ومن الصور المختلطة برضه، إن الخاطب وخطيبته/ الراجل ومراته، يتصوروا ويتصور جمبهم صاحبة مراته! أو صاحب العريس!
حرام، وعك مقرف الصراحة

بنشوف مشاهد السوريين واللاجئين وهما أصلًا قاعدين في مخيَّمات والشتا والبرد حواليهم من كل ناحية، وزيادة عليه مشاهد خروجهم من بين الأنقاض بعد الزلزال
وتفتح الميديا تلاقي واحد بيصوَّت عشان دكتور جاب له امتحان فيه سؤال صعب، أو جدول المحاضرات فيه سكشنين ورا بعض، وناس قاعد تشتكي القدر للناس على الميديا ! ويقولك العيشة صعبة وإحنا في ابتلاء!
والله بستحقر الأفعال دي، حتى لو مشوفتش مشاهد أصعب منها في الواقع، لأن في الماضي مشاهد أسوأ من كدا بكتير
وإحنا مطالبين بالصبر وبالشكر في الظروف الصعبة أصلًا وأولًا، لكن بنيجي عند لعب العيال ده وتلاقي الصويت مغرّق الميديا من شوية عيال!

يا رب احفظ إخواننا اللاجئين والمكروبين في كل مكان، يا رب آوهم واطعمهم واسكنهم واحفظهم واحفظ عليهم دينهم وثبتهم

(واتقوا يومًا ترجعون فيه إلى الله)
وامسحوا أي محتوى فيه مخالفات شرعية من الميديا؛ مش هتفيد مستقبلًا لا في أمر دنيا ولا دين، فضلًا عن الحرام اللي هتشيله لو حد شافها، فضلًا إن حد يقلدك فيها!
اللي مش بينصحك تشيل الحرام وأنت حي، مستحيل هيجري ورا الحاجات دي لما تموت عشان يمسحها، لو مفكر كدا فأنت موهوم

‏اللهم إن هذا إقبال ليلك وإدبار نهارك وأصوات دعاتك فاغفر لنا

بتشتغل في مكتب/عيادة/محل...، بتقعد فيه 8 ساعات لمدة خمس أيام، وكل يوم يجي زبون أو اتنين أو عشرة، وباقي الوقت فاضية، وبعدين في آخر الشهر تقبض 3000 جنيه، عشان تروح تجيب بيهم سكين كير، أو مرطب شفايف، ومطوِّل للرموش، أو تجيب هدوم بدل الهدوم اللي دابت بسبب قعدتها في الشغل
وتيجي تقول عادي مباح لنا العمل، وتقصَّر في حق أمها وأهلها قبل الجواز، وفي حق جوزها وأولادها بعد الجواز، تحت مسمى الشغل والكارير وحرام يضيع سنين الكلية والمصاريف ع الفاضي! فنضيَّع بقيت العمر على الفاضي معاهم!

مش فاهم حياة أيه دي، وشغل أيه ده، وفين المكسب من الموضوع!
فضلًا عن العبادات اللي بتطير في النص، وتضييع الأوقات

فضلًا إن واحدة تفتح حاجة خاصَّة بيها، يمكن تكسب في شهر ويمكن تخسر

ده بخلاف البنت اللي بتشتغل عشان تجيب فلوس إيجار شقتها، أو أكلها، أو فلوس مساعدة لأهلها ....، ربنا يبارك لها ويحفظها من الفتن ويعينها في شغلها

لكن الشغل لمجرّد إني اسمي شغَّالة وبقبض عشان الجو العام، ده تضييع للعمر على الفاضي

الصحبة الصالحة مش بتعينك على العبادات، وبتشجعك على قراءة القرآن وقيام الليل والصلاة في أول الوقت وبس!

الصحبة الصالحة هي اللي بتمنعك عن الحرام ويكفي الشرط ده عشان تتسمّى صحبة صالحة
لو شافوك بتعمل حاجة حرام هينصحوك؛ كدا الناس دي محترمة

النبي صلى الله عليه وسلم قال في الأوامر: فاتوا منه ما استطعتم
وقال في النواهي: فاجتنبوه

إن حد يشجعك على طاعة معينة ذلك يُحسنه كل أحد، حتى المنافقين والفاسقين
أما إن حد ينهيك عن حاجة حرام، فده صاحب صالح

ضابط الشخص الملتزم: عدم المجاهرة بحرام؛ فعل أو قول أو حضور
وضابط الصحبة الصالحة: عدم التشجيع على الحرام، ولو بالسكوت

الصراحة أنا مش شايف ده مجاهدة ولا حاجة،
اللي في الصورة ده مثال واقعي على التعايش السلمي بين الحرام والحلال!
وده حرام، مسموش مجاهدة
- أنك تكون بتقرأ قرآن، فالطبيعي هتكره المعصية ولو وقت القراءة بس، وهتحب إن محدش يشوفك وأنت بتعمل حاجة حرام، وهتخبي السجاير!

- إن بنت آية أو حديث أو درس أثَّر فيها، فتقوم جاية كاتبه بوست، طبيعي في اللحظة دي لو حاجة صورتها أو البوست الي قبلها كان بوست فيه أغنية أو فيلم، طبيعي هتشيلهم، وبعد ما تأثير الموعظة يخلص، تنزل الحرام تاني وهكذا

- إن شخص ينزل ستوري أغنية، وبعدها ستوري قرآن! ده مش مجاهدة، لو بيجاهد كان طبيعي هيتكسف على الأقل ويمسح ستوري الأغنية، ولما ستوري الآية يخلص، يبقى ينزل تاني

- إن بنت راحة تصلي التراويح بلبس غير شرعي وتقولك مجاهدة! تلبس لبس شرعي، ولما تخلص صلاة ترجع للبسها

- إن راجل يسيب الفرح عشان يروح يصلي وبعدين يرجع على قاعة الفرح تاني! الأولى بعد الصلاة يستنى ويروح الفرح بعد ما يخلص

حاول تفرَّق بين إنك فعلًا بتجاهد وفيه حاجات صعبة عليك! ولا أنت مقضيها على مزاجك وفاكر نفسك بتجاهد!

(إذا لم تعمل للإسلام في يومٍ؛ فاترك لأجله)

اترك لأجل الإسلام والمسلمين وإخوانك وأهلك معصيةً أو المجاهرة بها، اترك لله المجاهرة بذنبك حفاظاً على الإسلام والمسلمين، لا تكن محطة نحسٍ؛ تؤذي المسلمين بمجاهرتك

لا حول ولا قوة إلا بالله

لو فاكر إن المجاهرة بالحرام والمجاهرة بالطاعة في وقت واحد في نفس اللحظة شيء كويس واسمه مجاهدة، فدي مشكلة

مقولتش وقَّف الطاعة، لكن بقول خلي بالك وانتهي عن الحرام ولو وقت فعل الطاعة فقط!!
الخمس دقايق اللي هتعمل فيهم طاعة في مكان، متدخلش معاها حرام في الخمس دقايق دول بس حتَّى

والله العظيم القررات اللي بتتاخد في أوقات الإيمان العالي ليك، هي سبب نجاتك بعد كدا
ما أصل أنت لو ليك خمس دقايق في الشهر إيمانك بقى عالي وجيت تعمل طاعة، ومع الطاعة دي حذفت كذا وكذا وكذا من الحاجات الحرام، لما تيجي تعمل الحاجات الحرام هتاخد وقت عقبال ما توصل للحرام، مش هيكون سهل، وده من أهم أسباب إنك تبطله

مفيش بنت هتيجي فجأة تمسح كل صورها من على الفيس، ولما ترجع وإيمانها يقل، هتنزل كل الصور اللي مسحتها مرة واحدة، مستحيل، لكن لو فضلت سايبه الصور، فرصة أنها ترجع وتنزل تاني أسهل بكتير

أغلب الرجالة في الوقت الحالي لو رمى السجاير بعد ما جابها، صعب أوي يشتري علبة تانية، على الأقل هيستنى يومين، عشان يحلل فلوسها، وهيشرب ولو شحاتة من أصحابه سجارة أو اتنين في اليومين دول بس

التقليل من الحرام، ومن أسباب الوصول للحرام حاجة مهمة جدًّا، مش هتوصلها لو أنت فضلت عامل موازنة وبتعد حسناتك وبتمن على الله بيها !

طب ما تدعيلهم بالهداية؟
والله العظيم بدعيلهم، وبادعي إن أنا بدعيلهم أكتر من نفسي وأكتر ما أنت بتدعيلهم

بتدخل في نوايا الناس ليه؟
والله ما دخلت في نوايا حد، ده تذكير للناس عشان حتَّى لو مش هيقدر يعمل ده وهيفضل مكمل على التعايش السلمي بتاعه، على الأقل يعرف إنه بيعمل حاجة غلط، ويعترف بها، عسى الله أن يتوب عليَّا وعليه وعلى عباده أجمعين

حاجتين مبحبهومش في ناشري التلاوات

إنه يحط صورة الشيخ على الصوت! وصورة الشيخ في كامل هندامه وجماله، وقرّاء شباب! أنا لو شوفت المنظر ده على تليفون مراتي هحس إحساس مش لطيف، أيه علاقة الصورة بالتلاوة! ما كفاية الاسم

والحاجة التانية تصوير القارئ فيديو أثناء القراءة في الصلاة!

وأيه الهدف من نشر صورة الشيخ أو شكله وهو بيقرأ وعِلمه إنه قدام الكاميرا وفي قلب الصلاة؟
شيء بستغربه

المتزوج، كل فترة يحاول يسأل مراته: فيه حاجة مضايقاكي مني؟ زعلانة مني في حاجة؟
عشان هي ممكن تكون عايشة عادي ومكملة، بس شايلة منك، ويوم القيامة تقتص منك
فللسبب ده سؤالها مهم
+ إحساسها بأهميتها بسبب سؤال بسيط زي ده هيزود من قيمتك عندها، وهتحبك أكتر
وبعدين لو قالت زعلانة أو مضايقة أو التعامل مش كويس، الستات سهلة في المصالحة بالكلام والهدايا والموضوع يعدِّي في الدنيا، أفضل ما تتفاجئ من قصاصها منك يوم القيامة

الناس بتستخدم توسعة الدين والشرع عليهم لتلبية رغباتهم وشهواتهم!
يعني لما يجي في الشريعة واحدة بغي، الله عز وجل أدخلها الجنة بسبب فعل لها، كدا يبقى أي حد له الحق في الزنا! لو كان بيعبد ربنا وله رابط! وكل ما حد يكلمه يحتج بحديث سقي الكلب؟
هل كل الصحابة كانوا بيشربوا خمرة!
لما الشريعة تجيب صحابي بيشرب خمرة كاستثناء، وليس الأصل، للتوسعة على الناس وعدم القنوط من التوبة، تاخد أنت حديث الصاحبي اللي شرب الخمر وتخليه قاعدة عامة!
وأثر قاطع الطريق!
وخلافه، سبحان الله أدلة على رحمة وسعة ربنا سبحانه بينا، وإحنا نيجي نستخدمها لتبرير عصيان الله!
وزي ما فيه توسعة في الحجاب وفي ألوانه وفي أشكاله، والبنات تستخدمها لنوايا خفية من الظهور والبروز وأشياء تعلمها النساء عن بعضهنّ!

الرحلة فردية، ولكن التعامل بأنانية مُهلك
"قوا أنفسكم (وأهليكم) نارًا"

بدون أنانية في التصرفات:
هل أنت تقبل إن كل المسلمين على كل منصات التواصل يكون الأكونتات بتاعتهم كلها كوميكات أفلام ومسلسلات؟
تخيّل الوضع وفكّر فيه، لو لقيته هيبقى حاجة مقرفة أوي، يبقى أولى بيك أنك متعملش كدا، ولو كوميك واحد، بلاش تشيّره
ولو لقيت حد مشيّر بلاش تعمل عليه ريآكت أو تتفاعل معاه
حتى لو بتضحكك

مفيش خلاف إن الممثلين مجاهرين بحرام وبكبائر
وفيه فئة منهم متحرشين وتجار سلاح، وحرامية، وخمورجية، وخلافه
إنك تحط صورته على الأكونت بتاعك أكيد مش حاجة حلوة
+ إن حد ميفهمش الكوميك فيروح يشوف اللقطة الحقيقة من الفيلم اللي هو مشاهدته حرام، فدي مشكلة وكله على قفاك
+ إن حد يفتكر المسلسل واللقطة ويحن للمشاهدة فيروح يشوف فيلم من أعمال الشخص اللي في الكوميك أو خلافه
وخلافه من مشاكل أنك تشير كوميك فيه لقطة من فيلم، أو فيه صورة ممثل
ولو فيها حاجة ضحكتك اكتفي بالضحك وعديها، مش لازم تنشر الحاجات دي بين المسلمين
ارحمهم، وأبعد عنهم الأذى قدر الإمكان

ولو عرفت تنصح اللي منزلين الكوميكات دي، يبقى جزاك الله عن المسلمين خيراً

حاول لما يحصلك مصيبة أو مشكلة أو فشل أو رفد من الشغل أو سقوط في الدراسة أو مشكلة بينك وبين حد من أهلك وخلافه؛ إنك تصلي لله ركعتين شكر، بعدها مباشرةً متستناش يوم تاني
وده اتعلمته من الشيخ حازم شومان لما جاله خبر وفاة ابنه وقام مصلي ركعتين لله، حتّى قبل ما يروح لابنه ويشوفه
ومن قبله طبعاً الحديث الجميل لرسول الله صلى الله عليه وسلم بعد غزوة أُحد، ومع جروح النبي صلى الله عليه وسلم والصحابة، وهما لسه في أماكنهم، قال النبي صلى الله عليه وسلم:
(استووا حتى أثني على ربي)
لو حاولت تعملها مرة أو حافظت عليها، ما شاء الله هتتفاجئ من رضاك بأقدار الله

للشباب بس +21
.
.
.
.
لو مصمم تعمل فرح، أو مُجبر تعمل فرح، حاول متفجرش في الحرام، أقل الفرح إنك هتعمل اختلاط بين الرجالة الأجانب ومحارمك الستات ويتفرجوا على بعض في لقطة أشبه بمهرجان الجونة + تقييم من أصحابك للبس وأجسام الستات الموجودة
+ أغاني شغالة في الخلفية
حاول الفرح ميزدش عن كدا

مترقصش مع مراتك وسط الناس
متخليش أي عيّل من صحابك يطلع التليفون ويصورك أنت ومراتك، أو يتصور معاك أنت ومراتك
متخليش مراتك تلبس فستان ضيّق من الوسط والصدر، لبّسها خمار يداري المنطقة الي فوق كلها
خليك راجل ومتخليش الناس اللي هما قرايبك وأصحابك يتكلموا عن حجم صدر مراتك وحجم جسمها !
هو فيه ناس بتتكلم؟
والله العظيم بيتكلموا بأسوأ من كدا وعلى مرات صاحبه، وأخت صاحبه وعادي، ما هو صاحبه هيتكلم على مراته وعلى أخته، جمعية ودايرة

عشان كدا صعب تلاقي راجل عمل فرح هينصح حد أنه ميعملش فرح! ما هو أنت شوفت مراتي، أنا مش هشوف مراتك يعني؟
والدياثة المشتركة دي منتشرة بشكل بشع
وتلاقي راجل ومراته متصور مع راجل ومراته!
والصورة دي حرام، ونشرها حرام تاني

الحمد لله رب العالمين
نجحت بمادة

اللهم بك أحاول، ولا بشيء آخر

(المحبة ونصح المسلمين)
قال بعض العلماء هو ده الشيء اللي وقر في قلب سيدنا أبو بكر وبه وصل، وليس بكثير عبادة (ولكن بشيء وقر في قلبه)

مهما كنت شايف نفسك شخص مش كويس،
فحاول بكل طاقتك إن علاقتك ميكونش فيها تعاون على حرام، سواء علاقة صحوبية أو علاقة ارتباط
وخصوصاً بداية العلاقة؛ لأن بداية العلاقة بيُبنى عليها خطوط سير العلاقة بعد كدا، سواء حفلة الخطوبة أو حفلة الفرح في علاقة الارتباط، أو الشتيمة والغيبة وحضور الأفراح والغش في علاقات الصحوبية