وَلَيَنْصُرَنَّ اللَّهُ مَنْ يَنْصُرُهُ إِنَّ اللَّهَ لَقَوِيٌّ عَزِيزٌ

في وقت زي ده لما بلاقي نفسي فاضي أو مضايق، بحب أقلّب في قناة الشعر بتاعتي، أو في القناة هنا ببعض الكلمات واللي يطلعلي، أو في أكونت تويتر، وبخلص وأنا مبسوط الحمد لله 😁

فيديو سعيد صالح وهو بيقول:
"أي نعم ليا تاريخ مزفت قبل كدا ومهبب بهباب، بس أنا واثق إنه هيغفرلي، لأنه قال إذا توبتم هغفر لكم.
المذيع: أيه الحاجة اللي أنت سعيد أنك توبت عنها؟
سعيد صالح: قلة الأدب والحاجات الوحشة اللي كانت في البني آدم دي، الحمد لله تخلصت منها تمامًا، كويس إن أنا تخلصت منها، كان ممكن أفضل طول عمري قليل الأدب وحاجات من دي"

فيديو مؤثر جدًا
وحتى لو الإنسان كان فاكر نفسه كويس وطول عمره ماشي صح وبيأدي الفرائض، هيتمنى في نهاية حياته قبل ما يموت إنه يعمل كدا
إنه يتوب
ويعلن توبته للناس، كما أظهر فُجره وفحشه ليهم
ويعترف إنه كان بيعمل حاجات حرام
وإنه يندم على اللي كان بيعمله
ويطمع في كرم الله ومغفرته

سبحان الله، توفيق عجيب من ربنا، مستحيل حد يضمن إنه يعمل كدا قبل وفاته
فالطبيعي إن أي حد دلوقتي بيبادر بالتوبة وإعلان توبته للناس من الحرام اللي كان بيعمله وسط الناس، ومسح آثار الحرام من حياة الناس من الميديا

سعيد صالح محضرش كمية الدروس والمواعظ الإيمانية الجبارة اللي إحنا سمعناها
ولا وقف يصلي قيام بالساعات
ولا سمع تفسير للقرآن من د أحمد عبد المنعم وخلافه
ولا كان موجود في بيئة إيمانية تساعده
ولا كان فيه حد بينصحه يعمل الحلال ويبعد عن الحرام
وبيعترف وطالع يقول للناس أيوة أنا كنت بعمل حاجات حرام وتوبت عنها

حالياً شخص يكون عمل كل الحاجات دي، وبيجادل بالحرام بحجة إن فيها خلاف، أو محدش بيشيل ذنب حد، كل واحد حُر

كل واحد تاب من حرام كان بيعمله وسط الناس، يقول للناس أنا كنت بعمل كذا وده حرام وأنا معدتش هعمله إن شاء الله

وكل حد بيعمل حرام في وسط الناس يكف أذاه عن إخواته المسلمين ويكتفي بالحرام لنفسه ولواحده

كفاية الفتن والشيطان والنفس والهوى، متبقاش أنت كمان شيطان بتحارب أخواتك، بسبب شهوة مش قادر تمسك نفسك عنها وطالع تعملها في الملأ!

لو جه خاطر في بالك إنك تعد فلوسك اللي تصدقت بيها، وتقول ياااه مبلغ كذا، لو كنت مطلعتش الفلوس دي كان زماني بقى معايا كذا وكذا
ابعد الأفكار دي عن دماغك، لأن في الغالب ممكن مكنش يجيلك رزق بعد كدا لو مكنتش طلعت الصدقات دي، ويمكن كنت تصرفها في حاجات تانية غير الصدقة ومتبقاش برده معاك فلوس

متحسسش نفسك أنك تصدقت بفلوس كتير، وأنك كدا عملت حاجات كويسة
متتعاملش بمبدأ المَنْ

لأن الله هو اللي أرشدك للصدقة
وهو اللي رزقك لكي تستطيع التصدق
وهو اللي رزقك بعد التصدق
قال الله تعالى: (يمنون عليك أن أسلموا، قل لا تمنوا علي إسلامكم، بل الله يمن عليكم أن هداكم للإيمان إن كنتم صادقين)

الله يفعل ما يشاء
وله العزة والكبرياء
لا يسأل عما يفعل وهم يسألون

بقى كل شلّة وكل مجتمع فيها ناس نسايب لناس من نفس المجموعة
فلما يجي فرح ونحضره، غالبًا البنات اللي موجودة في الفرح، هي من أهلنا أو أهل صاحبي، أو نسايبي، أو نسايب صاحبي، ناس عارفينها، مش ناس مجهولة

فبيبقى موقف بايخ جدًّا، وساعات بيوصل لقلة الأدب، لما تلاقي واحد يقولك:
أنا جاي أدور على عروسة!
روح أقف على باب البنات
اتفرج على البنات يمكن واحدة تعجبك
يجوز تتفرج بنية الجواز
ووو، وخلافه من الهزار المعفن اللي ملوش لازمة
واللي في الغالب لما بنتكلم في الكلام ده، دماغك غصب عنك تلقائي بتروح لأسماء وأشكال البنات اللي موجودة، لأن معظهم إحنا عارفينهم، مش ناس غريبة!

فطبيعي إن موقف زي دا يقلل من قيمتك، وأحيانًا يقلل من رجولتك، ويخليك شخص تافه وسط الناس

هيفضل أسوأ موقف ممكن يحصل في علاقة صحوبية/ارتباط إنهم يجتمعوا على الحرام؛ سواء مشاهدة أو فعل أو كلام

حتى لو كل واحد بيعمل نفس الحرام لواحده، لما يتقابلوا محدش يصرّح للتاني إنه بيعمل الحرام ده، يتكلّف ويتصنّع لأبعد حد
المهم يمتنعوا عن الاجتماع على الحرام

حتى لو زوجين، كل واحد يعمل الحرام والتاني مش شايفه، هيشتم، هيغتاب، هيسمع أغنية، هيشوف فيلم، هيدخل معاملة مالية مشبوهه، هيحط مبلغ له في البنك، هيعق والديه، أي فِعل مهما كان، يحاولوا قدر الإمكان إن كل واحد يعمله والتاني مش شايفه

عشان لما حد من الطرفين يشوف التاني واقع في حرام، يعرف ينصحه ويقوله ده حرام، من غير ما يتكسف
وعشان يبقى في الاجتماع بركة وطاعة لله
(ورجلان تحابا في الله اجتمعا عليه وتفرّقا عليه)

أفضل شيء عن تجربة عموماً وفي الأوضاع دي إن محدش يحسبلها، سيبها ماشية ببركة ربنا
البركة نماء خفي، يزيده التقوى والستر

سواء قدمت النصيحة لأصحابك وأهلك، أو مقدمتش النصيحة، في الحالتين هتموت وتنتهي حياتك
وهيتبقى عملك الصالح من النصيحة لهم وصدقك قدام نفسك معاهم
أو نفاقك وغشَّك ليهم، لزيادة التودد والحب بينكم!
و(قلب من ترضيه بسخط بربك؛ بيد ربك)

الصراحة إنها مش رفاهية
لا، ده حاجة أساسية لما تلاقي واحد بينزل حاجة حرام، أقل حاجة تلغي متابعته، ولو واحدة بتنزل صورها، أقل شيء تلغي متابعتها
ولو حد بيشتم أو كل كلامه غيبة وسب وتريقة في خلق الله، الغي متابعته

حرام عليك نفسك اللي قاعدة تشرب الحاجات دي على الفاضي بدون حتى ما يكون في الموضوع إشباع لشهوة
ده حرام مجاني بسبب الفراغ، والكسل في إنك تشيل الناس دي من عندك

وخطوة أفضل من الخطوة دي أنك تنصحه يبطّل يكتب أو ينزل الحاجة الحرام دي، ولو كررها ومش بيستجيب، الغي متابعته

كمان يومين كل واحد هيورينا صورة والدته على الميديا، حاول متكونش منهم
حتى لو شيخك ذات نفسه منزل صورته مع أمه، متنزلش صورتك والدتك، الله يحفظها ويبارك فيها، ممكن تفرحها بكلام وبدعاء من غير ما تنزل صورتها للفانز بتوعك

أي اتنين مخطوبين بالوضع التقليدي السائد، بيقعوا في حرام أظهار الزينة من البنت أمام خطيبها وتزينها
وحرام حفلة الخطوبة بالاختلاط والأغاني والرقص اللي فيها
وحرام نزول صورتهما على الميديا
فمهما كان الشخص اللي خطب ومهما كانت درجة إيمانه هتفضل الحاجات دي حرام حتى لو عمل حاجة واحدة منها، وافضل استنكر الأفعال دي واستحقرها مهما كانت جميلة، لأن ربنا حرَّمها
ومتباركش لحد واقع فيها إلا ومباركتك متبوعة بنصيحتك له

عزيزٌ أنتَ في قلبي
ولكن عزة الإسلام أكبـر

الحب في أحيان كتير بيطغى على القيم الدينية تدريجيًا عند الشخص، وبتبقى مصيبة سودا
لو العلاقة مكنش فيها تعاون على الخير والمعروف، لا بد هيبقى فيها تعاون على الإثم والحرام والعدوان على محارم الله بشكل جماعي
ولو العلاقة مفيهاش شغل للأوقات بالعبادات، هتبقى شغل للأوقات بالحرام والتسلية بغيبة الناس

ليه الناس بتتريق وتقول:
(يا رب مشاكل من دي)

هو الدعاء بقى بيُستخدم في التريقة؟
واسم الرب جل وعلا بيُستخدم في التريقة؟

وليه واحد يدعي على نفسه إن ربنا يبتليه بـ مشكلة!!
ممكن فعلًا تكون دي مشاكل بالنسبالهم ومأرقة عليهم حياتهم، ومش حاسيين براحة البال
وبيشتكوا، وده بالنسبة ليهم بلاء على قدر الاستطاعة اللي ربنا رزقهم إياها
أو أيًا كان
عُمري ما حبيت إن الدعاء يكون في مهب التريقة والكوميكس بالشكل ده!

يا رب إنك تعلم أن ما دعوناك به، وندعوك به، هو مبلغ عِلمنا الذي نرى فيه المصلحة لديننا وأنفسنا، وأنك أنت العليم الحكيم، فيارب اقدر لنا الخير لما فيه خير ديننا ودنيانا وارضنا به

الله أكبر
اللهم أهلّه علينا بالأمن والإيمان، والسلامة والإسلام، ربي وربك الله
هلال رشدٍ وخيرٍ

كل عام وأنتم بخير

أفضل شيء الراجل يستعد بيه لرمضان ويخرج بيه من رمضان: صلاته في المسجد
وأفضل شيء البنت تستعد بيه لرمضان وتخرجه بيه من رمضان: مسح صورها من ع الميديا، والحفاظ على الحجاب الشرعي
وتكف أذاها عن المسلمين، وتكف فتنتها للبنات في حجابهم
حرام واحد مُتسبب في فتنة البنات والشباب، وهو وضع الصور على الميديا، ونشر سنة سيئة بين الناس، ومخالفة واضحة لشُعبة من شُعب الإيمان: الحياء

لما يكون عندك الإيمان عالي، ادخل على صفحات وقنوات المشايخ اللي بتحبهم، واقرأ الكلام
تزوّد
واستجب
ونفذ الكلام اللي قدامك
ادخل على أي أكونت صاحبه بيكتب نصايح واقرأ الكلام

الكلام اللي ممكن في الأوقات العادية متقفش عنده كتير، ومتهتمش بيه، لما يكون إيمانك عالي، أو بعيد عن الحرام، هتلاقي تأثيره عليك مختلف، وهيفيدك في الأيام العادية

الزواج عبادة، وطريق عظيم من طرق الوصول للجنة
فبأي شكل يكون مبني التواصل بين الزوجين على حرام!
على الاشتراك في نفس الذوق الموسيقي، أو نوعية الأفلام!
أو التعاون على مشاهدة الأفلام والمسلسلات!

تحول الزواج من طريق للجنة، وعبادة من أعظم العبادات
لـ تعاون على الإثم والعداون بداية من التعاون على الفرح والأغاني والتزين أمام الناس وخلافه، وتفريغ للشهوة وبعض الاهتمام
فكرة مرعبة!

اللي تحاول تحافظ عليه في رمضان:
تقرأ قرآن كتير
تصلي التراويح
تحافظ على صلاة الجماعة
تتجنب المجاهرة بأي حرام
والدعاء يوميًا بالعتق من النار
وربنا يعينك على فِعل ده

اللهم اعتق رقابنا من النار