عايز أبرَّأ ساحة عدد مش قليل من الرجالة من مصطلح "الدياثة" اللي بيتوصفوا بيه بسبب لبس مراته، والحقيقة إنك قبل ما تشوف مراته في الشارع أو ع الميديا، فهو بيحصل بينهم عشرات الخناقات، عشان يمنعها عن قلة الأدب اللي هي بتعمله، ساعات بينجح وساعات بيفشل، وساعات بتعمل حاجات غصب عنه، أو وهو مش شايفها ومش موجود، وفي الآخر كل واحد وله أسلوب معين بيستخدمه مع نشاز مراته، وكل واحد وله شخصيته، لكن هما رجالة جدًّا، ربنا يعينهم على الابتلاء اللي هما فيه

(فاتفق جمهور العلماء على حرمة هذا النظر إن كان بشهوة، وذهب بعضهم على جوازه إن كان بغير شهوة، وضابط الشهوة أن يجد في نفسه ميلا زائدا في قلبه عن ميله لأخته الجميلة).

عشان الخاطب اللي بيقعد قدام خطيبته بالساعات، فنظره لها حرام من غير خلاف، لأنه لو نظره لها مكنش بيحرك قلبه، أو كانت زي ما يكون قاعد مع أخته هيفسخ الخطوبة، أو ع الأقل مش هيقعد الساعات دي، ربع ساعة وهيمشي

فالمعضلتين اللي غير المنتقبين بيحطوا نفسهم فيها بسبب العُرف الحرام المنتشر، موضوع الجلسة مع الخاطب وموضوع مكياج الفرح

فالجلسة مع الخاطب، حتى لو البنت مش منتقبة، لازم تلبس نقاب قدام الخاطب

وفي يوم الفرح، لو هي مش منتقبة، لازم تغطي وشها بالنقاب عشان تغطي المكياج
زي ما بتغطي رسمة الفستان بالخمار عشان ميبانش تفاصيل جسمها من فوق

والحاجات دي حرام، مفيهاش خلاف
والاستهتار بيها مصيبة، لا تقل عن مصيبة البنات اللي بتقلع الطرحة يوم الفرح! بنفس المنطق بالضبط!

لكن الناس بتتعامل بأهوائها وحسب اللي العُرف يقبله، خلاص بنعمله!
فالعرف بيقبل المكياج والقاعدة بالساعات مع راجل اجنبي للحكاوي والهزار والضحك تحت مسمى "الخاطب" وبيقبل إن البنت تقلع الخمار وتبرز تفاصيل جسمها عشان رسمة الفستان تبان!
وكل ده حرام،
بالإضافة إنه مجاهرة بالحرام،
وفيه تشجيع على استمرار السنة السيئة دي في الدين
وفيه فتنة لبنات المسلمين

يا رب اهدنا لما فيه الخير لنا وللمسلمين

لا عذر لكم أمام الله إن ساعدتم على نشر أو استمرار سنَّة سيئة في الإسلام، ويمكنكم النصيحة، أو عدم التشجيع عليها، بدون أدنى بذل مجهود حقيقي

ليه البنت متنزلش تنويه عام قبل أي مناسبة ليها (فرح/ خطوبة) إن:
يا حبايبي ياريت مفيش بنت تيجي بلبس ضيق أو غير شرعي، ومفيش بنت تيجي وهي حاطة مكياج، وأنا كدة هكون فرحانة

واللي مش عايزه تلبس شرعي وهتيجي، تيجي

واللي هتتكسف تيجي بعد كلامي وهتعتذر وترفض تيجي، مفيش مشكلة مش هزعل منها وعلاقتنا زي ما هي

هو تذكير مني لأهلي وأصحابي

أسلم للبنت ولدينها، ولدين أصحابها، ولدين المسلمين

ونشر سنَّة حسنة بين المسلمين

"قوا أنفسكم (وأهليكم) نارًا"

بلاش أنانية الله يكرمكم
مش معنى أنك لابسة لبس شرعي، إن اللي جاي من أهلك وأصحابك لابسين اللي عايزيه، فبراحتهم! ليه كدا؟
ليه الناس تكون قاعدة في بيوتها في أمان الله، وبسبب دعوتك ليها لفرحك، هتخليها ترتكب كذا حرام مع بعض، هيوصل لكبيرة من الكبائر
ليه ترضي لأهلك وأصحابك بكدا؟
عشان تفرحي؟ وتضمني إنهم هيجوا؟
وهل فرحك بحضورهم أكبر من فرحك بعبادتهم لله؟

يا رب بارك في بنت نبَّهت أصحابها يوم فرحها على لبس اللبس الشرعي وعدم وضع الزينة الحرام، يا رب بارك لها وبارك فيها وفي زوجها وأهلها وولدها

اللهم طيَّره كُل مطار، وانفع به المسلمين

في نص الكوشة بتاعة الخطوبة/ الفرح مكتوب: وجعل بينكم مودة ورحمة
وفي أعلاها مكتوب: إن الله كان عليكم رقيبًا

رقيبًا بأفعالكم في الحفلة، ورقيبًا بأفعالكم في العلاقة بعد الوعد بالزواج، أو بعد العقد

إن الله كان عليكم رقيبًا

بلا (together) بلا بطيخ
وحشة وقديمة، وملهاش معنى، ما كل واحد يكتب اللي يحبه، بدون تقليد عيَّان

(فإن العبد إذا اعترف بذنبه وتاب، تاب الله عليه)

محدش يبعتلي عن البنات المنتقبة اللي بيشهدوا لهم بالاحترام، اللي بتتصور مع متبرجات وبتحضر أفراح وبتلبس فساتين سواريه، ويعارضوا كلامي، ويقولوا أني متشدد

أحب أقولكم إن البنات دي أشد فتنة على المسلمين، من الراقصات والفنانات، وحسابهم شديد بسبب المجاهرة والفتنة

زمان مكنش حد بيجاهر بحرام واحد، ومع ذلك كان بيخاف من النفاق، أو من الرياء أو السمعة
وزمان كان معظم المنافقين مش بيجاهروا بحرام
حالياً الناس غير متعلمة وبتجاهر بحرام كتير وساعات بتجاهر بكبائر، بدون أدنى خوف!
بل بالعكس الناس بتميل للغلط، حتى وهما عارفين إنه غلط، لمجرّد إن فيه حد هما حاسيين أنه محترم!

(ويا قوم مالي أدعوكم إلى النجاة وتدعونني إلى النار )!

يا رب ننجح

(ذلك بأن الله لم يك مغيرًا نعمةً أنعمها على قوم حتى يغيروا ما بأنفسهم)
أخبر الله أنه لم يك مغيرًّا نعمةً أنعم بها على أحد حتى يكون هو الذي يغيّرها بنفسه
فيُغيِّر طاعة الله بمعصيته
ويُغيِّر شكر الله بكُفره
ويُغيِّر أسباب رضاه بأسباب سخطه

فإذا غيَّر، غُيِّر عليه؛ وما ربُّك بظلَّامٍ للعبيد!

(وضرب الله مثلا قرية كانت آمنة مطمئنة يأتيها رزقها رغدًا من كل مكان فكفرت بأنعم الله فأذاقها الله لباس الجوع والخوف بما كانوا يصنعون)

ومن الصور المختلطة برضه، إن الخاطب وخطيبته/ الراجل ومراته، يتصوروا ويتصور جمبهم صاحبة مراته! أو صاحب العريس!
حرام، وعك مقرف الصراحة

بنشوف مشاهد السوريين واللاجئين وهما أصلًا قاعدين في مخيَّمات والشتا والبرد حواليهم من كل ناحية، وزيادة عليه مشاهد خروجهم من بين الأنقاض بعد الزلزال
وتفتح الميديا تلاقي واحد بيصوَّت عشان دكتور جاب له امتحان فيه سؤال صعب، أو جدول المحاضرات فيه سكشنين ورا بعض، وناس قاعد تشتكي القدر للناس على الميديا ! ويقولك العيشة صعبة وإحنا في ابتلاء!
والله بستحقر الأفعال دي، حتى لو مشوفتش مشاهد أصعب منها في الواقع، لأن في الماضي مشاهد أسوأ من كدا بكتير
وإحنا مطالبين بالصبر وبالشكر في الظروف الصعبة أصلًا وأولًا، لكن بنيجي عند لعب العيال ده وتلاقي الصويت مغرّق الميديا من شوية عيال!

يا رب احفظ إخواننا اللاجئين والمكروبين في كل مكان، يا رب آوهم واطعمهم واسكنهم واحفظهم واحفظ عليهم دينهم وثبتهم

(واتقوا يومًا ترجعون فيه إلى الله)
وامسحوا أي محتوى فيه مخالفات شرعية من الميديا؛ مش هتفيد مستقبلًا لا في أمر دنيا ولا دين، فضلًا عن الحرام اللي هتشيله لو حد شافها، فضلًا إن حد يقلدك فيها!
اللي مش بينصحك تشيل الحرام وأنت حي، مستحيل هيجري ورا الحاجات دي لما تموت عشان يمسحها، لو مفكر كدا فأنت موهوم

‏اللهم إن هذا إقبال ليلك وإدبار نهارك وأصوات دعاتك فاغفر لنا

بتشتغل في مكتب/عيادة/محل...، بتقعد فيه 8 ساعات لمدة خمس أيام، وكل يوم يجي زبون أو اتنين أو عشرة، وباقي الوقت فاضية، وبعدين في آخر الشهر تقبض 3000 جنيه، عشان تروح تجيب بيهم سكين كير، أو مرطب شفايف، ومطوِّل للرموش، أو تجيب هدوم بدل الهدوم اللي دابت بسبب قعدتها في الشغل
وتيجي تقول عادي مباح لنا العمل، وتقصَّر في حق أمها وأهلها قبل الجواز، وفي حق جوزها وأولادها بعد الجواز، تحت مسمى الشغل والكارير وحرام يضيع سنين الكلية والمصاريف ع الفاضي! فنضيَّع بقيت العمر على الفاضي معاهم!

مش فاهم حياة أيه دي، وشغل أيه ده، وفين المكسب من الموضوع!
فضلًا عن العبادات اللي بتطير في النص، وتضييع الأوقات

فضلًا إن واحدة تفتح حاجة خاصَّة بيها، يمكن تكسب في شهر ويمكن تخسر

ده بخلاف البنت اللي بتشتغل عشان تجيب فلوس إيجار شقتها، أو أكلها، أو فلوس مساعدة لأهلها ....، ربنا يبارك لها ويحفظها من الفتن ويعينها في شغلها

لكن الشغل لمجرّد إني اسمي شغَّالة وبقبض عشان الجو العام، ده تضييع للعمر على الفاضي

الصحبة الصالحة مش بتعينك على العبادات، وبتشجعك على قراءة القرآن وقيام الليل والصلاة في أول الوقت وبس!

الصحبة الصالحة هي اللي بتمنعك عن الحرام ويكفي الشرط ده عشان تتسمّى صحبة صالحة
لو شافوك بتعمل حاجة حرام هينصحوك؛ كدا الناس دي محترمة

النبي صلى الله عليه وسلم قال في الأوامر: فاتوا منه ما استطعتم
وقال في النواهي: فاجتنبوه

إن حد يشجعك على طاعة معينة ذلك يُحسنه كل أحد، حتى المنافقين والفاسقين
أما إن حد ينهيك عن حاجة حرام، فده صاحب صالح

ضابط الشخص الملتزم: عدم المجاهرة بحرام؛ فعل أو قول أو حضور
وضابط الصحبة الصالحة: عدم التشجيع على الحرام، ولو بالسكوت

الصراحة أنا مش شايف ده مجاهدة ولا حاجة،
اللي في الصورة ده مثال واقعي على التعايش السلمي بين الحرام والحلال!
وده حرام، مسموش مجاهدة
- أنك تكون بتقرأ قرآن، فالطبيعي هتكره المعصية ولو وقت القراءة بس، وهتحب إن محدش يشوفك وأنت بتعمل حاجة حرام، وهتخبي السجاير!

- إن بنت آية أو حديث أو درس أثَّر فيها، فتقوم جاية كاتبه بوست، طبيعي في اللحظة دي لو حاجة صورتها أو البوست الي قبلها كان بوست فيه أغنية أو فيلم، طبيعي هتشيلهم، وبعد ما تأثير الموعظة يخلص، تنزل الحرام تاني وهكذا

- إن شخص ينزل ستوري أغنية، وبعدها ستوري قرآن! ده مش مجاهدة، لو بيجاهد كان طبيعي هيتكسف على الأقل ويمسح ستوري الأغنية، ولما ستوري الآية يخلص، يبقى ينزل تاني

- إن بنت راحة تصلي التراويح بلبس غير شرعي وتقولك مجاهدة! تلبس لبس شرعي، ولما تخلص صلاة ترجع للبسها

- إن راجل يسيب الفرح عشان يروح يصلي وبعدين يرجع على قاعة الفرح تاني! الأولى بعد الصلاة يستنى ويروح الفرح بعد ما يخلص

حاول تفرَّق بين إنك فعلًا بتجاهد وفيه حاجات صعبة عليك! ولا أنت مقضيها على مزاجك وفاكر نفسك بتجاهد!

(إذا لم تعمل للإسلام في يومٍ؛ فاترك لأجله)

اترك لأجل الإسلام والمسلمين وإخوانك وأهلك معصيةً أو المجاهرة بها، اترك لله المجاهرة بذنبك حفاظاً على الإسلام والمسلمين، لا تكن محطة نحسٍ؛ تؤذي المسلمين بمجاهرتك

لا حول ولا قوة إلا بالله

لو فاكر إن المجاهرة بالحرام والمجاهرة بالطاعة في وقت واحد في نفس اللحظة شيء كويس واسمه مجاهدة، فدي مشكلة

مقولتش وقَّف الطاعة، لكن بقول خلي بالك وانتهي عن الحرام ولو وقت فعل الطاعة فقط!!
الخمس دقايق اللي هتعمل فيهم طاعة في مكان، متدخلش معاها حرام في الخمس دقايق دول بس حتَّى

والله العظيم القررات اللي بتتاخد في أوقات الإيمان العالي ليك، هي سبب نجاتك بعد كدا
ما أصل أنت لو ليك خمس دقايق في الشهر إيمانك بقى عالي وجيت تعمل طاعة، ومع الطاعة دي حذفت كذا وكذا وكذا من الحاجات الحرام، لما تيجي تعمل الحاجات الحرام هتاخد وقت عقبال ما توصل للحرام، مش هيكون سهل، وده من أهم أسباب إنك تبطله

مفيش بنت هتيجي فجأة تمسح كل صورها من على الفيس، ولما ترجع وإيمانها يقل، هتنزل كل الصور اللي مسحتها مرة واحدة، مستحيل، لكن لو فضلت سايبه الصور، فرصة أنها ترجع وتنزل تاني أسهل بكتير

أغلب الرجالة في الوقت الحالي لو رمى السجاير بعد ما جابها، صعب أوي يشتري علبة تانية، على الأقل هيستنى يومين، عشان يحلل فلوسها، وهيشرب ولو شحاتة من أصحابه سجارة أو اتنين في اليومين دول بس

التقليل من الحرام، ومن أسباب الوصول للحرام حاجة مهمة جدًّا، مش هتوصلها لو أنت فضلت عامل موازنة وبتعد حسناتك وبتمن على الله بيها !

طب ما تدعيلهم بالهداية؟
والله العظيم بدعيلهم، وبادعي إن أنا بدعيلهم أكتر من نفسي وأكتر ما أنت بتدعيلهم

بتدخل في نوايا الناس ليه؟
والله ما دخلت في نوايا حد، ده تذكير للناس عشان حتَّى لو مش هيقدر يعمل ده وهيفضل مكمل على التعايش السلمي بتاعه، على الأقل يعرف إنه بيعمل حاجة غلط، ويعترف بها، عسى الله أن يتوب عليَّا وعليه وعلى عباده أجمعين