يا رب قنا النار وعذاب النار

كل يوم لما تصحى م النوم، احمد ربنا إن محتواك مش مراتك، وأن محتواكي مش جسمك وعرض زينتك
واحمد ربنا إنك عايش برزق حلال، مش برزق بعرض ضحك مراتك وجسمها

ارحموا الممثلين اللي ماتوا شوية من نشر صورهم، وتذكير الناس بأعمالهم الحرام
مش لازم يطلع فتوى بحُرمة نشر الكوميكس بصور الفسَّاق، لكن كأدب ودين ليك ولرعيتك وللمسلمين، ليه تفكَّرهم بأعمال حرام، وليه تجيب العذاب لناس ميتة في قبرها!
عشان الناس تضحك!
عجيب

مش لازم البنت توصل للمستوى ده، لكن عشان تعرف لو قلت لبنت شيلي الرجالة اللي عندك على الميديا، وقالتلك: ليه؟ أو حتى قالتلك: حاضر، بس ممكن أعرف السبب؟
اعرف إن فيه مشكلة!
لأن الأصل هي اللي تتسأل عن سبب الإضافة، مش أنت اللي تتسأل عن سبب رجوع الأكونت لأول عهده!
ووضع الصور على الميديا، ونشر بوستات كوميكس ممثلين، وغيره كتير
وأكتر حاجة تستغرب منها التعنّت والرفض بحجة (عدم السيطرة!)
ويجوا يقولوا: الجواز مبني على التفاهم والمودة والرحمة! طب فين المودة والرحمة وأنتي مش عايزه تنفذي اللي يريحك جوزك واللي مش هيأثر عليكي بالسلب نهائي!
مؤشر رخم، حتى لو مش حاجة حرام
مش لازم كل حاجة تجيب آخر وتوصلها للحلال والحرام، عشان مش هتقدر تكمل بالأسلوب ده وهتتعب في النص

التعايش السلمي بين الحلال والحرام والمجاهرة المشتركة بهما؛ من أكتر الأشياء المهلكة
تلاقي ستوري أغاني وبعده ستوري قرآن!
تلاقي بنت حاطة صورتها، وبعدها منزلة بوست عن التقوى تقوى الله!
تلاقي بوست عن أغنية، وبعده بوست عن آية أو حديث!
تلاقي بوست حرام صِرف، وبعده بوست ديني صِرف!
تلاقي بوست غيبة، وبعده بوست دعاء بالهداية!

مش بيقدروا يمسحوا الحرام على الميديا، فهل نقدر نحسن الظن بهم ونقول إنهم تابوا عن الفعل والفعل اتمسح من صحيفتهم؟
مع إحسان الظن بهم إن شاء الله إنهم تابوا عن المجاهرة بالحرام المعين ده، واجبك تجاه أخوك إنك تنصحه إنه يشيل الحرام من صفحته، ولو حتى على سبيل إن معدش جاي من ورا الحرام ده تفاعل ولا ضحك ولا شهرة ولا حاجة، من جهة أي حاجة المهم الحرام يتشال

والتعايش السلمي بين الحلال والحرام؛ حرام
وملوش علاقة بـ خلطوا عملًا صالحًا وآخر سيئاً !

(أيها الكادحون إلى الله يجاهدون أنفسهم والشيطان والدنيا وأصحابهم والمجتمع والأعراف؛ آخرُ الكَدْح لقاءُ الله)
.

لو لقيت بوست فيه مخالفة شرعية، وحد محترم ومتدين معجب بيه، كدا هيبقى الشخص المحترم والمتدين ده هو اللي غلطان، لكن الحرام مش هيبقى حلال
وانصح الشخص صاحب البوست، والله معظم الناس اللي بتقع في الغلط على الميديا بنشر حاجات فيها مخالفات، هما بيبقوا مستنيين بس حد يقولهم إنها غلط عشان يمسحوا، المعظم بينزل وحاسس إن فيه حاجة غلط، وبيعتمد على دين الأفاضل من أصحابه إنه ينبه مش أكتر
وعادي مش حاجة عيب أنك تنبه أي حد نشر حاجة فيها مخالفة، حتى لو ده أسلوبه ومنهجه، متكونش عوناً للشيطان عليه

الانتشار الكاسح لصورة الاتنين المخطوبين والبيت في كامل زينتها، وربما فيه تلامس ما بينهما
ده حرام لا يجوز، متحاولش تمرره قدام عينك، غير أما تاخد ردّة فعل، وهي إنك تقدم نصيحة للشخص صاحبك/ صاحبتك على الأقل على الخاص
والله ما فيه حاجة هتتصلح أو هيقل انتشارها غير بالنصيحة
وأنت محدش هينصحك لو وقعت في حاجة غلط غير اللي شايف منك حرصك على دينك ودين الناس، غير كدا هيكنسلك زي ما كنسل غيرك، وزي ما أنت كنسلت الناس

‏منصّاتك الالكترونية، هي منابر لنشر الإسلام، ونشر كلام الله ونشر فضائل النبي صلى الله عليه وسلم والصحابة رضي الله عنهم
‏ولو بآيات، أو بأحاديث، أو مواقف من السيرة ومواقف للصحابة والتابعين
‏مش لازم كلام منمّق وعلامات إملائية

نحن مسؤولون في إظهار نجوم الصحابة ونجوم السلف الصالح، مسؤول أمام الله -سبحانه وتعالى- عندك منبر، عندك منابر اليوم موجودة مجانية اشتغل على إظهار نجوم الصحابة
وإظهار فضائل وأخلاق النبي صلى الله عليه وسلم

أمَّا اللي بيستغلوا المنبر في نشر مقاطع أفلام وأغاني، واستعراض صورهم وجمال أجسامهم وزينتهم وميلانهم! محرومون ومغبونون
ربنا يهديهم، واقعين في مشكلة كبيرة

يا رب ارزقنا اتباع الحق مهما كانت مرارتُه
وارزقنا موالاة عبادك المصلحين الناصحين مهما كانت شدة نصيحتهم
يا رب استجب

لو فعلًا مش عايز تغش في الامتحانات، بس مقاومتك ضعيفة في اللجنة، ادعي ربنا بفقد أسباب الغش في الامتحانات في اللجنة
وربنا يعينك لو صادق في دعواك

أمَّا تبييت النيَّة على الغش في الامتحان، فدي مصيبة
.

يا رب اهدنا واهدِ بنا

محدش بيحب حد، هيشوفه على حرام أو بيعمل حرام ويسكت عنه، نهائي مش بتحصل
لكن اللي بيحصل إنه بيبدأ يشوف الفعل مش حرام، ويتقوَّى على الرأي ده بأفعال ناس تانية بتعمل نفس الفعل، لحد ما يتأكد عنده ويبقى مش حرام، فيشوف حبيبه بيعمل حاجة مش حرام، وبالتاني مش بينصحه

لكن إن تفضل مقتنع بفعل أنه حرام وأنت مش بتعمله، وشايف "حبيبك" بيعمله وسايبه! ده مش بيحصل

فالمشكلة مش بتبقى في عدم النصيحة، المشكلة في البلوى اللي خلتك متنصحش
سواء الأنانية والخوف من ردة الفعل، مع أصحابك
أو تحويل الحرام لحلال، مع حبيبك

أمرنا الله بأمرٍ بدأ فيه بنفسه سبحانه ثم بملائكته فقال:

"إن الله وملائكته يصلون على النبي يا أيها الذين آمنوا صلوا عليه وسلموا تسليمًا"

أنا لا أرضى أبداً بإن بنت أنا مسؤول عنها تحط صورتها على الميديا، ولا حد ضافر منها، ولا صور هدومها
ومحدش يسألني عن السبب، لأن الطبيعي والبديهي اللي يتسأل عن السبب البنت، الأكونت فاضي، أنتي حطيتي صورتك، ليه؟ أيه السبب؟ وعلى حسب سببها يكون الإجابة، لكن مهما كان السبب أنا كإسلام مقبلش نهائي

واللي مقبلوش على المسؤول منهم، مقبلوش على أي بنت من البنات
فمهما كان الشخص اللي هياخد برأيي في صورة معينة، حتى لو مش ظاهر من بشرة البنت شيء، حتى عينيها، أنا هقوله رأيي أنها متنزلش على الميديا، قولاً واحداً
وأنا مش بتّبع طريقة: أحسن من مفيش،
ما إحنا لو مشينا على طريقة أحسن من مفيش على الميديا وواقع افتراضي كحيان، أمال هنعمل أيه على أرض الواقع! فضلاً عن المشاكل والأزمات والحالات النفسية السيئة وخلافه، إحنا كدا هنوصل للقاع

خسارة الحب في الفانية
يارب راضينا في التانية

السبب الوحيد اللي يخليني أتمسك بحب واحدة معيَّنة وأتجوزها، إنها تكون معايا في الجنَّة
والله السبب ده أقوى من سبب بقائي معاها في الدنيا، لو كان على الدنيا وبس، وفي الآخرة زوجات تانية، مكنتش هبقى متمسك بواحدة معيَّنة، لكن زوجتك في الآخرة جنّة جوا الجنّة

يا رب ارزقنا الجنّة

احذر أن تكون فتنة لغيرك

يابختك لو عِشت مسلم تأكل وتشرب وتخرج وتتكاثر، بدون ما تكون سبب في فتنة مسلم في دينه
والفتنة في الغالب تكون عن طريق المجاهرة بالحرام

مش محتاج تكون بتعرف تكتب، ولا بتعرف تجيب مسائل مغمورة وتعرضها، ولا يكون عندك متابعين ولا كاريزما، عشان تبلَّغ عن دين الله، وعشان تحقق أكبر استفادة من نِعمة المنابر الالكترونية، النعمة اللي هتتسأل عنها يوم القيامة، منبر صوته أكبر وأوسع وأكثر تأثير من منبر المسجد

يكفي تكتب آية من آيات الله، أو حديث من أحاديث النبي صلى الله عليه وسلم

أحسن من ملايين التويتات والبوستات اللي ممكن تشوفها في أي موقع من مواقع التواصل، وكلام كتير لا يُغني عن كلام الله شيء

وقال النبي صلى الله عليه وسلم: أفضل الكلام بعد القرآن أربع وهي من القرآن لا يضرك بأيهن بدأت: سبحان الله، والحمد لله، ولا إله إلا الله، والله أكبر

شريحة كبيرة من الرجالة مش "ديوثيين" ولا حاجة، ولا يرضوا الفاحشة والسوء في أهل بيتهم، ولو راجل شاف بنته قاعدة في الكلية مع شباب معاها في الدفعة بتهزر وبتضحك، هيزعقلها ويضربها، حتى لو لابسة ضيق وهو عارف وسايبها تنزل كدا

الرجالة اللي بيعملوا أفراح وبيسيبوا أهل بيتهم ومحارهم بالفساتين الضيقة والرقص، برضه غالبًا مش ديوثيين، ولو واحد منهم ماشي في الشارع وحد قاله: مراته لبسها ضيق ووسطها أو صدرها أو رجلها باينة من اللبس واللبس ضيق جدًّا، هيتضايق وهيزعقلها

الفكرة إن هما في الغالب مش عندهم معلومة الحلال والحرام، وطبعًا البركة في إخواننا "المحترمين" "الملتزمين" اللي تلاقيهم حاضرين صف أول في الأفراح، وحتى جزء منهم في أفراحهم الشخصية بيسيب الدنيا بزرميط مراته وقرايبه وكله

فبيجي الراجل العادي بيشوف المشاهد دي، فبترسَّخ في ذهنه، إن ده "عادي" في الأفراح وفي المناسبات، لكن مش بالضرورة إنه ديوث وبيوافق يجيب الشتيمة والمعاكسات والضرر لأهل بيته

لأن بموقف بسيط، لو هيَّجت رجولته، أو دينه، أو حتى أعراف مجتمعه، هيكتشف غلطه، ويأدبهم في البيت

لكن الفكرة إن الناس مش بتكتفي بالسكوت وخلاص، ياريتهم يسكتوا؛ بلا فعل أو قول،
لكن الأدهى والأمر: إنهم بيشاركوا في الحرام وفي حضور ومشاهدة الحرام، فبيؤصِّل عند الناس العادية إنه بقى فعل عادي!

فالأفضل ليك النصيحة، حتى لو صاحبك أنت شايفه من أفجر الناس، والله أنت عليك النصيحة، والله متكفِّل بهدايته، ومتكفِّل بمنعه عن الحرام، أو تيسير الحرام له، الجزء ده مش ليك
ولو بتيجي عند الحق وأخرس مش بتعرف تنطق، فخليك قاعد في بيتك بدون أدنى مشاركة في الحرام، والله ولو بـ لايك، ياريت متشاركش، وكُف عن الناس أذاك، ومعاونتهم على الحرام، ومتقارنش نفسك بيهم
لأن:
لا يستوى يوم القيامة عالمًا بالإسلام وجاهِلًا به!

وأنت بتحِس بتُقل النصيحة لما حد بينصحك، وبتبقى مضايق من النصيحة، ومش حابب تبان غلطان وبتعمل حاجة حرام حتى لو قدام نفسك
افتكر إن الناصح كمان بيبقى عنده تُقل في إعطاء النصيحة، وبينتابه شعور من القلق والتوتر والمسؤولية، مش بيبقى رايح ينصح وصدره مُنشرح ومبسوط، خصوصًا وإن بقى فيه جُمل محفوظة للرد على أي ناصح، وفيه ناس بتقل أدبها، وغيره

فالموضوع زي ما هو مش بسيط ليك، فهو مش بسيط للشخص الناصح؛ وإلا كانت كُل الناس نصحت
الفكرة إن إحنا نساعد بعض
وافتكر إن ردّك فعلك السيئة للشخص الناصح، هيترتب عليه صد كام شخص عن النصيحة، والشخص الناصح دات نفسه هيفكر كذا مرة قبل ما ينصح حد تاني
فردّة فعلك متعدية الضرر على المسلمين من أصحابك وإخوانك

محبش خالص إن مراتي أو بنتي تحط صورة البروفايل بتاعها صورة لشيخ! فضلاً عن لاعيب كورة أو شخصية عامة!
بلاش بطيخ