اللبس الشرعي لا يثبت ديانة، لكن اللبس غير الشرعي يُثبت قلة ديانة

النقاب أو اللبس الواسع، مع زعبوط طويل على الدماغ، أو لبس أوڤر سايز ملفت بشكل مبالغ فيه، أو شنطة غريبة، أو نضارة كبيرة ملفتة، أو اللبس ذات نفسه مُلفت وزينة

هيفيد بأية النقاب أو اللبس الواسع مع اللبس الموضة والشيك والأوڤر والكمام اللي نازلة على الكوع

والله ما هيفيدك بحاجة لبس واسع مع قلة دين
متتغرش بلبس شرعي ممزوج بتاتش قلة الدين من مظاهر جمال ومباهاه ليست من "عبادة الحجاب" في شيء

مش هتكتشف خطورة اللي بتعمله وبتوافق عليه وبتمرّره من غير نصيحة ولا تاخد موقف، غير لما تلاقي نفسك في قاعة الفرح وبتسقف مع أصحابك على رقص مراتك
ومش هتكتشفي خطورة اللي بتعمليه وبتوافقي عليه وبتمرّريه من غير نصيحة ولا تذكير، غير لما تلاقي نفسك بتحاولي توفّقي بين إن يبقى اسمك لابسة خمار، وبين إنه يكون باين رسمة الفستان على صدرك ووسطك في الفرح، ويسبقها البحث عن "ثغرات" في الدين عشان تحلّي لنفسك الزينة والأغاني في الفرح

النقطة الفاصلة وهي هتحدد المسار اللي هتكمل عليه حياتك هو نقطة الجواز

قبلها بتكون بتتحرّك على استحياء وبتتحجج بفلان المحترم وبفلانة المنتقبة، وبتتحجج بخلو البيئة من الصحبة الصالحة والدروس، وبتحاول تقلل من نشرك للحرام تجنبًا لصداع اتنين أو تلاتة من صحابك
بعد الفرح الموضوع هيكون على المشاع

في ظرف بضع سنين من ثانوي إلى خامسة كلية اتجوز من حوليَّا عشرات الشباب والبنات، والتحويل المجمل من لبس شرعي في الثانوي وتحريم الهزار مع المستر والاغاني والاختلاط وخلافه، لتحليل الرقص في الفرح في خامسة جامعة والمجاهرة بها، والأسوأ إنهم ينزلوا كلامهم القديم ويضحكوا عليه، كإنهم بيقولوا: ياااه أنا كنت أهبل أوي كنت بحرّم اللي ربنا حرّمه، وكنت متشدد ومنغلق وضيّق… وأي لفظ ملوش لازمة يتحط جمب الكلام!

لا يستوى يوم القيامة عالمًا بالإسلام وجاهِلًا به!

عشان تحس بمشكلتك في تمرير الحرام على نفسك، واستساغته مع الوقت وتأثيره عليك في تصرفاتك وأفعالك؛ هتلاقي إن صاحبك لو نزّل مقطع من فيلم أو أغنية مش هتكلمه، في حين لو نزّل صور ناس عريانة، ساعتها ممكن تكلمه
اسأل نفسك إيه الفرق؟ بمقياسك الشخصي وبمبادئك الشخصية، أنت عارف إن الاتنين حرام ومجاهرة بحرام، ليه اتكلمت في واحدة ومتكلمتش في التانية؟

لو صاحبتك نزلت صورة ليها لابسة لبس غير شرعي أو متزينة أو مبيّنة جزء من إيديها الساعد، أو رجلها فوق الكوتش، أو جزء من شعرها اللي قدام، مش هتنطقي بحرف
في حين إنها لو قلعت الحجاب، أو لبست مايوه، ساعتها ممكن تكلميها
اسألي نفسك إيه الفرق؟ بمقياسك الشخصي وبمبادئك الشخصية، أنتي عارفه إن الاتنين حرام ومجاهرة بحرام، ليه اتكلمتي في واحدة ومتكلمتيش في التانية؟

والله هو/ هي معملش التانية غير لما أنت منصحتوش وهو بيعمل الأولى!

مش مهم هو مش هينزل الحرام ليه! مش مهم عندي سبب عدم نشره للحرام، المهم إنه مينشروش

حتى لو سبب عدم نشره هو الصداع اللي أنت وأصحابك بتعملوه له، عادي كويس، المهم أنه مش هينشر حاجة حرام وخلاص
حقنًا لدين المسلمين، وكفاً عن المجاهرة بالحرام

مهم برده الناس تاخد في اعتبارها نفسية الشخص المقدّم للنصيحة، وموقفه وحاله!

ليه دايماً فيه اهتمام بحالة الشخص المنصوح، والشخص المقدم للنصيحة في داهية عادي!
فيه ساعات كتير الشخص اللي بيقدم النصيحة هو بيكون عايز يتخانق مع الشخص التاني، وبيحاول يحولها أقرب للنصيحة ويتمالك نفسه ويمسك أعصابه!

جزء كبير من اللي بيقدموا النصيحة لأنهم بيكونوا مضايقيين، يعني أنا المفروض حصلي أذي حالي من شخص معين. والمفروض بدل ما أتخانق معاه، انصحه وأعامله بطريقة كويسة وهو آذيني ومضايقيني!
موضوع صعب، مش بالبساطة اللي الناس متخيلاها

كمثال: لو كنت بصلي وفيه اتنين بيتكلموا جمبي بصوت عالي، فسواء أنا طلعت م الصلاة أو خلصت صلاة وروحت أقولهم مينفعش الكلام ده، في الحالتين هكون مضايق جداً ومتعصب، فبدل ما أقلبها خناقة، بحاول أقلبها نصيحة بس مش هقدر أتخلّى عن الغضب اللي حاصلي وأنهم خلوني معرفش أصلي!
ليه الناس تسيب الجزء ده وتمسك في جزء: كلامك معاهم كان وحش أوي مينفعش الشكل ده !
في حين إني لو اتخانقت معاهم، محدش كان هيتكلم !
هي الحساسية في "مصطلح النصيحة"

لو واحد شاف مراته بتضحك مع بيّاع، أو خرجت وهي متزينة، وعايز يقولها مينفعش الكلام ده ومعدتيش تعمليه تاني، ما طبيعي هو بيقول الكلام وهو مضايق جداً، فلو الكلام كان فيه شِدة فده الطبيعي!
لكن إزاي! أنت كدا اسمك راجل سادي ومش فاهم في الدين وجاهل وعصبي ومتشدد ودي ولا نصيحة ولا حاجة أنت كدا بتنفّر الناس م الدين!
وهلُمَّ جرًّا

إنَّهم لا يُنجِّيكم إلا الصدق، وأولى الصدق صدقك مع نفسك

ربنا يبارك ويحفظ بنت خرجت للعمل للإنفاق على أبوها وأمها
وربنا يبارك في بنت ويحفظها خرجت للعمل للإنفاق على أولادها
وربنا يبارك في بنت ويحفظها خرجت للعمل للإنفاق على نفسها

أما البنت اللي أهلها عندهم ما يكفيهم، وهي عندها ما يكفيها وأولادها، وبتنزل تشتغل وتحتك مع الرجال، لأجل تطويل الرموش وتنعيم الرجل والركبة والأكل في المطاعم والسفر بدون محرم لغير الحاجة، ومع ده بيتم التقصير في اللبس الشرعي بحجَّة الخروج الكثير من البيت! فربنا يهديهم ويقعدوا في بيتهم

من أرجى الأعمال اللي ممكن البنت تعملها، وتتوسَّل بيها إلى الله في كروباتها، إنها تمسح جميع صورها من على الميديا + تلبس لبس شرعي
وتكف أذاها عن بنات المسلمين وعن شباب المسلمين، وعن انتشار الحرام في المسلمين!
وإن شاء الله هو عمل خالص لله، ليس فيه رياء
في قصة أصحاب الغار، بدأت العفَّة والمنعة من البنت، وهي في حالة كرب (اتقِ الله ولا تفض الخاتم إلا بحقه!) فعفَّت وأعفَّت

إن الله سبحانه وتعالى أمر نبيه صلى الله عليه وسلم أن يأمر نساؤه وبناته ونساء الؤمنين بالاحتجاب أمام الأجانب!
قال ربنا:
(يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورًا رحيمًا)

(والله يعلم ما تصنعون)

سؤال واضح وصريح للجنة الكنترول:
هل الغش بيأثر على الطلبة زمايلي؟
آه بيأثر، وعلى حسب مستوى الطالب والحل بتاعه، على حسب نسبة تأثره من الغش!

عشان يبقى أكرملك تشيل المادة ولا تغش، لأنه مبقاش حرام وفقط، ده دخل فيه حقوق عباد كمان
ولو تعرف تجيب الناس اللي تأثرت بقى وتستسمحهم هيبقى مستحيل، وبالذات الطلبة اللي درجاتها تعبانة، الغش بيمسح بيهم الأرض

يا رب ننجح

الميديا من أكبر الأسباب على تبرج البنات
ويليها تبرج "المصليات" من النساء، أكبر فتنة على بنات المسلمين من النساء الفاسقات

يا رب قنا النار وعذاب النار

كل يوم لما تصحى م النوم، احمد ربنا إن محتواك مش مراتك، وأن محتواكي مش جسمك وعرض زينتك
واحمد ربنا إنك عايش برزق حلال، مش برزق بعرض ضحك مراتك وجسمها

ارحموا الممثلين اللي ماتوا شوية من نشر صورهم، وتذكير الناس بأعمالهم الحرام
مش لازم يطلع فتوى بحُرمة نشر الكوميكس بصور الفسَّاق، لكن كأدب ودين ليك ولرعيتك وللمسلمين، ليه تفكَّرهم بأعمال حرام، وليه تجيب العذاب لناس ميتة في قبرها!
عشان الناس تضحك!
عجيب

مش لازم البنت توصل للمستوى ده، لكن عشان تعرف لو قلت لبنت شيلي الرجالة اللي عندك على الميديا، وقالتلك: ليه؟ أو حتى قالتلك: حاضر، بس ممكن أعرف السبب؟
اعرف إن فيه مشكلة!
لأن الأصل هي اللي تتسأل عن سبب الإضافة، مش أنت اللي تتسأل عن سبب رجوع الأكونت لأول عهده!
ووضع الصور على الميديا، ونشر بوستات كوميكس ممثلين، وغيره كتير
وأكتر حاجة تستغرب منها التعنّت والرفض بحجة (عدم السيطرة!)
ويجوا يقولوا: الجواز مبني على التفاهم والمودة والرحمة! طب فين المودة والرحمة وأنتي مش عايزه تنفذي اللي يريحك جوزك واللي مش هيأثر عليكي بالسلب نهائي!
مؤشر رخم، حتى لو مش حاجة حرام
مش لازم كل حاجة تجيب آخر وتوصلها للحلال والحرام، عشان مش هتقدر تكمل بالأسلوب ده وهتتعب في النص

التعايش السلمي بين الحلال والحرام والمجاهرة المشتركة بهما؛ من أكتر الأشياء المهلكة
تلاقي ستوري أغاني وبعده ستوري قرآن!
تلاقي بنت حاطة صورتها، وبعدها منزلة بوست عن التقوى تقوى الله!
تلاقي بوست عن أغنية، وبعده بوست عن آية أو حديث!
تلاقي بوست حرام صِرف، وبعده بوست ديني صِرف!
تلاقي بوست غيبة، وبعده بوست دعاء بالهداية!

مش بيقدروا يمسحوا الحرام على الميديا، فهل نقدر نحسن الظن بهم ونقول إنهم تابوا عن الفعل والفعل اتمسح من صحيفتهم؟
مع إحسان الظن بهم إن شاء الله إنهم تابوا عن المجاهرة بالحرام المعين ده، واجبك تجاه أخوك إنك تنصحه إنه يشيل الحرام من صفحته، ولو حتى على سبيل إن معدش جاي من ورا الحرام ده تفاعل ولا ضحك ولا شهرة ولا حاجة، من جهة أي حاجة المهم الحرام يتشال

والتعايش السلمي بين الحلال والحرام؛ حرام
وملوش علاقة بـ خلطوا عملًا صالحًا وآخر سيئاً !

(أيها الكادحون إلى الله يجاهدون أنفسهم والشيطان والدنيا وأصحابهم والمجتمع والأعراف؛ آخرُ الكَدْح لقاءُ الله)
.

لو لقيت بوست فيه مخالفة شرعية، وحد محترم ومتدين معجب بيه، كدا هيبقى الشخص المحترم والمتدين ده هو اللي غلطان، لكن الحرام مش هيبقى حلال
وانصح الشخص صاحب البوست، والله معظم الناس اللي بتقع في الغلط على الميديا بنشر حاجات فيها مخالفات، هما بيبقوا مستنيين بس حد يقولهم إنها غلط عشان يمسحوا، المعظم بينزل وحاسس إن فيه حاجة غلط، وبيعتمد على دين الأفاضل من أصحابه إنه ينبه مش أكتر
وعادي مش حاجة عيب أنك تنبه أي حد نشر حاجة فيها مخالفة، حتى لو ده أسلوبه ومنهجه، متكونش عوناً للشيطان عليه

الانتشار الكاسح لصورة الاتنين المخطوبين والبيت في كامل زينتها، وربما فيه تلامس ما بينهما
ده حرام لا يجوز، متحاولش تمرره قدام عينك، غير أما تاخد ردّة فعل، وهي إنك تقدم نصيحة للشخص صاحبك/ صاحبتك على الأقل على الخاص
والله ما فيه حاجة هتتصلح أو هيقل انتشارها غير بالنصيحة
وأنت محدش هينصحك لو وقعت في حاجة غلط غير اللي شايف منك حرصك على دينك ودين الناس، غير كدا هيكنسلك زي ما كنسل غيرك، وزي ما أنت كنسلت الناس