم من عگبك الگوم
يهنالك النوم
وظليت أنه ابهاي الحرم حايره ومحتاره
* * *
ريت سيف الگص يمينك گص يبو فاضل يميني
والعمود الفضخ راسك حال ماب ينك وبيني
ونشف من الدمع جفني من سنا جمرة حنيني

اي وحـگ چفك والعلم
عگبك علي بيتي اتهدم
الله من ذاك السهم
مثل عينك فگص عيني

يالصوبوا عينك سهم والسهم مسموم
يهنالك النوم
من عينك ايفور الدمه اومن عيني يتجاره
* * *

يعباس اشلون وليه ابولية اعداك انولينه
حرم والخيل ادهشتنه وحرگوا اخيمنه علينه
نارفوگ النار شبت بالضماير وانسبينه

نار المخيم والظمه
وصاحت ودايع فاطمه
لا ظل خدر لا ظل حمه
گوم يا حامي الضعينه

نارين صـارت بالگلب تتواگد اليوم
يهنالك النوم
جمر الظمه وحرگ المخيم چملت ناره
* * *


يالعليك الخوه فرضت تسبح ابدم الحميه
فرضت اعليه الكفاله ومضت بيها الغاضريه
واگفلت عگبك خواتك واشگفت عنهن بديه

لاچن الحاله اتغيرت
وابيوت اهلنه اتهدمت
عگبك والعيـال انسبت
وآنه أديت العليه

بين الأخـو و بين الأخت لازم وملزوم
يهنالك النوم
وهرش الگلب من ينمرد تتغير اثماره
* * *


يعباس اشلون حيره اتحيرت وانگطع گلبي
وظل يحوم اعله الشريعه وعيني اعلى الخيم تربي
طحت يصبي البصيره وبيش اوچد بعد دربي

نصين دلالي انجسم
ما بينك وبين الخيم
ياخذلك اخبار الحرم
يالطحت بسهام عتبي

عباس ظل ابمصرعك گلبي اختك ايحوم
يهنالك النوم
ويسدر الخدر الحرم ياخذلك أخباره
* * *


چني بمخدرة هاشم ودعت گبر الكفلها
أتلوج من سهم المصيبه اتلوج بين اگبور أهلها
ومن جرح سهم الشماته دمعة العين اتهملها

وصاحت يمحزوز النحر
سهم المثلث من فطر
گلبك ومطلاعه الظهر
چبدتي ابناره شعلها

سهم المثلث من فطر گلبك يمظلوم
يهنالك النوم
هاك اخذ گلب اختك وشوف السهم وآثاره
* * *


يا حسين انذهل عگلي من شفت جسمك رميه
ولاعظم ظل بيه سالم من حوافر خيل أميه
اشلون جسم اللي يلم اجروح ألف وتسع ميه

وكل المواضي الصابتك
مرتعها صار ابمهجتك
والورد من دم رگبتك
يا شهيد الغاضريه

يحسين جسمك بالضيافه ماخـذ اعلوم
يهنالك النوم
لرماح وسهام ونبل وسيوف خطاره
* * *
يا هلي زينب تراني ودمكم اعيوني تهله
وعزكم الماضي چساني وما ترديت ابمذله
وما يمل الصبر گلبي ولعد گلبي الصبر مله

من فارگتكم يخوتي
وابـذلت بالطف همتي
حاربت دهري ابمهجتي
وعلي ما بانت الخله

زينب ترانـي وماعلي من اخوتي لوم
يهنالك النوم
وانهدم بيتي ابكربلا وراحت العماره

للشاعر المرحوم
كاظم منظور الكربلائي

#اللهم_عجل_لوليك_الفرج

(11)

من ركب ميمونه والغضب بعيونه

ركـّز الرايـه إعله المسنايه

وإنحدر طاعونه والغضب بعيونه

ــــــــــــــــــــــــــــــــــــــ

طلعت عقيلة حيدر إمن الصيوان
تمشي إبجلاله

شافت گمر هاشم يشع بإلإيمـــان
مطلع جمــاله

والعلم متمركز إبچف الوجـــدان
بإسم الكفــاله


هـاك إخذ عنوانه ضامر إو وجدانه

يالتكفلها حارس إبظلها

ويتغطرس دونه والغضب بعيونه

ــــــــــــــــــــــــــــــــــــــ

دسمع يمن بيك إغرست روح الزود
همه إو شجــاعه

يالناشر إبيمناك مرصد مشـــــــهود
عصمه إو مناعه

هالعلم من دعوة محمد مـــــــوجود
زم إرتفاعــــــه


والدك وإعلومه والذخرلك يومه

صاح أدريبه هالعلم هيبه

خدرچ إيشيدونه والغضب بعيونه

ــــــــــــــــــــــــــــــــــــــ

من سمع زينب طفح عزمه الطـــــفاح
دمدم إو ضهضب

يرتاح خل گلبچ يا زينــــــــــب يرتاح
وآنه المعــــــتب

وفصّم إعجود الرمح من هزه إو صاح
عــــونچ يا زينب


بالحـرب تدريني ما أصد عن ديني

هوّدي وهودي يختي بوجـودي

عزّتچ مضمونه والغضب بعيونه

ــــــــــــــــــــــــــــــــــــــ

وإتعلگت زينــــب ببن والــــدها
وصـاحت إبزودك

والغانمه إعيون إختك إتشاهــدها
ورح إبوجـــــودك

ما تنشد إختك طلعت إشمگصدها
مگصدها جـــودك


إعيالك المحجوبه بالعطش مصيوبـه

يالتشجعيني ماي من عيني

والحرم يردونه والغضب بعيونه

ــــــــــــــــــــــــــــــــــــــ

صد أو نده يا بت محمـــــــد شوفي
حگچ عليه

إصخيلچ إبروحي وأضحي إچفوفي
بالغاضريه

وإتشوف عينچ من يصكني إبشوفي
سهم المنيه


شـوفچ إتفگدينه دمعچ إتهلّينه

ونـه إبحگ حسين أنذبح للدين

(والعده إيسمعونه) والغضب بعيونه

ــــــــــــــــــــــــــــــــــــــ

عباس يتبختر وزينب ترعــــاه
تتمنه منـــــه

ومطلع گمر وجهه وتجلت معناه
خوه إو محنه

وگلبه إيتطاير فرح لمن تنـــخاه
وين إلمــچنّه


دسمع إشناداها وإغتنم مرضاها

يرتجز عونچ أنذبح دونچ

(كلهم إيشوفـونه) والغضب بعيونه

ــــــــــــــــــــــــــــــــــــــ


شوف الأخوّه الساميه وشوف الباس
وشوف الفراسه

شوف الحراسه النشرة إعله الحراس
خيمة حراســـه

من سمــــع زينب نادته يا عبــــاس
صاح إبحمــاسه


إبغايتي المعروفه وهمّتي الموصـوفه

يختي ليهمچ چافلچ يمچ

(إبهمته إيهـابونه) والغضب عبيونه

للشاعر المرحوم
كاظم منظور الكربلائي


#اللهم_عجل_لوليك_الفرج

(12)

لمن المستهل

ينقل ان السيد عبد الحسين الشرع رحمه الله
كان يكتب القصيدة على فطاريته فيوم من الايام كتب قصيدة واعطاها لاحد الرواديد فلما اطلع الرادود على القصيدة ردها بوجه السيد وقال له (هيه هاي هم حاسبهه قصيدة)فتألم السيد ذلك اليوم تألم شديد وعندما نام في عالم المنام رائ الزهراء ع وهيه تقول له لما انته متألم قال لها لماذا هكذا يردون بوجهي
فقالت له مولاتي قم قم (زينب لفت يم حسين لاچن گابعه بالهم)فنهض السيد من منامه واكمل القصيده لان المستهل من #الزهراء ع
فلهذا معروف عن السيد في اكثر قصائدة يكتب هذا الوزن من الشعر لان الزهراء ع اعطته له
.
.
.

زينب لفت يم حسين ... لأچــن گــابعه بالهم
تـگله يا ضـوه عيوني ... عليمن هالفزع ملتم
ــــــــــــــــــــــــــــــــــــــ
تعنت ليه للخيمــــــــه ... وتفسـر الصخر ونتهـا
طبت گعدت اگبالـــــه ... وعالـخـد تهل دمعتهـا
تگله اعليك ضلع امك ... المظلومه او مصيبتها

سولــف لي يماي العين
لا تخفي علي يحسيــن
عليمن هالفـزع صوبين

وأشوف ابكثر عج الخيل ... وادي كربلــــه غيم
ــــــــــــــــــــــــــــــــــــــ
أويلي من سمعها احسين ... سالت دمعة اعيونه
يگلها أخاف أسـولف لــچ ... او وجهچ ينخطف لونه
ابچتلى او چتل أهل بيتي ... يختي الگوم يردونه

ولا بـد مــا تشوفينــه
فوگ الثره امـگطعينه
يزينب لا تـنـــوحينــه

عينج عاليتامه النــــار... لو شبت بالمخيــم
ــــــــــــــــــــــــــــــــــــــ
تـگله الكاتبك يحسيــن ... من هالناس چـا وينه
يـگــل لها يماي العيـــن ... كلها انـگلـبــت اعلينه
تـگل له حمل اضعـونك ... او سدر للــوطن بينه

يـگـلهـا ما يخـلـــوني
أسـدر بعد بضـعــوني
نيتهم يـچتلونـــــــي

ولابد ما تشوفيني ... او شيبي يگطر امن الدم
ــــــــــــــــــــــــــــــــــــــ
والأكبر عالأرض مطروح ... يختي عيونج اتشوفه
او جاسم عالثرى مـرمي ... ابدال العرس والحوفه
وأخوچ اعلى النهر نايـم ... ويمه امگطعه اچفوفه

او يمه رايته او جـــوده
او عينه ابسهم ممـروده
بطل حيلي على ازنوده

لو شفتيهن ابكتره ... او جسمه اعلى الثره امخذم
ــــــــــــــــــــــــــــــــــــــ
يختي او سهم المثلـــث ... ابدلالــي تــشــوفينـه
او عبدالله الطفل يختي ... ابدم نحره امطوقينه
او لو شفتي الشمر يمـي ... ابعدي او لا تحاچينه

تراه هو يـگطع ابنحـري
او يتربع على صــــدري
يزينب عايني او صبري

لمن يحكم الباري ... او هوه ابحالنا أرحم

المرحوم السيد
عبد الحسين الشرع

#اللهم_عجل_لوليك_الفرج

(13)