والله العظيم أشهد إن لو أنا اللي خلقت نفسي ومقدِّر لنفسي قضاء معين بترتيبي، مش هيبقى أحسن من الوضع الحالي نهائي، ووضعي الحالي بكرم ربنا وفضله لا يُتخيَّل
سبحان الله العظيم

شهر شعبان تُرفع فيه أعمال السنة إلى الله، نهاية سنة المحاسبة في شهر شعبان، وبدايتها شهر رمضان
حاول تتخلص من أي حرام مثبت عندك على الميديا من صور وفيديوهات وشتايم أو غيبة، امسحها وتب منها، قبل رفع الأعمال

لسه لحد اللحظة دي الناس بتتساهل وبتترك سيئات جارية على صفحتها
- بدون ما تتوب منها
- وبدون ما تمسحها
مع إنها معدش ليها لازمة، ومعدتش هتجيب لايكات، ومعدتش هتضحك حد، ومش هتفيدك في أي شيء في الدنيا؛ غير إنها هتبقى حرام لم تتب منه

صورة واحد وخطيبته، صورة واحد ومراته في فرحهم، صورة واحد مع الدكتورة أو المعيدة، صورة واحدة، كلمات أغاني، كوميكس لأي فاسق من الفسَّاق، كلمات فاحشة حتى لو كان بيشتم بيها جماد، غيبة للاعيبة أو المشهورين، فيديوهات أغاني، مقاطع من أفلام ومسلسلات، بوست بيفتخر بيه بطُرق الغش اللي كان بيغش بيها في الامتحانات على سبيل الهزار إلخ إلخ

مش عارف هيجرى إيه لو واحد دخل ومسح كل الحرام القديم
ويقع في حرام جديد، وبعد ما يعدِّي وقته وياخد غايته وشهوته من البوست سواء لايكات أو كومنتات أو ضحك الناس عليه، يقوم ماسحه، وميخليش وراه أثر للحرام ده

وخليك فاكر إن أي كلمة بتكتبها أو بتشيرها على الفيس أو أي موقع بتقع في صحيفتك قبل ما الناس يشوفوها، وطول ما هي في صفحتك فهي في صحيفتك
وأظن أنك مش هتحب خالص تلاقي في صحيفتك يوم القيامة: كلمات أغاني، أو صور لمغنيين وممثلين (متحرشين وخمورجية وحرامية وخونة وظلمة…) ولا شتايم مهما كانت مستساغة في وسطك المحيط، هتظل كلمات قليلة الأدب، ولا غيبة، ولا تريقة على خلق الله، ولا كُفران لنِعم الله، ولا سخط على أقداره وخلافه

وتذكر:
متخططش لمعصية، ولو عملت معصية متكلبش فيها.
فرق كبير أوي بين اللي بيُغلب على معصية، وبين اللي بيعمد إليها.
وبين اللي المعصية بتطرأ عليه، وبين اللي بقت جزء من حياته.

اللهم اقسم لنا من طاعتك ما تبلغنا به جنتك، يارب

اللهم لا تجعل مصيبتنا في ديننا

طالما الدين بخير خلاص أنت بخير،
أيه راح منك يعني؟
وأيه الدنيا كلها أصلًا بتساوي أيه يعني؟
النبي صلى الله عليه وسلم ما كانش بيشبع ثلاث أيام من الشعير، كما تقول السيدة عائشة، وأحيانًا كان يتلوى كما تتلوى الحية من الجوع!

صلى الله عليه وسلم

والجملة الشهيرة لسيدنا عمر:
"نحن قوم أعزَّنا الله بالإسلام فمهما ابتغينا العزَّة في غيره أذلَّنا الله"
كانت بسبب تعليق البعض على هيئة ولبس سيدنا عمر وهو أمير المؤمنين وكان رايح لفتح بلد، موقف مهم جداً

فالدين هو المقياس والمعيار

حتى الممثلين والمغنين والفسّاق والفجّار، مع الحرام اللي بيرتكبوه، هما متمسكين بدين بيحتكموا فيه في حياتهم، ولكنها نسخة مشوّهه أو فيها بعض الأهواء، لكن مفيش إنسان يقدر يعيش من غير قواعد ومبادئ وصح وغلط في حياته!

لما تتوب من حاجة حرام كنت بتعملها قدام الناس، قول للناس إنك توبت منها، وأظهر ده

الناس بتفرح لما بتشوف واحد كان كافر وأسلم، وكذلك لما واحد كان بيعمل حاجة حرام وتاب منها

وده هيفيدك شخصياً في تثبيتك على عدم فعل الحرام ده تاني
وعلى الأقل عشان لو وقعت فيه، تلاقي حد يقولك حرام

قال الله تعالى:
إلا الذين تابوا وأصلحوا وبيَّنوا فأولئك أتوب عليهم وأنا التواب الرحيم

لو أنت شايف إن سماع الأغاني، ده حرام قليل، مش حاجة كبيرة -زعمًا منك-
فأنك تسمع الأغاني مع حد تاني، بيخليه حرام عظيم؛ لما فيه من التشجيع على الحرام، والتعاون على الإثم وعصيان الله، والمجاهرة بالحرام!
فما بالك لو كنتم مجموعة وبتسمعوا أغنية! تحت مسمى حفلة، أو فرح، أو أيًا كان!

الاجتماع على معصية الله، ذنب عظيم جدًّا

ولو الشخص اللي قدامك، عارف الحلال والحرام، وأنت متأكد من ده، يكفيك في نصحك له وتذكيره أنك تقوله: ده حرام مينفعش، وخلاص
مش لازم تبدأ بمقدمة أربع سطور كلام، وخاتمة زيها، ورسالتك كلها قلوب، أو كلامك كله كلام معسول وحُب
يكفيك التذكرة، وهو يكفيه الاستجابة والاستسلام لأمر الله عند التذكرة

لكن كلام الحُب والغرام ساعات بيقلل من قيمة الكلام المهم، وساعات بيقلل من قيمة الحرام الحاصل

وأنا مش بدعوه إلى الإسلام بدايةً، ده مجرَّد تذكير بحاجة هو عارفها، محتاجه تذكير بكلام الله المجرَّد

متضيعش إنك تذكر الله مثلًا ألف مرّة، بسبب إنك خايف من الرياء، أو مقلق حد يشوفك بتسبح في الشارع، أو أي مشاعر سلبية بتجيلك
امسك السبحة في أي مكان وسبّح
والسبحة من الأسباب المعينة على ذكر الله، لو أيدك فاضية غالبًا مش هيجي في بالك الذكر، لكن لو معاك سبحة هتفكرك كل شوية بذكر الله

واحد صحبي كان بياخد رأيي إنه عايز يحط صورته هو ومراته من سيشن الفرح، على الفيس بوك
أنا مكنتش أعرف إن مراته منتقبة، كنت فاكرها غير منتقبة
قال أيه رأيك أحط صورتها، بس بالجمب كدا، بحيث إنه ميكونش باين منها حاجة؟
قولتله رأيي لا متحطش، ولا حتى من الضهر
قالي زوجتي منتقبة، قولتله عادي برده رأيي متحطش
ومحطش مع إنه كان نفسه يحطها، ربنا يبارك فيهما

والصراحة عمومًا مش مع وضع أي صورة ولو لصابع من بنت تخضني، ولو أي حد سألني مستحيل أوافقه على حاجة زي كدا
وده مش تشدد أو فتوى، لأ هو اختياري في مساحة الحلال الأقرب للتورُّع عن الأفعال دي

وعمومًا لو حد محجِّم نفسه في زاوية الحلال والحرام بس، هيعاني في حياته كتير، لأنه فيه مسائل كتير هتقابله يومية مش هيعرف يتصرف فيها
فيه قبل الحلال والحرام، خطوة الحياء
وفيه خطوة القبول المجتمعي
وفيه خطوة: ولا تتبعوا خطوات الشيطان
وفيه خطوة: المآلات الحالية للفعل ده، عشان متفصلش رأيك عن الواقع
وفيه خطوات كتير ممكن ترفض بسببها أفعال تكون هي مش حرام، بس هي مخالفة لمقاصد الدين، وأحيانًا تؤول للحرام، من المعطيات في الحياة الواقعية بتاعتنا

راجل يتصور مع واحدة أجنبية عنه، حرام
وإنه ينزل الصورة على الميديا، حرام تاني
وجهر بالمعصية، ودعوى لانتشار الحرام
وإن حد يتفاعل عليها، حرام، ومن التعاون على الإثم، وتشجيع على الحرام!

طبعاً هيجي واحد الناس شايفاه "محترم" ويتصور مع واحدة اجنبية، أو بنت لابسة نقاب وبتتصور مع التيم بتاعها، ويهدموا الكلام ده
فبقولك متتفتنش بيهم، مش هيفيدوك حاجة وافتكر (وجعلنا بعضكم لبعض فتنة، أتصبرون)
وافتكر إن مقياس الاحترام والالتزام أصحابهم هما اللي وضعوه، هما مش واخدين صك سماوي إنهم متدينين، عشان تاخد أفعالهم على محمل الدين

قال سيدنا الخضر جازمًا: إنك لن تستطيع معي صبرًا، أي إنك يا موسى لن تطيق أن تصبر على ما تراه من علمي، لأن الظواهر التي هي علمك لا تعطيه، ولا تحيطه
وكيف تصبر على ما تراه خطأ ولم تخبر به؟ أو ولم تخبر بوجه الحكمة فيه؟

لو فهمت النموذج ده، هتوصف نفسك بالغباء، كل ما تشوف قدر من أقدار الله نفذ فيك أو في بلدك أو في حاجة حواليك، وأنت تتضايق من القدر ده!
الإيمان الغيبي إنك مهما بغلت من التفكير والأسباب مستحيل توصل لحكمة وهدف وقوع القدر من الله، لو الله لم يُخبر به، فالحل الوحيد إنك تؤمن بأن أقدار الله كلها خير، وإن العقل البشري مستحيل يقرَّب من الهدف، بدون إخبار من خالقه

الله لا يوصف بالشر
الله لا يفعل الشر
كل ما هو ظاهره شر بالنسبة لك، فهو شر نسبي، بالنسبة للمعلومات والقدرات اللي ربنا ادهالك بس

(السيرة النبوية صناعةٌ للذات)
أشهد

الحمد لله وحده.

تؤخِّر التوبة من ذنوب تعرفها، تظن أنك قادر على توبة حسنة متى أردتَها؟
مغرور مسكين، يوشك ظنك أن يُرديَك، فتصبح من الهالكين.

«رُبَّ قائمٍ مشكور له، ورُبّ نائمٍ مغفور له، وذلك أن الرجلين يتحابان في الله فقام أحدهما يُصلي فرضي الله صلاته ودعاءه فلم يردِ عليه من دعائه شيئاً، فذكر أخاه ذلك في دُعائه من الليل، فقال: يا ربِّ أخي فلان اغفر له، فغفر الله له وهو نائم».

كعب الأحبار

اللهم إنا نسألك لذَّة النظر إلى وجهك الأكرم في فردوسك الأعلى خالدين في رضوانك الأكبر أبدًا

لما ولد/ بنت لما يتسأل بتحضر أفراح، ويجاوب: مش بحب الأفراح بس بحضر للحاجات اللي مينفعش محضرهاش زي أفراح العيلة والكلام ده
ده معناه حاجة واحدة بس: إنه بيحضر أفراح، ومش ناوي توبة من الحضور!
بخلاف أي استنتاجات تانية من كلامه ومن شخضيته ومن أخلاقه، ده الاستنتاج الصح الوحيد

محدش في بداية كلامه مع طرف تاني في علاقة بيقول الاستثناءات! نهائي، بل الاستثناء من أي أمر مستحيل يتقال لا في أول قاعدة ولا في المستقبل
+ إنها حاجة حرام، فطبيعي برده الحرام مش بيتقال، أو بيتقال ويتقال بعده: بس معدش بحضر الحمد لله عشان حرام
+ حتى لو ده الأصل عنده (الحضور) فإنه ينوي عدم الحضور في المستقبل ده واجب عليه، وده الطبيعي اللي يتقال، مفيش استثناء في الموضوع!

ما كل واحد من المسلمين له صديق بيحبه جدًّا هيعمل فرح
وله أخوه بيحبه جدًَّا هيعمل فرح
وله قريب لازم يحضر فرحه عشان علاقات القرابة متبوظش
وهكذا
لو طبقنا قاعدة الاستثناء، وبقت قضية مشهورة، ما كل الناس هتحضر الأفراح وهتفضل مكملة!

ولا أنت بتبص من منظورك الشخصي بس إن كل اللي هتحضره في حياتك فلان وفلان وفلان وأخويا وابن عمي وو وبس، يبقوا كدا عشرين فرح بس، وخلاص مفيش أفراح تانية، فعادي لما أحضرهم وأبقى أتوب منهم!

لكن ميهمكش التعاون على الحرام ده
وميهمكش استمرار الحرام العظيم ده في المجتمع المسلم
وميهمكش قرايبك اللي عارضين أجسامهم وأصحابك والناس بيتفرجوا عليهم، تحت مرئى ومسمع منك
وميهمكش إن إخواتك المسلمين هيتفتوا بفعلتك

كل اللي همك بس، إن صاحبك يرضى عنك ويحبك والعلاقة تستمر
بس افتكر:
(قَلْبُ من ترضيه بإسخاط ربك؛ بيد ربك).

اللهم اشغلنا بمراضيك التي ترضى بها عنَّا
اللهم اشغلنا بمراضيك التي فيها صلاح معاشنا ومعادنا
يا رب آمين

نسبة البنات "المحترمين" اللي بيشتموا مرعبة الصراحة
وكون إن أنا أتخيل، إن أنا أتجوز واحدة وتكون بتشتم مع أصحابها فكرة رخمة جدًّا ومصيبة بالنسبة ليا، وبيترتب عليه إن البيئة اللي حواليها طبيعي محدش بينصحها أنها متشتمش
ده أنا مكنتش هبقى حابب خالص إنها تضحك على رسالة صاحبتها اللي فيها شتيمة، ومتتفاعلش معاها أقل حاجة
تكون هي بتشتم! حاجة رخمة أوي الصراحة

والمشكلة إنها حاجة مش بتتعرف
ربنا يرزقنا التقوى والطيِّبين