حاول لما يحصلك مصيبة أو مشكلة أو فشل أو رفد من الشغل أو سقوط في الدراسة أو مشكلة بينك وبين حد من أهلك وخلافه؛ إنك تصلي لله ركعتين شكر، بعدها مباشرةً متستناش يوم تاني
وده اتعلمته من الشيخ حازم شومان لما جاله خبر وفاة ابنه وقام مصلي ركعتين لله، حتّى قبل ما يروح لابنه ويشوفه
ومن قبله طبعاً الحديث الجميل لرسول الله صلى الله عليه وسلم بعد غزوة أُحد، ومع جروح النبي صلى الله عليه وسلم والصحابة، وهما لسه في أماكنهم، قال النبي صلى الله عليه وسلم:
(استووا حتى أثني على ربي)
لو حاولت تعملها مرة أو حافظت عليها، ما شاء الله هتتفاجئ من رضاك بأقدار الله

للشباب بس +21
.
.
.
.
لو مصمم تعمل فرح، أو مُجبر تعمل فرح، حاول متفجرش في الحرام، أقل الفرح إنك هتعمل اختلاط بين الرجالة الأجانب ومحارمك الستات ويتفرجوا على بعض في لقطة أشبه بمهرجان الجونة + تقييم من أصحابك للبس وأجسام الستات الموجودة
+ أغاني شغالة في الخلفية
حاول الفرح ميزدش عن كدا

مترقصش مع مراتك وسط الناس
متخليش أي عيّل من صحابك يطلع التليفون ويصورك أنت ومراتك، أو يتصور معاك أنت ومراتك
متخليش مراتك تلبس فستان ضيّق من الوسط والصدر، لبّسها خمار يداري المنطقة الي فوق كلها
خليك راجل ومتخليش الناس اللي هما قرايبك وأصحابك يتكلموا عن حجم صدر مراتك وحجم جسمها !
هو فيه ناس بتتكلم؟
والله العظيم بيتكلموا بأسوأ من كدا وعلى مرات صاحبه، وأخت صاحبه وعادي، ما هو صاحبه هيتكلم على مراته وعلى أخته، جمعية ودايرة

عشان كدا صعب تلاقي راجل عمل فرح هينصح حد أنه ميعملش فرح! ما هو أنت شوفت مراتي، أنا مش هشوف مراتك يعني؟
والدياثة المشتركة دي منتشرة بشكل بشع
وتلاقي راجل ومراته متصور مع راجل ومراته!
والصورة دي حرام، ونشرها حرام تاني

الحمد لله رب العالمين
نجحت بمادة

اللهم بك أحاول، ولا بشيء آخر

(المحبة ونصح المسلمين)
قال بعض العلماء هو ده الشيء اللي وقر في قلب سيدنا أبو بكر وبه وصل، وليس بكثير عبادة (ولكن بشيء وقر في قلبه)

مهما كنت شايف نفسك شخص مش كويس،
فحاول بكل طاقتك إن علاقتك ميكونش فيها تعاون على حرام، سواء علاقة صحوبية أو علاقة ارتباط
وخصوصاً بداية العلاقة؛ لأن بداية العلاقة بيُبنى عليها خطوط سير العلاقة بعد كدا، سواء حفلة الخطوبة أو حفلة الفرح في علاقة الارتباط، أو الشتيمة والغيبة وحضور الأفراح والغش في علاقات الصحوبية

إذ لا حسنة للعبد يعملها إلا من عند الله وبفضله وإقدارٌ له عليها

اللهم ربنا لك الحمد

عشان إحنا مش ملائكة، ولا مطالبين بإنشاء مجتمع ملائكي
فربنا شرع لنا التناصح، والأمر بالمعروف والنهي عن المنكر
وقال:
(ولو أنهم فعلوا ما يوعظون به لكان خيرا لهم وأشد تثبيتا)
لحماية المجتمع من انتشار الحرام؛ بسبب أنهم بشر

وأكتر سلاح بيحارب الشريعة دي هو المجاهرة بالحرام

(رُبَّ نصيحة من مخلوق كرهتها وتألمت منها؛ تفتح لك بابًا من نور وتعيدك إلى طريق الخالق)

يعني يوم القيامة خمسين ألف سنة، تقريبا ثماني عشر مليون يوم، الإنسان قائم ومرعوب وخايف أمر صعب يعني، سبحان الله!
(فمن جاءه موعظة من ربه فانتهى، فله ما سلف)
وتقبّل التناصح حتى لو تقيل عليك، حتى لو الأسلوب مش حلو، النصيحة للتذكرة، مش دعوة من أول وجديد للإسلام، ما أنت عارف الحلال والحرام
المهم تنتهي عن الحرام

لما تشوف حد في مشكلة لازم تساعده،
مش هتروح تستأذنه عشان تقدم له المساعدة!
هتقدم له المساعدة، وهو لإما هيقبلها لإما هيرفضها
مشاكل الدنيا بتوصل بسهولة للاكتئاب واليأس ومن ثمَّ للانتحار وللموت
ومشاكل الدين بتوصل للحرام ومن ثمَّ للنار

استفدت كتير أوي من البوستات والكلام اللي مش بيبقى عليه تفاعل كتير وأحياناً ولا لايك حتَّى، ويمكن صاحبه ميعرفش إن فيه حد بيستفاد، بس مكمِّل في الكتابة والشير على أساس إنه عمل صالح له أو لعل وعسى حتى ينتفع
بس فعلًا انتفاعي بيها كبير جدًّا
جزاهم الله عني وعن المسلمين خير الجزاء

(أنا مش داعية ومش مصنف نفسي أني ملتزم، ومش بستخدم الميديا منبر عشان أكلم عن الدين وعن ربنا)

هو الصراحة من التزاماتك كمسلم إنك داعية بشكل ذاتي، وإنك تكون ملتزم بالحلال والحرام، وأنك تتكلم عن ربنا وعن الدين
ده مش اختيار ممكن تعمله أو متعملوش!
ده حق الإسلام عليك، وحق إخواتك عليك

فمفيش أي معنى لكلمة: أنا مش ملتزم! أنا مش داعية! وخلافه

وهتسأل عن كل لايك وكل كومنت وكل كلمة كتبتها على الميديا، والكلمة بتُكتب في صحيفتك، قبل ما حد من أصحابك يشوفها ويقرأها؛ املأها بالمسلسلات والأفلام وصور الفنانين وكوميكاتهم وغيبة الناس، أو املأها بالكلام عن الله

عادي تبارك لصاحبك من غير ما تنزل صورته هو ومراته/خطيبته، عندك ستوري
وعادي تبارك له على الخاص من غير ما تتفاعل مع صورته هو ومراته/خطيبته لو منزلها على الميديا
وعادي تباركي لواحدة قريبتك من غير ما تثني على جمال الفستان وحلاوة مكياجها
ومن غير تفاعل مع صورها باللايك أو الكومنت

المباركة والتهنئة والفرحة ملهاش علاقة بالتفاعل مع حاجة حرام وإقرارها أو الحضور فيها

(بسم الله الذي لا يضر مع اسمه شيء في الأرض ولا في السماء وهو السميع العليم)

(‏كُل مُقاومة صغيرة لوجه الله، انتصارٌ عظيم)

يكفيك لما حد ينصحك نصيحة، تفتكر قول الله:

"وَلَوْ أَنَّهُمْ فَعَلُوا مَا يُوعَظُونَ بِهِ لَكَانَ خَيْرًا لَّهُمْ وَأَشَدَّ تَثْبِيتًا"
.

كلما سمعت إحداهم تقول: هحط صورتي على الفيس وأتزين في لبسي ما دام اللبس واسع، وهقدر أحافظ على ديني، ومليش علاقة باللي بيتفتن بيا سواء من البنات تنزل صورها زيي، أو من الرجالة، دي مشكلتهم
#تحسست_مسدسي

في المجتمع اللي انتشر فيه الزنا، لما حد بيلوم نفسه فيهم، وعايز يبطل الكلام ده، ويجي ينصح حد فيهم بيقوله بلاش الكلام ده بقى عشان غلط وحرام، فصاحبه بيتضايق جدًا منه، وبيحاول يقلل منه أو يطلع له مبررات بانتشار الموضوع ده في المجتمع، أو إن ده بديل لحد ما نتجوز، أو الموضوع بالرضا، أحسن من حاجات تانية بالغصب وخلافه

وكذلك في الشلة أو المجتمع اللي انتشر فيه الخمرة والحشيش

المعظم بيتضايق من النصيحة وبيتقفل منها، وبيحاول يعملك ويعمل لكلمتك اعتبار لما يجي يعمل الحاجة الحرام دي قدامك، ويفتكر كلامك ويتضايق من مجرّد التخيُّل والموقف المحرج، ويحاول يعمل الحرام بعيد عنك

مش عشان حرام معين منتشر في المجتمع بتاعك، تشوفه حرام عادي وبسيط، والحرام الي في مجتمع تاني تشوفه حرام كبير أوي ومينفعش حد يسكت عليه!

زي ما مجتمعك منتشر فيه الأغاني والمسلسلات والغيبة والشتايم والتبرج والتزين والغش، وشايف الحاجات دي عادية عشان منتشرة والكل بيعملها، وشايف إن الزنا والخمرة وضرب الوالدين والربا وأكل الحرام وقلع الحجاب دي حاجات كبيرة أوي لو حصلت لازم يكون فيها وقفة ونصيحة وموقف محدد

ففيه مجتمعات تانية منتشر فيها الحاجات دي وشايفاها حاجات عادية، وبيبصوا للحاجات الأكبر منها زي القتل والاغتصاب والسرقة وخلافه حاجات كبيرة مينفعش يتسكت عليها

وفيه مجتمعات تانية شايفه الحرام أبسط من كدا، وشايفه الحاجات اللي في المجتمع بتاعك من الأغاني والشتايم والغش ووو، حاجات كبيرة مينفعش يتسكت عليها

فالمقياس مش مجتمعك ولا بيئتك
والمقياس مش بمدى انتشار الحرام
والمقياس مش بمدى تقبل الناس للحرام وتمريره
والناس أغلبها عارف الحلال والحرام وبيسلّي نفسه بإن: كل الناس بتعمل الحرام المعيّن ده فأنا هعمله معاهم، والحرام اللي الناس مش بتعمله أو رافضاه وبتنبذ اللي بيعملوه هتجنبه!

عشان الناس مش هتفيدك بحاجة، وانتشار الحرام مش هيقلل من كونه حرام ولا من عقوبته الدنيوية والأخروية

المقياس بمدى علمك بالحلال والحرام وتطبيقه
والمقياس: (فمن يعمل مثال ذرةٍ خيراً يره..ومن يعمل مثقال ذرةٍ شراً يره)

الحفلة شباب بس؟
في الغالب مش هحضر، لأني شخصياً مش بحب الحاجات دي
لكن لو فيه حد من أهلي هيتبسط بيها ويجي معايا هحضر عشانه
بس لو الحفلة فيها أغاني مش هحضر خالص
حاسس السؤال ده غالباً هيبقى تفضيل شخصي لكل واحد
وأنا معروف عني إني مش هحضر الحاجات دي حتى لو حلال
وكانت اتعملت في سنة التخرج بتاعتي، وقالولي وقلت لا، بس ساعتها عشان مكنتش واثق في المنظمين، وقلت هتبقى تلبيخ بس اسمها حفلة محترمة وخلاص

سؤال فعلًا عايز أسأله بجد، ولو حد بيعمل كدا يقولي أيه اللي بيجي في دماغه لما بيعمل كدا؟
ولو حد عنده تفسير منطقي يعرفني

ليه الناس بتشير كوميك، أو بتتفاعل مع بوستات فيها صور بنات غير محجبة؟ أو شتيمة؟ أو غيبة لحد؟ أو فيه أغاني أو خلافه

هل الحجاب مش فرض؟ غض البصر مش فرض؟ الشتايم والغيبة حلال؟
ولا بيكون في دماغه، إن الشير واللايك دي حاجات تافه مش هيتحاسب عليها؟
أيه اللي بيجي في دماغه لما يعمل كدا؟
ولا المحتوى اللي موجود في الحاجة اللي مشيرها نفعها كبير جدًا ومفيش مجال لتوصيل النفع غير كدا؟
وطبعاً أغلب الحاجات دب بتبقى كوميكس للضحك!

جرَّد الحمد والفضل لله وحده، في كلامك
وبعد كده ابقى قول: ثم الفضل لأمي والفضل لأصحابي والفضل للبطيخ