من مشاكل دور الديزاين في توصيف الآيات القرآنية على أشكال بيانية وسلالم وكلمة ظاهرة وكلمة مخفية والشغل العيّان ده، إن الناس أول ما بتشوف الآية (الديزاين) بتقول: واااو جميلة، عشان "الديزاين" حلو، مش عشان الآية حلوة، أو خدت بالها من معنى خفي!
وبقيت بتحس غصب عنك إن لو حد كتب: الحمد لله، وبس، وواحد تاني كتب الحمد لله وجمبها قلوب كتير، وواحد كتب الحمد لله بصيغة من صيغ السنَّة، هيبقى بالنسبة لك اللي حاطت جمبها قلوب هو أكتر واحد فرحان فيهم أو أكتر واحد بيحمد ربنا،
وغيرها

كده كده مش بحب الحاجات دي خالص تتحط جمب كلام مقدَّس، حتى لو مش بتعمل حاجة

تقريبًا مفيش بنت هتوافق تصور شخص مع أزازة خمرة مقفولة، حتى لو لمجرد إن شكل الإزازة عاجبه
ظنًّا منها إنه حرام تصور شخص مع إزازة خمرة
لكن عادي جدًّا تلاقيها ماسكة الموبايل بتصور صاحبتها اللي لابسة لبس حرام! أو متزينة بزينة حرام!
فضلًا عن أنها تتصور معاها!

ولو فعلًا فيه بنت في مخيلتها إن هي هترفض رفض تام تصور صاحبتها مع الخمرة، لكن تصور صاحبتها وهي مش لابسة لبس شرعي أو متزينة، عادي!
تخاف على نفسها لأن ممكن يكون سبب رفضها لصورة الخمرة هو سبب مجتمعي وليس سبب ديني
وعلى كدا أي موضوع بالنسبة للبنت حرام قطعي، مع انتشاره هتعمله بمنتهى السهولة، بل وكمان هتبرهن على حِلُّه

أنا قلت قبل كدا إن الشباب بينها وبين بعضها لو واحد جه اتصور مع واحد لابس سلسلة أو ماسك سيجارة أو أي حاجة غلط عاملها، بيقوله مش هتصور معاك غير لما تشيل الحاجات دي، وعادي جدًّا
ده كمان بخلاف اللي لو واحد جه يصور صاحبه ويسأله: هتنزل الصورة دي عليها أغنية في استوري ولا لأ!

وعلى الجانب الآخر في عالم البنات الموازي وتحت شعار عشان متتكسفش أو محرجهاش وجبر الخواطر البنت بتصور صاحبتها وهي واقعة في حرام من لبس أو زينة!

لو كان حد متخيل إن الكلام اللي بقوله أفورة، فهو للأسف موهوم
عامل زي اللي بيشوف الناس كلها مش بتذاكر وبيتفاجئ ساعة النتيجة كله ناجح ما عدا هو
ففعلًا فيه عدد كبير من الناس بيعزلوا الهبل ده، وفيه أكتر منهم أشد من كدا، وأكثر استمساكًا بعدم المشاركة في الحرام، أو إعانة صاحبه على فعل الحرام
أما موضوع جبر الخواطر على حساب الدين ده، فأنت الغلبان الوحيد اللي واقع فيه!

ديزاين الخطوبة اللي بيبقى الاسمين متداخلين في بعض ده، واللي في أوقات كتير بتبقى مش عارف تقرأ الاسمين اللي مكتوبين، غير لو أنت كنت عارف الاسم قبلها، ديزاين رخم وتعبان، معرفش ليه في اتجاه سائد له، مع إن البساطة والوضوح في الحاجات دي أحلى وأشيك بكتير

مقياس حبك للشخص إنك بتزعل لما بتشوفه منزِّل حاجة غلط أو بيعمل حاجة غلط، وبتتضايق لو مش عارف توصله المعلومة
لكن موضوع أنك تسيبه يغلط براحته عشان العلاقة متتوترش، ده مصلحة صحوبية ملهاش علاقة بالحب؛ والله لا حب دنيوي ولا حب ديني

ليه دايمًا الناس بتحكي وتنزِّل مشاكلها في الشغل؟
مش بيحصل أي حاجة كويسة خالص؟
في أي يوم من أيام الشغل؟
أنك مكمِّل في الشغل وفيه حاجة بتشغلك يوميًا عن الفراغ، وحاجة مصدر رزق ليك ده مش حاجة كويسة؟
طب يوم القبض ده مش يوم كويس ويوم نعمة عليك؟
ليه دايمًا تصدير إن الشغل كله مشاكل! وأنت بسبب كونك سوبر مان قادر تتحدَّى كل المشاكل دي بدون أي استفاده!
ده حتى المرتب اللي أنت بتقبضه بتزود عليه عشان تعرف تروَّح!
أمال بتشتغل ليه؟ بتتصدق عليهم!

خلي بالك عشان النعمة ممكن تروح منك

اللهم إنا نسألك لذَّة النظر إلى وجهك الأكرم في فردوسك الأعلى خالدين في رضوانك الأكبر أبدًا

طريقة الكلام في خطبة الجمعة غير طريقة الكلام في الدرس العادي، غير طريقة الكلام كتابةً في كتاب، غير طريقة الكتابة على الفيس، غير طريقة الكلام بشكل شخصي
فمش كل مقولة لشيخ أو عالم نقدر نحطها بكل سهولة على الميديا، عشان ساعات بتقل قيمتها، أو بيُتَهم الشيخ بقلّة فقهه

أيه المشكلة لو واحد صاحبك نزّل ستوري محتواه حرام، أو نزّل بوست محتواه حرام، إنك تبعتله رسالة إن الكلام ده حرام والأفضل تشيله؟
أيه المشكلة تعمل كدا؟
بدون زعل ولا دخول في نقاشات فقهية ولا مشاكل وخناقات
أنت هتبعت الرسالة ومش لازم تستنى رد، ولو كان رد مش كويس وده النادر، عادي ضريبة سهلة

من أكبر مشاكل الاستوري اللي محتواه حرام صور بنات مش لابسة لبس شرعي أو أغاني أو مقاطع من فيلم أو غيبة أو شتيمة أو كُفران مستمر للنعم أو شكوى مستمرة من الأقدار وخلافه..
إنها بتُنشئ حالة من التعايش مع الحرام ده، أصل: عادي ما كل الناس بتكتب كدا/ ما كل الناس بتنزل الحاجات دي/ ما كل الناس بتعمل الحرام ده، فمش مشكلة!
والسبب إن حالياً فيه حرام منتشر وفيه حرام خفي، إن الحرام الخفي لو حد فعله بشكل علني الناس هتنكر عليه، ده السبب الوحيد،

عشان كدا مع الوقت الحرام العلني هيبقى "عادي" والحرام الخفي هيبقى علني والمشاكل هتكتر
ففي الوقت ده حاول ميبقاش اسمك من الناس الراضية بالحرام وساكته، فضلًا أنك تكون مساهم في انتشاره بالمساهمة فيه وتقول: كل الناس بتغلط وكل الناس بتعمل كدا!

مش هيكون عندك وقت تشيل صورتك أنت وخطيبتك أو أنت وأختك أو أنت ومراتك، أو صورتك أنتي من على الفيس لما تموتي
لأن الموت هيجي بشكل مفاجئ
ومحدش هيبقى همّه عليك أنه يمسحها بعد ما تموت، لأنه لو قلبه عليك كدا كان زمانه نصحك تشيلها أول ما نزلتها!
وكذا حد مات بشكل مفاجئ حوالينا ولسه لحد دلوقتي صفحته موجوده وعليها صوره هو وخطيبته!

الحرام اللي أنت نزلته والناس شافته وأشبعت شهوتك من نزوله وثناء الناس عليه، خلاص عّى وبقى من الماضي، ما تمسحه، سايبه ليه؟

هتتفاجئ يوم القيامة لما تلاقي إن الميديا في حُكم منبر عام قدام مئات الناس وأنت بتتكلم فيهم!
تخيل تكون واقف على منبر وقدامك مئات م الناس بحسب متابعينك وأصدقاءك، وأنت قاعد بتغني ليهم، أو بتشتم، أو أنتي عارضه صورك ليهم، أو أنت ماسك صورة كوميك لشوية ممثلين عشان تضحّك الناس وخلافه، هيكون رأيك أيه في الموضوع؟
إحساس صعب
أنت مش قادر على حساب نفسك، عشان تبقى مسؤول وسبب في وقوع مئات من الناس في حاجة حرام!

امسح القديم واعزم على أنك متنزلش حاجة حرام تاني، وبيّن للناس أنك معدتش هتنزل عشان ده حرام، عشان يوم ما تقع، تلاقي حد يسندك
ما دام الكل دلوقتي خايف يقولك حاجة وأنت تكسفه!

قال الله تعالى:
إلا الذين تابوا وأصلحوا وبينوا فأولئك أتوب عليهم وأنا التواب الرحيم
.

ارتباط وثيق جدًّا بين خلع الحجاب بسبب مشاكل في التنفس، وبين لبس ملابس ضيقة ووضع المكياج ونزول الصور على الميديا بعد خلع النقاب!
ولا حول ولا قوة إلا بالله

البنت اللي نفسها تلبس نقاب، بس أهلها مش موافقين، ليه مش بتلبس لبس النقاب بدون ما تغطي وشها؟
ولا هو لازم النقاب لإما لبس ع الموضة وضيَّق؟

نفس مجتمعك وبيئتك اللي رافضة الفائدة والربا بشكل قاطع، وبتستغرب إزاي فيه ناس توافق على الحرام دا!! عالم غريبة بجد ! وهكذا

ففيه مجتمع تاني برده شايف إن إزاي بنت تكون شايفه وعارفه الوعيد على اللبس غير الشرعي ولسه بتلبسه! ولسه بتتصور مع اللي لابساه أو بتصورها !

ومجتمع تالت شايف حُرمة الأغاني وإزاي حد يسمع أغاني ويقبل على نفسه ينزل موسيقى في ستوري وحد يشوفها

ومجتمع رابع شايف حُرمة الغش في الامتحانات، وإن إزاي فيه ناس بتغش وبتكتب أساميها في الغياب بسرقة واضحة وصريحة

وكذلك فيه مجتمعات شايفه التبرج يجوز، وشايفه الربا يجوز وعندهم أدلتهم وقال الله وكل حاجة

فالفكرة إن هي كلها أحكام دينية، ومش هيأثر استغرابك من الحكم في شيء، ولا هيأثر بيئتك ومجتمعك مجمعين على الحرام ده ولا رافضينه، مفيش حاجة هتغير الحكم الشرعي، وهتتحاسب أنت لواحدك على قد معرفتك بالدين وبالحلال والحرام وهتتحاسب على مجاهرتك بالحرام

فمستغربش لو لقيت إن بيئتك مش هتُغني عنك شيء، ولا هتغيَّر الحكم التشريعي
كلهم غلطانين ولا كرامة

أيه اللي يخلي حد ينزل صورة واحدة ماتت في عيد ميلادها !
حتى لو ست كبيرة، فضلًا إن المعظم بينزل صور بنات شابَّة ماتت، تنزل صورتها ليه!

حتى من باب الاستئذان، فضلًا عن الحرام في نزول الصورة

‏سُبحان الله وبحمدِه سُبحان الله العظيم

ممكن لو فيه نصيحة ليا أو اقتراح تقوله على أكونت صراحة أو الآسك
https://sarahah.top/u/uchihaislam
ولو فيه حاجة محتاجة رد منّي هرد عليها في نفس التطبيق، مش هنا، وياريت معدش حد يبعت رسالة مدح ليا أو لأي حد عمومًا غير أصحابه وحبايبه

الحلال والحرام بيُقاس بقال الله سبحانه وقال الرسول صلى الله عليه وسلم، مش بيُقاس بعدد الجمهور "المحترم" المؤيِّد.

والفعل الحرام هيفضل حرام حتى لو لقيته صادر من الشيخ الفلاني على صفحته، أو لقيته موجود في لِبس زوجة الداعية الفلاني في الشارع، أو صورة جماعية مختلطة فيها شخص بتثق في دينه