في المواد اللي أنا شيلتها في الست سنين إلا ترم دول، 3 مواد راسب نظري، و11 مادة بسبب أعمال السنة
أعمال السنة: غياب وكويز وميد ترم

أنا نسبة حضوري لأيام الغياب والكويزات، متوسطة زي متوسط الطلبة، مش منفَّض ولا حاجة، لكن اللي بيحصل إن الطلبة مش بتحضر، وبتخلي أصحابهم يحضَّروهم، فبيترتب عليه إن نسبة الحضور عالية
وفي الكويزات الناس بتغش من بعض تحت مرأى ومسمع من الدكتور والمعيد، وبالتالي نسبة الدرجات بتبقى عالية

فبيجي في الآخر المحصلة
إن كل شلّة صحاب خمسة ستة، بيسرقوا في الغياب وواحد يحضَّر الخمسة الباقيين، وبيغشوا في الامتحانات ويجيبوا درجات عالية
فبتطلع نتيجة أعمال السنة في الآخر في القيمة المتوسطة المعقولة، وبيندهس في وسطها فعلًا النسبة المتوسطة العادية بسبب السرقة والغش، ويتقال عليك من الطبقة الفاشلة اللي مش بتحضر ولا بتذاكر

فبالتبعية سرقتك وغشك دول، بيأثروا عليا بشكل مباشر، وهما السبب في إني أشيل كذا مادة كانت واقفة على درجة و3 درجات
وبالتبعية أنا كشخصي إسلام، مش مسامح أي حد بيغش والغش بتاعه بيأثر عليا

كان السنة اللي فاتت كنت شايل مادة، والنسبة كانت قليلة، فرفعوا الدفعة كلها خمس درجات، فلما رفعوا الدفعة، أنا نجحت الحمد لله في المادة دي

فالغش والسرقة بيقضوا على مستوى تقييم صعوبة الإمتحان، وظروف الطلبة، عشان النتيجة النهائية بتطلع النسبة كويسة، فبالتالي يبقى الحضور كويس والامتحان مناسب المستوى وخلافه

وقبل الكلام ده الغش وكتابة اسم حد في الحضور وهو مش حاضر؛ حرام، أيًّا كان السبب بدون إذن دكتور المادة، ومش مبرر إن الراجل شرحه وحش، أنت بتشتري درجات عادي، الغياب عليه 10 درجات، كل درجة بساعة ونص حضور المحاضرة، حابب تشتري وتاخد الدرجة؟ ادفع من وقتك ساعة ونص، مش مبرر أنك متحضرش وتاخد حق الدكتور مش مسامح لك أنك تاخده بطريقة حرام وتقول لصاحبك يكتبني!

فيه موقف حصل الترم الأول، مش بقوله على سبيل إني مضايق، لكن على سبيل الاستغراب من وجهة نظر الدكتور:

أنا شيلت مادة الترم الأول، والمادة دي مكنتش امتحنت الميد بتاعها، وشيلتها أعمال سنة، والميد كان من 30، كنت محتاج بس 15 درجة منه وأنجح
روحت للدكتور قولته كان عندي مشكلة كذا كذا ومعرفش أمتحن، قالي وأيه الدليل؟ قولتله الدليل، قالي والمطلوب؟ قولتله عايز آخد أعمال السنة كاملة، قالي مينفعش طبعًا، قولتله طب عايز امتحن الامتحان تاني في أي وقت تحدده، قالي مش هينفع ليك لواحدك، لازم أمتحن كل اللي كان عنده أعذار، قولتله ماشي عادي مفيش مشكلة، قالي لأ، فيه مشكلة، لأن أنا اللي بصحح، مش المعيدين، ومش هقعد أصحح ميد ترم تاني! قولتله طب أنا عايز أجيب 35 من 50 في أعمال السنة، مع تلت ورقة الامتحان عشان أنجح في المادة، قالي مينفعش، قولتله طب أعمل أيه يا دكتور؟ قالي أنت زي زمايلك، جالي زميل ليك برده مراته ولدت في الميد ترم ومعرفش يجي، وتاني رجله كانت متجبسة، والتالت كان عنده برده وهكذا، قولتله طب ما يمتحنوا يادكتور والمعيد يصححه؟ قالي لأ
قولتله تمام خير
قالي بس هزودك من 16 ل 20 من 50 في أعمال السنة، قولتله يادكتور مش هستفيد حاجة، زودهم ل 35، قالي لا، فضحكت ومشيت

واستغربت الصراحة إنه ضيَّع ع الناس درجات زي دي في إيده، بعيدًا عني، وإن واحد مراته حامل، هيعمل أيه يعني بجد!
سبحان الله العظيم

قال النبي صلَّى اللهُ عليه وسلَّم :
(والَّذي نفسي بيدِه لو تتابَعْتُم حتَّى لا يبقى منكم أحَدٌ لسال لكم الوادي نارًا)

لو كل شلة صحاب، أو عائلة، خَلَت من صاحب دين، وواحد يذكرهم بالله ويقول ده حلال وده حرام، ويأمر بالصلاة وبالمعروف، وينهى عن الحرام؛ هتذهب بركة المكان والمجموعة!
وهيحل محل الشخص ده، شخص يأمر بالحرام وينهى عن الصلاة والمعروف أو يؤخرها ويثبط الباقيين عن أعمال البِر

فلو أنت في مكان/ مجموعة ومفيش حد بيعمل كدا، واجب عليك تشيل الهم ده وتقوم بالأفعال دي
فِعلك وكلامك مش تفضل ولا مِنَّة منك، كلامك هيكون سبب في بركة الله عليك وعلى الباقيين ونجاتك ونجاة الباقيين

وإذا رأوا تجارة أو لهوا انفضوا إليها وتركوك قائمًا
قل ما عند الله خير من اللهو ومن التجارة والله خير الرازقين

عشان لما الصلاة تتعارض مع العمل أو التجارة
ربنا خالق الكون وخالقك، والسبب الوحيد في رزقك وفي إيجاد الشغل لك، قال لك:
(قل ما عند الله خير من اللهو ومن التجارة والله خير الرازقين)

فما بالك لما الصلاة تتعارض مع درس ولا سكشن ولا محاضرة ولا مذاكرة ولا ماتش ولا قعدة صحاب، أو أنك مكسوف تقوم تتوضى، أو حتى مكسوف تقوم تاخد دش، أو هتضيع وقت كتير، فلما ترجع البيت بقى وخلاص تصليها وكدا
كل ده قدام شغلك وقدام رزقك لا شيء
والصلاة مقدمة على الرزق
والله خير الرازقين

الفِعل أبلغ من الكتابة وأبلغ من الكلام وأبلغ من السمت وأبلغ من العِلم، فعلك دليل واضح على نيتك وعلى مبادئك، مهما كان الكلام اللي بتقوله وبتكتبه، ومهما كان مدى عِلمك ومعرفتك

هيفضل موقف بايخ إن الخطيب في كتب الكتاب يهزر بالتعدد، واسأل الله لمن تزوج الأولى أن يتزوج الثانية ووو
هو إحنا عُمرنا ما هنبقى ستات، وإحنا عارفين إن الستات بتتضايق م الكلام ده، طب ليه الهزار ده قدامهم؟
أنت متعرفش حال كام واحدة فيهم أصلًا جوزها بيكلم عليها، أو هي شاكة في حاجة، أو في رأسها مليون تساؤل عن أي تصرف من جوزها في اتجاه مش مناسب، ليه تهيِّج المشاعر دي جواها؟
ومن غير الكلام ده، ليه تهزر في موضوع عارف إن فيه طرف بيضايق منه؟

لما يكون فيه واحد"محترم" منزل حاجة على الميديا، فيها حاجة حرام وأنا عارف إن هي حرام، أول ما أشوفها عنده، بستغرب وأبدأ أتردد ويجي في بالي تساؤلات زي: ممكن فيه ضرورة، ممكن فيها اختلاف وأنا مكنتش أعرف؟، ممكن مخدش باله؟، وووو
بكل حُسن ظن في الشخص اللي منزّل المحتوى

لحد ما ألاقي واحد كاتبله تعليق: كذا حرام/ مينفعش/ لا يجوز، وخلافه
التعليقات دي بتطيَّر تساؤلات كتير جت في دماغي، ومع الوقت وتكرار الموقف وتكرار التساؤلات تلقائيًا هيتغير مفهومها في دماغي من حاجة حرام لحاجة "عادية" وتعدِّي!

بمجرَّد تعليق بسيط، بيهدم السلوك الشيطاني ده

وفي الآخر يجي واحد يقولك: النصيحة على العلن فضيحة!!

يا أخي دي فضيحة لو أنت شوفت حاجة قدامك شافها مئات الناس، وأنت منتصحتش قدام المئات اللي شافوها دول!

النصيحة فضيحة لما يكون شخص عمل حاجة بعيد عن الناس وأنا جيت أنصحه في وسط الناس بحاجة هما مش عارفين أنه بيعملها
لكن هو منزلها وعارف هو بيعمل أيه، والناس عارفه وشايفه الحرام اللي هو واقع فيه
أيه وجه الفضيحة في حاجة زي كدا؟

لما تلاقي حد منزل صورته مع واحدة، أو بنت منزله صورتها، أو واحد منزل مقطع مسلسل، أغنية، بوست فيه شتيمة، كلام غيبة في حد، قلة أدب على الناس، تشجيع على حرام، وخلافه
انصحه في البوست، وانصحه خاص، ولو عرفت تنصح الناس اللي متفاعلة على البوست وممكن متشوفش تعليقك على البوست، ادخلها خاص وانصحها عادي

مش عشان مقلق من كلام أي حد عليك، تسيب فرصة أنك تعدل وجهة عشرات الناس من اللي حواليك كان هيبدأ يتجر في سلسة حرام لا نهاية لها

وَلَيَنْصُرَنَّ اللَّهُ مَنْ يَنْصُرُهُ إِنَّ اللَّهَ لَقَوِيٌّ عَزِيزٌ

في وقت زي ده لما بلاقي نفسي فاضي أو مضايق، بحب أقلّب في قناة الشعر بتاعتي، أو في القناة هنا ببعض الكلمات واللي يطلعلي، أو في أكونت تويتر، وبخلص وأنا مبسوط الحمد لله 😁

فيديو سعيد صالح وهو بيقول:
"أي نعم ليا تاريخ مزفت قبل كدا ومهبب بهباب، بس أنا واثق إنه هيغفرلي، لأنه قال إذا توبتم هغفر لكم.
المذيع: أيه الحاجة اللي أنت سعيد أنك توبت عنها؟
سعيد صالح: قلة الأدب والحاجات الوحشة اللي كانت في البني آدم دي، الحمد لله تخلصت منها تمامًا، كويس إن أنا تخلصت منها، كان ممكن أفضل طول عمري قليل الأدب وحاجات من دي"

فيديو مؤثر جدًا
وحتى لو الإنسان كان فاكر نفسه كويس وطول عمره ماشي صح وبيأدي الفرائض، هيتمنى في نهاية حياته قبل ما يموت إنه يعمل كدا
إنه يتوب
ويعلن توبته للناس، كما أظهر فُجره وفحشه ليهم
ويعترف إنه كان بيعمل حاجات حرام
وإنه يندم على اللي كان بيعمله
ويطمع في كرم الله ومغفرته

سبحان الله، توفيق عجيب من ربنا، مستحيل حد يضمن إنه يعمل كدا قبل وفاته
فالطبيعي إن أي حد دلوقتي بيبادر بالتوبة وإعلان توبته للناس من الحرام اللي كان بيعمله وسط الناس، ومسح آثار الحرام من حياة الناس من الميديا

سعيد صالح محضرش كمية الدروس والمواعظ الإيمانية الجبارة اللي إحنا سمعناها
ولا وقف يصلي قيام بالساعات
ولا سمع تفسير للقرآن من د أحمد عبد المنعم وخلافه
ولا كان موجود في بيئة إيمانية تساعده
ولا كان فيه حد بينصحه يعمل الحلال ويبعد عن الحرام
وبيعترف وطالع يقول للناس أيوة أنا كنت بعمل حاجات حرام وتوبت عنها

حالياً شخص يكون عمل كل الحاجات دي، وبيجادل بالحرام بحجة إن فيها خلاف، أو محدش بيشيل ذنب حد، كل واحد حُر

كل واحد تاب من حرام كان بيعمله وسط الناس، يقول للناس أنا كنت بعمل كذا وده حرام وأنا معدتش هعمله إن شاء الله

وكل حد بيعمل حرام في وسط الناس يكف أذاه عن إخواته المسلمين ويكتفي بالحرام لنفسه ولواحده

كفاية الفتن والشيطان والنفس والهوى، متبقاش أنت كمان شيطان بتحارب أخواتك، بسبب شهوة مش قادر تمسك نفسك عنها وطالع تعملها في الملأ!

لو جه خاطر في بالك إنك تعد فلوسك اللي تصدقت بيها، وتقول ياااه مبلغ كذا، لو كنت مطلعتش الفلوس دي كان زماني بقى معايا كذا وكذا
ابعد الأفكار دي عن دماغك، لأن في الغالب ممكن مكنش يجيلك رزق بعد كدا لو مكنتش طلعت الصدقات دي، ويمكن كنت تصرفها في حاجات تانية غير الصدقة ومتبقاش برده معاك فلوس

متحسسش نفسك أنك تصدقت بفلوس كتير، وأنك كدا عملت حاجات كويسة
متتعاملش بمبدأ المَنْ

لأن الله هو اللي أرشدك للصدقة
وهو اللي رزقك لكي تستطيع التصدق
وهو اللي رزقك بعد التصدق
قال الله تعالى: (يمنون عليك أن أسلموا، قل لا تمنوا علي إسلامكم، بل الله يمن عليكم أن هداكم للإيمان إن كنتم صادقين)

الله يفعل ما يشاء
وله العزة والكبرياء
لا يسأل عما يفعل وهم يسألون

بقى كل شلّة وكل مجتمع فيها ناس نسايب لناس من نفس المجموعة
فلما يجي فرح ونحضره، غالبًا البنات اللي موجودة في الفرح، هي من أهلنا أو أهل صاحبي، أو نسايبي، أو نسايب صاحبي، ناس عارفينها، مش ناس مجهولة

فبيبقى موقف بايخ جدًّا، وساعات بيوصل لقلة الأدب، لما تلاقي واحد يقولك:
أنا جاي أدور على عروسة!
روح أقف على باب البنات
اتفرج على البنات يمكن واحدة تعجبك
يجوز تتفرج بنية الجواز
ووو، وخلافه من الهزار المعفن اللي ملوش لازمة
واللي في الغالب لما بنتكلم في الكلام ده، دماغك غصب عنك تلقائي بتروح لأسماء وأشكال البنات اللي موجودة، لأن معظهم إحنا عارفينهم، مش ناس غريبة!

فطبيعي إن موقف زي دا يقلل من قيمتك، وأحيانًا يقلل من رجولتك، ويخليك شخص تافه وسط الناس

هيفضل أسوأ موقف ممكن يحصل في علاقة صحوبية/ارتباط إنهم يجتمعوا على الحرام؛ سواء مشاهدة أو فعل أو كلام

حتى لو كل واحد بيعمل نفس الحرام لواحده، لما يتقابلوا محدش يصرّح للتاني إنه بيعمل الحرام ده، يتكلّف ويتصنّع لأبعد حد
المهم يمتنعوا عن الاجتماع على الحرام

حتى لو زوجين، كل واحد يعمل الحرام والتاني مش شايفه، هيشتم، هيغتاب، هيسمع أغنية، هيشوف فيلم، هيدخل معاملة مالية مشبوهه، هيحط مبلغ له في البنك، هيعق والديه، أي فِعل مهما كان، يحاولوا قدر الإمكان إن كل واحد يعمله والتاني مش شايفه

عشان لما حد من الطرفين يشوف التاني واقع في حرام، يعرف ينصحه ويقوله ده حرام، من غير ما يتكسف
وعشان يبقى في الاجتماع بركة وطاعة لله
(ورجلان تحابا في الله اجتمعا عليه وتفرّقا عليه)

أفضل شيء عن تجربة عموماً وفي الأوضاع دي إن محدش يحسبلها، سيبها ماشية ببركة ربنا
البركة نماء خفي، يزيده التقوى والستر

سواء قدمت النصيحة لأصحابك وأهلك، أو مقدمتش النصيحة، في الحالتين هتموت وتنتهي حياتك
وهيتبقى عملك الصالح من النصيحة لهم وصدقك قدام نفسك معاهم
أو نفاقك وغشَّك ليهم، لزيادة التودد والحب بينكم!
و(قلب من ترضيه بسخط بربك؛ بيد ربك)

الصراحة إنها مش رفاهية
لا، ده حاجة أساسية لما تلاقي واحد بينزل حاجة حرام، أقل حاجة تلغي متابعته، ولو واحدة بتنزل صورها، أقل شيء تلغي متابعتها
ولو حد بيشتم أو كل كلامه غيبة وسب وتريقة في خلق الله، الغي متابعته

حرام عليك نفسك اللي قاعدة تشرب الحاجات دي على الفاضي بدون حتى ما يكون في الموضوع إشباع لشهوة
ده حرام مجاني بسبب الفراغ، والكسل في إنك تشيل الناس دي من عندك

وخطوة أفضل من الخطوة دي أنك تنصحه يبطّل يكتب أو ينزل الحاجة الحرام دي، ولو كررها ومش بيستجيب، الغي متابعته

كمان يومين كل واحد هيورينا صورة والدته على الميديا، حاول متكونش منهم
حتى لو شيخك ذات نفسه منزل صورته مع أمه، متنزلش صورتك والدتك، الله يحفظها ويبارك فيها، ممكن تفرحها بكلام وبدعاء من غير ما تنزل صورتها للفانز بتوعك

أي اتنين مخطوبين بالوضع التقليدي السائد، بيقعوا في حرام أظهار الزينة من البنت أمام خطيبها وتزينها
وحرام حفلة الخطوبة بالاختلاط والأغاني والرقص اللي فيها
وحرام نزول صورتهما على الميديا
فمهما كان الشخص اللي خطب ومهما كانت درجة إيمانه هتفضل الحاجات دي حرام حتى لو عمل حاجة واحدة منها، وافضل استنكر الأفعال دي واستحقرها مهما كانت جميلة، لأن ربنا حرَّمها
ومتباركش لحد واقع فيها إلا ومباركتك متبوعة بنصيحتك له

عزيزٌ أنتَ في قلبي
ولكن عزة الإسلام أكبـر

الحب في أحيان كتير بيطغى على القيم الدينية تدريجيًا عند الشخص، وبتبقى مصيبة سودا
لو العلاقة مكنش فيها تعاون على الخير والمعروف، لا بد هيبقى فيها تعاون على الإثم والحرام والعدوان على محارم الله بشكل جماعي
ولو العلاقة مفيهاش شغل للأوقات بالعبادات، هتبقى شغل للأوقات بالحرام والتسلية بغيبة الناس