سؤال فعلًا عايز أسأله بجد، ولو حد بيعمل كدا يقولي أيه اللي بيجي في دماغه لما بيعمل كدا؟
ولو حد عنده تفسير منطقي يعرفني

ليه الناس بتشير كوميك، أو بتتفاعل مع بوستات فيها صور بنات غير محجبة؟ أو شتيمة؟ أو غيبة لحد؟ أو فيه أغاني أو خلافه

هل الحجاب مش فرض؟ غض البصر مش فرض؟ الشتايم والغيبة حلال؟
ولا بيكون في دماغه، إن الشير واللايك دي حاجات تافه مش هيتحاسب عليها؟
أيه اللي بيجي في دماغه لما يعمل كدا؟
ولا المحتوى اللي موجود في الحاجة اللي مشيرها نفعها كبير جدًا ومفيش مجال لتوصيل النفع غير كدا؟
وطبعاً أغلب الحاجات دب بتبقى كوميكس للضحك!

جرَّد الحمد والفضل لله وحده، في كلامك
وبعد كده ابقى قول: ثم الفضل لأمي والفضل لأصحابي والفضل للبطيخ

دائمًا بحب تكرار كلمة: (بإذني) في سورة المائدة
(وإذ تخلق من الطين كهيئة الطير بإذني فتنفخ فيها فتكون طيرا بإذني، وتبرئ الأكمه والأبرص بإذني، وإذ تخرج الموتى بإذني)

فكل ما تاخد دوا ليك لحاجة معينة، أو توصف دوا لحد، أو تنصح حد بدوا معين، قول الدوا ده حلو هيخفف التعب (بإذن الله)، اتعود أنك تقولها، واتعود تستشعر فعلًا، إن بدون إذن الله، الدوا مش هيعمل حاجة، مش هيشتغل

واتعود تدعي ربنا بالشفاء، قبل ما تاخد الدوا أو تفكر تشتري دوا

والله العظيم الإيمان بالقضاء والقدر جنة الدنيا، جنة، أنت خلاص على يقين إن ربنا -سبحانه وتعالى- كاتب كده، وهو ده الخير لك، مهما استثقلت المكتوب

ربنا عز وجل أوجد المعاصي وأوجدنا إن إحنا نقع فيها، عشان هتوصلنا لعبادات كُبرى من الاستغفار، والتوبة، والأمر بالمعروف والنهي عن المنكر والمجاهدة، مجاهدة النفس، وغيرها من العبادات الجليلة
ربنا لا يُحب الكذب والغش والزنا والربا وشرب الخمر، لكن وجودها، عشان توصلنا للعبادات دي

تخيل مكنش فيه حرام، وبالتالي محدش بيقع في الحرام؟
مكنش حد هيوصل للعبادات دي، وكان هيُصاب بالكبر أو بالعُجب وخلافه

وقال النبي صلى الله عليه وسلم:
(والذي نفسي بيده، لو لم تذنبوا لذهب الله بكم، ولجاء بقوم يذنبون، فيستغفرون الله، فيغفر لهم)

يعني لما تقع في الحرام، تستغفر، مش تقول: أنا بشر وطبيعي أقع وتفضل تكابر!
ولما حد يذكرك بإنه حرام، تتذكر، وتستغفر

محدش هيتحاسب مكانك، ولا أنت هتتحاسب على أسلوب حد في تذكيرك، أنت عندك المعلومة، وربنا بيُرسل لك التذكرة في أي وضع شاء، فتذكر خير لك

وفي الأفراح، ياريت ياريت تتفق مع صاحب القاعة إنه ميشغلش أغنية أسماء الله الحسنى، بأي شكل من الأشكال
مينفعش والله مهما كانت درجة فُجر الفرح، احتفظ بتعظيمك للتوحيد، وإنه ميبقاش عبارة عن أغنية معزوفة + تبقى لازمة ومتلازمة مع دخول عريس وعروسة للعرض على المشاهدين، مشهد مقرف، تنزيهًا وتعظيمًا للتوحيد، ومهما كان الفرح شكله عامل ازاي، ارفض واتفق مع الدي جي وصاحب القاعة إنها متشتغلش خالص

مشكلة كبيرة إن ربنا يكون كارمك وأنت عايش ونايم في كرم ربنا، ويكون كل كلامك في الحقيقة أو على الميديا على المشاكل اللي بتحصلك بس!
وأنت عارف إن كل حاجة بتحصل لك مقدَّرة من عند ربنا، فأي سخط أو شكوى بتكون على القدر المقدَّر ليك من الله
ويكأنك بتوصل للناس إن حياتك كلها مشاكل، سواء بسبب كلامك على الميديا أو كلامك وشكاويك في الحقيقة!
طب مفيش نِعم خالص من ربنا حصلتلك؟
مفيش دعوة استجابت، تقول للناس الحمد لله حصلي كذا كذا بفضل الله؟
ده حتى يوم ما بتنجح بتقعد تفسَّر كيفية مذاكرتك، وإزاي أنك نشِّنت على أسئلة معينة وجاتلك في الامتحان، وده بسبب أنك بتعرف تنشن صح!!
حتى يوم ما تيجي تكتب بفضل الله، مش قادر تسيبها خالصة كدا، وتلزق فيها: وبفضل صحابي اللي من غيرهم مكنش هعرف أكمل في الكلية!! والله؟

ده لو واحد صاحبك كارمك بحاجات بسيطة وأنت تطلعت تتكلم عنه إن هو مش بيجيب لك غير المشاكل بس، هيتضايق منك جدًّا
وربنا مش كارمك بحاجات بسيطة، ربنا الكريم

ناسي قول الله:
(وآتاكم من كل ما سألتموه)!
(وإن تعدوا نعمة الله لا تحصوها)!

وقول الله:
(وإذ تأذن ربكم لئن شكرتم لأزيدنكم، ولئن كفرتم إن عذابي لشديد)

بمناسبة مسلسلات رمضان

والله العظيم أشهد إن لو أنا اللي خلقت نفسي ومقدِّر لنفسي قضاء معين بترتيبي، مش هيبقى أحسن من الوضع الحالي نهائي، ووضعي الحالي بكرم ربنا وفضله لا يُتخيَّل
سبحان الله العظيم

شهر شعبان تُرفع فيه أعمال السنة إلى الله، نهاية سنة المحاسبة في شهر شعبان، وبدايتها شهر رمضان
حاول تتخلص من أي حرام مثبت عندك على الميديا من صور وفيديوهات وشتايم أو غيبة، امسحها وتب منها، قبل رفع الأعمال

لسه لحد اللحظة دي الناس بتتساهل وبتترك سيئات جارية على صفحتها
- بدون ما تتوب منها
- وبدون ما تمسحها
مع إنها معدش ليها لازمة، ومعدتش هتجيب لايكات، ومعدتش هتضحك حد، ومش هتفيدك في أي شيء في الدنيا؛ غير إنها هتبقى حرام لم تتب منه

صورة واحد وخطيبته، صورة واحد ومراته في فرحهم، صورة واحد مع الدكتورة أو المعيدة، صورة واحدة، كلمات أغاني، كوميكس لأي فاسق من الفسَّاق، كلمات فاحشة حتى لو كان بيشتم بيها جماد، غيبة للاعيبة أو المشهورين، فيديوهات أغاني، مقاطع من أفلام ومسلسلات، بوست بيفتخر بيه بطُرق الغش اللي كان بيغش بيها في الامتحانات على سبيل الهزار إلخ إلخ

مش عارف هيجرى إيه لو واحد دخل ومسح كل الحرام القديم
ويقع في حرام جديد، وبعد ما يعدِّي وقته وياخد غايته وشهوته من البوست سواء لايكات أو كومنتات أو ضحك الناس عليه، يقوم ماسحه، وميخليش وراه أثر للحرام ده

وخليك فاكر إن أي كلمة بتكتبها أو بتشيرها على الفيس أو أي موقع بتقع في صحيفتك قبل ما الناس يشوفوها، وطول ما هي في صفحتك فهي في صحيفتك
وأظن أنك مش هتحب خالص تلاقي في صحيفتك يوم القيامة: كلمات أغاني، أو صور لمغنيين وممثلين (متحرشين وخمورجية وحرامية وخونة وظلمة…) ولا شتايم مهما كانت مستساغة في وسطك المحيط، هتظل كلمات قليلة الأدب، ولا غيبة، ولا تريقة على خلق الله، ولا كُفران لنِعم الله، ولا سخط على أقداره وخلافه

وتذكر:
متخططش لمعصية، ولو عملت معصية متكلبش فيها.
فرق كبير أوي بين اللي بيُغلب على معصية، وبين اللي بيعمد إليها.
وبين اللي المعصية بتطرأ عليه، وبين اللي بقت جزء من حياته.

اللهم اقسم لنا من طاعتك ما تبلغنا به جنتك، يارب

اللهم لا تجعل مصيبتنا في ديننا

طالما الدين بخير خلاص أنت بخير،
أيه راح منك يعني؟
وأيه الدنيا كلها أصلًا بتساوي أيه يعني؟
النبي صلى الله عليه وسلم ما كانش بيشبع ثلاث أيام من الشعير، كما تقول السيدة عائشة، وأحيانًا كان يتلوى كما تتلوى الحية من الجوع!

صلى الله عليه وسلم

والجملة الشهيرة لسيدنا عمر:
"نحن قوم أعزَّنا الله بالإسلام فمهما ابتغينا العزَّة في غيره أذلَّنا الله"
كانت بسبب تعليق البعض على هيئة ولبس سيدنا عمر وهو أمير المؤمنين وكان رايح لفتح بلد، موقف مهم جداً

فالدين هو المقياس والمعيار

حتى الممثلين والمغنين والفسّاق والفجّار، مع الحرام اللي بيرتكبوه، هما متمسكين بدين بيحتكموا فيه في حياتهم، ولكنها نسخة مشوّهه أو فيها بعض الأهواء، لكن مفيش إنسان يقدر يعيش من غير قواعد ومبادئ وصح وغلط في حياته!

لما تتوب من حاجة حرام كنت بتعملها قدام الناس، قول للناس إنك توبت منها، وأظهر ده

الناس بتفرح لما بتشوف واحد كان كافر وأسلم، وكذلك لما واحد كان بيعمل حاجة حرام وتاب منها

وده هيفيدك شخصياً في تثبيتك على عدم فعل الحرام ده تاني
وعلى الأقل عشان لو وقعت فيه، تلاقي حد يقولك حرام

قال الله تعالى:
إلا الذين تابوا وأصلحوا وبيَّنوا فأولئك أتوب عليهم وأنا التواب الرحيم

لو أنت شايف إن سماع الأغاني، ده حرام قليل، مش حاجة كبيرة -زعمًا منك-
فأنك تسمع الأغاني مع حد تاني، بيخليه حرام عظيم؛ لما فيه من التشجيع على الحرام، والتعاون على الإثم وعصيان الله، والمجاهرة بالحرام!
فما بالك لو كنتم مجموعة وبتسمعوا أغنية! تحت مسمى حفلة، أو فرح، أو أيًا كان!

الاجتماع على معصية الله، ذنب عظيم جدًّا

ولو الشخص اللي قدامك، عارف الحلال والحرام، وأنت متأكد من ده، يكفيك في نصحك له وتذكيره أنك تقوله: ده حرام مينفعش، وخلاص
مش لازم تبدأ بمقدمة أربع سطور كلام، وخاتمة زيها، ورسالتك كلها قلوب، أو كلامك كله كلام معسول وحُب
يكفيك التذكرة، وهو يكفيه الاستجابة والاستسلام لأمر الله عند التذكرة

لكن كلام الحُب والغرام ساعات بيقلل من قيمة الكلام المهم، وساعات بيقلل من قيمة الحرام الحاصل

وأنا مش بدعوه إلى الإسلام بدايةً، ده مجرَّد تذكير بحاجة هو عارفها، محتاجه تذكير بكلام الله المجرَّد

متضيعش إنك تذكر الله مثلًا ألف مرّة، بسبب إنك خايف من الرياء، أو مقلق حد يشوفك بتسبح في الشارع، أو أي مشاعر سلبية بتجيلك
امسك السبحة في أي مكان وسبّح
والسبحة من الأسباب المعينة على ذكر الله، لو أيدك فاضية غالبًا مش هيجي في بالك الذكر، لكن لو معاك سبحة هتفكرك كل شوية بذكر الله

واحد صحبي كان بياخد رأيي إنه عايز يحط صورته هو ومراته من سيشن الفرح، على الفيس بوك
أنا مكنتش أعرف إن مراته منتقبة، كنت فاكرها غير منتقبة
قال أيه رأيك أحط صورتها، بس بالجمب كدا، بحيث إنه ميكونش باين منها حاجة؟
قولتله رأيي لا متحطش، ولا حتى من الضهر
قالي زوجتي منتقبة، قولتله عادي برده رأيي متحطش
ومحطش مع إنه كان نفسه يحطها، ربنا يبارك فيهما

والصراحة عمومًا مش مع وضع أي صورة ولو لصابع من بنت تخضني، ولو أي حد سألني مستحيل أوافقه على حاجة زي كدا
وده مش تشدد أو فتوى، لأ هو اختياري في مساحة الحلال الأقرب للتورُّع عن الأفعال دي

وعمومًا لو حد محجِّم نفسه في زاوية الحلال والحرام بس، هيعاني في حياته كتير، لأنه فيه مسائل كتير هتقابله يومية مش هيعرف يتصرف فيها
فيه قبل الحلال والحرام، خطوة الحياء
وفيه خطوة القبول المجتمعي
وفيه خطوة: ولا تتبعوا خطوات الشيطان
وفيه خطوة: المآلات الحالية للفعل ده، عشان متفصلش رأيك عن الواقع
وفيه خطوات كتير ممكن ترفض بسببها أفعال تكون هي مش حرام، بس هي مخالفة لمقاصد الدين، وأحيانًا تؤول للحرام، من المعطيات في الحياة الواقعية بتاعتنا

راجل يتصور مع واحدة أجنبية عنه، حرام
وإنه ينزل الصورة على الميديا، حرام تاني
وجهر بالمعصية، ودعوى لانتشار الحرام
وإن حد يتفاعل عليها، حرام، ومن التعاون على الإثم، وتشجيع على الحرام!

طبعاً هيجي واحد الناس شايفاه "محترم" ويتصور مع واحدة اجنبية، أو بنت لابسة نقاب وبتتصور مع التيم بتاعها، ويهدموا الكلام ده
فبقولك متتفتنش بيهم، مش هيفيدوك حاجة وافتكر (وجعلنا بعضكم لبعض فتنة، أتصبرون)
وافتكر إن مقياس الاحترام والالتزام أصحابهم هما اللي وضعوه، هما مش واخدين صك سماوي إنهم متدينين، عشان تاخد أفعالهم على محمل الدين