يا رب الناس اللي كل كلامها عن الجواز والتعدد تتجوز
الموضوع بقى رخم أوي الهزار في الجواز والهزار في التعدد، ودمه تقيل، ولا بيضحك ولا نيلة، مش فاهم أيه الهدف من استهلاك المجهود في الكلام عن احتياجك للجواز أو كوميكاتك عن التعدد

اللهم وصلًا بمن يَصِلنا بك، وقطعًا عمَّن يقطعنا عنك

من كتر ما بقيت بشيل أي حد عندي بينزل صورته مع الشجرة أو نويل، بقيت بحس إن محدش بقى بيتصور "من اللي عارفين حكمها"
لحد ما لقيت معيد ملوش لزمة، بنقعد نمجِّد فيه طول السنة عشان بيعرف يحفظنا المنهج وننجح، ينزل صورته وهو لابس الزعبوط الأهبل في صورة هبلة كدا
وصورة المعيد أو الدكتور بتقع تمامًا لو شوفته "سيمب" مع زميلاته، أو متصور مع شجرة في آخر السنة

أي واحدة بتحضر أفراح أو أي حاجة مشابهه، وهي عارفه إنه حرام، حتى لو لابسة لبس شرعي ونقاب، اغسل أيدك منها، وعد مش هتفيدك بشيء، وعيوبها أكبر بكتير من أي ميزة هتشوفها، إلا أن تتوب

اللبس الواسع مش هيفيدك بشيء، لو كان على سبيل الشياكة والموضة، لأنه في أقرب موضة وتريند مخالف للبس الشرعي، هتتجه له
الحجاب عبادة، وأي افتكاسات في أي عبادة لمواكبة البيئة المحيطة والجو العام؛ العبادة هتبوظ تدريجيًا
لإما تظبط لها تفكيرها وتسمع كلامك في الحلال، لإما فكك منها، حتى لو كانت أكتر بنت في البلد لبسها واسع

الجاكيت الجينز بكره جدًا سواء لبسه ولد أو بنت، وبالذات البنت مهما كان واسع
وكذلك الجاكيت الكات بكره جدًا سواء لولد أو بنت
يا رب يختفوا

(وجعلوا لله أندادًا ليضلوا عن سبيله قل تمتعوا فإن مصيركم إلى النار)

(كلوا وتمتعوا قليلًا إنكم مجرمون)

(والذين كفروا يتمتعون ويأكلون كما تأكل الأنعام والنار مثوى لهم)

(وجعل لله أندادًا ليضل عن سبيله قل تمتع بكفرك قليلًا إنك من أصحاب النار)

(ذرهم يأكلوا ويتمتعوا ويلههم الأمل فسوف يعلمون)

(أفرأيت إن متعناهم سنين
ثم جاءهم ما كانوا يوعدون
ما أغنى عنهم ما كانوا يُمتَّعون)
.

يا رب ننجح

أنا معدتش بتصور صور جماعية حتى لو فرحة أو عزومة أو أي شيء، وبدون ما أقول سبب عادي جداً
ولا بيبقى شكلي وحش ولا حد بيزن عليا آجي ولا حاجة، علاقات مريحة كل واحد على راحته
عشان لما تيجي بنت تجرّب بتعملها لو أصحابها لبسهم لبس حرام أو حاطين زينة حرام، وتقولهم مش عايزه اتصور، فده شيء طبيعي وعادي، مفيهوش إحراج ولا كسوف
ولكن الأفضل طبعاً تقولها ظبطي لبسك وحالك، لأن لو هي كانت في شغل اليونيفورم بتاعه عباية واسعة، مكنتش هتتردد تلبسها، ولو فيه شغل إجباري فيه تغطية الوجه بماسك أو خلافه، مكنتش هتتردد وفي داهية الروج والزينة وأي حاجة
فمفيش مجال للكسوف أو الاحراج
ومفيش مجال يتقال دي فتنة كبيرة، لأنها بتدوب في ثواني قدام الشغل، والشغل كمان في أحيان كتير بيكون إنها بتشغل وقت فراغها مبيكونش الشغل شيء إجباري بيساعدها على المعيشة!
وربنا الهادي

لا إله إلا الله!

يا سلام لو الناس تبعد الايموشن والأقواس وعلامات التنصيص ") :)) والحاجات دي من جمب الآيات والأحاديث والأذكار
حاسس الكلام هيبقى أفضل والمعانى هتبقى أوضح، والشكل حتّى هيبقى مريح للعين

من مشاكل دور الديزاين في توصيف الآيات القرآنية على أشكال بيانية وسلالم وكلمة ظاهرة وكلمة مخفية والشغل العيّان ده، إن الناس أول ما بتشوف الآية (الديزاين) بتقول: واااو جميلة، عشان "الديزاين" حلو، مش عشان الآية حلوة، أو خدت بالها من معنى خفي!
وبقيت بتحس غصب عنك إن لو حد كتب: الحمد لله، وبس، وواحد تاني كتب الحمد لله وجمبها قلوب كتير، وواحد كتب الحمد لله بصيغة من صيغ السنَّة، هيبقى بالنسبة لك اللي حاطت جمبها قلوب هو أكتر واحد فرحان فيهم أو أكتر واحد بيحمد ربنا،
وغيرها

كده كده مش بحب الحاجات دي خالص تتحط جمب كلام مقدَّس، حتى لو مش بتعمل حاجة

تقريبًا مفيش بنت هتوافق تصور شخص مع أزازة خمرة مقفولة، حتى لو لمجرد إن شكل الإزازة عاجبه
ظنًّا منها إنه حرام تصور شخص مع إزازة خمرة
لكن عادي جدًّا تلاقيها ماسكة الموبايل بتصور صاحبتها اللي لابسة لبس حرام! أو متزينة بزينة حرام!
فضلًا عن أنها تتصور معاها!

ولو فعلًا فيه بنت في مخيلتها إن هي هترفض رفض تام تصور صاحبتها مع الخمرة، لكن تصور صاحبتها وهي مش لابسة لبس شرعي أو متزينة، عادي!
تخاف على نفسها لأن ممكن يكون سبب رفضها لصورة الخمرة هو سبب مجتمعي وليس سبب ديني
وعلى كدا أي موضوع بالنسبة للبنت حرام قطعي، مع انتشاره هتعمله بمنتهى السهولة، بل وكمان هتبرهن على حِلُّه

أنا قلت قبل كدا إن الشباب بينها وبين بعضها لو واحد جه اتصور مع واحد لابس سلسلة أو ماسك سيجارة أو أي حاجة غلط عاملها، بيقوله مش هتصور معاك غير لما تشيل الحاجات دي، وعادي جدًّا
ده كمان بخلاف اللي لو واحد جه يصور صاحبه ويسأله: هتنزل الصورة دي عليها أغنية في استوري ولا لأ!

وعلى الجانب الآخر في عالم البنات الموازي وتحت شعار عشان متتكسفش أو محرجهاش وجبر الخواطر البنت بتصور صاحبتها وهي واقعة في حرام من لبس أو زينة!

لو كان حد متخيل إن الكلام اللي بقوله أفورة، فهو للأسف موهوم
عامل زي اللي بيشوف الناس كلها مش بتذاكر وبيتفاجئ ساعة النتيجة كله ناجح ما عدا هو
ففعلًا فيه عدد كبير من الناس بيعزلوا الهبل ده، وفيه أكتر منهم أشد من كدا، وأكثر استمساكًا بعدم المشاركة في الحرام، أو إعانة صاحبه على فعل الحرام
أما موضوع جبر الخواطر على حساب الدين ده، فأنت الغلبان الوحيد اللي واقع فيه!

ديزاين الخطوبة اللي بيبقى الاسمين متداخلين في بعض ده، واللي في أوقات كتير بتبقى مش عارف تقرأ الاسمين اللي مكتوبين، غير لو أنت كنت عارف الاسم قبلها، ديزاين رخم وتعبان، معرفش ليه في اتجاه سائد له، مع إن البساطة والوضوح في الحاجات دي أحلى وأشيك بكتير

مقياس حبك للشخص إنك بتزعل لما بتشوفه منزِّل حاجة غلط أو بيعمل حاجة غلط، وبتتضايق لو مش عارف توصله المعلومة
لكن موضوع أنك تسيبه يغلط براحته عشان العلاقة متتوترش، ده مصلحة صحوبية ملهاش علاقة بالحب؛ والله لا حب دنيوي ولا حب ديني

ليه دايمًا الناس بتحكي وتنزِّل مشاكلها في الشغل؟
مش بيحصل أي حاجة كويسة خالص؟
في أي يوم من أيام الشغل؟
أنك مكمِّل في الشغل وفيه حاجة بتشغلك يوميًا عن الفراغ، وحاجة مصدر رزق ليك ده مش حاجة كويسة؟
طب يوم القبض ده مش يوم كويس ويوم نعمة عليك؟
ليه دايمًا تصدير إن الشغل كله مشاكل! وأنت بسبب كونك سوبر مان قادر تتحدَّى كل المشاكل دي بدون أي استفاده!
ده حتى المرتب اللي أنت بتقبضه بتزود عليه عشان تعرف تروَّح!
أمال بتشتغل ليه؟ بتتصدق عليهم!

خلي بالك عشان النعمة ممكن تروح منك

اللهم إنا نسألك لذَّة النظر إلى وجهك الأكرم في فردوسك الأعلى خالدين في رضوانك الأكبر أبدًا

طريقة الكلام في خطبة الجمعة غير طريقة الكلام في الدرس العادي، غير طريقة الكلام كتابةً في كتاب، غير طريقة الكتابة على الفيس، غير طريقة الكلام بشكل شخصي
فمش كل مقولة لشيخ أو عالم نقدر نحطها بكل سهولة على الميديا، عشان ساعات بتقل قيمتها، أو بيُتَهم الشيخ بقلّة فقهه

أيه المشكلة لو واحد صاحبك نزّل ستوري محتواه حرام، أو نزّل بوست محتواه حرام، إنك تبعتله رسالة إن الكلام ده حرام والأفضل تشيله؟
أيه المشكلة تعمل كدا؟
بدون زعل ولا دخول في نقاشات فقهية ولا مشاكل وخناقات
أنت هتبعت الرسالة ومش لازم تستنى رد، ولو كان رد مش كويس وده النادر، عادي ضريبة سهلة

من أكبر مشاكل الاستوري اللي محتواه حرام صور بنات مش لابسة لبس شرعي أو أغاني أو مقاطع من فيلم أو غيبة أو شتيمة أو كُفران مستمر للنعم أو شكوى مستمرة من الأقدار وخلافه..
إنها بتُنشئ حالة من التعايش مع الحرام ده، أصل: عادي ما كل الناس بتكتب كدا/ ما كل الناس بتنزل الحاجات دي/ ما كل الناس بتعمل الحرام ده، فمش مشكلة!
والسبب إن حالياً فيه حرام منتشر وفيه حرام خفي، إن الحرام الخفي لو حد فعله بشكل علني الناس هتنكر عليه، ده السبب الوحيد،

عشان كدا مع الوقت الحرام العلني هيبقى "عادي" والحرام الخفي هيبقى علني والمشاكل هتكتر
ففي الوقت ده حاول ميبقاش اسمك من الناس الراضية بالحرام وساكته، فضلًا أنك تكون مساهم في انتشاره بالمساهمة فيه وتقول: كل الناس بتغلط وكل الناس بتعمل كدا!