أنا كإسلام للأسف بسيء الظن بأي شخص بيجاهر بالمعصية خصوصًا لو كانت مش بسيطة، وخصوصًا لو ثبِّت المعصية على الميديا ومنها الفيس بوك؛ إنه شخص غير مُعظِّم للدين !
والله عشرات الشباب معانا عاديين خالص، بيعملوا حاجات غلط كتير ومعروفين، لكن بالنسبة لتثبيت معصية أو تقرير ذنب وكتابته على الفيس بوك علني كدا، مش بيعمله نهائي
وسألت كذا حد فيهم، قالي عشان مخدش ذنب حد
وإنه نشر لسنَّة سيئة
وإن الفيس بوك في حكم من يخطب في قوم، إزاي ينشر أو يحدث منه تصرف حرام! أو تصرف فيها خلاف بين الحرمة والكراهة!
وإنه فتنة للناس
والأسوأ لما بيحصل من ناس غالب عليها الطابع الإسلامي، بيرسِّخ في نفوس (المؤمن الضعيف) الإقرار بحلال الذنب ده
سواء أنا غلط أو صح، ده اللي أنا بظنُّه في الناس غصب عنِّي، لما بشوف موقف زي دا، إنه غير معظِّم لأكبر نعمة في حياته، وبيسعى بشتى الطرق لإظهار كُفرانه بها، وفتنة الناس
مش لسان حاله، لكن لسان أعماله

سورة العَلَق سورة عظيمة جدًا
اقرأ باسم ربك الذي خلق (1) خلق الإنسان من علق (2)
اقرأ وربك الأكرم (3) الذي علم بالقلم (4) علم الإنسان ما لم يعلم (5)

كلا إن الإنسان ليطغى (6) أن رآه استغنى (7) إن إلى ربك الرجعى (8)
أرأيت الذي ينهى (9) عبدا إذا صلى (10) أرأيت إن كان على الهدى (11) أو أمر بالتقوى (12)
أرأيت إن كذب وتولى (13)
ألم يعلم بأن الله يرى (14)

كلا لئن لم ينته لنسفعا بالناصية (15) ناصية كاذبة خاطئة (16)
فليدع ناديه (17) سندع الزبانية (18)
كلا لا تطعه واسجد واقترب

سبحان الله، بعد الآيات دي، حُقَّ للإنسان السجود لثِقل الوحي عليه

في نهاية رمضان، لما بتكون آخر عبادة صيام- صلاة تراويح- صلاة تهجد، وحتى آخر صلاة فجر في رمضان وهكذا
بتحس قد إيه إنك عايز تحسِّنها وتجملها، عشان آخر عبادة، ولو لفترة مؤقتة لحد ما يجي رمضان الجاي، وأظن ده برده بيحصل في الحج أو العُمرة، بتكون فيها نفس الشهوة واللذة في آخر يوم وآخر طواف

وبتحس فيها حديث النبي صلى الله عليه وسلم: "إذا قُمْتَ في صلاتِكَ، فصَلِّ صلاةَ مُودِّعٍ"
لو أي عبادة استشعرت إنها آخر عبادة، هتلاقي من تحسينها وحُسن أدائها والتأني فيها ولذتها، شيء جميل

سبحان الله
بستغرب أوي لما حد بياخد بنصيحتي
مش عارف إيه سبب الاستغراب، بس دا فعلاً الإحساس اللي بيجيلي لما حد ينفذ اللي باعتهوله، وخصوصًا إن أنا ببعت: من غير إيموشن يطرِّي الجو، وبيكون بصيغة الأمر، ومش بيكون فيه ألفاظ أدبية، إلا لو واحد أكبر منّي يعني، بيبقى بأسلوب أدب، مش عشان دي نصيحة، ولكن عشان احترام فرق السن
كنت أتمنى انزل اسكرينات لناس عملت بالنصيحة علطول، بس مش هينفع
من غير جِدال
من غير استدراك عليَّ
من غير تعليق على أسلوبي
وحتى كمان غير إسلاميين "اللي هو أصلًا محدش بينصحهم عشان في الغالب مش هيعملوا حاجة!"
ودي نقطة مهمة:
لأن أنت مش مطالب إنك تدعو اللي عندك شك إنه هيقبل نصيحتك وهيعمل بيها!
المعنى دا مش موجود نهائي
بل بالعكس ممكن يكون معاني مخالف لكذا نص شرعي
أنت بتنصح عشان واجب عليك الأمر بالمعروف والنهي عن المنكر
واجب عليك تنصح أخوك
بس
نتيجة الموضوع دا مش عليك!
وكمان حاجة: النصيحة مش سعي، والنتيجة مش هو اللي هينفذه
لأ، خالص، النتيجة هو النصيحة، بدال نصحت، أنت كدا حققت النتيجة والغاية من الموضوع

سبحان الله
مهمة الأنبياء!
والناس بتتكسف تعملها، أو بتحاول تحددها على حسب القبول ولا لأ، بمعايير من دماغه!

مهمة الأنبياء:
(وما على الرسول إلا البلاغ المبين)
(فإنما عليك البلاغ وعلينا الحساب)
(إن أنت إلا نذير)
والآية الجميلة:
(قل: أطيعوا الله وأطيعوا الرسول
فإن تولوا
فإنما عليه ما حمل وعليكم ما حملتم)!

ومعيار القبول:
(ليس عليك هداهم ولكن الله يهدي من يشاء)

بقى فيه تقصير في أداء مهمة الأنبياء وتقليدهم، بسبب: إن الناس دي مش هتتقبل كلامي!!
هو واجبك ومهمتك: النصيحة والأمر والنهي وبس
مش مهمتك: أنهم يقبلوا كلامك، أو أنهم يعملوا بكلامك!

الأنبياء اللي مأمنش من قومهم ولا واحد، هيدخلوا الجنة
والصالحين المصلحين اللي محدش من قومهم سمع كلامهم في الأمر والنهي، هيدخلوا الجنة
لأنهم عملوا الواجب اللي عليهم وبس، وهو دي النتيجة، النتيجة= النصحية والإبلاغ

رأيي
سماع المحاضرات العلمية، والدروس الإيمانية في المواصلات، أغلب الأوقات بتكون لتريح الضمير وتقضية واجب
وفي الأغلب برده في النهاية عشان: أنا سمعت 543 درس في المواصلات، حسن استغلال الأوقات البينية!
طب وبعدين؟ إيه المحصلة؟
أوقات المواصلات تستغلها في مواقع التواصل وفي الألعاب على الموبايل
ولما تروح البيت وتهدى وتقعد فاضي، متلعبش ولا تفتح الفيس وتويتر وتقضي الساعات المتواصلة عليهم، وأقعد اسمع واتفرج بقى على المحاضرات والدروس
لكن إنك تختار الوقت الهادي والذهن الصافي في الميديا واللعب، ووقت الصداع والمشغوليات في سماع مادة دينية أو تعليمية!
حاجة غريبة جدًا

كنت بشوف فيديوهات لفاضل سليمان وأحمد عبد المنعم وأنا باكل، مكملتش خمس دقايق في الدرس، وقفلته
طلع محتاج كل كلمة تتكتب، أو تركز فيها، ما شاء الله

لسه المعضلة الأكبر مش لاقي ليها إجابة
الراجل في خطوبته أو جوازته، وسايب أصحابه يصوره عروسته عادي، بفستانها الضيق والميكاج، تمام؟ تمام
ليه لما واحد منهم ينزل صورتها مع العريس، اللي هو مصورها، يحط قلب على وشها، ويسيب صدرها الحاجة الوحيدة اللي باينة وظاهره في الصورة وبفعله دا يسلط عليها الأنظار أكتر؟ ليه؟
مع إن تغطية الصدر فرض، وتغطية الوجه مختلف بين الفرض والاستجباب!
ليه بيعمل كدا؟
وحصلت قدامي شايفها بعيني:
واحد اتخانق مع صاحبه عشان نزل صورته مع مراته وهو مش مغطي وشها، بس صدرها عادي مفيش منه مشكلة
وده أصبح يُسمى: التوجيب
لو منزلتش ستوري بالشكل دا، أو مجتش الخطوبة وصورتني مع مراتي، تبقى صاحب مش جدع!

أكتر ناس مقرفة ممكن تشوفها على الميديا؛ الناس الكئيبة المُحبَطة والمُحبِطة

الأندلس سقطت سنة 1492
وحاليًا إحنا في سنة 2022
أكتر من نص قرن الفرق
مش مهم الفرق قد إيه، وهل النتائج والتحول هنعيشه ولا لأ
المهم إن في النهاية عِرفنا نحوِّل المسلمين من شخصيات كارهه لأي إنسان عايش في الأندلس بعد السقوط،
لإنسان أمنية حياته في الدنيا إنه يروح أسبانيا، ويتصور هناك مع مباني الميزة الأهم والأكبر فيها في كل المباني وكل الملاعب شعار الصليب
—-
الناس مستغربة إن حاليًا فيه ناس متباينة في قضية فلسطين والاحتلال!
طب هتعمل إيه لما كمان 100 سنة ولا 200 سنة، لقيت أحفادك وأولادهم بيشجعوا أندية الاحتلال؟ ولابسين تي شيرتاته؟ ونفسهم يزوروا الاحتلال؟
ومعظم فِرق الاحتلال هتبقى مصبوغة بنجمة اليهود
موضوع مقرف صح؟ ومقزز؟ وأنت في نفسك بتقول مستحيل يحصل؟
لكن هو دا الواقع والله، في أي بلد إسلامية، تحولت للكُفر بأي شريعة محرَّفة أو دين وضْعِي
—-
أندية أسبانيا معظمها الصليب واضح في شعاراتها، وطبعًا واضح في برشلونة وريال مدريد
الموضوع مخدش وقت طويل، أقل من 400 سنة لحد إنشاء كرة القدم ووجودها في أسبانيا

معدتش مشكلة صرف شهوات وطاقات الشباب في لِعب ورفاهية مباحة!
بقت نوع من التطبيع مع الوضع، وإنه عادي يعم ياااااه دي بقالها مئات السنين! أنت لسه فاكر!!
أيوة يسطا يعني لو الموضوع دا كان من عشر سنين، كنت هترفض التشجيع وأي مشجع كان هيبقى خاين ومطبِّع، لكن بعد 100 سنة، ميبقاش اسمه كدا!!
ده مقياسك واعتبارك!!
فعلًا عندك حق ده مقياسك في الحياة كلها، مش في اللعب والهيافة، لأنك بتتعامل مع الدين ومع كلام الله بنفس المنطق بالظبط، بس أنت مش واخد بالك
هبقى أتكلم عن النقطة دي في موضع تاني
___
هل السياسة مش بتتدخل في الكورة؟
مستحيل وألف مستحيل!
مشروع الفِرق الأسبانية، واللي ممكن يكون مازال لحد الآن، هو مشروع سياسي بحت!
والموضوع دا لسه شغّال لحد الآن عادي، واللي ميشوفش من الغربال يبقى أعمى!
وانتقال ميسي لفرنسا، وانتقال كريستيانو من الريال
كلها سياسات، لإما اللاعيبة بيتم التلاعب بيها، لإما موافقين على تسييسهم
___
المهم إن أنا بكره ريال مدريد جدًا، وأي كورة أجنبية بالدرجة الأولى، كانت بلد إسلامية وسقطت
___
يا راجل دا وصل الحال إنهم ينزلوا صورة لاعيبة كورة لابسين سلاسل ومتصورين بالسجاير والخمور للاحتفال!!
أنت بتحتفل بإيه؟
طب المحرمات اللي في الصورة دي مش مكسوف منها على الأقل؟
لا حول ولا قوة إلا بالله
___
في النهاية: طبعًا أتمنى محمد صلاح هو اللي يفوز
الكلام مش كروي نهائي، لكن كُره في فريق أعلى نقطة فيه الصليب ريال مدريد

يصح الدين للمسلم عندما يكون اتباعه للأوامر والنواهي من باب: الاستسلام والتسليم لأمر الله
وليس من باب: المصالح والمفاسد الدنيوية!

الفجر بقى بدري أوي، راجع من البلايستيشن، يدوب بتعشى، لقيت الفجر أذن

من ضمن اللي اتقتلوا صاحبي! مينفعش ادعيله بالرحمة؟
لو كان "مُسلم" ادعيله براحتك مش قضيتي إن الدعاء له يجوز أو لا يجوز، بس متجاهرش بدعوتك، أهم شيء
لازم يكون فيه زجر وتخويف ورهبة للموضوع دا

أنا لو كنت بنت، كنت أول حاجة هدوّر فيها في الراجل، فلوسه، إنه يكون معاه فلوس، أو شغل كويس يقدر يجيب منه فلوس
زي ما أنا حاليًا بشوف إن أهم ميزة بالنسبة ليا في البنت إنها تكون جميلة بشكل أكون قابله
لو كنت بنت كان هيبقى الميزة في الراجل إنه يكون حاله ميسور بشكل أنا قابله

ده غير الدين يعني، ده فلتر تاني تحت فلتر الدين
والدين له مقياس الشرع، لا مقياس نسبي، ولا مقياس عُرفي

كان كذا حد يوصفلي أشخاص، ويقولي: محترم جدًا ومتدين ووو
بعدين آجي أسأل عنه، سواء الشخص شخصيًا اسأله أو اسأل حد عنه، أو أشوف حاله
والله بدون مبالغة بلاقي إن مهمته الأساسية في الحياة إنه بيفتن الناس بأعماله وأقواله، شخصية بعيدة كل البُعد عن "المسلم العادي" فضلًا إنه يكون ملتزم= يفعل الواجبات وينتهي عن المحرمات علنًا، إسلامي علني حتى

فلقيت إن الناس بتقيِّم بمقاسيين نسبية مخرومة بشكل بشع
ويتقال كلمة زي: كفاية إنه بيصلي، أو تتقال من البنت شخصياًً: أنا لابسة كذا ومش فوِّت فرض!

سبحان الله
أنا معرفش ده مَنّ عليَّا ولا مَنَّ على الله
هي الفروض الأساسية، بقت ميزة؟ المفروض أقبل وأرفض عليها؟
يعني مش المفروض إن: ده الطبيعي، دي دائرة أختياراتي، وجواها بقى أبدأ أشوف اختياراتي الشخصية؟
ولا أنا أصلًا ببدأ اختياراتي من المسلمين والكفار والفسَّاق والفجَّار ووو، فلو لقيت واحد بيفعل الفروض، ده كدا خيار كويس؟!

عُمر ما كان إتيان الفروض واجتناب المحرمات، ميزة
لأن دا الأصل
وكمان فروض الإتيان، فروض الأعمال، سهلة نسبيًا، بالنسبة لفروض الترك أو فروض القلب، أو فروض النيّة
فمستحيل يكون إن إنسان بيصلي، أو إنسانة لابسة لبس شرعي، الحاجات دي مميزات في الشخص!
لأن دي أصلًا الحد الأدنى من الاختيار!
فأنت هتدور في الدائرة دي، فالطبيعي إن كل اللي جوا الدائرة، بيعملوا الحاجات دي
فدي مش ميزة ترجَّح كفَّة شخص على التاني

من وجهة نظري: هل فيه بنت ممكن تِقبل براجل مش شغَّال؟ أو ظروفه المادية مش حلوة؟ أو مثلًا تفكَّر فيه؟ أو طالب في الجامعة زي حالاتي مثلًا؟
رأيي: ملهاش لزوم
ليه؟
لأن الموضوع ده ممكن يتوافق عليه، لو فيه شخصيات شباب استثنائية، مش موجود منها، فعادي هوافق إن العيب اللي عنده هو عيب الفلوس، والله أعلم ممكن يتحسن بعد كدا، لكن حتى لو كان عيب دائم، أنا هوافق عليه، لأنه شخصية فريدة من نوعها

هل فيه شخصيات استثنائية أنا قابلتها؟
في الوسط المحيط بيا، في المدرسة والمنصورة وقدي في السن أو في الجامعة أو خلافه
الإجابة: لأ، مفيش
المعظم نُسخ من بعض، مفيش فلتات
فملهاش لزمة القبول بالأدنى، خدي واحد كويس ماديًا، وكله شبه بعضه في بقيت الحاجات

ممكن يكون فيه شخصيات مختلفة نوعًا ما، عن بقيت الناس في بعض النقط، آه ده موجود وفيه ناس من أصحابي كدا، وممكن أكتب أسماؤهم عشان أنا بحب فيهم النقط دي وبحبهم
لكن إنه يكون شخصية فريدة؟ لأ لسه ملقتش
ولا حتى في البنات فيه شخصيات فريدة دينيًا، ممكن فيه شخصيات فريدة في الصفات الشخصية، بس من غير الدين، الموضوع فكسان يعني

فالمغامرة بقبول حد، أو الإعجاب بحد أو خلافه، وهو معندوش المميزات الشخصية اللي تزكِّيه عن بقيت الشباب، دي مش حاجة كويسة
والظن إنه شخصية استثنائية بسبب كلامه على الفيس أو تصرفاته والكلام دا، مش مقياس برده
وأنا شخصية عادية بالمناسبة، في ميزان الإسلام والشرع مش هكون موجود، لكن لو في موازين نسبية، ممكن أبقى موجود، بس إحنا اتفقنا إنها مقاييس ملهاش لزمة ولا وزن

بخلاف المميزات الشخصية،
فالمميزات الدينية غالبًا متقاربة
طب دي حاجة مش كويسة، أعمل ايه؟
للأسف دي القماشة الموجودة، لو مش عاجبك، دوَّري في مجتمع تاني أو في مدينة تانية

فمحدش يقبل بشاب أو بنت إلا وهو عنده نسب وفلوس وجمال، ولو الحد الأدنى من الأشياء دي، بالإضافة للتفضيلات الشخصية

الكلام ده للأسف ملوش علاقة بالحب
لو واحد بيحب واحدة، هيبقى صعب إقناعه بأي حاجة😢

ونفس الكلام ينطبق على التيمات الطلابية، عدم الاختلاط مش ميزة؛ لأن ده الأصل!
والمفروض يكون اختيارك منحصر في التيمات الغير مختلطة

الكلام عن العبادات
زي صلاة الليل، أو صيام الاتنين والخميس أو صيام أي نافلة
بيبقى حلاوته في تجرُّده من الايموشن
هيبة العبادة وتعظيمها في النفوس بتبقى في الكلام في الألفاظ
لما بيزيد عليها ايموشن بيتحول الموضوع لأشبه ما يكون: دعايا، أو تليين للكلام أكنها نصحية
بتفقد العبادة هيبتها في عيني

لما بشوف كلام لشيخ، آية قرآنية أو حديث، مجرَّدة بدون أي ايموشن، الكلام بيبقى له هيبة وتعظيم رهيب
بخلاف لما تشوف واحد كاتب آية وحاطت جمبها قلب!

جمال الكلام وحلاوته ولينه ومعناه والطريقة الأقرب للوصول لقلب القارئ، هو الكلام المقدَّس ذات نفسه، بدون أي مقبِّلات، ولا مجمِّلات له
ده كلام رب البشر، للبشر
(ألا يعلم من خلق!
وهو اللطيف الخبير)

لو بتحط قلب أو وردة، عشان الصيام يبقى شكله شيك، أو قيام الليل يبقى خفيف على قلوب الناس، فأحب أبشرك:
الموضوع مبيبقاش كدا
الموضوع بيبقى أشبه بكلمة لايف كوتش، وبيتم تداولها
بدون تعظيم واضح وصريح لقدر العبادة

وفي النهاية دي نضارتي الشخصية

حتى ألفاظ الحب، وألفاظ التعزية، لما بيتحط ليها ايموشن، بتقلل من قيمتها، وفي التعزية بتخليها تعزية باهتة
"البقاء لله ربنا يرحمه"
"البقاء لله ربنا يرحمه💔" !!
"بحبك وحشتني"
"بحب وحشتني ❤️❤️" !
برده فيه هيبة من غير ايموشن كدا
" صيام الاثنين ❤️"
"صيام الاثنين🌿 يا كرام 🌸"
"صيام الاثنين" ومعاه حديث الابتعاد عن النار للنبي صلى الله عليه وسلم

أنا كنت عايز اجيب مثال لمحتوى ديني بدون ايموشن، ومحتوى بايموشنات كتير، بس للأسف شكل الاسكرين بالايموشن مزعجة جدًا
ولو عايز تجرّب وتحس بعظمة كلام الوحي، سواء قرآن أو سنة، أو أعمال صالحة، اتفرج على بوست لعمِّي
وشوف بعدها أي بوست لأي شخص عامل مهرجان جمب الآية أو الحديث أو النصيحة

وفي النهاية دي نضارتي الشخصية

إِنَّ الَّذِينَ آمَنُوا وَعَمِلُوا الصَّالِحَاتِ
أُولَٰئِكَ هُمْ خَيْرُ الْبَرِيَّةِ
.