الناس اللي بيتقال عليهم محترمين ومؤدبين في عالم موازي، لو كانوا صحابي كنت زماني مبلكهم والله، من كمية الحرام اللي بينزلوه يومياً
تقريباً بيوصفوا المحترم بإنه محترم وملتزم على حسب ملامح وشّه!
وطبعاً رضا أصحابهم أهم من دينهم وصلاحه، فبيخافوا يشيلوهم عشان ميتقمصوش، وفي داهية بقى الدين اللي بينسحب بالتدريج!

أي واحدة عاملة أكونت على الانستجرام، فهي حاطة نفسها في ركن ضيق جدًّا، هيبقى واجب عليها تنصح كل واحدة منزله صورة مش بحجاب شرعي، أو متزينة، وبعدين تشيلها من عندها عشان تنكر المنكر بأيديها وفي استطاعتها وبدون مفاسد
عشان كثرة تعرّضها للصور دي، هيقل من دينها وسترها مع الوقت، ولو مش هيقلل فهو غلط تتفرج على حرام

بيقولك:
الفيلم ده بدون مشاهد خارجة، فعادي تشوفه!

المشاهد الخارجة هي:
مشاهد فيها اختلاط بين راجل وست غير محارم
مشاهد فيها كشف عورة الست أو عورة الراجل
وعورة الست كلها، أو كلها ما عدا وجهها وكفَّها
مشاهد فيها أغاني
مشاهد فيها رقص
مشاهد فيها كذب لإضحاك الناس
مشاهد فيها تريقة على شعائر دينية
مشاهد فيها تزوير للتاريخ
وخلافه

لكن لو تقصد بالمشاهد الخارجة مشهد من مشاهد مقدمات الزنا، فدة مش مشاهد خارجة، ده فُجر

فلو فيه فيلم بدون مشاهدة خارجة عن تعاليم الدين، اتفرج عليه مفيش مشكلة

مهما كان شكلي أو فعلي فأنا واخد بفرضية اللحية، زي ما واخد بفرضية النقاب
وكل واحد وظروفه، بس الظروف مش هتغير من الحكم، وربنا يعين الجميع على عبادته على الوجه الذي يرضاه، ويتقبله

أنا ضد أي بوست بيقول: قلل سوشيال ميديا، أو اقفل الميديا، عشان المشاكل اللي بتيجي منها وخلافه
ربنا يرحم ويبارك في المشايخ اللي مهتمة بالميديا ومخصصة مقدار من الوقت للإجابة على أسئلة الناس وشرح المسائل الفقهية، والفتاوى المعاصرة ليهم
يا رب بارك في أوقاتهم وبارك فيهم

ما كل مجال في الدنيا فيه جزء كويس وجزء وحش، اشمعنا بنيجي عند الميديا ونقول نقفلها عشان عيوبها كتير! ما أنت لو خدت بأسباب تقليل عيوبها ومشاكلها، مش هتحس إن ليها مشاكل أصلًا

أما لو أنت عايز تتفرغ للعبادة فده شيء تاني خاص بيك لواحدك، لأن الدعوة إلى الله وتعليم الناس الدين من خلال الميديا من أعظم العبادات!

أكبر ميدان في العالم فيه ناس مجتمعة، وأكبر ميدان فيه ناس فعلًا عايزه تعرف وتتعلم وتسأل والمشايخ تجاوبها، ليه ببساطة يتقال: اقفل يا شيخ ميديا بلا وجع دماغ!!
وجع دماغ في تعليم دين ربنا !
حتى لو هيجيلك منه مشاكل أو وجع دماغ أو خلافه، طب ما أيه المشكلة؟ ما ده الطبيعي

ولا هو وجع الدماغ والمشاكل لو في الشغل عادي، لكن لو في العلم والتعلم يبقى بناقص نعتزلها؟

الميديا لا غنى عنها، ولا غنى عن وجود مشايخ ومفتيين يسمعوا للناس ويشرحوا ليهم ويجاوبوا على أسئلتهم، حتى لو فيه أوقات الفراغ، والكل عنده أوقات فراغ

لكن الاعتزال ده! قمة الغلط

أي حد لسه محترم ومش بيستخدم موضوع التعدد في الهزار، أو يستخدم أي ابتلاء يحصل في الهزار، أو يصنع منه كوميكات، فهو شخص على دماغي، وبخلاف كدا، بيحط نفسه في موقف محرج وبيقلل من قيمته وسط الناس

الأمر بالمعروف والنهي عن المنكر غايتك الأولى منه مش السعي في إصلاح العالم، ولكن السعي في إصلاح نفسك بدايةً والنجاة بها

- هو من أهم الأسباب في ثباتك

- وربنا قال: ولتكن منكم أمة يدعون إلى الخير ويأمرون بالمعروف وينهون عن المنكر وأولئك هم المفلحون

- وقال: وإذ قالت أمة منهم لم تعظون قوما الله مهلكهم أو معذبهم عذابًا شديدًا قالوا معذرة إلى ربكم ولعلهم يتقون

- قال رسول الله صلى الله عليه وسلم: (لتأمرنَّ بالمعروف، ولتنهون عن المنكر، أو ليوشكن الله أن يبعث عليكم عذابًا من عنده، ثم تدعونه فلا يستجيب لكم) !

قبل النصيحة ادعي للشخص المنصوح بالهداية، وبعد النصيحة ادعيله بالهداية، خليك كريم مع حبايبك والمسلمين بالغيب

الله الواسع، والإسلام جامعنا، اوعى تفكر بأنانية وبُخل
ومتخليش النصيحة "تقضية واجب" أو نظام "ترييح ضمير"

اللي البنت بتقول عليه فتنة صعبة، وتكليف إلهي صعب جدًّا على النفس، ولازم أنفذه بخطوات مينفعش أعمله علطول لأنه محتاج مجاهدة كبيرة

بيكون أسهل شيء على نفس البنت في تركه تماماً، لو كان شرط لشغلها !

واللي البنت بترفضه وتنكره من أفعال حرام من بنات مشاهير على الميديا
بتقبله لو اللي عمله شخصية بتحبها وكمان بتهنّي صحابها لو عملوه!

عشان متحسش بالتناقض، تشوف فعلًا هي ممتنعة عن الحرام بسبب إنه حرام، ولا على حسب دين البيئة المحيطة هي ماشية!
لأن إحساس التناقض ده مع الوقت بيُفضي لفعل الحرام

نيتك في الأعمال عامل مهم لزيادة إيمانك، وفي ثباتك، وأحرى للقبول عند الله، ومن الاستجابة من الناس

يا رب الناس اللي كل كلامها عن الجواز والتعدد تتجوز
الموضوع بقى رخم أوي الهزار في الجواز والهزار في التعدد، ودمه تقيل، ولا بيضحك ولا نيلة، مش فاهم أيه الهدف من استهلاك المجهود في الكلام عن احتياجك للجواز أو كوميكاتك عن التعدد

اللهم وصلًا بمن يَصِلنا بك، وقطعًا عمَّن يقطعنا عنك

من كتر ما بقيت بشيل أي حد عندي بينزل صورته مع الشجرة أو نويل، بقيت بحس إن محدش بقى بيتصور "من اللي عارفين حكمها"
لحد ما لقيت معيد ملوش لزمة، بنقعد نمجِّد فيه طول السنة عشان بيعرف يحفظنا المنهج وننجح، ينزل صورته وهو لابس الزعبوط الأهبل في صورة هبلة كدا
وصورة المعيد أو الدكتور بتقع تمامًا لو شوفته "سيمب" مع زميلاته، أو متصور مع شجرة في آخر السنة

أي واحدة بتحضر أفراح أو أي حاجة مشابهه، وهي عارفه إنه حرام، حتى لو لابسة لبس شرعي ونقاب، اغسل أيدك منها، وعد مش هتفيدك بشيء، وعيوبها أكبر بكتير من أي ميزة هتشوفها، إلا أن تتوب

اللبس الواسع مش هيفيدك بشيء، لو كان على سبيل الشياكة والموضة، لأنه في أقرب موضة وتريند مخالف للبس الشرعي، هتتجه له
الحجاب عبادة، وأي افتكاسات في أي عبادة لمواكبة البيئة المحيطة والجو العام؛ العبادة هتبوظ تدريجيًا
لإما تظبط لها تفكيرها وتسمع كلامك في الحلال، لإما فكك منها، حتى لو كانت أكتر بنت في البلد لبسها واسع

الجاكيت الجينز بكره جدًا سواء لبسه ولد أو بنت، وبالذات البنت مهما كان واسع
وكذلك الجاكيت الكات بكره جدًا سواء لولد أو بنت
يا رب يختفوا

(وجعلوا لله أندادًا ليضلوا عن سبيله قل تمتعوا فإن مصيركم إلى النار)

(كلوا وتمتعوا قليلًا إنكم مجرمون)

(والذين كفروا يتمتعون ويأكلون كما تأكل الأنعام والنار مثوى لهم)

(وجعل لله أندادًا ليضل عن سبيله قل تمتع بكفرك قليلًا إنك من أصحاب النار)

(ذرهم يأكلوا ويتمتعوا ويلههم الأمل فسوف يعلمون)

(أفرأيت إن متعناهم سنين
ثم جاءهم ما كانوا يوعدون
ما أغنى عنهم ما كانوا يُمتَّعون)
.

يا رب ننجح

أنا معدتش بتصور صور جماعية حتى لو فرحة أو عزومة أو أي شيء، وبدون ما أقول سبب عادي جداً
ولا بيبقى شكلي وحش ولا حد بيزن عليا آجي ولا حاجة، علاقات مريحة كل واحد على راحته
عشان لما تيجي بنت تجرّب بتعملها لو أصحابها لبسهم لبس حرام أو حاطين زينة حرام، وتقولهم مش عايزه اتصور، فده شيء طبيعي وعادي، مفيهوش إحراج ولا كسوف
ولكن الأفضل طبعاً تقولها ظبطي لبسك وحالك، لأن لو هي كانت في شغل اليونيفورم بتاعه عباية واسعة، مكنتش هتتردد تلبسها، ولو فيه شغل إجباري فيه تغطية الوجه بماسك أو خلافه، مكنتش هتتردد وفي داهية الروج والزينة وأي حاجة
فمفيش مجال للكسوف أو الاحراج
ومفيش مجال يتقال دي فتنة كبيرة، لأنها بتدوب في ثواني قدام الشغل، والشغل كمان في أحيان كتير بيكون إنها بتشغل وقت فراغها مبيكونش الشغل شيء إجباري بيساعدها على المعيشة!
وربنا الهادي

لا إله إلا الله!

يا سلام لو الناس تبعد الايموشن والأقواس وعلامات التنصيص ") :)) والحاجات دي من جمب الآيات والأحاديث والأذكار
حاسس الكلام هيبقى أفضل والمعانى هتبقى أوضح، والشكل حتّى هيبقى مريح للعين