(إذا لم تعمل للإسلام في يومٍ؛ فاترك لأجله)

اترك لأجل الإسلام والمسلمين وإخوانك وأهلك معصيةً أو المجاهرة بها، اترك لله المجاهرة بذنبك حفاظاً على الإسلام والمسلمين، لا تكن محطة نحسٍ؛ تؤذي المسلمين بمجاهرتك

لا حول ولا قوة إلا بالله

لو فاكر إن المجاهرة بالحرام والمجاهرة بالطاعة في وقت واحد في نفس اللحظة شيء كويس واسمه مجاهدة، فدي مشكلة

مقولتش وقَّف الطاعة، لكن بقول خلي بالك وانتهي عن الحرام ولو وقت فعل الطاعة فقط!!
الخمس دقايق اللي هتعمل فيهم طاعة في مكان، متدخلش معاها حرام في الخمس دقايق دول بس حتَّى

والله العظيم القررات اللي بتتاخد في أوقات الإيمان العالي ليك، هي سبب نجاتك بعد كدا
ما أصل أنت لو ليك خمس دقايق في الشهر إيمانك بقى عالي وجيت تعمل طاعة، ومع الطاعة دي حذفت كذا وكذا وكذا من الحاجات الحرام، لما تيجي تعمل الحاجات الحرام هتاخد وقت عقبال ما توصل للحرام، مش هيكون سهل، وده من أهم أسباب إنك تبطله

مفيش بنت هتيجي فجأة تمسح كل صورها من على الفيس، ولما ترجع وإيمانها يقل، هتنزل كل الصور اللي مسحتها مرة واحدة، مستحيل، لكن لو فضلت سايبه الصور، فرصة أنها ترجع وتنزل تاني أسهل بكتير

أغلب الرجالة في الوقت الحالي لو رمى السجاير بعد ما جابها، صعب أوي يشتري علبة تانية، على الأقل هيستنى يومين، عشان يحلل فلوسها، وهيشرب ولو شحاتة من أصحابه سجارة أو اتنين في اليومين دول بس

التقليل من الحرام، ومن أسباب الوصول للحرام حاجة مهمة جدًّا، مش هتوصلها لو أنت فضلت عامل موازنة وبتعد حسناتك وبتمن على الله بيها !

طب ما تدعيلهم بالهداية؟
والله العظيم بدعيلهم، وبادعي إن أنا بدعيلهم أكتر من نفسي وأكتر ما أنت بتدعيلهم

بتدخل في نوايا الناس ليه؟
والله ما دخلت في نوايا حد، ده تذكير للناس عشان حتَّى لو مش هيقدر يعمل ده وهيفضل مكمل على التعايش السلمي بتاعه، على الأقل يعرف إنه بيعمل حاجة غلط، ويعترف بها، عسى الله أن يتوب عليَّا وعليه وعلى عباده أجمعين

حاجتين مبحبهومش في ناشري التلاوات

إنه يحط صورة الشيخ على الصوت! وصورة الشيخ في كامل هندامه وجماله، وقرّاء شباب! أنا لو شوفت المنظر ده على تليفون مراتي هحس إحساس مش لطيف، أيه علاقة الصورة بالتلاوة! ما كفاية الاسم

والحاجة التانية تصوير القارئ فيديو أثناء القراءة في الصلاة!

وأيه الهدف من نشر صورة الشيخ أو شكله وهو بيقرأ وعِلمه إنه قدام الكاميرا وفي قلب الصلاة؟
شيء بستغربه

المتزوج، كل فترة يحاول يسأل مراته: فيه حاجة مضايقاكي مني؟ زعلانة مني في حاجة؟
عشان هي ممكن تكون عايشة عادي ومكملة، بس شايلة منك، ويوم القيامة تقتص منك
فللسبب ده سؤالها مهم
+ إحساسها بأهميتها بسبب سؤال بسيط زي ده هيزود من قيمتك عندها، وهتحبك أكتر
وبعدين لو قالت زعلانة أو مضايقة أو التعامل مش كويس، الستات سهلة في المصالحة بالكلام والهدايا والموضوع يعدِّي في الدنيا، أفضل ما تتفاجئ من قصاصها منك يوم القيامة

الناس بتستخدم توسعة الدين والشرع عليهم لتلبية رغباتهم وشهواتهم!
يعني لما يجي في الشريعة واحدة بغي، الله عز وجل أدخلها الجنة بسبب فعل لها، كدا يبقى أي حد له الحق في الزنا! لو كان بيعبد ربنا وله رابط! وكل ما حد يكلمه يحتج بحديث سقي الكلب؟
هل كل الصحابة كانوا بيشربوا خمرة!
لما الشريعة تجيب صحابي بيشرب خمرة كاستثناء، وليس الأصل، للتوسعة على الناس وعدم القنوط من التوبة، تاخد أنت حديث الصاحبي اللي شرب الخمر وتخليه قاعدة عامة!
وأثر قاطع الطريق!
وخلافه، سبحان الله أدلة على رحمة وسعة ربنا سبحانه بينا، وإحنا نيجي نستخدمها لتبرير عصيان الله!
وزي ما فيه توسعة في الحجاب وفي ألوانه وفي أشكاله، والبنات تستخدمها لنوايا خفية من الظهور والبروز وأشياء تعلمها النساء عن بعضهنّ!

الرحلة فردية، ولكن التعامل بأنانية مُهلك
"قوا أنفسكم (وأهليكم) نارًا"

بدون أنانية في التصرفات:
هل أنت تقبل إن كل المسلمين على كل منصات التواصل يكون الأكونتات بتاعتهم كلها كوميكات أفلام ومسلسلات؟
تخيّل الوضع وفكّر فيه، لو لقيته هيبقى حاجة مقرفة أوي، يبقى أولى بيك أنك متعملش كدا، ولو كوميك واحد، بلاش تشيّره
ولو لقيت حد مشيّر بلاش تعمل عليه ريآكت أو تتفاعل معاه
حتى لو بتضحكك

مفيش خلاف إن الممثلين مجاهرين بحرام وبكبائر
وفيه فئة منهم متحرشين وتجار سلاح، وحرامية، وخمورجية، وخلافه
إنك تحط صورته على الأكونت بتاعك أكيد مش حاجة حلوة
+ إن حد ميفهمش الكوميك فيروح يشوف اللقطة الحقيقة من الفيلم اللي هو مشاهدته حرام، فدي مشكلة وكله على قفاك
+ إن حد يفتكر المسلسل واللقطة ويحن للمشاهدة فيروح يشوف فيلم من أعمال الشخص اللي في الكوميك أو خلافه
وخلافه من مشاكل أنك تشير كوميك فيه لقطة من فيلم، أو فيه صورة ممثل
ولو فيها حاجة ضحكتك اكتفي بالضحك وعديها، مش لازم تنشر الحاجات دي بين المسلمين
ارحمهم، وأبعد عنهم الأذى قدر الإمكان

ولو عرفت تنصح اللي منزلين الكوميكات دي، يبقى جزاك الله عن المسلمين خيراً

حاول لما يحصلك مصيبة أو مشكلة أو فشل أو رفد من الشغل أو سقوط في الدراسة أو مشكلة بينك وبين حد من أهلك وخلافه؛ إنك تصلي لله ركعتين شكر، بعدها مباشرةً متستناش يوم تاني
وده اتعلمته من الشيخ حازم شومان لما جاله خبر وفاة ابنه وقام مصلي ركعتين لله، حتّى قبل ما يروح لابنه ويشوفه
ومن قبله طبعاً الحديث الجميل لرسول الله صلى الله عليه وسلم بعد غزوة أُحد، ومع جروح النبي صلى الله عليه وسلم والصحابة، وهما لسه في أماكنهم، قال النبي صلى الله عليه وسلم:
(استووا حتى أثني على ربي)
لو حاولت تعملها مرة أو حافظت عليها، ما شاء الله هتتفاجئ من رضاك بأقدار الله

للشباب بس +21
.
.
.
.
لو مصمم تعمل فرح، أو مُجبر تعمل فرح، حاول متفجرش في الحرام، أقل الفرح إنك هتعمل اختلاط بين الرجالة الأجانب ومحارمك الستات ويتفرجوا على بعض في لقطة أشبه بمهرجان الجونة + تقييم من أصحابك للبس وأجسام الستات الموجودة
+ أغاني شغالة في الخلفية
حاول الفرح ميزدش عن كدا

مترقصش مع مراتك وسط الناس
متخليش أي عيّل من صحابك يطلع التليفون ويصورك أنت ومراتك، أو يتصور معاك أنت ومراتك
متخليش مراتك تلبس فستان ضيّق من الوسط والصدر، لبّسها خمار يداري المنطقة الي فوق كلها
خليك راجل ومتخليش الناس اللي هما قرايبك وأصحابك يتكلموا عن حجم صدر مراتك وحجم جسمها !
هو فيه ناس بتتكلم؟
والله العظيم بيتكلموا بأسوأ من كدا وعلى مرات صاحبه، وأخت صاحبه وعادي، ما هو صاحبه هيتكلم على مراته وعلى أخته، جمعية ودايرة

عشان كدا صعب تلاقي راجل عمل فرح هينصح حد أنه ميعملش فرح! ما هو أنت شوفت مراتي، أنا مش هشوف مراتك يعني؟
والدياثة المشتركة دي منتشرة بشكل بشع
وتلاقي راجل ومراته متصور مع راجل ومراته!
والصورة دي حرام، ونشرها حرام تاني

الحمد لله رب العالمين
نجحت بمادة

اللهم بك أحاول، ولا بشيء آخر

(المحبة ونصح المسلمين)
قال بعض العلماء هو ده الشيء اللي وقر في قلب سيدنا أبو بكر وبه وصل، وليس بكثير عبادة (ولكن بشيء وقر في قلبه)

مهما كنت شايف نفسك شخص مش كويس،
فحاول بكل طاقتك إن علاقتك ميكونش فيها تعاون على حرام، سواء علاقة صحوبية أو علاقة ارتباط
وخصوصاً بداية العلاقة؛ لأن بداية العلاقة بيُبنى عليها خطوط سير العلاقة بعد كدا، سواء حفلة الخطوبة أو حفلة الفرح في علاقة الارتباط، أو الشتيمة والغيبة وحضور الأفراح والغش في علاقات الصحوبية

إذ لا حسنة للعبد يعملها إلا من عند الله وبفضله وإقدارٌ له عليها

اللهم ربنا لك الحمد

عشان إحنا مش ملائكة، ولا مطالبين بإنشاء مجتمع ملائكي
فربنا شرع لنا التناصح، والأمر بالمعروف والنهي عن المنكر
وقال:
(ولو أنهم فعلوا ما يوعظون به لكان خيرا لهم وأشد تثبيتا)
لحماية المجتمع من انتشار الحرام؛ بسبب أنهم بشر

وأكتر سلاح بيحارب الشريعة دي هو المجاهرة بالحرام

(رُبَّ نصيحة من مخلوق كرهتها وتألمت منها؛ تفتح لك بابًا من نور وتعيدك إلى طريق الخالق)

يعني يوم القيامة خمسين ألف سنة، تقريبا ثماني عشر مليون يوم، الإنسان قائم ومرعوب وخايف أمر صعب يعني، سبحان الله!
(فمن جاءه موعظة من ربه فانتهى، فله ما سلف)
وتقبّل التناصح حتى لو تقيل عليك، حتى لو الأسلوب مش حلو، النصيحة للتذكرة، مش دعوة من أول وجديد للإسلام، ما أنت عارف الحلال والحرام
المهم تنتهي عن الحرام

لما تشوف حد في مشكلة لازم تساعده،
مش هتروح تستأذنه عشان تقدم له المساعدة!
هتقدم له المساعدة، وهو لإما هيقبلها لإما هيرفضها
مشاكل الدنيا بتوصل بسهولة للاكتئاب واليأس ومن ثمَّ للانتحار وللموت
ومشاكل الدين بتوصل للحرام ومن ثمَّ للنار

استفدت كتير أوي من البوستات والكلام اللي مش بيبقى عليه تفاعل كتير وأحياناً ولا لايك حتَّى، ويمكن صاحبه ميعرفش إن فيه حد بيستفاد، بس مكمِّل في الكتابة والشير على أساس إنه عمل صالح له أو لعل وعسى حتى ينتفع
بس فعلًا انتفاعي بيها كبير جدًّا
جزاهم الله عني وعن المسلمين خير الجزاء

(أنا مش داعية ومش مصنف نفسي أني ملتزم، ومش بستخدم الميديا منبر عشان أكلم عن الدين وعن ربنا)

هو الصراحة من التزاماتك كمسلم إنك داعية بشكل ذاتي، وإنك تكون ملتزم بالحلال والحرام، وأنك تتكلم عن ربنا وعن الدين
ده مش اختيار ممكن تعمله أو متعملوش!
ده حق الإسلام عليك، وحق إخواتك عليك

فمفيش أي معنى لكلمة: أنا مش ملتزم! أنا مش داعية! وخلافه

وهتسأل عن كل لايك وكل كومنت وكل كلمة كتبتها على الميديا، والكلمة بتُكتب في صحيفتك، قبل ما حد من أصحابك يشوفها ويقرأها؛ املأها بالمسلسلات والأفلام وصور الفنانين وكوميكاتهم وغيبة الناس، أو املأها بالكلام عن الله

عادي تبارك لصاحبك من غير ما تنزل صورته هو ومراته/خطيبته، عندك ستوري
وعادي تبارك له على الخاص من غير ما تتفاعل مع صورته هو ومراته/خطيبته لو منزلها على الميديا
وعادي تباركي لواحدة قريبتك من غير ما تثني على جمال الفستان وحلاوة مكياجها
ومن غير تفاعل مع صورها باللايك أو الكومنت

المباركة والتهنئة والفرحة ملهاش علاقة بالتفاعل مع حاجة حرام وإقرارها أو الحضور فيها

(بسم الله الذي لا يضر مع اسمه شيء في الأرض ولا في السماء وهو السميع العليم)