تراث القصائد الحسينية

#تراث

علي عالي اعله كل عالي علي يالعالي امن الرب
علي مانصّبك منصوب لاچن بالنصّ امنصّب

علي ابساگ العرش نورك علي يالعلّمت جبريل
اسمك نزل بالتوراة وازبور و صحف وانجيل
يا آيه اعله كل آيه شبه شمس الضحه اعله الليل
يالمبدر تمام التم وبسابـع سـمه چـوچـب

يا چوچب خبر مسند اِلك تحت العرش مسند
لولاك انسـله الإسـلام لا عابـد ولا معـبد
لا سارت سفينة نوح لا سد السكندر سـد
وآدم من عصه وأبعد بسمك ياعلي اتگرّب

گرب بسم النبي الهادي او بسمك دهر يتوسّل
يسر السر عِذت موسي او ناصر كل نبي مرسل
عَـصاه انته الصرت ثعبان او كل ساحر سجد واختل
او صبّرته و عبّرته الفرعون اهلكت من طب

فرعون او خسف قارون ياشهب اعله جند ابليس
يا مهر النبي اسليمان يمحضّر عرش بلقيس
يالرافع لإبن مريم عيسي او گبل عيسي ادريس
برد و سلم لبـراهـيم نار البالسـمه تلهـب

برد و سلم ذيچ النار وانته النَصُر بالتابوت
بالجب من عِذت يوسف اوعِذت يونس ابّطن الحوت
انته الفَنه اعله أهل اللات ونته السخط وانته الموت
يمدمّر ثمود اوعاد يانقمه اوعـذاب الصـب

يصب ياصاجعة نمرود فلك اِو كل فلك دوّار
يدُر ياذهـب المـصفّه يـَمر يـمـدمّر الكفّار
حُكم الغيث حُكم الريح حُكم الخلد حُكـم النار
بإذن الله تحت يدّك والكون الّـذي اِمـركّب

كون الركّبه الباري تحت حكـمك يـحامـيها
يابـحر المحـيط و قاف ياراسـي رواسيها
يامِذهِل اويا مِهـول اويا داهـي دواهـيها
سيف الباري المنسل أسد ياسيف المجرّب

السانه و عينه و چفّـه والكل بيدك امسلمه
اذنه السامعه و بابه و آياته و سفط علمه
يعفو الله و كظم غيظه و جوده و رحمته و حلمه
غضب لليغضب اعليها و سيفك للعليها أغضب

غضب طحت اعله جنّ البير ذات العلم منّه الفات
عله افراش النبي منّ نام بالهجره و تولّه و بات
عله متن النبي تركّب بالكعبه و تچسر اللات
او من مثلك يچسر اللات و عله متن النبي يركب

عله متن النـبي تركـب يا مُظـهر عجايـبها
الك طوع الشمس ردّت يحيدر من مغاربها
الباب الحصن من هزّيت اهتزّت كل جوانبها
والسابع سمه اهتزّت السيفك من شطر مرحب

شطرته و لا تهاب الموت واتهزّك هزاهزها
ابن ود وابن معدي گرب وبطال المبارزها
حامي الدخل حامي الجار واتحلّ المعاجزها
سيفك شيّـد الإسـلام لأركان الكـفر خرّب

لأركان الكفر هـدّيـت ومـهـدّم مـساچـنها
الدرس يمدرّس الإسلام مدرستك غبت عنها
اشلون انته الإنس والجن طاحنها ابمواطنها
اشلون ابسيف ابن ملجم حيدر ياعلي امصوب

اشلون ابسيف ابن ملجم حيدر ياعلي اصوابك
كلّ الحزن كلّ النوح والمأتم عله امصابـك
تشوفه امدلّس ابسيفه عله چتلك ابمحرابك
يمنعك صبرك و حلمك و شيبك بالدمه اتخضّب

شيبك بالدمه اتخضّب يمهِدي الضال ياظلها
يـمـدلّل يـتامـاها اويـا مـربـاع أرامـلـها
الغُرب يمعذّي الغربه منته الغُرب عزّ الها
گوضوا العند أهاليكم عزكم يالغُرب غـرّب

المرحوم شيخ عبدألأمير الفتلاوي

#اللهم_عجل_لوليك_الفرج

(42)

❤13👍8

37K viewsedited 09:40